O‘zbekiston Jurnalistlar uyushmasi tashabbusi bilan Turizm qo‘mitasi hamkorligida Samarqand viloyatida yangidan bunyod etilgan Imom Buxoriy majmuasiga media-tur tashkil etildi.

“Muborak Ramazon hayiti arafasida buyuk vatandoshimiz, hadis ilmining sultoni Imom Buxoriy hazratlarining ruhi poklariga yana bir bor hurmat-ehtirom bajo keltirmoqdamiz. Buxoriy bobomiz Qur’oni karimdan keyingi eng mo‘’tabar manba bo‘lgan hadislar kitobini yaratib, butun islom olamida shuhrat qozongan ulug‘ siymodir. Muqaddas zaminimiz dunyoga mana shunday mashhur allomani bergani bilan har qancha faxrlansak, arziydi”, – degan edi davlat rahbari joriy yil Ramazon hayiti arafasida Imom Buxoriy majmuasiga tashrifi chog‘ida.

Darhaqiqat, Payariq tumanining 45 gektar hududida joylashgan mazkur majmuaning mahobati qayta bunyod etilgan ulkan minoralar va masjid gumbazlaridan seziladi, biroq bu haybatning asosiy qismi «Sihohi sitta»ning avvali – «Sahih ul-Buxoriy» muallifi, islom olamining yetuk muhaddisi Abu Abdulloh Muhammad ibn Ismoil ibn Ibrohim al-Buxoriyning qo‘nim topgan maskani – maqbarasi sanaladi.

Majmua rasmiylarining bidirishicha, Imom Buxoriy majmuasi ilgari bir kunda 12 ming ziyoratchiga xizmat ko‘rsatgan bo‘lsa, ayni paytda 65 ming nafar ziyoratchini qabul qilish quvvatiga ega. Qadamjoda 14 ta moviy gumbaz, 75 metrlik 4 ta minora bor.

Media tur ishtirokchilari dastlab PQ-2855-sonli qaror asosida tashkil etilgan ilmiy dargoh faoliyati bilan tanishdi.

Yurtimizdan yetishib chiqqan ulug‘ allomalar merosini chuqur tadqiq etish va keng targ‘ib qilish orqali ma’naviy-ma’rifiy muloqotni kuchaytirishda mustahkam huquqiy asos bo‘lib xisoblangan ushbu dargoh dunyoning 50 ta yetakchi islom tadqiqot markazlari va nufuzli universitetlari (Oksford, Kembrij, «Al-Furqon» fondi, Britaniya kutubxonasi va boshqalar) bilan hamkorlik qilib kelmoqda.

Shuningdek markazga qo‘lyozmalar fondini boyitish maqsadida Misrdan 130 mingta, Saudiya Arabistonidan Imom Buxoriy asarlarining 34 ta elektron nusxasi keltirilgan. Markazda restavratsiya va konservatsiya ishlari ham keng yo‘lga qo‘yilgan bo‘lib mutaxassislar laboratoriyada 550 ta nodir qo‘lyozma kitoblar chang-g‘ubordan tozalanib, konservatsiya qilingan. Markaz fondidagi 524 ta qo‘lyozma (177 176 varaq) skaner qilinib, elektron nusxalari tayyorlandi. Imom Buxoriy va boshqa buyuk allomalarning 52 ta noyob asari o‘zbek tiliga tarjima qilindi va jami 128 ta kitob va risola nashr etildi.

Media tur davomida jurnalistlar Hadis ilmi Markazi, barcha shart-sharoitlarga ega masjid, ma’muriyat binosi, muzey hamda kirish-chiqish ayvonlarini o‘z ichiga olgan betakror me’moriy ansambldan iborat majmuani tomosha qildilar.

Qayd etish kerakki, ushbu majmuaning umumiy maydoni 45 gektarni tashkil etadi. 10 ming kishiga mo‘ljallangan ulkan masjid, ma’muriyat binosi, 154 ustunli, milliy uslubdagi ayvondan iborat.

Shuningdek, press-tur ishtirokchilari majmua qoshida ochilgan turizm markazidan o‘rin olgan 15 gektar maydondagi zamonaviy infratuzilma – ziyoratchilar uchun barcha zarur shart-sharoitlarga ega mehmonxonalar, avtoturargohlar va xizmat ko‘rsatish hamda servis nuqtalari, hududddagi obodonlashtirish ishlari bilan yaqindan tanishdilar.

