Sport
«Real»dagi kichik inqiroz. Klubning muammosi nimada va Alonso endi nima qiladi?
Madridliklar g‘alaba qozonishni unutib qo‘ydi, ayrim futbolchilar va murabbiy o‘rtasida esa ziddiyat ko‘zga tashlanmoqda.
Yaqindagina klasikoda g‘alaba qozonib, Ispaniya chempionatida jiddiy farq bilan peshqadamlik qilayotgan «Real» birdaniga muammolar girdobiga tushib qoldi. Qoniqarsiz natijalar, ishonarsiz o‘yin, jarohatlar va eng e’tiborlisi Habi Alonso bilan muammolar – ispan nashrlari yozda jamoa boshqaruviga kelgan murabbiyga muhlat berilgani, keyingi uch o‘yindan birortasida g‘alaba qozona olmasa, iste’foga chiqarilishi mumkinligi haqida yozishmoqda.
Albatta, bunday xabarlar turli murabbiylar bilan ko‘p chiqib turadi, odatda nashrlar ko‘pincha taxminlarni bo‘rttirib yozishadi. Ammo Angliyadan farqli ravishda Ispaniyada jurnalistlar biroz boshqacha ishlashini, nashrlar u yoki bu klub, shu jumladan, «Real»ning ham manfaatlariga xizmat qilishini inobatga olsak, vaziyatga jiddiyroq qarash mumkin. Zero bunday xabarlar chiqayotgani, shu bilan birga, klub rasmiylari tomonidan raddiyalar yo‘qligi, tabiiyki, daraxtning uchi bekorga silkinmayotganidan dalolat beradi. Quyida shu savolga javob izlanadi – Madridda nima bo‘lyapti o‘zi?
Tizimli murabbiy nima?
So‘nggi yillarda bu atama tez-tez ishlatilmoqda, nafaqat Yevropada, balki mahalliy matbuotda, sharhlovchilar tomonidan ham murabbiylar tizimli va eski klassik uslubga rioya qiluvchilar sifatida ajratilishiga guvoh bo‘lamiz.
Habi Alonso va «Real» mavzusida ham bu atamaga murojaat qilishga to‘g‘ri keladi, zero u nemis futbolida shakllangan tizimli murabbiy bo‘lsa, «Real»ning oldingi bosh murabbiyi Karlo Anchelotti aksincha, eski maktab murabbiylarining yorqin va eng muvaffaqiyatli vakili edi. Qisqa muddatda bu qadar qutblashish tabiiyki, avvaldan bu mavzu tilga olinishiga sabab bo‘lgandi.
Xullas, eski maktab asosan futbolchilarning xususiyatlaridan kelib chiqqan holda taktika va uslub tanlash, ayniqsa yetakchilarning o‘zini qulay his qilishi yordamida samaraliroq foylalanishni ko‘zda tutadi va ijrochilarga imkon qadar erkinlik taqdim etadi. Bazaviy talablar – zich o‘ynash, pozitsiyalar, pressingga amal qilingan holda, muayyan vaziyatlarda improvizatsiyaga kengroq yo‘l ochiladi.
Tizimli futbolda esa birlamchi – futbolchi emas, jamoadir. Albatta, har qanday tizim ham mazkur jamoadagi futbolchilarning xususiyatlariga tayanadi va shundan kelib chiqadi. Ammo to‘p qanday egallanishidan tortib, har bir nuqtada qanday harakatlanish, to‘pni kimga yetkazish va qaysi yo‘l bilan vaziyatlar yaratish murabbiy tomonidan oldindan belgilanadi. Shu asosda jamoa uzoq mashg‘ulotlar yordamida aniq uslubni avtomatizm darajasiga olib chiqadi. Ha, biroz murakkab, ammo to‘liq ishlaganda, raqibdan qat’i nazar soatdek ishlaydigan mexanizmga aylantirish mumkin.
Taqqoslash uchun misol keltiramiz. Tasavvur qiling, bir jamoa tarkibida o‘rtacha darajasi 7 baholik bo‘lgan 11 nafar futbolchi bor. Klassik uslubda bu jamoa har o‘yinda kamida 6, muvaffaqiyatli hollarda 8 bahoga loyiq o‘yin ko‘rsatishi mumkin. Ammo agar bu tizimlashsa, jamoa 9-10 darajadagi futbol namoyish qilishga loyiq bo‘ladi. Shu bilan birga, tizim ishlamaganda, ba’zida jamoa o‘yini 4-5 darajaga tushib ketishi ham mumkin. Shundan xulosa qilish mumkinki, tizim nisbatan kuchsizroq tarkib va futbolchilar bilan ham yaxshi ishlaydi – shu orqali umumiy darajani oshirish, o‘rtacha futbolchilar bilan ham yuqori natijalarni ko‘zlash mumkin.
Shu misol orqali «Real»ni yanada osonroq tushunamiz – Madridda doim har bir chiziqda Yevropaning eng yaxshi futbolchilari yig‘ilgan, shuning uchun klassik uslubda o‘ynash ham jamoaga katta sovrinlarni yutish uchun kifoya qilgan. O‘yin ma’lum darajadan pastga tushib ketmaydi, futbolchilar uchun qulay uslub tanlangani evaziga ichki ziddiyatlar ham bo‘lmaydi, 8-9 darajali futbolchilar doim shu darajada o‘yin ko‘rsatib, raqobatbardosh bo‘la olishadi.
Nega tizimli murabbiy «Real» uchun noqulay?
Bilasizmi, sportda sabab-oqibat prinsipi mavjud bo‘lishi juda muhim. Ma’lum natijaga erishish uchun belgilangan harakatlar majmui kerak bo‘ladi. Aytaylik, biror tezlikka ega bo‘lish uchun bir kunda falon soat mashq, falon soatlik uyqu, ma’lum diyeta va hokazolar kerak. Demak, belgilangan natijaga erishish uchun shu yo‘ldan boriladi. Hammasi oddiy.
