Sport
Klublar o‘rtasidagi JCh boshlanmoqda: unda kimlar ishtirok etadi?
Turnir formati, mukofot pullari va asosiy yulduzlar haqida.
15 iyun kuni Amerika Qo‘shma Shtatlarida klublar o‘rtasidagi jahon chempionati start oladi. Ochilish o‘yinida Messi, Suares, Buskets va Alba kabi taniqli futbolchilar to‘p suradigan «Inter» Mayami Misrning «Al Ahli» jamoasiga qarshi maydonga tushadi. Quyida esa ushbu musobaqa haqida, uning formati, qaysi jamoalar o‘ynashi va boshqa savollar yuzasidan ma’lumot keltiriladi.
Bu qanday turnir?
2016 yil iyunida FIFA prezidenti Janni Infantino har yili o‘tkaziladigan klublar o‘rtasidagi jahon chempionatini kengaytirish va muddatini ham yozga ko‘chirish haqida taklif bilan chiqdi. Avvaliga bu turnir 2021 yilda Xitoyda tashkil qilinishi, unda 24 jamoa qatnashib, har yili emas, keyinchalik xuddi jahon chempionati kabi har 4 yilda o‘tkazilishi kelishib olingandi. Ammo oraga pandemiya tushib, Yevropa va Janubiy Amerika kubogi bahslari ham 2021 yilga ko‘chirilgach, bu loyiha ham kechiktirildi. Keyinchalik jamoalar sonini 32 tagacha oshirish va yangi formatdagi ilk turnirni 2025 yilda o‘tkazish kelishib olindi.
Tabiiy ravishda bu musobaqaga juda ko‘p tashkilotlar, futbolchilar uyushmasi, ligalar qarshilik qilishdi. Zero, shundoq ham yil davomida juda ko‘p o‘yinlarda maydonga tushadigan futbolchilar uchun bu qo‘shimcha risk, jarohatlar soni keskin oshishi, klublarning mavsumga tayyorgarligiga xalaqit berishi ko‘p bor tilga olindi.
Ammo loyihaning tijoriy tomoni, juda katta mukofot jamg‘armasiga ega ekani klublarni vaziyatga boshqacha qarashga majbur qilgani shubhasiz. Chunki shundoq ham moliyaviy feyr-pley cheklovlari bilan kurashib kelayotgan top-klublar uchun qo‘shimcha sof daromad ayni muddao. Axir ushbu turnirda g‘olib bo‘lgan klub 100 million yevroga yaqin summani qo‘lga kiritishi mumkin. Bu summa misol uchun deyarli barcha (APLdan tashqari) chempionatlarda, hatto Chempionlar Ligasida ham butun mavsum ishtirok etib qo‘lga kiritiladigan mablag‘dan ko‘proq. Nafaqat g‘olib, masalan, Yevropaning shunchaki turnirda qatnashgan bir klubi 15-30 million yevro atrofida mablag‘ ishlab topishi mumkin. Osiyo klubi 9 million yevro atrofida kafolatlangan summani oladi.
Turnirda ishtirok uchun mukofot pullari (mukofot jamg‘armasi 525 million dollar):
Yevropa — 12,81 dan 38,19 million dollargacha;
Janubiy Amerika — 15,21 million dollar;
Shimoliy va Markaziy Amerika — 9,55 million dollar;
Osiyo — 9,55 million dollar;
Afrika — 9,55 million dollar;
Okeaniya — 3,58 million dollar.
Turnirdagi muvaffaqiyatli ishtirok uchun ko‘proq pul ishlab olish mumkin, bu yerda mukofot jamg‘armasi 475 million dollar va quyidagicha taqsimlanadi:
Guruh bosqichi — g‘alaba uchun 2 million, durang uchun 1 million dollar;
1/8 finalga chiqish — 7,5 million dollar;
Chorakfinalga chiqish — 13,125 million dollar;
Yarimfinalga chiqish — 21 million dollar;
Finalga chiqish — 30 million dollar;
Turnir g‘olibligi — 40 million dollar.
FIFA prezidenti Janni Infantino turnir g‘olibi umumiy hisobda 125 million dollargacha pul olishi mumkinligini aytgan. To‘g‘ri, sal hisoblab ko‘rilsa, eng ko‘p gonorar 155,815 million dollar chiqadi. Klub buning uchun bir nechta shartlarni bajarishi kerak:
Bu Yevropadan kelgan jamoa bo‘lishi;
Jamoa ishtirok etgani uchun maksimal to‘lov olishi;
Jamoa guruh bosqichidagi uchta o‘yinning barchasida g‘alaba qozonishi.
O‘z navbatida, FIFA ham shunday jiddiy loyiha yozgi tijoriy turnirlar darajasiga tushib qolmasligi uchun o‘z talabini qo‘ygan – barcha klublar to‘liq asosiy tarkibida bilan qatnashishi kerak.
