Sport
O‘rtoqlik o‘yinlari foydali bo‘ldi – Ismoilov intizomdagi kamchiliklar, hujumchi muammosi va raqiblar haqida
Futbol bo‘yicha O‘zbekiston U-17 jamoasining jahon chempionatidagi ishtirokiga sanoqli kunlar qoldi. Mundial oldidan jamoa bosh murabbiyi Islombek Ismoilov matbuot anjumanida qatnashib, o‘rtoqlik o‘yinlarida olingan xulosalar va JCh uchun rejalari haqida gapirdi.
{Yii::t(}
O’tkazib yuborish 6s
O’tkazib yuborish
17 oktyabr kuni Milliy futbol markazida O‘zbekiston U-17 jamoasi bosh murabbiyi Islombek Ismoilov va futbolchi Azizbek Erimbetov ishtirokida matbuot anjumani o‘tkazildi. Dastlab Ismoilov Turkiya bilan o‘yinda qiziqqonlik ortidan olingan sariq kartochkalarga to‘xtaldi. U bunday xatolar katta o‘yinlarda pand bermasligi uchun alohida ishlanayotganini aytdi.
“Endi bu narsa ko‘proq mentalitet bilan bog‘liq. Sababi biz qiziqqon xalqmiz. Bu narsa qonimizda bor. Lekin buning ustida futbolchilar bilan juda ko‘p ishlarni amalga oshiryapmiz. Aynan o‘sha Osiyo chempionatidan keyin o‘yin holatlari qaytadan ko‘rib chiqilgan va har tomondan futbolchilarga tushuntirish ishlari olib borilgan.
Endi 17 yosh – bu o‘tish davri hisoblanadi, qiyin hozirgi holatda. Shunga qaramasdan, har bitta o‘rtoqlik uchrashuvlaridan keyin ham buning ustida tinimsiz ishlarni amalga oshiryapmiz. Hattoki mashg‘ulotlarda ham kimdir oddiy sariq kartochka olsa, unga jarimalar qo‘llaganmiz.
Endi qo‘ldan kelgancha hamma ishlar amalga oshirilyapti. Yana musobaqaga yaqin vaqt qolganda, ularning ustida bir qator tushuntirish ishlarini olib boramiz. O‘ylaymanki, endi bu safar unaqa qo‘pol xatolar bo‘lmaydi”, deydi Ismoilov.
U o‘rtoqlik o‘yinlari foydali bo‘lganini qayd etgan.
“Bu o‘rtoqlik uchrashuvida biz ikkala o‘yinda (Turkiya o‘smirlariga qarshi o‘yinlar) ikki xil taktikani ko‘zdan kechirdik. Birinchi o‘yinda 4-2-2-2 sxemasini, ko‘proq o‘sha maydon markazi orqali o‘ynash taktikasini ko‘rib chiqdik. Buning uchun bizda futbolchilar yetarli darajada edi. Shuning uchun hujumchisiz o‘ynadik, ko‘proq yarimhimoyachilarga imkoniyat berdik. Futbolchilar imkon darajasida bu narsalarni bajarishga harakat qilishdi va birinchi o‘yindan keyin tahlil qildik.
Ikkinchi o‘yinda esa, odatiy 4-3-3 sxemasiga qaytdik. Ikki xil taassurot qoldirdi. O‘ziga yarasha plyus-minus tomonlari bor. Umuman, bu o‘yindan asosiy maqsad – o‘sha yakuniy qarorni qabul qilishimiz uchun futbolchilarga baho berishimiz kerak edi. Deyarli 90 foizga o‘sha futbolchilardan jahon chempionatiga borishi kerak bo‘lgan 21 talik tarkib bo‘yicha qaror qabul qildik, desam ham bo‘ladi. O‘ylaymanki, bu o‘yinlar jamoa foydasiga ishladi”, deydi murabbiy.
Ismoilov Turkiyaga qarshi bahsda futbolchilar JCh oldidan o‘zini ayaganini ham qo‘shimcha qildi.
