Sport
Mbappe – mojaro markazida. U klasikoga tayyorlanish o‘rniga ta’tilga ketdi va jamoadoshlarini g‘azablantirdi
Uni muxlislar ham tanqid qilishmoqda. «Real» rahbariyatidan Mbappeni ketkazish talab qilingan petitsiyani 14 milliondan ortiq kishi imzolagan.
«Real» hujumchisi Kilian Mbappe klasiko arafasida Italiyaga ketib qolgani uchun keskin tanqidga uchradi, deb yozmoqda Ispaniya va Fransiyadagi nashrlar. Ushbu forvard jarohatlangan va bo‘sh vaqtida ta’tilga yo‘l olgandi, ammo bu uni ta’na-dashnomlardan qutqara olmadi – jamoa bosh murabbiyi Alvaro Arbeloa uni himoya qilib chiqishiga to‘g‘ri keldi.
Bahslarga sabab bo‘lgan safar
Mbappe 24 aprel kuni «Betis»ga qarshi kechgan o‘yinda (1:1) tizza osti payini shikastlab olgandi. Klubdagilar 27 yoshli forvard qachon safga qaytishini ma’lum qilmagan. Ayrim ma’lumotlarga ko‘ra, u mavsum oxirigacha maydonga tusha olmasligi mumkin, boshqa manbalar esa unda «Barselona»ga qarshi 10 may kuni o‘tkaziladigan klasikoda o‘ynash imkoniyati borligini aytishgan.
Ammo fransuz futbolchisi, aftidan, jarohati haqida unchalik jiddiy qayg‘urmayapti – u ko‘nglini yozishga qaror qildi va sevgilisi, aktrisa Ester Ekspozito bilan Kalyariga yo‘l oldi.
Marca va L’Equipe nashrlari ma’lumotiga ko‘ra, so‘nggi vaqtlarda fransiyalik yulduzning ayrim jamoadoshlari, jumladan, Vinisius Junior bilan munosabatlari yomonlashgan. Va klub uchun qiyin pallada Italiyaga ketib qolishi uning kiyim almashtirish xonasidagi holatini yanada yomonlashtirgan. «Real»dagilar uning klasikogacha jarohatidan tuzalish imkoniyati bo‘lganidan kelib chiqib, tiklanish vaqtida bunday yo‘l tutishni yaxshi g‘oya deb hisoblashmayapti.
Forvardni fanatlar ham tanqid qilishmoqda. Italiyaga sayohat haqidagi yangiliklar fonida madridliklar klubi himoyachisi Fran Garsiyaning fransuz jamoadoshi haqida aytgan so‘zlari yana keng aylanmoqda.
«Bilasizki, bugun bitta futbolchi mashq qilmasligi, to‘p ortidan yugurmasligi mumkin. Ammo bir vaqtning o‘zida bir necha o‘yinchi bu bilan shug‘ullanmasa, bu chempionatda, Chempionlar ligasida g‘alaba qozonish imkoniyatiga jiddiy ta’sir ko‘rsatadi. O‘ylaymanki, agar Kilian ter to‘kib ishlasa, u jamoaning qolgan a’zolariga katta yordam bergan bo‘ladi», – degandi Garsiya yanvar oyidayoq El Camino de Mario kanaliga.
Himoyachi intervyusida Mbappe haqida boshqa ko‘p iliq so‘zlar aytgan bo‘lsa-da, muxlislar tushunarli sababga ko‘ra aynan shu iqtibosni eslab qolgandi. Hozir esa bu gaplar yana dolzarblashdi va ijtimoiy tarmoqlarda faol tarqalmoqda.
Fanatlar «Real» rahbariyatidan Mbappedan qutulish talab qilingna petitsiya ochishgan. Ikki kun ichida uni allaqachon 14 milliondan ortiq kishi imzolagan.
Shu bilan birga, jamoa ixtiyoriga qaytganidan keyin forvard o‘ziga dam olish kunlari olmagan. AS xabariga ko‘ra, u boshqa futbolchilarga dam berilgan vaqtda fizioterapevt va tiklanish bo‘yicha mutaxassislar bilan ishlash uchun «Real» bazasiga kelgan.
Yaqin vaqtlar ichida Kilian MRT tekshiruvidan o‘tadi va shundan keyin uning «Barselona»ga qarshi o‘yindagi ishtirokiga oydinlik kiritiladi.
Bu vaqtda esa futbolchining tarafdorlar uning «Real»da qolishi haqida petitsiya boshlagan va uni ham 10 milliondan ortiq kishi imzolagan.
«Sadoqatiga shubha qilmayman»
«Real» bosh murabbiyi Alvaro Arbeloa yulduzli futbolchisiga qaratilgan tanqidlarga munosabat bildirdi.
«Mbappe boshqa har qanday futbolchi kabi bo‘sh vaqtida xohlagan ishini qilishi mumkin. Men bunga aralasholmayman. Vinisiusning sadoqati unikidan kuchliroqmi? Taqqoslab o‘tirmayman. Menimcha, bizga hamma kerak. Men murabbiylik kursisini egallaganimdan beri doim shuni aytaman: har qanday o‘yinda g‘alaba qozonish uchun har bir futbolchining fidoyiligi kerak.
«Real» smokingda maydonga tushadigan o‘yinchilar bilan emas, balki ter va loyga botgan futbolkalarda o‘yinni yakunlaydigan o‘yinchilar bilan yaratilgan. Bu ajoyib klubda ekanimiz hammamizning omadimiz kelgani. «Real»dan muhimroq futbolchi yo‘q. Lekin men o‘z shogirdlarimning sadoqatiga shubha qilmayman», – deya Arbeloaning so‘zlarini keltirgan Diario AS.
Ispaniyalik mutaxassis Mbappening «Barselona» bilan o‘yindagi ishtiroki hozircha so‘roq ostida ekanini qo‘shimcha qilgan.
