Hukumat qarori bilan “Zo‘ravonlikdan jabrlangan, o‘ziga nisbatan zo‘ravonlik sodir etilishi xavfi ostida va ijtimoiy jihatdan xavfli ahvolda bo‘lgan bolalar hamda ularning oilalariga ijtimoiy xizmatlarni tashkil qilish tartibi to‘g‘risida”gi nizom tasdiqlandi.

Nizomga muvofiq, zo‘ravonlikdan jabrlangan yoki zo‘ravonlik xavfi ostida bo‘lgan bolalar va ularning oilalariga ijtimoiy xizmatlar himoya qilish rejasi asosida ko‘rsatiladi. Ijtimoiy jihatdan xavfli ahvolda bo‘lgan bolalar va ularning oilalari uchun esa individual integratsiya rejasi ishlab chiqiladi.

Qarorga ko‘ra, ijtimoiy himoyaga muhtoj bolalar uchun quyidagi turdagi xizmatlar nazarda tutilgan:

6 oygacha bo‘lgan muddatga qisqa muddatli ijtimoiy xizmatlar;
1 yilgacha bo‘lgan muddatga uzoq muddatli ijtimoiy xizmatlar;
1 yilgacha bo‘lgan muddatga tun-u kun ko‘rsatiladigan ijtimoiy xizmatlar.

Shuningdek, bolalar va ularning oilalari uchun “Mehrli oila” xizmati yo‘lga qo‘yiladi.

Ijtimoiy xizmat ko‘rsatish istagini bildirgan yakka tartibdagi tadbirkorlar yoki yuridik shaxslar “Yagona milliy ijtimoiy himoya” axborot tizimidagi ijtimoiy xizmatlar ko‘rsatuvchilarning yagona reyestriga kiritilishi shart. Buning uchun “Ijtimoiy himoya” axborot tizimi orqali so‘rovnoma to‘ldiriladi va u 10 ish kuni ichida belgilangan talablar asosida ko‘rib chiqiladi.

Talablarga kamida ikki nafar psixoijtimoiy mutaxassisning mavjudligi, ularning ish staji va tibbiy ma’lumotnomasi, shuningdek, binolarda sanitariya holatining ta’minlanganligi kiradi.

So‘rovnoma tasdiqlanganidan so‘ng talabgor yagona reyestrga kiritilib, bu haqda elektron tarzda xabar beriladi.

Source link

Prezident Shavkat Mirziyoyev 12-fevral kuni Andijon viloyatini ijtimoiy-iqtisodiy rivojlantirish bo‘yicha olib borilayotgan ishlar va 2026 yil uchun ustuvor vazifalar yuzasidan yig‘ilish o‘tkazdi.

Yig‘ilish avvalida qayd etilganidek, Andijon – aholisi eng zich joylashgan hudud. Viloyatda 3,5 milliondan ortiq aholi istiqomat qiladi, har yili 80 mingga yaqin tug‘ilish qayd etilmoqda.

Yer resurslari cheklangan sharoitda har bir gektar yer, har bir loyiha hamda har bir investitsiya yuqori qo‘shilgan qiymat va barqaror ish o‘rni yaratishi shartligi ta’kidlandi. Bu viloyat rahbariyati oldidagi eng asosiy vazifa ekani ko‘rsatib o‘tildi.

2025-yil yakunlariga ko‘ra, yalpi hududiy mahsulot 107,7 trillion so‘mni tashkil etib, 6,8 foizga oshdi. Sanoat mahsulotlarini ishlab chiqarishda 7,2 foiz, xizmatlar hajmida 15,1 foiz, qishloq xo‘jaligida 4,7 foiz o‘sish qayd etildi.

Joriy yilda iqtisodiyot va sanoatni 8 foizga, xizmatlarni 16,3 foizga, qishloq xo‘jaligini 5,9 foizga oshirish maqsad qilingan. Xorijiy investitsiyalarni 2025 yildagi 2,5 milliard dollardan 2026-yilda 3,5 milliard dollarga, eksportni 1,3 milliard dollardan 1,5 milliard dollarga yetkazish rejalashtirilgan.

2025-yilda 383 ming aholining bandligi ta’minlangan bo‘lsa, 2026-yilda 489,5 ming aholining bandligini ta’minlash, ishsizlikni 3,6 foizga, kambag‘allikni 2,4 foizga tushirish muhimligi ta’kidlandi.

Asaka, Oltinko‘l, Xo‘jaobod, Shahrixon tumanlari hamda Andijon shahrini ishsizlik va kambag‘allikdan xoli hududlarga aylantirish vazifasi qo‘yildi. “Og‘ir” toifadagi Bo‘ston, Paxtaobod va Ulug‘nor tumanlarida kambag‘allikni kamida ikki barobar qisqartirish belgilandi.

Joriy yilda viloyatda 798 million dollarlik loyihalarni ishga tushirish rejalashtirilgani ta’kidlandi.

