Sport
«Kimdir meni jamoada ko‘rishni istamayapti». Saloh shov-shuvli intervyu berdi
U murabbiy bilan munosabatlari buzilganini ochiq aytdi va qishda ketishi mumkinligiga ishora qildi.
«Liverpul» mavsum startidagi g‘alabali seriyadan keyin inqiroz ko‘chasiga kirib qoldi. Va hozircha vaziyatni o‘nglashning imkoni bo‘lmayapti. 6 dekabr kuni APLning navbatdagi turida mersisaydliklar yana ochko yo‘qotishdi: «Lids» bilan o‘yinda avvaliga jamoa 2:0 hisobida oldinga chiqib olgandi, keyin ikkita gol o‘tkazib yubordi, o‘yin oxirida Soboslai yana qizillarni hisobda oldinga olib chiqdi, ammo 90+6-daqiqada uchinchi gol o‘tkazib yuborildi (3:3). So‘nggi 10 o‘yinda atigi ikki bor g‘alabaga erishgan «Liverpul» turnir jadvalida sakkizinchi o‘rinda bormoqda. Muxlislarning katta qismi bosh murabbiy Arne Slot iste’fosini talab qilmoqda. «Lids» bilan o‘yindan keyin esa klubda navbatdagi jiddiy muammo paydo bo‘ldi. Jamoaning uzoq yillik yetakchisi, qatorasiga uch o‘yinda zaxirada qoldirilgan Muhammad Saloh jurnalistlar qarshisiga chiqdi hamda murabbiy bilan o‘rtasidagi oldingi munosabat qolmaganini ochiq aytdi. Shuningdek, qishda ketishi mumkinligiga ishora qildi.
U «Vest Hem» va «Lids»ga qarshi o‘yinda umuman maydonga chiqmadi, «Sanderlend» bilan o‘yinda esa ikkinchi bo‘limda zaxiradan tushgandi.
Qatorasiga uch o‘yinda zaxirada qolishi Salohning «sabr kosasini to‘ldirdi». Uning hisoblashicha, Slot uni «Liverpul» muammolarida asosiy aybdor sifatida ko‘rsatmoqda.
Klubdan hafsalasi pir bo‘lgani haqida
«Men juda-juda xafaman. Bu klub uchun yillar davomida, ayniqsa o‘tgan mavsumda qancha mehnat qilganimni hamma ko‘rib turibdi. Bunga ishona olmayman, yana 90 daqiqa zaxira o‘rindig‘ida qoldirildim. Bu uchinchi martasi. Menimcha, faoliyatimda ilk bor shunaqa bo‘lmoqda.
Men hozir zaxirada o‘tiribman va nega bunday bo‘lganini bilmayapman. Aftidan, klub aybni menga ag‘darmoqda. Men shuni his qilyapman. Menimcha, bu mutlaqo ravshan: kimdir hamma ayb mening zimmamda bo‘lishini xohlagan.
Klub yozda katta va’dalar bergandi, endi esa uch o‘yinda maydonga tushirilmadim. Ular va’dasida turishdi deya olmayman.
Men bunday vaziyatga ko‘nika olmayman. Men bu klub uchun juda ko‘p ish qilgandim».
Arne Slot haqida
«Men ko‘p marta bosh murabbiy bilan munosabatim yaxshi ekanini aytganman. Hozir esa hech qanday munosabat qolmadi. Menimcha, kimdir meni klubda ko‘rishni xohlamayapti.
Yana bir bor aytaman: endi o‘rtamizda hech qanday munosabat yo‘q. Juda yaxshi munosabat bo‘lgandi, endi esa birdan yo‘q bo‘lib qoldi. Kecha u boshlang‘ich tarkibda tushmasligimni aytdi va men u bilan uchrashdim. U nimalar his qilayotganimni biladi. U bundan xabardor».
Kelajagi haqida
«Men doimo bu klubga muxlislik qilaman. Farzandlarim uni doim qo‘llab-quvvatlaydi. Men bu klubni juda yaxshi ko‘raman va doimo shunday bo‘lib qolaman. Kecha onamga qo‘ng‘iroq qildim – hech kim asosiy tarkibda chiqish yoki chiqmasligimni bilmasdi, lekin men bilardim.