«Kilian o‘ynaydimi? Ko‘ramiz, u o‘zini qanday his qilarkan. O‘tgan haftadagi testlar tiklanish jarayoni ko‘proq vaqtni olishini ko‘rsatgandi», – degan mutaxassis.
Mbappe jarohatini davolayotgan mahalda «Real» natijalari uchun butun mas’uliyat yuki Vinisiusning zimmasiga tushmoqda. Va braziliyalik vinger ham uyaltirmayapti – u o‘tgan turda «Espanyol» bilan o‘yinda dubl muallifi bo‘ldi (2:0) va murabbiydan katta maqtov eshitdi. Arbeloa o‘yindan keyin uning jamoaga ta’siri ortib borayotganini e’tirof etdi.
Shunday pallada yana bir qiziqarli yangilik paydo bo‘ldi: jurnalist Fransua Gallardoning ma’lumotiga ko‘ra, Kilianning onasi va agenti hisoblangan Fayza Lamari go‘yoki Madrid klubi prezidenti Florentino Peresga ultimatum qo‘ygan va yozda Vinisiusni sotib yuborishni talab qilgan.
Chempionat yakuniga to‘rt tur qolganida «Real» turnir jadvalida 77 ochko bilan ikkinchi o‘rinda joylashgan va «Barselona»dan 11 ochkoga ortda qolmoqda. Chempionlik masalasi klasikoda uzil-kesil hal bo‘lishi mumkin.
O‘zbekiston tezkor gol bilan hisobni ochgandi, ammo ikkinchi bo‘limda Husanov penaltiga sababchi bo‘ldi va hisob tenglashdi. Qolgan daqiqalarda Kannavaro shogirdlari yana ikkita gol o‘tkazib, mundial bilan xayrlashdi.
Kongoliklar endi Angliya bilan o‘ynaydi
Kongo DR – O‘zbekiston 3:1
Gollar: Shomurodov, 10 (0:1). Vissa, 68 – penalti (1:1). Mayyele, 78 (2:1). Vissa, 90+1 (3:1)
Kongo DR: Mpasi-Nzau, Tuanzebe, Mbemba, Masuaku (Kayyembe, 83), Van-Bissaka, Mutussami (Mukau, 72), Sadiki, Sipenga (Bongonda, 72), Mbuku (Elia, 72), Bakambu (Mayyele, 51), Vissa
O‘zbekiston: Ne’matov, Husanov, O‘rozov (Iskandarov, 82), Ashurmatov, Mozgovoy (Sergeyev, 82), Shukurov (G‘aniyev, 59), Nasrullayev, Alijonov, Hamdamov (Hamrobekov, 59), Fayzullayev (O‘runov, 73), Shomurodov
Ogohlantirishlar: Sadiki, 21. Mbuku, 45. Mutussami, 62 – Husanov, 43. Nasrullayev, 48
Jahon chempionati guruh bosqichidagi yangi formatni ko‘pchilik tanqid qilgandi, lekin uning ijobiy jihatlari ham bor. Shulardan biri – so‘nggi turda turnir motivatsiyasiga ega bo‘lmagan jamoalar kam bo‘ladi. Qatorasiga ikki o‘yinda jami 8 gol o‘tkazib yuborgan O‘zbekiston ham pley-offga chiqish uchun imkoniyat saqlab qolgandi.
Bu imkoniyat juda kichik edi – Kongo DR bilan o‘yindan oldin Opta Fabio Kannavaro shogirdlarining 1/16 finalga chiqish imkoniyatini 0,1 foizga baholayotgandi. O‘zbekistonliklar uchinchi o‘rin egalari orasida sakkizlikka kirish uchun raqibni yetti to‘p farqi bilan mag‘lub etishi va gollar nisbatini yaxshilashi talab etilardi. Shu bilan birga, O‘zbekistonning bu o‘yindagi raqibi ishonchli himoyasi bilan maqtana oladigan jamoa edi – kongoliklar JCh-2026 saralash turnirida 12 uchrashuvda jami 7 gol o‘tkazgandi.
Kannavaro Portugaliyadan uchralgan 0:5 hisobidagi mag‘lubiyatdan keyin yana rotatsiyaga qo‘l urdi, ammo jamoaning asosiy yulduzlari – Husanov, Shomurodov, Fayzullayev – boshlang‘ich tarkibdagi o‘rnini saqlab qoldi. Afrikaliklar ustozi Sebastiyan Desabr ham jiddiy o‘zgarish amala oshirdi – kongoliklar uch markaziy himoyachidan iborat sxemadan voz kechib, 4-4-2 ga o‘tdi. Fransuz murabbiyining qarorini tushunish mumkin edi – Kongo DR pley-offga chiqishi uchun g‘alaba qozonishi talab etilardi.
Bu o‘yinda ikki jamoaga ham g‘alaba kerakligi betaraf muxlislar uchun hujumkor o‘yin va’da qilayotgandi. Amalda ham muxlislar ilk daqiqadayoq gol ko‘rishdi. O‘yinning 30-soniyasidayoq Shomurodov Mpasi-Nzau qo‘riqlayotgan darvozani ishg‘ol etdi, ammo gol ofsayd tufayli bekor qilindi.
O‘zbekiston bu bilan to‘xtamadi va 10-daqiqada yana gol urdi: Mozgovoy to‘pni jarima maydoniga yetkazdi, u yerda Fayzullayev to‘pni teginmay o‘tkazib yubordi va uning bu harakati himoyachilarni chalg‘itdi, Shomurodov esa o‘tkir burchak ostida turganiga qaramay, nozik uslubda zarba berdi va darvozani ishg‘ol etdi.
Ko‘p o‘tmay afrikaliklar javob qaytarishdi: Mbuku jarima maydoni yaqinida to‘pni qabul qilib, chap oyog‘ida to‘qqizlik tomon qaytarib bo‘lmas zarba yo‘lladi. Ammo vaziyatga VAR aralashdi va hujum boshlanayotganda fol ishlatilgani ma’lum bo‘lib, ushbu gol bekor qilindi.