“Turkiya borini berib o‘ynadi. Xuddi oxirgi o‘yinini o‘ynayotgandek”, deydi u.
Murabbiy hujumchi Nurbek Sarsenbayev uchta o‘yinga diskvalifikatsiya qilingan bo‘lsa-da, u turnirga olib ketish imkoniyatini istisno etmayapti.
“Sarsenbayevga keladigan bo‘lsak, albatta, bu hozirgi kunda og‘riqli nuqta bo‘lib turibdi. Nurbek jamoa uchun juda ko‘p foydasi tekkan futbolchi. Biz buning ustida juda ko‘p bosh qotirdik va bir qancha hujumchilarga imkoniyat berdik. Afsuski, hozirgi holatda ko‘p imkoniyat berilgan futbolchilar terma jamoa darajasida emas. Shuning uchun Nurbekning borish-bormasligi to‘g‘risida hali baribir yakuniy qaror qabul qilingani yo‘q. Lekin musobaqa davomida bizga umuman yordam bermaydigan futbolchidan ko‘ra, guruh o‘yinlaridan keyin bizga baribir Nurbekning yordami tegadi. Albatta, guruhdan chiqamiz, Xudo xohlasa. Bunga jamoaning salohiyati yetadi.
Bundan tashqari, bizda hujum chizig‘ida hozir Azizbek Abdumo‘minov ham bemalol harakat qila oladi. Sayfiddin Sodiqov ham hujum markazida o‘ynaydi. Hujum markazida kim o‘ynashi muammo emas. Sababi biz qo‘yayotgan o‘yin uslubida aynan qaysidir pozitsiyada o‘ynaydigan futbolchi emas, balki barcha pozitsiyalarda harakat qila oladigan futbolchilarni jamlashga harakat qilyapmiz”, deydi Ismoilov.
U jamoaning jismoniy holati haqidagi savolga ham javob qaytardi.
“Jismoniy holatga keladigan bo‘lsak, umuman, hozir mana zamonaviy futbolda, Yevropada futbolchilarning o‘sha yoshligidan boshlab alohida e’tibor beriladigan jihat bo‘lib qoldi. O‘FA tomonidan aynan jismoniy tayyorgarlik bo‘yicha barcha sharoitlar yaratib berilmoqda va murabbiylar ham tinimsiz shuning ustida ish olib borishyapti. Osiyo chempionatidan oldin ko‘pchilik jamoaning jismoniy holatiga e’tiroz bildirgandi. Lekin musobaqa ko‘rsatdiki, jamoa o‘yindan o‘yinga qo‘sha oldi. Hamma jamoalar, ko‘p jamoalar o‘yindan o‘yinga orqaga ketsa, bizning jamoa aksincha, o‘yindan o‘yinga o‘zidagi salohiyatini ko‘rsata oldi. Va biz shu tayyorgarlikni andoza sifatida ushlab qolganmiz. Jahon chempionatiga ham bu narsani mukammallashtirilgan holatda tayyorgarlik ko‘rdik.
Endi bu yerda har xil omillar bor. Birinchidan, yosh futbolchi, o‘zgarayotgan organizm. Qaysidir futbolchida, masalan, 17 yoshda organizm boshqa holatda bo‘ladi, qaysi biridadir boshqa holat. Shu narsalarni ham hisobga olib boryapmiz. Doimiy ravishda futbolchilarni monitoring qilib boramiz. Buning ustida ko‘p ishlaymiz. O‘ylaymanki, jahon chempionatida ham jamoa o‘sha Osiyo kubogida bo‘lgandek, o‘zining jismoniy holatining eng baland darajasini ko‘rsata oladi”, deydi murabbiy.
Ismoilov shogirdlarining o‘rtoqlik o‘yinlarida ko‘rsatgan natijasidan ko‘ngli to‘lmaganini qayd etdi.
