52 yoshli ispaniyalik mutaxassis O‘zbekiston futzal federatsiyasi bilan 2 yillik shartnomani imzoladi.

Foto: O‘zbekiston futzal federatsiyasi

Ispaniyalik taniqli mutaxassis Xose Mariya Mendes O‘zbekiston futzal milliy jamoasining yangi bosh murabbiyi etib tayinlandi, u bilan 2 yillik shartnoma imzolandi, deb xabar berdi O‘zbekiston futzal federatsiyasi.

Mendes muqaddam ikki bor O‘zbekiston milliy jamoasini boshqargan: dastlab 2011–2012 yillarda, so‘ng 2014–2017 yillarda. Uning rahbarligi ostida milliy jamoa 2016 yilgi Osiyo chempionatida kumush medalni qo‘lga kiritgan.

52 yoshli Xose Mariya Pazos Mendes — Pulpis 1974 yilda Ispaniyaning Lugo shahrida tug‘ilgan. Murabbiylik faoliyatini 1996 yilda boshlagan va “Lugo”, “Melilya”, “Kafe Kandelas Lugo”, “Valensiya”, Xorvatiyaning “Orkan”, shuningdek, “Barsel” klublarida ishlagan.

2008–2009 yillarda Tailand, 2010 yilda Vetnam milliy jamoasini boshqargan. Shundan so‘ng, uning O‘zbekiston bilan bog‘liq faoliyati boshlandi. Milliy jamoadan tashqari, 2016–2017 yillarda mamlakat chempioni “Ardus” klubida ham faoliyat yuritdi.

2019–2026 yillar davomida u Tailandda faoliyat olib bordi. 2023 yil qisqa muddat Xitoyning “Shenjyen” jamoasini boshqardi. Murabbiy sifatida ikki karra Osiyo kubogi vitse-chempioni, shuningdek, klublar o‘rtasidagi Osiyo chempionati hamda Osiyo kubok egalari kubogi g‘olibi bo‘lgan.

Source link

Bugun Yevropa Chempionlar Ligasida nimchorak final uchrashuvlari start oladi. Qur’a yana «Real» va «Manchester Siti»ni pley-offda to‘qnashtirgan, «PSJ»da «Chelsi»dan o‘tgan yozdagi mag‘lubiyat uchun qasos olish imkoni yuzaga kelgan. Bundan tashqari, «Liverpul» yana Istanbulga, «Barsa» yana Nyukaslga safar qiladi.

10 mart kuni Chempionlar ligasi 1/8 finalida dastlabki uchrashuvlar bo‘lib o‘tadi. Turnirning yangi formatida ham bu bosqichdan oldingi tartib saqlanib qolgan: 16 jamoa, har bir bosqichda ikkitadan o‘yin, hech qanday safardagi gol qoidasi yo‘q. Quyida sakkizta juftlikning keyingi bosqichga chiqish imkoniyatlari chamalab ko‘riladi.

«Galatasaroy» – «LIVeRPUL» (10 mart, 22:45. Zo‘r TV)

Imkoniyatlar: 35 foizga – 65 foiz

Stadionlardagi muhit, aura bo‘yicha eng zo‘r juftlik deb atash mumkin. «Rams Park» ham, «Enfild» ham muxlislarning performansi bo‘yicha Yevropada eng yaxshilaridan sanaladi. Mersisaydliklar uchun qur’adan oldingi ehtimoliy raqiblar orasida aynan «Galatasaroy» nisbatan osonroq raqib sifatida ko‘rilgan bo‘lishi mumkin, ammo aynan Istanbulda odatda mezbonlarni yengish juda qiyin. Dastlabki o‘yin Turkiyada bo‘lishi e’tiborga olinsa, Okan Buruk shogirdlari birinchi o‘yinda kerakli natijaga erishib, javob o‘yinida shu ustunlikni saqlashga harakat qilib o‘ynashi mumkin. Zero «Galatasaroy» tarkibidagi futbolchilarni «Enfild» bilan qo‘rqitib bo‘lmaydi – Sanches, Gundo‘g‘an, Torreyra, Lamina, Sane kabi futbolchilar APL futbolida yetarlicha tajriba to‘plab ulgurishgan.  