Birinchi bo‘lim o‘rtalarida suv ichish uchun qilingan tanaffusdan keyin kongoliklar o‘ziga keldi va ketma-ket hujumlar uyushtira boshladi, shunday hujumlardan birida Vissa jarima maydoni markazidan zarba berish imkoniyatiga ega bo‘ldi, faqat zarbaga biroz aniqlik yetishmadi.
Bo‘lim oxirida esa o‘zbekistonliklar ikkinchi golni urishga yaqin keldi. 38-daqiqada Hamdamov qanotdan uzatma berdi, to‘p rikoshet bo‘lib, darvozaga kirib ketishiga bir baxya qolgandi, ammo Mpasi qiyinchilik bilan to‘pni qaytarib qoldi. Bo‘limga qo‘shib berilgan daqiqalarda Fayzullayevning jarima zarbasidan keyin to‘p to‘sin yuqorisidan o‘tib ketdi.
Tanaffusdan keyin ko‘p o‘tmay Desabr forvardlardan birini almashtirdi va Bakambu o‘rnini Mayyele egalladi. Lekin ikkinchi bo‘limdagi ilk golli vaziyatni yana Shomurodov yuzaga keldi: ammo bu safar uning zarbasidan keyin to‘p darvoza to‘riga tashqi tomondan tegdi.
Afrikaliklar oldinga tashlanishdi va golga yaqinlasha boshlashdi – avvaliga Ne’matov Mbukuning murakkab zarbasini qaytardi, ammo ikkinchi bo‘lim o‘rtalarida Vissa jarima maydoni ichida Husanovni o‘ziga fol ishlatishga majbur qildi. «Nyukasl» hujumchisi 11 metrdan ideal zarba berdi va hisobni tenglashtirdi.
Suv ichish uchun qilingan navbatdagi tanaffus vaqtida Desabr uchtalik almashtirish qildi – Mukau, Bongonda va Elia kabi yangi kuchlar maydonga chiqib keldi. Ulardan uchinchisi o‘yin taqdirini hal qilgan uzatma muallifiga aylandi, u himoyachilar ortiga tashlab bergan to‘pga birinchi bo‘lib yetib borgan Mayyele to‘pni darvozabon ustidan oshirib, to‘rga joyladi.
O‘yinga qo‘shib berilgan daqiqalarda Elia yana bir muhim uzatma amalga oshirdi, maydon tashqarisiga chiqib ketayotgan to‘pni quvib yetgan (bu vaziyatda barcha, jumladan, himoyachi Alijonov ham shunday o‘ylagan va to‘pni ham, raqibni ham ta’qib qilmaslikni ma’qul ko‘rgandi) futbolchi bu safar Vissaga assistentlik qildi.
3:1 – O‘zbekiston uchinchi o‘yinda ham mag‘lubiyatga uchrab, uyga qaytadigan bo‘ldi. Iroda ko‘rsatgan kongoliklar esa endi pley-offda Angliyaga qarshi kechadigan o‘yinga tayyorlanishni boshlashi mumkin.
Italiyalik mutaxassis futbolchilarni birinchi bo‘lim uchun maqtagan va ular bilan faxrlanishini bildirgan. Jamoa sardori Eldor Shomurodov esa hisobni saqlashga urinish – murabbiyning ko‘rsatmasi bo‘lmagani, odatda futbolchilarning o‘zi ham bunday holatlarda hisobdan kelib chiqib o‘ynashi, raqib ham bunga majbur qilganini aytib o‘tdi.
O‘zbekiston milliy jamoasi bosh murabbiyi Fabio Kannavaro Kongo DR bilan o‘yindan keyingi matbuot anjumanida ishtirok etdi.
O‘zbekiston jahon chempionati guruh bosqichi 3-turi doirasida kechgan ushbu o‘yinda 1:3 hisobida mag‘lubiyatga uchradi. Kannavaro shogirdlari o‘yinning 10-daqiqasidayoq Eldor Shomurodov urgan gol evaziga hisobda oldinga chiqib olgandi, ammo ikkinchi bo‘limda himoyada yo‘l qo‘yilgan xatolar tufayli uchta gol o‘tkazib yuborildi – 1:3.
Italiyalik mutaxassis futbolchilar o‘yindan oldin to‘psiz o‘ynash qiyin bo‘lishini tushunib turganini aytib o‘tdi.
«Birinchi bo‘limda juda ko‘p energiya sarfladik. Bugungacha bizning jismoniy samaradorligimiz yaxshi edi, bugun ham jismoniy tomondan yaxshi harakatlandik. Raqibimiz ham bu tomonlama yaxshi shakllangan jamoa edi. Biz o‘yindan oldin to‘pni nazorat qilmasak qiyin bo‘lishini bilardik. Ikkinchi bo‘limda xatolar qildik va shu sababli gollar o‘tkazib yubordik», – deya uning so‘zlarini keltirmoqda O‘FA matbuot xizmati.
Kannavaro jamoa birinchi bo‘limni juda yaxshi boshlagani va ko‘plab imkoniyatlarga ega bo‘lgani, ikkinchi bo‘limda esa xatolarga yo‘l qo‘yilganini ta’kidlagan.
«Bu musobaqa men uchun ham, futbolchilar uchun ham katta tajriba bo‘ldi. O‘ylaymanki bu kelajakda bizga katta motivatsiya beradi.
Albatta, futbolchilar bilan juda ko‘p muloqot qildim. Guruhimizda ham kuchli jamoalarga qarshi o‘ynashimiz kerakligini bilardik. Lekin ushbu natijadan afsusdamiz.
Ha, biz xatolar qildik. Biroq men futbolchilardan umuman shikoyat qilmoqchi emasman. Ular qo‘lidan kelgan hammasini qildi va men ulardan faxrlanaman», – degan italiyalik mutaxassis.
O‘yindan keyin jamoa hujumchisi va o‘yindagi yagona gol muallifi Eldor Shomurodov ham mikst zonada «O‘zbekiston 24» uchun intervyu bergan. U kichik hisobdagi ustunlikni ushlashga harakat qilish bosh murabbiyning ko‘rsatmasi bo‘lmaganini aytib o‘tgan.