Ma’lumot o‘rnida ta’kidlash lozimki, ushbu turizm markazida 1 ta to‘rt yulduzli, 2 ta uch yulduzli mehmonxona, 22 ta 176 o‘rinli oilaviy mehmon uylari hamda avtoturargoh bunyod etilgan. Mazkur ob’yektlar to‘liq kommunikatsiya tarmoqlari bilan ta’minlanib, hududida obodonlashtirish ishlari amalga oshirilgan.

OAV vakillari 9 pavilondan iborat innovatsion muzey bilan tanishar ekan, muzey fondidagi mavjud vitrinalardan o‘rin olgan Imom Buxoriy hayot yo‘li va ilmiy-ma’naviy merosi, musavvirlik ishlari, nodir asarlar va boshqa eksponatlar haqida qiziqarli ma’lumotlarga ega bo‘ldilar.

Darhaqiqat, mamlakatimizning ulkan imkoniyatlarini namoyon etayogan islom olamida muhaddislar sultoni deya e’tirof etilgan Imom Buxoriy majmuasi nafaqat ziyorat markazi, balki, xalqimiz uchun, ayniqsa yoshlar uchun, ilm-ma’rifat, tarbiya va ibrat maskani bo‘lib xizmat qiladi.

Source link

44 yillik tanaffusdan so‘ng, 2017 yilda Samarqandga tramvay qaytdi. Bugun u nafaqat O‘zbekistonda, balki butun Markaziy Osiyoda yagona tramvay tizimi hisoblanadi. Shu jihatdan u oddiy transport emas, balki ramzga aylangan. Biroq bu ramz faqat nostalgiya emas — u har kuni minglab odamlar hayotini yengillashtirayotgan transport vositasidir.

Samarqandda tramvay tarixi ancha avval boshlangan. Ilk liniya 1907 yilda ochilgan, 1947 yilda esa elektr tramvay rasman ishga tushirilgan. Ammo 1973 yil 28 avgust kuni bu harakat to‘xtatilgan. Liniyalar buzilgan, depo yopilgan. 2017 yilda bu tarix yana davom etdi. Samarqand tramvaylarida yaqin tarixda Toshkentda faoliyatini yakunlagan “haydovchi amakilar”ni ko‘rishimiz mumkin.

Bugun Siyob bozoridan temiryo‘l vokzaligacha bo‘lgan yo‘lda shu “qaytish”ni aniq his qilish mumkin. Vagon ichida sokinlik va tartib hukm suradi. Chexiyada ishlab chiqarilgan VARIO LF tramvaylari keng va qulay. Ayniqsa talabalar, yosh bolali oilalar va keksa insonlar uchun bu transport ancha yengillik yaratmoqda.

Yo‘lovchilarning aytishicha, tramvay shahardagi eng barqaror va ishonchli jamoat transportiga aylangan. Ko‘pchilik yangi yo‘nalishlari yo‘lga qo‘yilishini kutmoqda.

Tramvay ortida turgan odamlar taqdiri esa alohida hikoya. Masalan, haydovchilar orasida Toshkentdan kelib ishlayotganlar ham bor. Ulardan biri — Ravshan Alimov. U 1995 yilda tramvay haydovchisi sifatida faoliyatini boshlagan.

“Shu kasb ortidan farzandlarimni uyli-joyli qildim, o‘qitdim. Bu menga ota kasb — otam ham tramvay haydovchisi bo‘lgan. Ikki kun ish, bir kun dam. Yigirma kunda bir uyga borib kelaman, besh-olti kun oilam bilan bo‘laman. Toshkentda tramvay to‘xtaydi, deb o‘ylamagan edik. Shu sohani yaxshi ko‘rganimiz uchun yetti-sakkiz kishi Samarqandga kelib ishlayapmiz”, – deydi u.