Kecha [ota-onamga] aytdim: ««Brayton» bilan o‘yinga kelaveringlar. O‘ynaymanmi, yo‘qmi, buni bilmayman, ammo baribir zavq olaman. Tasavvur qilyapman, chunki bundan keyin nima bo‘lishini bilmayman. Men «Enfild»da bo‘lib, muxlislar bilan xayrlashaman va Afrika Kubogiga yo‘l olaman. U yerdaligimda nima bo‘lishini bilmayman».
Saudiya Arabistoniga ketishi ehtimoli haqida
«Men bu savolga javob berishni istamayman».
Shartnomasi haqida
«Uni imzolaganimdan afsusdamanmi? Bu savolga vijdonan javob berish men uchun juda og‘ir. Bu og‘riqli, hatto savolning o‘zi ham og‘riqli. Bu klub bilan shartnoma imzolaganim uchun men hech qachon afsuslanmayman. Shartnomani uzaytirib, faoliyatimni shu yerda yakunlayman deb o‘ylagandim.
Hammasi qachondir, qandaydir tarzda tugaydi, lekin miyamda bir fikr aylanadi: «Nega hammasi aynan shunday tugashi kerak?» Chunki men juda yaxshi holatdaman, atigi besh oy oldin men barcha individual mukofotlarni qo‘lga kiritgandim, nega endi hammasi shunday ketishi kerak? Kechirasiz, jamoadagilarning barchasi ham yaxshi formada emas, ammo hozir aynan men himoyalanishimga to‘g‘ri kelmoqda».
Futbolchilar bilan munosabatlari haqida
«Yo‘q, yo‘q, yo‘q (unga jamoadoshlari pand bermadimi degan savolga javoban), bu yigitlar men ularni qanchalik yoqtirishimni bilishadi. Ular o‘yindan oldin ham, o‘yindan keyin ham ularni qanchalik qo‘llab-quvvatlashimni bilishadi. Men tajribali futbolchiman. Men ularni doim qo‘llab-quvvatlayman, doim tajriba ulashaman. Yo‘q, yo‘q, o‘yinchilarning bunga daxli yo‘q. Ular ham meni juda qo‘llab-quvvatlashadi, shuning uchun o‘rtamizda faqat ulkan muhabbat va hurmat bor».
Yana bir bor klub oldidagi xizmatlari haqida
«Klub uchun qilgan ishlarimdan keyin bunaqa bo‘lishi chindan og‘riqli. O‘zingiz uchun tasavvur qilib ko‘rishingiz mumkin. Uydan chiqayotganingda bugun boshlang‘ich tarkibda bo‘lish-bo‘lmasligingni bilmaysan. Men klubni juda yaxshi bilaman, men ko‘p yillardan buyon shu yerdaman. Bilaman, ertaga [Jyeymi] Karrager yana va yana menga hujum qiladi – tanqid qilaversin, bu normal holat.
Men APLga kelganimdan keyingi davrda klub uchun barchadan ko‘p gol urdim. Bu davrda butun APLda mendan ko‘proq gol urgan va golli uzatma bergan boshqa kimdir bor deb o‘ylamayman. Menimcha, boshqa kimdir bilan bu ish sodir bo‘lganda, klub yonini olgan bo‘lardi. Men esa bunaqa vaziyatdagi yagona futbolchiman. Barcha aytyapti: «Mo — muammo, demak uni chetga surib qo‘yish kerak». Men esa muammo o‘zimda deb o‘ylamayman.
Men klub uchun borimni berdim. O‘z o‘rnim uchun har kuni kurashishim shart emas, chunki u meniki, unga haqliman. Men klubdan kattaroq emasman, lekin men o‘ynashga haqliman».
Noto‘g‘ri munosabat haqida
«Misol keltirish kerakmi? Bu ahmoqlik, ammo afsusdaman. Yodimda, qaysidir pallada Harri Keyn o‘n o‘yinda gol urmagandi va mediadagilarning barchasi shunday degandi: «Harri gol uradi hali». Ish Salohga kelganda esa barcha shunday demoqda: «U zaxirada o‘tirishi kerak». Uzr, Harri!»
Buyog‘iga nima bo‘ladi?
Bu vaziyatda murabbiyning qarorini ham to‘g‘ri tushunish mumkin: joriy mavsumda misrlik futbolchining o‘yinida jiddiy pasayish yuzaga keldi. U mavsum startidagi 12 o‘yinda atigi to‘rt gol urib, ikki assist amalga oshirgandi, bu esa o‘tgan mavsumdagi fenomenal ko‘rsatkich (29 gol + 18 assist) bilan solishtirganda juda kamtarona ko‘rinadi.