«Fabio Kannavaro emas, bu ko‘proq psixologik tomonlama. Bu narsa futbolchilarning xayolida bo‘ldi, deb o‘ylayman. Chunki har doim g‘alaba qozonayotganingda, o‘sha hisobni ushlash uchun harakat qilasan. Shuning uchun buni ko‘proq psixologik omil deb o‘ylayman. Albatta, ikkinchi bo‘limda ham, birinchi bo‘limdagidek o‘ynashda davom etishimiz kerak edi.
Lekin shuni unutmaslik kerakki, Kongo ham jismoniy tomondan ancha kuchli jamoalardan biri. Ular buni oldingi o‘yinlarda ham ko‘rsatishgandi va bugun ularga g‘alaba kerak edi. Ko‘proq himoyalanishimizga ular ham majbur qildi deb o‘ylayman.
Agar shu yerda bo‘ladigan bo‘lsak, albatta darajamiz shu bo‘ladi. Agar undan ko‘prog‘iga loyiq bo‘lganimizda, albatta ko‘prog‘iga erishgan bo‘lardik.
Lekin eng asosiysi, qayerga ishlashimiz kerakligini, qayerga qarab ishlashimiz kerakligini jahon chempionati ko‘rsatib berdi va katta tajriba bo‘ldi. Futbolchilar ham borini berib o‘ynashdi hammasi.
Albatta, bu yerda oson o‘yinning o‘zi bo‘lmaydi. Kichik xatolar ham kechirilmaydi. O‘ylashimcha, tajriba yetishmasligi evaziga mana shu joyimizda qolib ketdik», – degan jamoa sardori.
Kongo DR bilan o‘yindan avval Atlanta shahridagi xiyobonda o‘zbek futbol ixlosmandlari hamda yurtdoshlarimiz ishtirokida milliy jamoani qo‘llab-quvvatlash uchun qator tadbirlar bo‘lib o‘tmoqda. Ularning ichida nafaqat o‘zbekistonliklar, balki qo‘shni mamlakatlardan ham mehmonlar bor. Biz allaqachon g‘olibmiz, strategik jihatdan yutdik, deydi O‘zbekistonning AQShdagi elchisi.
Jorjiya shtati, Atlanta shahrida joylashgan zamonaviy Mercedes-Benz stadionida AQSh vaqti bilan 27 iyun kechqurun, O‘zbekiston vaqti bilan esa 28 iyun tongda jahon chempionati doirasida o‘yin bo‘lib o‘tadi. Bu katta ehtimol bilan O‘zbekiston milliy jamoasining oxirgi o‘yini bo‘lishi mumkin. Lekin, futbolchilar va milliy jamoa g‘alabadan umidvor.
Atlantadagi Founders Green Park’da AQSh, Kanada, Meksikadagi o‘zbeklar, o‘zbek diasporasi vakillari, futbol ixlosmandlari va muxlislar ishtirokida o‘yin oldidan tadbirlar o‘tkazilmoqda. Unda o‘zbekona kuy-qo‘shiqlar yangradi, yurtdoshlarimiz raqsga tushdi, futbolchilarga omad tiladi.
Kun.uz tadbirga kelgan O‘zbekistonning AQShdagi favqulodda va muxtor elchisi – Furqat Sidiqov bilan suhbatlashdi. Biz g‘alaba qozondik, strategik jihatdan yutdik, deydi diplomat.
“Bu yerda faqatgina vatandoshlarimiz emas, Markaziy Osiyodan kelgan bizning qardosh qo‘shnilarimizning vakillari ham bor. O‘zingizga ma’lum, bu birinchi tadbir emas. Biz har bitta jamoamiz o‘ynagan shaharda mana shunaqa tadbirlarni qildik. Elchixona va boshqa vazirliklar bilan birgalikda. Nafaqat bizning vatandoshlar, diaspora vakillari, balki qo‘shni davlatlardan ham kelishdi. Bizning futbolimiz Markaziy Osiyoni birlashtirdi”, deydi Furqat Sidiqov.
Elchining qo‘shimcha qilishicha, Kongo bilan o‘yinda futbolchilarimiz g‘alaba qozonishi kerak. Lekin strategik jihatdan biz allaqachon yutdik, deya qo‘shimcha qiladi Sidiqov.
“Hozir Atlanta O‘zbekistonga aylandi. Qayerga qarasangiz o‘zbeklar. O‘zbekiston madhiyasi yangraganda va bayrog‘imiz stadionga chiqqanda millionlab odamlar ko‘rdi. Hozir O‘zbekistonga boraman degan odamlar , bilasizmi, elchixonaga murojaatlar kamida 3-4 martaga ko‘payib ketdi. Bu katta reklama”, deydi AQShdagi elchi.
Shuningdek, xiyobonda yig‘ilgan yurtdoshlarimiz ham Kongoga qarshi o‘yindan g‘alaba kutayotganliklarini bildirishdi.
O‘zbekiston milliy terma jamoasining 18 yoshli himoyachisi Behruz Karimov Jahon chempionatidagi o‘yini bilan nafaqat muxlislar, balki Yevropa futboli vakillarining ham e’tiborini tortmoqda.
BlueCo korporatsiyasi (Angliyaning «Chelsi» va Fransiyaning «Strasburg» klublari egasi) faoliyatini yorituvchi BlueCo Xtra sahifasi o‘z ijtimoiy tarmog‘ida Behruz Karimovni klublar rahbariyatiga tavsiya qildi.
«BlueCo Behruz Karimovni «Strasburg» yoki «Chelsi» uchun transfer qilishi kerak. U O‘zbekistonning katta iste’dodlaridan biri. Himoyada juda faol harakat qiladi va yuqori saviyadagi raqiblarni qanotda to‘xtata oladi», – deyiladi sahifada.
