Siyosat
Davlat boshqaruvida yagona raqamli platforma joriy etiladi
Davlat boshqaruvida yagona integratsiyalashgan raqamli platformani joriy etish, startaplar ekotizimini rivojlantirish va telekommunikatsiya sohasida tadbirkorlik muhitini yaxshilashga bag‘ishlangan taqdimot Prezident Shavkat Mirziyoyevga namoyish etildi.
So‘nggi yillarda mamlakatda raqamli davlat xizmatlari kengayib, davlat idoralarida zamonaviy axborot tizimlari joriy etildi. Buning natijasida O‘zbekiston BMTning «Elektron hukumat» reytingida 24 pog‘ona yuqoriladi. 2030-yilga qadar mamlakatni mazkur reytingning eng kuchli 30 davlati qatoriga olib chiqish maqsad qilingan.
Ma’lum qilinishicha, joriy yil yakuniga qadar raqamli xizmatlar soni 880 taga, ulardan foydalanuvchilar soni esa 15,5 million nafarga yetishi kutilmoqda. 2024-yilda bu ko‘rsatkichlar mos ravishda 525 ta xizmat va 4 million foydalanuvchini tashkil etgan.
Taqdimotda davlat organlaridagi ma’lumotlar bazalari va axborot tizimlari tarqoq holda shakllangani, bu esa tahlil va qaror qabul qilish jarayonlarida yagona yondashuvning yetishmasligiga sabab bo‘layotgani qayd etildi.
Shu munosabat bilan davlat boshqaruvining yagona integratsiyalashgan raqamli platformasini bosqichma-bosqich joriy etish taklif qilindi. Tizimda hududlar iqtisodiyoti, investitsiyalar, ekologiya, xavfsizlik, aholini qiynayotgan muammolar, mahallalar farovonligi, fazoviy ma’lumotlar hamda obyektlar yagona raqamli muhitda jamlanadi.
Platforma sun’iy intellekt texnologiyalari asosida ma’lumotlarni tahlil qilib, hududlardagi muammolarni erta aniqlash, qarorlar ijrosini monitoring qilish, resurslarni samarali taqsimlash va davlat boshqaruvi samaradorligini oshirish imkonini beradi. Prezident joriy yilda ushbu tizimni Toshkent shahrida, 2027-yildan esa barcha hududlarda joriy etish zarurligini ta’kidladi.
Taqdimotda tovar va xizmatlarning yagona milliy tasniflash tizimini ishga tushirish ham taklif etildi. Bu tadbirkorlar uchun byurokratik jarayonlarni qisqartirish, davlat idoralari o‘rtasidagi ma’lumot almashinuvini soddalashtirish va statistik hisobotlar aniqligini oshirishga xizmat qilishi qayd etildi.
Shuningdek, milliy navigatsiya tizimini yaratish, 2030-yilga qadar AT eksportini 5 milliard dollarga yetkazish, 5 mingta startap tashkil etish va 2 milliard dollar investitsiya jalb qilish rejalari taqdim etildi. Telekommunikatsiya sohasida litsenziyalash tartibini soddalashtirish, yangi uylarni yuqori tezlikdagi internet infratuzilmasi bilan loyihalash hamda sohada tadbirkorlikni qo‘llab-quvvatlash bo‘yicha qator takliflar ma’qullandi.
Prezident mutasaddilarga davlat idoralari ma’lumotlarini integratsiya qilish, raqamli xizmatlar sifatini oshirish, kiberxavfsizlik va shaxsiy ma’lumotlar himoyasini ta’minlash, shuningdek, xususiy sektor uchun yanada qulay shart-sharoitlar yaratish bo‘yicha aniq topshiriqlar berdi.
Bugun, 25-sentyabr kuni O‘zbekiston Prezidenti Shavkat Mirziyoyev Xitoy Xalqaro madaniy kommunikatsiya markazi raisi Long Yuysyan va Gonkongning «JDB Group» kompaniyasi asoschisi Chan Xuntoni qabul qildi. Bu haqda Prezident matbuot xizmati xabar berdi.
Qayd etilishicha, O‘zbekiston bilan Xitoy o‘rtasidagi barcha sharoitlarda har tomonlama strategik sheriklik munosabatlarini yanada chuqurlashtirish va madaniy-gumanitar aloqalarni mustahkamlash masalalari ko‘rib chiqildi.
Markaz O‘zbekistonning Xitoy bilan ko‘p qirrali hamkorligini mustahkamlashga katta hissa qo‘shib kelayotgani qayd etildi. Birgalikda infratuzilmani rivojlantirish, investitsiyalar va «yashil» sanoat sohalarida qator loyihalar amalga oshirildi.
«JDB Group» kompaniyasining O‘zbekistondagi faoliyatining ustuvor yo‘nalishlari sifatida zamonaviy shahar, transport va sanoat infratuzilmasini rivojlantirish hamda geologiya sohasi belgilandi.