“Murabbiy sifatida o‘zi hech qachon, hech qaysi o‘yindan ko‘nglim to‘lmaydi. Chunki biz doim ko‘proq xato ko‘zi bilan qarashga harakat qilamiz. Sababi, maqsadimiz jamoa o‘yinini yanada rivojlantirish, takomillashtirish. Shuning uchun hali jamoaning o‘yinidan to‘liq ko‘nglim to‘lgani yo‘q”, deydi u.
U guruhdagi raqiblar haqidagi savolga ham javob berdi.
“Endi jahon chempionatida oson raqibning o‘zi bo‘lmaydi. Masalan, Paragvayni oladigan bo‘lsak, o‘zining qit’asida Argentinani, Chilini yutgan, yaxshi jamoa. Panama ham xuddi shunaqa, yaxshi jismoniy tayyorgarlikka ega jamoa. Irlandiya ham jismoniy jihatdan ancha kuchli, Yevropa jamoasi. Lekin uchala jamoaga qarshi biz o‘ylab qo‘ygan rejalarimiz bor. Xudo xohlasa, uchala jamoani ham mag‘lub etishga harakat qilamiz”, deydi u.
Islombek Ismoilov tadbir yakunida O‘FA tomonidan aniq chempionlik vazifasi belgilanmagani, vaziyatga real qarash kerakligini bildirdi.
“Lekin biz jamoa sifatida bu narsa uchun harakat qilamiz. Shuning uchun rahbariyat tomonidan avvalgi natijalardan ko‘ra yaxshiroq natijalar qayd etish oldimizga vazifa qilib qo‘yilgan”, deydi u.
Eslatib o‘tamiz, o‘smirlar o‘rtasidagi jahon chempionati 3-27 noyabr kunlarida Qatarda bo‘lib o‘tadi.
Xalqaro futbol assotsiatsiyalari federatsiyasi (FIFA) prezidenti Janni Infantino so‘nggi jahon chempionati doirasida o‘ziga qarshi bildirilgan tanqidlarga munosabat bildirdi.
Ijtimoiy tarmoqda post chop etgan Infantino AQSh, Meksika va Kanada mezbonligida o‘tgan jahon chempionatini (JCh) “dunyodagi eng yaxshi shou” deb atagan va hakamlik, intizomiy choralar hamda boshqa mojarolarga oid e’tirozlarni rad etgan.
Jahondagi millionlab muxlislar qiziqishini uyg‘otgan JCh mojarolar, bahsli qarorlar bilan ham e’tiborga tushdi.
“Aslida hakamlarning bahsli qarorlari yoki “g‘alati” intizomiy hukmlar, masalan, ehtimoliy yanglish qizil yoki sariq kartochkalar va ayrim vaziyatlarda futbolchilarni chetlatmaslik haqidagi keyingi qarorlar oddiy amaliyot hisoblanadi va dunyoning eng yirik ligalarining ayrimlarida keng qabul qilinadi”, – deya FIFAning bahsli qarorlarini oqlashga uringan Janni Infantino.
FIFA rahbari, shuningdek, Vashington va Tehron harbiy ziddiyatiga qaramay, Eron terma jamoasi JChda qatnashganini yutuq o‘laroq sanagan. Ammo u Eron terma jamoasi AQShga viza olish va kelib-ketishda duch kelgan qiyinchiliklar masalasiga to‘xtalmagan.
Tahlilchilarga ko‘ra, JCh-2026 siyosatchilar ko‘p marta aralashgan va aralashishga uringan musobaqa sifatida tarixga kirdi.
Chempionat arafasidayoq AQSh prezidentining maxsus vakili Paolo Zampolli JChda Eron o‘rniga Italiya terma jamoasini tiqishtirishga urindi.
AQSh termasi jamoasi vakili Folarin Balogan bilan bog‘liq mojaro esa siyosat va sport sarhadlari qorishib ketganini ko‘rsatdi.