Behruz Karimov Kolumbiya va Portugaliyaga qarshi uchrashuvlarda asosiy tarkibda maydonga tushib, dunyo futboli yulduzlari Luis Dias va Nuno Mendeshga qarshi munosib harakat qildi.
Ayniqsa, Kolumbiya bilan bahsda uning uzoq masofadan yo‘llagan kuchli zarbasi ustunga tegib qaytgani ko‘pchilikning yodida qoldi.
Statistika ham yosh himoyachining o‘yinini tasdiqlaydi:
to‘pni raqibdan 15 marta olib qo‘ygan;
34 marta yakkakurashlarda ishtirok etgan;
6 ta muvaffaqiyatli dribling amalga oshirib, O‘zbekiston terma jamoasida bu ko‘rsatkich bo‘yicha eng yaxshi natijani qayd etgan.
Eslatib o‘tamiz, Behruz Karimov Toshkentdagi Respublika olimpiya va paralimpiya zaxiralari kolleji tarbiyalanuvchisi hisoblanadi. U turli yoshdagi O‘zbekiston terma jamoalarida o‘ynagan va 2025 yildan buyon «Surxon» klubi sharafini himoya qilib kelmoqda.
O‘zbekiston terma jamoasi Jahon chempionatida qiyin o‘yinlar o‘tkazayotgan bo‘lsa-da, Behruz Karimov kabi yosh futbolchilarning Yevropa klublari diqqatini tortgani o‘zbek futboli kelajagi uchun ijobiy signal sifatida baholanmoqda.
Ayni paytda BlueCo Xtra’ning bu bayonoti rasmiy transfer taklifi emas, balki klublarga qaratilgan tavsiya hisoblanadi. Ammo buning o‘zi ham Behruz Karimovning xalqaro maydondagi o‘yini e’tiborsiz qolmayotganini ko‘rsatadi.
G, H va I guruhlarida so‘nggi tur shiddatli uchrashuvlarga boy bo‘ldi.
Jahon chempionatida guruh bosqichi yakuniga yetib bormoqda. 26 iyun kuni kechqurun va 27 iyun kuni tongda G, H va I guruhlarida uchinchi tur o‘yinlari bo‘lib o‘tdi. Ispaniya Urugvay ustidan g‘alaba qozondi (1:0), Kabo-Verde Saudiya Arabistoni bilan durang o‘ynab (0:0), pley-offga chiqdi, Belgiya Yangi Zelandiyaga rahm qilmadi (5:1), Eron Misr bilan o‘yinda ochkolarni teng bo‘lib oldi (1:1) va boshqa o‘yinlarning natijalarini kutadigan bo‘ldi.
Maydon tashqarisida ham qiziqarli voqealar bo‘lib o‘tmoqda: Urugvay futbolchilari va bosh murabbiy Marselo Biyelsa o‘rtasida mojaro chiqqan, Shvetsiya vingeri Elanga esa turnir qoidalarini tushunmay, yaponlar bilan o‘yindan keyin yig‘lagan.
Urugvay mojaro bilan turnirni tark etdi
Urugvay – Ispaniya 0:1
Gol: Baena, 42 (0:1)
Urugvay: Muslera (Rochet, 46), Kaseres, Olivera, Sanabriya (Rodriges, 70), Varela, Ugarte (De la Krus, 45), Bentankur, Valverde (Vinyas, 57), Arauxo, Kanobbio, Nunes
Ispaniya: Simon, Lyaport, Kubarsi, Kukurelya, Liorente, Rodri, Pedri (Ruis, 60), Merino (Olmo, 60), Baena (Pino, 66), Yamal (Torres, 76), Oyyarsabal (Uilyams, 76)
Ogohlantirishlar: Sanabriya, 54. Varela, 58. De la Krus, 90– Baena, 46
Chetlatish: Kanobbio, 90
N guruhida so‘nggi tur oldidan barcha a’zolarda pley-offga chiqish imkoni saqlanib turgandi. Shu jumladan, Urugvayda ham – Biyelsa shogirdlari ikki turda 2 ochko jamg‘argan va turnirdagi ishtirokini davom ettirish uchun Ispaniyani yengish talab etilardi.
Bu oson vazifa emasdi, ammo birinchi bo‘limning katta qismida janubiy amerikaliklar kuchli raqibga munosib qarshilik ko‘rsatishdi va hisobni ochish uchun bir necha imkoniyatlarga ega bo‘lishdi. Ammo bo‘lim oxirlarida gol o‘tkazib yuborildi. Bu gol uchun aybni to‘liq Fernando Muslera o‘z zimmasiga olishi mumkin – 40 yoshli darvozabon u qadar kuchli bo‘lmagan va o‘ziga kelgan to‘pni o‘tkazib yubordi. Bu uning uchun chempionatda uchinchi marta qovun tushirishi bo‘ldi – Saudiya va Kabo-Verde bilan o‘yinlarda ham uning xatolari ikki golga sababchi bo‘lgandi.
Tanaffusda Biyelsa darvozabonni ham almashtirdi va uning o‘rniga Serxio Rochetni tushirdi – murabbiyning so‘zlariga ko‘ra, Musleraning o‘zi shuni so‘ragan.
Darvozadagi o‘zgarish urugvayliklarga yordam bermadi – jamoa harakat qildi, ammo hisobni tenglashtira olmadi. Ikkinchi bo‘lim boshlarida mojaroli holat yuzaga keldi, Biyelsa jamoa yetakchisi Federiko Valverdeni 57-daqiqadayoq almashtirib tashladi, u esa maydondan chiqayotganida futbolkasi bilan og‘zini yopgan holda murabbiyga qarata nimadir dedi – tabiiyki, bu minnatdorchilik so‘zlari emasdi.