Uchrashuv yakunida mazkur kompaniya ishtirokida amalga oshirilayotgan va yangi loyihalarni jadallashtirish yuzasidan kelishuvga erishildi.
Siyosat
Saida Mirziyoyeva Diyene Keyta bilan demografik barqarorlik va inson kapitali bo‘yicha hamkorlikni muhokama qildi
O‘zbekiston Respublikasi Prezidenti Administratsiyasi rahbari Saida Mirziyoyeva BMT Bosh kotibi o‘rinbosari, BMT Aholishunoslik jamg‘armasi (UNFPA) ijrochi direktori Diyene Keyta bilan uchrashdi.
Muloqotda demografik barqarorlik, inson kapitali va aholi farovonligini ta’minlash bo‘yicha hamkorlikni yanada rivojlantirish masalalari muhokama qilindi.
Saida Mirziyoyeva O‘zbekistonning asosiy kapitali yosh avlod ekanini ta’kidladi. U demografik salohiyatni kelgusida dividend manbaiga aylantirish uchun inson, ayniqsa, ayollar va bolalarning salomatligi, ta’limi hamda xavfsizligiga investitsiya kiritish zarurligini bildirdi.
Saida Mirziyoyeva o‘zining Telegram kanalida demografik prognozlash tizimini yo‘lga qo‘yilayotganini ma’lum qildi. Shuningdek, «Demografik dividend — 2050» strategiyasini ishlab chiqish rejalashtirilayotganini aytdi.
Tomonlar demografik barqarorlikni faqat aholi soni bilan bog‘liq masala sifatida emas, balki ta’lim, sog‘liqni saqlash, bandlik, ijtimoiy himoya va oilalarni qo‘llab-quvvatlashni qamrab oladigan uzoq muddatli taraqqiyot masalasi sifatida ko‘rish zarurligini ta’kidladi.
Shuningdek, demografik ma’lumotlar va tahliliy prognozlar asosida qarorlar qabul qilish hamda inson kapitali va ijtimoiy xizmatlarga investitsiyalarni kuchaytirish bo‘yicha xalqaro hamkorlikni rivojlantirish masalalari muhokama qilindi.
Muloqotda aholining farovonligini oshirish va demografik jarayonlarni samarali boshqarishda ma’lumotlar hamda prognozlarning ahamiyatiga e’tibor qaratildi.
Prezident administratsiyasi rahbari Saida Mirziyoyeva Nyu-Yorkda «BlackRock» rahbariyati bilan uchrashdi.
Unda kompaniya prezidenti Robert Kapito, vitse-rais Tomas Donilon, «Global Infrastructure Partners» raisi va bosh ijrochi direktori Adebayo Ogunlesi, Moliyaviy va strategik investorlar guruhi global rahbari hamda kompaniyaning Yaqin Sharq mintaqasi bo‘yicha rahbari Charlz Hatami qatnashdi.
Muloqot davomida 2027-yilda Toshkent xalqaro moliya markazi faoliyatini yo‘lga qo‘yish masalasini muhokama qilindi. «BlackRock» ushbu Markaz konsepsiyasi va tuzilmasini ishlab chiqishda ko‘maklashmoqda.
AQSh ishbilarmon doiralari vakillari ishtirokidagi qo‘shma davra suhbatida O‘zbekiston hamda mintaqamizning yaqin o‘n yilliklarga mo‘ljallangan rivojlanish istiqbollari yuzasidan fikr almashildi.
O‘zbekiston yirik, samarali, sifatli sarmoyalar uchun yangi imkoniyatlar maydoniga aylanmoqda, dedi Saida Mirziyoyeva.
Mudofaa vaziriga ikki o‘rinbosar tayinlandi. Bu haqda vazirlik matbuot xizmati xabar berdi.
Jumladan, Prezidentning tegishli qaroriga muvofiq, polkovnik Zoidov Qahramonjon Obidjonovich O‘zbekiston mudofaa vazirining qurollanish va qurollantirish bo‘yicha o‘rinbosari lavozimiga tayinlandi.
Adliya polkovnigi Muratov Jahongir Dilshatovich vazirning komplayens va korrupsiyaga qarshi ichki nazorat bo‘yicha o‘rinbosari lavozimiga tayinlandi.
Prezident Shavkat Mirziyoyev Andijon viloyatiga tashrif buyuradi.
Ikki kunlik safar dasturidan hududning sanoat va investitsiya salohiyati, energetika, qishloq xo‘jaligi, transport, turizm va boshqa sohalardagi loyihalar bilan tanishish o‘rin olgan. Davlatimiz rahbari mahallalardagi bunyodkorlik ishlarini ham ko‘zdan kechiradi. Qator yangi quvvatlarni ishga tushirish va istiqbolli loyihalar qurilishini boshlash ko‘zda tutilgan.
Shuningdek, Andijon viloyatini yanada rivojlantirishning ustuvor yo‘nalishlari muhokamasiga bag‘ishlangan yig‘ilish bo‘lib o‘tadi.