Turnir ishtirokchilarining eng qimmatbaho futbolchilari:
Kilian Mbappe («Real») — 180 million yevro
Erling Holand («Manchester Siti») — 180 million yevro
Jamal Musiala («Bavariya») — 140 million yevro
Koul Palmer («Chelsi») — 120 million yevro
Xulian Alvares («Atletiko») — 100 million yevro
Bu ro‘yxatga Jud Bellinghem (180 million), Vinisius Junior (170), Federiko Valverde (130), Rodri (110), Maykl Olise (100), Lautaro Martines (95), Dezire Due, Xvicha Kvaratsxeliya, Usmon Dembele (90 milliondan) va boshqa ko‘plab superyulduzlarni qo‘shish mumkin.
Turnir formati qanaqa?
Chempionat formati xuddi milliy jamoalar o‘rtasidagi jahon chempionati kabi bo‘lib, 32 ta klub 8 guruhga bo‘lingan holda boshlashadi. Har guruhda jamoalar bir-biri bilan bir martada kuch sinashishadi va eng ko‘p ochko to‘plagan ikki jamoa nimchorak finalga chiqadi.
Guruhlarda birinchi o‘rinlarni egallagan jamoalar keyingi bosqichda ikkinchi o‘rin bilan chiqqan jamoalarga qarshi o‘ynaydi.
Ochkolar teng bo‘lib qolganda, avvalo, o‘zaro o‘yinga, so‘ng esa umumiy to‘plar nisbati, urgan gollar soni va boshqa ko‘rsatkichlarga qarab o‘rinlar taqsimlanadi.
Guruh bahslari 15 iyunda boshlanib, 27 iyunda nihoyasiga yetadi. Nimchorak final o‘yinlari 28 iyundan 2 iyulgacha, chorakfinallar 4–5 iyul, yarimfinallar esa 8–9 iyul kunlariga belgilangan. Final 13 iyul kuni bo‘lib o‘tadi. Uchinchi o‘rin uchun bahs ko‘zda tutilmagan.
O‘yinlar AQShning 11 shahridagi 12 stadionida bo‘lib o‘tadi. Orlandoda ikki stadion turnir uchun mo‘ljallangan. Ochilish o‘yini Mayamidagi «Hard Rok Stedium»da, final esa Nyu York yaqinidagi «Metlayf» stadionida o‘tadi. Musobaqa o‘tkaziladigan eng katta stadion Los Anjyeles yaqinidagi «Rouz Boul» – 88 500 muxlisni o‘ziga sig‘dira oladi. Eng kichik o‘yingoh esa Vashingtonda – «Audi Fild»ga 20 ming tomoshabin kirishi mumkin.
Besh stadion – final o‘tadigan «Metlayf», shuningdek Atlanta, Filadelfiya, Sietl va Mayamidagi stadionlar bir yildan so‘ng mundial o‘yinlarini ham o‘zida qabul qiladi.
Qanday jamoalar qatnashadi?
Bu turnir haqida gap boshlangandan beri ko‘pchilikni o‘ylantirayotgan savol shu – nega «Barselona» yo‘q? «Liverpul» va «Arsenal»chi? «Chelsi» qayerdan qo‘shilib qoldi va hokazo.
Xuddi milliy jamoalar o‘rtasidagi jahon chempionati singari, bu turnirda ham konfederatsiyalarga o‘rinlar ajratilgan. Faqat ishtirokchilar saralash o‘yinlari emas, reyting orqali aniqlanadi. Bir shart – bir mamlakatdan ikkitadan ortiq jamoa bo‘lmasligi kerak.
Shuningdek, 2021-2024 yillardagi konfederatsiyalardagi Chempionlar Ligasi (Libertadores va hokazo) kabi turnir g‘oliblari to‘g‘ridan to‘g‘ri ishtirok etishi mumkin. Agar shu davrda bir mamlakatning 3-4 jamoasi ushbu sovrinlarni yutgan bo‘lsa, istisno tariqasida bir mamlakatdan ikkitadan ortiq klub qatnashishi mumkin. Masalan, Libertadores kubogini 4 yilda Braziliyaning to‘rt xil klubi qo‘lga kiritgani uchun chempionatda Braziliyadan 4 klub qatnashmoqda.
Yevropaga 12 o‘rin ajratilgan. Dastlab, Chempionlar Ligasi g‘oliblarini aniqlab olamiz – «Chelsi», «Real», «Manchester Siti» va yana «Real». Demak, uch klub avtomatik ravishda jahon chempionatiga yo‘llanma oldi. Qolgan 9 jamoa reyting asosida aniqlanadi. Sezganingizdek, endi boshqa ingliz jamoalariga joy qolmadi, zero «Chelsi» va «Manchester Siti» bilan bir mamlakatga berilgan limit to‘ldi. Agar misol uchun, 2022 yilgi finalda «Liverpul» «Real»ni yutganida, uchinchi ingliz jamoasi o‘laroq mersisaydliklar ham turnirda qatnashishi mumkin edi.
