Iqtisodiyot
Bond omborlari ochiladi: smartfonlar va kiyim-kechaklar arzonlaydimi?
1 iyuldan bond omborlari tashkil qilishga ruxsat berilmoqda. Xo‘sh, bu o‘zi qanaqa ombor, uni kimlar ocha oladi, bu yangilikning narx-navoga ta’siri qanaqa bo‘ladi? Kun.uz savollariga Istiqbolli loyihalar milliy agentligi boshqarma boshlig‘i Komronbek Muhammadiyev javob berdi.
O‘zbekistonda 2026 yil 1 iyuldan e’tiboran ikki yillik huquqiy eksperiment boshlanadi: yangi turdagi erkin ombor – bond omborlari tashkil etishga ruxsat berilmoqda.
Bond omborlari – jismoniy shaxslarga shaxsiy ehtiyojlari uchun sotiladigan import tovarlarni vaqtincha saqlash uchun mo‘ljallangan. U yerdagi tovarlar faqat marketpleyslar orqali sotiladi.
Bond omboriga joylanadigan tovarlar ikki guruhga ajratilgan. Birinchi guruhdagi tovarlar: smartfon, noutbuk, planshet va boshqa ayrim yarim elektronika tovarlari jo‘natmalar deklaratsiyasi asosida jismoniy shaxslarga chiqarilganda, bojsiz olib kirish normalari tatbiq etilmaydi va amaldagi bojxona to‘lovlari o‘rniga ularning sotish qiymatidan 5 foiz yagona bojxona to‘lovi undiriladi. QQS undirilmaydi.
Ikkinchi guruh tovarlarga xalqaro miqyosda brend bo‘lmagan kiyim-kechak va poyabzallar kiradi. Ularni sotishda QQS va 3 foiz bojxona boji undiriladi.
Komronbek Muhammadiyevning so‘zlariga ko‘ra, bu tartib elektron tijorat sohasini rivojlantirish va yashirin iqtisodiyotni qisqartirish imkonini beradi.
— Bond omborlari faoliyati O‘zbekistonda birinchi marta eksperiment tariqasida yo‘lga qo‘yilyapti. Bond omborlari nima, u yerga tovarlar qanday joylashtiriladi va bojlar qanday bo‘ladi?
— Elektron tijorat sohasi O‘zbekistonda jadal rivojlanyapti, lekin chakana savdoda ulushi hozirgi kunda ham dunyodagi o‘rtacha ko‘rsatkichlar bo‘yicha baribir past. Bizda elektron tijorat ulushi salkam 5 foizni tashkil etadi, dunyodagi o‘rtacha ko‘rsatkich esa 15-20 foiz.
Ikkinchi masala, hammamiz hozir ko‘rib turibmiz, barcha davlat organlari birlashib, xufiyona iqtisodiyotga qarshi kurashishni asosiy maqsad deb belgilab qo‘ygan. Shu maqsadni bajarish borasida bizga vazifa qo‘yildi. Bond omborlari orqali tovarlarni, ya’ni elektron savdo platformalari, oddiy qilib aytganda marketpleyslar orqali sotishni yo‘lga qo‘yish. Bundan asosiy maqsad nima? Birinchidan, ochiq-oydin aytish kerak, har xil yo‘llar bilan – kargo deymizmi yo kurer jo‘natmalari orqalimi – tadbirkorlar tovarlarni olib kirib kelyapti. Va buning natijasida ko‘pgina aylanma, pul mablag‘lari kulrang zonada qolyapti. Bond omborlari orqali esa tadbirkor chet eldan tovarlarni import qilayotganda, ikkita ro‘yxatga kiruvchi tovarlarni pasaytirilgan bojlarda olib kiradi.
Birinchi ro‘yxat – bu beshta turdagi tovarlar. Ularga smartfonlar, planshetlar va hokazo elektronika tovarlari kiradi. Ularga barcha bojxona va soliq to‘lovlari o‘rniga yagona bojxona to‘lovi joriy etildi. Bugungi kunda smartfonlarning bojxona boji 5 foizni tashkil etadi, lekin bunga qo‘shimcha yana qo‘shilgan qiymat solig‘i ham bor. Qo‘shilgan qiymat solig‘ini qo‘shib olib kiradigan bo‘lsak, byujdetga to‘lovlar 17 foizdan oshadi. Bizning eksperimentimizda esa bu smartfonlarning sotilayotgan qiymatidan 5 foiz yagona bojxona to‘lovi undiriladi, QQS yo‘q.