Balogan Bosniya va Gersegovinaga qarshi uchrashuvda qizil kartochka olgani uchun Belgiya bilan o‘yinni o‘tkazib yuborishi kerak edi. Biroq FIFA Intizom qo‘mitasi FIFA Intizom kodeksining 27-moddasiga tayanib, diskvalifikatsiya ijrosini bir yillik sinov muddatiga almashtirdi. Ma’lum bo‘lishicha, AQSh prezidenti Donald Tramp Balogan masalasini qayta ko‘rib chiqish yuzasidan FIFA rahbariyatiga murojaat qilgani ortidan shunday qaror qabul qilingan.
Buning ortidan Yevropa futbol uyushmalari ittifoqi (UYeFA) Baloganga nisbatan qabul qilingan qaror yuzasidan FIFAni keskin tanqid qildi. UYeFA tarqatgan bayonotda mazkur qaror “misli ko‘rilmagan, tushuntirib bo‘lmaydigan va asossiz” deb baholandi.
Norvegiya futbol assotsiatsiyasi rahbariyati esa ushbu holat bo‘yicha Tramp ustidan shikoyat qilish niyatini bildirdi.
Bu yilgi JChning kumush medali sovrindori Argentina termasi jamoasini FIFA musobaqalaridan chetlatishga doir petitsiya rekord darajada – 23,3 millionta ovoz yig‘di.
Ko‘p million sonli muxlislar FIFA rahbariyati va hakamlar jamoasini mashhur futbolchi Lionel Messiga yon bosishda aybladi. Xususan, Lotin Amerikasi davlatining Shveysariya hamda Misrga qarshi o‘yinlardagi g‘alabalari shubha uyg‘otgan.
Darvoqe, final o‘yinidan keyin ham Messi jamoadoshlari mojaroli holatni yuzaga keltirdi. Xususan, futbolchilar Nauel Molina, Leandro Paredes va Tyago Almada hamda Argentina termasi bosh murabbiyi yordamchisi Roberto Ayala Ispaniya futbolchilariga nisbatan kuch ishlatgan.
Kuchli norozilik va tarmoqlardagi bosim ortidan FIFA Argentina futbolchilarining xatti-harakati tekshirilishini ma’lum qildi.
«Manchester City» O‘zbekiston terma jamoasi himoyachisi Abduqodir Husanov bilan yangi besh yillik shartnoma imzolaganini rasman e’lon qildi. Yangi kelishuvga ko‘ra, futbolchi klub safida 2031 yilgacha to‘p suradi.
Husanov Angliya klubiga 2025 yil yanvar oyida kelib qo‘shilgan bo‘lib, qisqa vaqt ichida jamoaning asosiy futbolchilaridan biriga aylandi. 2025/26 yilgi mavsumning ikkinchi yarmida u Mark Geyi bilan markaziy himoyada ishonchli tandem hosil qilib, jamoaning so‘nggi 19 ta APL uchrashuvidan 16 tasida maydonga tushdi. Shuningdek, Angliya kubogi va Liga kubogi finallarida ham muhim rol o‘ynadi, deyiladi klub matbuot xizmatining xabarida.
Ta’kidlanishicha, 22 yoshli himoyachi «Manchester City» safida atigi 47 ta o‘yin o‘tkazganiga qaramay, yuqori tezligi va samarali himoyaviy harakatlari bilan Premyer-liganing eng istiqbolli yosh futbolchilaridan biri sifatida e’tirof etildi. U, shuningdek, klubning 2025/26 yilgi mavsumdagi eng yaxshi futbolchisi sovrini uchun nomzodlar uchligidan ham joy olgan edi.
Bundan tashqari, Husanov O‘zbekiston terma jamoasining tarixda ilk bor Jahon chempionatiga yo‘llanma olishi yo‘lida ham muhim hissa qo‘shdi.
Yangi shartnoma imzolangach, Abduqodir Husanov klubda qolayotganidan mamnunligini bildirib, «Manchester City»da har kuni rivojlanayotganini ta’kidladi.
