Andijonda o‘z xizmat vakolatidan foydalanib, davlatga qarashli yerdan mo‘may daromad olishga uringan mansabdorlar fosh etildi.

Farg‘ona vodiysi magistral kanallar boshqarmasi 2-Shahrixon bo‘limi 3-gidrouchastkasi boshlig‘i chorvachilik qilmoqchi bo‘lgan kishiga Katta Farg‘ona kanali himoya hududidagi 30 sotix yerni olib bermoqchi bo‘ldi. U yer maydonini ijara asosida foydalanish uchun hujjatlarni mansabdor tanishlari orqali to‘g‘rilab berishni va’da qilib, evaziga 40,5 ming dollar so‘ragan.

U aytilgan pulning 20 ming dollarini olayotgan vaqtida ashyoviy dalillar bilan ushlangan.

Mazkur noqonuniy ishga Farg‘ona vodiysi magistral kanallardan foydalanish boshqarmasi bo‘lim boshlig‘i ham aloqadorligi aniqlangan. Tezkor tadbir davomida u 20 ming dollardan 3 ming dollarni olgan vaqtida qo‘lga tushgan.

Bundan tashqari, ushbu yer maydonidan ijara asosida foydalanib kelayotgan Farg‘ona vodiysi magistral kanallardan foydalanish boshqarmasi 2-Shahrixon bo‘limi 3-gidrouchastkasi xodimi yerni berish uchun 19 ming AQSh dollari talab qilganligi holati ham tegishli tartibda rasmiylashtirildi.

Keyingi holatda esa Oltinko‘l tumanidagi ta’lim muassasasi direktori 10 ming dollar pora bilan ushlandi. Ma’lumotga ko‘ra, xususiy avtomaktab auksion orqali ushbu ta’lim muassasasining 1,1 gektar yerini yutib olgan. Direktor esa ikki o‘rtadagi kelishuv shartnomasini tasdiqlab berish uchun 15 ming dollar talab qilib, shundan 10 mingini olayotganda qo‘lga tushgan.

Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda, deyiladi xabarda.

Source link

Saudiya Arabistoni podshohi mehmonlari – turli davlatlardan chaqirilgan hojilar, jumladan o‘zbekistonlik hojilar ham Muqaddas Ka’ba ustiga yopiladigan yopinchiq – kisva (yoki Ka’bapo‘sh)ning tayyorlanish jarayonlari bilan tanishtirildi.

Ka’bapo‘sh Baytullohga ko‘rsatiladigan e’tiborning alohida ko‘rinishlaridan biri sanaladi.

Ka’ba yopinchig‘ining balandligi 14 metrga yetadi. Uning yuqori qismida eni 95 sm, uzunligi 47 m bo‘lgan matoda Qur’on oyatlari yozilgan. Mato 16 qismga ajratilgan. Ularning har biri turli islomiy naqshlari bilan bezatilgan.

U matoning quyi qismi esa Qur’on oyatlari bilan to‘ldirilgan. Oyatlar orasidagi bo‘sh joylarga esa “Ya Hayy” (Ey, Tirik zot!), “Ya Qayyum” (Ey, Barcha joyda mavjud zot), “Ya Rahim” (Ey Mehribon zot), “Ya Rahmon” (Ey Rahmli zot), “Al-hamdulillah ul-Rabbiyl alamiyn” (Butun olamlarning Egasi Allohga hamd-sanolar bo‘lsin) kalimalari tushirilgan.

Makka shahrida Ka’ba yopinchig‘i – kisvaning ko‘rgazmasini tashkil qilish an’anaga aylangan. Unda kisvani tayyorlashda ishlatiladigan uskunalar, mato va ipak mahsulotlari namoyish etiladi.

Ka’ba yopinchig‘ini tayyorlash uchun Saudiya Arabistoni hukumati 1927 yilda alohida ustaxona tashkil qilgan. Ustaxonada 240 hunarmand va texnik mutaxassislar mehnat qiladi. Hozirgi kunga kelib kisva tayyorlashga 17 million saudiya riyoli (taxminan 4,5 million dollar) sarflanadi.

Kisvaning oltin iplar bilan naqshlar solib tikiladigan matosining o‘ziga 450 kg.dan ziyod ipak ishlatiladi. Har yili ikkita kisva tayyorlanadi. Biri Ka’baning ustiga yopilsa, ikkinchisi, har ehtimolga qarshi saqlab qo‘yiladi.

