Jamiyat
PGM “to‘ri” ko‘plab o‘zbekistonliklarni o‘z domiga tortdi
O‘zbekistonda minglab fuqaro navbatdagi moliyaviy piramidaga chuv tushdi. Bu safar Pioneer Global Media nomi ostidagi platforma 6 oy ichida oson pul topish ilinjidagi fuqarolar cho‘ntagini qoqib oldi. Unga aldanganlarning ko‘pi kredit olib yoki qarz ko‘tarib, pul tikkan. Odamlar ko‘ngliga “10 ta tuxum, 4 ta shashlik va 3 ta banan” bilan kirib borgan PGM ularning millionlab pulini o‘zlashtira oldi. Bu haqda Kun.uz’ga xabar bergan shaxs 146 mln so‘midan ayrilgan. Afsuski, bundaylarning aniq soni ma’lum emas.
Minglab o‘zbekistonliklar navbatdagi moliyaviy piramidaga aldandi. Bu safar PGM, ya’ni Pioneer Global Media nomi ostidagi platforma 6 oyda “urug‘ qadab”, “hosil”ni ham yig‘ishtirib olishga ulgurdi.
PGM nima?
Pioneer Global Media platformasi shakli va uslubi avvalgilaridan umuman farq qilmaydigan moliyaviy piramida. Kompaniya Londonda joylashgani, raqamli iqtisodiyotni rivojlantirish faoliyati bilan shug‘ullanishi aytiladi. Kompaniya sertifikatlari sifatida istalgan odam yasashi mumkin bo‘lgan ikkita surat keltirilgan.
“2009 yilda tashkil etilgan PGM o‘zining ijodiy va samarali reklama agentligi bilan mashhur bo‘lib, yirik shahar markazlarida faoliyat yuritadi. PGM YouTube, Instagram, TikTok, Facebook, Globoplay, Messenger, Steam va boshqalar kabi yirik global ijtimoiy dasturiy ta’minot va o‘yin operatorlari bilan reklama bo‘yicha hamkorlikni yo‘lga qo‘ydi”, deyiladi platformaning ijtimoiy tarmoqlardagi sahifalarida.
PGM 2019 yilda O‘zbekistonga raqamli tadbirkorlikni rivojlantirish va mahalliy texnologik ekotizimni mustahkamlash maqsadida kirib kelgani ma’lum qilingan.
PGM’ning onlayn xodimlari dasturni yuklab olganidan so‘ng kompaniya reklama uchun hamkorlardan haq olishi, ushbu to‘lovlarning 70-80 foizi onlayn xodimlarga ish haqi sifatida to‘lanishi bildirilgan. Onlayn xodimlar go‘yoki mehnat depoziti sifatida pul tikishlari kerak. So‘ngra ularga kunlik vazifa topshiriladi. Vazifalar asosan qandaydir ilovalarni yuklab olish bilan bog‘liq. Vazifa bajarilgach onlayn xodimga kunlik haq to‘lanadi.
Albatta, bularning bari ushbu platforma aslida moliyaviy piramida ekanini yashirib turish uchun foydalanilgan yolg‘on. Asosiy maqsad esa depozit qo‘ydirish orqali odamlarni chuv tushirish.
Qanday “ildiz otdi”?
Ushbu moliyaviy piramida Telegram’da bir nechta kanal va guruhlarga ega. Ulardagi ma’lumotlar va davrlar tahlil qilib ko‘rilsa, PGM 2025 yil may oyi boshlarida targ‘ib qilina boshlagani ma’lum bo‘ladi.
Masalan, qariyb 42 ming a’zoga ega bo‘lgan Pioneer Global Media LTD kanali 2022 yil 14 dekabrda yaratilgani qayd etilgan. Undagi ilk xabar shu kuni e’lon qilingan. Biroq ushbu xabar tahrirlangan. Undan keyingi xabar esa 2025 yil 29 aprel kuni joylashtirilgan.