«Bu men va oilam uchun juda quvonchli kun. Manchesterga kelganimdan buyon har bir lahzadan zavq oldim va futbolchi sifatida ko‘p narsani o‘rgandim. Endi yangi vazifam — Enso Mareska va uning murabbiylar shtabiga o‘zimni namoyon etish hamda jamoada muntazam o‘rin egallash. Muxlislarga qo‘llab-quvvatlagani uchun rahmat. Endi bor e’tiborim klub muvaffaqiyati uchun bor kuchimni berishga qaratilgan», — dedi Husanov.
Klubning futbol bo‘yicha direktori Ugu Viana esa Husanovning Angliyaga kelganidan buyon rivojlanishidan mamnun ekanini bildirib, uning jahon darajasidagi markaziy himoyachiga aylanishi uchun barcha imkoniyatlarga ega ekanini ta’kidladi. Uning so‘zlariga ko‘ra, 22 yoshli futbolchining eng yaxshi yillari hali oldinda va u Enso Mareskaning rejalarida muhim o‘rin tutadi.
Kelasi mundiallardan biri Fransiya va Germaniya o‘tishi mumkin.
«Le Parisien» nashrining xabar berishicha, Fransiya va Germaniya Jahon chempionatini birgalikda o‘tkazishni ko‘rib chiqmoqda.
Ikki mamlakat 2038 yoki 2042-yilgi Jahon chempionatini o‘tkazish uchun qo‘shma ariza topshirishi kutilyapti. 2030-yilgi Jahon chempionati Ispaniya, Portugaliya va Marokashda bo‘lib o‘tadi.
Ochilish o‘yinlari Urugvay, Argentina va Paragvayda bo‘lib o‘tadi. 2034-yilgi Jahon chempionati Saudiya Arabistonida bo‘lib o‘tadi.
Yaponiyada o‘tkaziladigan Aichi-Nagoya-2026 yozgi Osiyo o‘yinlarining jamoaviy sport turlariga qur’a tashlash marosimi bo‘lib o‘tmoqda.
Unga ko‘ra, futbol bo‘yicha O‘zbekiston U23 terma jamoasi S guruhida Vetnam, Filippin va Kuvayt bilan bahs olib boradigan bo‘ldi.
A guruhi: Yaponiya, Tailand, Qirg‘iz Respublikasi, Gongkong
B guruhi: Xitoy, BAA, Eron, KXDR
C guruhi: Vetnam, O‘zbekiston, Filippin, Kuveyt
D guruhi: Koreya Respublikasi, Saudiya Arabistoni, Qatar.
Bugun tunda Ispaniya va Argentina keyingi to‘rt yillikning eng kuchli jamoasini aniqlaydi.
JCh-2026 finali
Ispaniya – Argentina
20 iyulga o‘tar kechasi, 00.00. New York/New Jersey Stadium (Nyu York)
Shunchaki eng kuchlilar
Bunday afishadagi final jahon chempionatiga ideal darajada mos keladi, chunki bu sayyoraning eng yaxshi ikki jamoasi o‘rtasidagi murosasiz to‘qnashuvdir.
Ispaniya – Yevropaning amaldagi chempioni, Argentina – amaldagi jahon chempioni va Amerika kubogi sohibi. Bundan tashqari, aynan shu ikki jamoa hozirda FIFA reytingida eng yuqori ikki o‘rinni egallab turibdi: janubiy amerikaliklar birinchi, yevropaliklar ikkinchi o‘rinda. Bu reyting yuritilishi boshlangan 1992 yildan buyon jahon chempionati finalida uning ikki yetakchisi o‘zaro o‘ynamoqda. Qo‘shimcha intriga – bunga qadar biror marta turnir arafasida reytingda birinchi o‘rinda bo‘lgan jamoa yakunda chempionlikni qo‘lga kiritmagan, shunday ekan, bu oqshom Argentina statistikaga ham qarshi borishiga to‘g‘ri keladi.
Bundan tashqari, tarixda birinchi bor jahon birinchiligining hal qiluvchi o‘yinida ikki qit’a chempionlari to‘qnashadi. Shu yil martida Ispaniya va Argentina Qatarda bitta o‘yindan iborat turnir – Finalissimada o‘zaro kuch sinashishi rejalashtirilgandi. Ammo AQSh va Isroil Eronga qarshi urush boshlagach, bu o‘yin bekor qilingandi. Endi bu ikki jamoa baribir yanada muhimroq sovrin uchun kuch sinashadigan bo‘ldi.
