Jamiyat
BMTda qabul qilingan G‘azo rezolyutsiyasi, turk kemasiga zarba bergan Rossiya va Ukrainaga 100 ta qiruvchi samolyot – kun dayjesti
O‘tgan kun davomida jahonda ro‘y bergan eng asosiy voqea va yangiliklar sharhi bilan kundalik xabarnomada tanishtiramiz.
{Yii::t(}
O’tkazib yuborish 6s
O’tkazib yuborish
BMT G‘azo bo‘yicha AQSh rezolyutsiyasini qabul qildi
17 noyabr kuni BMT Xavfsizlik Kengashi G‘azodagi urushni tugatish bo‘yicha AQSh tomonidan tayyorlangan rezolyutsiyani qabul qildi. BMT rezolyutsiyasi — o‘tish davri boshqaruv organini qonuniylashtirish hamda G‘azoga qo‘shin yuborishni ko‘rib chiqayotgan davlatlarni ishontirish uchun muhim qadamdir.
Rezolyutsiya matnida a’zo davlatlar o‘tish davri hokimiyati sifatida ko‘zda tutilgan Tinchlik Kengashida ishtirok etishi mumkinligi aytiladi.
Ushbu rezolyutsiya prezident Donald Trampning sulh rejasini qo‘llab-quvvatlaydi: rezolyutsiya G‘azoda qurolsizlantirish jarayonini, jumladan, qurollarni utilizatsiya qilish va harbiy infratuzilmani yo‘q qilish orqali ta’minlaydigan xalqaro barqarorlashtirish kuchlariga ham ruxsat beradi.
Hamas esa bayonotida qurolsizlanmasligini yana bir bor takrorlab, Isroilga qarshi kurashini «legitim qarshilik» deb ta’rifladi. Bu pozitsiya esa guruhni xalqaro kuchlar bilan to‘qnash kelishi ehtimoli bilan yuzma-yuz qo‘yadi.
«Rezolyutsiya G‘azo sektoriga xalqaro vasiylik mexanizmini yuklaydi, buni xalqimiz va ularning fraksiyalari rad etadi», — deyiladi Hamas bayonotida.
Falastin ma’muriyati rezolyutsiyani olqishlab bayonot chiqardi va uni amalga oshirishda ishtirok etishga tayyor ekanini bildirdi. Tramp esa ovoz berishni ijtimoiy tarmoqlarda «haqiqiy tarixiy ahamiyatga ega lahza» sifatida nishonladi. «Kengash a’zolari va yana ko‘plab qiziqarli e’lonlar kelgusi haftalarda e’lon qilinadi», — deb yozdi Tramp.
Veto huquqiga ega bo‘lgan Rossiya avval rezolyutsiyaga qarshi chiqish ehtimolini bildirgan edi, biroq Xitoy ham, Rossiya ham ovoz berishda betaraf bo‘ldi. Ularning BMTdagi elchilari, hujjat BMTga G‘azoning kelajagida aniq rol bermayotganidan shikoyat qilishdi.
«Aslida kengash – Vashingtonning va’dalariga asoslanib, tashabbusga o‘z roziligini bermoqda. G‘azo sektoriga to‘liq nazoratni Tinchlik Kengashi va ISFʼga topshirmoqda. Biz esa hozircha bu tuzilmalarning qanday ishlashi haqida hech narsa bilmaymiz», — dedi Rossiyaning BMTdagi elchisi Vasiliy Nebenzya.
Falastinliklar uchun davlat tuzishning kelajakdagi ehtimolini tilga olingan hujjat matni esa Isroilda bahs uyg‘otdi. Ular to‘laqonli Falastin davlatiga bo‘lishiga qat’iy qarshilik qilmoqda.
Ukrainaga 100 ta qiruvchi samolyot
Ukraina prezidenti Volodimir Zelenskiy va Fransiya prezidenti Emmanuel Makron o‘rtasida 100 dona Dassault Rafale qiruvchi samolyotlarini sotib olish bo‘yicha kelishuv imzolandi.
Kiyevning mudofaa uskunalarini xarid qilishini kuchaytirishga qaratilgan hujjat Parij yaqinidagi harbiy havo bazasida imzolandi. Parijda Makron bilan o‘tkazilgan qo‘shma matbuot anjumanida Zelenskiy bu kelishuvni 2026 yildan boshlab 10 yil davom etadigan «tarixiy» bitim deb ta’rifladi.