Hozirda Samarqand shahridagi Tramvay liniyalarini ekspluatatsiya qilish direksiyasida 76 nafar xodim mehnat qiladi. Tramvaylar “Temiryo‘l vokzali – Sattepa maskani” va “Temiryo‘l vokzali – Siyob bozori” yo‘nalishlarida harakatlanib, kuniga o‘rtacha 9-10 ming yo‘lovchiga xizmat ko‘rsatmoqda.

Kelgusida Kimyogarlar qo‘rg‘onidan temiryo‘l vokzaligacha yangi yo‘nalish ochish rejalashtirilgan. Buning uchun yana 14 ta vagon xarid qilinishi kutilmoqda.

Siyobdan vokzalgacha bo‘lgan bu qisqa sayohat bir narsani aniq ko‘rsatdi: tramvay Samarqand uchun o‘tmish yodgorligi emas. U — bugungi ehtiyoj hamdir. Shahar nafasini yengillashtirayotgan, odamlarni manzilga oson va tartibli yetkazayotgan o‘ziga xos jarayon deyish mumkin.

Source link

Prezident Shavkat Mirziyoyev geologiya sohasi xodimlariga kasb bayramlari munosabati bilan tabrik yo‘lladi.

Quyida tabrik matni bilan to‘liq tanishish mumkin.

«Qadrli do‘stlar!

Avvalo, siz, azizlarni – ko‘pmillatli geologlar, muhandis va mutaxassislar, ishchi va xizmatchilar jamoasini qutlug‘ kasb bayramingiz bilan chin qalbimdan samimiy muborakbod etib, barchangizga o‘zimning yuksak hurmatim va ezgu tilaklarimni izhor etaman.

Ushbu quvonchli ayyomda sizlarning murakkab tabiiy sharoitlarda fidokorona mehnat qilib, yangi-yangi konlar, mineral xomashyo manbalarini topish, ularni mamlakatimiz ravnaqi, xalqimiz farovonligi yo‘lida ishlatish borasidagi ulkan xizmatlaringizni yana bir bor minnatdorlik bilan e’tirof etamiz.

Ana shunday sa’y-harakatlaringiz tufayli yurtimizda umumiy bahosi taxminan 3 trillion dollarga teng 2 ming 500 dan ortiq kon va 3 mingdan ziyod istiqbolli maydonlar aniqlangani O‘zbekiston ulkan qazilma boyliklar xomashyo bazasiga ega ekanidan dalolat beradi.

Keyingi yillarda ana shu zaxiralarni o‘zlashtirish va shu asosda iqtisodiyotimiz rivojiga qudratli turtki berish bo‘yicha katta ishlarni amalga oshirmoqdamiz. Jumladan, sohaga xalqaro standartlar joriy etilib, investitsiyaviy jozibadorlik oshirilmoqda, oltin, kumush, mis, uran, uglevodorod konlari va maydonlari xorijiy sarmoyadorlar uchun ham taqdim etilmoqda, soliq stavkalari pasaytirilmoqda. Shu bois dunyodagi eng nufuzli kompaniyalar mamlakatimizga faol investitsiya kiritmoqda. Hozirgi vaqtda ular bilan hamkorlikda umumiy qiymati 30 milliard 700 million dollar bo‘lgan 90 ta loyiha amalga oshirilayotgani diqqatga sazovordir.

Bugungi kunga qadar 1 ming 458 ta foydali qazilma ob’yekti onlayn auksion orqali sotildi. Buning hisobidan davlat budjetiga 1 trillion so‘mdan ziyod mablag‘ tushdi, 100 mingga yaqin yuqori daromadli yangi ish o‘rinlari yaratildi.

So‘nggi o‘n yilda davlat budjetidan 8 trillion 200 milliard so‘m mablag‘ yo‘naltirilgani 2 mingga yaqin texnika va texnologiyalarni joriy etish, geologiya-qidiruv uskunalarini 70 foiz yangilash imkonini berdi.

Mamlakatimizda vertolyot va dronlar yordamida aerogeofizika ishlari yo‘lga qo‘yilgani, zamonaviy 3 D o‘lchamli seysmik kompleks ishga tushirilib, yer qa’rini 9 kilometrgacha chuqurlikda geofizik o‘rganish imkoniyati yaratilgani soha rivojida yangi davr boshlanganidan dalolat beradi.