Jamoalar Chempionlar Ligasining joriy mavsumida guruh bosqichida ham to‘qnash kelgandi. «Galatasaroy» o‘z maydonida 1:0 hisobida ustun kelgan, yagona golni Viktor Osimhen penaltidan urgandi. Ammo bu o‘yin Slot jamoasidagi inqiroz davriga to‘g‘ri kelgandi, bugungi «Liverpul» esa nisbatan ancha tartibga kelib qoldi. Shu bilan birga, «Liverpul» hali «Galatasaroy»ga qarshi safar o‘yinlarida g‘alaba qozonmagan. 2001/02 yillar mavsumida Istanbulda 1:1 hisobi qayd etilgan va faqat safardagi gol qoidasi bo‘yicha inglizlar keyingi bosqichga chiqishgandi. 2006/07 yillar mavsumida esa jamoalar guruhda duch kelib, har ikki o‘yin 3:2 hisobida mezbon jamoa foydasiga hal bo‘lgan.

«Nyukasl» – «BARSeLONA» (11 martga o‘tar kechasi, 01:00. Zo‘r TV)

Imkoniyatlar: 45 ga – 55

Ushbu jamoalar ham kuzda, guruh bosqichi doirasida uchrashgandi. Angliyada bo‘lib o‘tgan o‘yinni Eddi Hau shogirdlari o‘ta faol boshlashgan, bir qator vaziyatlar yaratib, raqibni qiyin ahvolga solib qo‘yishgandi. Keyin esa Frenki de Yong – Pedri juftligi ishga tushdi – bu ikki futbolchi maydon markazini qo‘lga olib, o‘yinni «Barselona» uchun qulayroq, xotirjamroq ko‘rinishga olib kelishdi. Keyin esa Markus Reshford kerakli gollarni urib, ispanlarga g‘alaba keltirgandi.

Lekin Frenki de Yong fevral oyida jarohat oldi va «Nyukasl»ga qarshi ikki o‘yinni ham o‘tkazib yuboradi. Pedri esa endigina tiklandi va qisqa vaqtda optimal formaga kira olishi so‘roq ostida. «Barselona» oxirgi o‘yinlarda aynan markazni nazorat qilishga qiynalmoqda.

APL bahslarida kuchli beshlikdan 9 ochkoga ortda qolib ketgan va yagona umidi aynan Chempionlar Ligasi o‘yinlari bo‘lgan «Nyukasl» bu safar «Barselona»ga yetarlicha boshog‘riq bo‘lishi turgan gap. Gordon, Elanga, Vissa, Myorfi kabi tezkor futbolchilarga ega bo‘lgan inglizlar «Barselona»ning yuqori himoya uslubidan foydalanib qolishi mumkin.

Umuman, tarkib bo‘yicha albatta «Barselona» kuchliroq – qo‘pol xatolar, kutilmagan ssenariylar yuzaga kelmasa, kataloniyaliklar keyingi bosqichga o‘tishi mumkin.

«Atalanta» – «BAVARIYa» (11 martga o‘tar kechasi, 01:00)

Imkoniyatlar: 25 ga – 75

Italiya klublari ichida faqat «Atalanta» turnir pley-off bosqichiga chiqa oldi. Bergamoliklar o‘tish bosqichida Bundesliganing boshqa jamoasi – «Borussiya»ga qarshi birinchi o‘yinda 0:2 hisobida yutqazganiga qaramay, o‘z maydonida kambek amalga oshirib, ko‘pchilikning yoqimtoyiga aylanib ulgurishdi. Umuman, jamoa nemislarga qarshi ancha muvaffaqiyatli o‘ynay olishini avval ham isbotlagan. Ikki yil oldin butun mavsumni mag‘lubiyatsiz o‘tkazgan «Bayyer» ham Yevropa Ligasi finalida shu jamoaga qarshi o‘yinda seriyasini to‘xtatgandi.

