Sport
JCh kundaligi. Holand Neymarni yig‘latdi, Angliya jang qildi
Karlo Anchelotti shogirdlari yaqqol vaziyatlardan, jumladan, penaltidan ham foydalana olishmadi va o‘yin oxirida Holand ularni jazoladi; Mexikoda kechgan trillerda esa inglizlar ikkinchi bo‘limda bir kishi kam bo‘lib qolishdi, ammo g‘alabaga erishishdi.
6 iyulga o‘tar kechasi va tongda jahon chempionatining 1/8 final bosqichida yana ikki uchrashuv bo‘lib o‘tdi. Braziliya turnirning kashfiyot jamoasiga aylangan Norvegiyaga yutqazdi (1:2) va turnirni tark etdi, Angliya esa turnir mezbonlaridan biri Meksikaga qarshi o‘ta og‘ir o‘yin o‘tkazdi va qiyinchilik bilan g‘alaba qozondi (3:2). Endi ushbu g‘olib jamoalar keyingi bosqichda yarimfinal yo‘llanmasi uchun o‘zaro o‘yin o‘tkazadi.
Neymar kech qoldi
Braziliya – Norvegiya 1:2
Gollar: Holand, 79 (0:1). Holand, 90 (0:2). Neymar, 90+10 – penalti (1:2)
Aniq ijro etilmagan penalti: Gimaraes, 14’
Braziliya: Alisson, Gabriel Magalyayns, Markinios, Duglas Santos, Danilu Luis, Kazemiro, Gimaraes (Ederson Silva, 79), Martinelli (Danilu Santos, 67), Rayan (Neymar, 67), Vinisius Junior, Kunya (Endrik, 58)
Norvegiya: Nyuland, Ayyer, Heggem, Volfe (Estigor, 90+5), Ryuerson (Eursnes, 63), Berge, Berg, Edegor, Nusa (Bobb, 46), Syorlot (Shelderup, 46), Holand
Ogohlantirish: Neymar, 90
Braziliya Norvegiyaga qarshi beshinchi o‘yinida ham g‘alaba qozona olmadi. Karlo Anchelottining sehri ish bermadi. Holand o‘z dubli bilan Braziliyani uyiga qaytarib yubordi.
Braziliya pley-offning oldingi bosqichida Yaponiya bilan o‘yinda kambek amalga oshirgan va ko‘pchilik yana Karlo Anchelottining magiyasi haqida gapira boshlagandi. Aynan murabbiyning futbolchi almashtirishlari va taktik yechimlari ikkinchi bo‘limda vaziyatni o‘zgartirgandi.
Navbatdagi o‘yinda u Yaponiyaga qarshi o‘yindagi g‘alaba goli muallifi Gabriyel Martinellini ilk bor boshlang‘ich tarkibga kiritdi. Ammo u o‘zining doimiy ampluasi hisoblangan chap qanot hujumida emas, hujumchi ortida tushdi.
Norvegiya bosh murabbiyi Stole Solbakken esa muvaffaqiyatli tarkibni almashtirmadi va uning shogirdlari o‘yinni hujumkor boshladi. O‘yin startidayoq Edegor boshlagan hujumni Berg aniq zarba bilan yakunladi, ammo bu hujum davomida Syorlot ofsaydga tushib qolgani pand berdi.
Keyin esa norvegiyaliklar hujumda to‘p yo‘qotishi braziliyaliklarning tezkor qarshi hujumiga sabab bo‘ldi, bu hujumda Kunya penalti ishladi. Ammo nuqtaga yaqinlashgan Bruno Gimaraes darvozabonni alday olmadi.
Skandinavlar to‘pga egalik qilishda davom etdi, janubiy amerikaliklar esa omadini qarshi hujumlardan izladi va bir necha yaxshi vaziyatlarga ega bo‘ldi, ammo Nyuland ishonchli o‘ynashda davom etdi va birinchi bo‘limning eng yaxshi futbolchisiga aylandi.
Birinchi bo‘limga qo‘shib berilgan daqiqalarda norvegiyaliklar hisobni ochishga yaqin keldi: Magalyayns Holand bilan kurashda ustun keldi va to‘pni to‘xtatib qoldi, ammo ortda yetib kelgan Edegor uni ilib ketdi va jarima maydoniga kirib, yerlatib zarba berdi, Alissonning mahorati jamoasini goldan saqlab qoldi.