Ammo agar shu sabab va oqibat bog‘liqligi yo‘qolib qolsa-chi? Masalan, o‘ta iste’dodli futbolchilarni bilamiz – Romario, Neymar, Ronaldinio, Gaskoyn va hokazo. Ularni nima birlashtirib turadi? Ular shundoq ham o‘ta iste’dodli bo‘lishgan, belgilangandek mashg‘ulot qilishmas, tartibli hayot tarzida yashashmagan. Mana shu teskari sabablar bilan ham mutlaqo boshqa oqibat – muvaffaqiyatga erishishgach, tabiiyki, ularning mashg‘ulotlarga bo‘lgan munosabati boshqacha bo‘ladi. Ularga har qanday muvaffaqiyat ostida ulkan mehnat yotishini tushuntira olmaysiz, chunki ulardagi g‘ayrioddiylik siz keltirgan nazariyani rad qiladi. Ana, Romario mashg‘ulot qilmasdan turib erta-yu kech tinim bilmaydigan Dungadan yaxshiroq, ana Gaskoyn bir umr aroq ichib yurib, ichmasdan diyeta qiladigan ko‘pgina futbolchilardan yaxshiroq o‘ynayapti. Nimani tushuntirasiz?
Yomon tomoni, bunday futbolchilarning faoliyati uzoq kechmaydi. Qachonki, mashg‘ulotlarga ehtiyoj sezganda, talant yetarli bo‘lmay qolgan paytda boyagi sabab-oqibat bog‘liqligiga ular ishonishmaydi. Chunki o‘z tanasida buning aksiga misol bor. Eng muhimi, ularning misoli boshqalarga ishlamasligi, aslida muvaffaqiyat kaliti bu emasligini boshqa oddiy futbolchilar tushunib yetishi kerak. Ana, Ronaldinio mashg‘ulotlarga qatnamay ham zo‘r o‘ynayapti-ku, demak oson yo‘li bor ekan-da, degan xulosa paydo bo‘lmasligi lozim.
Uzoqdan olib kelganimning sababi, «Real» klubi aynan shunday futbolchi misolining jamoa ko‘rinishidir. Yo‘q, «Real» ham doim mashg‘ulot qilgan, noto‘g‘ri ishlar qilmagan. Ammo butun dunyoda jamoalar boshqacha, tizimli futbol o‘ynayotgan paytda, xuddi diskotekadan kelib, hammadan yaxshi o‘yin ko‘rsata olgan Ronaldinio singari kelib, sovrinlarni yutavergan. Bu yerda anormallik yo‘q, zero «Real» eng yaxshi futbolchilarni va bu uslubda eng samarali bo‘lgan murabbiylarni (Mourinio, Zidan, Anchelotti) qo‘lga kirita olgandi. Boyagi misoldagi futbolchilarda muhim farq ularning xudo in’om etgan talanti bo‘lsa, «Real» misolida bu to‘g‘ri yig‘ilgan tarkib va murabbiy sababli bo‘lgan.
Ammo yildan yilga moliyaviy tomondan inglizlar bilan kurashish qiyinlashib qoldi. Avvalgidek eng yaxshilarni yig‘ish qiyinroq va qimmatroq bo‘lib bormoqda. «Barselona»ga qarshi muhim uchrashuvlar boy berilmoqda. Anchelottini birov bog‘lab bermagan. Shu va boshqa sabablar Florentino Peresni katta islohotga, shu paytgacha «Real» uchun mutlaqo teskari bo‘lgan yo‘nalishga undadi.
Alonsoga qiyin bo‘lishi aniqmidi?
Hali ish boshlanmasdanoq Alonso to‘qnash kelishi mumkin bo‘lgan muammolar va mavsum davomida kutilmaganda paydo bo‘lgan to‘siqlarni taxmin qilish oson edi. Bu har qanday boshqa murabbiy bilan ham sodir bo‘lishi shubhasiz, ya’ni obektiv sabablar sifatida quyidagi uch omilni keltirish mumkin.
Klublar o‘rtasida jahon chempionati. «Real» iyun-iyul oylarida klublar o‘rtasidagi jahon chempionatida qatnashdi va yarimfinalgacha bordi. Taqqoslash uchun, boshqa klublar 1 iyuldan to‘liq dam olib, mavsumoldi yig‘inlarni boshlagan bo‘lsa, «Real» iyul oyi boshlarida eski mavsumni yakunlab, tanaffusga chiqib ketdi. Tabiiyki, odatdagidan qisqaroq dam olish va rejadagidek bo‘lmagan mavsumoldi yig‘inlar har qanday yangi murabbiy, ayniqsa u yangi tizimni olib kirmoqchi bo‘lganida, qiyinchilik tug‘diradi.
Jarohatlar. «Real» futbolchilari mavsum davomida anormal darajada ko‘p jarohat olishmoqda. Tabiiyki, bu kerakli o‘yin tizimini qurish uchun ham, jamoadagi o‘zaro raqobat muhitiga ham ta’sir ko‘rsatadi.
Vaqt. Hammasi ko‘ngildagidek bo‘lib, barcha tayyorgarliklar a’lo o‘tib, hech kim jarohat olmagan taqdirda ham ma’lum tizimni jamoa o‘yiniga kiritish ma’lum vaqtni talab etadi. Jamoa real rejimda, haqiqiy o‘yin yuklamalari ostida ham sinovdan o‘tishi kerak. Hammasi hal qilingan taqdirda ham, ora-sira turli to‘siqlar chiqishi, muvaffaqiyatsiz o‘yinlar bo‘lishi, o‘sha to‘siqlar ostida bu uslub qanday ishlashi borasida tajribalar o‘tishi lozim bo‘ladi.
Yulduzlar bilan ishlash. Habi Alonsoning murabbiylik tajribasi u qadar katta emas, faqat «Bayyer»da ishlagan xolos. «Bayyer» va «Real» futbolchilarining darajasi, har ikki klubga bo‘lgan bosim farqi juda katta va bu murabbiyga yetarlicha noqulaylik tug‘dirishi aniq edi. Inqiroz uchun dastlabki zarba shu tomondan keldi.
Vinisius bilan ziddiyat
Aslida Alonso hammasini to‘g‘ri qildi. «Barselona»ga qarshi muhim o‘yinda 2:1 hisobidagi ustunlikni saqlab qolish uchun pragmatik qaror qabul qildi, Vinisiusni zaxiraga oldi. Dunyodagi yuzta jamoadan to‘qson to‘qqiztasida bo‘ladigan oddiy ish jarayoni va bu qandaydir janjal keltirib chiqarishini taxmin qilish ham mumkin emas. Habi doimgidek, «Bayyer»da o‘n marta qilgan, jamoa uchun, o‘yin uchun kerakli bo‘lgan almashtirishni amalga oshirdi.