Bundan anglash mumkinki, 2022 yil yaratilgan kanal sotib olingan hamda nomi o‘zgartirilib, undagi ma’lumotlar o‘chirib tashlangan holda ilk xabar tahrirlangan. Bu orqali go‘yoki PGM 2022 yildan beri mavjud ekani haqida tasavvur uyg‘otishga harakat qilingan. “PGM kompaniyasi haqida ma’lumot” nomli boshqa bir kanal esa 2025 yil 11 avgust kuni yaratilgan.
PGM platformasi 2025 yil may oyida targ‘ibotni boshlab, iyun-iyul oylarida faollasha borgan. Avvalo o‘zini o‘ziga deganday ortidan ko‘proq odam ergashtirib, guruh tuza olganlar rag‘batlantirilgan. Ularga jamoasi bilan dasturxon atrofida tadbir o‘tkazish, jamoasi a’zolariga turli mahsulotlar tarqatish uchun mablag‘lar ajratilgan. Mahsulot olgan odamlardan esa uyali telefonida PGM dasturini ko‘rsatgan holda suratga tushib berishi talab etilgan. So‘ngra ushbu suratlardan yanada ko‘proq odamlarni ishontirishda foydalanishgan.
Tarqatilgan mahsulotlar esa turlicha: meva, tuxum, yog‘, makaron, sut, guruch va shu kabi mahsulotlar.
Shuningdek, turli tadbirlar uyushtirilib, ularda ham faol targ‘ibot ishlari olib borilgan.
Bundan tashqari, hududlarda oziq-ovqat do‘koni bo‘lgan yakka tartibdagi tadbirkorlar jalb etilib, ularning savdo nuqtalaridan ham faol foydalanilgan.
Shubhali to‘lov
Platformaga qo‘shilish va ishlash uchun pul tikish talab qilingan. Tikiladigan pul miqdori esa ishlab chiqilgan darajalarga qarab oshib borgan. Masalan, yuqori darajada ko‘proq pul tikish va shunga mos ravishda ko‘proq pul ishlash taklif etilgan. Daromad miqdori katta foizlarda va’da qilingan.
Depozitga qo‘yiladigan, ya’ni PGM’ga qo‘shilish uchun tikiladigan pul qandaydir rasmiy hisob raqamlarga emas, P2P ko‘rinishida kimlarningdir bank kartalariga o‘tkazilgan.
Avvalgi moliyaviy piramidalardan farqli jihati, pul o‘tkazmalari qabul qilingan bank kartasi egasi bundan xabardor bo‘lishi mumkin. Masalan, PGM’ga aldangan ko‘plar depozit summalarini Qahramon Olimov ismli shaxsning bank kartalariga P2P ko‘rinishida o‘tkazgan.
Bu bir nechta misol. Aslida, Qahramon Olimovning bank kartalariga PGM bilan bog‘liq ko‘plab pul o‘tkazmalari amalga oshirilgan. Kun.uz’ning aniqlik kiritishicha, 1969 yilda tug‘ilgan Olimov Qahramon Abduqayumovich Farg‘ona viloyati Buvayda tumanida istiqomat qiladi. Aynan uning o‘zi ham PGM a’zosi bo‘lgan.
Qahramon Olimov PGM moliyaviy piramidasida parda ortida turganlarning topshirig‘ini bajargan bo‘lishi mumkin. Negaki, u bank kartalarida yig‘ilgan mablag‘lardan o‘ziga berilgan ro‘yxat asosida PGM a’zolariga go‘yoki daromadi sifatida pul o‘tkazmalarini amalga oshirib kelgan.
Aslida, PGM’ga go‘yoki mehnat depoziti sifatida pul tikkanlar o‘nlab shaxslarning bank kartalariga o‘tkazmalarni amalga oshirishgan. Qahramon Olimov hamda boshqalar o‘zlari bilgan yoki bilmagan holatda, balki ma’lum bir haq evaziga PGM ortida turganlar va aldanganlar o‘rtasida moliyaviy ko‘prik vazifasini bajarib bergan bo‘lishi mumkin. Ular bank kartalariga yig‘ilgan milliardlab pul mablag‘larini qanday tartibda kimga o‘tkazgani esa tahririyatga qorong‘i.