Solbakken tanaffusda hujum qanotlarini almashtirdi va Musa-Syorlot o‘rniga Shelderup-Bobb juftligini maydonga tashladi. Ikkinchi bo‘limning katta qismida jamoalar ehtiyotkor o‘yin uslubini qo‘llashdi. Raqibdan ortiqcha xavf sezmagan Anchelotti hatto yaxshi sport formasida bo‘lmagan Endrik va Neymarni maydonga tushirishga jazm qildi. Ammo ulardan birinchisi maydonga tushishi bilan o‘ta qulay imkoniyatni qo‘ldan boy berdi – Vinining zargarona pasidan keyin darvozabon bilan yakkama-yakka vaziyatga chiqib borayotgan yosh futbolchi to‘pni o‘zidan qochirib yubordi va yakunda xato zarba berdi.
Neymar esa jamoani qutqara olmadi, aksincha u maydonga tushganidan keyin jamoa ketma-ket gollar o‘tkazib yubordi. Avvaliga Shelderup qanotdan to‘pni havolatib darvozabon hududiga yetkazdi, u yerda Magalyayns bilan to‘p uchun kurashda ustun kelgan Holand boshda aniq zarba yo‘lladi – 1:0.
Ushbu hujumchi butun o‘yin davomida to‘pga deyarli teginmagan bo‘lsa-da, kerakli pallada o‘zini ko‘rsatdi. Ammo uning bu goli g‘alaba uchun yetarli bo‘lmasligi ham mumkin edi – 35 yoshli Nyuland yana bir qahramonlik ko‘rsatib, to‘sin ostidan kirib ketayotgan to‘pni to‘xtatib qoldi.
O‘yin oxirida esa Holand jarima maydoni tashqarisidan turib, Shelderupning yana bir pasini golga aylantirdi va o‘yin qahramoni maqomini Nyulanddan tortib oldi. Bu uning turnirdagi yettinchi goli bo‘ldi va u endi Messi hamda Mbappe bilan to‘purarlar poygasidagi ishtirokini davom ettirmoqda.
Neymar esa qo‘shimcha daqiqalarda ishlangan penaltini aniq ijro etish orqali so‘nggi raqsini ijro etdi – bu uning Braziliya milliy jamoasi safida so‘nggi o‘yini bo‘lib qoladi.
U o‘yindan keyin ijtimoiy tarmoqda shunday yozdi: «Men qayta va qayta urindim. Lekin endi hammasi tugadi».
Mexikoda triller
Meksika – Angliya 2:3
Gollar: Bellinghem, 36 (0:1). Bellinghem, 38 (0:2). Kiniones, 42 (1:2). Keyn, 60 – penalti (1:3). R. Ximenes, 69 – penalti (2:3)
Meksika: Ranhel, Montes (Alvares, 46), Vaskes, Galyardo, Sanches (Fidalgo, 79), Lira, Romo (Guterres, 61), Mora (S. Himenes, 61), Kiniones (Martines, 81), Alvarado, R. Himenes
Angliya: Pikford, Konsa, Geyi, O`Rayli (Spens, 74), Kuansa, Rays, Anderson (Byorn, 75), Bellinghem, Gordon, Saka (Stouns, 57), Keyn (Rodjyers, 90)
Ogohlantirishlar: Sanches, 71. Vaskes, 90 – Rays, 1. Geyi, 68. O`Rayli, 72
Chetlatish: Kuansa, 54
Turnir favoritlaridan biri hisoblangan Angliya – chorakfinalda. Tomas Tuxel jamoasi beshta gol urilgan va yorqin kechgan o‘yinda turnir mezbonlarining yurishini to‘xtatdi. Endi inglizlar pley-offning keyingi bosqichini 12 iyul kuni Norvegiyaga qarshi o‘tkazadi.
Angliya o‘tgan bosqichda Kongo DR bilan o‘yinda qiyinchilikka uchragandi va bosh murabbiy boshlang‘ich tarkibda o‘zgarishlar qilishga qaror qilib, hujum qanotlarini almashtirdi: Reshford va Madueke o‘rnida ilk daqiqalardan Gordon va Saka harakat qildi. Shuningdek, o‘ng qanot himoyasida Spens o‘rnini jarohatidan tuzalgan Kuansa egalladi. Haviyer Agirre esa hech narsani o‘zgartirmadi, uning jamoasida barchasi yaxshi ketayotgandi: meksikaliklar turnir boshidan buyon gol o‘tkazmagan ikki jamoadan (ikkinchisi Ispaniya) biri bo‘lib turgandi.
O‘yinni inglizlar kuchli pressing bilan boshlashdi, lekin Rays ortiqcha jonbozlik ko‘rsatib, xavfli o‘yin uchun qizil kartochka olishiga bir baxya qoldi – agar uning oyog‘i bir necha santimetrga og‘ib ketganida inglizlar o‘yin startidayoq o‘n kishi bo‘lib qolishi mumkin edi.
