Toshkent shahrining Chilonzor tumanida tungi vaqtda piyoda ishtirokida yo‘l-transport hodisasi sodir bo‘ldi. Hodisa oqibatida bir nafar fuqaro jarohatlanib, unga tez tibbiy yordam ko‘rsatilgan.

Toshkent shahar IIBB YHXB Axborot xizmati ma’lumotiga ko‘ra, voqea joriy yilning 16 may kuni soat taxminan 01:00 larda Chilonzor tumanidagi Bunyodkor shohko‘chasida, Oliy Majlis binosi qarshisida sodir bo‘lgan.

Dastlabki ma’lumotlarga ko‘ra, 2007 yilda tug‘ilgan haydovchi Tracker rusumli transport vositasini boshqarib ketayotib, yo‘lning belgilanmagan qismidan harakatlanib o‘tayotgan 2007 yilda tug‘ilgan piyodani urib yuborgan.

Yo‘l-transport hodisasi oqibatida piyoda turli tan jarohatlari olgan. Unga voqea joyiga yetib kelgan shifokorlar tomonidan birinchi tez tibbiy yordam ko‘rsatilgan. Hozirda uning ahvoli bo‘yicha qo‘shimcha ma’lumot berilmagan.

Mazkur holat yuzasidan Toshkent shahar IIBB YHXB tomonidan surishtiruv harakatlari olib borilmoqda. Huquqni muhofaza qiluvchi organlar hodisaning barcha holatlarini o‘rganmoqda.

Shu munosabat bilan YHXB barcha haydovchi va piyodalarni yo‘l harakati qoidalariga qat’iy amal qilishga chaqirdi. Xususan, piyodalarga faqat belgilangan joylardan harakatlanib o‘tish, haydovchilarga esa tungi vaqtda harakat vaqtida yanada ehtiyotkor bo‘lish tavsiya etildi.

Source link

2026 yil boshi holatiga ko‘ra, O‘zbekistonda har 1 000 nafar ayolga o‘rtacha 1 015 nafar erkak to‘g‘ri kelmoqda. Eng yuqori ko‘rsatkich Namangan viloyatida qayd etilgan.

Milliy statistika qo‘mitasi ma’lumotlariga ko‘ra, 2026 yil 1 yanvar holatida mamlakat bo‘yicha har 1 000 nafar ayolga 1 015 nafar erkak to‘g‘ri kelgan.

Hududlar kesimida bu borada eng yuqori ko‘rsatkich Namangan viloyatida kuzatilib, u yerda har 1 000 nafar ayolga 1 034 nafar erkak to‘g‘ri kelgan.

Shuningdek, yuqori ko‘rsatkichlar Qashqadaryo viloyatida — 1 029 nafar, Andijon viloyatida — 1 027 nafar, Navoiy viloyatida — 1 026 nafar va Surxondaryo viloyatida — 1 025 nafarni tashkil etgan.

Jizzax va Farg‘ona viloyatlarida bu ko‘rsatkich 1 019 nafardan, Samarqand viloyatida 1 016 nafardan iborat bo‘lgan.

Qoraqalpog‘iston Respublikasida har 1 000 nafar ayolga 1 010 nafar erkak, Sirdaryo viloyatida 1 009 nafar, Toshkent viloyatida 1 008 nafar, Buxoro viloyatida 1 006 nafar va Xorazm viloyatida 1 004 nafar erkak to‘g‘ri kelgan.

Toshkent shahri esa ro‘yxatda eng past ko‘rsatkich qayd etilgan hudud bo‘lib, poytaxtda har 1 000 nafar ayolga 966 nafar erkak to‘g‘ri kelishi ma’lum qilingan.

 

Source link

Foto: Toshkent viloyati IIBB YHXB

Olmaliq shahrida mototransport ishtirokida yo‘l-transport hodisasi sodir bo‘ldi, deb xabar berdi Toshkent viloyati IIBB YHXB.

Ma’lum qilinishicha, 14 may kuni soat 23:00 larda Toshkent viloyati Olmaliq shahri A.Temur ko‘chasida 2003 yilda tug‘ilgan fuqaro C.F. mototsikl boshqarib ketayotgan vaqtida yo‘lni piyodalar uchun belgilanmagan qismidan kesib o‘tayotgan 2011 yilda tug‘ilgan piyodani urib yuborgan. 

Hodisa natijasida piyoda turli xil tan jarohatlari olgan va kasalxonaga yotqizilgan. 

Hozirda holat yuzasidan Olmaliq shahar IIB tomonidan surishtiruv harakatlari olib borilmoqda. 