Zelenskiy shuningdek, kelishuv doirasida Ukraina Fransiyaning «juda kuchli» radarlarini ham, sakkizta SAMP/T havo mudofaasi tizimini ham qabul qilib olishini aytdi.
Ukraina shuningdek, Fransiyadan 55 ta yangi elektr lokomotiv sotib olish bo‘yicha kelishuv imzolagan. Bu Ukraina logistikasini kuchaytirish maqsadida qilinmoqda.
Zelenskiy Fransiyaga Gretsiya safaridan keyin yetib keldi. Afinada ikki mamlakat gaz kompaniyalari AQShdan Ukraina uchun kelayotgan suyultirilgan gazni yetkazib berishni muhokama qilgandi.
Rossiya Ukrainadagi turk kemasiga zarba berdi
Rossiya kuchlari dushanba kuni Odessa viloyatidagi Izmail portida langar tashlab turgan, Turkiyaga tegishli ORINDA nomli kemani nishonga oldi. Zarba kemada yong‘in chiqishiga sabab bo‘ldi va portlash xavfi tufayli yaqin atrofdagi hududlar evakuatsiya qilindi.
Kemaga taxminan 4 000 tonna suyultirilgan neft gazi ortilgan bo‘lgan. Turkiyaning Dengiz ishlari bo‘yicha bosh boshqarmasi 16 nafar turk ekipaj a’zosining barchasi xavfsiz evakuatsiya qilinganini tasdiqladi.
Ularning hech biri jarohat olmagan va ular xavfsiz joyga ko‘chirilgan, deyiladi bayonotda.
Ukraina yong‘in xavfsizligi brigadalari yong‘inni o‘chirgach, zarar bo‘yicha batafsil baholash o‘tkazilishini aytdi. Turk rasmiylari vaziyatni yaqindan kuzatayotganini va Ukraina idoralari bilan aloqada ekanini qo‘shimcha qildi.
Turk OAVlariga ko‘ra, Rossiya–Ukraina urushi boshlanganidan beri Qora dengizdagi bir necha turk bayrog‘i ostida tijoriy kemalar jangovar zarbalardan shikastlangan. Biroq ekipaj a’zolariga jarohat yetmagan.
Dushanba kuni sodir bo‘lgan yana bir alohida hodisada, Rossiya raketa zarbasi Odessadagi energiya obektiga urildi. Hujum 36,5 ming xonadonni elektrsiz qoldirdi.
Germaniya Isroilga qurol yetkazib berishni tikladi
Germaniya hukumati Isroilga qurollarni yetkazib berishga qo‘yilgan bir necha oylik taqiqni bekor qildi. Cheklovlarni bekor qilish, 10 oktyabrdan buyon amal qilayotgan Isroil va HAMAS o‘rtasidagi o‘t ochishni to‘xtatish rejimi «so‘nggi haftalarda barqarorlashgani» bilan izohlandi.
Shu bilan birga, Germaniya hukumati endilikda har bir qurol yetkazib berish to‘g‘risidagi so‘rovni avtomatik ravishda ma’qullamaydi. Balki «umuman olganda, har bir eksport arizasini alohida ko‘rib chiqishga» qaytadi.
Shuningdek, Germaniya G‘azo aholisiga infratuzilmani tiklashda yordam berishini qayd etdi.
Germaniya hukumati G‘azo genotsidi davrida Isroilni harbiy va diplomatik jihatdan faol qo‘llab kelgan. Xususan, avvalgi kansler Olaf Shols hukumati Isroilga deyarli 500 million yevrolik qurollar yetkazgan. Fridrix Mers boshchiligidagi yangi hukumat davrida ham kamroq bo‘lsa-da qurollar berilgan.Mers faqat 2025 yil avgust oyiga kelib, Isroilga qurol embargosini e’lon qilgandi.
Bin Salmon AQShga kelmoqda
17 noyabr kuni prezident Donald Tramp AQShda ishlab chiqarilgan F-35 qiruvchi samolyotlarini Saudiya Arabistoniga sotishni ma’qullashini rejalashtirayotganini aytdi.