Shundan keyin Meksika tashabbusni qo‘lga oldi va vaziyatlarga ega bo‘la boshladi. 15-daqiqada Raul Himenes hisobni ochishga yaqin edi — ammo uning boshda darvozaning pastki burchagiga yo‘llagan murakkab zarbasini Pikford qaytarib qoldi.
Kuling brekdan keyin esa Angliya ham o‘ziga keldi va o‘yin boshidan buyon ilk bor darvoza sohasi tomon to‘g‘ri borgan zarbasini yo‘lladi. Ammo Gordonning zarbasidan keyin Ranhel to‘pni egallab oldi.
O‘yinning so‘nggi 10 daqiqaligi qizib ketdi. Meksika hujum qilishda davom etdi, hisobni esa inglizlar ochishdi. Avvaliga 36-daqiqada Rays butun maydonni to‘p bilan bosib o‘tdi va qanotda o‘zini taklif qilgan Sakaga yetkazdi, u esa to‘pni havolatib jarima maydoni markaziga oshirdi, u yerda meksikalik himoyachilar Bellinghemni qo‘riqlay olishmadi.
Meksikaliklar bu zarbadan o‘ziga kelishga ulgurmasdan ikkinchi golni o‘tkazib yuborishdi: maydon markazida turnirning eng yosh futbolchisi, 17 yoshli Gilberto Mora Gordon va Andersonning bosimi ostida to‘pni oldirdi, tezkor qarshi hujum Keyn Bellinghemning ikkinchi goliga assistentlik qilishi bilan yakunlandi.
Shunga qaramay, Meksika sochilib ketmadi va tezda javob golini urdi. Standart vaziyat ijro etilganida Konsa to‘pni uzoqlashtirishda xatoga yo‘l qo‘ydi va darvoza qarshisida yolg‘iz qoldirilgan Kiniones qaytarib bo‘lmas zarba yo‘lladi va turnirdagi to‘rtinchi golini urdi – 1:2.
Tanaffusga qadar Raul Himenesda yana ikkita yaxshi vaziyat bo‘ldi: avvaliga olis burchakni aniq nishonga ololmadi, keyin esa Pikford uning zarbasidan keyin to‘sin ostiga borayotgan to‘pga yetib bordi.
Meksikaliklar himoyachisi Sesar Montes esa hisobni tenglashtirish uchun o‘ta qulay vaziyatni qo‘ldan chiqardi: darvozaga juda yaqin turgan futbolchi to‘pga bir teginishda zarba bera olmadi va ortdan yetib kelgan Bellinghem xavfni bartaraf etdi.
Meksikaliklar ustozi ushbu futbolchisini tanaffusda almashtirib yubordi.
Ikkinchi bo‘lim startida inglizlar uchinchi golni ham urishga yaqin keldi, ammo Niko O’Raylining zarbasidan keyin to‘p ustunga bordi. Biroz o‘tib esa o‘yinni butkul o‘zgartirib yuborgan voqea sodir bo‘ldi: 53-daqiqada Jarrel Kuansa jamoadoshlarini qiyin ahvolga solib qo‘ydi. U Galyardodan to‘pni olib qo‘yishga urinib, butsasining ostki qismi bilan raqibning to‘pig‘iga zarba berdi, bosh hakam VAR aralashuvidan keyin inglizlar himoyachisini maydondan chetlatdi.
«Atsteka» o‘yingohiga yig‘ilganlar bayram qilishga kirishdi, ammo ularning quvonchi uzoqqa cho‘zilmadi – meksikaliklar darvozaboni Ranhel jarima maydoniga kirib kelgan Gordonni yiqitdi va penaltiga sababchi bo‘ldi. Keyn zarbani aniq ijro etib, turnirdagi gollari sonini 6 taga yetkazib oldi.
Meksika son jihatdan ustunligidan foydalanib, to‘liq hujumga o‘tdi va gollar shousini davom ettirdi. Javob goli ham penaltidan urildi – himoyaga yordamga qaytgan Keyn to‘pni uzoqlashtirishga urinib, ortdan kelgan raqib futbolchisiga zarba berib yubordi.
Nuqtaga yaqinlashgan Himenes sovuqqonlik bilan zarba yo‘lladi – 2:3.
Shu pallada navbatdagi kuling brek inglizlar joniga ora kirdi. Tomas Tuxel yuzaga kelgan tanaffusdan foydalanib, shogirdlariga kerakli ko‘rsatmalarni berdi va jamoa 5-3-1 sxemasida o‘ynashga kirishdi. Murabbiy zaxiradan Jon Stounz, Spensa hamda bu mavsumda hali o‘ynamagan Den Byorn kabi himoyachilarni maydonga tashladi, uning jamoasi qolgan yarim soat mobaynida (o‘yinga 11 daqiqa qo‘shib berildi) bor e’tiborini raqibni jarima maydoniga kiritmaslikka qaratdi va buni a’lo darajada uddaladi. Meksikaliklarning havodan uzatmalari naf bermadi. O‘yinga qo‘shib berilgan daqiqalar tugayotganida hisob tenglashishi mumkin edi, ammo darvozabon hududida ikki raqib qurshovida turgan Stounz to‘pni maydondan chiqarib yuborishga ulgurdi.
