Sport
APLda bir turda 3 ta top to‘qnashuv, Italiyada derbi. Haftaning asosiy o‘yinlari
Bu safargi uikendda «Arsenal» «Siti»ni, «MYu» «Chelsi»ni qabul qiladi, «Liverpul»ni qiyin sinov kutmoqda.
Uch kun davom etgan Chempionlar Ligasi o‘yinlari yakunlanib ulgurmay, milliy chempionatlar boshlanmoqda. Liverpul va Rim derbilari, “Old Trafford” va “Emiraytes”da navbatdagi katta uchrashuvlar, Fransiyada esa “PSJ” de Dzerbi boshqaruvidagi “Marsel”ni sinovdan o‘tkazadi. “Real” va “Barselona” alohida holatda Kataloniya va Madrid klublariga qarshi to‘p surib, asta-sekin klasiko havosiga tayyorgarlikni boshlashadi.
LIVeRPUL – EVeRTON (20 sentabr, 16:30)
“Liverpul” ushbu mavsumda deyarli dor ustida yuribdi. Slot shogirdlari ayni damda Yevropada 100 foizlik natija ko‘rsatayotgan kam sonli jamoalardan biri bo‘lishsa-da, o‘tkazilgan besh o‘yinning har birida ochko yo‘qotilishi mumkin edi. Bu o‘yinlarning uchtasida “Liverpul” hal qiluvchi golni hakam tomonidan qo‘shib berilgan daqiqalarda urdi. Yana ikki o‘yinda ham gollar 80-daqiqadan so‘ng kiritilgan.
Bu aslida omadmi yoki “Liverpul”ning kuchli o‘yini raqibning so‘nggi daqiqalarda qarshilik ko‘rsata olmay qolishiga sabab bo‘lyaptimi, aytish qiyin. Shunisi aniqki, bunday seriya odatda uzoq davom etmaydi, ammo natijalar qaysi tomonga og‘adi, buni ham taxmin qilish oson emas. Qizig‘i, bu safargi raqib bilan ham avvalgi o‘yinlardagi ssenariyni bemalol kutish mumkin, zero bu ham derbi, “Everton” esa “Liverpul”ga qarshi o‘yinlarda doim munosib bo‘la olishini unutmaslik kerak.
“Everton” so‘nggi yillardan farqli ravishda mavsumni ancha kuchli boshladi, ilk o‘yinlardan yengish qiyin bo‘lgan “qattiq yong‘oq” bo‘la olishini namoyish etyapti. Jamoa ilk turda “Lids”ga yagona penalti evaziga mag‘lubiyatga uchragan bo‘lsa-da, masalan “Brayton” ustidan qozonilgan g‘alaba alohida e’tiborga arziydi. Zero “Brayton” ayniqsa mavsum boshida hatto top-klublarga ham yon bermasligi ma’lum.
Devid Moyyes boshqaruviga qaytgan jamoa barcha musobaqalarni hisobga olganda qatorasiga 4 o‘yindan beri mag‘lubiyatga uchragani yo‘q, bularning uchtasida umuman o‘z darvozasidan gol o‘tkazmadi. Tabiiyki, hozircha vaziyatlar yaratishda aniq bir tizim bo‘lmagan va oldingi chiziqda bir qator yangi futbolchilarga ega bo‘lgan “Liverpul” uchun “Everton” himoyasini yorib o‘tish oson bo‘lmaydi.
Yangilar haqida gap borganda, Aleksandr Isakning “qizillar” tarkibida debyut qilganini ta’kidlash kerak. Arne Slotning aytishicha, “Atletiko”ga qarshi oltmish daqiqa Isakning faoliyatidagi balki eng og‘ir daqiqalar bo‘lgan va katta ehtimol bilan u “Everton” bilan o‘yinda ilk daqiqalardan maydonga tushmasligi mumkin. APL o‘yinida Ekitike boshlang‘ich tarkibda tushib kelmoqda. Umuman olganda, “Liverpul”ning hafta o‘rtasida nisbatan ancha kuchli raqibga qarshi to‘p surgani butun hafta davomida derbiga tayyorlangan “Everton”ga qo‘shimcha ustunlik berishi turgan gap. Jarohatlarga kelsak, mehmonlar safida ham yo‘qotishlar deyarli yo‘q. Faqat markaziy himoyachi Jarrad Brantueyt ancha oldin, mavsumoldi o‘rtoqlik o‘yinlarida jarohat olgandi va hali yangi mavsumda safga qaytgani yo‘q.
So‘nggi derbilar tarixiga qaralsa, “Liverpul” “Enfild”da o‘tgan o‘yinlarda doim ancha ustun harakat qiladi – oxirgi 15 derbidan 10 tasi “Liverpul” g‘alabasi bilan yakunlangan. Jumladan, “Enfild”da o‘tgan oxirgi 4 derbida mezbonlar gol o‘tkazmasdan g‘alaba qozonishning uddasidan chiqishgan.
MANCheSTeR YuNAYTeD – CheLSI (20 sentabr, 21:30)
Qiziq fakt, Aleks Fergyusondan keyin o‘nga yaqin doimiy va vaqtinchalik murabbiylar ishladi, “Chelsi”da undan ham ko‘proq. “MYu” turli davrlarni boshdan kechirdi, “Chelsi”da ham turli davrlar bo‘ldi, bu orada ikki marta APL, bir marta Chempionlar Ligasini yutishga muvaffaq bo‘lishdi. Jamoalar turlicha holatlarda, gohida u, gohida bunisi favorit bo‘lib to‘qnashdi.
Lekin Fergyusondan keyingi davrda hali biror marta “Chelsi” “Old Trafford”da g‘alaba qozonmagan. Duranglar juda ko‘p, lekin g‘alaba yo‘q. Oxirgisi o‘sha 2013 yilda, Fergyussonning oxirgi mavsumida ro‘y bergan ekan. Ayni damda yuqori o‘rinlarda yurgan “Chelsi” yana mavsumni muammolar bilan boshlagan “MYu” ustidan nihoyat safar g‘alabasini qo‘lga kiritishga ishonayotgan bo‘lishi mumkin, ammo yuqorida aytilganidek, “Old Trafford”da mezbonlar bundan yomonroq holatlarda ham “Chelsi”ga yon bermagan.