Yuqorida tilga olingan asosiy farq mana shu yerda yuzaga chiqadi. Ha, jamoa sifatida «Real» uchun «Barselona»ni yengish eng muhimi, ammo yulduz futbolchilarda qo‘shimcha motivatsiya ham bo‘ladi. Bellinghem, Mbappe, Vinisius kabi yulduzlar mavsumni chempion bo‘lish, Chempionlar Ligasini yutish kabi maqsadlardan tashqari, aytaylik, «Oltin to‘p» olish kabi maqsadlar bilan boshlaydi. Tabiiyki, Vinisius klasikoda gol urish uchun maydonga chiqqan, o‘zi uchun juda muvaffaqiyatli va qulay kechayotgan o‘yinni hammadan avval tugatishni istamaydi. Bu yerda zinhor futbolchini oqlamayapman, uning aytganini qilish kerak, demoqchi ham emasman, ammo «Real» kabi katta klubga borar ekansan, shunchaki, sening shogirdlaring Playstation’dagi 75 baholik futbolchilardan 90 baholikka aylanib qolmaydi. Ularning manfaatlari, egolari ham kattaroq, ziddiyatliroq bo‘ladi va katta klublarda taktikadan ham ko‘proq insoniy munosabatlar, psixologiya ko‘proq ahamiyat kasb etadi.
Tizimli murabbiylarda eng ko‘p namoyon bo‘ladigan kamchilik ham shu – o‘zi va futbolchilar o‘rtasida qandaydir masofa, devor o‘rnatishdir. Kichik klublarda bu juda samarali bo‘lishi mumkin, ammo yulduzlar bilan ishlashda har bir qarorni ularga yoqadigan qilib tushuntira olish, muhitni ushlab turish ham juda muhim hisoblanadi. Sen Rodrigo bizga kerak emas deyapsanmi, uning yaqin do‘stlari bo‘lgan Vinisius va Militoaga ham bu qaroring boshqacha ta’sir qilishi mumkinligini hisobga olishing kerak. Jamoa bilan hissiy bog‘ qurish, hech bo‘lmasa, murabbiylar shtabida mana shu vazifani bajara oladigan, bosh murabbiyning g‘oyalari va qarorlarini futbolchilarga boshqacha tilda yetkazib bera oladigan kimdir bo‘lishi lozim. Shu o‘rinda «Liverpul»da Slotning muammolari Jon Heytinga ketishidan so‘ng boshlanganini eslash mumkin.
Muammo barham topdi, Vinisius uzr so‘rab, tarkibga qaytdi. Ammo natijalardagi yomonlashuv ham xuddi shundan keyin boshlandi – 8 o‘yinda atigi 2 g‘alaba. Vinisius esa uzr so‘ragani haqidagi postida Habi Alonsoning ismini umuman tilga olmadi.
Futbolchilar Alonso uslubiga qarshimi?
Agar yetarlicha ta’sirga ega bo‘lgan yulduzlarni oladigan bo‘lsak, faqat Kilian Mbappeda murabbiy bilan muammo bo‘lmasligi kerak. Chunki fransuz hujumchisi aynan Alonso qo‘l ostida juda ko‘p gollar uryapti, eng yaxshi mavsumlaridan birini o‘tkazmoqda. Shuningdek, Arda Guler asosiy tarkibga qaytdi, albatta, Mastantuono, Karreras, Hausen kabi yangi xarid qilingan futbolchilar ham murabbiyga qarshi bora olmaydi.
Vinisius bilan ochiq ziddiyat bo‘ldi, Rodrigo tarkibdan deyarli chiqarildi, Valverde avvalgidek muhim futbolchi emas, Judning maydondagi pozitsiyasi bilan ham muammolar bor – avvaliga u raqib jarima maydonidan uzoqlashdi, keyin Guler bilan bir paytda samarali tandem bo‘la olishmayapti. Ya’ni qarshi tomonning ham salmog‘i katta.
Endi Anchelotti davri bilan asosiy farqni aytaman. Italiyalik murabbiy aksariyat o‘yinlarda futbolchilar zavq oladigan, ularga qulay bo‘lgan uslubni tanlar, «Real» aksariyat o‘yinlarda yulduzlarning malakasi hisobiga yutib ketardi. «Barselona», «Manchester Siti», «Arsenal»ga qarshi katta o‘yinlarda esa ishonchli o‘ynash qiyinlashar, agar futbolchilar katta sahnaga chiqa olsa, yaxshi, mabodo o‘yin qovushmasa, imkoniyat pasayib ketardi.
Alonso o‘z tizimi bilan har qanday jamoaga qarshi tashabbuskor, o‘z o‘yinini ko‘rsata olishni o‘rgatdi – «Barselona»ga qarshi bu tizim ish berdi ham. Futbolchilar ham nihoyat «Barselona»ni ustunlik bilan yenga olishganidan xursand bo‘lishgan, tizimga bo‘lgan ishonch ortgan bo‘lishi kerak. Ammo muammo «Elche» yoki «Selta» kabi raqiblarga qarshi o‘yinlarda qalqib chiqadi. Alonso faqat katta o‘yinlarni yutishni o‘rgatib, kichik o‘yinlarda o‘zidan Anchelottini «yoqib» ololmaydi. Tizimmi, demak hamma o‘yinda shunday o‘ynash kerak, «Elche» bilan ham tinmay yugurish, pressing qilish kerak. Odatda «Elche»ni boshqacha, osonroq va qulay yo‘l bilan yutib yurgan yulduzlarga endi bu ko‘rsatmalar yoqavermaydi. Maydon chetida to‘pni egallagan Vinisius uni jarima maydoniga Alonso aytgan yo‘l bilan emas, o‘zi bilganicha olib bormoqchi bo‘ladi. To‘pni egallash uchun uning orqasidan yugurish shart emas, biroz sabr qilib, o‘rta blok qo‘ysak, shundoq ham olib qo‘yamiz-ku, deb o‘ylay boshlashadi. Ziddiyat mana shu yerda.
Nega boshqa jamoalarda bunday muammo yo‘q?
Shu yerda Habi Alonsoning Madridga kelish vaqti ham biroz noqulay bo‘lganini inobatga olish kerak. Nega «Arsenal» yulduzlari Artetaga qarshi shunday qarshi chiqishmaydi? Chunki Saka bo‘ladimi, Raysmi, har kim har qancha yulduz bo‘lmasin, bu darajaga aynan Arteta bilan, Artetaning uslubi, tizimi yordamida chiqishdi. «PSJ»da sakkiz nafar futbolchi «Oltin to‘p» nomzodlari qatoriga kirdi, hammasi Luis Enrike qo‘l ostida o‘ynab.