Ikkinchi ro‘yxatga o‘tadigan bo‘lsak, u yerda 30 ta pozitsiya belgilangan. Asosiysi, ko‘p ishlatiladigan tovarlar – kiyim-kechak, poyabzal va hokazolar kiritilgan. Ularga barcha bojxona va soliq to‘lovlari o‘rniga 3 foiz bojxona to‘lovi va 12 foiz qo‘shilgan qiymat solig‘i belgilnyapti. Ya’ni o‘rtacha oladigan bo‘lsak, trikotaj, tekstil, kiyim-kechaklarga bizda bojlar haligacha baland – 20 foiz boj. Bu bojdan tashqari qo‘shilgan qiymat solig‘i ham bor, bojxona rasmiylashtiruvi va hokazo… O‘rtacha shu 30 foizgacha ham chiqib keladi narx.
Endi buni ham tushunishimiz kerak, ichki bozorni qo‘llab-quvvatlash, deyishadi. Lekin biz JSTga kirmoqchimiz. Tashkilotga kirishdan maqsad – shu raqobat muhitini tenglashtirish. Tadbirkorlarimiz ham ushbu yangi qoidalarga ko‘nikishi kerak, tushunishi kerak, sekin-sekin o‘rganishi kerak. Mana shu bond omborlari orqali tovar olib kirilayotganda, qo‘shimcha raqobat muhiti ham yaratiladi.
Bunaqa mexanizm chakana savdoni o‘ldirmaydimi degan savol o‘rtaga chiqyapti. Chunki hamma bond omborlari orqali olib kirishni boshlaydi, do‘kon va boshqa savdo nuqtalari o‘zini qoplamay, yopilib ketadi degan xavotirlar bor. Biz bu yerda ko‘rsatib o‘tgan mexanizmimizda olib kirilayotgan tovarlar faqatgina elektron savdo platformalari orqali jismoniy shaxslarga shaxsiy ehtiyoji uchun realizatsiya qilinishi belgilangan. Ya’ni bond omboridan xarid qilingan tovarlarni tijoriy maqsadda ikkilamchi chakana savdoga chiqarish man etilgan. Buni nazorat qilish Bojxona qo‘mitasi, Soliq qo‘mitasi, bond ombori operatori va maxsus elektron savdo platformasi operatoriga yuklatilgan. Ya’ni bu huquqiy eksperiment, shuning uchun bu qattiq nazoratda bo‘ladi. Agar har xil xavf-xatarlar paydo bo‘ladigan bo‘lsa, bu yerda preventiv mexanizmlar kuchga kiradi.
— Bond ombori litsenziyasi kimlarga beriladi? Ma’lum tadbirkorlargagina berilmaydimi bu huquq? Raqobat nuqtayi nazaridan ishlar qanday tashkil qilinadi?
— Qarorda belgilaganidek, uch oy muddatda biz Vazirlar Mahkamasi qarorini ishlab chiqishimiz kerak. Bu qaror bilan ikkita vaqtinchalik nizom tasdiqlanadi. Birinchi nizom – bond omborlari faoliyatini tashkil etish bo‘yicha, ikkinchi nizom – maxsus elektron savdo platformalari orqali shu bond omborlarda joylashtirilgan tovarlarni sotish tartibini belgilaydi.
Birinchisida bond omborlari uchun barcha talablar yozib chiqiladi, ya’ni bond omborlari reyestri, reyestrga kiritilishi uchun qanday talablarni bajarishi shartligi. Ikkinchisida maxsus elektron savdo platformalari uchun xuddi shunday talablar belgilanadi va ushbu talablar ochiq-oydin, yaqqol Vazirlar Mahkamasi qarorida ko‘rinadi. Barcha u bilan tanishib chiqadi va ushbu reyestrga kirish uchun arizalar o‘rnatilgan tartibda qabul qilinadi. Arizaga javob berish muddati yo 10 kun, yo 30 kun bo‘ladi, ya’ni qonunchilik hujjatlarida belgilangandek.