Leo va u cho‘miltirgan Lamin
Argentina finalga chiqishi bilan ijtimoiy tarmoqlarda 2007 yilgi fotosurat virusdek tarqaldi, unda 20 yoshli Lionel Messi tog‘orada Lamin Yamal ism-sharifli chaqaloqni cho‘miltirayotgani aks etgan – o‘shanda u hali yarim yosh ham emasdi. Bu 2008 yilgi xayriya taqvimi uchun olingan real kartinadir.
Tabiiyki, o‘shanda hech kim bu ikki shaxs 19 yil o‘tib jahon chempionati finalida bir-biriga qarshi o‘ynashini tasavvur qila olmasdi. Qolaversa, Yamal va Messi o‘ynayotgan jamoalarning yo‘li shu vaqtgacha kesishmagandi, shunday ekan, bu ularning ilk uchrashuvi bo‘ladi.
Bu dueldagi asosiy intriga fotosuratda ham emas. Leo uchun bu o‘yin katta ehtimol bilan, jahon chempionatlaridagi so‘nggi o‘yin bo‘lib qoladi. Argentinalik futbolchi – hozirgi asrning dastlabki choragida futbolning asosiy ramzlaridan biri. Lamin esa, aksincha, yangi davr yuzlaridan va «Barselona»da Messining vorisi. Pafosli qilib aytganda, buni ikki davr to‘qnashuvi deyish ham mumkin.
Yamalning yangi rekordi
13 iyul kuni Yamal 19 yoshga to‘ldi. U endi tarixdagi eng yosh jahon chempioni bo‘la olmaydi – bu titul 1958 yilgi mundialda 17 yoshda bo‘lgan Peleda qolmoqda. U jahon birinchiliklarida oltin medal qo‘lga kiritgan eng yosh yevropalik ham bo‘la olmaydi – italiyalik Juzeppe Bergomi 1982 yil 18 yoshida chempion bo‘lgandi.
Ammo Yamal yanada yuqoriroq darajadagi maqomga erishishi mumkin – jahon va Yevropa chempionatlarida g‘olib chiqqan eng yosh futbolchi. Ikki yil oldin ushbu vinger Ispaniya milliy jamoasi bilan 17 yoshga kirganini nishonlaganidan bir kun o‘tib qit’a chempionligini ham nishonlagandi, bugun tunda esa u yana bir katta sovrinni qo‘lga kiritishi mumkin. Bungacha hech kim 19 yoshida ham Yevropa va ham jahon chempionatlarida g‘olib bo‘la olmagan.
De la Fuente yoki Skaloni: ulardan biri tarixga kiradi
Ispaniya milliy jamoasi safida ikki yil oldin Yevro g‘olibi bo‘lgan 16 nafar futbolchi bor. Ammo asosiy intriga murabbiylar shtabida. Luis de la Fuente jamoani 2022 yilgi jahon chempionatidan keyin qabul qilib olib, avvaliga qit’a birinchiligida g‘olib bo‘ldi, endi navbat jahon birinchiligiga.
Agar jamoasi bu finalda ham g‘alaba qozonsa, unda de la Fuente Yevropa chempionati va jahon chempionatida g‘olib chiqqan uchinchi murabbiyga aylanadi. Bu borada birinchisi Helmut Shen bo‘lgandi, u bu natijaga GFR termasi bilan erishgan (Yevro-1972, JCh-1974), ikkinchisi esa – ispanlarning sobiq ustozi Visente del Boskedir (JCh-2010, Yevro-2012).