Sohada raqobat va shaffoflik muhiti shakllanmoqda. Uzoq yillar davomida e’tibordan chetda qolgan milliy geologiya maktabi va ta’lim tizimi qayta tiklandi, zamonaviy talablarga mos bo‘lgan Geologiya fanlari universiteti tashkil etildi. Ilg‘or xorijiy maktablarning ilmiy salohiyatidan foydalanish va innovatsion texnologiyalarni qo‘llash maqsadida Kompetensiyalar markazi faoliyati yo‘lga qo‘yildi.

Ana shunday keng ko‘lamli ishlarimiz tufayli 2016-2025 yillarda 1 ming 900 dan ziyod yangi konlar ochildi. Agar 2016 yilda tasdiqlangan uran zaxiralarimiz 97 ming tonnani tashkil etgan bo‘lsa, o‘tgan davrda yana 16 ta yangi kon aniqlanib, zaxira 140 ming tonnaga yetkazildi.

Yaqinda Olmaliqda yiliga 60 million tonna rudani qayta ishlash quvvatiga ega bo‘lgan yangi mis boyitish fabrikasini ishga tushirdik.
Hech shubhasiz, bunda ham siz, zahmatkash geologlarning alohida xizmatlaringiz borligini, ana shu megaloyiha natijasida 6 mingdan ortiq yuqori daromadli ish o‘rni yaratilgani, korxona hisobiga yiliga 5 milliard dollar mablag‘ kelib tushishini alohida ta’kidlab o‘tmoqchiman.

Hurmatli soha xodimlari!

Biz «O‘zbekiston – 2030» strategiyasida geologiya sohasini yanada rivojlantirish bo‘yicha ham kelgusi vazifalarni aniq belgilab oldik. Yurtimizning mineral xomashyoga boy, istiqbolli hududlarini geologik jihatdan o‘rganishni kengaytirish, oltin ishlab chiqarishni – 1,5 barobar, kumushni – 3 karra, misni – 3,5 marta, uran, temir va ko‘mirni – 3 hissa oshirishni maqsad qilganmiz.

Siz, jonkuyar va matonatli geologlarning katta bilim va tajribangiz, mustahkam iroda va mehnatsevarlik fazilatlaringiz hisobidan bu yuksak marralarga albatta erishamiz, deb ishonaman.

Soha xodimlarining mehnat va turmush sharoitlarini yaxshilash, ularning mashaqqatli faoliyatini munosib rag‘batlantirish masalalari bundan buyon ham doimo e’tiborimiz markazida bo‘ladi.

Sizlarni bugungi qutlug‘ ayyom bilan yana bir bor chin dildan qutlab, barchangizga sihat-salomatlik, sharafli ishlaringizda yangi yutuq va omadlar, xonadonlaringizga tinchlik va farovonlik tilayman.»

Source link

Raqobat qo‘mitasi so‘rovi asosida O‘zbekistonda mahalliy poyezdlar kechikkan hollarda yo‘lovchilarga pullik kompensatsiya to‘lash tartibini joriy etilmoqda.

Qo‘mitaga ko‘ra, so‘nggi vaqtlarda poyezdlarning jadvaldan kechikishi bo‘yicha murojaatlar soni ortib borayotgani qayd etilgan. Xususan, 2025-yil davomida Qo‘mitaga ushbu masala yuzasidan 51 ta murojaat kelib tushgan.

Murojaatlarda ayrim yo‘nalishlarda poyezdlar 40 daqiqadan 1 soatgacha kechikib kelayotgani, bu esa yo‘lovchilarning shaxsiy rejalariga jiddiy ta’sir ko‘rsatayotgani ta’kidlangan. Shu bilan birga, amaldagi qoidalarda bunday holatlar uchun kompensatsiya mexanizmi mavjud emasligi aniqlangan.

Transport vazirligi tomonidan ishlab chiqilayotgan yangi qoidalarga ko‘ra, poyezd kechikkan taqdirda yo‘lovchilarga aniq miqdorda kompensatsiya to‘lanadi. Jumladan, 15 daqiqadan 30 daqiqagacha kechikkan hollarda chipta qiymatining 15 foizi, 31–60 daqiqada 25 foizi qaytarilishi belgilanmoqda.