Alonso Madridda boshqarishi kerak bo‘lgan tarkib esa Alonsosiz, ayni paytda u taklif qilayotgan tizimga mutlaqo teskari bo‘lgan tizimda Chempionlar Ligasini ham, Ispaniya chempionatini ham yutgan. Alonso faqat mana bunaqa qilsakkina biz Chempionlar Ligasini yutamiz, deb singdira olmaydi. Bu bilan futbolchilarni noprofessionalizmda ayblamoqchi emasman, ammo ziddiyatlar bo‘lganida o‘rtadagi mana shu ishonchsizlik qalqib chiqishi mumkinligini tushunish kerak. Devid Moyyes kelganida «MYu» futbolchilari uning barcha aytganini qilganiga, professional shaklda shug‘ullanganiga shubha yo‘q, ammo natijalar yomonlashganda, qandaydir ziddiyatlar paydo bo‘lganda Moyyesning futbolchilardan farqli ravishda shunchaki «Everton»dan kelgani ham rol o‘ynagani shubhasiz.
Aytaylik, bu ish ancha ertaroq, masalan, «Real» bir tarkib bilan barcha turnirlarni yutib, Ronaldu, Beyl, Benzema, Kazemiro kabi yulduzlar bilan xayrlashib, yangi futbolchilar bilan birga Alonsoni olib kelib, endi yangi yo‘ldan boramiz, degan g‘oya bilan sodir bo‘lganda, hammasi boshqacha kechishi mumkin edi. Ammo Alonso tayyor o‘ynab turgan, yutib yurgan tarkibga keldi. Yulduzlar ham Modrich, Kroos yo Benzema kabi yangi murabbiyga yordamchi bo‘lib yoniga kiradigan, g‘oyalarni yoshlarga singdirib, estafetani beradiganlar emas, ancha toksik futbolchilar. Vinisiusni taniymiz, Mbappega tegib bo‘lmaydi, Jud yoki boshqalar ham yuqorida misol keltirgan futbolchilarga o‘xshamaydi. Qaysidir ma’noda «Real» rahbariyati mana shu yo‘nalishda biroz xato qildi.
Klub murabbiyni himoya qilmayapti
Shu bilan birga, «Real» klubi ham Alonsoni yetarlicha himoya qilmayotgandek tuyulmoqda. Esingizda bo‘lsa, Ruben Amorim eng ko‘p tanqidlar ostida qolganda «MYu» rahbari Jim Retkliff chiqib, Rubenga kamida uch yil berishini ochiq aytgandi. Shundan so‘ng jamoa o‘yinida siljish kuzatildi, turli shubha va taxminlarga o‘rin qolmadi. Shu bayonotdan keyingi 9 uchrashuvda jamoa faqat bir marta mag‘lubiyatga uchradi.
Hakamlar haqida juda ko‘p chiqishlar qiladigan Peres Habi Alonso turli mish-mishlar girdobida qolganida biror bayonot bilan vaziyatga oydinlik kiritishi, murabbiyga yordam berishi mumkin edi. Boshqa tomondan Retkliffda necha yildan beri yutqazayotgan va ko‘zni yumib almashtirib yuborish mumkin bo‘lgan tarkib, Peresda esa bir qator jahon miqyosidagi qimmatbaho aktivlar turganini ham inobatga olish kerak. Tabiiyki, bu holatda murabbiyni bo‘shatish eng arzon va xavfsiz yo‘l.
Endi nima bo‘ladi?
Odatda, iste’fo haqida gap chiqib, murabbiyga muhlatlar berila boshlandimi, bu uzoqqa bormaydi. O‘zi berilgan vaqt yetarli emasligi va katta bosim ostida ekanini bilgan murabbiy o‘z g‘oyalariga ters bo‘lgan qarorlarni qabul qilishni, futbolchilarga tayanishni boshlaydi. Ba’zi murabbiylar shunday shartlarda natijalarni yaxshilab, o‘zi uchun vaqtni cho‘zishi, holatdan chiqib ketishi ham mumkin. Ammo aslida boshqa faoliyat bilan nom qozongan murabbiylar, xususan Habi Alonsoga bunday shartlar noqulay bo‘lishi tabiiy. U «Bayyer»da ilk o‘yinlardan katta ishonch ostida ishlagan va to u yerdan ketguncha hech qanday bosim his qilmagan. Bosim ostidagi Alonso qanchalik samarali, buni hali bilmaymiz.
Lekin «Manchester Siti»ga qarshi o‘yinda butunlay boshqa «Real»ni ko‘rdik. Alonso imkon qadar futbolchilarga erkinlik berdi, yutqazgan bo‘lsa-da, jamoa so‘nggi paytlardagi eng yaxshi o‘yinlaridan birini o‘tkazdi, uchrashuvdan keyin bir qator futbolchilar Alonsoni to‘liq qo‘llab-quvvatlashi, u uchun jonini berishga ham tayyor ekanini aytib chiqishdi.
Futbolchilar murabbiy uchun o‘ynashni boshladimi, demak murabbiyning taqdiri shu kundan boshlab futbolchilar qo‘liga o‘tadi. Alonso endi futbolchilarga yaxshi bo‘lishi, ular o‘zlarini yaxshi his qilishlari uchun o‘z g‘oyalaridan voz kechib turishga majbur. Habi Alonso Madridda qolgan taqdirda ham, bemalol aytish mumkinki, murabbiy Habi Alonso ketib bo‘ldi.
Qahramon Aslanov
Litvalik murabbiy Kotrina Kulbite qo‘l ostidagi jamoa hal qiuvchi bahsda Filippinga yutqazdi.
Futbol bo‘yicha O‘zbekiston ayollar milliy jamoasi Avstraliyada bo‘lib o‘tayotgan Osiyo kubogidagi ishtirokini yakunladi.
Litvalik murabbiy Kotrina Kulbite qo‘l ostidagi jamoa kuchli sakkiztalikka kirdi.
Futbolchilar Bangladeshni 4:0 hisobida mag‘lub etdi. Ammo KXDR (0:3), Xitoy (0:3) va Janubiy Koreyaga (0:6) yutqazdi.
Jahon chempionati yo‘llanmasi uchun hal qiluvchi kurashda Filippin milliy jamoasiga 0:2 hisobida yutqazdi.