«Barselona»ning tushib qolish sababi ham tushunarli. «Real» YeChL orqali yo‘llanma olgach, Ispaniyadan ikkinchi jamoa reyting asosida aniqlandi. «Atletiko»ning Yevropa maydonlaridagi reytingi «Barselona»nikidan yuqori bo‘lib chiqdi.
Janubiy Amerikaga 6 ta o‘rin ajratilgan. 2021-2024 yillarda Libertadores kubogining 4 g‘olibiga qo‘shilib, reyting orqali «River Pleyt» va «Boka Xuniors» joy olgan.
KONKAKAF mintaqasiga 5 o‘rin ajratilgan. Faqat bir jihat, Meksikaning «Leon» klubi 2023 yilda Chempionlar Ligasini yutgan bo‘lsa-da, jahon chempionatiga bora olmadi, chunki ushbu klubning egasi «Pachuka»ning ham egasi hisoblanadi. Natijada 2023 yilgi ChL finalchisi «Los Anjyeles» reyting bo‘yicha keyingi jamoa «Amerika» (Meksika) jamoasini yengib, yo‘llanmani qo‘lga kiritdi.
Osiyodan Chempionlar Ligasini yutgan uch jamoaga qo‘shilib, reyting bo‘yicha Janubiy Koreyaning «Ulsan Hyonde» jamoasi chempionat ishtirokchisiga aylandi.
Darvoqe, bu safargi chempionatda AQShdan uch jamoa qatnashadi. Sababi, amerikaliklar mezbon sifatida qo‘shimcha o‘ringa ega bo‘lishgan. Bu o‘rin MLS chempioni «Inter»ga nasib qildi va shu tariqa klublar o‘rtasidagi jahon chempionatida Messi ham qatnashadigan bo‘ldi. Ronalduning «An Nasr» klubi esa xalqaro maydondagi muvaffaqiyatsizlik tufayli bu turnirda qatnasha olmaydi.
Guruhlar tarkibi
A guruhi: «Al Ahli» (Misr), «Inter» Mayami (AQSh), «Portu» (Portugaliya), «Palmeyras» (Braziliya);
V guruhi: «Atletiko» (Ispaniya), «Botafogo» (Braziliya), «PSJ» (Fransiya), «Sietl Saunders» (AQSh);
S guruhi: «Oklend Siti» (Yangi Zelandiya), «Bavariya» (Germaniya), «Benfika» (Portugaliya), «Boka Huniors» (Argentina);
D guruhi: «Chelsi» (Angliya), «Esperans» (Tunis), «Flamengo» (Braziliya), «Los Anjyeles» (AQSh);
Ye guruhi: «Inter» (Italiya), «Monterrey» (Meksika), «River Pleyt» (Argentina), «Urava Reds» (Yaponiya);
F guruhi: «Borussiya» Dortmund (Germaniya), «Fluminense» (Braziliya), «Mamelodi Sandauns» (JAR), «Ulsan» (Janubiy Koreya);
G guruhi: «Al Ayn» (BAA), «Yuventus» (Italiya), «Manchester Siti» (Angliya), «Vidad» (Marokash);
N guruhi: «Al Hilol» (Saudiya Arabistoni), «Pachuka» (Meksika), «Real» (Ispaniya), «Zalsburg» (Avstriya).
Favoritlar
Albatta, asosiy favoritlar doimgidek Yevropa klublari bo‘lib, ayniqsa «Real» va «Manchester Siti»ni alohida qayd etish kerak. Chunki bu ikki jamoa o‘tgan mavsumda birorta ham sovrin yuta olmadi, klublar o‘rtasidagi jahon chempionati esa mana shu bo‘shliqni to‘ldirish uchun ayni muddao.
Shuningdek, «PSJ»ga ham alohida e’tibor berish kerak bo‘ladi. Enrike shogirdlari agar bu turnirda ham g‘alaba qozonishsa, 2025 yilda qo‘lga kiritgan 4-sovrini bo‘ladi. Bungacha fransuzlar Fransiya chempionati, kubogi va Chempionlar Ligasini yutishdi. Avgustda «PSJ»ni «Tottenhem»ga qarshi Yevropa Superkubogi, «Marsel»ga qarshi Fransiya Superkubogi o‘yinlari ham kutib turibdi. Shu tariqa, klub bir yilda 6 sovrin yutish imkoniyatiga ega. Bungacha 2008/09 yillar mavsumida Pep Gvardiola boshchiligidagi «Barselona» xuddi shunday natijani qayd etgandi.