Inglizlar hisobdagi ustunlikni saqlab qolish uchun jang qildi va yakunda omon qoldi.
Endi navbatda 12 iyul kuni Erling Holand boshchiligidagi norveglarga qarshi kechadigan yana bir jang kutmoqda.
Uning iqrori FIFA rahbarini noqulay ahvolda qoldirdi.
AQSh prezidenti Donald Tramp FIFAdan mamlakat milliy jamoasi hujumchisi Folarin Balogunning qizil kartochkasini bekor qilishni so‘raganini rasman tan oldi. Avvalroq Xalqaro futbol federatsiyasi shov-shuvli tarzda ushbu amerikalik futbolchining diskvalifikatsiyasini bir yilga kechiktirgandi va unga Belgiyaga qarshi o‘yinda qatnashish imkonini bergandi.
Prezidentning samimiy iqrori
Tramp 6 iyul kuni Oq uyda jurnalistlar bilan muloqot chog‘ida jahon chempionatidagi so‘nggi shov-shuvli voqealar yuzasidan bayonot berdi. Siyosatchining so‘zlariga ko‘ra, turnir 1/16 finalida Bosniya va Hersegovinaga qarshi kechgan o‘yinda (2:0) Balogunni chetlatish uchun hech qanday sabab bo‘lmagan.
«Men epizodni ko‘rdim. O‘zim yaxshi sportchi bo‘lganman, sportni yoqtiraman va uni juda yaxshi tushunaman. U yerda fol yo‘q edi. Shunchaki ikki baquvvat yigit katta tezlikda yugurayotib, o‘zaro to‘qnashib ketgan. Bu hakam esa… uning tarixini surishtiradigan bo‘lsak, savollar tug‘iladi. Bilasizmi, men mojaro keltirib chiqarishni yoqtirmayman, ammo u juda shubhali. U shunday qarorlar chiqarganki, hech kim ishonmagan. Hatto raqib jamoalar ham hayron bo‘lishgan», – dedi Tramp.
U sportdan xabardor ekanini aytganiga qaramay, futboldagi qoidalarni yaxshi tushunmasligini ko‘rsatib qo‘ydi.
«Ular bu vaziyatni sekinlashtirilgan kadrda qayta ko‘rib chiqmasligi kerak edi. Chunki u yerda barchasi boshqacha ko‘rinadi. Oddiy tezlikda qaraganda esa ikki yigit shunchaki to‘qnashib ketganini ko‘rish mumkin.
Balogun hech qanday yomon ish qilmadi. U – bizning eng yaxshi, juda muhim futbolchilarimizdan. Ular esa unga qizil kartochka ko‘rsatdi…
Men qizil kartochka nimaligini ham bilmasdim. Buni unchalik muhim emas deb o‘ylagandim. Keyin esa menga u keyingi o‘yinda qatnasha olmasligini aytishdi… Bu adolatsizlik bo‘lgan bo‘lardi. Eng yaxshi futbolchingdan o‘yin vaqtida ayrilish, kimnidir o‘yin davomida jazolash – boshqa ish. Ammo hali o‘ynalmagan o‘yin uchun jazolash – haddan tashqari adolatsizlik, bunday qilib bo‘lmaydi», – deya qayd etgan prezident.
Shundan keyin Tramp chindan ham FIFA prezidenti Janni Infantinoga qo‘ng‘iroq qilib, Balogunning diskvalifikatsiyasini bekor qilishni so‘raganini tan oldi.
«Shuning uchun, ha, men FIFAdan bu qarorni qayta ko‘rib chiqishni so‘radim. Men o‘zim juda hurmat qiladigan odam bilan gaplashdim. Darvoqe, uni endi yanada ko‘proq hurmat qila boshladim. Uni bungacha ham hurmat qilardim, endi esa o‘n karra ko‘proq hurmat qilaman. U AQShda jahon chempionatini o‘tkazish uchun juda ko‘p ish qildi.
Umuman olganda, bu yerda jahon chempionati mening sharofatim bilan o‘tkazilmoqda, Bayden tufayli emas. U vaqtda Bayden uxlayotgandi», – deya qo‘shimcha qilgan Tramp.