O‘yindan keyin urugvayliklar ustozi siniqqan holatda edi: «Men iste’dodli futbolchilar guruhi bilan ishladim. Ammo ularning mashaqqatli mehnati, sa’y-harakatlari va sadoqatiga qaramay, men ularni nima uchun aynan shunday bo‘lganini tushuntirish zaruratidan xalos qila oladigan kuchga aylantira olmadim. Urugvay futbolida hech narsa qoldirmayapman, chunki murabbiy uch yil ishlagan mamlakatga qo‘shishi mumkin bo‘lgan har qanday hissa – agar muvaffaqiyatlar bo‘lmasa – dividend keltirmaydi», – dedi Biyelsa.
So‘nggi tur oldidan murabbiy va futbolchilar orasida kelishmovchilik yuzaga kelgani haqida xabar tarqalgandi. El Espectador Deportes ma’lumotiga ko‘ra, Valverde boshchiligidagi futbolchilarning bir guruhi murabbiy bilan o‘zaro uchrashuv o‘tkazishgan. Futbolchilar mashg‘ulotlar haddan tashqari og‘irligidan shikoyat qilishgan va bu jarohatlarga sabab bo‘lishi mumkinligini aytishgan, shuningdek, Ispaniya bilan o‘yin uchun taktik rejani tanqid qilishgan – futbolchilar ilk daqiqalardan kuchli pressing uyushtirish o‘rniga, chuqur himoyalanish va qarshi hujumlarga tayanishni ma’qul ko‘rishgan.
Shundan keyin Biyelsa butun jamoani yig‘gan va 50 daqiqalik nutq so‘zlab, futbolchilarning bunday e’tirozlari oldin ham murabbiyning ishiga zarar yetakazganini ta’kidlagan. Muloqot vaqtida jamoaning ayrim a’zolari namoyishkorona tarzda yig‘ilishni tark etishgan. Yakunda butun jamoa turnirni tark etdi.
Guruh bosqichini birorta gol o‘tkazmay yakunlagan Ispaniya esa keyingi bosqichda J guruhidan ikkinchi o‘rin bilan chiqadigan jamoaga (Avstriya yoki Jazoir) qarshi o‘ynaydi.
Kabo-Verde pley-offda
Kabo-Verde – Saudiya Arabistoni 0:0
Kabo-Verde: Vozinya, Diney Borjyes, Lopesh, Juan Paulu, Pina (Moreyra, 90+4), Lenini, Monteyru (L. Duarte, 71), D. Duarte, Semedu (Varela, 61), Mendesh da Grasa (Rodrigesh, 71), Livramento (Da Koshta, 61)
Saudiya Arabistoni: Al-Uvays, Al-Amriy, Al-Tumbukti (Lajamiy, 33), Al-Bushal (Al-Arbi, 82), Abdulhamid, N. Ad-Dovsariy, Al-Haybariy (Al-Juvayr, 46), S. Ad-Dovsariy (Abulshamat, 66), Mandash (Al-Hamdon, 66), Al-Buraykan, Kanno
Ogohlantirishlar: Pina, 9 – Abdulhamid, 4. N. Ad-Dovsariy, 67. Al-Buraykan, 90
Urugvayliklar ispanlar bilan o‘yinda javob golini urish uchun mashaqqat chekayotganida, parallel uchrashuvda turnirning asosiy sensatsiyasi ro‘y berdi. Jahon chempionatidagi debyutini o‘tkazayotgan Kabo-Verdedan so‘nggi turda Saudiya Arabistonidan hech bo‘lmaganda bir ochko olish talab etilardi – bunday holda jamoada pley-offga kamida uchinchi o‘rin egalari orasida sakkizlikka kirish orqali imkoniyat saqlanib qolgan bo‘lardi.
Yakunda jamoa g‘alabaga ham yaqin keldi – afrikaliklar ko‘proq hujum qilishdi, saudiyaliklar darvozasi tomon 15 bor zarba berishdi va mudofaada ham ishonchli harakat qilishdi. Kaboverdiliklar yetakchisi, darvozabon Vozinya bir necha bor goldan qutqardi va kerakli hisobga erishishga (0:0) katta hissa qo‘shdi.
Bu uchrashuv oldinroq yakunlandi va afrikaliklar maydonda turib Urugvayning turnirni tark etishiga guvoh bo‘lishdi va o‘z yo‘llanmasini katta xursandchilik bilan nishonlashdi. Kabo-Verde – pley-offning eng kichik (aholisi soni 500 ming kishi atrofida) ishtirokchisi va 1998 yildan buyon uch ochko bilan guruhdan chiqqan ilk jamoaga aylandi.
1/16 finalda ushbu sensatsiya jamoani Argentinaga qarshi o‘yin kutmoqda.
Belgiyaning jahli chiqdi
Yangi Zelandiya – Belgiya 1:5
Gollar: Trossar, 28 (0:1). Trossar, 50 (0:2). De Bryuyne, 66 (0:3). Jast, 84 (1:3). Lukaku, 86 (1:4). Salemakers, 90+4 (1:5)
Yangi Zelandiya: Krokomb, Bindon, Sarmen, Kakache (de Vris, 79), Peyn (Boksall, 64), Bell (Makkovatt, 64), Stamenich, Tomas (Old, 46), Jast, Singh (Rendell, 46), Vud
Belgiya: Kurtua, Teat, Mehele, De Kyuyper, Kastan, Tilemans (Raskin, 85), Vanaken, De Bryuyne (Salemakers, 72), Trossar (Onana, 72), Doku (Fernandes-Pardo, 56), De Ketelare (Lukaku, 85)
Ogohlantirishlar: Stamenich, 46. Jast, 56
Rudi Garsiya shogirdlari turnir startida ko‘pchilikning hafsalasini pir qilib, ikki o‘yinda ham g‘alaba qozona olmagandi – Misr (1:1) va Eron bilan o‘yinlarda (0:0) Yevropa vakillari ochko yo‘qotgandi. Shu bilan birga, jamoa bu o‘yinlarda o‘zi birorta gol ura olmagan – misrliklar bilan o‘yinda Muhammad Xanining avtogoli yordam bergandi.