Argentina milliy jamoasi ustozi Lionel Skaloni ham tarixga kirish imkoniga ega. U allaqachon Amerika kubogida ikki bor g‘alaba qozondi, Finalissimada g‘olib chiqdi, eng asosiysi, jahon chempioni bo‘lishga ham ulgurgan. Hozircha o‘z jamoasi bilan ikki bor jahon chempioni bo‘lgan yagona murabbiy – 1934 va 1938 yillarda o‘z vatani jamoasini jahon chempioniga aylantirgan italiyalik Vittorio Potsso bo‘lib qolmoqda. Boshqa so‘z bilan aytganda, Skaloni qariyb bir asrdan buyon hech kim erisha olmayotgan natijaga erishishi mumkin.
17 nafar argentinalikda ikki karra jahon chempioni bo‘lish imkoni bor
Argentina milliy jamoasi tarkibi so‘nggi to‘rt yilda deyarli o‘zgarmadi. Qaydnomadagi 26 futbolchidan 17 nafari Qatardagi mundialda ham jahon chempioni bo‘lgandi. Yakshanba oqshomidagi o‘yinda ular ikki karra jahon chempioni bo‘lish va ikki karra JCh chempioni bo‘lgan futbolchilar ro‘yxatini jiddiy darajada kengaytirish imkoniga ega – hozirda bunday ro‘yxatda 20 kishi bor. Bular asosan brazillar va italyanlardir, ammo u yerda bitta argentinalik – 1978 va 1986 yilgi mundiallarda Argentina milliy jamoasi safida bo‘lgan Daniel Passarella ham bor.
Pele esa uch karra jahon chempioni bo‘lishga muvaffaq bo‘lgan yagona futbolchidir. Ammo agar bu tunda Argentina g‘alaba qozonadigan bo‘lsa, uning rekordini ham keyingi mundiallarda qaysidir argentinalik takrorlashi mumkin bo‘ladi.
Rodri tarixga kirishi mumkin
Shu vaqtgacha faqat o‘n kishi «Oltin to‘p», jahon chempionati va Chempionlar ligasi/Yevropa chempionlari kubogini qo‘lga kiritgan:
Bobbi Charlton
Gerd Myuller
Frans Bekkenbauer
Paolo Rossi
Zinedin Zidan
Rivaldo
Ronaldinio
Kaka
Lionel Messi
Usmon Dembele
Ko‘rinib turibdiki, bu ro‘yxatda ispanlar yo‘q, shunday ekan, Rodri birinchisi bo‘lishi mumkin. 30 yoshli ushbu yarimhimoyachi 2023 yilda «Manchester Siti» bilan Chempionlar ligasi g‘olibi bo‘lgan, 2024 yilda «Oltin to‘p» uchun kurashda Vinisiusni ortda qoldirgan. Jahon chempionatida ham g‘olib chiqish uning nomini abadiylashtiradi.
Ispaniya rekordga qarab ketmoqda
Yarimfinalda Fransiya ustidan qozonilgan g‘alaba shuni anglatadiki, Ispaniya milliy jamoasi mag‘lubiyatsiz o‘yinlar seriyasini 37 o‘yinga yetkazgan. Luis de la Fuente shogirdlari oxirgi bor 2024 yil 22 mart kuni Kolumbiyaga qarshi o‘rtoqlik uchrashuvida yutqazgandi (0:1). O‘tgan yil Millatlar ligasi finalida Portugaliyaga penaltilar seriyasida boy berilgan o‘yin bu o‘rinda mag‘lubiyat deb hisoblanmaydi, chunki o‘yinning asosiy vaqti durang hisob bilan tugagan.
37 o‘yin – 2018 yildan 2021 yilga qadar bo‘lgan oraliqda umuman yutqazmagan Italiya milliy jamoasi rekordini takrorlashdir. Agar jahon chempionati finalida Ispaniya g‘alaba qozonsa yoki o‘yinni penaltilar seriyasigacha olib borsa, unda «Qizil furiya» jahon rekordini yangilaydi.
Kim eng yaxshi to‘purar bo‘ladi?