«Men FIFA adolatiga ishonaman»
So‘nggi kun davomida butun dunyo bo‘ylab tanqidga uchragan va iste’fosi talab qilingan Infantinoning o‘zi uchun esa Trampning iqrori yoqimsiz syurpriz bo‘ldi. Shuning uchun FIFA rahbari o‘zini oqlashga shoshilib, rasmiy murojaatini e’lon qildi. Futbol mulozimi AQSh prezidenti bilan gaplashganini tan olgan, ammo bu odatiy amaliyot ekanini va lobbizm bo‘yicha hech qanday shubha bo‘lmasligi kerakligini qayd etgan.
«Ha, men futbol bo‘yicha jahon chempionati bilan bog‘liq masalalarni muntazam ravishda Qo‘shma Shtatlar prezidenti bilan muhokama qilaman, chindan ham u menga qo‘ng‘iroq qildi. Menga dunyodan davlat rahbarlari, hukumat amaldorlari, futbol arboblari va biznes rahbarlaridan turli masalalar bo‘yicha shunday qo‘ng‘iroqlar bo‘lyapti. Suhbat davomida men FIFAning mustaqil sud organlari ishtirokida yuridik jarayon ketayotgani va bu masala vakolatli organlar tomonidan belgilangan tartibda hal etilishini tushuntirdim. FIFA tizimi shunday ishlaydi va bu men doimo amal qiladigan tamoyildir», – deydi Infantino.
FIFA prezidenti tashkilotning bunday masalalar bo‘yicha qarorlariga ta’sir ko‘rsata olmasligini va Balogunning qizil kartochkasi bekor qilinganidan boshqalar bilan bir vaqtda xabar topganini qo‘shimcha qilgan.
«FIFA sud organlari mustaqil. Ular mustaqil ravishda harakat qiladi, FIFA Intizom kodeksini qo‘llagan holda qoidalar va har bir ishning o‘ziga xos holatlarini inobatga olib, qaror qabul qilishadi. Ularning mustaqilligi futbolga ishonch va uning halolligi uchun juda muhimdir va bu har doim hurmat qilinishi kerak. Men FIFA intizomiy qo‘mitasi qarorlarini ular e’lon qilinganda o‘qiyman. Ba’zan ular meni ham hayratga soladi. Ba’zan ularga qo‘shilaman, ba’zan esa – yo‘q. Ammo men ularni va ularni qabul qiluvchi organlarning avtonomiyasini doimo hurmat qilaman. Bizga bu qaror yoqadimi yoki yo‘qmi – buning ahamiyati yo‘q», – degan Infantino.
Eslatib o‘tamiz, 6 iyul kuni Xalqaro futbol federatsiyasi jahon chempionati 1/16 finalida Bosniya va Hersegovinaga qarshi o‘yinda (2:0) qizil kartochka olgan Balogunning diskvalifikatsiyasini amalda bekor qildi (futbolchiga bir yil sinov muddati berildi, u shu vaqt ichida yana intizomiy qoidabuzarlik qiladigan bo‘lsa, jazo qo‘llanadi). Natijada amerikalik hujumchi 1/8 finalda Belgiyaga qarshi o‘ynaydigan bo‘ldi, holbuki reglament bo‘yicha u kamida ikki o‘yindan chetlatilishi ko‘zda tutilgandi. Tunda bo‘lib o‘tgan o‘yinda u maydonga tushdi va 90 daqiqa o‘ynadi, uch bor zarba berib, gol ura olmadi, AQSh esa yirik hisobda (1:4) yutqazdi.
AQShga esa katta shov-shuv ko‘tarib, o‘yinga tushirilgan Balogun ham yordam bera olmadi.
Ronaldu baribir jahon chempionatini zabt etolmadi
Portugaliya – Ispaniya 0:1
Gol: Merino, 90+1 (0:1)
Portugaliya: Koshta, Ruben Diash, Veyga, Nunu Mendesh (Semedu, 56), Joau Kanselu (Dalot, 71), Joau Nevesh, Vitinya (Bernardu Silva, 83), Brunu Fernandesh, Joau Feliks (Leau, 71), Pedru Netu (Konseysau, 83), Krishtianu Ronaldu
Ispaniya: Simon, Lyaport, Kubarsi, Kukurelya, Porro, Rodri, Pedri (Merino, 85), Olmo (Ruis, 85), Baena (Torres, 75), Yamal, Oyyarsabal (Iglesias, 90)
Ogohlantirishlar: Bernardu Silva, 89. Veyga, 90 – Torres, 90
Portugaliya 1/8 finalda Ispaniyaga qarshi o‘yinning qo‘shimcha daqiqalarida gol o‘tkazib, jahon chempionatini tark etdi. Bu Krishtianu Ronaldu uchun milliy jamoa safidagi oxirgi o‘yin bo‘lib qoldi.
