Sport
«Oltin to‘p»ga da’vogarlar ro‘yxati e’lon qilindi
7 avgust kuni France Football jurnali 2025 yilgi «Oltin to‘p» uchun nomzodlarni e’lon qildi. Shuningdek, nashr «Kopa Trofi» (eng yaxshi yosh o‘yinchi), Yashin (eng yaxshi darvozabon) va Kruiff (eng yaxshi murabbiy) sovrinlariga da’vogarlar ro‘yxatini ham ochiqladi. G‘oliblar nomi 22 sentabr kuni Parijda ma’lum bo‘ladi.
«Oltin to‘p»
Nomzodlar 30 nafar futbolchidan iborat:
Usmon Dembele («PSJ», Fransiya)
Janluidji Donnarumma («PSJ», Italiya)
Jud Bellinghem («Real», Angliya)
Dezire Due («PSJ», Fransiya)
Denzel Dumfris («Inter», Niderlandiya)
Seru Girassi («Borussiya» Dortmund, Gvineya)
Erling Holand («Manchester Siti», Norvegiya)
Viktor Gyokeresh («Arsenal», Shvetsiya)
Ashraf Hakimi («PSJ», Marokash)
Harri Keyn («Bavariya», Angliya)
Xvicha Kvaratsxeliya («PSJ», Gurjiston)
Robert Levandovski («Barselona», Polsha)
Aleksis Makallister («Liverpul», Argentina)
Lautaro Martines («Inter», Argentina)
Skott Maktominey («Napoli», Shotlandiya)
Kilian Mbappe («Real», Fransiya)
Nunu Mendesh («PSJ», Portugaliya)
Joau Nevesh («PSJ», Portugaliya)
Pedri («Barselona», Ispaniya)
Koul Palmer («Chelsi», Angliya)
Maykl Olise («Bavariya», Fransiya)
Rafinya («Barselona», Braziliya)
Deklan Rays («Arsenal», Angliya)
Fabian Ruis («PSJ», Ispaniya)
Virjiyl van Deyk («Liverpul», Niderlandiya)
Vinisius Junior («Real», Braziliya)
Muhammad Saloh («Liverpul», Misr)
Florian Virs («Liverpul», Germaniya)
Vitinya («PSJ», Portugaliya)
Lamin Yamal («Barselona», Ispaniya).
Dembele – favorit
Ro‘yxatda eng ko‘p futbolchi «PSJ» vakillari – birdaniga 9 nafar. Buning ajablanadigan tomoni yo‘q, nima bo‘lganda ham ular yakunlangan mavsumda trebl qayd etib, asosiy triumfatorga aylanishdi. Tarixda faqat ikkinchi bor yakuniy ro‘yxatdagi 30 da’vogardan 9 nafari bir jamoadan bo‘lmoqda. 2018 yilda ham nomzodlarning qariyb uchdan bir qismi «Real» vakillari edi.
Top-30 ro‘yxatdagi yagona darvozabon ham Parijdan, ammo u taqdirlash marosimiga qadar ushbu klub a’zosi bo‘lib qolishi fakt emas. Donnarumma hozircha klubi bilan yangi shartnoma bo‘yicha kelishuvga erisha olmayapti.
«PSJ» hujum chizig‘i yetakchilaridan biri Usmon Dembeleni ko‘pchilik bukmekerlar «Oltin to‘p»ni qo‘lga kiritish uchun asosiy favorit sifatida ko‘rmoqda. Undan keyingi o‘rinlarda Yamal va Saloh. Ammo har qanday prognozga ehtiyotkorlik bilan yondashish lozim: o‘tgan mavsumda juda ko‘pchilik «Oltin to‘p»ni Vinisius olishini taxmin qilgandi, ammo yakunda Rodri g‘olib chiqdi.