Albatta, «Bavariya» va «Atletiko»ni, so‘nggi ikki YeChL finalchilari «Inter» va «Borussiya»ni ham unutmaslik kerak. Janubiy Amerika jamoalari doim o‘ziga xos uslubi va mahoratli futbolchilari bilan munosib qarshilik qilib kelishgan. Shuningdek, «Al Hilol» yulduzlarining ham kuchli jamoalarga qarshi o‘yinini kuzatish qiziq bo‘ladi.
Abduqodir Husanov uchun imkoniyat
Ushbu turnir haqida eng tanqidiy fikr aytgan murabbiylardan biri Pep Gvardiola bo‘lgandi. Hatto klublarning asosiy tarkibda harakat qilish talabidan ham jig‘ibiyron bo‘lgan, «mening jamoamda kim asosiy ekanini FIFA aniqlaydimi?» deb keskin chiqish qilgandi.
Ushbu mavsumni ko‘ngildagidek o‘tkaza olmagan va inqirozli davrlarni boshdan kechirgan Gvardiola uchun kelasi mavsum juda muhim ekanini unutmaslik kerak. Hatto klublar o‘rtasidagi jahon chempionligidan ham ko‘ra, yangi mavsumni munosib boshlab olish, jarohatlarni chetlab o‘tish muhimroq. Iyul o‘rtalarigacha turnirda qatnashib, deyarli tanaffussiz yangi mavsumga tayyorlanish ham oson emas. O‘tgan yilgi inqirozning asosiy sabablaridan biri ham yozdagi Yevropa chempionati bo‘lganini eslasangiz kerak. Shu tufayli katta ehtimol bilan Gvardiola ayrim yetakchi futbolchilarning yuklamasini kamaytirishi, asosan yosh futbolchilar hamda yangi transfer qilinganlarni sinab ko‘rishi ham mumkin.
Ana shunda Diash va Gvardiol kabi himoyachilar ba’zi o‘yinlarda zaxirada qolib, Abduqodir Husanov kabi futbolchilarga imkoniyat berilishi ehtimoli yuqori. Pep Gvardiola uning nimalarga qodir ekanini ko‘rib olgan, shu bilan birga, jamoa bilan o‘yin amaliyoti ham ahamiyat kasb etadi.
Bundan tashqari, «Manchester Siti» ishtirok etayotgan guruh u qadar og‘ir emas. Marokash va BAA klublari inglizlar uchun muammo tug‘dirmasa kerak. Demak, Abduqodir Husanov ham ushbu turnirda yetarlicha vaqt olishi va balki yangi jamoasidagi ilk sovrinini qo‘lga kiritishi mumkin.
Chempionatni qayerda ko‘rish mumkin?
O‘zbekistonlik muxlislar MTRK Sport, Futbol, hamda Zo‘r TV telekanallari orqali mazkur o‘yinlarni to‘g‘ridan to‘g‘ri tomosha qilish imkoniyatiga ega bo‘ladi.
«Arsenal» so‘nggi daqiqalarda muhim g‘alabaga erishdi, qatorasiga ikkinchi o‘yinda durang o‘ynagan «Siti» endi 9 ochkoga ortda qolmoqda. «Chelsi» yana yutqazdi, «Real»da yirik g‘alaba.
«Arsenal» – «Everton» 2:0
Gollar: Yokeresh, 89 (1:0). Douman, 90+7 (2:0)
«Arsenal»: Rayya, Saliba, Gabriel Magalyayns, Kalafiori (Inkapiye, 74), Timber (Moskera, 38), Subimendi (Douman, 74), Rays, Eze, Madueke (Martinelli, 61), Saka, Havers (Yokeresh, 61)
«Everton»: Pikford, Kin, O`Brayyen, Mikolenko, Garner, Gana Guyye (Jorj, 90+5), Iroegbunam (Rel, 86), Dyusberi-Holl, Ndiay, Makneyl (Armstrong, 86), Betu (Barri, 69)
«Arsenal» o‘z maydonida kechgan o‘yinda to‘pga egalik qildi, ammo dastlabki 20 daqiqa ichida qarshi hujumlardan ikki bor gol o‘tkazib yuborishi mumkin edi. Birinchi holatda Rayyaning xatosidan keyin Maknilning zarbasidan keyin darvozaga kirib ketayotgan to‘pni yotgan holatda oyog‘ini ko‘tarib qolish orqali to‘xtatib qoldi.
Maknilning uzoq masofadan yo‘llagan zarbasi ustundan qaytdi, qaytgan to‘pga birinchi bo‘lib yetib kelgan Ndiay esa vaziyatdan foydalana olmadi. Keyinroq Maknilning bir necha metr masofadan yo‘llagan zarbasini darvozabon qaytardi.