Bu nega vaqtinchalik nizom? Chunki bu huquqiy eksperiment bo‘lyapti va ikki yilga mo‘ljallangan. Muddat yakunlanishi bilan Iqtisodiyot va moliya vazirligi bilan birgalikda bizning agentlik tegishli takliflar kiritishi kerak. Ya’ni ushbu tartibni yo to‘laqonli bizning qonunchiligimizga implementatsiya qilish bo‘yicha yoki agar yaxshi samara bermasa, tugatish bo‘yicha. Bizning tahlillarimizga qaraganda, o‘zini juda ham yaxshi ko‘rsatishi kerak.
Ochiq-oydin aytaman, O‘zbekistonda hozir sal logistika bilan, omborlar bilan va boshqa-boshqa savdo uchun juda muhim infratuzilma bilan katta muammolar bor. Iqtisodiyotimiz jadal sur’atlar bilan o‘sayotgan paytda, infratuzilmada yetishmovchiliklar bor. Shuning uchun nima maqsad qo‘yganmiz? Bond omborlariga talablar juda kuchli bo‘ladi.
Biz institutsional o‘yinchilarni kutyapmiz, ya’ni bizning iqtisodiyotimizga, shu logistika infratuzilmasiga, bond omborlari, tarqatish punktlariga katta-katta investitsiya kiritadigan o‘yinchilarni kutamiz. Chunki agar kichkina-kichkina o‘yinchilarga beriladigan bo‘lsa, birinchidan, ular bond ombori uchun talablarni bajarishi qiyinroq bo‘ladi. Agar kichkina o‘yinchilar ushbu tartib orqali ishlamoqchi bo‘lsa, ular birlashishi mumkin. Ya’ni birlashib, bitta yagona marketpleys yoki bond ombori operatorini yaratib, o‘rnatilgan tartibda arizaga topshirishi mumkin.
— O‘zbekistonda bunday omborlar shu paytgacha bo‘lmagan, umuman bojxona omborlari bor. Qanaqa bo‘ladi? Mavjud bojxona omborlari bond omborlarga aylantiriladimi yoki ular noldan quriladimi?
— Endi har xil ssenariylar bor. Bizda omborlar bor, lekin ular hozirgi talablarga yetarli emas. Bizda mahalliy o‘yinchilardan biri juda ham katta ombor qurgan. Bu faqatgina ombor emas, ya’ni u juda ko‘p funksiyalarni o‘ziga jamlab olgan. U yerda tegishli tovarlar taqsimlanib ham chiqiladi, avtomatik tarzda ko‘p operatsiyalar amalga oshiriladi. Hozir bunday olib qaraydigan bo‘lsak, hisob-kitob qilib chiqdik, agar 100 ming kvadrat metrlik multifunksional ombor qurmoqchi bo‘lsa, 100 million dollar sarflanishi kerak ekan.
Institutsional o‘yinchilar ushbu tartib bilan ishlay oladi. Chunki bu yerda o‘zi omborning funksiyalaridan kelib chiqqan holda, ancha-muncha xodimlar ishlaydi, ularning bond omboriga talablari kuchli bo‘ladi.
To‘liq suhbat bilan video orqali tanishishingiz mumkin.
Qozog‘iston Energetika vaziri so‘zlariga ko‘ra, O‘zbekiston bilan bir qator yirik tashabbuslar, jumladan, neft-kimyo va qayta ishlash sohalarida muhokama qilinmoqda.
Qozog‘iston Energetika vaziri Yerlan Akkenjyenov Ostonada bo‘lib o‘tgan MES-2026 mintaqaviy ekologik sammiti doirasida O‘zbekiston bilan hamkorlikni kengaytirish rejalari haqida gapirdi. Uning so‘zlariga ko‘ra, mamlakatlar o‘rtasidagi hamkorlik tajriba almashish va o‘zaro qo‘llab-quvvatlashga asoslangan.