“Chelsi” raqibi fonida ancha barqaror bo‘lsa-da, yana ikki omil uchrashuv natijasini taxmin qilish qiyinligini ko‘rsatadi. Birinchidan, “MYu” yanada og‘irroq holatda bo‘lgan apreldagi o‘yinni eslang. “Stemford Brij”da o‘tgan o‘yinda mezbonlarga g‘alaba juda zarur, “MYu” esa Yevropa Ligasi finaliga tayyorganlik ko‘rayotgandi. Ammo shunda ham Amorim shogirdlari ancha kuchli o‘yin ko‘rsatishgan va “Chelsi”ning 1:0 hisobida g‘alabasi bilan yakunlangan bahsning oxirigacha kurashishgandi. “Iblislar”ning ayni damdagi holati nisbatan yaxshiroq va umuman Amorim o‘tgan haftadagi derbini qo‘shmasa, top-raqiblarga qarshi jamoani munosib tayyorlay olyapti. Ikkinchidan, mana shu tayyorgarlik uchun vaqt mezbonlarda ikki barobar ko‘p bo‘lganini ham ta’kidlash kerak. Yevrokuboklarda qatnashayotgan “Chelsi” chorshanba oqshomida “Bavariya” maydonida qiyin o‘yinda ishtirok etdi va yana bir og‘ir to‘qnashuvga to‘liq tiklanib ulgurmasligi ham mumkin. O‘tgan mavsumda Mareska Konferensiyalar Ligasiga umuman boshqa tarkibni tushirib, jamoasining barcha frontlarda yaxshi sport formasida bo‘lishini ta’minlagan bo‘lsa, YeChL bunday tajribalarga yo‘l qo‘ymaydi. Haftada ikki o‘yinlik rejim qaysidir ma’noda Mareska uchun ham yangi sinov bo‘ladi.
Jarohatlarga kelsak, “Chelsi” safida markazda Laviyadan tashqari, Essugo ham yo‘q, natijada markazdagi uchlik barcha o‘yinlarda o‘zgarishsiz to‘p surishga majbur. Undan tashqari, Liam Delapning ham yordamidan Mareska foydalana olmaydi. Matbuot anjumanida u Alexandro Garnachoning ilk daqiqalardan o‘ynashga tayyor ekanini aytib o‘tdi – demak, biz argentinalik vingerning endi raqib jamoasi safida “Old Trafford”ga chiqib kelishini ko‘ramiz.
“Manchester Yunayted” esa terma jamoalar tanaffusidan oldin Kunya va Mauntdan ayrilgandi. Xabarlarga qaraganda, Kunya “Chelsi”ga qarshi tarkibga qaytish uchun bor imkoniyatini ishga solyapti, lekin hali Amorimning bu boradagi yakuniy fikri ma’lum emas. “Etihad”da chap qanot “o‘nligi” sifatida Amadni sinab ko‘rish tajribasi o‘xshamadi. Bu safar Amorim yana o‘sha tarkibda qoladimi yoki Bruno Fernandesh vaqtincha bo‘lsa-da, oldingi chiziqqa qaytadimi, ko‘ramiz. Bu ikki futbolchidan tashqari, Diyegu Dalotda ham jarohat bor, shuningdek, Lisandro Martinesning uzoq muddatdan so‘ng safga qaytishi keyingi oyga kutilmoqda.
Yana bir intriga, albatta, darvoza chizig‘iga yangi xarid qilingan Lammensning asosiy tarkibda paydo bo‘lish ehtimoli. O‘tgan to‘rt o‘yinda darvozada turib, yo‘naltirilgan 15 zarbaning yarmini o‘tkazib yuborgan Altay Bayindirga berilayotgan imkoniyat bu qadar uzoq davom etishi qiyin.
LATsIO – ROMA (21 sentabr, 15:30)
Liverpul derbisidan bir kun o‘tib bizni Rimda ham ajoyib derbi kutib turibdi. Rimning ikki klubi yana orani ochiq qilishadi.
Jamoalarning yangi mavsumdagi starti deyarli o‘xshash – u qadar muvaffaqiyatsiz deyish qiyin, shu bilan birga savollar ham bor. “Latsio” 2-turda “Verona” ustidan 4:0 hisobida ajoyib g‘alabaga erishdi, ammo safar o‘yinlarining har ikkisida ham mag‘lubiyatga uchradi. “Roma” esa go‘yoki yana Raniyeri davriga qaytib qolgandek – uchala o‘yin ham 1:0 hisobida tugadi. Faqat so‘nggisida jamoa o‘z maydonida “Torino”ga shu hisobda mag‘lubiyatga uchradi.
Hozircha Italiyada ko‘p tilga olinayotgan peshqadamlar boshqa bo‘lsa-da, Rim jamoalarida ham chempionlik poygasida ishtirok etishga salohiyat yetarli. Masalan, “Roma” yaxshi himoya chizig‘iga ega va ligada eng kam gol o‘tkazgan jamoa bo‘lib turibdi. Bu mavsumoldi tayyorgarlik o‘yinlarida ham ko‘zga tashlangan, juda ko‘p o‘rtoqlik o‘yinlarini jamoa gol o‘tkazmay yakunlagandi. Shu bilan birga, Gasperini shogirdlarini himoyaviy deb ham bo‘lmaydi. Biz ushbu murabbiyni juda yaxshi bilamiz va hali to‘liq g‘oyalarini singdira olmagan bo‘lsa-da, masalan, “Roma” uch turdan keyin to‘p nazorati bo‘yicha A Seriya yetakchisi ekani ham qaysidir ma’noda yangilik.
“Latsio” esa yaratilgan xavfli vaziyatlar borasida ligada faqat “Napoli”dan ortda qolyapti, xolos. Albatta, bu yerda ham o‘ziga yarasha kontekst bor – “Latsio” bir o‘yinni yirik hisobda yengdi, qolgan ikkitasida mag‘lubiyatga uchradi. Ya’ni ko‘p hujum qilish va vaziyatlar yaratish uchun sharoit va sabablar yetarli ham bo‘lgan.
Xullas, Italiya futbolining eng dogmatik, shu bilan birga o‘z uslubi bilan nafaqat Italiya, balki Yevropada ham nom qozongan ikki murabbiyi o‘rtasidagi bahs aynan taktik jihatdan qiziqarli bo‘lishi tabiiy. Gasperini va Sarri – bu ikki murabbiy dueli hech qachon zerikarli bo‘lishi mumkin emas.
Tarkiblarga kelsak, “Latsio”da Jigo, Evra, Ladzari, Visino kabi futbolchilar maydonga tusha olishmaydi. Hammasida jarohat bor. “Roma” safida esa Paulo Dibala yana jarohatlandi va keyingi oygacha maydonda kutish qiyin. “Aston Villa”dan ijara asosida olib kelingan Leon Beylining holati ham aniq emas va uning yangi jamoa tarkibida debyuti keyinroqqa qolishi mumkin.
O‘zaro o‘yinlarda so‘nggi yillarda deyarli tenglik kuzatilgan. “Roma”da biroz ustunlik bor – oxirgi 35 bahsdan 15 tasi aynan “bo‘rilar” foydasiga hal bo‘lgan. “Latsio”da bu davrda g‘alabalar soni esa 12 ta. O‘tgan mavsumdagi derbilarning birida durang qayd etilgan bo‘lsa, ikkinchisida “Roma” 2:0 hisobida ustun kelgan.
