Namanganlik va surxondaryolik ikki yigit Luhanskda og‘ir kunlarni boshdan kechirgan. Ularning har ikkisi avvaliga Rossiyada narkotuzoq orqali qamoqqa olingan. So‘ngra turli bosim va qiynoqlar orqali urushga borishga majburlangan.

Rossiyaga armiyasiga yollanib, Ukrainaga qarshi urushda qatnashgan ikki o‘zbekistonlik jinoiy jazoga tortildi. Kun.uz sud hujjatlari bilan tanishdi.

“Blatnoy”ning tirik qolishi

Namanganlik Abduvaliga (maqoladagi ismlar o‘zgartirilgan) urushda “Blatnoy” laqabi berilgandi. Luhansk maydonlarida jangga kirgan bu yigit frontga o‘z-o‘zidan borib qolmagan.

Abduvali 2023 yil oktyabrida ishlab pul topish Maqsadida Rossiyaga ketgan. Bu paytda u 21 yoshda bo‘lgan. 2024 yil yanvarida Abduvali narkojinoyatda ayblanib, qamoqqa olingan. Biroq sud qilinmasdan 2025 yil sentabrga qadar ushlab turilgan. So‘ngra unga urushga borish evaziga afv taklif qilishgan.

Abduvali qamoq ehtiyot chorasidan ozod bo‘lish va qiynoqlardan qutulish maqsadida taklifga ko‘nishga majbur bo‘lgan.   

“2024 yil 26 yanvarda Moskva shahrining markaziy ko‘chalaridan birida taksida ishdan yotoqxonaga qaytayotgandim. Militsiya xodimlari mashinani to‘xtatdi. So‘ngra meni ushlab, militsiya bo‘limiga olib borishdi. U yerda kiyimlarimni yechib, yonimni ko‘zdan kechirishdi. Ammo hech qanday taqiqlangan narsa topisholmadi. U yerdan chiqayotganimda egnimdagi kurtkamni ham ham tekshirishdi. Shunda uning cho‘ntagidan ro‘molchaga ilashib, skotchga o‘ralgan bir bo‘lak saqichsimon modda chiqdi.

Ularga bu modda menga tegishli emasligini, narkotik iste’mol qilmasligimni aytdim”, degan Abduvali suddagi ko‘rsatmasida.

Shundan so‘ng hujjatlar rasmiylashtirilib, sud ajrimi bilan Abduvaliga qamoq ehtiyot chorasi qo‘llangan. U Moskva shahridagi “Tombov SIZO-1” turmasiga etap qilingan. Turmada har 2 oyda sud orqali qamoq ehtiyot chorasini cho‘zdirib, 2025 yil 5 sentabrga qadar sud qilmasdan ushlab turishgan. Bu vaqtda unga har kuni urushga borishni taklif qilishib, ko‘ndirish uchun qiynoqqa solishgan, tahqirlashgan. Abduvali qiynoqlardan qutilish uchun oxiri bu taklifga ko‘ngan. 

“2025 yil 5 sentabr kuni men va yana 25 nafar mahbusni Luhanskdagi rotaga olib borishdi. Barchamizning kiyimlarimiz va shaxsiy buyumlarimizni yig‘ishtirib olishdi. Avtomatdan o‘q otishni mashq qildirishdi. Harbiy-jangovar tayyorgarlik 2 hafta davom etdi.

2025 yil 3 oktyabrda 15 nafar yollanma askarlardan iborat guruh tarkibida Xarkov shahri hududidagi jang maydoniga bordim. U yerda dron zarbasidan jarohat olib, ortga qaytdim. Harbiy gospitalda shifokorlar tekshirib, kerakli muolajalarni qilishdi. 2 hafta davolangach polkka qaytib bordim. Sheriklarimning bari vafot etgan ekan.

So‘ng tirik qolish imkonsiz ekanini bilib, qochishga harakat qildim. Biroq yo‘lda tutib olishdi. 20 nafar askar kaltakladi”, degan Abduvali.

Shundan so‘ng u yana gospitalga yotgan. Bir muddat davolanib, jang maydoniga qaytgan. Harbiy qismdan qochishning ham, jang maydonida omon qaytishning ham imkoni yo‘qligini bilgach, o‘ziga jarohat yetkazgan.