Jumladan, Asaka, Buloqboshi va Shahrixon tumanlarida charm-poyabzal, qurilish materiallari hamda dastgohlar ishlab chiqarishga ixtisoslashgan 3 ta mikrosanoat markazi tashkil etiladi. 110 ta qishloq hamda 26 ta chegaraoldi va olis mahallalarda qishloq xo‘jaligi mahsulotlarini qayta ishlash, kichik sovitkichli omborlar tashkil qilish va mikrosanoat loyihalari amalga oshiriladi.

Andijon tumanidagi “Ipak yo‘li” erkin iqtisodiy zonasida 100 gektardan ortiq yer maydoni bo‘sh turibdi. Yer resurslari cheklangan sharoitda tayyor infratuzilmasi bor maydonlarda yuqori qo‘shilgan qiymatli loyihalarni joylashtirish, minglab ish o‘rinlarini yaratish imkoniyatidan to‘liq foydalanish zarurligi ko‘rsatib o‘tildi.

Viloyatda qishloq xo‘jaligini rivojlantirishga alohida e’tibor qaratildi.

Joriy yilda paxtachilikda hosildorlikni oshirish maqsadida xorijiy navlar joylashtiriladigan va ilg‘or “76×10” sxemasi asosida ekiladigan paxta maydonlarini kengaytirish, 472 dona yangi texnika xarid qilish rejalashtirilgan. 2 ming gektar kam samarali eski bog‘lar intensiv bog‘larga aylantiriladi, 6,8 ming gektar yer foydalanishga qayta kiritiladi.

Yangi tajriba sifatida Oltinko‘lda gulchilik, Izboskanda ko‘chatchilik, Asakada issiqxonachilik, Qo‘rg‘ontepada sabzavotchilik, Buloqboshida uzumchilik bo‘yicha tomorqa maktablari tashkil etiladi.

2025 yilda viloyatga 460 ming xorijiy va 1,8 million mahalliy turist kelgan. Joriy yilda xorijiy turistlar sonini 700 mingga, mahalliy sayyohlarni esa 2,5 millionga yetkazish maqsad qilingan.

Shu maqsadda Buloqboshidagi “Shirmonbuloq”, Xo‘jaoboddagi “Imom ota” va Xonoboddagi turizm markazlarini rivojlantirish uchun alohida direksiya ochiladi. Tuman va shahar markazlaridagi 91 ta mahallani bog‘lovchi gavjum ko‘chalarda savdo, dam olish va ko‘ngilochar maskanlar barpo etiladi

Andijonda uy-joy masalasi boshqa hududlarga nisbatan ancha dolzarb. Joriy yilda viloyatdagi “Yangi O‘zbekiston” massivlarida 54 ta, boshqa hududlarda esa 158 ta ko‘p qavatli uylar qurilishi kutilmoqda.

“Qurilishga tayyor yer” tizimini joriy etish orqali loyihalarni boshlash muddatini 120 kundan 30 kungacha qisqartirish mumkinligi ko‘rsatib o‘tildi. Jalaquduqda ushbu yangi tizim asosida zamonaviy uy-joylar qurish bo‘yicha tajriba boshlanadi.

Viloyatda 11 ta oliy ta’lim muassasasi faoliyat yuritmoqda, 94 mingdan ortiq talaba tahsil olmoqda, 56 ta texnikumda 46 ming nafar o‘quvchi kasblarga o‘rgatilmoqda. Oliygohlardagi ilmiy salohiyatni oshirish, dual ta’lim qamrovini kengaytirish choralari belgilab olindi.

Tibbiyot texnikumlariga til o‘rgatish bo‘yicha ilg‘or xususiy ta’lim tashkilotlarini jalb qilib, yiliga 4 mingdan ziyod yoshlarning Yevropa davlatlariga ishlashga borishiga ko‘maklashish tashabbusi qo‘llab-quvvatlandi.

Yoshlarni qo‘llab-quvvatlash maqsadida Ijtimoiy reyestrga kirmagan oilalarning iqtidorli farzandlariga ham sport, madaniyat va san’at sohasidagi tashabbuslari uchun “Yoshlar daftari” jamg‘armasidan 41 million so‘mgacha subsidiya berish taklif qilindi. Prezidentimiz ushbu tartibni Andijon viloyatidan boshlashni topshirdi.

Davlatimiz rahbari yig‘ilish yakunida belgilangan vazifalar ijrosi Andijon aholisi hayotida aniq va sezilarli natija berishi shartligini ta’kidlab, mutasaddilarga tegishli topshiriqlar berdi.

Source link

Jahongir Mirpo‘latov Toshkent shahar soliq boshqarmasi boshlig‘i vazifasini bajaruvchi tayinlandi. 

Mirpo‘latov Jahongir Muzapparovich Soliq qo‘mitasi raisining tegishli buyrug‘i bilan Toshkent shahar soliq boshqarmasi boshlig‘i vazifasini bajaruvchisi etib tayinlandi. 

U tayinlovga qadar Soliq qo‘mitasi Yuridik shaxslarga xizmat ko‘rsatish departamenti direktori lavozimida faoliyat yuritgan.