ARSeNAL – MANCheSTeR SITI (21 sentabr, 20:30)
Nihoyat “Arsenal” so‘nggi mavsumlarda “Manchester Siti” bilan o‘yinlardagi kompleksidan xalos bo‘ldi va bemalol o‘zaro o‘yinda favorit sifatida tilga olinishi mumkin. So‘nggi bahsdagi ishonchli 5:1 hisobidagi g‘alaba, yozgi transfer bozoridagi faollik, yangi mavsumdagi o‘ta ishonchli start “Arsenal”ga mana shu maqomni taqdim etgani shubhasiz. Albatta, “Manchester Siti” ham juda ko‘p yangi futbolchilarni tarkibiga qo‘shib oldi, ammo “shaharliklar”dan farqli ravishda “Arsenal”ning xaridlariga yangi tajribalar yoki muammolarni yopish uchun kelgan yosh futbolchilar emas, aksincha, tayyor ishlab turgan mexanizmga qo‘shimcha “ehtiyot qismlar” o‘laroq baho berish mumkin. E’tibor bering, ayni damda so‘nggi yillarning eng asosiy futbolchilari Saka va Saliba yo‘q, Kay Havers va Jyezus ham jarohatda, ammo shunda ham hech kim bu yo‘qotishlarni muammo sifatida ko‘rmayapti. Nihoyat “Arsenal”dagi faoliyatida ilk marta Arteta jarohatlardan qayg‘urmay, har bir o‘yinga tayyor bo‘lishi mumkin.
“Manchester Siti”ga kelsak, jamoa go‘yoki bir haftada ham derbini, ham YeChLda “Napoli”ni birorta ham gol qo‘yvormay yutgan bo‘lsa-da, aniq baho berish qiyin. “Siti”ni ko‘proq “Tottenhem” va “Brayton”ga qarshi muvaffaqiyatsiz o‘yinlar orqali baholash to‘g‘riroq bo‘lardi, zero “Manchester Yunayted” shundoq ham qiyin holatda va “Siti”ga juda qulay bo‘lgan uslubda to‘p surib, vazifani osonlashtirdi. “Napoli” esa o‘yin boshidan bir kishi kam bo‘lib qolgandi. Yetarlicha tartibli va zich o‘ynaydigan jamoalarga qarshi “Manchester Siti”ning muammolari hali hech qayerga ketgani yo‘q. “Arsenal” hujumda “Siti”ga “Yunayted” kabi ko‘p imkoniyat bermaydi, umuman, “Arsenal” bu mavsumda o‘z darvozasi oldida birorta ham katta vaziyat yaratilishiga imkoniyat bermagan yagona klubdir. Jamoa ushbu mavsumda o‘tkazib yuborgan yagona gol ham Saboslaining uzoq masofadan yo‘llagan zarbasi bo‘ldi xolos. Ya’ni noodatiy qarorlarsiz yoki biroz omadning kulib boqishisiz “Manchester Siti”ga g‘alaba shundoq tortiq qilinmaydi. Pep Gvardiola shogirdlari esa bu mavsumda hali qiyin uchrashuvda raqibni yenga olmadi.
Albatta, ushbu o‘yinga O‘zbekiston milliy jamoasi futbolchisi Abduqodir Husanov fonida qarashimiz ham to‘g‘ri bo‘ladi va katta ehtimol bilan bu safar ham u asosiy tarkibda harakat qilsa kerak. Gvardiola qatorasiga ikki o‘yindan beri Husanovni asosiy tarkibga, faqat o‘ng qanotga tushiryapti. Bu uch o‘yinning eng qiyini va himoyada ko‘proq harakatlar talab qilinadigan “Arsenal”ga qarshi Pep endi Nunez yoki Lyuisni qo‘ymasa kerak. Abduqodirni APLning yana bir tezkor futbolchisi Eze yoki Martinelliga qarshi ko‘rish albatta o‘zbek muxlislari uchun qiziq bo‘ladi.
Yuqorida Salibaning jarohati tilga olingan bo‘lsa-da, fransiyalik himoyachi Bilbaodagi Chempionlar Ligasi o‘yinida zaxira o‘rindig‘idan joy oldi. Arteta qariyb bir oydan beri maydonga tushmagan Salibani uning tajribasiga ishonib birdaniga “Siti”ga qarshi o‘yinda tushiradimi yoki so‘nggi o‘yinlarda yomon ko‘rinmayotgan Moskueraga ishonishda davom etadimi, hali noma’lum. Saka, Havers va Jyezusdan tashqari, Martin Edegor ham sheriklariga yordam bera olmaydi. U APLning 4-turida “Nottinghem”ga qarshi bahsda jarohat olgandi.
Mehmonlar tarkibida ham yo‘qotishlar jiddiy. Himoyada Jon Stounz va Ayt-Nuri, markazda Kovachich, hujumda Sherki va Marmush maydonga tusha olishmaydi. Ammo kutilmaganda Fil Foden formaga qaytdi va eng yaxshi davrlarini eslab qoldi, shuningdek, Doku ham oldingi chiziqda samarali harakat qilmoqda, Holand terma jamoa o‘yinlariyam qo‘shilsa, so‘nggi 5 o‘yinda 10 gol va 3 assistni amalga oshirdi – Pep Gvardiolada bu chiziqda muammo bo‘lmasa kerak. Tarkib haqida so‘z borganda faqat jarohatlarni emas, hafta o‘rtasida bo‘lib o‘tgan Chempionlar Ligasi ta’sirini ham unutmaslik kerak. “Arsenal” Bilbaodagi o‘z o‘yinini seshanba kuni o‘tkazgan bo‘lsa, “Manchester Siti”ning “Napoli”ga qarshi o‘yini payshanba oqshomiga belgilangandi. Bu ham mezbonlarning foydasiga ishlasa ajab emas.
Yuqorida aytilganidek, “Arsenal” favorit, ham o‘z maydonida to‘p suryapti, ham oxirgi besh o‘zaro o‘yinda londonliklar mag‘lubiyat nimaligini bilmayapti. Seriya davom etarmikin?
MARSeL – PSJ (21 sentabr, 23:45)
Roberto de Dzerbi Marselda ish boshlaganiga ko‘p vaqt o‘tmagan bo‘lsa-da, ilk mavsumidayoq jamoani o‘z uslubiga ega bo‘lgan va doim birinchi raqamda o‘ynashga harakat qiladigan qilib qo‘ydi. O‘tgan mavsumda 2-o‘rin ham bejiz emas. Chempion bilan ochkolar farqi katta edi, “Marsel” parijliklarga yetarlicha raqobat ko‘rsata olmagan, o‘zaro o‘yinlarda ham “PSJ” yaqqol ustunligini ko‘rsatgan, ammo agar yangi mavsumda qaysidir jamoa ligaga biroz bo‘lsa-da intriga olib kirishi kerak bo‘lsa, aynan de Dzerbi shogirdlaridan kutish kerak.