Yangi Zelandiyaga qrashi uchinchi tur o‘yini futbolchilar uchun o‘z aybini yuvish va g‘alaba qozonib, pley-off masalasini hal qilish uchun imkon edi. Va belgiyaliklar bu vazifani sharaf bilan uddalashdi: raqib 5:1 hisobida tor-mor etildi va guruhda birinchi o‘rin egallandi.
O‘yin taqdirini amalda «Arsenal» vingeri Leandro Trossar hal qildi, u birinchi bo‘limda dubl rasmiylashtirdi. Ikkinchi bo‘limda esa Kevin de Bryuyne ham o‘z nomini tabloga yozdirib qo‘ydi va Belgiyaning qatorasiga uchta jahon chempionatida gol urgan ilk futbolchisiga aylandi. O‘yin oxirlarida esa Romelu Lukaku asosiy qahramonga aylandi – 33 yoshli hujumchi 85-daqiqada maydonga tushib, to‘pga ikkinchi teginishidayoq gol urdi. Ushbu forvard Misr bilan o‘yinda maydonga tushganidan 23 soniya o‘tib Xanini o‘z jamoasi darvozasini ishg‘ol etib qo‘yishga majbur qilgandi.
Bundan tashqari, yangi zelandiyaliklarga qarshi o‘yinning qo‘shimcha daqiqalarida Lukaku Salemakersning goliga assistentlik ham qildi. Romelu shu kuni Mark Vilmotsni ortda qoldirib, Belgiyaning jahon chempionatlaridagi eng yaxshi to‘purariga aylandi.
Belgiyaning 1/16 finaldagi raqibi uchinchi o‘rin egalari orasidagi kuchli sakkizlik aniqlanganidan keyin ma’lum bo‘ladi.
Eronni pley-offdan santimetr ajratib qoldi
Misr – Eron 1:1
Gollar: Saber, 5 (1:0). Rizoyan, 14 (1:1)
Aniq ijro etilmagan penalti: Torimiy, 11’
Misr: Shubayr, Robia, Abdul Munim (Yosir Ibrohim, 14), Ahmad Fotih, Xani, Lashin, Saber (Ateya, 46), Saloh (Sayid, 57), Trezege, Ashur (Marmush, 46), Ziko (Abdulkarim, 76)
Eron: Beyranvand, Xalilzoda, Kanaanizodagon, Ne’matiy (Hardoniy, 46), Muhammadiy, Rizoyan, Izzatullohiy, Qurboniy, Muhibiy (Jahonbaxsh, 90+1), Quddus (Mug‘anli, 67), Torimiy
Ogohlantirishlar: Saber, 20. Yosir Ibrohim, 42. Lashin, 90 –Kanaanizodagon, 19. Ne’matiy, 43. Izzatullohiy, 79. Xalilzoda, 90
Bugungi dasturdagi yana bir drama Misr va Eron o‘rtasidagi bahsda kuzatildi. Jamoalar birinchi bo‘lim boshida bittadan gol urishdi – bunday natija ko‘proq Muhammad Saloh va uning jamoadoshlarini qoniqtirardi – afrikaliklar tabiiyki hisobdan kelib chiqib o‘ynashda davom etishdi.
Eronliklar ikkinchi bo‘lim davomida toliqib qolishdi, lekin yakuniy shturmni uyushtirish uchun o‘zlarida kuch topa olishdi va 90+6-daqiqada gol ham urishdi. Osiyoliklar bazasidagi xursandchilikni so‘z bilan ta’riflab bo‘lmasdi – gol muallifi Shoja Xalilzoda qora ko‘zoynak taqib, oldindan tayyorlab qo‘yilgan gol nishonlash uslubini namoyish etishga ham ulgurdi, ammo biroz o‘tib barchasi sarobga aylandi: VAR aralashuvidan keyin bu hujumda mikroskopik ofsayd aniqlandi.
Qolgan daqiqalarni ham eronliklar hujumda o‘tkazishdi va yana bir golga yaqin kelishdi, ammo misrliklar darvozaboni yaqin masofadan yo‘llangan zarbani qaytarib qoldi. O‘yin 1:1 hisobida yakunlandi, ammo Eron uchun barchasi tugamagan – uchta o‘yinda ham durang o‘ynagan jamoada to‘plar nisbati yaxshi va eng yaxshi uchinchi o‘rin egalari orasida hozircha oltinchi o‘rinni egallab turibdi. Jamoa pley-offga yo‘l olishi uchun J, K va L guruhlaridan kamida ikkitasida kerakli hisoblar qayd etilishi kerak bo‘ladi.
Dembele nomidagi bo‘lim
Norvegiya – Fransiya 1:4
Gollar: Dembele, 7 (0:1). Dembele, 20 (0:2). Osgor, 21 (1:2). Dembele, 32 (1:3). Due, 90+4 (1:4)
Aniq ijro etilmagan penalti: Strann Larsen, 50’
Norvegiya: Selvik, Estigor, Falhener (Langos, 66), Berkan (Pedersen, 46), Eursnes, Berg, Osgor, Torstvedt (Torsbi, 46), Shelderup (Nusa, 83), Bobb (Hauge, 83), Strann Larsen
Fransiya: Menyan, Upamekano (Konate, 76), Lakrua, Ernandez, Kunde (Gyusto, 87), Kone, Tchuameni, Olise (Sherki, 65), Due, Dembele (Barkolya, 65), Mbappe (Mateta, 87)
Ogohlantirishlar: Berg, 10 – Tchuameni, 74
Dastlabki ikki turda Fransiya va Norvegiya oltitadan ochko to‘plagan va muddatidan oldin pley-off masalasini hal qilishgandi. Yevropa vakillari o‘zaro o‘yinda 1/16 finalga qaysi jamoa birinchi o‘rin bilan chiqishin hal qilishi kerak edi.
O‘yindan oldin norvegiyaliklar forvardi Erling Holand shunday degandi: «Agar fransuzlar bu o‘yinda g‘olib bo‘lishsa, jahon chempioni ham ular bo‘ladi». Skandinavlar jamoasi ustozi esa kutilmagan yurish qildi: u keng ko‘lamli rotatsiyaga qo‘l urdi va asosiy tarkibga to‘liq dam berdi, Holand, Edegor, Syorlot kabi yetakchilar shu kuni zaxiradan ham tushirilmadi.