«Biz F-35ʼlarni sotamiz», dedi Tramp Oval kabinetda jurnalistlarga. Bunday savdo siyosatda muhim burilish bo‘lib, Yaqin Sharqdagi harbiy muvozanatni o‘zgartirishi, Isroilning «sifat jihatidan harbiy ustunligini» saqlash haqidagi ta’rifni sinovdan o‘tkazishi mumkin.
Saudiya Arabistoni 48 tagacha F-35 qiruvchilarini sotib olishni so‘ragan. Bitim Pentagonning siyosat bo‘limi tomonidan ma’qullangan.
Bugun, 18 noyabr kuni Saudiya valiahd shahzodasi Muhammad bin Salmon – jurnalist Jamol Qoshiqchining o‘ldirilganidan yetti yil o‘tib, ilk marta Oq uyga kelmoqda. Diplomatik manbalarga ko‘ra, qirollikning de-fakto rahbari AQShdan Qatardagi kabi xavfsizlik kafolatlari, AI hamda fuqaroviy yadro texnologiyalari bo‘yicha kelishuv izlayapti.
Bangladeshda sobiq bosh vazir sirtdan qatlga hukm qildi
Bangladesh sudi mamlakatning sobiq bosh vaziri Shayx Hasinani 2024 yilgi norozilik namoyishlarini tarqatish chog‘ida insoniyatga qarshi jinoyatlar sodir etilishida aybdor deb topdi. Hukumatning sobiq rahbari o‘lim jazosiga hukm qilindi.
Biroq u o‘sha voqealar chog‘ida Hindistonga qochib ketgandi.
78 yoshli Hasina bilan birga uning hukumatidagi yana ikki amaldor aybdor deb topildi: sobiq ichki ishlar vaziri Asaduzzamon Xon Kamol hamda politsiyaning sobiq boshlig‘i Abdulloh al-Ma’mun.
Sud zalida ulardan faqat ikkinchisi ishtirok etdi: u o‘z aybiga iqror bo‘lgan va sud jarayonida ayblovchi tomon guvohi sifatida ko‘rsatma berdi.
Bangladeshdagi ommaviy norozilik namoyishlari 2024 yil iyul oyida boshlangan va huquq-tartibot idoralari bilan qonli to‘qnashuvlarga aylanib, yuzlab odamlar, jumladan, bolalar halok bo‘lgandi. Namoyishlarni talabalar boshlagan: ular davlat sektoridagi ish o‘rinlarining ajratilishidagi diskriminatsiyadan norozi bo‘lgan.
Hukm e’lon qilinganidan ko‘p o‘tmay, Hasina sudni noqonuniy deb atab, bayonot berdi. U, avvalroq «xavfsizlik kuchlariga namoyishchilarga qarata o‘t ochish bo‘yicha shaxsan ko‘rsatma bergani haqidagi ayblovlarni» qat’iyan rad etgandi.
Saudiyada 45 nafar hindistonlik ziyoratchi halok bo‘ldi
16 noyabr kuni erta tongda Saudiya Arabistonining Mufrihat shahri yaqinida Makkadan Madinaga ketayotgan avtobus dizel yonilg‘isi ortilgan avtosisterna bilan to‘qnashib ketdi. Oqibatda kamida 45 nafar hindistonlik ziyoratchi halok bo‘ldi.
Qutqaruv xizmatlari va mahalliy hokimiyat vakillari voqea joyiga yetib borib, qutqaruv ishlarini olib borgan. Rasmiylar jabrlanganlarning aniq sonini va halok bo‘lganlarning shaxsini aniqlashda davom etmoqda.
Haydarobod politsiyasi xabariga ko‘ra, avtobusda 46 nafar yo‘lovchi bo‘lgan, ulardan faqat bir yigit omon qolgan. Halok bo‘lganlar orasida 18 nafar ayol va 10 nafar bola bo‘lgani ta’kidlanmoqda.
Hindiston bosh vaziri yuz bergan hodisa munosabati bilan yaqinlarini yo‘qotgan oilalarga hamdardlik bildirdi. Qayd qilinishicha, halok bo‘lganlarning jasadi diniy urf-odatlarga muvofiq Saudiya Arabistonida dafn etiladi.
Samarqand shahrida Osiyo taraqqiyot banki Boshqaruvchilar kengashining 59-yillik yig‘ilishi doirasida bo‘lib o‘tgan uchrashuvlar O‘zbekistonning xalqaro iqtisodiy maydondagi mavqei tobora mustahkamlanayotganini yana bir bor namoyon qildi.