Birinchidan, “Marsel” yetakchi futbolchilarini saqlab qolish bilan birga bir qator e’tiborli xaridlarga ham qo‘l urdi. Pavar, Emerson, Obameyang, kabi futbolchilarda eng katta miqyosda tajriba bor. O‘tgan yili “Lill”da porlagan Eynjyel Gomes Angliya terma jamoasi a’zosi hisoblanadi, markazga yaxshi ta’sir ko‘rsatishi mumkin. Ikkinchidan, Chempionlar Ligasi doirasidagi “Real”ga qarshi o‘yin ko‘p jihatdan ko‘rgazmali bo‘ldi – “Marsel” eng top darajadagi raqiblar bilan ham tengma-teng o‘ynay olishini butun Yevropaga ko‘rsatdi. To‘g‘ri, o‘sha o‘yinda 13 seyv amalga oshirgan Xeronimo Rulining qahramonligiga ko‘z yumib bo‘lmaydi, ammo ba’zi pallalarda “Marsel” ham qiziq ko‘rindi, hatto g‘alaba qozonish imkoniyati ham bor edi. Tabiiyki, bunday o‘yindan keyin “Marsel” bemalol “PSJ”ga qarshi ham samarali o‘ynay olishiga ishonch bo‘ladi. Buning ustiga o‘yin Marselda bo‘lib o‘tadi – jamoa ushbu mavsumda o‘z maydonidagi har ikki o‘yinda ham yirik hisobda g‘alaba qozonib, jami 9 gol urgan.
“PSJ” esa asta-sekin mavsumga kirib kelmoqda. Bu tabiiy, jamoa klublar o‘rtasidagi jahon chempionatida finalgacha yetib bordi va natijada deyarli mavsumoldi yig‘inlarsiz chempionatni boshladi. Startdagi dastlabki ikki o‘yinda faqat minimal g‘alaba qayd eta olgan Enrike shogirdlari endi optimal formaga kirib borishyapti – mavsumdagi 5 o‘yinda 5 g‘alaba, 14 gol urilgan va 3 ta o‘tkazib yuborilgan. So‘nggi ikki o‘yinda hatto jamoaning ikki asosiy quroli bo‘lmish Due va Dembelening jarohati ham sezilmayapti. “Marsel”ga qarshi o‘yinda bu ikki hujumchidan tashqari Joao Nevesh ham qatnasha olmasligi mumkin. “Tuluza” bilan o‘yinda het-trik qayd etgan futbolchi Chempionlar Ligasida “Atalanta”ga qarshi kechgan uchrashuvda jarohat oldi va kamida ikki haftaga safdan chiqdi.
Mezbonlardagi yo‘qotishlarga kelsak, asosiysi, marokashlik Naif Aguerd Madriddagi bahsda ham yetishmagandi, katta ehtimol bilan “PSJ”ga qarshi o‘yinni ham o‘tkazib yuboradi. Shuningdek, “Bornmut”dan transfer qilingan Hamid Traoreda ham kichik jarohat bor. Qolgan futbolchilarning hammasi uchrashuvga tayyor va balki raqibga nisbatan bir kun ko‘p (“Marsel” YeChL o‘yinini seshanba, “PSJ” esa chorshanba o‘tkazgan) dam olish imkoni ham mezbonlarga jismoniy tarafdan qo‘shimcha ustunlik berishi mumkin.
BOShQA O‘YINLAR
20 sentabr. Hoffenhaym – BAVARIYa (18:30), Brayton – TOTTeNHEM (19:00), ReAL – Espanyol (19:15), Verona – YuVeNTUS (21:00), Udineze – MILAN (23:45)
21 sentabr. Bornmut – NYuKASL (18:00), Torino – ATALANTA (18:00), Istanbul Boshoqshexir – Alaniyaspor (19:00), Malyorka – ATLeTIKO (19:15), BORUSSIYa D – Volfsburg (22:30), INTeR – Sassuolo (23:45), BARSeLONA – Xetafe (23:55).
Finalda O‘zbekiston terma jamoasidan 7 nafar bokschi oltin medal uchun jang qildi.
Xitoyning Guiyang shahrida World Boxing tashkiloti kubogi bahslarining ikkinchi bosqichi bo‘lib o‘tdi. Musobaqada 40 davlatdan 177 nafar erkaklar va 123 nafar ayollar g‘oliblik uchun bahs olib bordi.
Unda O‘zbekiston erkaklar terma jamoasi to‘liq tarkibda – 10 vazn toifasida, ayollar jamoasi esa 9 vazn toifasida ishtirok etdi hamda 4 ta oltin, 3 ta kumush va 4 ta bronza medallarini qo‘lga kiritdi.
Final bosqichiga O‘zbekiston terma jamoasi eng ko‘p – 7 nafar bokschi bilan yetib keldi.
-57 kg vazn toifasida Nigina O‘ktamova hindistonlik Prachiga qarshi ringga ko‘tarildi. Yakunda 5:0 hisobida g‘alaba qozongan Nigina Jahon kubogi oltin medalini qo‘lga kiritdi.
60 kg vaznda Abdumalik Halokov braziliyalik Luiz Gabriyelga qarshi ringga chiqdi va 5:0 hisobida zafar g‘alaba qozondi.
-80 kg vazn toifasida Javohir Ummataliyev braziliyalik Vanderley Pereyrani 3:2 hisobida yengdi.
-90 kg vaznda To‘rabek Habibullayev angliyalik Isaak Okoxga qarshi ringga ko‘tarilishi kerak edi. Raqibi jarohat olganligi sababli jang qila olmasligini bildirdi va To‘rabek g‘olib deb e’lon qilindi.
-48 kg vazn toifasida Farzona Fozilova, -50 kg vazn toifasida Asilbek Jalilov, 80 kg vazn toifasida Oltinoy Sotimboyeva kumush medalni qo‘lga kiritdi.
Yarim finalda mag‘lub bo‘lgan Arman Maxanov, Akmaljon Isroilov, Aziza Zokirova hamda Sitora Turdibekova musobaqani bronza medali bilan yakunladilar.
Turnirning uchinchi final bosqichi noyabr oyida Toshkentda bo‘lib o‘tadi.
Sport
Bir monarxga ikki jamoa. Niderlandiya qiroli avval o‘z jamoasini tabrikladi, keyin kyurasaoliklar bilan bayram qildi
Qirol bir kunda bo‘lib o‘tgan ikki o‘yinga ham ulgurish uchun katta masofani bosib o‘tdi.
Foto: Getty Images, Reuters
Niderlandiya qiroli Villem-Aleksandr va kirolicha Maksima bir kun ichida ikkita o‘yinni stadiondan turib tomosha qilishdi: avvaliga Ronald Kuman shogirdlari Shvetsiyani qanday tor-mor etganiga guvoh bo‘lishdi (5:1), shuningdek, Kyurasaoning Ekvador bilan o‘yiniga kirishga ulgurishdi (0:0). Ushbu monarxning Dik Advokat boshqaruvidagi jamoaga qiziqishi bejiz emas.