«Liverpul» muammolari fonida ko‘plab muxlislar va ekspertlar Muhammad Salohning o‘yinidagi pasayishni alohida ko‘rsata boshlagandi.
33 yoshli futbolchi o‘tgan mavsumda shartnomasini 2027 yilgacha uzaytirgan.
13 dekabr kuni «Brayton»ga qarshi kechadigan o‘yin esa Saloh uchun klubdagi oxirgi o‘yin bo‘lib qolishi mumkin. Shu bilan birga, ayrimlar u allaqachon muxlislar bilan xayrlashdi deb hisoblamoqda: «Lids» bilan o‘yindan keyin Mo maydonga chiqib, uzoq vaqt qoldi va tribunaga yig‘ilganlarni olqishlab turdi.
U dekabr oyining ikkinchi yarmida Afrika kubogi o‘yinlariga jo‘nab ketadi, birinchi o‘yin – 22 dekabr kuni bo‘lib o‘tadi. Agar Misr turnirda finalgacha yetib boradigan bo‘lsa, u «Liverpul»ga 20 yanvardan oldin qaytmaydi.
Shuningdek, 2026 yilgi jahon chempionatigacha yarim yil qolmoqda, futbolchi turnirga borishi uchun sport formasini yuqori holatda saqlab turishi kerak bo‘ladi. U bu yarim yilni qayerda va qanday o‘tkazishi hozircha katta savol ostida.
Salohning oxirgi bayonoti Krishtianu Ronalduning «MYu»dan ketish oldidan Pirs Morganga bergan mashhur intervyusini yodga solib yubormoqda. Ushbu jurnalist allaqachon misrlik futbolchini ham o‘zi bilan suhbat qurishga chorladi. Futbolchi bu taklifga rozi bo‘ladigan bo‘lsa, portugaliyalik yulduznikidan ko‘ra shov-shuvliroq intervyu chiqishi mumkin.
U 50 kg vazn toifasida vaqtinchalik chempionlik kamari uchun puerto-rikolik Jonatan Gonsalesga qarshi jang qiladi.
17–19 aprel kunlari Qirg‘iziston poytaxti Bishkek shahrida professional boks oqshomi bo‘lib o‘tadi. Unda ikki karra Olimpiya chempioni Hasanboy Do‘smatov ham ringga ko‘tarilishi kutilmoqda.
WBA reytingida oltinchi o‘rinni egallab turgan charm qo‘lqop ustasi 50 kg vazn toifasida vaqtinchalik chempionlik kamari uchun puerto-rikolik Jonatan Gonsalesga qarshi jang qiladi.
Hasanboy Do‘smatov professional ringdagi so‘nggi jangini 2025 yil 20 iyul kuni filippinlik Mark Antonioga qarshi o‘tkazib, g‘alaba qozongan edi. Shu tariqa, uning professional boksdagi janglari soni 7 taga yetdi, ularning barchasi Do‘smatov foydasiga hal bo‘lgan.
Jonatan Gonsales hisobida 29 g‘alaba, 4 durang va 1 mag‘lubiyat mavjud.
O‘zbekiston Superligasida 3-tur o‘yinlari o‘tkazildi. «Neftchi» yirik hisobdagi g‘alabalar seriyasini davom ettirdi. «Navbahor» bu asrda birinchi marta Toshkentda «Paxtakor»ni yengdi. «Dinamo» Samarqandda «Nasaf»ga qarshi o‘yinlarda 18 yildan beri davom etayotgan noxush an’anani buzolmadi. Mirjalol Qosimov OKMK klubining muvaffaqiyatsiz startini internetda darhol mashhur bo‘lib ketgan falsafiy jumlalar bilan izohladi.
10-12 mart kunlari futbol bo‘yicha O‘zbekiston Superligasida 3-tur o‘yinlari o‘tkazildi.
NeFTChI 3:0 ANDIJON
Gollar: Alisher Odilov, 42 (1:0), Jamshid Iskandarov, 50 (2:0), Anvarjon G‘ofurov, 56 (3:0)
Amaldagi chempion «Neftchi» g‘alabali qadamini davom ettirdi va bu safar «Andijon»ni yirik hisobda yengdi. Bosh murabbiy Islombek Ismoilov shogirdlari chempionat startida har bir o‘yinni 3:0 hisobida yakunlamoqda.