O‘yinning ilk daqiqalarida – maydon markazi uchun kurash kechdi. Portugaliya maydon markazini Ispaniyaga boy bermadi. Yamal o‘yin debyutida Mendesh bosimi ostida bir necha bor oddiy vaziyatlarda to‘p yo‘qotdi. Shunga qaramay, o‘yindagi ilk xavfli vaziyat aynan ispanlarda yuzaga keldi. Sakkizinchi daqiqada Olmo chiziqlar orasini kesib o‘tuvchi pasi bilan Oyarsabalni yakkama-yakka vaziyatga chiqarib yubordi, ammo hujumchi shoshib qoldi va yaqin masofadan turib, xato zarba berdi.
Ko‘p o‘tmay Roberto Martines shogirdlari Ronalduni zarbdor pozitsiyaga chiqarish yo‘llarini izlay boshlashdi. Standart vaziyatlardan biri ijro etilganida Krishtianu Rodri bilan kontaktdan keyin jarima maydonida yiqildi. Ammo angliyalik hakam Teylor bu epizod folga tortmaydi, deb hisobladi. Keyin esa Portugaliya sardori o‘ng qanotda yaxshi ochildi va uzatmani qabul qilib, yaqin burchakka zarba berdi – ispanlar darvozaboni ishonchli harakat qildi.
Keyin esa seyv qilish navbati Diogu Koshtaga keldi: u Lamin Yamalning o‘z uslubida yo‘llagan aylanma zarbasini ham, qaytgan to‘pga Baena tomonidan berilgan ikkinchi zarbani ham qaytardi.
Bo‘lim oxirlarida esa tashabbus portugallar qo‘liga o‘tdi va Simon ham ikkitalik seyv amalga oshirdi: u avvaliga Felishning boshda yo‘llagan zarbasini, keyin Ronaldu akrobatik holatda yo‘llagan zarbani bartaraf etdi. 41-daqiqada Portugaliya bu safargi mundialda yana bir marta standart vaziyatni ayyorona ijro etdi. Mendesh olis burchakka kuchli zarba berdi, ammo to‘p Porroning boshiga tegdi va yo‘nalishini o‘zgartirib, to‘singa bordi.
Tanaffusdan keyin ham o‘yin qarama-qarshi kurslarda kechdi. Mendesh Yamalni zararsizlantirishda davom etdi, ammo 50-daqiqada amalda o‘yin natijasiga ta’sir ko‘rsatgan epizod sodir bo‘ldi. Lamin navbatdagi marta portugallar jarima maydoniga yorib kirdi, uni qarshi olgan Mendesh xavfni bartaraf etdi, ammo shu vaziyatda jarohat olib, o‘yinni davom ettira olmaydigan bo‘ldi.
Shundan keyin portugallar Yamalni ikki kishi bo‘lib qo‘riqlay boshladi, bu esa boshqalarning imkoniyatini yaxshiladi.
O‘yinning so‘nggi qismida futbolchilar charchab qolishdi va murabbiylar shaxmat o‘ynashga kirishdi. De la Fuente Pedrini, Martines esa Vitinyani maydondan olishiga to‘g‘ri keldi.
O‘yin overtaymga qarab keta boshladi. Ammo o‘yinga qo‘shib berilgan daqiqalar boshlanganida portugallar konsentratsiyani yo‘qotishdi. Portugallar safida zaxiradan o‘yinga qo‘shilgan Bernardu Silva keraksiz vaziyatda Mikel Merinoga fol ishlatdi, ispanlar to‘pni tezda o‘yinga kiritib yuborishdi va kombinatsiya yakunida «Arsenal» yarimhimoyachisi darvozabon bilan yakkama-yakka vaziyatga chiqib borib, g‘alaba golini urdi.
Portugallar qolgan daqiqalarni to‘liq hujumda o‘tkazishdi, ammo mag‘lubiyatdan qutulib qola olishmadi.
Yevropa chempionlari jahon chempioni bo‘lish yo‘lidagi yurishini davom ettirdi. Ronaldu uchun esa jahon chempioni bo‘lish armon bo‘lib qoladigan bo‘ldi.
Belgiya AQShni jazoladi
AQSh – Belgiya 1:4
Gollar: De Ketelare, 9 (0:1). Tillman, 31 (1:1). De Ketelare, 33 (1:2). Vanaken, 57 (1:3). Lukaku, 90+3 (1:4)
AQSh: Friz, Richards, Rim, Robinson (Arfsten, 90+2), Frimen, Adams (Pepi, 72), Tillman, Makkenni, Pulishich (Berhalter, 59), Dest (Reyna, 46), Balogun (Rayt, 90+2)
Belgiya: Kurtua, Mehele, Ngoy, De Kyuyper, Kastan, Raskin (Vitsel, 89), Onana (Vanaken, 21), Tilemans, Trossar (Salemakers, 89), Lukebakio (Lukaku, 67), De Ketelare (Doku, 67)
Ogohlantirishlar: Makkenni, 35. Tillman, 69
AQSh va Belgiya milliy jamoalari o‘zaro o‘yinda chorakfinalda Ispaniyaga kim raqib bo‘lishiga oydinlik kiritishdi. Yakunda turnir mezbonlari yirik hisobda mag‘lub bo‘lishdi.