Birinchi bekat – Niderlandiya
FIFA prezidenti Janni Infantino deyarli har bir o‘yinda ko‘rinish berishi hech kimni ajablantirmaydi. Lekin Niderlandiya qiroli bir kechada orasida ming kilometrdan ortiq masofa mavjud bo‘lgan ikki stadionga tashrif buyurishga ulgurib, barchani hayron qoldirdi.
Uning dastlabki manzili Hyuston bo‘ldi, bu yerda Kuman shogirdlari Shvetsiyani tor-mor etishdi (5:1). Monarx o‘yinni Xalqaro futbol federatsiyasi rahbari yonida o‘tirib kuzatdi.
«Men bu yerda FIFA mehmoniman. Agar Infantino o‘yinga tushgan bo‘lsa, uning yonida men ham o‘tiraman. Balki unga Tinchlik mukofoti uchun bir necha nomzodlarimni taklif qilishga ulgurgandirman», – deya hazil qildi Villem-Aleksandr jurnalistlar bilan muloqotda Infantino va Tramp o‘rtasidagi munosabatlarni nazarda tutib.
Jamoasi oson g‘alabaga erishgan bo‘lsa-da, qirol natija uchun qattiq qayg‘urgandi.
«O‘yin vaqti bir necha marta defibrillyator qayerda turganiga qarab qo‘ydim. Ayrim pallalarda qattiq siqilib qoldim», – deya hazillashishda davom etgan monarx.
O‘yin yakunlanganidan keyin u kiyim almashtirish xonasiga yo‘l olgan va jamoa a’zolarini tabriklagan. Futbolchilardan ayrimlari imkoniyatdan foydalanib, qirol bilan suratga tushib olishgan: xususan, jamoa sardori Virjiyl van Deyk va darvozabon Bart Verbryuggen u bilan selfi olishgan.
Een trots @koninklijkhuis 🧡#NothingLikeOranje #FIFAWorldCup pic.twitter.com/O7lwsfywF0
— OnsOranje (@OnsOranje) June 21, 2026
«U men yaxshi turganim va o‘yin unga yoqqanini aytdi», – deya darvozabondan iqtibos keltiradi Voetbal.
Ammo Villem-Aleksandr jamoa bilan ko‘p vaqt qola olmasdi: u tezda aeroportga yo‘l oldi, chunki bir necha soat o‘tib Kanzas-Sitida Kyurasao va Ekvador o‘rtasidagi o‘yin boshlanishi kerak edi.
Ikkinchi bekat – Kyurasao
2010 yil suverenitet qo‘lga kiritilganiga qaramay, Kyurasao hamon Niderlandiya qirolligining bir qismi hisoblanadi. Qolaversa, milliy jamoadagi 26 futbolchidan 25 nafari Karib havzasidagi orollarda emas, aynan Niderlandiyada dunyoga kelgan.
Qirol shu sabablar tufayli jamoani qo‘llab-quvvatlash uchun uzoq yo‘l bosib keldi, jamoadagilar ham uni ko‘rishdan xursand bo‘lishdi. Monarx esa stadionga tushishdan oldin to‘q sariq rangdagi formasini ikkinchi jamoasining ranglariga almashtirdi.
Kyurasaoning Ekvador bilan o‘yindagi durang natijasi (0:0) Niderlandiyaning yirik hisobdagi g‘alabasidan ham qadrliroq edi. Bu o‘z tarixida ilk bor mundialda ishtirok etayotgan jamoa tomonidan qo‘lga kiritilgan ilk ochko edi. Villem-Aleksandr esa oila a’zolari bilan birga yana jamoa kiyim almashtirish xonasiga kirib keldi va jamoa bosh murabbiyi, niderlandiyalik taniqli mutaxassis Dik Advokat sha’niga maqtovli so‘zlar aytdi. Keyin esa u barcha futbolchilar bilan qo‘l berib ko‘rishib chiqdi va ular bilan birga raqs tusha ketdi.
Royal Celebration with the King and Queen 💙@koninklijkhuis pic.twitter.com/PLLrVoek80
— Curaçao National Football Team (@TheBlueWaveFFK) June 21, 2026
E’tiborli jihati, uchinchi turda qirol ikki jamoadan birini tanlashiga to‘g‘ri keladi: Kyurasao – Kot-d’Ivuar va Niderlandiya – Tunis o‘yinlari deyarli bir vaqtda boshlanadi, ushbu o‘yinlar o‘tkaziladigan stadionlar o‘rtasidagi masofa esa qariyb 2000 kilometr chiqadi.
Birinchi turda 5 ta gol urgan shvedlar bu turda 5 ta gol o‘tkazishdi, Kyurasao darvozaboni esa 15 ta seyv bilan rekord o‘rnatdi, kuchli raqibdan ochko olgan debyutantlar guruhdan chiqish uchun nazariy imkoniyatni saqlab qolmoqda; Germaniya muddatidan oldin pley-off masalasini hal qildi, Yaponiyaga ham yirik hisobda yutqazgan Tunis turnirni tark etdi.
Jahon chempionatining ikkinchi turi yorqin o‘yinlar bilan muxlislarni xursand qilishda davom etmoqda: Kyurasao Ekvador bilan o‘yinda sensatsiya ko‘rsatdi (0:0), Yaponiya Tunisni osonlik bilan tor-mor etdi (4:0), Niderlandiya Shvetsiyaga imkon qoldirmadi (5:1), Germaniya Kot-d’ Ivuar bilan o‘yin oxirida g‘alaba golini urdi (2:1).
Maydon tashqarisida ham e’tiborli voqealar bo‘lib o‘tmoqda: Turkiya milliy jamoasi futbolchilari turnirni erta tark etgani uchun uzr so‘rashdi, Angliyadagilar mundialda o‘ynalayotgan to‘plarning g‘ayrioddiy xususiyatini payqab qolishdi, Portugaliyada esa feyk xabar tufayli chiqqan mojaro avj olmoqda.
Shvetsiya darvozasiga ikki futbolchi dubl qildi
Niderlandiya – Shvetsiya 5:1
Gollar: Brobbi, 5 (1:0). Brobbi, 17 (2:0). Gakpo, 47 (3:0). Gakpo, 54 (4:0). Elanga, 59 (4:1). Sammervill, 89 (5:1)
Niderlandiya: Verbryuggen, van Deyk, van Hekke, van de Ven, Dyumfris, de Yong (Til, 59), Reynders (Kopmeyners, 59), Gravenberh, Gakpo (Lang, 90), Malen (Sammervill, 46), Brobbi (Depay, 72)
Shvetsiya: Nordfeldt, Hin, Lindelyof, Lagerbilke, Chelstrem (Bergvall, 55), Nyugren (Zeneli, 55), Ayyari (Ali, 79), Gudmundsson (Stroud, 90+3), Bernhardsson (Elanga, 55), Isak, Yokeresh
Ogohlantirishlar: Gudmundsson, 53. Ayyari, 75. Bergvall, 80
Shvetsiya 1-turda yirik hisobda g‘alaba qozonib, maqtovlarga sazovor bo‘lgandi (5:1). Ammo o‘shanda raqib guruh autsayderi Tunis bo‘lgandi. Endi esa yulduzli tarkibga ega bo‘lgan niderlandlar Yaponiya bilan durang o‘ynab qo‘yganidan keyin bor alamini shvedlardan olishdi (5:1).