Endi O‘zbekiston ayollar milliy jamoasi qit’alararo saralash musobaqasida ishtirok etadi. Birinchi bosqich noyabr-dekabr oylarida markazlashgan formatda bo‘lib o‘tadi. Ikkinchi bosqich 2027 yil fevral oyiga belgilangan.
O‘zbekiston ayollar milliy jamoasi tarixda biror marta jahon chempionatida ishtirok etmagan.
Sport
«Real» «Bavariya»ga qarshi, «Barsa» yana «Atletiko» bilan o‘ynaydi. YeChLda chorakfinal juftliklari
Turnirda 8 jamoa qoldi.
Chorshanba oqshomida Chempionlar ligasi 2025/26 yillar mavsumi 1/8 finali doirasida yana to‘rt uchrashuv o‘tkazildi: «Arsenal», «Real», «PSJ» va «Sporting» ortidan «Barselona», «Atletiko», «Bavariya» va «Liverpul» jamoalari ham keyingi bosqichga yo‘llanma olishdi.
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
«Arsenal» va «Bavariya» – asosiy favoritlar
Har bir bosqichdan keyin Opta superkompyuteri Chempionlar ligasida kim g‘olib bo‘lishi bo‘yicha prognozlarini yangilab bormoqda. Turnir startidan oldin «Liverpul»ning imkoniyatlari eng yuqori baholangandi, o‘tgan mavsum Angliya chempioni bo‘lgan va yozgi transferlarda eng faol bo‘lgan jamoaga 20,6 foiz berilgandi, ammo vaqt o‘tib bu jamoaning imkoniyatlari uch baravar pasaytirildi – 7 foizgacha.
Turnir avvalida ikkinchi asosiy da’vogar «Arsenal» bo‘lib turgandi (15,3 foiz), ammo londonliklarning imkoniyatlari vaqt sayin o‘sib bordi va endi ikki baravar yuqori baholanmoqda.
Setkaning ikkinchi tomonidagi asosiy favorit – «Bavariya». Opta Angliya va Germaniya grandlari Budapeshtdagi finalga yetib kelishini bashorat qilmoqda. «Barselona» va «PSJ»da ham yarimfinalga chiqish imkoniyati yuqori baholangan.
Opta versiyasiga ko‘ra, jamoalarning Chempionlar ligasi g‘olibligi uchun imkoniyatlari:
«Arsenal»da startdan oldin 15,3 foiz, chorakfinal arafasida 30 foiz;
«Bavariya»da startdan oldin 4,5 foiz, chorakfinal arafasida 18 foiz;
«Barselona»da startdan oldin 8,8 foiz, chorakfinal arafasida 14,7 foiz;
«PSJ»da startdan oldin 12 foiz, chorakfinal arafasida 12,1 foiz;
«Real»da startdan oldin 5,8 foiz, chorakfinal arafasida 7 foiz;
«Liverpul»da startdan oldin 20,6 foiz, chorakfinal arafasida 30 foiz;
«Atletiko»da startdan oldin 0,8 foiz, chorakfinal arafasida 4,7 foiz;
«Sporting»da startdan oldin 0,8 foiz, chorakfinal arafasida 3,3 foiz.
1993 yil, aprel. Milliy basketbol assotsiatsiyasi muntazam ligasidagi navbatdagi o‘yini bo‘lib o‘tmoqda. Tanaffus paytida qiziqarli tanlov o‘tkazadi. Unga ko‘ra, xohlovchilar maydon chetidan to‘p irg‘itib, narigi tomondagi savatchaga tushirishi kerak edi. Bir yigit shu ishni uddalaydi. Biroq yutuqni to‘lashi lozim bo‘lgan sug‘urta kompaniyasi g‘irromlik qiladi va pullarini berishdan bosh tortadi. Oxir oqibat yigitga yutuqni “Chicago bulls” jamoasi to‘lab beradi.
Bugun AQSh sportini basketbol o‘yinisiz tasavvur qilib bo‘lmaydi. Bu sport turi muxlislar tashrifi bo‘yicha Amerika futboli va beysboldan so‘ng uchinchi o‘rinda turadi.
Basketbol AQShda eng ko‘p o‘ynaladigan o‘yin hisoblanadi va bilan mamlakatda 26 milliondan ortiq odam shug‘ullanadi.
Shuningdek, AQSh va Kanada jamoalari ishtirok etadian Milliy basketbol assotsiatsiyasi ligasi dunyo miqyosida eng ko‘p tomosha qilinadigan turnir hisoblanadi.
Jamoaviy o‘ynaladigan boshqa sport turlarida bo‘lgani kabi AQShda bo‘lib o‘tadigan basketbol o‘yinlari juda qiziqarli va keskin kurashlar ostida kechadi.
Shu bilan birga tanaffus paytlarida zaldagi muxlislar uchun turli tanlovlar o‘tkaziladi va o‘yinlar qiziqarli shouga aylanadi.
1993 yilda ana shunday tanlovlarning biri mojaro bilan yakun topadi. “Chicago bulls” jamoasiga homiylik qiluvchi kompaniya mukofot uchun va’da qilingan 1 mln dollarni g‘olib yigit Don Kelhunga to‘lab berishdan bosh tortadi.
Foto: spors.qq.com
Million dollarlik aniq zarba
1993 yil 14 aprel. Chikago shahridagi arenada MBA muntazam ligasida ishtirok etuvchi “Chicago bulls” va “Miami Heat” jamoalari bellashmoqda.
O‘sha paytda AQShlik jahonga mashhur basketbolchi Maykl Jordan “Chicago bulls” jamoasi sharafini himoya qilar va u ham maydonda edi.
O‘yinga tanaffus berilgan paytda “Chicago bulls” jamoasi, “Koka-kola” kompaniyasi Lettuce Entertain You restoranlar tarmog‘idan iborat tashkilotchilar yutuqli tanlov o‘tkazadi.
Tanlovga ko‘ra, avval muxlislar orasidan tasodifiy yo‘l bilan bir necha kishi tanlab olinadi. So‘ng ular navbati bilan basketbol maydonining bir chetidan, ikkinchi chetidagi savatchaga to‘pni uloqtirishi kerak edi.
Qoida aniq: 23 metr uzoqlikdan savatchaga to‘pni aniq tushirgan qatnashchi g‘olib bo‘ladi va u 1 mln dollarga ega chiqadi. Agar bu ishni bir necha kishi bajarsa mukofot puli ular orasida teng taqsimlanadi.
