Surxondaryo viloyatida ekolog Aleksandr Fedin tomonidan barpo etilgan mashhur bog‘ni saqlab qolish va rivojlantirish maqsadida mazkur hudud Ekologiya va iqlim o‘zgarishi milliy qo‘mitasi tasarrufiga o‘tkaziladi. Shuningdek, bog‘ negizida jamoatchilik uchun ochiq ekologik park tashkil etilishi rejalashtirilmoqda.

Foto: Surxondaryo viloyati hokimligi

Bu haqda Ekologiya va iqlim o‘zgarishi milliy qo‘mitasi Aleksandr Fedinning salomatligi hamda u tomonidan yaratilgan bog‘ taqdiri bo‘yicha ijtimoiy tarmoqlarda tarqalgan xabarlar yuzasidan bergan rasmiy munosabatida ma’lum qildi.

Qayd etilishicha, mazkur masala qo‘mita tomonidan alohida nazoratga olingan. Hozirgi vaqtda Aleksandr Fedin Termiz shahridagi tez tibbiy yordam klinik shifoxonasiga joylashtirilgan bo‘lib, unga zarur tibbiy yordam ko‘rsatilmoqda. Shu bilan birga, uni munosib yashash sharoitlari bilan ta’minlash bo‘yicha amaliy ishlar olib borilmoqda.

Shuningdek, Aleksandr Fedinni Qo‘mita huzuridagi O‘rmon agentligi tizimiga ishga joylashtirish choralari ko‘rilishi ma’lum qilindi.

Rasmiy munosabatda ta’kidlanishicha, Aleksandr Fedinning mamlakat ekologiyasi va ko‘kalamzorlashtirish sohasiga qo‘shgan hissasi inobatga olinib, u barpo etgan bog‘ni saqlab qolish va rivojlantirish bo‘yicha alohida hujjat tayyorlanmoqda.

Unga muvofiq, mazkur hudud jamoatchilik uchun ochiq ekologik park sifatida tashkil etiladi hamda Ekologiya va iqlim o‘zgarishi milliy qo‘mitasi tasarrufiga o‘tkaziladi.

Kelgusida ushbu hudud negizida jamoatchilik bog‘i shakllantirilib, uning noyob tabiiy merosini asrab-avaylash va yanada boyitish bo‘yicha ishlar amalga oshirilishi rejalashtirilgan.

Source link

O‘zgidromet ma’lumotlariga ko‘ra, bugun O‘zbekistonda havo o‘zgaruvchan bo‘ladi, yog‘ingarchilik kutilmaydi, faqat Farg‘ona vodiysi viloyatlarining ayrim joylarida kunning ikkinchi yarmida qisqa muddatli yomg‘ir yog‘ishi, momaqaldiroq kuzatilishi mumkin. Shamol sharqdan 7-12 m/s tezlikda esadi, ba’zi joylarda 13-18 m/s gacha kuchayishi, ayrim joylarda chang-to‘zonlar bilan kuzatilishi mumkin. Harorat 30-35° bo‘ladi.

Toshkentda havo o‘zgaruvchan bo‘ladi, yog‘ingarchilik kutilmaydi. Shamol sharqdan 3-8 m/s tezlikda esadi, 10-12 m/s gacha kuchayishi, ayrim joylarda chang-to‘zonlar bilan kuzatilishi mumkin. Harorat 32-34° bo‘ladi.

Respublikaning tog‘ oldi va tog‘li hududlarida havo o‘zgaruvchan bo‘ladi, vaqti-vaqti bilan yomg‘ir yog‘adi, momaqaldiroq kuzatilishi mumkin. Shamol sharqdan 7-12 m/s tezlikda esadi, momaqaldiroq vaqtida 13-18 m/s gacha kuchayishi mumkin. Harorat 18-23° bo‘ladi.

Source link

Samarqand viloyatining Pastdarg‘om tumanidagi «Kichik Nayman» mahalla fuqarolar yig‘inida istiqomat qiluvchi bir guruh aholi nomidan «Xabar.uz» tahririyatiga murojaat kelib tushdi.

Unda jiddiy ijtimoiy muammolar, xususan, aholining kundalik turmush tarziga bevosita daxldor bo‘lgan suyultirilgan gaz ta’minotidagi uzilishlar bugungi kunda odamlarni og‘ir ahvolga solib qo‘ygani tilga olingan.

Murojaatda ta’kidlanishicha, mahalla aholisiga har 45 kunda yetkazib berilishi lozim bo‘lgan suyultirilgan gaz balonlari 106 kun deganda, ya’ni 3 oydan ziyod vaqt o‘tib yetib kelgan. Tartib bo‘yicha gaz balonlari o‘z vaqtida to‘ldirilmagani sababli, xonadonlardagi ikkita balon ham butunlay bo‘shab qolgan. Biroq «Pastdarg‘omtumangaz» xodimlari kelgan vaqtda aholining faqatgina bittadan gaz balonini almashtirib bergan, xolos. Navbatdagi ta’minot yana 100 kundan keyin kelishi inobatga olinsa, bitta gaz baloni xonadon ehtiyojlariga mutlaqo yetmasligi tayin.