Parda ortidagilar kim?
Kun.uz moliyaviy piramidalar haqida ko‘plab surishtiruvlar e’lon qilgan. Video ko‘rish orqali pul ishlashni taklif qilgan Aif va Whats, “powerbank ijarasi”dan daromad olishga chaqirgan Parker, odamlarni “kitob o‘qish orqali pul topish” bahonasida chuv tushirgan OMD hamda yaqindagina ko‘plab o‘zbekistonliklarning cho‘ntagini shilib ketgan, “organ” xodimlari ham targ‘ibotiga qo‘shilgan XCM shular jumlasidan.
Minglab insonlarni chuv tushirgan, biri yopilsa boshqasi yangidan ochilayotgan ushbu moliyaviy piramidalar ortida bir guruh turgani tobora oydinlashib bormoqda. Negaki, ular uslub va shakl jihatdan bir xil. Qolaversa, ayrimlarida yaqin o‘xshashliklar bor.
Masalan, “kitob o‘qish orqali pul topish”ni taklif qilgan hamda minglab odamlarni chuv tushirgan OMD moliyaviy piramidasi 2025 yil may oyida yopilgan. Ayni shu paytda PGM targ‘iboti faol boshlab yuborilgan.
OMD’ga a’zo bo‘lish uchun odamlar tomonidan pul o‘tkazilgan bank kartalari orasida Dilnoza Hojiyeva ismli shaxsning bank kartasi bor.
PGM moliyaviy piramidasida ham odamlarning pulini yig‘ib olishda aynan shunday ismli shaxsning bank kartalari ishlatilgan.
Agar ushbu shaxsning o‘zi bundan bexabar, bank kartalari esa virtual bo‘lsa, demak, Dilnoza Hojiyevaning shaxsiy ma’lumotlari bitta guruhning qo‘lida. Bu OMD va PGM moliyaviy piramidalarining ortida bitta guruh turgani haqidagi taxminni o‘rtaga chiqaradi. Agar ban kartalari odatiy hamda bankka fuqaroning o‘zi borib ochtirgan bo‘lsa, unda Dilnoza Hojiyeva ushbu guruhga “xizmat” qiladi, degan gumon paydo bo‘ladi. Har ikki holatda ham Dilnoza Hojiyevaning “izi” bir guruhga olib boradi.
“O‘rta bo‘g‘in”ni uzish vaqti keldi
O‘tgan 2-3 yil ichida O‘zbekistonda biri yo‘qolsa boshqasi paydo bo‘layotgan moliyaviy piramidalar uchta bo‘g‘inni yuzaga keltirda: yuqori bo‘g‘in – parda ortidagi asosiy jinoyatchilar, o‘rta bo‘g‘in – moliyaviy piramida ekanini bilgan holda ortidan ergashtiruvchilar, quyi bo‘g‘in – ishonuvchan jabrlanuvchilar.
Bu yerda asosiy yo‘qotuvchilar quyi bo‘g‘indagilar bo‘lib qolmoqda. Negaki, o‘rta bo‘g‘indagilar boshqalarning to‘lovi hisobiga odatda zararga kirishmaydi. O‘zbekistonda paydo bo‘lgan istalgan moliyaviy piramida tahlil qilib ko‘rilsa, 10-15 kishini aldagan bir kishi, guruhboshi topiladi. U “farvon hayot” ertagini o‘qib, odamlarni ishontiradi. Ayrimlar hatto buni kasb qilib oldi.
Huquqni muhofaza qiluvchi organlar asosiy jinoyatchilarni topishning uddasidan chiqolmayotgan ekan, hech yo‘qsa ana shu o‘rta bo‘g‘inni uzishi kerak. Yo‘qsa, minglab odamlar aldanishda davom etaveradi.
Kun.uz yana bir bor yurtdoshlarimizni turli shubhali platformalarga ishonmaslikka va pullarini sarflamaslikka chaqirib qoladi.