“Harbiy qism hojatxonasiga kirib, o‘z so‘lagimni shpritsga tortdim va o‘ng oyog‘im tizza  sohasiga yubordim. Oradan bir kun o‘tgach, oyog‘im shishib ketdi: tana haroratim ko‘tarilib, butunlay yurolmay qoldim. Komandirlar majburan meni qayta gospitalga yuborishdi. Gospitalda esa bunday murakkab jarrohlik amaliyotini o‘tkazish imkoni yo‘qligi sababli yo‘lovchi poyezdda nazorat ostida Sankt-Peterburg shahrida joylashgan markaziy harbiy gospitalga yuborishdi”, deyiladi yigitning ko‘rsatmasida.

Ahvoli biroz yaxshilangan Abduvali 2026 yil 4 yanvar kuni harbiy gospital devoridan oshib o‘tib, u yerdan qochishga muvaffaq bo‘lgan. So‘ng Moskva shahriga borib, O‘zbekiston elchixonasidan yordam so‘ragan. Shu tariqa u vatanga qaytish guvohnomasi orqali 15 yanvarda O‘zbekistonga qaytib kelgan.

Abduvali sudda Ukrainaga qarshi urushda majburlikdan ishtirok etganini aytgan.

JIB Namangan tuman sudining 2026 yil 29 apreldagi hukmi bilan Abduvali yollanish jinoyatini sodir qilishda aybli deb topilgan. Unga 3,5 ozodlikni cheklash jazosi tayinlangan. 

“Do‘stim sabab qamaldim”

Surxondaryolik Boburning Rossiyada boshidan kechirganlari Abduvalinikidan kam emas. U ham narkotuzoqqa ilingan va Donetskdagi janglarda qatnashgan.

30 yoshli Bobur Rossiyaga 2022 yil avgust oyida borgan. U Moskva viloyatidagi non sexida ishlab kelgan. Ammo 2023 yil iyulida barchasi o‘zgarib ketgan.   

O‘sha kuni farg‘onalik do‘sti undan Voronej shahriga birga borib kelishni iltimos qilgan. Bobur avval birga ishlagan do‘stining bu iltimosini rad qilolmagan. Shu tariqa u do‘sti ijaraga olgan mashinada yo‘lga chiqqan.

“Lipetsk shahriga yetib borganimizda do‘stim mashinani to‘xtatib, do‘konga kirib ketdi. Men sigaret chekish maqsadida mashinadan tushdim. Shu vaqtda fuqarolik kiyimidagi militsiya xodimlari kelib, mashinani ko‘zdan kechirishdi va do‘stimga tegishli sumka ichidan narkotik chiqqani uchun meni o‘zlari bilan olib ketishdi.

Tergov qilishib, narkotik modda saqlashda ayblashdi. 2023 yil oktbrgacha qamoqda saqlashdi. So‘ng sud qilishib, 9 yilga ozodlikdan mahrum qilishdi”, degan Bobur sudda.

Jazo muddatini o‘tash davrida doimiy ravishda Ukrainaga qarshi urushda qatnashishga undab kelingan. Qiynoq va bosimlardan so‘ng Bobur 2025 yil avgust oyida Rossiya armiyasida harbiy xizmatni o‘tash uchun shartnoma tuzishga majbur bo‘lgan.

“Men bilan birga taxminan 30 nafar mahbusni urushga tayyorlash uchun Nijniy Novgord shahriga olib borishdi. Bir oyga yaqin harbiy tayyorgarlikdan o‘tdik: okopda yurish, o‘q otish, drondan qochish kabilarni o‘rgatishdi.

So‘ngra menga “AK-74” avtomatini, harbiy kiyim-kechak va bronejilet berishdi hamda urush chizig‘iga olib borishdi. 2025 yil 2 noyabrda Ukraina askarlari biz turgan joyga dronlardan zarba berishdi. Oqibatda og‘ir yaralanib, ortga chekindim. Qo‘limga jgut qo‘yib, qonni to‘xtatishdi. Olgan jarohatlarim bilan 3 kun qolib ketdim”, degan Bobur ko‘rsatmasida.

Keyin uni Luhanskdagi gospitalga olib borishigan. 10-15 kunlik davolanishdan so‘ng odam yetishmayapti, deya yana poligonga jo‘natishgan. Ammo Boburning jarohati ancha jiddiy edi. Ko‘p o‘tmay uni Belgorod shahridagi gospitalga olib borishga majbur bo‘lishadi.