Agar kechikish 61 daqiqadan 120 daqiqagacha davom etsa, yo‘lkiraning 50 foizi, 121 daqiqadan ortiq hollarda esa to‘liq — 100 foizi qaytarilishi ko‘zda tutilgan.

Mazkur tartib hozirgacha faqat «Afrosiyob» poyezdlari uchun amal qilgan bo‘lsa, endilikda u barcha mahalliy oddiy va tez yurar poyezdlarga ham tatbiq etilishi rejalashtirilmoqda.

Qayd etilishicha, Raqobat qo‘mitasi, Transport vazirligi va «O‘zbekiston temir yo‘llari» AJ hamkorligida bu yo‘nalishdagi ishlar izchil davom ettiriladi.

Source link

“Qaysi tadbirda o‘tirsam, mening qo‘shig‘im qo‘yiladi. Avval mening mualliflik huquqim uchun pulimni yig‘ib bersin davlatimiz, keyin soliqdan gapirsin”, dedi Yulduz Usmonova.

O‘zbekiston xalq artisti Yulduz Usmonova 12—30 aprel kunlari bo‘lib o‘tadigan yakkaxon konserti oldidan intervyu berdi. U suhbat davomida konsertga tayyorgarlik, yangi dastur haqida gapirib, xonandalarning soliq to‘lashi kerakligi haqidagi qaror loyihasiga o‘z munosabatini bildirdi.

Yulduz Usmonova o‘tgan yilgi konsertida “Men muxlislarni yig‘latmayman, tafakkur qildiraman. Sababi hayot tashvishining o‘zi yetarli”, degan edi. Bu yilgi konsertda xonanda qanday g‘oyani ilgari suradi?

— Tafakkur qilgan odam yig‘lamaydimi? O‘zining qilgan xatosidan yig‘laydi, birovdan o‘pkalab emas. Yig‘i bilan yig‘ining farqi bor-da. Siz bilan men ham ko‘p yolg‘onni, haromni, haqsizlikni ko‘rib, indamay ketyapmiz-ku! Boykotlarni ko‘rib turib, mahsulotlarni indamay sotib olib, yeb, bolalarimizga olib beryapmiz-ku! Vijdon qiynalsa, yig‘laysiz-da, bu oddiy misol. Odamlar qo‘shiqda o‘zini topib olsa, yig‘lashi mumkin. Bunday yig‘iga hech kimning qarshiligi yo‘q. Maqsadimiz ularning yuragini ezish emas.

Bizning paytlarda 80 foiz qo‘shiqlar yig‘latadigan va ma’noli bo‘lardi. Odam shu qo‘shiqlardan yengillik topsa, albatta, yig‘lasin. Yig‘lab-yig‘lab, yuzini yuvib, ko‘ziga yana surmasini surtib, ko‘chaga chiqib, hayot yana davom etayotganini his qiladi. Yig‘latish deganda shuni nazarda tutaman, deydi u.

“Menchalik ishlaydigan odam qolmadi”

— Tapir-tupur, betartib konsertlarga pul to‘lab, kirayotganlar bor. Shuncha kun konsert beryapman, o‘zimning boshimga suv o‘girib yubordim. O‘zimga o‘zim charchama, Usmonova, dedim. Bunchalik ishlaydigan odam qolmadi. G‘am-tashvishsiz o‘rtaga chiqib olib, ashula aytishyapti. Men siqilyapman, har kuni dori ichaman. O‘zimni qanday tinchlantirishni bilmayman. Mendan necha yoshga yetdingiz, deb ko‘p so‘rashadi. Turmush o‘rtog‘im nega siqilasiz, deydi. Qanday qilib siqilmay? Men bolalarim bilan sahnaga chiqyapman, tasavvur qilyapsizmi? Qanday qilib xavotir olmasligim mumkin?

Menimcha, gap kostyumlarda, gaplarda, iddao qilishda, chiroyli yondirilgan chiroqlarda emas. U shundoq ham kerak, qilamiz. Qo‘shiqlar o‘z o‘rnini topsa, Yulduzni Yulduz deb eslashadi. Konsertida zo‘r lazer, chiroq qilgan edi, deb eslashmaydi. Yettidan yetmishgacha eslanyapmanmi, demak, qo‘shiqlar yashayapti. Men qo‘shiqlar yashashi tarafdoriman, deydi Yulduz Usmonova.