Samvel Babayan qo‘l ostidagi «Andijon» dastlabki g‘alabadan so‘ng, qatorasiga ikki marta yutqazdi. Bundan tashqari, Babayan murabbiy sifatida ilk marotaba «Neftchi»ga yutqazdi. Andijonliklar ustozi o‘yindan keyin hafsalasi pir bo‘lganini yashirmadi. «Bu mag‘lubiyat men uchun yanada alamli, chunki «Neftchi» tarkibida tarix yozayotgan ko‘plab futbolchilarni o‘zim tarbiyalaganman», dedi u.
PAXTAKOR 0:2 NAVBAHOR
Gollar: Katulondi Kati, 47 (0:1), Ruslanbek Jiyanov, 65 pen (0:2)
Toshkentdagi qorli maydonda «Paxtakor» va «Navbahor» to‘qnash keldi. Keskin kurashlarga boy o‘yin taqdirini ikkinchi bo‘limdagi gollar hal qildi va namanganliklar g‘alabani ilib ketdi. «Paxtakor» chempionat startidagi ikkita g‘alabadan keyin mag‘lubiyat alamini tatib ko‘rdi.
«Navbahor» bu asrda ilk marotaba «Paxtakor»ni Toshkentda yengdi. Namanganliklar bosh murabbiyi Temur Kapadze «Paxtakor»ni mag‘lub etish yoqimli ekanini ta’kidladi. «O‘yin bo‘yicha raqibdan kuchli edik, «Paxtakor»ga qarshi bahs – har bir klub uchun motivatsiya» deb qo‘shimcha qildi u.
«Paxtakor» ustozi Kamoliddin Tojiyev mag‘lubiyatdan hayron ekanini aytdi. «Yigitlarni tanimay qoldim. To‘g‘risini aytsam, nima yuz berganini tushunmadim», dedi u.
MASh’AL 0:2 QIZILQUM
Gollar: Jambuli Jigauri, 39 (0:1), Shohruz Norxonov, 90+1 (0:2)
«Mash’al» chempionatning autsayderiga aylandi. «Qizilqum»ga yutqazgan muborakliklar 3 ta mag‘lubiyat bilan jadval tubiga o‘rnashdi. Bundan tashqari, hali biror marta raqib darvozasini ishg‘ol etolmadi. «Qizilqum» esa ilk o‘yindagi mag‘lubiyatdan keyin qatorasiga ikki marta g‘alaba qozondi.
«Mash’al» bosh murabbiyi Igor Surov betobligi tufayli bu o‘yinda ishtirok etmadi. Uning o‘rnini egallagan Otabek Narzullayev jamoaning muvaffaqiyatsiz startini tayyorgarlik yaxshi bo‘lmagani bilan izohladi. «Qishki yig‘inni o‘zimizda o‘tkazdik, Turkiyaga bormadik, nazorat o‘yinlarini esa asosan Pro-Liga klublariga qarshi o‘tkazdik. Menimcha, bu ham o‘z ta’sirini ko‘rsatdi», dedi u.
BUXORO 1:1 XORAZM
Gollar: Vladimir Rodich, 36 (1:0), Azizjon Ahrorov, 49 (1:1)
Chempionatni kutilmagan ikkita g‘alaba bilan dadil boshlagan «Buxoro» bu turda qoqildi. Bosh murabbiy Aleksandr Xomyakov shogirdlari hisobni ochgan bo‘lsa-da, ikkinchi taym boshida gol o‘tkazib yubordi. Qolgan daqiqalarda «Xorazm» ishonchli harakat qilib, durangni ushlab qolishga erishdi.
LOKOMOTIV 0:0 QO‘QON-1912
Pro-Ligadan qaytgan «Lokomotiv» qatorasiga ikkita mag‘lubiyatdan so‘ng, kutilmaganda «Qo‘qon-1912» qarshiligini sindirolmadi. Temiryo‘lchilar 9 yildan buyon o‘z maydonida bunga erisholmayapti. Qo‘qonliklar ilk ochkosini qo‘lga kiritdi, ammo hamon jadval tubida bormoqda.
SURXON 0:0 BUNYoDKOR
Termizda o‘tgan bahsda har ikki jamoada yaxshi vaziyatlar bo‘ldi, ammo hisob ochilmadi. «Surxon» ilk ochkosini qo‘lga kiritdi.
