Jamiyat
Qurbon hayiti arafasida Toshkentdan qo‘shimcha 55 ta avtobus reysi yo‘lga qo‘yildi
Qurbon hayiti munosabati bilan Toshkent avtovokzalidan viloyatlarga qatnovchi avtobuslar soni oshirildi. YHXX ma’lumotiga ko‘ra, bayram arafasida yo‘lovchilar oqimi keskin ko‘paygani sabab qo‘shimcha 55 ta reys tashkil etildi.
Ma’lum qilinishicha, ayni vaqtda Toshkentdan Sirdaryo orqali voha viloyatlariga qatnaydigan 65 ta doimiy yo‘nalish faoliyat yuritmoqda. Qo‘shimcha reyslar esa bayram kunlarida yuzaga kelgan yuqori talabni qoplashga qaratilgan.
Shuningdek, mas’ullar fuqarolarga chiptalarni uydan chiqmagan holda telefon yoki onlayn platformalar orqali tekshirish va xarid qilish mumkinligini eslatdi. Yo‘lovchilar soniga qarab qo‘shimcha reyslar yana ko‘paytirilishi ham mumkin.
Bayram kunlari xalqaro ahamiyatdagi avtomobil yo‘llarida YPX xodimlari kuchaytirilgan tartibda xizmat olib boradi. Haydovchilarga yo‘l haqini sun’iy oshirmaslik, safar oldidan dam olish va harakat xavfsizligi qoidalariga qat’iy amal qilish bo‘yicha ogohlantirishlar berilmoqda.
Eslatib o‘tamiz, 2026-yilda Qurbon hayitining birinchi kuni 27-may — chorshanbaga to‘g‘ri keladi.