Prezident Shavkat Mirziyoyev 24-mart kuni Yangi Toshkentda barpo etilayotgan yirik sport inshooti – zamonaviy futbol stadionining qurilish jarayonini ko‘zdan kechirdi.
Ushbu zamonaviy sport majmuasiga o‘tgan yilning 11-noyabr kuni davlatimiz rahbari tomonidan tamal toshi qo‘yilgan edi.
Ayni paytda o‘yingoh qurilishi jadal davom etmoqda. Jumladan, yerni tekislash ishlari to‘liq yakunlangan. Poydevor quyish ishlari to‘qson besh foizga bajarilgan. Qurilish joyiga metall-konstruksiya materiallari bosqichma-bosqich keltirilmoqda.
Qayd etish kerak, keyingi yillar mamlakatimiz futbol sohasida tub burilish davri bo‘ldi. Jumladan, mahalliy chempionatlar tizimi isloh qilinib, bolalar va o‘smirlar akademiyalari tashkil etildi, hududlarda 75 ta katta va 302 ta mini stadion faoliyat ko‘rsatmoqda.
Ma’lumki, 2017-yilda yurtimizda FIFA va Osiyo futbol konfederatsiyasi talablariga javob beradigan maydonlarning soni atigi 3 ta bo‘lgan. Bugun ularning soni 10 tadan oshdi.
Shuningdek, 1,5 mingta maktabning futbol stadionlari ta’mirlanib, 1 milliondan ziyod o‘quvchi va mahalla yoshlari qamrab olindi. Yoshlar o‘rtasida mahalla, tuman, viloyat va respublika turnirlarini an’anaviy o‘tkazish yo‘lga qo‘yildi.
Bu sa’y-harakatlar o‘z natijasini bera boshladi.
Futbol bo‘yicha olimpiya terma jamoamiz Parijdagi olimpiadada ilk bor ishtirok etdi. Tariximizda birinchi marotaba milliy terma jamoamiz joriy yilda bo‘ladigan jahon chempionati yo‘llanmasini qo‘lga kiritdi.
O‘tgan yilning 2 oktyabr kuni FIFA Kengashi yig‘ilishida futbol bo‘yicha 20 yoshgacha bo‘lganlar o‘rtasida 2027 yildagi jahon chempionatini O‘zbekiston va Ozarbayjonda o‘tkazish bo‘yicha qaror qabul qilindi.
Ushbu jahon chempionati doirasidagi o‘yinlar ikki mamlakatdagi 3 tadan stadionda o‘tkaziladi. Jahon chempionatlarining final va yarim final o‘yinlari sig‘imi 50 mingdan ko‘p bo‘lgan stadionda o‘tkazilishi FIFA talablaridan biri hisoblanadi.
Mamlakatimiz futboli uchun muhim loyiha – Yangi Toshkent stadioni shu maqsadda qurilmoqda. Qiymati 100 million dollarlik ushbu o‘yingoh qurilishi uchun nega aynan Yangi Toshkent hududi tanlandi? Sababi Yangi Toshkent kelajakda mamlakatimizning yangi imkoniyatlar va ilg‘or g‘oyalar markaziga aylanadi.
Yangi Toshkent stadioni FIFAning barcha talablariga mos ravishda barpo etilmoqda. Majmua Osiyodagi eng yirik va zamonaviy infratuzilmaga ega futbol maydonlaridan biri bo‘ladi.
Mazkur inshoot nafaqat 2027 yilgi 20 yoshgacha bo‘lganlar o‘rtasidagi jahon chempionati uchun, balki butun o‘zbek futboli va yoshlar sportining kelgusi rivoji uchun xizmat qiladi.
Davlatimiz rahbariga qurilish jarayoni haqda batafsil ma’lumot berildi.