Bu safargi mundialda to‘purarlar o‘rtasida fantastik poyga kuzatilib, bir vaqtning o‘zida bir necha yulduzlar birinchilik uchun kurash olib borishdi. Uchinchi o‘rin uchun Fransiya va Angliya o‘rtasida kechgan bahsdan (4:6) keyin to‘purarlar ro‘yxati (gol+pas tizimida) quyidagi ko‘rinishda:
Kilian Mbappe (Fransiya) – 10+4
Lionel Messi (Argentina) – 8+4
Jud Bellinghem (Angliya) – 7+1
Erling Holand (Norvegiya) – 7+0
Usmon Dembele (Fransiya) – 6+2
Harri Keyn (Angliya) – 6+1
Mikel Oyyarsabal (Ispaniya) – 5+1
Gollar soni teng bo‘lib qolgan taqdirda «Oltin butsa» golli uzatmalar soni ko‘p bo‘lgan futbolchiga beriladi. Uchinchi o‘rin uchun kechgan bahsda Mbappe 2 gol urdi va bir golga uzatma berib, poygada yaqqol birinchi o‘ringa chiqib oldi. Hozirda faqat Messi va Oyyarsabalda unga yetib olish uchun nazariy imkoniyat mavjud.
Uni quvib o‘tish uchun Messi finalda yoki het-trik qayd etishi yoki 2 gol va 1 golli uzatma muallifi bo‘lishi talab etiladi. Ispaniyalik hujumchida esa amalda imkoniyat yo‘q: u finalda kamida beshta gol urishiga hech kim ishonmaydi.
Qolaversa, Messi JCh tarixidagi eng yaxshi to‘purar maqomini ham boy bergan: o‘tgan tundagi o‘yindan keyin Mbappe 22 gol bilan birinchi o‘ringa chiqib oldi, Messi undan bitta kam gol urgan.
«Oltin to‘p»ni kim oladi?
Yana bir muhim masala – «Oltin to‘p»ni kim qabul qilishi. Gap har ikki sovrin haqida ketmoqda – jahon chempionatining eng yaxshi futbolchisiga beriladigan va France Football tomonidan har yili topshiriladigan sovrinlar.
E’tiborli jihati, Messi 39 yoshida ham ushbu sovrinlar uchun real da’vogarlik qilmoqda. Yarimfinal o‘yinlaridan keyin argentinalik hujumchi ko‘p versiyalar bo‘yicha favoritga aylandi. Agar Argentina jahon chempioniga aylansa, uni turnirning eng yaxshi futbolchisi sifatida tan olmaslikning imkoni yo‘q. Agar Ispaniya g‘olib bo‘lsa, boshqa variantlar ham paydo bo‘ladi va ko‘p narsa final o‘yiniga bog‘liq.
Deputatlar kapital bozori bo‘yicha yangi qonun qabul qildi
TIV rahbari qator davlat elchilaridan ishonch yorliqlarini qabul qilib oldi
FIFA prezidenti o‘ziga qarshi tanqidlarga javob qaytardi
-
Dunyodan5 days ago
Ukraina armiyasining bosh qo‘mondoni almashtirildi.
-
Turk dunyosi5 days agoNYT hisoboti: Eronning ishonchli tahdidi Prezident Trampni Turkiyadagi havo kuchlari 1-ni almashtirishga undadi
-
Dunyodan1 day ago
Yaponiyalik ayollar 41 marta rekord o’rnatdilar
-
Iqtisodiyot1 day ago
Bank depozitlari bir yilda 118 trln so‘mga ko‘paydi
-
Iqtisodiyot3 days ago
Bir necha kun ko‘tarilgan dollar birdan keskin pastladi
-
Dunyodan4 days agoRossiya jinoiy javobgarlikka tortilgan muhojirlarga fuqarolikni rad etadi
-
Jamiyat3 hours agoIchimlik suvi narxlarini tasdiqlash vakolati Idoralararo tarif komissiyasiga o‘tkaziladi
-
Turk dunyosi4 days agoTurkiya inflyatsiya bilan kurashar ekan, Eron urushi lirani yangi bosim ostida qoldiradi