«Tajriba almashish va o‘zaro yordam – bularning barchasi amaliy vazifalarni hal etishga xizmat qiladi. Biz hamkorlarimiz bilan nafaqat energetika sohasida, balki iqtisodiyotning barcha sohalarida faol hamkorlik qilmoqdamiz», dedi vazir.
Uning ta’kidlashicha, O‘zbekiston bilan bir qator yirik tashabbuslar, jumladan, neft-kimyo va qayta ishlash sohalarida muhokama qilinmoqda.
«O‘zbekiston bilan juda ko‘p qo‘shma loyihalarimiz bor. Yaqinda prezidentning O‘zbekistonga tashrifi bo‘lib o‘tdi, unda ko‘plab tashabbuslar muhokama qilindi. Neft-kimyo sanoatini rivojlantirish va neftni qayta ishlash sohasini kengaytirish shular jumlasidandir», dedi vazir.
Energetika, jumladan, tranzit va resurslarni yetkazib berish sohasidagi hamkorlikni kengaytirish bo‘yicha ham ishlar olib borilmoqda.
«Biz Rossiya gazining O‘zbekistonga tranziti, shuningdek, Rossiya neftini yetkazib berish masalalari bo‘yicha yaqindan ishlayapmiz. Bundan tashqari, Qozog‘iston mahsulotlarini, xususan, xom neft va neft mahsulotlarini O‘zbekistonga yetkazib berish imkoniyatini ko‘rib chiqmoqdamiz», deb qo‘shimcha qildi Yerlan Akkenjyenov.
Uning so‘zlariga ko‘ra, loyihalarning bir qismi allaqachon amaliy bosqichga o‘tgan.
«Ko‘plab loyihalar allaqachon amalga oshirish bosqichida. Umuman olganda, o‘zbekistonlik hamkorlar bilan juda yaqin hamkorlik yo‘lga qo‘yilgan», dedi vazir.
Iqtisodiyot
“QQSni oson qaytarib olish ta’minlanmasa, stavkani 6 foizga tushirishni taklif qilamiz” – Davron Vahobov
Savdo-sanoat palatasi QQSga o‘tish chegarasini oshirishni qo‘llab-quvvatlamaydi, lekin uni oson va tez qaytarib olish ta’minlanishi kerak, deb hisoblaydi. “Prezidentimiz o‘tkazgan katta yig‘ilishlarda QQSni oson qaytarish masalasi ko‘tarilgan edi, ammo amaliyotda hali to‘liq ishlamayapti. Shu sababli yana taklif kiritamiz: yo QQSni qaytarishni tubdan soddalashtirish, yoki QQS stavkasini pasaytirish kerak”, dedi SSP raisi.
Foto: Savdo-sanoat palatasi
21 aprel kuni umumiy ovqatlanish va gastronomiya sohasida faoliyat yuritayotgan tadbirkorlar ishtirokida ochiq muloqot o‘tkazildi. Unda Navoiy viloyatida faoliyat yuritayotgan tadbirkorlardan biri narxlar oshib borayotgani fonida qo‘shilgan qiymat solig‘iga o‘tish mezonini qayta ko‘rib chiqishni taklif qildi.
Uning aytishicha, so‘nggi paytlarda narxlar oshgani sababli korxonalarning aylanmasi ham yuqorilab boryapti. Bu esa ko‘plab kichik biznes sub’yektlarini QQS to‘lovchisiga aylanish chegarasiga olib kelib qo‘yyapti
“Narxlar oshyapti, aylanma ham shunga yarasha oshib ketyapti. Shu sababli QQSga o‘tish kriteriyasini oshirish kerak”, – dedi tadbirkor.
Amaldagi tartibga ko‘ra, yillik aylanmasi belgilangan chegaradan (hozirda 1 mlrd so‘m) oshgan tadbirkorlar majburiy tarzda QQS to‘lovchisiga aylanadi (ungacha aylanmadan olinadigan soliq amal qiladi). QQS – bu mahsulot yoki xizmat qiymatiga qo‘shiladigan bilvosita soliq bo‘lib, hozirgi stavkasi 12 foizni tashkil etadi. Tadbirkorlar bu soliqni iste’molchidan undirishadi, biroq ayrim holatlarda oldindan to‘langan QQSni qaytarib olish (zachet) mexanizmi mavjud.