Gremm Potter shogirdlari 5-daqiqadayoq tezkor gol o‘tkazib yuborishdi. Bu golli hujum maksimal darajada oddiy amalga oshirildi: darvozabon to‘pni oldinga yetkazdi, Brobbi to‘pni yutib oldi va qanotga yetkazib, o‘zi oldinga yugurdi, chap qanotda undan to‘pni qabul qilib olgan Reynders oldinroqdagi Gakpoga uzatma berdi, u esa to‘pni darvozabon hududiga yetib kelgan Brobbiga yetkazdi va hujumchida darvozani ishg‘ol etishdan boshqa variant yo‘q edi. Va bu voqealarning barchasi 10 soniya ichida ro‘y berdi.
17-daqiqada esa ushbu hujumchi endi o‘ng qanotdan Dumfris uzatgan to‘pni yaqin masofadan turib darvoza to‘riga kiritib yubordi va dublni rasmiylashtirdi.
O‘yinning birinchi bo‘limida shvedlar raqibga qaraganda ko‘proq zarba berishdi (9:5), Yokereshning o‘zida uchta xavfli vaziyat yuzaga keldi, ammo niderlandlar darvozaboni Verbryuggen ishonchli harakat qildi.
Ikkinchi bo‘lim boshida esa niderlandlar yana tashabbusni o‘z qo‘liga olishdi va Kodi Gakpo ham ikkita bir-biriga o‘xshash gollar muallifiga aylandi.
Shvedlar biroz o‘tib qarshi hujumda Elanganing chiroyli goli bilan javob qaytarishdi, ammo yakuniy hisob o‘yin oxirlarida Sammervil tomonidan o‘rnatildi – 5:1. Niderlandlar hozircha rasman guruhdan chiqishmadi, ammo amalda pley-offga tayyorgarlik ko‘rishni boshlashi mumkin.
Undav qutqardi
Germaniya – Kot-d`Ivuar 2:1
Gollar: Kesse, 30 (0:1). Undav, 68 (1:1). Undav, 90+4 (2:1)
Germaniya: Noyyer, Ta, Shlotterbek (Ryudiger, 46), Braun, Kimmih, Pavlovich (Amiri, 60), Nmecha, Musiala (Leveling, 60), Virs, Sane (Undav, 60), Havers (Goretska, 85)
Kot-d`Ivuar: Ya. Fofana, Kossunu, Agbadu, Konan, Singo (Due, 82), Sangare (S. Fofana, 75), Kesse, Oulai, Diomande (Pepe, 85), Diallo (Adingra, 75), Bonni (Gessan, 75)
To‘rt karra jahon chempionlari turnirni oson g‘alaba bilan boshlashgandi: birinchi turda jamoaga turnir debyutanti Kyurasao raqib bo‘lgandi. Bundestim avvaliga raqibga turnir tarixidagi ilk golni urish imkoniyatini bergan bo‘lsa-da, keyin istagancha gol urgandi (7:1). Ikkinchi o‘yindagi g‘alaba Germaniya uchun uzoq kutilgan pley-off yo‘llanmasini taqdim etishi kerak edi: nemislar oldingi ikki mundialda ham guruhdan chiqa olmagandi. Ikkinchi turdagi raqibni yengish esa oson ish emasdi – birinchi turda Ekvador (1:0) ustidan g‘alabaga erishgan Kot-d’Ivuar ham guruh masalasini shu turda hal qilish uchun maydonga tushgandi.
Nemislar, albatta, uchrashuv favoriti sanalayotgandi. Ammo jamoa o‘yin startida ishonchsiz harakat qildi va tashabbusni afrikaliklarga berib qo‘ydi. Va raqib o‘z imkoniyatidan foydalandi: Frank Kesse jarima maydonida o‘ziga kelib qolgan to‘pni darvoza to‘riga joylab qo‘ydi.
Shundan keyin ham ivuarliklar himoyaga yotishmadi, aksincha bosim o‘tkazishda davom etishdi va nomdor raqibga qaraganda yaxshiroq ko‘rindi. Ammo hisobni ushlab qola olishmadi. Germaniya safida zaxiradan o‘yinga tushgan Deniz Undav (u oldingi o‘yinda ham zaxiradan maydonga tushib 1 gol va 2 assist muallifi bo‘lgandi) qahramonga aylandi: «Shtutgart» hujumchisi 60-daqiqada maydonga tushdi va 68- va 90+4-daqiqalarda gol urib, jamoasini pley-offga olib chiqdi.
Kyurasaoda ham ochko bor
Ekvador – Kyurasao 0:0
Ekvador: Galindes, Pacho, Inkapiye, Franko (Presiado, 83), Alsivar (Rodriges, 46), Vite, Moyzes Kaysedo, Estupinyan (Angulo, 70), Yyeboa (X. Kaysedo, 89), Valensiya, Plata
Kyurasao: Rom, Gari, Floranus, Obispo, Fonvill (van Eyma, 76), Brenet, Komenensiya (Romeratoe, 84), L. Bakuna, J. Bakuna (Gorre, 75), Chong (Margarita, 76), Lokadia (Kastaner, 83)
Ogohlantirishlar: Alsivar, 38 – L. Bakuna, 39. J. Bakuna, 53. Komenensiya, 56. Gari, 75. Kastaner, 90
Bu o‘yin oldidan Ekvador yaqqol favorit edi va amalda ham janubiy amerikaliklar yaqqol ustunlikka erishishdi – xG bo‘yicha 3,05 ga 0,48, zarbalar soni bo‘yicha 27:10, golli vaziyatlar bo‘yicha 5:0, burchak zarbalari bo‘yicha 9:0, to‘pga egalik qilish ko‘rsatkichi bo‘yicha 75 ga 25 foiz.
Ammo Enner Valensiya, Moyses Kaysedo, Pervis Estupinyan, Piyero Inkapiye va Vilyan Pacho kabi yulduzlar jamoasi jahon chempionatiga ilk bor chiqqan raqibga qarshi hech narsa qila olishmadi. Kyurasaoliklarning 37 yoshli darvozaboni Eloy Rom kabo-verdelik Vozinyadan ham o‘tib ketdi va 15 seyv ijro etdi. Uning ham instagramdagi o‘quvchilari soni o‘sa boshladi: o‘yin arafasida unda 300 ming o‘quvchi bor edi, o‘yindan keyin bu raqam millionga qarab ketmoqda.