Lekin «Bavariya»ga qarshi o‘yinda bunday muvaffaqiyatni takrorlash juda qiyin kechishi turgan gap. «Atalanta» o‘zinining eng yaxshi o‘yinlarini o‘tkazgan taqdirda ham ayni damda natijalar borasida Yevropaning eng yaxshi jamoasi bo‘lib turgan Vensani Kompani shogirdlari bir bosh yuqori. Buning ustiga myunxenliklar Bundesligada yetarlicha farq bilan peshqadamlik qilishmoqda va kerakli rotatsiyalarni amalga oshirib, bor e’tiborini aynan Chempionlar Ligasiga qaratish imkoniga ega.

«ATLeTIKO» – «Tottenhem» (11 martga o‘tar kechasi, 01:00)

Imkoniyatlar: 55 ga – 45

Har ikki jamoa ham futbol o‘ynashdan ko‘ra raqibga o‘yin bermaslik, uning ustun jihatlarini yo‘qqa chiqarishga usta, jismoniy kurashlarda o‘zini juda yaxshi his qiladi. So‘nggi yillarda «Atletiko» biroz tashabbuskor futbolga yuzlangan, «Tottenhem» esa muammolar girdobida qolayotgan bo‘lsa-da, bu juftlikdan har narsani kutish mumkin. Angliya chempionatida autsayderlar qatorida yurib ham, Chempionlar Ligasida kuchli sakkizlikka kirgani, umuman, o‘tgan yili ham xuddi shu rejimda Yevropa Ligasini yutgani e’tiborga olinsa, YeChLda umuman boshqacha «Tottenhem»ni ko‘rishimiz mumkin. Shu bilan birga, alohida o‘yinlarda «Atletiko»ning ham plankasi ancha yuqori bo‘lishiga ko‘p marta guvohi bo‘lganmiz.

Igor Tyudor va Diyego Simeone dueli – chiroyli kombinatsiyalar va hujumkor o‘yindan ko‘ra, qanday qilib raqibga xalaqit berilishi, o‘zini ham ayamasdan kurashni jonli tomosha qilishni xohlaydigan ixlosmandlar uchun ajoyib shou.

«Bayyer» – «ARSeNAL» (11 mart, 22:45. Zo‘r TV)

Imkoniyatlar: 30 ga – 70

Yengilmas jamoalar to‘qnashuvi. Bugungi tarkiblarga unchalik aloqador bo‘lmasa-da, har ikki jamoa milliy chempionatda mavsumni mag‘lubiyatsiz yakunlay olganlar klubiga a’zo hisoblanadi. «Arsenal» 2003/04 yillar mavsumida, «Bayyer» esa 2023/24 yillarda chempionatda biror marta ham yutqazmasdan chempion bo‘lishni uddalagan.

Ushbu juftlikda «Arsenal» yaqqol favorit. Taqvim ham Mikel Arteta nemislarga qarshi o‘yinlarga nisbatan qulay sharoitda tayyorgarlik ko‘rish uchun sharoit yaratdi. Birinchidan, «Arsenal» «Bayyer»ga qarshi ilk o‘yin oldidan APLda qiyin o‘yin o‘tkazishiga to‘g‘ri kelmadi, londonliklar shanba kuni uchinchi liga vakili «Mansfild Taun»ga qarshi oson o‘yin o‘tkazdi va murabbiy katta rotatsiya qilish imkoniga ega bo‘ldi. Endi Leverkuzenga jamoa jismonan tayyor holatda borishi mumkin. Javob o‘yini borasida esa APL londonliklarga yon bosdi – «Everton»ga qarshi uchrashuv avvaliga yakshanba kuniga belgilangan edi, ammo «Bayyer»ga qarshi o‘yin seshanba kunga to‘g‘ri kelgani sababli, APL rahbariyati o‘yinni shanbaga ko‘chirib berdi.

«Arsenal» so‘nggi o‘yinlarda unchalik barqaror emasligi haqida mulohazalar ko‘p bo‘lsa-da, «Bayyer»da muammolar yanada ko‘proq deyish mumkin. Londonlik keyingi bosqichga o‘tishda jiddiy muammoga duch kelishi dargumon.