Aytish mumkinki, o‘yin oldidan bo‘lib o‘tgan voqealar Belgiya futbolchilarini yanada jipslashtirdi (FIFA Trampning so‘rovi bilan Folarin Balogunning diskvalifikatsiyasini kechiktirgan, Belgiya tomonining e’tirozi esa qanoatlantirilmagandi).
O‘yin boshlanishi arafasida jamoa sardori Romelu Lukaku butun jamoani bitta joyga yig‘di va ehtirosli nutq so‘zladi. Va «qizil iblislar» ilk daqiqalardan raqibni yanchib tashlash uchun oldinga tashlanishdi – yevropaliklar bu turnir boshidan buyon bu qadar jahldor ko‘rinishmagandi. Amerikaliklar darvozaboni Metyu Friz birinchi daqiqadayoq qahramonlik ko‘rsatib, Timoti Kastanning yuqori burchakka yo‘llagan zarbasini qaytarishiga to‘g‘ri keldi. Ammo u uzoq dosh berolmadi va Sharl De Ketelare 9-daqiqada baribir hisob ochdi.
Mezbonlar esa maydonda umuman yo‘qolib qolishdi. Muxlislar Jyessi Marsh shogirdlarini bu turnirda hali bu qadar ilojsiz va parokanda holda ko‘rishmagandi. Va faqat suv ichish uchun qilingan tanaffusdagina Maurisio Pochettino shogirdlarini o‘ziga keltira oldi va ko‘p o‘tmay hisob tenglashdi. Bu vaziyatda Malik Tillmanning zarbasidan keyin to‘p raqib futbolchisiga tekkan holda yo‘nalishni o‘zgartirishi amerikaliklarga qo‘l keldi.
Ammo Belgiya o‘tkazib yuborilgan golni his qilmadi. Jamoa to‘p maydon markaziga keltirilishi bilan yana oldinga yugurdi va hisobda yana oldinga chiqib oldi – De Ketelare bu safar Leandro Trossarning qanotdan uzatmasini golga aylantirdi. Birinchi bo‘lim statistikasi maydondagi vaziyatni yaqqol ifodalardi: zabalar soni – 11:3, darvoza sohasiga to‘g‘ri borgan zarbalar soni – 5:1, xG – 1,90 ga 0,42. Barchasi Belgiya foydasiga.
Birinchi bo‘lim oxiri va ikkinchi bo‘lim boshini AQSh nisbatan yaxshi o‘tkazdi, ammo 57-daqiqadagi halokatli xato o‘yin taqdirini hal qildi. Darvozabon Friz himoyachilarga yordam berish uchun jarima maydonini tashlab chiqdi, ammo to‘pdan o‘z vaqtida qutulish o‘rniga sustkashlik qildi va uni Vanakenga sovg‘a qildi – belgiyaliklar yarimhimoyachisi esa osonlik bilan bo‘sh darvozani ishg‘ol etdi. Amerikaliklar sardori Tim Rim zarbani to‘sishi mumkin edi, ammo to‘p yo‘liga oyog‘ini to‘g‘ri qo‘ya olmadi.
Biroz o‘tib mezbonlar yetakchisi Kristian Pulishich jarohat olib maydonni tark etdi. Qolgan daqiqalarda amerikaliklar javob golini urishga qattiq harakat qilishdi, ammo o‘yin yirik hisobda yakunlandi. Romelu Lukaku bu safar ham zaxiradan o‘yinga qo‘shilib, o‘z nomini tabloga yozdirib qo‘ydi va jahon chempionatida to‘rtta o‘yinda joker sifatida gol urgan ilk futbolchiga aylandi.
Endi «qizil iblislar» 10 iyul kuni chorakfinal doirasida Ispaniyaga qarshi maydonga tushadi.
Portugaliya terma jamoasi hujumchisi Krishtianu Ronaldu milliy jamoadagi faoliyatiga baho berib, mamlakat uchun uchta yirik xalqaro sovrinni qo‘lga kiritganidan faxrlanishini ta’kidladi.
Foto: Getty Images / 2025
2026 yilgi jahon chempionatining 1/8 finalida Ispaniyaga 0:1 hisobida mag‘lub bo‘lib, musobaqani tark etgan Portugaliya terma jamoasi sardori Krishtianu Ronaldu o‘z faoliyati yuzasidan fikr bildirdi.