Ayniqsa, Saudiya Arabistonining “ACWA Power” kompaniyasi rahbari Muhammad Abunayyanning fikrlari mamlakatda amalga oshirilayotgan islohotlar va investitsion muhitga tashqi bahoni aks ettiradi.
Muhammad Abunayyan O‘zbekistonni o‘z yurtidek yaqin his qilishini ta’kidlab, mamlakat rahbariyati tomonidan investorlarga ko‘rsatilayotgan yuqori e’tibor va amaliy qo‘llab-quvvatlashni alohida qayd etdi. Uning so‘zlariga ko‘ra, Prezident darajasida har bir loyihaning borishi shaxsan nazorat qilinayotgani, jarayonlarni tezlashtirishga xizmat qilmoqda. Bu esa sarmoyalarning samarali amalga oshishi uchun mustahkam zamin yaratmoqda.
Yashil energetika – strategik ustuvorlik
Suhbatda O‘zbekistonning energetika siyosatiga alohida urg‘u berildi. Qayd etilishicha, mamlakat qayta tiklanadigan energiya manbalarini rivojlantirishga erta bosqichda kirishgan va bugun bu yo‘nalishda aniq strategiya shakllangan.
Mutaxassislar fikricha, bu faqat texnologiya emas, balki iqtisodiy va ijtimoiy samaradorlikni ham hisobga olgan yondashuvdir. Natijada O‘zbekiston nafaqat o‘z ehtiyojlarini ta’minlayotgan, balki mintaqada energetik barqarorlikni ta’minlovchi markazga aylanmoqda.
Investitsiyalar oqimi: ishonch va natija
So‘nggi yillarda O‘zbekistonga xorijiy investitsiyalar oqimi keskin oshgani alohida ta’kidlandi. Ilgari investorlar kam kelgan bo‘lsa, hozir dunyoning turli burchaklaridan yirik va sifatli sarmoyadorlar mamlakatga kirib kelmoqda.
Bu, avvalo, qonun ustuvorligi, shaffoflik va institutsional islohotlar natijasi sifatida baholanmoqda. Muhammad Abunayyan ta’kidlaganidek, O‘zbekiston “kelib-ketadigan” emas, balki uzoq muddatli va mas’uliyatli investorlarni tanlash siyosatini olib bormoqda.
30 milliard dollarlik yangi bosqich
Ma’lum qilinishicha, Saudiya Arabistoni investitsiyalari hajmi allaqachon 26 milliard dollardan oshgan. Yaqin istiqbolda bu ko‘rsatkichni 30 milliard dollardan yuqoriga chiqarish rejalashtirilmoqda.
Bu sarmoyalar energetika, infratuzilma, tibbiyot, suv ta’minoti, turizm va ishlab chiqarish kabi strategik sohalarni qamrab olmoqda. Shu orqali O‘zbekiston nafaqat ichki bozor, balki mintaqaviy iqtisodiy markaz sifatida shakllanmoqda.
Inson kapitali va strategik yetakchilik
Tahlilchilarga ko‘ra, O‘zbekistondagi o‘zgarishlarning asosiy omili — inson kapitaliga e’tibor va strategik boshqaruvdir. Yoshlarni zamonaviy bilimlar bilan ta’minlash, mahalliy kadrlarni tayyorlash va ularni yirik loyihalarga jalb qilish uzoq muddatli o‘sishni ta’minlaydi.
Muhammad Abunayyan bu jarayonlarni shaxsan Prezident Shavkat Mirziyoyevning qat’iy siyosati va amaliy yondashuvi bilan bog‘ladi. Uning ta’kidlashicha, O‘zbekiston bugun dunyodagi eng tez transformatsiya qilinayotgan davlatlardan biriga aylangan.
Global noaniqliklar, geosiyosiy ziddiyatlar va iqtisodiy xavflar kuchaygan bir sharoitda O‘zbekiston barqaror o‘sish va investitsiyalar uchun jozibador maydon sifatida shakllanmoqda.
Yashil energetika, institutsional islohotlar va ochiq investitsiya siyosati mamlakatni nafaqat Markaziy Osiyoda, balki xalqaro miqyosda ham muhim iqtisodiy markazga aylantirishga xizmat qilmoqda.