Uni gospitalga olib ketayotgan mashina haydovchisi yo‘lda do‘konga kirib chiqish maqsadida to‘xtaydi. Shunda Bobur qochishga muvaffaq bo‘ladi. U Moskva shahriga borib, elchixonadan vatanga qaytish guvohnomasini oladi va 2026 yil 27 fevral kuni O‘zbekistonga qaytib keladi.

JIB Termiz shahar sudining 2026 yil 1 maydagi hukmi bilan Bobur yollanish jinoyatini sodir qilishda aybli deb topilgan. Unga 4,5 yil ozodlikni cheklash jazosi tayinlangan. 

Source link

Prezident Shavkat Mirziyoyev Xalqaro kongress markazida O‘zbekistonda kitobxonlikni rivojlantirish bo‘yicha umummilliy harakatga start berish marosimida ishtirok etdi.

Davlat rahbari nutqida bugungi kunda raqamli texnologiyalar va sun’iy intellekt hayotga chuqur kirib borayotganini, bunday sharoitda mustaqil fikrlay oladigan insonlar jamiyat taraqqiyoti uchun hal qiluvchi ahamiyat kasb etishini ta’kidladi.

– Kitob o‘qiydigan odam teran va sog‘lom fikrlaydi. Bunday tafakkurga ega inson esa jamiyatni o‘zgartira oladi, – dedi Prezident.

Ta’kidlanishicha, Yangi O‘zbekistonda kitobxonlik va mutolaa madaniyati davlat siyosati darajasiga ko‘tarilmoqda. Prezident ulug‘ ajdodlar – Imom Buxoriy, Muhammad Xorazmiy, Ahmad Farg‘oniy, Alisher Navoiy va Mirzo Ulug‘bek kabi mutafakkirlarning yuksak salohiyati ilm va kitobga muhabbat bilan bog‘liq bo‘lganini qayd etdi.

Davlat rahbari 2017-yildan buyon o‘tkazib kelinayotgan «Yosh kitobxon» tanlovi millionlab yoshlarni kitobga yaqinlashtirganini ta’kidladi.

Ma’lum qilinishicha, joriy yil boshida qabul qilingan qaror asosida eng faol kitobxonlarni qo‘llab-quvvatlashning yangi tizimi yo‘lga qo‘yilgan. Yaqinda «Yosh kitobxon» tanlovining respublika bosqichi yakunlanib, unda 42 nafar yosh ishtirok etgan. Tanlovning uch nafar g‘olibi Prezident sovg‘asi — zamonaviy avtomobillar bilan taqdirlangan.

Marosimda Birlashgan Arab Amirliklarida amalga oshirilayotgan «Arab kitobxonlik tanlovi» tajribasi ham misol sifatida keltirildi. Qayd etilishicha, mazkur dastur 200 milliondan ortiq o‘quvchini qamrab olgan.

Prezident ma’lum qilishicha, O‘zbekistonda «Milliy kitobxonlik harakati» dasturi boshlanmoqda va uni davlat darajasida qo‘llab-quvvatlash bo‘yicha alohida farmoyish imzolangan.

Endilikda har yili tanlovning final bosqichi Prezident darajasida o‘tkaziladi. Dasturning umumiy mukofot jamg‘armasi 240 ming dollarni tashkil etadi.

Bosh sovrin sohibi 50 ming dollar bilan taqdirlanadi. Bu mamlakat tarixida kitobxonlik sohasidagi eng yirik mukofot sifatida qayd etilmoqda.

Dasturda 1-sinfdan 11-sinfgacha bo‘lgan o‘quvchilar ishtirok etishi mumkin. Prezident ushbu tashabbusni mamlakat kelajagi uchun strategik investitsiya deb atadi.

Source link

Jamiyat | 10:18

4342

2 daqiqa o‘qiladi

Ko‘p qavatli uyning 1-qavatida yashaydigan uy egasi xonadoniga basseyn qurib olgani ma’lum bo‘ldi. U yerto‘laning bir qismini noqonuniy egallab, unga tushish uchun uyidan yo‘lak ham ochib olgan. Mulkdorga nisbatan 20 mln so‘mdan ortiq jarima qo‘llanib, unga xonadonni avvalgi holatiga qaytarish majburiyati yuklangan.

Inspeksiya e’lon qilgan videodan kadr

Navoiyda ko‘p qavatli uyning birinchi qavatida o‘zboshimchalik bilan basseyn qurib olish holati aniqlandi. Bu haqda Qurilish va uy-joy kommunal xo‘jaligi nazorati inspeksiyasi xabar berdi.