55 ming tomoshabinga mo‘ljallangan Yangi Toshkent stadioni 6 qavatli bo‘ladi, unda nafaqat sportchilar, balki tashrif buyuruvchilar va matbuot xodimlari uchun ham keng qulayliklar yaratiladi. Tomoshabinlar stadionga tez fursatda kirib-chiqishlari uchun o‘ndan ortiq eskalator o‘rnatiladi. Hududda yana qo‘shimcha 3 ta mashg‘ulot maydoni bo‘ladi. Stadion yaqinida metro bekati barpo etiladi. 5 ming 500 o‘rinli avtoturargoh quriladi.
Prezident bunday katta sig‘imli yopiq stadion mamlakatimizda ilk bor bunyod etilayotgani uchun har bir jihatga ahamiyat berish zarurligini ta’kidladi. Stadion atrofini obodonlashtirish ishlarini hozirdan rejalashtirib, bosqichma-bosqich amalga oshirilishi zarurligi qayd etildi.
Namangan viloyati va Toshkent shahrida o‘tkazilgan tezkor tadbirlarda qonuniga xilof ravishda quyma oltin va kumush savdosi bilan shug‘ullangan shaxslar ushlandi.
Foto: Prokuratura departamenti
Bosh prokuratura huzuridagi Departament hamda boshqa huquqni muhofaza qiluvchi organlar xodimlari hamkorligida o‘tkazilgan tadbirlarda noqonuniy qimmatbaho metall savdosi holatlari fosh etildi.
Xususan, Namangan viloyatining Davlatobod tumanida o‘tkazilgan tezkor tadbirda fuqarolar M.N. va M.M. bir dona sof quyma oltinni fuqaro G.R.ga 8 500 AQSh dollari va 420 ming so‘mga sotgan vaqtida ashyoviy dalillar bilan ushlandi. Ekspertiza xulosasiga ko‘ra, mazkur quyma 88,97 gramm og‘irlikda bo‘lib, uning tarkibida 99,5 foiz sof oltin mavjudligi aniqlangan.
Shuningdek, Toshkent shahrida o‘tkazilgan tezkor tadbirda fuqarolar S.M., F.M. va boshqalar jami 11 dona bo‘lakdan iborat, umumiy og‘irligi 11,5 kilogramm bo‘lgan kumushni fuqaro M.S.ga 35 000 AQSh dollariga sotgan vaqtida ushlangan.
Mazkur holatlar yuzasidan Jinoyat kodeksining 177-moddasi (valuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari olib borilmoqda.
Navoiy viloyati IIB axborot xizmati guruhi rahbari Fayozjon Qosimovning «Xabar.uz»ga ma’lum qilishicha, narkokurerlar bot «xizmati» orqali bir-birini topishgan. Va bot xizmati ular uchun zaharli tarmoq vazifasini o‘tagan.
Ta’kidlanishicha, «Xavfsiz va sog‘lom yurt» tezkor profilaktik tadbirlari davomida oddiy «telegram bot» niqobi ostida ishlayotgan, aslida esa yoshlarni zaharli girdobga tortayotgan narkokurerlar tarmog‘i fosh etilgan. Tezkor tadbir davomida 26 yoshli, muqaddam sudlanmagan fuqaro Sh.T. 1,80 gramm gashishni 600 ming so‘mga sotayotgan vaqtida qo‘lga olingan. Bir qarashda «mayda savdo»dek ko‘ringan holat ortidan katta va xavfli jinoiy guruh faoliyati ochilgan.
Ma’lum bo‘lishicha, Sh.T. giyohvandlik moddalarini boshqa bir ikki nafar navoiylik bo‘lgan 25 yoshli R.J. hamda 26 yoshli E.D.lardan olgan. Ularning yonidan 8 ta ampulada gashish moyi va 6 grammga yaqin gashish moddasi aniqlangan.
Bu shaxslar mijozlar bilan yuzma-yuz uchrashishmagan. Barcha jarayon «telegram bot» orqali boshqarilgan: buyurtma, to‘lov, yetkazib berish kabi xizmatlarning hammasi raqamli tarzda. Ular, go‘yoki, «ta’minotchi» sifatida faoliyat yuritib, aslida, giyohvandlik moddalarini yashirin lokatsiyalarga joylashtirib borishgan. Ya’ni, mijozlar bir-biri bilan ko‘rishmagan holatda «mahsulot»ni daraxt osti yoxud turli xiyobonlardagi xilvat joylarga ko‘mib, suratga tushirib, rasm va lokatsiyani «hamkorlar»ga jo‘natib qo‘yish orqali tarqatishgan.