Manba
Ishtixonda ikki bola xatna qilinganidan keyin vafot etdi. Ularning ikkisi ham sog‘lom holda tuman tibbiyot birlashmasiga olib kelinib, sunnat qilingan, lekin tegishli tartiblar qo‘pol ravishda buzilgan: bolalardan na tahlil olingan, na biror joyda bu amaliyotlar qayd etilgan. E’tiborlisi, jarrohlardan biri bolaning o‘limidan keyin yuqoriroq mansabga ko‘tarilib ketgan.
Kun.uz muxbiri Ishtixonda bo‘lib, voqea tafsilotlarini o‘rgandi.
Ma’lum bo‘lishicha, 2026 yil 22 mart kuni besh yoshli Elxan Tursunov tuman tibbiyot birlashmasida xatna qilingan. Oradan bir kun o‘tib, bolaning ahvoli yomonlashgan. Kesilgan joydan qon ketish boshlangan.
Shundan so‘ng Elyor Rajabov o‘g‘lini shifoxonaga olib borgan. Bolani xatna qilgan jarroh Aziz Xudoyberdiyev bilan telefon orqali bog‘lanishganida, u ishda emasligi sabab bemor bolani hamkasbi Javlon Meliyevga ko‘rsatishlarini aytgan.
“Javlon Meliyev o‘g‘limni olib kirib, taxminan 20 daqiqa davomida tibbiy yordam ko‘rsatdi. Operatsiya qilingan joyni bog‘lab qo‘ydi va bizga hammasi yaxshi ekanini, xavotir olmasligimizni aytdi. Lekin kechga borib o‘g‘limning issig‘i ko‘tarilib ketdi”, deydi Rajabov.
Bolaning ota-onasi bu kunlar davomida operatsiya qilgan shifokor bilan telefon orqali bog‘lanib turishgan va tavsiyalarini bajarishgan. Ammo bolada o‘zgarish bo‘lmagan, aksincha ahvoli yomonlashib boravergan.
“27 mart kuni jarroh Xudoyberdiyevni uyga chaqirtirdik. U bolaning holatini ko‘rib: “Shamollatib qo‘yibsizlar, o‘tib ketadi”, dedi. O‘sha paytda holatga guvoh bo‘lib turgan hududiy hamshiramiz e’tiroz qildi, bolaning ahvoli yomonlashayotganini aytdi. Shundan so‘ng o‘g‘limni yana shifoxonaga olib bordik. Uni jonlantirish bo‘limiga olib kirishdi, taxminan yarim soatlardan so‘ng joni uzilganini aytishdi”, deydi bolaning otasi.
Shifokorlardan izoh olish uchun Ishtixon tuman tibbiyot birlashmasida bo‘ldik. Elxan ertasi kuni shifoxonaga olib borilgan vaqtda unga tibbiy yordam ko‘rsatgan Javlon Meliyevning aytishicha, hamkasbi Aziz Xudoyberdiyev undan bir kun avval xatna qilingan bolaga tibbiy yordam ko‘rsatishni so‘ragan.
Meliyev eski qon izlarini tozalab, bir muddat kuzatib turgani, keyin o‘rnini bog‘lab qo‘yganini bildirdi. Jarroh bolada alohida nojo‘ya holatlarni ko‘rmagani uchun uyiga javob bergani, kechqurun bog‘langan bintni olib tashlash kerakligini tavsiya qilganini aytdi.
Jarrohlik amaliyoti tahlillarsiz o‘tkazilgan
Xo‘sh, aslida xatna amaliyoti qanday o‘tkazilishi kerak edi va amalda qanday bo‘lmoqda?
Navbatchi shifokor, jarroh Sohibjon Xoljigitovning aytishicha, xatna amaliyotini o‘tkazishdan avval har bir bola umumiy tekshiruvlardan o‘tkazilishi shart. Agar tekshiruvlar natijasi ijobiy chiqmasa, amaliyot to‘xtatib turilishi lozim.
Lekin Elxan Tursunov sunnat qilinishidan avval hech qanday tekshiruvlardan o‘tkazilmagan.