Yutuqni “Chicago bulls” jamoasiga homiylik qilayotgan “American Hole ‘N One” sug‘urta kompanisi to‘lab berishi lozim edi.
Tanlov boshlangach bir necha kishi to‘pni uloqtiradi, biroq savatchaga tushira olmaydi. Aslida bu ish juda qiyin bo‘lib, shu sababli ham tashkilotchilar tanlovga yutuq sifatida katta mablag‘ qo‘ygandi.
Navbat kanselariya do‘koni sotuvchisi bo‘lib ishlovchi Don Kelhunga keladi. Yigit uloqtirgan to‘p to‘g‘ri borib savatchaga tushadi. Shunda arenada o‘tirgan muxlislar yigitni olqishlay boshlaydi.
Foto: Videodan kadr
O‘sha paytda tanaffus olgan basketbolchilar tanlovni kuzatishayotgandi. Ular ham navbati bilan yigitni quchoqlab, tabriklashadi. Jumladan, maydonda bo‘lgan Maykl Jordan ham.
Don Kelhunning qo‘liga 1 dollarlik yutuqqa ega chiqqani haqidagi banner-sertifikat topshiriladi. Yigit o‘sha kuni xursand holda sevimli jamoasining arenasidan chiqib ketadi. Ertasi kuni esa muammo boshlanadi…
G‘irromlik
Don Kelhun ancha-muncha basketbolchilar ham amalga oshirolmaydigan ishni uddalab, mukofot puliga ega chiqqandi. Biroq 23 metrdan to‘pni savatchaga hech kim tushira olmasligiga ishonib pul tikkan sug‘urta kompaniyasi yutuqni to‘lashga kelganda g‘irromlik qilardi.
Kompaniya Don Kelhunga mukofot puli berilmasligini e’lon qilib, buning ikkita sababini keltiradi. Birinchi sababga ko‘ra Don Kelhun to‘pni uloqtirayotganda chiziqni bosgan.
Ikkinchisi, u avvalroq bir muddat kollejdagi jamoa safida basketbol o‘ynagan. Kompaniya tanlov oddiy muxlislar o‘rtasida o‘tkazilganini va unda Donning ishtiroki xato bo‘lganini aytadi.
Ya’ni, sug‘urta kopaniyasi tanlov ishtirokchilari so‘ngi 5 yilda basketbol bilan muntazam shug‘ullanmagan bo‘lishi kerak edi, deb turib oladi.
Foto: Videodan kadr
Shundan so‘ng sug‘urta kopaniyasining vajlari bo‘yicha tekshiruv o‘tkaziladi. Eng avval Don Kelhun to‘pni uloqtirayotgan paytda chiziqni bosganmi yoki yo‘q, shu tekshiriladi.
Jarayon tasvirga tushirilgandi. Video sinchiklab ko‘rilganda Donning chiziqni bosmagani ma’lum bo‘ladi. Ikkinchi sabab bo‘yicha ham komissiya yigitni haq deb topadi.
Chunki shartga ko‘ra, tanlovda professional sportchi, hatto faoliyatini tugatgan bo‘lsa ham qatnashishi mumkin emasdi. Don Kelhun esa hech qachon basketbol bilan professional tarzda shug‘ullanmagan, shunchaki kollejdagi havaskor jamoada o‘ynagandi.
Sug‘urta kopaniyasining ikkita vaji ham o‘rinli emas, deb topiladi. Biroq ular baribir 1 mln dollarni to‘lashni xohlamaydi.
O‘sha paytda Don Kelhun bilan sodir bo‘lgan hodisa va sug‘urta kompaniyasining g‘irromliq qilayotgani AQSh OAV lari e’tiboriga tushadi va ular birin ketin hodisa haqida yoza boshlaydi. Ammo bu ham sug‘urta kopaniyasining fikrini o‘zgartira olmaydi.
Hodisaga “Chicago bulls” jamoasining aralashuvi
Don Kelhunga qilingan g‘irromlik ommaga oshkor bo‘lgach muxlislar “Chicago bulls” jamoasini ham ayblay boshlaydi. Chunki tanlov jamoaning uy arenasida, uning o‘yini paytida tashkillashtirilgandi.
Qolaversa gazetalar va turli telekanallar har kuni Don Kelhunga qilingan g‘irromlik haqida maqola hamda ko‘rsatuvlar berib, muxlislarni yanada junbushga keltiradi.
Foto: alamy.com
Bu orada bir yilcha vaqt o‘tib ketadi va Don Kelhun sug‘urta kompaniyasidan o‘z yutug‘ini ololmaydi. Kunlarning birida “Chicago bulls” jamoasi rahbariyati 1 mln dollarlik yutuq bo‘yicha matbuot anjuani o‘tkazishi haqida e’lon beradi.
Matbuot anjumanida jamoa rahbariyati sug‘urta kompaniyasidan farqli ravishda Don Kelhun 1 mln dollarni haqqoniy yutganini tan oladi. So‘ng sug‘urta kompaniyasi to‘lashdan bosh tortgan pullarni jamoa to‘lab berishini ma’lum qiladi.
Faqat jamoa rahbariyati Donga pullarni birdaniga emas, har yili 50 ming dollardan 20 yil davomida to‘lab borilishini aytadi. Yigitning bunga ko‘nishdan o‘zga chorasi qolmaydi.
O‘shandan keyin Don Kelhun 2013 yilgacha 20 yil davomida har yili “Chicago bulls” jamoasidan 38 ming dollardan olib turadi. Qolgan 12 ming dollar daromad solig‘i uchun ushlab qolinadi. Shu tariqa yigit o‘zi yutgan mukofot pullarini to‘liq oladi.
Garchi bir urinishda million dollarni yutgan bo‘lsa-da Don Kelhun millionerga aylana olmaydi – u kanselariya mahsulotlari sotiladigan magazindagi ishini davom ettiradi.
Mashmashaga Maykl Jordanning aralashuvi
Don Kelhun to‘pni savatchaga tushirgan kuni afsonaviy basketbolchi Maykl Jordan ham maydonda edi. Boshqalar kabi u ham g‘olibni tabriklaydi.