Yanada xavflisi, guruh a’zolaridan biri F.T. maxsus bot orqali «onlayn o‘quv kurslari»ni ham o‘tab, giyohvand moddalarini qayta ishlashni ham o‘rgangan va o‘z uyida narkolaboratoriya tashkil qilgan. Tadbir davomida F.T.ning xonadonidan 1 kg 477 gramm gashish moddalari, 34 dona qadoqlangan mahsulot, shuningdek, vositalarni tayyorlash va qadoqlash uskunalari ham topilgan.
Tergov ma’lumotlariga ko‘ra, ushbu guruh 1000 dan ortiq lokatsiyaga giyohvandlik moddalarini joylashtirgan. Ular yana 2,5 kg gashishni tarqatishni rejalashtirgan bo‘lib, uning «bozor qiymati» 1 milliard 220 million so‘mga teng ekanini ham aytishgan.
«Holat o‘rtaga jiddiy savollarni qo‘yadi. Yoshlar oson daromad topish ilinjiga tushib qolishgan. Buning uchun daromadning qaysi yo‘l bilan kelishi ularni, deyarli, qiziqtirmay qo‘ygan. Eng qizig‘i, zamonaviy raqamli platformalar orqali narkosistemani boshqarishmoqda. Ushbu jinoyat ortida «texnologiya» emas, inson fojeasi, bir necha gramm modda ortidan yuzlab yoshlarning izdan chiqib ketishi mumkin bo‘lgan hayoti yotgani achinarli. Yoshlarimiz «Bot xizmati» deb atalgan turli tizimlar ortida, aslida, zahar tarqatishning yangi, niqoblangan shakli yotganini unutmasliklari kerak»,-deydi Fayozjon Qosimov.
Sirdaryo viloyatida yashovchi yigit Telegram orqali tarqatilgan zararli APK virus dasturi yordamida 200 dan ortiq fuqaroning bank kartalaridan 2 mlrd so‘mdan ortiq mablag‘ni noqonuniy yechib olgani aniqlandi.
Ichki ishlar organlari tomonidan o‘tkazilgan tezkor-qidiruv tadbirlari davomida Sirdaryo viloyatida yashovchi shaxs tomonidan sodir etilgan yirik miqyosdagi kiberjinoyat fosh etildi.
Ma’lum bo‘lishicha, gumonlanuvchi Telegram messenjeri orqali tarqatilgan zararli APK virus dasturidan foydalanib, fuqarolarning mobil qurilmalariga kirish imkoniyatini qo‘lga kiritgan. Shundan so‘ng u ularning bank kartalariga ulangan ma’lumotlardan foydalanib, pul mablag‘larini noqonuniy ravishda yechib olgan.
Dastlabki ma’lumotlarga ko‘ra, ushbu usul orqali 200 dan ortiq fuqaro jabrlangan bo‘lib, ularga yetkazilgan moddiy zarar 2 mlrd so‘mdan ortiqni tashkil etgan.
Tekshiruvlar davomida gumonlanuvchi jami 121 ta kiberjinoyat sodir etgani aniqlangan. Hozirda u protsessual tartibda ushlanib, qamoqqa olingan.
Huquqni muhofaza qiluvchi organlar tomonidan mazkur holat yuzasidan qo‘shimcha tergov harakatlari olib borilmoqda.
Mutaxassislar fuqarolarni noma’lum manbalardan yuborilgan havolalar va dasturlarni yuklab olmaslikka, shaxsiy va bank ma’lumotlarini himoya qilishga jiddiy e’tibor qaratishga chaqirmoqda.