O‘n kun ichida ikkinchi o‘lim
Afsuski, bu – Ishtixondagi yagona holat emas. Elxan bilan bog‘liq holatdan bir hafta o‘tgach, 3 aprel kuni ushbu tibbiyot birlashmasida yana bir bola – Hamidjon To‘xtayevning ham xatna amaliyotidan so‘ng sog‘lig‘i yomonlashgan. Unda allergiya kuzatilgan, issig‘i ko‘tarilgan.
Shifoxonaga olib borilganda “o‘tib ketadi, tabiiy holat” mazmunida javob berilgan. 8 aprelga kelib, Hamidjon To‘xtayev shifoxonada hayotdan ko‘z yumgan.
Ma’lum bo‘lishicha, To‘xtayev ham operatsiyadan avval umumiy tekshiruvlardan o‘tkazilmagan.
Ishtixon tuman sog‘liqni saqlash bo‘limi boshlig‘ining birinchi o‘rinbosari Javlon Qaynarov bolalar amaliyotdan avval umumiy tibbiy ko‘rikdan o‘tkazilganda, bu holat sodir bo‘lmasligi mumkinligini yashirmadi.
Jarroh “ko‘tarilib” ketdi
Masalaning yana bir o‘ziga xos tomoni shundaki, 2026 yil 27 mart kuni Elxan Tursunov bilan bog‘liq holat bo‘yicha Ishtixon tuman sog‘liqni saqlash bo‘limi tomonidan tuman prokuraturasiga xat chiqarilgan. Unga ko‘ra, jarrohlik amaliyotini o‘tkazgan Aziz Xudoyberdiyev, ertasi kuni tibbiy yordam ko‘rsatgan Javlon Meliyev va boshqa mas’ullarning yo‘l qo‘ygan xato-kamchiliklari e’tirof etilib, ularga nisbatan intizomiy choralar qo‘llash masalasi ko‘rib chiqilishi ma’lum qilingan.
Biroq ushbu bildirgidan bir hafta o‘tib, Aziz Xudoyberdiyev yuqoriroq lavozimni egallagan: u Sirdaryo viloyati Sayxunobod tuman tibbiyot birlashmasiga bosh shifokor etib tayinlangan.
Jinoyat ishlari ochildi
Bosh prokuratura axborot xizmati rahbari Hayot Shamsutdinovning Kun.uz’ga ma’lum qilishicha, Elxan Tursunov va Hamidjon To‘xtayevning sunnat amaliyotidan keyin vafot etgani yuzasidan tekshiruv o‘tkazilgan.
To‘plangan materiallarga ko‘ra, mazkur holatlarda tibbiyot xodimlarining harakatlariga huquqiy baho berish uchun qo‘shimcha tergov harakatlari, jumladan, yuzlashtirish, eksgumatsiya va boshqa protsessual ishlar o‘tkazilishi zarur deb topilgan.
Shu asosda 2026 yil 2 may kuni Jinoyat kodeksining 116-moddasi 3-qismi (Kasb yuzasidan o‘z vazifalarini lozim darajada bajarmaslik) bilan jinoyat ishi qo‘zg‘atilgan. Hozirda tergov harakatlari olib borilmoqda.
Tahlil olmasdan operatsiya qilish odatiy holmi?
Ishtixon tumanida kuzatilgan ushbu holatni faqat bir hudud doirasidagi fojia sifatida baholash yetarli emas. Chunki bugun tibbiyot tizimida raqamlashtirish va elektronlashtirish jarayonlari kechayotgan bir paytda, eng oddiy amaliyot oldidan ham zarur tibbiy tekshiruvlar o‘tkazilmagani – jiddiy tizimli muammolardan darak beradi.
Agar rasmiy gaplar amalda ishlayotgan bo‘lganida, bunday holatlar kuzatilmasligi kerak edi. Demak, savol tug‘iladi: bu faqat Ishtixondagi holatmi, boshqa hududlarda sunnat kabi amaliyotlar oldidan bolalar to‘liq ko‘rikdan o‘tkazilyaptimi, tahlillar olinyaptimi?
Yoki shu kabi holatlar kuzatilganda, marhum bolalarning o‘limiga ota-onalarning o‘zi aybdor qilinyaptimi?
Kun.uz mavzuga yana qaytadi.