«Manchester Siti» yarimhimoyachisi bu safar short-listga ham kirmadi: ispaniyalik futbolchi 2024 yil sentabrida og‘ir jarohat olgandi va faqat mavsum yakuniga kelib safga qaytdi.
«Kopa Trofi»
«Kopa Trofi» jahonning 21 yoshga to‘lmagan eng yaxshi futbolchisiga beriladi. 2024 yilda Yamal g‘olib chiqqandi. Bu safar nomzodlar ro‘yxati quyidagi 10 futbolchidan iborat:
Pau Kubarsi («Barselona», Ispaniya)
Ayyub Buaddi («Lill», Fransiya)
Estevao («Chelsi» / «Palmeyras», Braziliya)
Din Hausen («Real» / «Bornmut», Ispaniya)
Maylz Lyuis-Skelli («Arsenal», Angliya)
Rodrigo Mora («Portu», Portugaliya)
Lamin Yamal («Barselona», Ispaniya)
Dezire Due («PSJ», Fransiya)
Joau Nevesh («PSJ», Portugaliya)
Kenan Yildiz («Yuventus», Turkiya).
Yozda 18 yoshini nishonlagan Lamin bu sovrinni ikki marta qo‘lga kiritgan birinchi futbolchi bo‘lish uchun ajoyib imkoniyatga ega. U hali uzoq vaqt rekordlarni yangilashi mumkin.
Yashin nomidagi sovrin
Jahonning eng yaxshi darvozaboniga beriladigan Lev Yashin nomidagi mukofotni qatorasiga ikki yildan buyon Argentina milliy jamoasi va «Aston Villa» klubi posboni Emiliano Martines o‘ziniki qilib keladi. France Football bu safar ham uni nomzodlar ro‘yxatiga qo‘shgan:
Alisson («Liverpul», Braziliya)
Yassin Bunu («Al-Hilol», Marokash)
Lyuka Shevale («Lill», Fransiya)
Tibo Kurtua («Real», Belgiya)
Janluidji Donnarumma («PSJ», Italiya)
Emiliano Martines («Aston Villa», Argentina)
Yan Oblak («Atletiko», Sloveniya)
David Rayya («Arsenal», Ispaniya)
Mats Sels («Nottinghem Forest», Belgiya)
Yan Zommer («Inter», Shveytsariya).
Kruiff nomidagi sovrin
Bu sovrinni dunyoning eng yaxshi murabbiyi qo‘lga kiritadi. 2024 yilda bu sovrin Karlo Anchelottiga («Real») berilgandi, bu safar u nomzodlar qatorida yo‘q. France Football nomzodlar ro‘yxatiga quyidagi besh nafar murabbiyni kiritgan:
Luis Enrike («PSJ», Ispaniya)
Hans-Diter Flik («Barselona», Germaniya)
Antonio Konte («Napoli», Italiya)
Arne Slot («Liverpul», Niderlandiya)
Enso Mareska («Chelsi», Italiya).
Taqdirlash marosimi qachon va qayerda o‘tkaziladi?
«Oltin to‘p» taqdimoti tarixda to‘rtinchi marta kalendar yili emas, mavsum yakunlari bo‘yicha o‘tkaziladi. 2024 yil 1 avgustdan 2025 yil 31 iyulgacha bo‘lgan davr hisobga olinadi. Tantanali marosim 22 sentabr kuni – an’anaga ko‘ra, Parijning Shatle teatrida bo‘lib o‘tadi.
O‘tgan yili tashkilotchilar hakamlar hay’ati tarkibini qisqartirishgandi. Endilikda FIFA reytingining top-100 taligiga kirgan mamlakatlardan faqat 100 nafar jurnalist eng yaxshilar uchun ovoz berishi mumkin. Ilgari ovoz beruvchilar soni 170 nafargacha bo‘lgan. Bunday o‘zgarish France Football nashri tashabbusi bilan amalga oshirildi – bu qaror orqali mukofotning nufuzini oshirishi ko‘zlangan.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