Rom jahon chempionatining bir o‘yinida seyv ijro etish bo‘yicha rekord o‘rnatdi (2014 yilgi mundial 1/8 finalida AQSh milliy jamoasi posboni Belgiyaga qarshi o‘yinda o‘z darvozasi tomon yo‘llangan 16 ta zarbani qaytargandi, ammo o‘shanda jamoalar qo‘shimcha bo‘limlarda ham o‘ynagan va o‘yin 120 daqiqa davom etib, yevropaliklarning 2:1 hisobidagi g‘alabasi bilan yakunlangandi).
Bundan tashqari, Dik Advokat boshchiligidagi Kyurasao uchun bu jahon chempionatlaridagi ilk ochkoga aylandi. Ikkinchi tur o‘yinlaridan keyin KONKAKAF vakillari Ekvador bilan bir xil ochkoga ega, faqat to‘plar nisbatiga ko‘ra (Kyurasao turnirni Germaniyaga 1:7 hisobida yutqazish bilan boshlagandi) oxirgi o‘rinda.
Ekvador ikki o‘yinda 40 ta zarba yo‘llab, birorta gol ura olmadi: avvaliga Kot-d’Ivuar bilan o‘yinning so‘nggi daqiqalarida gol o‘tkazib, yutqazgandi (0:1), endi kamtarona Kyurasaoni yenga olmadi (0:0). Endi E guruhidan chiqish uchun Ekvador so‘nggi turda Germaniyani mag‘lub etishi kerak bo‘ladi. Pley-offga chiqish imkoniyati Kyurasaoda ham saqlanib qolmoqda: buning uchun ular Kot-d’Ivuarni mag‘lub etishi kerak bo‘ladi.
Yaponiya yubiley o‘yinda porladi
Tunis – Yaponiya 0:4
Gollar: Kamada, 4 (0:1). Ueda, 31 (0:2). D. Ito, 69 (0:3). Ueda, 83 (0:4)
Tunis: Damen, Talbi, Rekik, Bronn (Ben Amida, 46), Sxiri (Xedira, 90), Slimane, Abdi (Ashuri, 90), Valeri, Saad (Garbi, 46), Mejbri, Tunekti (Shauat, 65)
Yaponiya: D. Sudzuki, Itakura, X. Ito, Tomiyasu (Seko, 79), Tanaka, Sano, Nakamura (Yu. Sudzuki, 79), Doan (Sugavara, 74), D. Ito, Kamada (D. Sudzuki, 73), Ueda (Goto, 84)
Tunis – Yaponiya o‘yini natijasini oldindan taxmin qilish mumkin edi. Birinchi turdagi yirik mag‘lubiyatdan keyin bosh murabbiyidan ayrilgan tunisliklar o‘yini bir necha kun ichida o‘zgarib qolishini kutish to‘g‘ri bo‘lmasdi. Yaponlar esa jahon chempionatlari tarixidagi yubiley 1000-o‘yinni yorqin o‘tkazishga qaror qilishdi.
Yaponiya to‘rtinchi daqiqadayoq hisobni ochishdi. Daiti Kamada darvozaga orqa qilib turgan holda tovoni bilan aniq zarba yo‘lladi.
10-daqiqada hisob 2:0 ko‘rinishini olishi mumkin edi: Ueda yo‘llagan zarbadan keyin to‘p himoyachilardan birining oyog‘i orqali darvoza to‘riga yo‘l oldi, ammo tunisliklar posboni Aymen Damen so‘nggi lahzada jamoasini qutqarishga ulgurdi – golni avtomatik aniqlash tizimi to‘p darvoza chizig‘ini to‘liq kesib o‘tmagan deb topdi.
Lekin Ueda birinchi bo‘limning o‘zi baribir o‘z maqsadiga erishdi, ikkinchi bo‘lim boshlarida Dzyun Ito hisobni yirik ko‘rinishga keltirib, tunislik muxlislarning kambek uchun umidlarini so‘ndirdi, o‘yin oxirida Ayase Ueda dublni rasmiylashtirib, yakuniy hisobni o‘rnatdi (4:0).
Turklar uyalmoqda
Bir kun oldingi o‘yinlar doirasida Turkiya milliy jamoasi Paragvayga yutqazib qo‘ygandi (0:1) va pley-offga chiqish imkoniyatini yo‘qotgandi. Holbuki turnir oldidan ushbu jamoa D guruhi favoritlaridan biri sifatida ko‘rilayotgandi. Endi futbolchilar muxlislardan uzr so‘ramoqda.
«Butun xalqimizdan uzr so‘rayman. Jamoamiz yosh. Oldinda hali turnirlar ko‘p. Ehtimol, bu mening so‘nggi turnirimdir, lekin yosh o‘yinchilarimizni qo‘llab-quvvatlashingizni so‘rayman», – degan TRT Spor nashriga «Inter» yarimhimoyachisi Hoqon Chalxono‘g‘li.
Arda Guler ham shu ohangda bayonot berdi.
«Biz qattiq uyatdamiz. Barchamiz top-klublarda o‘ynaymiz va bu turnirda ancha yaxshiroq qatnashishimiz kerak edi. Birorta ham gol ura olmaslikni qabul qilib bo‘lmaydi», – deydi «Real» futbolchisi.
Jo Hart to‘pdan qanday foydalanish kerakligini aytdi
Angliya milliy jamoasining sobiq darvozaboni Jo Hart 2026 yilgi jahon chempionatida foydalanilayotgan «Trionda» nomli to‘p yuzasidan kuzatuvlari natijalari bilan bo‘lishdi. Uning fikricha, 2010 yilgi «Jabulani» to‘plari bilan bo‘lgani kabi, bu to‘p bilan ham olis masofadan zarba berilganida darvozabonlar uchun reaksiya ko‘rsatish juda qiyin bo‘ladi.
«Trionda» chindan ham odatiy modellardan farq qiladi: u atigi to‘rtta paneldan tayyorlangan. Bundan tashqari, to‘p ichiga ma’lumotlarni VAR tizimiga uzatuvchi datchiklar o‘rnatilgan. Bularning barchasi, britaniyalik sobiq futbolchi fikricha, aerodinamik xususiyatlarga kuchli ta’sir qiladi.
BBC efirida Hart Xorvatiyaning Angliya darvozasiga urgan birinchi goli bilan bog‘liq epizodni, shuningdek, Lionel Messining Jazoirga urgan gollaridan birini tahlil qilib, darvozabonlar to‘p tezligi va trayektoriyasini hisoblashda xato qilishmoqda, degan xulosaga keldi. Joning shunga ishonchi komil: bu turnirning borishiga jiddiy ta’sir ko‘rsatishi mumkin. Futbolchilar to‘pning bunday xususiyatini bilgan holda, masofadan zarba berishni ko‘paytiradi.