Oliy Majlisda mehnat munosabatlarini takomillashtirishga qaratilgan qonun loyihasi birinchi o‘qishda ko‘rib chiqilib, deputatlar tomonidan qabul qilindi. Hujjat mehnat sohasidagi ortiqcha byurokratik to‘siqlarni bartaraf etish, ishga qabul qilish jarayonlarini soddalashtirish va xodimlar huquqlarini yanada ishonchli himoya qilishga qaratilgan.
Qonun loyihasiga ko‘ra, ishga qabul qilishda talab etiladigan hujjatlar ro‘yxati sezilarli darajada qisqartirilmoqda. Yangi tartib bo‘yicha fuqaroni ishga olishda asosan uning shaxsiy identifikatsiya raqami talab etiladi. Faqat harbiy xizmatga majburlar va chaqiriluvchilar qo‘shimcha ravishda harbiy guvohnoma yoki harbiy hisobda turganlik haqidagi hujjatni taqdim etadi.
Shu bilan birga, mehnat munosabatlarini raqamlashtirishga alohida e’tibor qaratilgan. Jumladan, ishga kirishda elektron mehnat daftarchasidan ko‘chirma taqdim etish amaliyoti bekor qilinishi nazarda tutilmoqda. Elektron raqamli imzo yoki biometrik identifikatsiya — Face-ID orqali tasdiqlangan hujjatlar yuridik jihatdan qo‘lda imzolangan hujjatlar bilan tenglashtiriladi.
Hujjatda ish joyida tazyiq va zo‘ravonlikka qarshi kurashishga oid normalar ham mustahkamlangan. Unga ko‘ra, bunday holatlarni taqiqlash, ularning oldini olish va jabrlangan xodimlarni himoya qilish bo‘yicha aniq mexanizmlar joriy etiladi.
Bundan tashqari, ish beruvchi tomonidan ish haqi to‘lash muddati buzilgan taqdirda, har bir kechiktirilgan kun uchun kompensatsiya to‘lash tartibi ham aniqlashtirilmoqda.
Qonun loyihasi qabul qilinishi mehnat bozorida shaffoflikni oshirish, raqamlashtirishni jadallashtirish va fuqarolar uchun ishga joylashish jarayonini yengillashtirishga xizmat qilishi kutilmoqda.
Nurota tumanidagi oilaviy bog‘cha rahbari bo‘lgan ayol 13 nafar bolani Matiz mashinasida bog‘chaga olib ketayotganda YTHga uchragan. Oqibatda ayol vafot etgan. Bir bola koma holatida, 8 nafari esa viloyat markaziga shifoxonaga olib ketilgan. Er-xotin haydovchilik guvohnomasi bo‘lmagan holda mashina boshqarib kelgani aytilmoqda.
Navoiy viloyatining Nurota tumanida bog‘cha bolalari ishtirokida YTH sodir bo‘ldi. Bu haqda Kun.uz manbasi xabar berdi.
Kun.uz’ning aniqlik kiritishicha, YTH 5 may kuni ertalab sodir bo‘lgan. Tumandagi oilaviy bog‘chalardan birining rahbari bo‘lgan 34 yoshli ayol 13 nafar tarbiyalanuvchi va o‘zining 3 oylik chaqalog‘ini Matiz mashinasiga mindirib tashigan.
Ayol bolalarni yashash xonadonlaridan bog‘chaga olib ketayotgan bo‘lgan. U harakat paytida boshqaruvni yo‘qotgan va mashina yo‘ldan chiqib ketib, ag‘darilgan. YTH oqibatida ayol vafot etgan, bolalar esa turli darajada tan jarohatlari olgan. Ayni vaqtda bir bola koma holatida, 8 nafari esa viloyat markazidagi shifoxonaga olib ketilgani aytilmoqda.
Manbaga ko‘ra, er-xotin haydovchilik guvohnomasi bo‘lmagan holda yillar davomida mashina boshqarib kelgan. Ya’ni bolalar doimiy ravishda shu holda uydan bog‘chaga va bog‘chadan uyga tashilgan. Hatto ota-onalar ham bunga e’tiroz bildirmagan.
Bu Navoiyda haydovchilik guvohnomasi bo‘lmagan shaxs bolalarni mashinada tashishi bilan bog‘liq ilk holat emas: avvalroq haydovchilik guvohnomasi ham, avtomobilni boshqarish huquqi ham bo‘lmagan shaxs mast holda 23 nafar bolani Damas’da tashigani aniqlangandi.