«Men bor kuchimni berdim. Portugaliyaga uchta sovrin olib keldim, mengacha esa mamlakatda birorta ham xalqaro sovrin yo‘q edi. Men bundan baxtliman.
Yevro–2016 — terma jamoa tarixidagi eng muhim sovrin. Men uchun uning qadri, aslida, jahon chempionligi bilan teng», — dedi Ronaldu.
Ronaldu Portugaliya safida 2016 yilgi Yevropa chempionatida g‘olib chiqqan. Shuningdek, u terma jamoa bilan ikki marta UYeFA Millatlar ligasi bosh sovrinini ham qo‘lga kiritgan.
41 yoshli hujumchi Portugaliya terma jamoasi safida 233 ta uchrashuvda maydonga tushib, 146 ta gol va 46 ta golli uzatma muallifi bo‘lgan. U milliy jamoalar tarixida eng ko‘p gol urgan futbolchi hisoblanadi.
Xalqaro futbol federatsiyasi (FIFA) 2030-yilda o‘tkaziladigan futbol bo‘yicha Jahon chempionati mezbonlarini rasman tasdiqladi.
Unga ko‘ra, navbatdagi Jahon chempionati tarixdagi eng noodatiy musobaqalardan biri bo‘ladi. Turnirning asosiy bahslariga Ispaniya, Portugaliya va Marokash mezbonlik qiladi.
Musobaqaning 100 yilligi munosabati bilan ilk uchrashuvlar esa Urugvay, Argentina va Paragvayda o‘tkaziladi. Bu mamlakatlar 1930-yilgi ilk Jahon chempionatiga hurmat ramzi sifatida tanlangan.
Shu tariqa, 2030-yilgi mundial ilk bor uch qit’a va olti mamlakat hududida o‘tkaziladi. Turnirda 48 ta terma jamoa ishtirok etishi rejalashtirilgan.
O‘zbekistonlik grossmeyster Nodirbek Abdusattorov Xorvatiya poytaxti Zagreb shahrida bo‘lib o‘tgan nufuzli «Grand Chess Tour 2026» musobaqasining uchinchi bosqichi – «Super Rapid and Blitz Croatia» turnirida kumush medalni qo‘lga kiritdi.
1–5 iyul kunlari o‘tkazilgan musobaqada dunyoning eng kuchli 10 nafar grossmeysteri ishtirok etdi. O‘zbekiston sharafini himoya qilgan Nodirbek Abdusattorov rapid va blits bahslari yakunlariga ko‘ra 23,5 ochko to‘plab, Fransiya vakili Alireza Firuzja bilan bir xil natija qayd etdi.
G‘olibni aniqlash uchun tay-breyk o‘yinlari tashkil etildi. Ikki partiya 1:1 hisobida yakunlangach, armegeddon bahsida Alireza Firuzja g‘alaba qozonib, chempionlikni qo‘lga kiritdi.
Yakuniy natijalarga ko‘ra:
Alireza Firuzja (Fransiya)
Nodirbek Abdusattorov (O‘zbekiston)
Maksim Vashe-Lagrav (Fransiya)
Turnirni ikkinchi o‘rinda yakunlagan hamyurtimiz 42,5 ming AQSh dollari miqdoridagi mukofotga sazovor bo‘ldi.
O‘zbekiston aviayuk tashish sur’atlari bo‘yicha Markaziy Osiyoda yetakchiga aylandi
Andijondagi YTH qasddan odam o‘ldirish deya malakalanishi kerak
Tramp Infantinodan Balogunga jazoni bekor qilishni so‘raganini tan oldi
-
Siyosat4 days agoO‘zbekiston va Gruziya strategik sheriklik deklaratsiyasini imzoladi
-
Jamiyat4 days agoO‘zbekistonda ayollar umr ko‘rish bo‘yicha erkaklardan oldinda
-
Siyosat4 days agoShavkat Mirziyoyev Gruziyaning oliy milliy mukofoti bilan taqdirlandi
-
Iqtisodiyot4 days ago
Dollar kursida keskin pasayish yuz berdi
-
Iqtisodiyot4 days ago
Iyunda eskrou orqali 34 mingdan ortiq bitim rasmiylashtirildi
-
Iqtisodiyot5 days ago“Quyoshli xonadon”larga aprel–may oylari uchun subsidiya to‘lab berildi
-
Dunyodan5 days ago
Kaliforniyadagi Jahon chempionati muxlislar zonasi yaqinida sodir bo’lgan otishmada bir kishi halok bo’ldi
-
Jamiyat4 days agoToshkentda qurilish tashkiloti markaziy kanalizatsiya quvurini uzib yubordi