Savolga javoban Savdo-sanoat palatasi raisi Davron Vahobov QQS mezonini oshirish masalasiga ehtiyotkorlik bilan yondashish kerakligini bildirdi. Uning so‘zlariga ko‘ra, bu chora muammoni yengillashtirish o‘rniga yanada murakkablashtirishi mumkin.
“Kriteriyani oshirish masalasi aslida vaziyatni yanada qiyinlashtirishi mumkin. Shu sababli tadbirkorlar tomonidan boshqa muqobil taklif ilgari surilgan edi, ya’ni aylanmadan 6 foizlik soliq joriy etish va QQS mezoniga tegmaslik. Ya’ni korxona 10 mlrd yoki 100 mlrd so‘m aylanma qiladimi – farqi yo‘q, oddiy tartibda aylanmadan 6 foiz to‘lab ishlayveradi degan yondashuv taklif qilingan”, – dedi u.
Vahobovning aytishicha, bu taklif hukumat darajasida muhokama qilingan, biroq yakunda boshqa mexanizm ilgari surilgan.
“Biz bu taklifni hukumatga olib chiqqanimizda 6 foizlik modelni joriy qilish o‘rniga mavjud 12 foizlik QQSdan ma’lum qismini qaytarish mexanizmini takomillashtirish variantini taklif qildik. Ya’ni QQSning 40–50 foizini oson va tez qaytarib berish tizimini yaratish masalasi ko‘tarildi”, – dedi SSP raisi.
Uning ta’kidlashicha, agar QQSni qaytarib olish mexanizmi haqiqatan ham sodda va tez ishlaydigan bo‘lsa, tadbirkorlar uchun ancha qulaylik yaratiladi.
Shu bilan birga, u hozirgi amaliyotda QQSni qaytarish jarayoni kutilgan darajada samarali ishlamayotganini ham e’tirof etdi.
“Prezidentimiz tomonidan o‘tkazilgan katta yig‘ilishlarda QQSni oson qaytarish masalasi ko‘tarilgan edi. Ammo amaliyotda bu mexanizm hali to‘liq ishlamayapti. Shu sababli biz yana taklif kiritamiz: yoki QQSni qaytarish tizimini tubdan soddalashtirish kerak, yoki muqobil ravishda QQS stavkasini pasaytirish, masalan, 6 foizlik modelni joriy etish masalasini ko‘rib chiqish zarur”, – dedi Vahobov.
Uning qo‘shimcha qilishicha, QQS mezonini oshirish hozircha maqsadga muvofiq emas, chunki iqtisodiyotda QQS zanjiri keng qamrovli bo‘lib, u ko‘plab sohalarni qamrab oladi, jumladan, umumiy ovqatlanish sektorini ham.
Iqtisodiyot
Qirg‘iziston ilk marta Yevropa Ittifoqining sanksiyalarni chetlab o‘tishga qarshi kurashish mexanizmiga tushdi
Yevropa Ittifoqi Qirg‘iziston ikkimaqsadli tovarlarni Rossiyaga reeksport qilishning tizimli kanaliga aylanganini va Bishkek bilan texnik muzokaralar chegaralarda nazoratni kuchaytirishga olib kelmaganini ta’kidlamoqda.
Yevropa Ittifoqi elchilari 22 aprel kuni Bryusselda bo‘lib o‘tgan yig‘ilishda Rossiyaga qarshi yangi sanksiyalar paketini ma’qulladi. Bu haqda Bloomberg xabar berdi.
Dastlab Yevrokomissiya 20-paketni fevral oyida qabul qilishni rejalashtirgan edi, biroq uni kelishish Vengriya va Slovakiya qarshiligi tufayli kechikdi.
Yangi sanksiyalar paketi Rossiya energiya daromadlarini yanada qisqartirish va uning harbiy-sanoat majmuasini cheklashga qaratilgan. Xususan, chora-tadbirlar dronlar ishlab chiqarish, «soya floti»ga ta’sir qiladi, Rossiya suyultirilgan tabiiy gazi bilan bog‘liq xizmatlarni bosqichma-bosqich taqiqlaydi.