«Kanonirlar» esa tinimsiz hujum uyushtirganiga qaramay (birinchi bo‘limning o‘zida 13 zarba berildi), hisobni ocha olmadi. Birinchi bo‘limdagi eng yodda qolgan vaziyat Havers jarima maydoni ichida yiqilishi bo‘ldi. Bu epizodda Kin avvaliga raqib hujumchisining oyog‘ini bosib oldi, keyin esa qo‘llari bilan turtib yiqitdi, ammo bosh hakam va VAR xonasidagilar kontakt penalti uchun yetarli emas deb topdi.
Ikkinchi bo‘limda esa mezbonlar uzoq masofadan zarba berishga e’tibor qarata boshladi, xususan, Ezening aylantirib yo‘llagan zarbasiga Pikford yetib bora olmadi, ammo to‘p darvoza ustuni yonidan o‘tib ketdi. Keyin esa Arteta katta tavakkalchilikka qo‘l urdi va tayanch yarimhimoyachisi Martin Subimendi o‘rniga o‘ng qanot vingeri Doumanni maydonga tashladi. Aynan shu o‘zgarish o‘yinni hal qildi. Avvaliga ushbu yosh yarimhimoyachining o‘ng qanotdan uzatmasidan keyin Pikford to‘pga chiqishda xatoga yo‘l qo‘ydi, Inkapiye esa to‘pni bo‘sh darvoza qarshisiga yetib kelgan Yokereshning oyoqlari ostiga tashlab berdi.
So‘nggi daqiqalarda mehmonlar hisobni tenglashtirish umidida to‘liq tarkib bilan oldinga tashlandi, Douman esa burchak zarbasidan keyin uyushtirilgan qarshi hujumda bo‘sh darvozani ishg‘ol etib, APL tarixiga kirdi. Maks 16 yosh-u 73 kunligida liga tarixida gol urgan eng yosh futbolchiga aylandi. Bu orqali u Jyeyms Von tomonidan 2005 yilda o‘rnatilgan rekordni (16 yosh-u 270 kun) yangiladi.
Shu tariqada, bu mavsumda zaxiradan tushgan futbolchilari 11 bor gol urgan Mikel Arteta jamoasi qiyinchilik bilan bo‘lsa-da muhim g‘alabaga erishdi.
«Chelsi» – «Nyukasl Yunayted» 0:1
Gol: Gordon, 18 (0:1)
«Chelsi»: Sanches, Chaloba, Fofana (Xato, 82), Kukurelya, Gyusto (Delap, 46), Jyeyms, Kaysedo (Lavia, 61), Fernandes, Garnacho, Palmer, Joao Pedro
«Nyukasl Yunayted»: Ramsdeyl, Botman, Tiau, Holl, Livramento, Uillok (Byorn, 77), Remsi, Voltemade (Joelinton, 67), Barns, Myorfi (Elanga, 78), Gordon
Ogohlantirishlar: Fofana, 23. Kaysedo, 25 – Ramsdeyl, 84. Holl, 89
«Chelsi» «qarg‘alar»ga qarshi Londonda o‘tgan oldingi 12 o‘yindan 11 tasida g‘alaba qozongandi va shanba oqshomidagi o‘yinni ushbu seriyani davom ettirish maqsadida hujumkorlik bilan boshladi. Ammo mezbonlar o‘z imkoniyatlaridan foydalana olishmadi. 18-daqiqada Palmer qulay vaziyatni yo‘qqa chiqarganidan keyin «Nyukasl» muvaffaqiyatli qarshi hujum uyushtirdi va Uillok Gordonni bo‘sh darvoza qarshisiga chiqarib yubordi.
Tanaffusdan keyin Entoni dublga erishishi mumkin edi, ammo darvozaga qaytgan Sanches jamoasini qutqardi. U Liam Rosenior jamoasini o‘yinda qoldirdi, ammo jamoa mag‘lubiyatdan qutulib qolishni uddalay olmadi. «Chelsi» yana ochko yo‘qotib, raqobatchilarga imkon berdi: bugun «MYu» va «Aston Villa» o‘yinida g‘olib bo‘lgan jamoa ilgarilab ketadi, «Liverpul» esa «Chelsi»ni quvib o‘tib, beshinchi o‘ringa ko‘tarilishi mumkin.