Prezident Shavkat Mirziyoyev Yangi Toshkent shahrida barpo etiladigan favvora majmuasi loyihasi bilan tanishdi.
Mamlakatimizda aholi uchun zamonaviy jamoat makonlari, ko‘ngilochar va madaniy hordiq maskanlarini tashkil etishga alohida e’tibor qaratilmoqda. Bu kabi loyihalar shaharlar qiyofasini boyitish, aholi uchun qulay dam olish muhitini yaratish, shuningdek, mahalliy va xorijiy mehmonlar oqimini ko‘paytirishga xizmat qiladi.
Yangi Toshkentda qariyb 8 gektardan iborat maydonda musiqali favvora majmuasi barpo etish rejalashtirilgan.
Loyihaga ko‘ra, suv yuzasining umumiy maydoni 6,3 gektarni tashkil etadigan havzada 1,5 gektar maydonda suv, musiqa va yorug‘lik uyg‘unligidagi shoularni o‘tkazish imkonini beradigan favvora barpo etiladi. Majmua tarkibida suvni 232 metr balandlikkacha ota oladigan super favvora, diametri 100 metrli suzuvchi platforma bo‘ladi.
Favvora radiusi 185 metr bo‘lgan, 360 darajali suv ekranini hosil qilish hamda uning yuzasida turli tasvirlarni proyeksiya qilishga qodir bo‘ladi.
Shuningdek, yuqori quvvatli lazer nurlari, dinamik suv kompozitsiyalari va turli vizual effektlardan foydalanish rejalashtirilgan. Nasos, elektr, lazerli proyeksiya va boshqa texnik tizimlar yer ostidagi ikki qavatli inshootda joylashtiriladi.
Suv havzasi atrofida yashil hududlar hamda xizmat ko‘rsatish ob’yektlarini tashkil etish ko‘zda tutilgan. Ushbu majmua Yangi Toshkentning eng diqqatga sazovor joylaridan biriga aylanishi, shaharning me’moriy qiyofasini boyitishi va turli madaniy tadbirlar, bayram hamda festivallar uchun yana bir zamonaviy maskan bo‘lib xizmat qilishi kutilmoqda.
Davlatimiz rahbari loyihaning mazmun-mohiyati, texnik yechimlari va hududni kompleks obodonlashtirish masalalariga alohida e’tibor qaratdi. Bu yerga tashrif buyuruvchilar uchun zamonaviy savdo, ovqatlanish va servis xizmatlarini sifatli tashkil etish muhimligini ta’kidladi. Shu bilan birga, ayni hududda joriy yilgi Mustaqillik bayrami munosabati bilan shou tadbirlarini yuqori saviyada o‘tkazish zarurligi qayd etildi.
O‘zbekistonda futbolchilar daromad solig‘idan ozod etildi
Prezident islomiy banklar to‘g‘risidagi qonunni imzoladi
Sportga homiylik qilgan tadbirkorlar imtiyoz oladi
-
Turk dunyosi4 days agoBuyuk Britaniya Tashqi ishlar vazirligi Gretsiya, Turkiya, Kipr va Dubayga sayohatlar haqidagi soʻnggi maʼlumotlarni eʼlon qildi
-
Dunyodan4 days ago
Prezident Tramp Eronga Hormuz boʻgʻozini ochish uchun 48 soat vaqt berdi
-
Jamiyat3 days ago
O‘zbekistonliklar qaysi mamlakatlarga eng ko‘p safar qilmoqda (top-10)
-
Jamiyat4 days agoO‘zbekistonda taksichilarni aldashning yangi firibgarlik usuli fosh etildi
-
Siyosat5 days agoO‘zbekiston va AQSh mehnat migratsiyasi bo‘yicha yangi kelishuvga erishdi
-
Dunyodan3 days ago
Eron tarixidagi eng katta banknotalar muomalaga chiqariladi
-
Jamiyat5 days ago
Namanganda yirik turistik majmua qurilishi boshlandi
-
Iqtisodiyot4 days agoO‘zbekiston eksporti 35 yilda qariyb 19 barobarga oshdi