Sport
O‘zbekiston terma jamoasining tarixiy uchrashuvi 9 qavatli bino balandligida katta ekranda namoyish etiladi
5 iyun kuni Abu-Dabida o‘tadigan Futbol bo‘yicha JCh-2026 saralash bosqichi doirasidagi BAA–O‘zbekiston o‘yini Toshkent markazida, O‘zbekiston Milliy kutubxonasi old maydonida katta ekranda namoyish etiladi.
Shuningdek, 10 iyun kuni ham ushbu manzilda O‘zbekiston–Qatar o‘yini namoyish etiladi. Ommaviy tadbirlar nafaqat futbol tomoshasini, balki ochiq osmon ostidagi konsert dasturi va motivatsion shoularni ham o‘z ichiga oladi.
Ommaviy tadbir Toshkent shahar hokimligi tashabbusi bilan hukumat ko‘magida o‘tkazilmoqda. Unga kirish bepul bo‘lib, 16 yoshdan 40 yoshga bo‘lgan yoshlar Telegramʼda @land_uzbot orqali ro‘yxatdan o‘tib, unda ishtirok etishi mumkin. 5 iyunda tadbir 19:00 dan boshlanadi.
O‘zbekiston futbol assotsiatsiyasi bilan hamkorlikda amalga oshirilayotgan loyihaning barcha xarajatlari Kapitalbank, Uzum va Ucell kompaniyalari tomonidan to‘liq moliyalashtirilmoqda. Ushbu kompaniyalar O‘zbekistonda inson kapitali va iste’dodlarni rag‘batlantirishni o‘z ijtimoiy mas’uliyatining muhim qismi deb hisoblaydi.
Tadbirlarda 100 mingdan ortiq yoshlar, jumladan, Toshkent shahrida yashovchi va unda mehmon bo‘lib turgan minglab futbol ixlosmandlari, jamoatchilik faollari, sport sohasi va kreativ sanoat vakillari, jurnalist, bloger va inflyuyenserlar ishtirok etishi kutilmoqda.
Kun.uz ushbu tadbirda axborot hamkori sifatida ishtirok etmoqda.
“O‘zbekiston – iste’dodlar zamini” yoshlar harakatning asosiy maqsadi –O‘zbekiston milliy terma jamoasini qo‘llab-quvvatlash orqali yoshlarni umumiy vatanparvarlik g‘oyasi ostida birlashtirish, ularga katta maqsadlar sari intilishga rag‘bat berish. Harakat Toshkent shahrida o‘tkaziladigan shu kabi tadbirlarning yillik dasturini o‘z ichiga oladi.
Eslatib o‘tamiz O‘zbekiston terma jamoasi o‘z tarixida birinchi marta JCh yo‘llanmasini qo‘lga kiritishga yaqin turibdi. Buning uchun Timur Kapadze jamoasi BAA bilan durang o‘ynashi yoki o‘z uyida Qatar terma jamoasini mag‘lub etishi kifoya.
Bugun Abu-Dabida BAA–O‘zbekiston o‘yini uchun chiptalar sotuvga chiqarildi va qisqa muddatda ularning barchasi sotib tugatildi.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