O‘zbekistonda 2026 yil 1 sentabrdan boshlab san’atkorlar va boshlovchilar ko‘rsatadigan xizmatlarni “Soliq” ilovasida ro‘yxatga olish hamda “bir xizmat – bir to‘lov” tamoyili asosida soliqqa tortish rejalashtirilmoqda. Mazkur qaror loyihasining e’lon qilinishi shou-biznes vakillari o‘rtasida keng muhokama va e’tirozlarga sabab bo‘lmoqda. O‘zbekiston xalq artisti Yulduz Usmonova bu borada qanday fikrda?

— Rahbarlarimiz eshitsin — prezidentimizga material olib kiradiganlar juda adashadi. Indamay kelayotgandim, endi gapiraman. “Voy, to‘ylarda isrofgarchilik bo‘lyapti, san’atkorlarni qisqartirish kerak”, deyishadi. Agar biz isrofgarchilik bo‘lsak, bizni konsertingizga qo‘ymang. Nima qilib davlat tadbirlariga bizni qo‘yyapsizlar? Qo‘yinglar, san’atkorlarni qirib yuboringlar. Xatmi Qur’on qilib, aqiqa qilib, o‘zingiz o‘tkazavering. Nima bo‘ladi, kim ishlaydi? Eng yomon, eng ishlamaydigan san’atkor ham fonogramma qilish uchun necha pul sarflaydi?

Tug‘ilgan kun, tomosha qilsangiz, fonogramma ayttirib bo‘lsa ham, chaqirasiz-ku. Masalan, men eski-tuskida, yirtiq kiyimda kelsam, yoqamanmi, ayting? U omma ichidagi odam. Kosmetologga borishi shart, yaxshi kiyinib yurishga majbur, chunki u xalqning yuzi. Biz Amerika emasmiz, o‘z urf-odatimiz bor, yirtiq kiyim to‘g‘ri kelmaydi. Lekin bizda birorta qo‘shiq uchun pul to‘lanyaptimi? Har bir bayramda qo‘shiq buyurtma qilayotganda pulini to‘lashga qurbingiz yetadimi? To‘lang, shunda gap bo‘lishi mumkin emas.

Bugungi kunda juda qiyin. Isrofgarchilik bo‘lsa ham, san’atkorlar deyishadi. Senatorlar, deputatlarning hayotiga, ularning qizlari qanday yurganiga qaranglar. Mana, isrofgarchilik qayerda! Biz ishlamayapmizmi? Qachon uxlaganimni kim ko‘rdi? Men yig‘lab yuboraman, kecha ham juda qattiq yig‘ladim. Odam charchab ketadi. Endi soliq. Kim chidaydi, kim ishlaydi, kim yangi qo‘shiq qiladi? O‘ldiringlar san’atni! Gap bo‘lishi mumkin emas. Soliq tugul, litsenziyani ham 10 barobar qilib qo‘yinglar.

To‘ylardan ham soliq oladigan bo‘lishsa, to‘y qilayotgan odam bir san’atkor soliq to‘lashi uchun yana shuncha pul to‘lashi kerak. Hamma ham o‘g‘ri emas, tadbirkorlarning orasida ishlab topayotgani ham bor. Ular pul olishmaydi, ishlab topishadi. Kim pul olsa, soliq qo‘ying. Bu mashina qayerdan kelgani, qizi, o‘g‘lining Angliyada yurganini so‘rasin.

San’atkor emas, ijrochi ko‘p. Kim hozir yangi qo‘shiq aytyapti? Chiqsa, 4-5 ta chiqadi. Qolganlar eski qo‘shiqlarni remiks qilib kuylayapti. Qaysi tadbirda o‘tirsam, mening qo‘shig‘im qo‘yiladi. Avval mening mualliflik huquqim uchun pulimni yig‘ib bersin davlatimiz, keyin soliqdan gapirsin. Necha yillardan buyon qo‘shiqlarim qo‘yiladi. Men hech bo‘lmaganda bir tiyin so‘radimmi? Endi men ham pulimni so‘rayman. Qo‘shiq kuylamayman, deydi xonanda.

Source link