«Real» – «Manchester Siti» (12 martga o‘tar kechasi, 01:00. Zo‘r TV)

Imkoniyatlar: 50 ga – 50

Chempionlar Ligasi klassikasiga aylanib bo‘lgan to‘qnashuv. So‘nggi yetti mavsumning oltitasida jamoalar turli bosqichlarda o‘zaro kuch sinashishiga to‘g‘ri kelgan. Faqat 2020/21 yillar mavsumida muxlislar ushbu jamoalar to‘qnashuviga guvoh bo‘lmagan. Ammo buni joriy mavsumda guruh bosqichidagi o‘zaro o‘yin kompensatsiya qilgandi, deyish mumkin. O‘shanda Pep Gvardiola shogirdlari Madriddan 2:1 hisobidagi g‘alaba bilan qaytgandi.

Ammo o‘tgan qisqa vaqt ichida ham ko‘p narsa o‘zgarib ketdi. «Real» Habi Alonsoni iste’foga chiqarib, Alvaro Arbeloani yangi bosh murabbiy etib tayinladi, «Manchester Siti» esa yanvarning o‘zida ikkita katta transferga qo‘l urdi: Semenyo va Geyi bilan jamoa yanada kuchaydi. Semenyo guruh bosqichi uchun qaydnomaga kiritilmagani tufayli, jamoa a’zosi bo‘lsa-da, Chempionlar Ligasi o‘yinlarida qatnasha olmagandi. U aynan «Real»ga qarshi o‘yinda debyut qilishi kutilmoqda.

O‘zbekistonlik himoyachi Abduqodir Husanov ham aynan «Real»ga qarshi ushbu turnirdagi ilk o‘yinini o‘tkazgan va katta taassurot qoldirgandi, Gvardiola bu safar ham unga ishonch bildirishi mumkin.

Shu paytgacha jamoalar ko‘p marta to‘qnash kelgan bo‘lishsa-da, bu safar ilk bor o‘yinlar kartinasini taxmin qilish qiyin. Avvallari, Gvardiola jamoasi o‘z uslubiga muvofiq tarzda to‘pni nazorat qilishga urinar, «Real» esa individual mahorat va tezkor qarshi hujumlarga tayanar edi. Ammo yangilangan «Manchester Siti» biroz boshqacha, raqibga moslashib ham o‘ynashni o‘rganib olgan. O‘z navbatida, Arbeloa boshqaruvi davridagi «Real»ning ham aniq uslubini tasavvur qilish qiyin. Xullas, muxlislarni hakam hushtagi chalingandan keyingina jamoalarning rejasi namoyon bo‘ladigan, shuningdek, o‘yin davomida bir necha marta muvozanat o‘zgarishi mumkin bo‘lgan bahslar kutib turibdi.

«PSJ» – «Chelsi» (12 martga o‘tar kechasi, 01:00)

Imkoniyatlar: 50 ga –50

O‘n yillar oldin ushbu jamoalar to‘qnashuvi ham Chempionlar Ligasining doimiy tomoshasiga aylanib ketgandi. Demba Baning so‘nggi daqiqalardagi golidan so‘ng maydon bo‘ylab yugurgani, 2015 yildagi olovli qo‘shimcha bo‘limlar ko‘pchilikning yodida bo‘lsa kerak. Oxirgi marta esa raqiblar o‘tgan yozda klublar o‘rtasidagi jahon chempionati finalida to‘qnash kelishgandi. O‘yin kutilmaganda «Chelsi»ning 3:0 hisobidagi g‘alabasi bilan yakunlangandi. Demak, parijliklarda qasos olish imkoni tug‘ildi.