«Uchranglilar» esa to‘liq asosiy tarkibda o‘ynashdi va ilk daqiqalardan ketma-ket hujumlar uyushtirishdi. Usmon Dembele esa het-trik qayd etishi uchun 32 daqiqa yetarli bo‘ldi. U jahon chempionatlarida so‘nggi 72 yillikdagi eng tezkor het-trik muallifiga aylandi. Raqib esa Telo Osgorning goli bilan javob qaytardi.
Ikkinchi bo‘lim boshida norveglarda hisobdagi farqni qisqartirish uchun juda qulay imkoniyat yuzaga kelgandi, ammo forvard Yorgen Larsen penaltini aniq ijro etolmadi – Mayk Menyan zarba yo‘nalishini topdi va seyv ijro etdi. O‘yin oxirida esa Dezire Due yakuniy hisobni o‘rnatdi – 4:1. Kilian Mbappe shu kuni ikki golli uzatma bilan cheklandi.
Fransiya 1998 yildan buyon ilk bor guruh bosqichidagi barcha o‘yinlarda g‘alaba qozondi.
Endi 1/16 finalda Norvegiya Kot-d’Ivuar bilan o‘ynaydi. Fransiyani esa F guruhida uchinchi o‘rinni egallagan Shvetsiya bilan bahs kutmoqda.
Senegal Iroqqa 5 ta gol urdi va pley-offga chiqdi
Senegal – Iroq 5:0
Gollar: Diarra, 4 (1:0). Sarr, 56 (2:0). Guyye, 59 (3:0). Guyye, 71 (4:0). Ndiay, 82 (5:0)
Senegal: Diav, Sek (Siss, 58), Niakate, Yakobs, Diatta, Gana Guyye, Kamara (Guyye, 57), Diarra (Jyekson, 57), Mane, Mbay (Ndiay, 57), Sarr (Diao, 81)
Iroq: Bazil (Jalol, 46), Sulaka, Hoshim, Doski, Frans Dia, Iqbol (Yakob, 67), Al-Ammariy, Yasim (Maknzi, 58), Bayyesh, Qosim (Yunus, 16), Al-Hamadiy (Yusuf, 58)
Ogohlantirishlar: Sek, 18. Guyye, 81 – Al-Ammariy, 75. Doski, 90
Chetlatish: Sulaka, 13
I guruhidagi ikkinchi o‘yinda intriga ko‘proq edi. Ikki jamoa ham yakuniy tur arafasida birorta ochkoga ega emasdi. Bu o‘yindagi g‘alaba jamoalardan birini uchinchi o‘rin orqali pley-offga olib chiqishi mumkin edi. Ammo boshqa da’vogarlar (12 guruhdan faqat 8 tasida uchinchi o‘rin egalari ham pley-offga chiqishi mumkin) bilan raqobatda yutib chiqish uchun imkon qadar yirik hisobda g‘alaba qozonish talab etilardi.
Bu vazifani Senegal uddaladi. Afrikaliklar dastlabki o‘n daqiqa ichida hisobni ochishdi va raqib son jihatdan ozchilik bo‘lib qolishiga erishishdi. Ikkinchi bo‘limda muvaffaqiyat rivojlantirildi va yirik hisob qayd etildi. Pap Guyye dubl muallifi bo‘ldi, Habib Diarra, Ismaila Sarr va Iliman Ndiay bittadan gol urishdi — 5:0.
Shu tariqa, «Teranga sherlari» Afrikaning jahon chempionatlarida bir o‘yinda besh gol urgan ilk jamoasiga aylandi va Misr hamda Eron o‘rtasidagi uchrashuvda durang qayd etilgani evaziga 1/16 final yo‘llanmasini kafolatladi. Raqobatchilar ochko yo‘qotgani tufayli endi senegalliklar uchinchi o‘rin vakillari reytingida sakkizinchi o‘rindan tushib ketmasligi aniq.
Navbatdagi o‘yinlar
27 iyundan 28 iyunga o‘tar kechasi va tongda guruh bosqichining so‘nggi uchrashuvlari bo‘lib o‘tadi.
02.00. L guruhi. Panama – Angliya
02.00. L guruhi. Xorvatiya – Gana
04.30. K guruhi. Kolumbiya – Portugaliya
04.30. K guruhi. Kongo DR – O‘zbekiston
07.00. J guruhi. Jazoir – Avstriya
07.00. J guruhi. Iordaniya – Argentina
Zilzila qurbonlari soni 1400 dan oshadi, 69 000 kishi bedarak yo’qolgan
O‘zbekiston jahon chempionatini tark etdi
O‘zbekistonda pensiya, nafaqa, ish haqi va stipendiyalar oshiriladi
-
Sport5 days ago🔴 LIVE: AQSh-Eron muzokaralari va Starmer iste’fosi
-
Jamiyat3 days ago«Andijon polkasi» tadbiriga ketayotgan o‘quvchilar YTHga uchradi
-
Sport2 days agoYaponiya futbolining buyuk sabog‘i: mag‘lubiyatdan to‘g‘ri xulosa chiqarish
-
Dunyodan1 day agoQirgʻiziston va Oʻzbekiston chegarani delimitatsiya qilish doirasida hudud almashadilar
-
Jamiyat2 days agoVatanparvar jurnalistlarni o‘zimga do‘st va maslakdosh deb bilaman
-
Sport4 days agoEldor Shomurodov muxlislardan uzr so‘radi
-
Siyosat5 days agoPrezident Mirziyoyev Qatar amiriga gaz zavodi portlashi munosabati bilan hamdardlik bildirdi
-
Dunyodan4 days ago
BAAda 15 yoshgacha bo’lgan bolalar uchun ijtimoiy tarmoqlar taqiqlangan