Yangi paketda uchinchi davlatlarga alohida e’tibor qaratilgan.
Yevropa Ittifoqi birinchi marta Qirg‘izistonga nisbatan sanksiyalarni chetlab o‘tishga qarshi maxsus mexanizmni qo‘llamoqda.
Qarorga ko‘ra, bir qator ikkimaqsadli tovarlarni Yevropadan respublikaga yetkazib berishga taqiq joriy etildi. Cheklovlar quyidagilarga ta’sir qiladi:
– yuqori aniqlikdagi metall kesish stanoklari, shu jumladan raqamli dasturiy boshqaruvga (RDB) ega uskunalar;
– aloqa uskunalari – modemlar, routerlar, radiostansiyalar va boshqa ma’lumot uzatish qurilmalari.
Yevropa Ittifoqi Qirg‘iziston ushbu tovarlarni Rossiyaga reeksport qilishning tizimli kanaliga aylanganini va Bishkek bilan texnik muzokaralar chegaralarda nazoratni kuchaytirishga olib kelmaganini ta’kidlamoqda.
Bundan tashqari, Qirg‘izistonning bir qator logistika kompaniyalari Yevropa Ittifoqining transport infratuzilmasidan foydalanish imkoniyatidan mahrum qilindi.
Shu paytgacha Yevropa Ittifoqi faqat uchinchi davlatlardagi (masalan, Xitoy, O‘zbekiston yoki Qirg‘izistonning o‘zida) aniq kompaniyalarga nisbatan sanksiyalar qo‘llagan. Endi esa cheklovlar davlat bilan butun bir savdo yo‘nalishi darajasida joriy etilmoqda.
Avvalroq, Rossiyaga qarshi cheklovlarni chetlab o‘tishda gumonlar tufayli Yevropa Ittifoqi Qirg‘izistonning bir necha bankiga nisbatan sanksiyalar qo‘llagan edi. Masalan, Markaziy Osiyo Kapital Banki, Tolubay, Yevroosiyo jamg‘arma banki, Kapital Bank, Keremet Bank va boshqalar.
Qirg‘iziston banklarga qarshi sanksiyalar asossiz ekanini bir necha bor ta’kidlagan. Prezident Sadir Japarov 2025 yilda BMT minbaridan G‘arbni respublikaga nisbatan cheklovlari uchun tanqid qilgan edi. U asossiz sanksiyalarni mamlakat ichki ishlariga aralashish va endigina shakllanayotgan iqtisodiyotning rivojlanishiga to‘sqinlik qiluvchi bosim deb atadi.
Umumiy ovqatlanish sohasidagi tadbirkorlar bilan ochiq muloqotda peshlavhalar muammosi ko‘tarildi. Tadbirkor hali dizayn kod kuchga kirmay turib, peshlavhalar olib tashlanayotgani, biroq yechim berilmayotganiga e’tiroz bildirdi. “Necha marta borib sarson bo‘lib topshirganmiz, pulini ham to‘lab keldik. Tasdiq hali kelmaydi, biz hali o‘zimiz hal qilib olganimiz yo‘q deyishdi”, dedi u.
Illyustrativ foto: Yunusobod tumani hokimligi matbuot xizmati
21 aprel kuni umumiy ovqatlanish va gastronomiya sohasidagi tadbirkorlar ishtirokida ochiq muloqot bo‘lib o‘tdi. Unda Soliq qo‘mitasi raisi Farrux Po‘latov, Savdo-sanoat palatasi raisi Davron Vahobov, biznes ombudsman o‘rinbosari Jamshid O‘runov va boshqa mas’ullar ishtirok etdi.
Muloqotda tadbirkorlardan biri Toshkent shahrida peshlavhalar olib tashlanayotgani haqida e’tirozlarini bildirdi.