«Vest Hem» – «Manchester Siti» 1:1
Gollar: Bernardu Silva, 31 (0:1). Mavropanos, 35 (1:1)
«Vest Hem»: Hermansen, Mavropanos, Disasi, Todibo, Fernandesh, Souchek, Diuf, Van-Bissaka, Pablo (Magassa, 64), Bouen (Kante, 90+6), Kastelyanos (Traore, 75)
«Manchester Siti»: Donnarumma, Geyi, Husanov, Ayt Nuri (Sherki, 60), Mateus Nunes, Rodri, Bernardu Silva (Reynders, 75), O`Rayli, Semenyo (Foden, 75), Marmush (Doku, 60), Holand
Ogohlantirishlar: Magassa, 76. Fernandesh, 89 – Marmush, 11. Bernardu Silva, 37
Birinchi bo‘lim o‘rtalaridan o‘tganida Bernardu Silvaning Holandga uzatmasi to‘g‘ridan to‘g‘ri zarbaga aylanib, hisob ochilganida ko‘pchilik bu o‘yin taqdiri hal bo‘lgani haqida o‘ylay boshlagandi. Ammo «Siti» bu mavsumda ishonchli o‘ynay olmayapti. Biroz o‘tib «Vest Hem» muvozanatni tikladi. Burchak zarbasidan keyin Donnarumma to‘pga chiqishda xatoga yo‘l qo‘ydi va «Arsenal»ning sobiq futbolchisi Mavropanos muvozanatni tikladi.
Bu mezbonlar uchun o‘yindagi ilk zarba edi va bu zarba chempionlik poygasida ishtirok etayotgan jamoaning oyog‘idan chalib qolish uchun yetarli bo‘ldi. Qolgan vaqt davomida «shaharliklar»ning hech qaysisi mezbonlar himoya devorida o‘tmadi, to‘p darvoza sohasiga yetib borganida esa darvozabon Hermansen ishonchli harakat qildi. Endilikda shu kuni o‘yinni diskvalifikatsiya tufayli tribunada o‘tirib kuzatishga majbur bo‘lgan Gvardiola jamoasi «Arsenal»dan 9 ochkoga ortda qolmoqda. «Siti»da bitta zaxira o‘yini borligiga qaramay, deyarli hech kim endi jamoa bu farqni yo‘qqa chiqara olishiga ishonmayapti.
Ispaniya: Molinaning zambarak zarbasi va tinim bilmas Valverde
«Atletiko» – «Xetafe» 1:0
Gol: Molina, 8 (1:0)
«Atletiko»: Musso, Ximenes, Langle, Pubil (Alvares, 66), Koke, Almada (Simeone, 66), Vargas (Liorente, 73), Gonsales, Molina, Baena (Grizmann, 73), Syorlot (Lukman, 66)
«Xetafe»: Soriya, Abkar, Duarte (Riko, 83), Romero, Iglesias, Kiko Femeniya (Birmanchevich, 46), Dakonam, Arambarri (Martin, 74), Milya (Munos, 90+2), Satriano, Vaskes (Liso, 74)
Ogohlantirishlar: Syorlot, 55. Vargas, 68. Molina, 90 –Romero, 60. Liso, 77. Satriano, 90
Chetlatish: Abkar, 55
Yaqinda «Real»ni mag‘lub eta olgan «Xetafe» «Atletiko»ga ham jiddiy muammolar tug‘dirdi. Shu kuni Oblak o‘rniga darvozaga turgan Musso olti seyv ijro etishiga to‘g‘ri keldi. Ammo mezbonlarning qariyb ikki yildan buyon gol urmayotgan himoyachisi Molina o‘yin startidayoq o‘yin taqdirini hal qildi. Argentinalik futbolchining jarima maydoni tashqarisidan yo‘llagan kuchli zarbasidan keyin to‘p olis «to‘qqizlik»ka borib tushdi.
Mehmonlar esa ancha osonroq vaziyatlardan gol ura olmadi. «Matraschilar»ni goh Musso qutqardi, goh «Xetafe» futbolchilari to‘g‘ri zarba bera olmadi. Ikkinchi bo‘lim boshlarida Abkar qizil kartochka olib maydonni tark etganidan keyin esa amalda o‘yin taqdiri hal bo‘ldi. Diyego Simeone jamoasi uchinchi o‘rinni yanada mustahkamladi.