Eslatib o‘tamiz, prezident Shavkat Mirziyoyev 27 yanvarda bo‘lib o‘tgan yig‘ilishda Toshkent shahri soliq idoralarini tanqid qildi. Shundan so‘ng Toshkent shahar soliq boshqarmasi sobiq boshlig‘i Yunusjon Nasimjonov ishdan olindi. 

Source link

Istanbulda so‘nggi vaqtlardagi eng shafqatsiz jinoyatlardan biri tafsilotlari fosh bo‘lmoqda: Umraniye tumanidagi ijaraga olingan kvartirada ikki ayol – O‘zbekiston fuqarolari Durdona Hakimova va Sayyora Ergashaliyeva o‘ldirildi. Ularning jasadi bo‘laklarga bo‘linib, turli chiqindi qutilariga tashlangan.

Turkiya OAV ma’lumotlariga ko‘ra, politsiya Durdona Hakimovaning o‘ldirilishini tergov qilish chog‘ida Umraniye tumanidagi xuddi shu uyda yana bir qurbon bo‘lganini aniqladi – 32 yoshli Sayyora Ergashaliyeva. Tergovchilarning fikricha, u avvalroq o‘ldirilgan va bo‘laklangan.

Ma’lum qilinishicha, Sayyora Ergashaliyeva 23 yanvardan beri bedarak yo‘qolgan deb ro‘yxatga olingan.

Politsiya ayollar gumonlanuvchilar bilan birga yashagan uy atrofidagi xavfsizlik kameralari yozuvlarini qayta ko‘rib chiqdi.

Kadrlarda turli kunlarda gumonlanuvchilar xonadondan qora qoplarni olib chiqib, ko‘cha bo‘ylab olib yurganini ko‘rish mumkin. Shuningdek, ular oq jomadon bilan chiqib, uni Shishli hududidagi axlat qutisiga tashlab ketgan.

Tergov versiyasiga ko‘ra, bu jinoyatlarning xronologiyasi quyidagicha bo‘lishi mumkin: Sayyora Ergashaliyeva birinchi bo‘lib, keyin Durdona Hakimova o‘ldirilgan. Bu qotilliklar bir-biri bilan qanchalik bog‘langanligi hozir aniqlanmoqda.

Durdona Hakimova va Sayyora Ergashaliyeva

Kamera yozuvlari bilan o‘tkazilgan tergov quyidagi voqealar ketma-ketligini ko‘rsatadi:

– 23 yanvar kuni Sayyora Ergashaliyeva Umraniyadagi kvartiraga kiradi.

– Uning ortidan ikki gumonlanuvchi erkak ham kirgan.

– 24 yanvar kuni gumonlanuvchilar xonadondan bir necha bor qora qoplar bilan chiqib ketgan. Oqibatda ular oq jomadonni olib, taksiga o‘tirib, Shishli tumaniga boradi. U yerda jomadon chiqindi konteyneriga tashlanadi. Aynan shu jomadonda dastlabki ma’lumotlarga ko‘ra Durdona Hakimovaning tana bo‘laklari bo‘lgan.

Mahalliy OAV ma’lumotlariga ko‘ra, ushbu topilmalardan so‘ng, gumonlanuvchilar yana bir bor so‘roq qilindi va ular Sayyora Ergashaliyevani xuddi shu usulda – pichoq bilan o‘ldirganini, so‘ngra uning jasadini bo‘laklarga bo‘lib, qismlarini turli chiqindi qutilariga tashlaganini tan olgan.

Bu ma’lumotlar turk ommaviy axborot vositalarida tarqaldi va rasmiy sud qarorlari bilan tasdiqlanmagan tergov versiyasiga tegishli. Hozircha Turkiya politsiyasi yoki prokuraturasining ikkinchi qurbon haqidagi rasmiy xabarlari e’lon qilinmadi.

Avvalroq Sayyora Ergashaliyevaning bedarak yo‘qolgani va uni yaqinlari qidirayotgani xabar qilingandi.

24 yanvar kuni Turkiyaning Istanbul shahridagi Shishli tumani Feriko‘y mahallasida chiqindi konteyneridan boshsiz tana topildi. Ushbu jasad O‘zbekiston fuqarosi bo‘lgan 37 yoshli ayolga tegishli bo‘lib, u boshqa o‘zbekistonliklar tomonidan o‘ldirilgani ta’kidlandi. Mahalliy nashrlarga ko‘ra, qotillar jasadni bo‘laklab, jomadonga solgan va chiqindixonaga tashlab ketgan. Jasadning boshqa qismlari boshqa chiqindixonadan topilgan. O‘zbekistonning Istanbul shahridagi bosh konsulxonasi o‘ldirilgan shaxs O‘zbekiston fuqarosi Hakimova Durdona ekanini tasdiqladi. Holat yuzasidan O‘zbekistonning 2 nafar fuqarosi qo‘lga olindi. Ular Turkiyadan Gruziyaga aviareys orqali qochishga uringan vaqtida ushlangan.

Durdona Hakimovaning o‘ldirilishi Istanbul va Anqarada norozilik namoyishlariga sabab bo‘ldi.

Source link

Samarqandda dorifurushlar ushlandi: tafsilotlar



Source link