Ma’lum qilinishicha, inspeksiya xodimlari tomonidan ko‘p qavatli uylarning texnik holatini o‘rganish maqsadida Zarafshon shahrida nazorat tadbiri o‘tkazilgan. O‘rganishda shaharning 12-kichik hududida joylashgan ko‘p qavatli uyda mulkdor 1-qavatdagi xonadonida o‘zboshimchalik bilan basseyn qurib olgani aniqlangan. Shuningdek, xonadon egasi yerto‘laning bir qismini noqonuniy egallab olib, unga tushish uchun uyidan maxsus yo‘lak ham ochib olgan.

“Mutaxassislarning ta’kidlashicha, bunday o‘zboshimchalik bilan amalga oshirilgan qurilish ishlari ko‘p qavatli uyning konstruktiv mustahkamligiga salbiy ta’sir ko‘rsatib, texnik holati zaiflashishiga olib kelishi hamda aholi xavfsizligiga bevosita tahdid yuzaga keltirishi mumkin”, deyiladi xabarda.

Holat yuzasidan huquqbuzarga BHMning 50 baravari miqdorida jarima qo‘llangan va xonadonni avvalgi holatiga qaytarish bo‘yicha majburiy ko‘rsatma berilgan.

Source link

Namangan viloyatining Uychi tumanida bir yoshli bolakay hovlidagi hojatxona chuquriga tushib ketdi. Voqea joyiga yetib kelgan FVV qutqaruvchilari tezkor harakat qilib, bolaning hayotini saqlab qolishga muvaffaq bo‘ldi.

Kecha, 22 may kuni soat 18:47 da Namangan viloyati, Uychi tumani «Muborak» mahalla fuqarolar yig‘ini hududida joylashgan uylarning birida favqulodda holat sodir bo‘ldi. Uy egasining 2025 yilda tug‘ilgan o‘g‘il farzandi ehtiyotsizlik va nazoratdan chetda qolgani sababli hovlidagi hojatxonaga tushib ketgan.

Hodisa haqida xabar kelib tushgach, FVV qutqaruvchilari zudlik bilan manzilga yetib borgan va qutqaruv ishlarini boshlagan. Qutqaruvchilardan biri hojatxona chuquriga tushib, bolakayni olib chiqqan.

Shifokorlar tomonidan bolaga birinchi tibbiy yordam ko‘rsatilganidan so‘ng u yaqinlariga topshirildi. Hozirda bolaning ahvoli yaxshi ekani ma’lum qilinmoqda.

Mutaxassislar ota-onalarni farzandlarini nazoratsiz qoldirmaslikka chaqirmoqda.

Source link

Andijon viloyatida yer maydonlarini noqonuniy ajratish va rasmiylashtirib berish bilan bog‘liq korrupsion holatlar fosh etildi. Davlat xavfsizlik xizmati tezkor tadbirlari davomida bir nechta mansabdor shaxslar katta miqdorda pora olayotgan vaqtida qo‘lga olindi.

Ma’lum bo‘lishicha, Farg‘ona vodiysi magistral kanallardan foydalanish boshqarmasi 2-Shahrixon bo‘limi 3-gidrouchastkasi boshlig‘i chorvachilik bilan shug‘ullanishni rejalashtirgan fuqaroga katta Farg‘ona kanali himoya hududidagi 30 sotix yer maydonini ijaraga rasmiylashtirib berish evaziga 40,5 ming AQSh dollari talab qilgan. U oldindan 20 ming dollar olgan vaqtida DXX va Bosh prokuratura huzuridagi Departament xodimlari tomonidan ushlangan.

Tergov davomida ushbu noqonuniy sxemaga Farg‘ona vodiysi magistral kanallardan foydalanish boshqarmasi bo‘lim boshlig‘i ham aloqador ekani aniqlangan. U 20 ming dollardan 3 ming dollarini olgan vaqtida qo‘lga tushgan. Shuningdek, mazkur yer maydonidan ijara asosida foydalanib kelgan gidrouchastka xodimi ham yerni berish uchun 19 ming dollar talab qilgani ma’lum bo‘lgan.

Yana bir holatda esa Oltinko‘l tumanidagi ta’lim muassasasi direktori muassasa hududidagi 1,1 gektar yer maydoni bo‘yicha kelishuvni tasdiqlab berish evaziga 15 ming dollar so‘ragan. U oldindan 10 ming dollar olgan vaqtida ushlangan.

Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.

Source link