Umuman, londonliklarning sobiq ustozi Enso Mareska katta o‘yinlarga xos tayyorlanish borasida ko‘p bor o‘zini ko‘rsatgan, agar hozir ham ushbu mutaxassis ishlayotgan bo‘lganida «Chelsi»ning imkoniyatlari biroz yuqoriroq baholanishi ham mumkin edi. Liam Rosenior kelganidan buyon London klubi top-raqiblardan faqat «Arsenal»ga qarshi uchta o‘yin o‘tkazdi va uchalasida ham yutqazdi. Qolgan raqiblar bilan o‘yinlarda esa asosan birinchi raqamda o‘ynadi va yutqazmadi. «PSJ» Rosenior uchun yana bir jiddiy sinov bo‘ladi.

Albatta, o‘tgan yilning oktyabrida «PSJ» – «Strasbur» bahsini ham unutmaslik kerak – o‘shanda «Strasbur» ustozi bo‘lgan Rosenior Enrike uchun yaxshigina syurpriz tayyorlagan va 3:3 hisobida durang o‘ynab ketgandi. Mehmonlar atigi o‘yinning 29 foiz vaqtida to‘pga egalik qilib ham vaziyatlar borasida raqibga bo‘sh kelmagan, 3:1 hisobida oldinda borgandi ham. Demak, Roseniordan bu safar ham nimadir kutish mumkin.

O‘z navbatida, «PSJ»ning holati ham biroz mavhum. O‘tgan mavsumda jamoa guruh bosqichi masalasini faqat so‘nggi turlardagi qiyin g‘alabalar orqali hal qilgan va shundan keyin asta-sekinlik bilan kuchayib borgandi. Fransiya chempionati ancha yengil ekanidan kelib chiqilsa, aynan shunday tonus jamoa uchun juda kerak. Ammo bu safar «PSJ» guruh bosqichini nisbatan oson o‘tkazdi, hatto o‘tish bosqichida ham ichki chempionatdagi tanishi «Monako» raqib bo‘ldi. Enrikening bu mavsum uchun tajribalari hali davom etayotgani, guruhning hal qiluvchi o‘yinida «Nyukasl»ni mag‘lub eta olmagani, «Monako»ga qarshi ikki o‘yinda ham qiynalgani, ichki chempionatda ham ishlar joyida emasligidan kelib chiqilsa, «PSJ» va «Chelsi»ning imkoniyatlarini teng baholash mumkin.

«Budyo/Glimt» – «Sporting» (12 martga o‘tar kechasi, 01:00)

Imkoniyatlar: 50 ga – 50

Qur’a Chempionlar Ligasi ushbu mavsumining ikkita eng yorqin sensatsiyasi jamoalarini o‘zaro raqib qildi. «Budyo/Glimt» guruh bosqichida «Manchester Siti» va «Atletiko»ni, o‘tish bosqichida esa «Inter»ni mag‘lubiyatga uchratib, barchaning e’tiborini o‘ziga qaratgandi. «Sporting» esa umumiy guruh bosqichida kuchli sakkizlikka kira oldi. Portugaliyaliklar so‘nggi turda Bilbaoda kechgan o‘yinda mezbonlar darvozasiga 90+4-daqiqada gol urib, «Real»ni kuchli sakkizlikdan tushirib yuborgandi. Undan oldingi turda turda esa «PSJ» ustidan g‘alaba qozonilgan.

Shu yergacha yetib kelishning o‘zi katta g‘alaba, chorakfinal esa har ikki jamoa uchun ertakning davomi, ajoyib mukofot bo‘ladi. Demak, nimchorak finalning eng ochiq, hujumkor va erkin o‘yinlari aynan shu juftlik ishtirokida bo‘lib o‘tishi kutilmoqda. 

Source link

Avstraliyada o‘tgan xalqaro turnirda eronlik futbolchi qizlar milliy madhiyani kuylashdan bosh tortdi. Ularning besh nafari boshpana so‘radi va Avstraliya hukumat idoralari ularni himoya ostiga oldi.