Ko‘za kunda emas, kunida sinadi. Bog‘chalar bolalar hayoti bilan o‘ynashmoqda
O‘zbekistonda hududlarni barqaror rivojlantirish va «yashil» iqtisodiyotni rag‘batlantirish maqsadida Germaniya xalqaro hamkorlik jamiyati (GIZ) bilan yangi kelishuv imzolandi. Hujjatga ko‘ra, master rejalar ishlab chiqish va «yashil» pilot loyihalarni amalga oshirish uchun 9 million yevro miqdorida grant mablag‘lari jalb etiladi.
Iqtisodiyot va moliya vazirligi hamda GIZning O‘zbekistondagi vakolatxonasi ishtirokida o‘tgan muzokaralarda tomonlar ilgari amalga oshirilgan ishlar natijalarini tahlil qilib, yangi ustuvor yo‘nalishlarni belgilab oldi. Qayd etilishicha, avval ajratilgan grantlar hisobidan 12 ta tuman uchun kompleks rivojlanish master rejalari ishlab chiqilgan va 24 ta pilot loyiha ijobiy baholangan.
Jumladan, Shahrisabz tumanida 500 gektar maydonda agroturizm majmuasi tashkil etilgan. Shuningdek, Amudaryo, Chimboy, Bulung‘ur, Kattaqo‘rg‘on, Mirishkor, Xiva va Hazorasp tumanlarida kasbga o‘qitish markazlari yo‘lga qo‘yilgan. Bundan tashqari, intensiv baliqchilik xo‘jaliklari rivojlantirilib, ijtimoiy obyektlarda energiya tejovchi issiqlik nasoslari o‘rnatilgan, IT va hunarmandchilik markazlari tashkil etilgan. Ushbu ishlar uchun jami 1,3 million yevro grant mablag‘lari yo‘naltirilgan.
Yangi kelishuvga muvofiq, 2026–2029 yillarda ushbu tashabbuslar yangi bosqichga olib chiqiladi. Xususan, master rejalarni ishlab chiqish va amalga oshirishda sun’iy intellekt va innovatsion tahlil usullaridan foydalanish, shuningdek «yashil» pilot loyihalarni kengaytirish ko‘zda tutilgan.
Vazirlik axborot xizmati ma’lumotiga ko‘ra, Baxmal, Boysun va So‘x tumanlarida ham yangi master rejalar asosida pilot tashabbuslar amalga oshiriladi. Shuningdek, loyihalar samaradorligini oshirish maqsadida mahalliy va xorijiy ekspertlar jalb qilinib, mutaxassislar malakasini oshirishga qaratilgan o‘quv dasturlari, seminar va treninglar tashkil etiladi.
Mazkur hamkorlik O‘zbekistonda «yashil» iqtisodiyotni rivojlantirish, hududlarni kompleks tarzda modernizatsiya qilish va zamonaviy texnologiyalarni joriy etishda muhim qadam bo‘lishi kutilmoqda.
Dollar, yevro va funt-sterling sezilarli qimmatlab ketmoqda
O‘zbekiston 2032-yilgacha 5,67 MVt gidroenergetika quvvatiga ega bo‘lishni maqsad qilgan
O‘zbekistonga 30 mlrd dollar sarmoya rejasi
-
Jamiyat4 days ago
O‘zbekistonning ikki qo‘shnisi bilan tutashgan chegarasida «Tinchlik parki» tashkil etilishi mumkin
-
Dunyodan3 days ago
Sudya Terranovaning o’ldirilishi
-
Sport5 days ago
FIDE reytingi yangilandi: ikki o‘zbekistonlik «top-5»talikda!
-
Jamiyat5 days agoJinoiy guruh yetakchisidan 2,7 ming dollar olgan profilaktika inspektori ushlandi
-
Iqtisodiyot4 days agoO‘zbekiston tashqi qarzi 2025 yilda 18 mlrd dollarga oshdi. Bu rekord ko‘rsatkich
-
Jamiyat5 days agoDiyetolog qarishning asosiy «dushmani»ni ma’lum qildi
-
Iqtisodiyot3 days ago
qaysi modellar ko‘p ishlab chiqarilmoqda?
-
Iqtisodiyot5 days ago
O‘zbekiston tashqi savdosi o‘sdi. Qaysi davlatlar asosiy hamkorlar?