Foto: Videodan kadr
O‘yin so‘ngida “Chicago bulls” jamoasining barcha o‘yinchilari Don Kelhun savatchaga tushirgan to‘pga dastxat qo‘yib berishlari lozim edi. O‘shanda faqat bir kishi – Maykl Jordan bu ishni qilmaydi. Jamoadoshlari dastxat qo‘yayotganda u indamay kiyinish xonasiga kirib ketadi.
Mayklning dastxat qo‘ymagani sababi bor edi. 1992 yilda u Upper Deck kompaniyasi bilan shartnoma imzolagandi.
Ushbu kelishuvga ko‘ra, Upper Deck Jordanning dastxati tushirilgan turli mahsulotlarni ishlab chiqaruvchi yagona kompaniya hisoblanardi.
Sportchi va kompaniya o‘rtasida tuzilgan shartnomada Jordanning futbolka, to‘plar va boshqa narsalarga dastxat qo‘yishi cheklangandi. Jordan faqat xayriya tadbirida yoki kasal bolalar uchun dastxat qo‘yishi mumkin edi.
Don Kelhun nima qilib bo‘lsa ham Jordanning dastxatini olishni maqsad qiladi va “Chicago bulls” jamoasining o‘yinlariga muntazam tusha boshlaydi. Biroq mashhur o‘yinchining dastxatini ololmaydi.
Oradan bir yilcha vaqt o‘tadi. Sug‘urta kompaniyasi hamon mukofot pulini to‘lab berishni kechiktirib kelar, Don esa da’vogar sifatida yurgandi. Bir kuni yigit Maykl Jordan o‘g‘lining o‘yinlarini ko‘rish uchun u o‘qiydigan maktabga borib turishini eshitadi va o‘sha yoqqa otlanadi.
Foto: memedeportes.com
Biroq tan soqchilar uni Mayklning oldiga qo‘ymaydi. Ular sportchi baribir dastxat bermasligini ta’kidlaydi. Don u yerdan chiqib ketayotganida tan soqchilardan biri uni quvib yetadi va Maykl chaqirayotganini aytadi.
Yigit Jordan bilan uchrashganda sportchi Donni taniydi va “Pulingizni oldingizmi?” deb so‘raydi. Yigit olmaganini bildiradi.
Shundan so‘ng Jordan “Chicago bulls” rahbariyatiga bosim o‘tkazadi va yigitga yutuqni to‘lab berishni talab qiladi. Avvaliga jamoa rahbariyati ko‘nmaydi.
Biroq bir muddat o‘tgach klub rahbariyati o‘zining eng yaxshi o‘yinchisi qo‘ygan talabga ko‘nishga majbur bo‘ladi.
Angliyaning olti jamoasidan to‘rttasi turnirni tark etdi. Chorakfinalning barcha juftliklari aniq bo‘ldi.
«Kamp Nou»da rekordlar va antirekord
«Barselona» – «Nyukasl» 7:2
Gollar: Rafinya, 6 (1:0). Elanga, 15 (1:1). Bernal, 18 (2:1). Elanga, 28 (2:2). Yamal, 45+7 – penalti (3:2). Fermin Lopes, 51 (4:2). Levandovski, 56 (5:2). Levandovski, 61 (6:2). Rafinya, 72 (7:2)
«Barselona»: X. Garsiya (Shchensni, 82), Kubarsi, Martin, Joau Kanselu (Espart, 66), E. Garsiya (Arauxo, 21), Pedri, Bernal, Fermin Lopes (Olmo, 66), Rafinya, Yamal, Levandovski (Torres, 66)
«Nyukasl Yunayted»: Ramsdeyl, Tiau, Byorn, Holl, Trippiyer (Livramento, 46), Joelinton (Botman, 64), Tonali (Uillok, 55), Remsi, Barns, Elanga (Myorfi, 64), Gordon (Osula, 81)
Ogohlantirishlar: Kubarsi, 44 – Joelinton, 17. Trippiyer, 45. Uillok, 60
Birinchi o‘yin: 1:1
«Kamp Nou»dagi o‘yin turli-tuman rekordlar jamlanmasiga aylandi. Birinchidan, Angliyaning hech bir klubi bungacha Chempionlar ligasi pley-offidagi bir o‘yinda 7 gol o‘tkazib yubormagandi. «Nyukasl» esa shunday imkonsiz ko‘ringan ishni uddaladi. O‘z maydonida to‘liq ustunlik qilgan va so‘nggi daqiqalarda penalti tufayli g‘alabani qo‘ldan chiqargan APL vakili javob o‘yinining birinchi bo‘limida ham munosib qarshilik ko‘rsatdi. Mehmonlar uchta gol o‘tkazib yuborgan bo‘lsa-da, o‘zi ham raqib mudofaasidagi qo‘pol xatolardan foydalanib, ikkita gol urdi.
Ammo Kiran Trippiyer birinchi bo‘limga qo‘shib berilgan daqiqalarda penaltiga sababchi bo‘ldi va Lamin Yamal uchinchi bor jamoasini hisobda oldinga olib chiqdi. Tanaffusdan keyin esa «Nyukasl»ni tanib bo‘lmay qoldi. Eddi Hau jamoasi shunchaki sochilib ketdi va 10 daqiqa ichida uchta gol qo‘yib yubordi. Bunday himoya chizig‘i bilan ko‘p narsadan umid qilib bo‘lmasdi. Ayniqsa Jyeykob Remsining xatosi yilning eng kulgili holatlari kolleksiyasidan o‘rin olishi tayin. Uning qo‘pol xatosi yettinchi gol o‘tkazilishiga olib keldi.
Rafinya bu o‘yinda «gol+pas» tizimida 4 (2+2) ochko ishladi, Robert Levandovski dublni rasmiylashtirdi. Polyak hujumchisi birdaniga bir necha rekordni urdi. U Chempionlar ligasida urgan gollari sonini 41 taga yetkazib, bu borada Lionel Messining rekordini yangiladi. Bundan tashqari, Robert endi Chempionlar ligasida dubl qayd etgan eng katta yoshli futbolchi hisoblanadi – u hozir 37 yoshda. «Barsa» uchun yagona minus – darvozabon Joan Garsiya jarohat olishi bo‘ldi. Chorakfinalda jamoa usiz qiynalishi mumkin.