Source link

Tarmoqda «Aviasozlar» bozori buzilishi haqida xabar tarqaldi. Toshkent shahar hokimligi mazkur masala yuzasidan bayonot berdi. 

Aytilishicha, xalq tilida Kadishev bozori deb nomlanuvchi «Aviasozlar» bozorining, shuningdek, savdo rastalari va do‘konlarining buzilishi haqidagi ma’lumotlar haqiqatga to‘g‘ri kelmaydi. 

Bozor odatdagi tartibda ishlamoqda. Olib borilayotgan ishlar qonuniy asosda faoliyat yuritayotgan savdo rastalari va obyektlariga daxl qilmaydi. Gap uzoq vaqt davomida tartibsiz, o‘zboshimchalik bilan tashkil etilgan savdo mavjud bo‘lgan bozorga tutash hududda tartib o‘rnatish haqida ketmoqda, deyiladi hokimlik xabarida. 

Ushbu hududda ayrim fuqarolar meva, sabzavotlar, go‘sht mahsulotlari va kalla-pochalarni ruxsat beruvchi hujjatlarsiz, jumladan, sanitariya-epidemiologiya talablarini buzgan holda sotgan. Zarur sanitariya sharoitlari va mahsulot sifati nazoratining yo‘qligi oziq-ovqat xavfsizligi uchun xavf tug‘dirardi. 

Bundan tashqari, tartibsiz savdo piyodalarning erkin harakatlanishiga to‘sqinlik qilar, transport harakatiga xalaqit berar, tirbandliklar, odamlarning to‘planishi, tartibsiz avtoturargohlar va aholi, xaridorlar hamda bozorga tashrif buyuruvchilar uchun noqulayliklar tug‘dirardi. 

Ushbu hududda savdo qilgan shaxslarga bozor hududidan muqobil, maxsus ajratilgan va qonuniy joylar taklif etilmoqda. Bu joylar tadbirkorlar uchun ham, xaridorlar uchun ham yanada tartibli va qulay sharoitlarni nazarda tutadi. 

«Ushbu hududda ishlar yakunlangach, hududni obodonlashtirish va ko‘kalamzorlashtirish, shuningdek, avtomobillar uchun turargoh tashkil etish rejalashtirilgan. Bu tartibsiz avtoturargohlarni kamaytirish, hududga kirishni optimallashtirish va xavfsiz qilish, shaxsiy transportda harakatlanish uchun qulayroq sharoitlar yaratish hamda yaqin atrofdagi ko‘chalardagi yuklamani kamaytirish imkonini beradi», deyiladi xabarda.

Source link

O‘zbekistonning BAAdagi elchisi Umid Shodiyev ushbu davlatdagi nufuzli «Unison Capital Investment» kompaniyasi ijrochi direktori Tamer Akl bilan uchrashdi, deb xabar qilmoqda «Dunyo» axborot agentligi.

Muzokaralar davomida davlat-xususiy sheriklik (DXSh) asosida sog‘liqni saqlash sohasida zamonaviy infratuzilmani rivojlantirish istiqbollari muhokama qilindi.

Muloqot chog‘ida Farg‘ona viloyatida DXSh asosida kompyuter tomografiyasi bo‘limlarini tashkil etish investitsiya loyihasini amalga oshirish masalalari ko‘rib chiqildi.

Shuningdek, kompaniya respublika bo‘ylab 100 ta to‘liq siklli diagnostika markazlarini tashkil etish rejalarini taqdim etdi. Ushbu markazlarda MSKT, MRT, rentgenografiya, gemodializ va laboratoriya diagnostikasi xizmatlarini joriy etish ko‘zda tutilmoqda.

«Unison Capital Investment» rahbariyati Toshkent xalqaro investitsiya forumida ishtirok etib, forum doirasida Investitsiyalar, sanoat va savdo hamda Sog‘liqni saqlash vazirliklari rahbarlari bilan mazkur loyihalarni amalga oshirish bo‘yicha muzokaralar o‘tkazadi.

Mazkur tashkilot sog‘liqni saqlash va kapital talab qiladigan yo‘nalishlarda investitsiya loyihalarini amalga oshirishga ixtisoslashgan xususiy investitsiya kompaniyasi hisoblanadi. Kompaniya tibbiy infratuzilmani rivojlantirish, investitsiyalarni boshqarish hamda davlat-xususiy sheriklik asosida loyihalarni amalga oshirish sohasida faoliyat yuritadi.

Bundan tashqari, kompaniya mintaqa bo‘yicha birinchi bo‘lib BAA Sog‘liqni saqlash vazirligi bilan hamkorlikda DXSh modeli asosida tibbiy infratuzilma loyihalarini amalga oshirayotgan xususiy tashkilotlardan biridir.

Source link