Vatanida milliy madhiyani kuylashdan bosh tortgani uchun ta’qibga uchrash xavfi ostida qolgan Eron ayollar terma jamoasining besh nafar futbolchisi Avstraliyada boshpana oladi. Bu haqda 10 mart, seshanba kuni Avstraliya ichki ishlar vaziri Toni Berk ma’lum qildi. Uning aytishicha, u bir kun avval kechqurun ularning humanitar viza olish uchun bergan arizalarini imzolagan. Shuningdek, u Avstraliya politsiyasi sportchi qizlarni “xavfsiz joy”ga joylashtirganini aytdi.

9 mart, dushanba kuni AQSh prezidenti Donald Tramp omma oldida Avstraliyani eronlik futbolchi qizlarga boshpana berishga chaqirdi. Ular Isroil va AQShning Erondagi urushi boshlanishidan oldin Osiyo kubogida ishtirok etish uchun Avstraliyaga kelgan edi. Trampning so‘zlariga ko‘ra, ularni vatanga qaytarmaslik kerak, chunki u yerda ularni “juda katta ehtimol bilan” o‘lim kutayotgan bo‘lishi mumkin. Amerika prezidenti agar Avstraliya sportchi qizlarga boshpana bermasa, buni AQSh amalga oshirishini va’da qildi. Uning aytishicha, u bu mavzuni Avstraliya bosh vaziri Entoni Albaneze bilan muhokama qilgan.

Keyinroq Tramp o‘zining Truth Social ijtimoiy tarmog‘ida Avstraliya hukumat organlari besh nafar sportchiga boshpana berishni ma’qullagani, boshqalar esa o‘z navbatini kutayotganini yozdi.

“Besh nafari allaqachon joylashtirildi, qolganlari esa yo‘lda. Biroq ayrimlar qaytishi kerak, deb hisoblamoqda, chunki ular oilalarining xavfsizligidan xavotirda, jumladan, agar ular qaytmasa, oila a’zolariga tahdidlar bo‘lishi mumkin”, — dedi Oq uy rahbari. U yana Avstraliya bosh vaziri “bu juda nozik vaziyatni yaxshi boshqarayotgani”ni qo‘shimcha qildi.

Janubiy Koreyaga qarshi o‘yin oldidan madhiya ijro etilgan vaqtda futbolchi qizlar jim turgan edi. Eron televideniyesi bu holatni “hayosizlikning eng yuqori cho‘qqisi” deb atagan. Keyingi o‘yinlar oldidan esa ular mamlakat madhiyasini ijro etdi.

CNN Spors telekanali ma’lumotiga ko‘ra, Eron ayollar terma jamoasining kamida yetti nafar sportchisi milliy jamoa joylashgan hududni tark etgan. Keyinchalik ma’lum bo‘lishicha, ulardan besh nafari Avstraliya politsiyasi tomonidan himoya ostiga olingan. Qolgan ikki ayolning taqdiri haqida hozircha hech qanday ma’lumot yo‘q.

Eron ayollar futbol terma jamoasi 8 mart, yakshanba kuni Osiyo kubogi guruh bosqichidagi so‘nggi uchrashuvida Filippinga mag‘lub bo‘ldi. Odatda, guruh bosqichidan chiqib ketgan jamoalar chempionat o‘tkazilayotgan mamlakatni bir necha kun ichida tark etadi.

Source link

Angliya Kubogi (FA Cup) 2025/2026-yilgi mavsumi chorak final bosqichiga qur’a tashlandi.

Ushbu bosqichning markaziy o‘yinida «Manchester Siti» va «Liverpul» to‘qnashadi.

1/4 finalning barcha juftliklari:

«Manchester Siti» — «Liverpul»
«Sauthempton» — «Arsenal»
«Chelsi» — «Port Veyl»
«Vest Hem» yoki «Brentford» — «Lids» («Vest Hem» va «Brentford» juftligi g‘olibi «Lids»ga qarshi to‘p suradi)

Chorak final bahslari 2026-yil 4-5-aprel kunlariga belgilangan.

Quyi liga vakili «Port Veyl» musobaqada qolgan eng zaif (reyting bo‘yicha) jamoa bo‘lib, «Chelsi»ga qarshi safarda maydonga tushadi.