«Bunyodkor» bosh murabbiyi Ilyos Zeytullayev moliyaviy qiyinchiliklarga shama qildi. «So‘nggi yangiliklardan keyin futbolchilarni ruhlantirish qiyin, biroq shunga qaramay, ular maydonga tushib, bor kuchini o‘yinga bag‘ishlamoqda. Futbolchilar to‘rt oydan beri maosh olmayapti, biz oilamizni boqishimiz kerak, deb murojaat qilmoqda. O‘ylaymanki, «Bunyodkor»dagi vaziyatga e’tibor qaratishadi», dedi u.
DINAMO 1:1 NASAF
Gollar: Anvarjon Hojimirzayev, 44 (1:0), Sharof Muhiddinov, 90+2 (1:1)
Samarqandda turning markaziy o‘yini bo‘lib o‘tdi. «Dinamo» birinchi bo‘lim oxirida hisobni ochdi, ammo g‘alabani ushlab qololmadi. So‘nggi daqiqalardagi gol «Nasaf»ni mag‘lubiyatdan asrab qoldi. «Dinamo» 18 yildan buyon o‘z maydonida «Nasaf»ni mag‘lub etolmayapti.
O‘yindan keyin «Dinamo» bosh murabbiyi Vadim Abramov futbolchilar 4 oydan beri maosh olmayotganini aytdi. «Nasaf» bosh murabbiyi Ro‘ziqul Berdiyev ham moliyaviy qiyinchiliklar borligini tan oldi, ammo Qashqadaryoning imkoniyatlari juda kengligi, viloyat rahbari futbolga umuman befarq emasligi, shu bois bu borada ko‘ngli to‘qligini ta’kidladi.
OKMK 2:2 SO‘G‘DIYoNA
Gollar: Lyupcho Doriyev, 45 (0:1), Siavash Haqnazariy, 54 (1:1), Abror Karimov, 74 (2:1), Otabek Jo‘raqo‘ziyev, 90+1 (2:2)
Kutilmaganda chempionatni ikki mag‘lubiyat bilan boshlagan va jadval tubiga tushib qolgan jamoalarning o‘yini qiziqarli kechdi. OKMK g‘alabaga yaqinroq edi, ammo o‘yin oxirida gol o‘tkazib yubordi va 3 ochkoni qo‘ldan chiqardi.
OKMK bosh murabbiyi Mirjalol Qosimov chempionat startidagi qiyinchiliklarga falsafiy yondashishini ma’lum qildi. «Biz ham qayerdadir xato qilgandirmiz, beayb – Parvardigor. Hammasiga sabr qilish kerak. Mashinada ketayotib, oldindagi «Damas» oynasidagi yozuvga ko‘shim tushib qoldi, lotinchada yozilgan ekan: «Bir gap bo‘lar, qaysi biriga siqilay». Xullas, shunaqa gaplar», dedi u.
3-tur o‘yinlaridan keyin Superliga jadvali
Superliga to‘purarlari
Futbol, Superliga
Turkiyada o‘tkazilayotgan sport gimnastikasi bo‘yicha jahon kubogi bosqichida O‘zbekiston terma jamoasi a’zosi Oksana Chusovitina tayanib sakrash dasturida finalga yo‘llanmani qo‘lga kiritdi.
Saralash bahslarida ishtirok etgan tajribali gimnastikachi o‘z chiqishi uchun 13.083 ball to‘plab, kuchli sakkizlik qatoriga kirdi va hal qiluvchi bosqichga yo‘l oldi. Endi Chusovitina finalda medallar uchun kurash olib boradi.
Mazkur musobaqaning dastlabki kuni O‘zbekiston terma jamoasi uchun muvaffaqiyatli kechdi. Chunki yana bir sportchi — Abdulaziz Mirvaliyev ham saralash bosqichini muvaffaqiyatli o‘tdi. U erkin mashq dasturida 13.533 ball jamg‘arib, final yo‘llanmasini qo‘lga kiritdi.
Shu tariqa, O‘zbekiston terma jamoasining ikki nafar vakili jahon kubogi bosqichining finalida ishtirok etadi. Final bahslari ertaga bo‘lib o‘tadi va unda gimnastlar medallar uchun kurash olib boradi.
Shuningdek, bugun musobaqada saralash bosqichining ikkinchi kuni doirasida yana bir qator chiqishlar bo‘lib o‘tishi rejalashtirilgan.
Futbol bo‘yicha Yevropa ligasining 2025/2026-yilgi mavsumida 1/8 final bosqichining dastlabki o‘yinlari bo‘lib o‘tdi.