«Real» – «Elche» 4:1
Gollar: Ryudiger, 39 (1:0). Valverde, 44 (2:0). Hausen, 66 (3:0). Manuel Anxel, 85 – avtogol (3:1). Arda Guler, 89 (4:1)
«Real»: Kurtua, Ryudiger (D. Aguado, 61), Hausen, F. Garsiya, Karvahal, Tshuameni (Arda Guler, 58), Pitarch (Palasios, 64), Kamavinga, Valverde (G. Garsiya, 58), Vinisius Junior (Yanez, 58), Dias (Manuel Anxel, 63)
«Elche»: Dituro, Petro (M. Aguado, 64), Affengryuber (Bigas, 74), Chust, Valera, Sangare (Pedrosa, 23), Redondo (Mir, 64), Febas, Sepeda (Xosan, 64), Andre Silva, Neto (Diangana, 74)
Ogohlantirishlar: Kamavinga, 55 – Valera, 62. Affengryuber, 66. Mir, 88
Hafta o‘rtasida YeChL o‘yinida katta kuch sarflagan «Real» futbolchilari ancha vaqtgacha autsayder darvozasi tomon yo‘l topa olmadi. Ammo yarimhimoyaga qaytganidan keyin yayrab o‘ynayotgan Valverdeda bu o‘yinga ham yetarli kuch qolgandi. «Selta» darvozasiga g‘alaba goli, «Siti»ga qarshi o‘yinda het-trik, shanba kuni esa uning seriyasi darvom etdi. Avvaliga Fedening zarbasidan keyin darvozabon to‘pni amallab qaytardi, qaytgan to‘pga esa Ryudiger birinchi bo‘lib yetib keldi va hisob ochildi. Bir necha daqiqa o‘tib esa barchasini Valverdening o‘zi bajardi. U jarima maydoniga yaqinlashib kelib, bir harakat bilan himoyachini yo‘lidan oldi va to‘pni to‘sin ortidan darvoza to‘riga kiritdi.
Alvaro Arbeloa 58-daqiqadayoq Vinisius Junior, Valverde va Tshuameni kabi yetakchi futolchilarini, biroz o‘tib Ryudigerni ham zaxiraga oldi, ular keyingi hafta o‘rtasida «Siti»ga qarshi javob o‘yinida kerak bo‘ladi. Ularning o‘rniga o‘yinni davom ettirgan futbolchilar ham ikkita gol urishdi. Avvaliga 18 yoshli Yanesning uzatmasidan keyin Hausen hisobdagi farqni oshirdi. O‘yin oxirlarida esa Guler maydonning ikkinchi qismidan turib fantastik gol muallifiga aylandi. U zarba bergan nuqtadan darvoza chizig‘igacha bo‘lgan masofa 68 metr chiqadi.
Yirik g‘alabadan keyin madridliklar turnir jadvalida yana «Barselona»ga bir ochkolik masofada yaqinlashib oldi, lekin kataloniyaliklar yakshanba kuni «Sevilya»ga qarshi o‘yin natijasiga ko‘ra yana to‘rt ochkolik farqni tiklashi mumkin.
Bugun, Turkiya Superligasining 26-turi doirasida peshqadam «Galatasaroy» o‘z maydonida «Bashakshehir»ni qabul qiladi.
Uchrashuv Toshkent vaqti bilan soat 22:00 da Istanbuldagi «RAMS Park» stadionida boshlanadi.
«Galatasaroy» 25 o‘yindan so‘ng 61 ochko bilan jadvalda 1-o‘rinda bormoqda. «Bashakshehir» esa 42 ochko bilan 5-pog‘onani egallab turibdi va yevrokuboklar uchun kurashmoqda.
«Istanbul Bashakshehir» bugungi o‘yin uchun asosiy tarkibni e’lon qildi. Eldor Shomurodov — asosiyda, Abbosbek Fayzullayev qaydnomaga ham kiritilmagan.
2026-yilgi Osiyo Kubogi chorak finalida O‘zbekiston ayollar terma jamoasi Janubiy Koreya ayollar terma jamoasidan mag‘lubiyatga uchradi. 6:0 hisobida g‘alaba qozongan koreyslar yarim final yo‘llanmasini qo‘lga kiritdi.
Shunga qaramasdan, milliy jamoamiz Jahon chempionati yo‘llanmasi uchun kurashni davom ettiradi. Bo‘lg‘usi raqib Yaponiya – Filippin uchrashuvida aniqlanadi — ushbu uchrashuvda yengilgan jamoa ustidan g‘alaba qozonsa, O‘zbekiston terma jamoasi 2027-yilda Braziliyada o‘tkaziladigan ayollar o‘rtasidagi JChga yo‘llanma oladi.
Agar jamoa ushbu o‘tish bahsida ham yengilsa, KXDR/Xitoy Taypeyi o‘rtasidagi o‘yinda mag‘lub bo‘lgan jamoa bilan to‘qnash keladi. Bu uchrashuv g‘olibi xalqaro pley-off o‘yinlari orqali mundial yo‘llanmasi uchun kurashni davom ettiradi, mag‘lub musobaqani tark etadi.
2026-yilgi ayollar o‘rtasidagi Osiyo Kubogida 12 ta terma jamoa ishtirok etmoqda. Ular uchta guruhga bo‘lingan holda bahs olib bordi. Guruhlarda dastlabki ikki o‘rinni egallagan jamoalar hamda eng yaxshi ko‘rsatkich qayd etgan ikki nafar uchinchi o‘rin sohibi chorak final bosqichiga yo‘l oldi.