Source link

O‘zbekistonda ilk bor masofadan robot jarrohlik amaliyoti muvaffaqiyatli bajarildi.

Ushbu murakkab va yuqori texnologiyali operatsiyani akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazining malakali mutaxassisi Abdurashid Abdukarimov Xitoy davlatidan turib amalga oshirdi.

Robot jarrohlik tizimi shifokorga eng nozik harakatlarni ham yuqori aniqlikda bajarishga ko‘maklashadi. Bu esa bemorning kamroq jarohat olishi va qisqa muddatda tiklanishini ta’minlaydi.

Source link

O‘zgidromet ma’lumotlariga ko‘ra, bugun kunduzi ba’zi joylarda yomg‘ir yog‘adi, ayrim joylarda kuchli bo‘ladi, momaqaldiroq kuzatilishi mumkin. Qoraqalpog‘iston Respublikasi, Xorazm viloyatida yog‘ingarchilik kutilmaydi. Shamol 7-12 m/s tezlikda esadi, ba’zi joylarda 13-18 m/s gacha kuchayadi, ayrim joylarda chang-to‘zonlar bilan kuzatilishi mumkin. Harorat 20-25° bo‘ladi.
 
Toshkentda vaqti-vaqti bilan yomg‘ir yog‘adi, momaqaldiroq bo‘lishi mumkin. Shamol 3-8 m/s tezlikda esadi, 10-12 m/s gacha kuchayishi mumkin. Harorat 22-24° bo‘ladi.
 
Tog‘ oldi va tog‘li hududlarda yomg‘ir yog‘adi, ba’zi joylarda kuchli bo‘ladi, momaqaldiroq kuzatilishi mumkin. Ayrim joylarda do‘l yog‘ishi mumkin. Sel-suv toshqin hodisalari yuzaga kelishi mumkin. Shamol 7-12 m/s tezlikda esadi, ba’zi joylarda 15-20 m/s gacha kuchayishi mumkin. Harorat 13-18° bo‘ladi.

Source link

Muqaddam sudlangan narkosavdogarlar ozodlikdan mahrum etildi. 

Jumladan, Toshkent viloyatining Bekobod tumanida yashovchi, 1999-y.t., muqaddam Jinoyat Kodeksining 112-moddasi (o‘ldirish yoki zo‘rlik ishlatish bilan qo‘rqitish) va 140-moddasi (haqorat qilish) bilan sudlangan ayol 2025 yilning iyul oyida qo‘shni respublikaga borib, narkosavdogardan 1 kg «gashish» moddasini 6 ming AQSh dollariga sotib olish va uni mamlakatimiz hududidagi tegishli manzilga yetkazib berish bo‘yicha kelishuvga erishgan.

Oradan ma’lum bir vaqt o‘tib, ayol Whatsapp messenjeri orqali giyohvandlik vositasi qoldirib ketilgan xufiya joy manzilini olgan.

So‘ngra muqaddam giyohvandlik vositalari bilan bog‘liq jinoyatlari uchun sudlangan ikki tanishi bilan Bekobod shahri hududidagi dala maydoniga yo‘l olgan.

Biroq, ular ajal og‘usini xufiya joydan olgan vaqtlarida Davlat xavfsizlik xizmati va Bojxona organlari xodimlari tomonidan ashyoviy dalillar bilan ushlangan.

Ekspertiza xulosasiga ko‘ra, giyohvandlik vositasining sof og‘irligi 985 grammni tashkil etgan. 

Tergov jarayonida ayol o‘zining 1993-y.t. jinoiy sherigi bilan birgalikda Bekobod shahridan ijaraga xonadon olib, u yerda giyohvandlik vositalarini sotish hamda iste’mol qilish uchun «bangixona» tashkil etganliklari ham fosh bo‘ldi.

Jinoyat ishlari bo‘yicha Bekobod shahar sudining hukmiga ko‘ra, mazkur shaxslar Jinoyat Kodeksining 246 va 273-moddalarida nazarda tutilgan jinoyatlarni sodir etganlikda aybli deb topilib, ularga nisbatan 8 yil 3 oydan 10 yil 6 oy muddatgacha ozodlikdan mahrum qilish jazosi tayinlandi.

Source link