Yevropa Ligasi. 1/8 final. Birinchi o‘yinlar. 12-mart
Bolonya — Roma 1:1
Gollar: Bernardeski (51) — Pellegrini (71)
Lill — Aston Villa 0:1
Gol: Uotkins (61)
Shtutgart — Portu 1:2
Gollar: Undav (40) — Moffi (21), Mora (27)
Panatinaikos — Betis 1:0
Gol: Taborda (87, penalti)
Chetlatishlar: Zaruri (59, Panatinaikos) — Lorente (88, Betis)
Selta — Lion 1:1
Gollar: Rueda (25) — Endrik (88)
Chetlatish: Iglesias (55, Selta)
Nottinghem Forest — Midtyulland 0:1
Gol: Cho Hyo Son (80)
Genk — Frayburg 1:0
Gol: Al Vahdi (24)
Ferensvarosh — Braga 2:0
Gollar: Kanichovski (32), Jozef (69)
Javob o‘yinlari 19-mart kuni bo‘lib o‘tadi.
Oq uy rahbari so‘zlariga ko‘ra, bu ularning «hayoti va xavfsizligi» uchun muhim.
AQSh prezidenti Donald Tramp futbol bo‘yicha Eron milliy jamoasining jahon chempionatidagi ishtiroki o‘rinli emasligini aytdi.
«Eron milliy jamoasi jahon chempionatida mamnuniyat bilan kutib olinadi, lekin men haqiqatan ham ularning hayoti va xavfsizligi uchun u yerda bo‘lishini o‘rinli deb hisoblamayman», deb yozdi Tramp ijtimoiy tarmoqda.
Avvalroq, Eron sport vaziri Ahmad Dunyomoli xavfsizlik masalalari va AQSh bilan urush sababli milliy jamoaning jahon chempionatidagi ishtiroki imkonsiz ekanini aytgan edi.
«Bu korrupsiyalashgan hukumat rahbarimizni o‘ldirganidan so‘ng, jahon chempionatida ishtirok etishimizga imkon beradigan hech qanday sharoit qolmadi. Eronga qarshi olib borilgan dushmanlik harakatlari fonida bizga qarshi ikki marta urush olib borildi va bir necha ming fuqaromiz o‘ldirildi. Bunday sharoitda bizda ishtirok etish imkoniyati yo‘q», dedi u.
Hozircha bu haqda rasmiy qaror qabul qilinmagan. Eron futbol federatsiyasi va FIFA bu xabar yuzasidan izoh bermadi.
Jahon chempionati 11 iyundan 19 iyulga qadar AQSh, Kanada va Meksikada bo‘lib o‘tadi. Eron milliy jamoasi Osiyo saralashi uchinchi bosqichida O‘zbekiston bilan bir guruhda qatnashgan va birinchi o‘rin bilan mundial yo‘llanmasini qo‘lga kiritgandi. Qur’a natijalariga ko‘ra Eronga G guruhida Belgiya, Misr va Yangi Zelandiya jamoalar raqib bo‘lgandi. Eronliklarning guruh bosqichidagi barcha o‘yinlari AQShda, ikki o‘yin Los-Anjyelesda, yana bittasi – Sietlda bo‘lib o‘tishi belgilangan.
Prezident Tramp yashirishga uringan Eronga qarshi urush sababi ma’lum bo’ldi
Namanganda mashinada megafondan foydalangan haydovchi “prava”sidan ayrildi
AQSh hukumati Eron hujumi oqibatlarini yetarlicha baholamadi
-
Jamiyat2 days agoNogironlar uchun onlayn platforma tenderida shubhali holatlar aniqlandi
-
Dunyodan5 days ago
Prezident Tramp: “Eron bilan hech qanday kelishuv boʻlmaydi”
-
Dunyodan4 days ago
2015 yilgi Suriya stsenariysi Eronda takrorlanishini istamaymiz.
-
Dunyodan3 days ago
Ali Xomanaiyning o‘g‘li Eronning yangi oliy rahbari etib saylandi
-
Dunyodan4 days ago
Eronda AQSh va Isroilni qo’llab-quvvatlaganlarning mulki musodara qilinadi
-
Dunyodan4 days ago
Prezident Tramp Eronning yangi oliy rahbari haqida gapirdi
-
Dunyodan5 days ago
Indoneziyada bolalarga qaratilgan ijtimoiy tarmoqlar taqiqlandi.
-
Jamiyat3 days agoRulda kamar taqmagan Sardor Mamadaliyev jarimaga tortildi