Eslatib o‘tamiz, o‘tgan yilgi mavsum (2024/2025) g‘olibi «Kristal Pelas» hisoblanadi.

Source link

Shaxmat – strategiya va intellekt o‘yini – asrlar davomida insonlar o‘rtasidagi eng muhim intellektual raqobat turlaridan biri bo‘lib kelmoqda.

Shaxmatdagi eng yuqori e’tirof pog‘onasi grossmeyster unvoni hisoblanadi. Bu unvon o‘yinda yuksak mahorat, favqulodda salohiyat va unga beqiyos sadoqatni namoyon etgan shaxmatchilarga beriladi.

Quyida Xalqaro shaxmat federatsiyasi (FIDe) ma’lumotlariga ko‘ra, eng ko‘p shaxmat grossmeysterlariga ega mamlakatlar keltirilgan.

Foto: World Visualized

Rossiya — 256 nafar grossmeyster. Rossiya yetuk shaxmatchilarni tarbiyalash bo‘yicha uzoq va boy an’anaga ega. Mixail Botvinnik va Vasiliy Smislov kabi afsonaviy ustalardan tortib, Sergey Karyakin va Vladimir Kramnik singari zamonaviy yulduzlargacha, Rossiya shaxmat maktabi hanuzgacha eng kuchli va ta’sirli maktablardan biri bo‘lib qolmoqda.

AQSh — 101 nafar grossmeyster. Qo‘shma Shtatlarda kuchli va jadal rivojlanayotgan shaxmat jamoasi mavjud. Fabiano Karuana, Xikaru Nakamura va Uesli So kabi yetakchi o‘yinchilar muntazam ravishda dunyoning eng kuchli shaxmatchilari qatoriga kiradi.

Germaniya — 96 nafar grossmeyster. Germaniya boy shaxmat merosiga ega. Uning afsonaviy namoyandalari qatorida Emanuel Lasker va Zigbert Tarrash bor. Bugungi kunda bu an’anani Arkadiy Naydich va Liviu-Diter Nisipyanu kabi zamonaviy ustalar davom ettirmoqda.

Ukraina — 93 nafar grossmeyster. Ukraina dunyoga ko‘plab mashhur shaxmatchilarni taqdim etgan, ular orasida sobiq jahon chempioni Ruslan Ponomaryov ham bor.

Hindiston — 64 nafar grossmeyster. So‘nggi o‘n yilliklarda Hindistonda shaxmat rivoji chin ma’noda juda tezlashdi. Vishvanatan Anand, Pentala Xarikrishna va Vidit Gujrati yetakchi shaxslardan bo‘ldi. Yangi avlod orasida esa amaldagi chempion Gukesh Dommaraju ham alohida ajralib turadi.

Vengriya — 58 nafar grossmeyster. Vengriya o‘zining kuchli shaxmat maktabi bilan mashhur. Uning afsonaviy namoyandalari qatorida Yudit Polgar, Layosh Shtayner va Dyula Breyyer bor.

Serbiya — 58 nafar grossmeyster. Serbiyada 50 nafardan ortiq grossmeyster va xalqaro reyting ro‘yxatida 2500 ga yaqin o‘yinchi bor. Qiziq jihati shundaki, Velimir Ivich 2020 yilda grossmeyster unvonini olgan, undan oldin 2018 yilda xalqaro master, 2016 yilda esa FIDe ustasi unvoniga sazovor bo‘lgan.

O‘nlikni Ispaniya (56), Fransiya (50) va Xitoy (48) grossmeysterlari yakunlaydi. Bu ko‘rsatkich tarixiy yetakchilarga nisbatan kamtarona ko‘rinsa-da, Xitoyda shaxmat juda shiddat bilan rivojlanmoqda. 1980-yillardan buyon ushbu sport turiga davlat tomonidan ko‘rsatilgan qo‘llab-quvvatlash o‘z samarasini berdi: xitoylik grossmeysterlar muntazam ravishda jahon elitasi safiga kirmoqda. Ular orasida Din Lijen va ayollar o‘rtasida ko‘p karra jahon chempioni Hou Ifan bor.

Source link