Chorak final g‘oliblari to‘g‘ridan-to‘g‘ri Jahon chempionati yo‘llanmasiga ega bo‘ladi. Mag‘lub jamoalar esa oldindan aniqlangan setka asosida pley-off bosqichida ishtirok etadi. Pley-offda g‘alaba qozongan jamoalar Osiyoning 5 va 6-vakili sifatida mundial yo‘llanmasini qo‘lga kiritadi.
JCh-2027 yo‘llanmasi uchun pley-off o‘yinlari:
O‘zbekiston — Yaponiya/Filippin
KXDR — Xitoy Taypeyi
Yarim finalga yo‘l olgan Avstraliya, Xitoy va Janubiy Koreya terma jamoalari allaqachon Jahon chempionati ishtirokchisiga aylanishga ulgurdi. So‘nggi yarim finalchi nomi Yaponiya – Filippin uchrashuvidan keyin ma’lum bo‘ladi.
Ma’lumot uchun: 2029-yilgi ayollar o‘rtasidagi Osiyo Kubogi O‘zbekistonda o‘tkaziladi.
Sport
Futbol bo‘yicha O‘zbekiston ayollar terma jamoasi Osiyo kubogi chorak finalida yirik hisobda mag‘lub bo‘ldi
Endi ular jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Avstraliyada bo‘lib o‘tayotgan ayollar o‘rtasida Osiyo kubogi chorak finalida O‘zbekiston terma jamoasi futbolchilari Janubiy koreyalik raqibalariga qarshi maydonga tushdi.
Bahs 6:0 hisobida Janubiy Koreya ayollar terma jamoasi g‘alabasi bilan yakunlandi.
O‘zbekistonlik ayol futbolchilar bangladeshlik raqibalarini 4:0 hisobida yengib chorak finalga chiqishgandi.
Endi ular 19 mart kuni jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Osiyo kubogida eng yaxshi natijaga erishgan olti jamoa 2027 yilgi ayollar o‘rtasidagi Jahon chempionatiga to‘g‘ridan-to‘g‘ri yo‘llanmani qo‘lga kiritadi.
U 50 kg vazn toifasida vaqtinchalik chempionlik kamari uchun puerto-rikolik Jonatan Gonsalesga qarshi jang qiladi.
17–19 aprel kunlari Qirg‘iziston poytaxti Bishkek shahrida professional boks oqshomi bo‘lib o‘tadi. Unda ikki karra Olimpiya chempioni Hasanboy Do‘smatov ham ringga ko‘tarilishi kutilmoqda.
WBA reytingida oltinchi o‘rinni egallab turgan charm qo‘lqop ustasi 50 kg vazn toifasida vaqtinchalik chempionlik kamari uchun puerto-rikolik Jonatan Gonsalesga qarshi jang qiladi.
Hasanboy Do‘smatov professional ringdagi so‘nggi jangini 2025 yil 20 iyul kuni filippinlik Mark Antonioga qarshi o‘tkazib, g‘alaba qozongan edi. Shu tariqa, uning professional boksdagi janglari soni 7 taga yetdi, ularning barchasi Do‘smatov foydasiga hal bo‘lgan.
Jonatan Gonsales hisobida 29 g‘alaba, 4 durang va 1 mag‘lubiyat mavjud.
Prezidentning yangi qarori e’lon qilindi
«Siti» deyarli kurashdan chiqdi, Gulerdan shedevr gol. Kun o‘yinlari
Uch yil avval pora olgan sobiq arxiv xodimasi sudga tortildi
-
Jamiyat4 days agoNogironlar uchun onlayn platforma tenderida shubhali holatlar aniqlandi
-
Jamiyat4 days agoRulda kamar taqmagan Sardor Mamadaliyev jarimaga tortildi
-
Dunyodan4 days ago
Ali Xomanaiyning o‘g‘li Eronning yangi oliy rahbari etib saylandi
-
Siyosat2 days agoPrezident Mirziyoyev fuqarolardan murojaatlar ko‘payib borayotgan bir paytda militsiya xodimlarining qo‘pol xatti-harakatlarini tanqid qildi
-
Siyosat3 days agoIkki nafar O‘zbekiston fuqarosi firibgarlik va o‘g‘irlik hodisasidan so‘ng Bahrayn va AQShdan qaytib keldi
-
Turk dunyosi4 days agoEron urushi kuchayib borayotgan bir paytda Turkiya o’rtada qoldi
-
Sport4 days agoAvstraliyadan boshpana so‘ragan eronlik futbolchilardan biri fikrini o‘zgartirdi
-
Iqtisodiyot3 days ago
13-mart kuni ham dollar kursi pastlaydi