Nevesh va Ronalduning qallig‘i o‘rtasidagi mojaro
Portugaliyaning Kongo DR bilan o‘yindagi muvaffaqiyatsiz natijasidan (1:1) keyin ijtimoiy tarmoqlarda jamoa yarimhimoyachisi Joau Neveshning sevgilisi Madalen Aragaoga taalluqligi ko‘rsatilgan feyk yozishma virusdek tarqaldi. Unda ijtimoiy tarmoq foydalanuvchilaridan biri go‘yoki uning posti ostida shunday yozgani ko‘rsatilgan: «Boyfrending – ahmoq. Unga to‘pni GOAT (barcha zamonlarning eng kuchli futbolchisi ma’nosida) Krishtianu Ronalduga uzatish kerakligini ayt». Bunga javoban Aragao go‘yoki shunday yozgan: «O‘z GOAT’inga faoliyatini yakunlash kerakligini ayt. U juda xudbin».
OAVning aniqlashicha, aslida bunday yozishma bo‘lib o‘tmagan, bu skrinshot fotoshop yoki sun’iy intellekt orqali yasalgan. Ammo bir qancha yirik nashrlar bu skrinshotni tarqatishdi. Ushbu post mashhur Record Mexico akkauntida ham paydo bo‘lgan va uni Ronalduning qallig‘i Jorjina Rodriges ko‘rib qolgan. U post ostida shunday fikr qoldirgan: «Vau! Yangi avlod ajoyib!»
Shundan keyin Ronalduning minglab muxlislari Nevesh va uning sevgilisining instagramdagi sahifalariga hujum qilishgan. Boshqalar esa yolg‘on ma’lumotga ishonib, reaksiya bildirgan Jorjinaning ustidan kulishmoqda.
Bundan biroz oldin Krishtianuning singlisi Katya Aveyru portugallar jamoasi yarimhimoyachisi Brunu Fernandeshni passiv o‘ynashda ayblagandi va bu ijtimoiy tarmoqda jamoaga nisbatan salbiy fonni kuchaytirdi. Umuman olganda, 23 iyun kuni O‘zbekistonga qarshi o‘ynaydigan Portugaliya milliy jamoasi atrofidagi muhit notinch bo‘lib qolmoqda.
21-22 iyun kungi o‘yinlar
21 iyun kuni kechqurun va 22 iyunga o‘tar kechasi JCh guruh bosqichi 2-turi doirasida yana 4 ta uchrashuv bo‘lib o‘tadi:
21.00. H guruhi. Ispaniya — Saudiya Arabistoni
00.00. G guruhi. Belgiya — Eron
03.00. H guruhi. Urugvay — Kabo Verde
06.00. G guruhi. Yangi Zelandiya — Misr
Portugaliya bilan o‘yin 23 iyun kuni Toshkent vaqti bilan soat 22:00 da boshlanadi.
Futbol bo‘yicha AQSh, Kanada va Meksikada bo‘lib o‘tayotgan jahon chempionatining 2-turidan o‘rin olgan Portugaliya va O‘zbekiston milliy jamoalari o‘rtasidagi uchrashuv rasmiylari ma’lum bo‘ldi.
Mazkur bellashuvni marokashlik FIFA hakami Jalol Jayed boshqarib boradi. Unga qanotlarda hamyurtlari Zakariya Brinsi va Mustafo Akarkad yordam beradi.
Janubiy Afrika Respublikasi vakillari Abongayl Tom hamda Zaxele Sivela uchrashuvning to‘rtinchi va beshinchi rasmiy hakamlari sifatida faoliyat olib boradi.
O‘zbekiston milliy jamoasining Portugaliyaga qarshi bahsi 23 iyun kuni Toshkent vaqti bilan soat 22:00 da boshlanadi.
Musobaqaning 1-turida O‘zbekiston milliy jamoasi Kolumbiyaga qarshi maydonga tushib, 1:3 hisobida mag‘lub bo‘lgandi.
Fayzullayev shuningdek, XXI asrdagi jahon chempionatlarida boshi bilan gol urgan eng past bo‘yli futbolchi sifatida qayd etilib, urugvaylik Jorjian de Arraskaetaga tegishli rekordni yangiladi.
Foto: O‘zbekiston futbol assotsiatsiyasi
O‘zbekiston milliy jamoasi yarimhimoyachisi Abbosbek Fayzullayev 2026 yilgi jahon chempionatining birinchi turidagi eng tezkor futbolchi deb topildi.
SofaScore platformasi ma’lumotlariga ko‘ra, 22 yoshli futbolchi Kolumbiyaga qarshi o‘yin davomida soatiga 36 kilometr tezlikka erishgan. Bu natija birinchi turda maydonga tushgan barcha o‘yinchilar orasida eng yuqori ko‘rsatkich bo‘ldi.
Fayzullayevdan keyingi o‘rinni xorvatiyalik Yosip Stanishich egallagan bo‘lib, uning maksimal tezligi soatiga 35,9 kilometrni tashkil etgan. Kot d’Ivuar vakili Vilfrid Singo esa 35,8 km/soat natija bilan uchinchi o‘rinni egallagan.
Abbosbek Fayzullayev O‘zbekiston milliy jamoasining mundialdagi ilk goli muallifiga aylandi va shuningdek, XXI asrdagi jahon chempionatlarida boshi bilan gol urgan eng past bo‘yli futbolchi sifatida ham qayd etildi.
Opta statistik platformasi xabariga ko‘ra, bo‘yi 167 santimetr bo‘lgan Fayzullayev urugvaylik Jorjian de Arraskaetaga tegishli rekordni yangiladi. Bo‘yi 173 santimetr bo‘lgan Arraskaeta JCh-2022da Gana darvozasiga bosh bilan gol urgandi.
O‘zbekistonda qurilish ishlari hajmi 35 yilda 12 barobar oshdi
Baliq yog’i foydasiz: tadqiqotchilar shunday xulosaga kelishdi
«Endigi vazifa erishilgan kelishuvlarni real loyihalarga aylantirish»
-
Jamiyat3 days agoAbdulla Qodiriy ko‘chasida haydovchilar uchun yangi qayrilish joyi tashkil etildi
-
Iqtisodiyot3 days agoUch karra yer solig‘ining bekor qilinishi: pullar qanday qaytariladi?
-
Iqtisodiyot4 days ago
Toshkentda YIBning mintaqaviy vakolatxonasi ochildi
-
Siyosat4 days ago
O‘zbekistonda AQSh bilan yirik investitsiya loyihalari amaliy bosqichga o‘tadi
-
Dunyodan1 day agoEron Hormuz boʻgʻozi yopilganini eʼlon qildi
-
Dunyodan4 days agoEron yadro quroliga ega boʻlmaslikka rozi: Prezident Tramp
-
Siyosat4 days ago
O‘zbekiston va Albaniya birinchi xonimlari uchrashdi
-
Sport4 days agoJCh-26. O‘zbekiston mag‘lubiyat bilan boshladi