Bunday uzoq muddatli uzilishlar, ayniqsa, ijtimoiy himoyaga muhtoj qatlam, yolg‘iz keksalar, nogironligi bo‘lgan shaxslar va yosh bolali oilalar uchun haqiqiy sinovga aylanmoqda. Tabiiy gaz yo‘qligi sababli, aholi qish mavsumi uchun g‘amlab qo‘ygan o‘tinlarini yoz kunlaridayoq o‘choqqa yoqishga majbur bo‘lyapti. Keksalarga issiq choy, yosh chaqaloqlarga kuniga bir necha bor sutli bo‘tqa (kasha) tayyorlash kerak bo‘lgan oilalar ayni damda juda qiynalmoqda, deyiladi.

Bundan tashqari, iste’molchilar «Pastdarg‘omtumangaz» xodimlarining xatti-harakatlaridan ham norozi bo‘lishmoqda. Ma’lum qilinishicha, xodimlar bir dona suyultirilgan gaz baloni uchun belgilangan 40 ming so‘m o‘rniga aholidan noqonuniy ravishda 45 ming so‘mdan pul yig‘ib olishmoqda. Kamiga, tarqatilayotgan gaz balonlarining aksariyati eski va me’yoridan kam to‘ldirilgan bo‘lib, ularni tortib ko‘rish uchun maxsus yuk mashinalarida bo‘lishi shart bo‘lgan o‘lchov tarozilari umuman ishlamaydi.

Eslatib o‘tamiz, xuddi shu mahalla aholisi 2026-yilning 18-fevralida ham gaz balonlari o‘z vaqtida yetkazilmayotganidan norozi bo‘lib tahririyatimizga murojaat yo‘llagandi. Qishdan chiqdik, bahor o‘tdi, yoz boshlanib ketdi — muammo o‘sha-o‘sha.

Aholining jiddiy e’tirozi va haqli noroziligiga sabab bo‘layotgan ushbu og‘ir vaziyat yuzasidan mutasaddi tashkilotlardan, xususan, viloyat va tuman gaz ta’minoti korxonalari hamda nazorat organlaridan tezkor amaliy choralar va rasmiy izoh kutib qolamiz.

Source link

Milliy statistika qo‘mitasi ma’lumotlariga ko‘ra, O‘zbekistonda, 2026-yilning 1-aprel holatiga, 1 kvadrat kilometr maydonga o‘rtacha 85,5 kishi to‘g‘ri kelmoqda.

Hududlar kesimida 1 km² ga to‘g‘ri keladigan aholi soni quyidagicha:

Toshkent shahri — 7 352,4 kishi

Andijon viloyati — 821,4 kishi

Farg‘ona viloyati — 627,8 kishi

Namangan viloyati — 430,9 kishi

Xorazm viloyati — 341,2 kishi

Samarqand viloyati — 262,1 kishi

Sirdaryo viloyati — 222,1 kishi

Toshkent viloyati — 209,6 kishi

Surxondaryo viloyati — 150,5 kishi

Qashqadaryo viloyati — 130,6 kishi

Jizzax viloyati — 74,3 kishi

Buxoro viloyati — 50,5 kishi

Qoraqalpog‘iston Respublikasi — 12,4 kishi

Navoiy viloyati — 10,2 kishi

Source link

Mamlakatimizda turizmni yangi bosqichga olib chiqishda mavjud muammolarni o‘rganish, sohaga yangi xalqaro tajribalarni joriy etish yuzasidan Turizm qo‘mitasi raisi A.Aqqulov rahbarligida sohada faoliyat ko‘rsatuvchi tadbirkorlik subyektlari ishtirokida navbatdagi ochiq muloqot tashkil etildi.

Uchrashuvda mamlakatimizdan xorijga sayohatga chiquvchi fuqarolarimiz hamda ichki turizm yo‘nalishida sayohat qilayotgan mahalliy sayyohlarning xavfsizligini ta’minlashda sug‘urta tizimining o‘rni, bu boradagi mavjud mexanizmlar samaradorligi va ularni yanada takomillashtirish masalalari atroflicha muhokama qilindi.

Tadbirda sug‘urta kompaniyalari, turoperatorlar, turagentliklar hamda O‘zbekiston Respublikasi Istiqbolli loyihalar milliy agentligi vakillari ishtirok etib, sayyohlarga taqdim etilayotgan sug‘urta xizmatlari, turistik paketlar tarkibidagi himoya mexanizmlari hamda xalqaro amaliyotda qo‘llanilayotgan ilg‘or yondashuvlar haqida fikr almashdilar.

Shuningdek, ishtirokchilar tomonidan turistlarning huquq va manfaatlarini himoya qilish, baxtsiz hodisalar, tibbiy holatlar yoki sayohat davomida yuzaga kelishi mumkin bo‘lgan boshqa kutilmagan vaziyatlarda sug‘urta xizmatlaridan foydalanish jarayonlarini soddalashtirish bo‘yicha takliflar bildirildi.

Turizm qo‘mitasi raisi A.Aqqulov o‘z so‘zida mamlakatimizda xavfsiz va barqaror turistik muhitni shakllantirish davlat siyosatining muhim yo‘nalishlaridan biri ekanini ta’kidlab, bu borada davlat idoralari, xususiy sektor va sug‘urta tashkilotlari o‘rtasidagi hamkorlikni yanada kuchaytirish zarurligini qayd etdi.

Uchrashuv yakunlariga ko‘ra, turistik sug‘urta xizmatlarini raqamlashtirish, onlayn sug‘urta polislarini rasmiylashtirish imkoniyatlarini kengaytirish, turistlarga axborot berish tizimini takomillashtirish hamda sohadagi normativ-huquqiy bazani xalqaro standartlar asosida takomillashtirish bo‘yicha takliflarni umumlashtirishga kelishib olindi.

Source link