“Hammani qiynab yuborgan peshlavhalar masalasi. Hali o‘zlari “guide book” qilishmagan, topshirsangiz, tasdiq kelmaydi. Biz o‘zimiz hali qilmaganmiz, deyishadi. Siz endi peshlavhangizni olib tashlashingiz kerak, nomsiz ishlashingiz kerak. Yunusobodda ham, Chilonzorda ham bo‘ldi. Necha marta borib, sarson bo‘lib topshirganmiz, pulini ham to‘lab keldik. Oxiri aytishdiki, tasdiq hali kelmaydi, biz hali o‘zimiz hal qilib olganimiz yo‘q, deyishadi.
Hamma peshlavhalarni olib tashlaymiz-da, keyin bo‘sh binolar rasmiga qarab dizayn kod qilib chiqamiz, deyishyapti. Bitta knopka bilan qilsa bo‘ladigan narsani qilish imkoni yo‘q ekan”, – dedi tadbirkor.
SSP raisi Davron Vahobov tadbirkorlardan peshlavhalar bo‘yicha aniq takliflar berishni so‘radi.
“Bir tarafdan bu narsa qaysidir ma’noda to‘g‘ri. Sababi biz Toshkentning yuzimiz. Shaharga chiqinglar… Men yaqinda Belarusga bordim, hammasi bir xil yozilgan. Birlashib, o‘zimizning fikrimizni olib chiqaylik”, – dedi Vahobov.
Farrux Po‘latov va Davron Vahobov
Tadbirkor fikricha, avval dizayn kod chiqarilib, keyin tadbirkorlarga peshlavhalar uchun tavsiya berilishi kerak.
Soliq qo‘mitasi raisi Farrux Po‘latov ayrim peshlavhalar “Angrendan ko‘rinishi”ga urg‘u berib, bir xil dizayn kod bo‘lishini qo‘llab-quvvatlashini bildirdi.
Avvalroq mashhur umumiy ovqatlanish tarmoqlari – Dodo Pizza, Belissimo Pizza, Evos, Feed Up, KFC va Papa Johns peshlavhalar olib tashlanayotgani bo‘yicha jamoaviy murojaat bilan chiqqan edi.
Ular bu amaliyot belgilangan tartib va protsessual talablarga zid ekanini, ayrim hollarda esa ro‘yxatdan o‘tgan tovar belgilariga ham ta’sir qilib, biznes identifikatsiyasi va intellektual mulk huquqlarini cheklayotganini qayd etgan.
Markaziy bank 2026-yil 24-apreldan valyutalarning yangi kursini belgiladi.
AQSh dollari 26,53 so‘mga tushib, 12 015,96 so‘m etib belgilandi.
Yevro kursi 96,06 so‘mga tushdi va 14 051,46 so‘m bo‘ldi. Funt-sterling 16 222,75 so‘m bo‘ldi (-59,90).
Rossiya rubli 160,30 so‘m etib belgilandi (-0,25).
Qozog‘iston O‘zbekistonga neft yetkazib berishni boshlashi mumkin
Qozog‘iston olti oyga tuxum importini taqiqladi
Shavkat Mirziyoyev Turkiya bilan harbiy hamkorlik bo‘yicha hisobotni eshitdi
-
Jamiyat4 days ago
Самарқандда МЧЖ раҳбарларининг кирдикорлари ошкор бўлди: тафсилотлар
-
Dunyodan4 days ago
Ukraina Turkiyaga Zelenskiy-Putin uchrashuvi boʻyicha soʻrov yubordi
-
Dunyodan3 days agoEron Hurmuz boʻgʻozini bloklagani sababli muzokaralarni rad etmoqda
-
Siyosat3 days ago“Oʻzbekneftgaz” va Xitoyning CNPC hamkori uglevodorodlarning oʻta chuqur zahiralarini oʻrganish boʻyicha
-
Siyosat2 days agoSaida Mirziyoyeva xalqaro forumda Prezident murojaatini o‘qib eshittirdi
-
Jamiyat5 days ago
Afg‘onistonda farzandlari halok bo‘lgan ota-onalarga imtiyoz beriladi
-
Siyosat2 days agoPrezident Shavkat Mirziyoyev JSST bosh direktorini qabul qildi
-
Siyosat3 days agoSamarqandda narkotiklarning transmilliy tahdidlariga qarshi kurash bo‘yicha xalqaro forum bo‘lib o‘tmoqda