Salohning benefisi
«Liverpul» – «Galatasaroy»
Gollar: Soboslai, 25 (1:0). Ekitike, 51 (2:0). Gravenberh, 53 (3:0). Saloh, 62 (4:0)
Aniq ijro etilmagan penalti: Saloh, 45+4’
«Liverpul»: Alisson, van Deyk, Konate, Kerkez, Frimpong (Jons, 67), Gravenberh (Nioni, 89), Virs (Kiyeza, 89), Soboslai, Makallister, Saloh (Gakpo, 74), Ekitike (Ngumoha, 89)
«Galatasaroy»: Ugurjan Chaqir, Abdulkarim Bardakchi (Eren Elmali, 73), Singo, Yakobs, Boe (Sane, 46), Torreyra (Yunus Oqgun, 60), Lemina, Sara, Barish Yilmaz, Sholloi, Osimhen (Lang, 46, Ikardi, 80)
Birinchi o‘yin: 0:1
Chorshanba kungi o‘yinlarda chinakamiga intriga saqlanib qolgan yagona o‘yin «Enfild»da edi, bu yerda mezbonlar minimal farqni yo‘qqa chiqarishi talab etilardi. Mezbonlar birinchi bo‘lim o‘rtalaridayoq bu vazifani uddalashdi. Mak Allister burchak zarbasini ijro etishda raqiblarni dog‘da qoldirib, to‘pni yerlatib jarima maydoni chizig‘i hududiga yetkazib berdi, u yerda ortdan kelgan Soboslaini esa hech kim kutib olmadi.
«Liverpul»ning bu mavsumdagi eng yaxshi futbolchisi bo‘lib turgan vengriyalik yarimhimoyachi jamoasi tanaffusga ikki gol farqi bilan chiqib ketishi uchun barcha ishni qildi. Ammo u ishlagan penaltini Saloh aniq ijro eta olmadi.
Misrlik hujumchi o‘z vaziyatlaridan foydalana olmagan bo‘lsa-da, ikkinchi bo‘lim boshida ikki daqiqa ichida urilgan ikki golda ham ishtirok etdi. Avvaliga tezkor qarshi hujumda u Ekitikega ideal uzatma berdi, biroz o‘tib uning zarbasidan keyin darvozabondan qaytgan to‘pni Gravenberh darvozaga kiritib yubordi va «Galatasaroy» amalda chorakfinalga chiqishdan umid uzdi. Salohning o‘zi ham yakunda o‘z nomini tabloga yozdirib qo‘ydi – Virs tovonida uzatgan pasdan keyin o‘zining eng yaxshi yillarida bo‘lgani kabi aylanma zarba yo‘lladi.
Biroz o‘tib «Enfild»da yig‘ilganlar zaxiraga olinayotgan o‘z kumirini olqishlar ostida kuzatib qo‘ydi. Bu oqshomdagi gol uning uchun YeChLdagi 50-goli edi. U shundan 47 tasini «Liverpul» safida urgan («Bazel»da 2 va «Chelsi»da 1). Saloh – bunday ko‘rsatkichga erishgan ilk afrikalik futbolchi bo‘ldi. Oldinda esa Arne Slot jamoasini chorakfinalda «PSJ»ga qarshi o‘yinlar kutmoqda. Mersisaydliklar uchun bu o‘tgan mavsumdagi mag‘lubiyat uchun revansh olish imkoniyatidir.
Inglizlarning yana bir jamoasini ispanlar chiqarib yubordi
«Tottenhem» – «Atletiko» 3:2
Gollar: Kolo Muani, 30 (1:0). Alvares, 47 (1:1). Simons, 52 (2:1). Gansko, 75 (2:2). Simons, 90+1 – penalti (3:2)
«Tottenhem Hotspur»: Vikario, Romero (Danso, 81), van de Ven, Spens, Dregushin (Udoji, 66), Grey (Gallaher, 81), Sarr, Simons, Tel (Olusesi, 81), Porro (Bergvall, 74), Kolo Muani
«Atletiko»: Musso, Gansko, Le Norman, Rudjyeri, Molina (Koke, 64), Kardozo, Liorente, Lukman (Syorlot, 64), Simeone (Ximenes, 87), Grizmann (Baena, 84), Alvares (Gonsales, 84)
Ogohlantirishlar: Porro, 57. Vikario, 58. Romero, 70. Udoji, 72 – Rudjyeri, 28. Lukman, 56. Syorlot, 90
Birinchi o‘yin: 2:5
Yaqinda «Atletiko» Ispaniya kubogi yarimfinalida «Barselona»ga qarshi birinchi uchrashuvda yirik g‘alabaga (4:0) erishgach, «Kamp Nou»dagi javob o‘yinida bu ustunlikni saqlab qolish uchun to‘liq himoyaviy o‘yin uslubini tanlagandi. Londonda esa barchasi butunlay boshqacha kechdi va dastlabki 45 daqiqalikda mehmonlar sakkizta zarba berishdi, Lukman esa darvozani ishg‘ol etishga ham muvaffaq bo‘ldi. Ammo – ofsayddan. Yana bir necha xavfli hujumlar uyushtirildi, ammo yakunda Diyego Simeone jamoasi yo‘q joydan «Tottenhem»ga o‘yinga qaytish imkonini berdi. Autdan to‘p tashlanishi, Telning jarima maydoni markaziga uzatmasi, u yerda esa yolg‘iz qoldirilgan Kolo Muani.
Mezbonlar ikkinchi golni ham urishganida ispanlar og‘ir vaziyatga tushib qolgan bo‘lardi, faqat darvozabon Musso jamoa joniga ora kirdi. Argentinalik posbon Telning burchakka yo‘naltirilgan zarbasini oyoqlari bilan to‘sib qoldi. Birinchi bo‘limdan keyin baribir intriga saqlanib qoldi va buning uchun mezbonlar Vikarioga minnatdorchilik bildirishi kerak bo‘ladi. Juliano Simeone uzoq masofadan zarba yo‘llaganida to‘p Romeroga tekkan holda o‘z trayektoriyasini o‘zgartirdi, ammo allaqachon to‘p yo‘liga yotgan italiyalik darvozabon o‘rnidan turib, xavfni bartaraf etishga ulgurdi.
Ammo ikkinchi bo‘lim boshida «Atletiko» baribir intrigani o‘ldirdi. Avvaliga Xulian Alvares Simons gol urishiga to‘sqinlik qildi (mezbonlar uning harakatini fol deb e’tiroz bildirishdi) va qarshi hujumni o‘zi gol bilan yakunlandi. U jarima maydonida Lukmandan pas qabul qilib oldi va to‘pni yuqori burchakka aniq yo‘lladi.
Hakamdan va raqiblardan ranjigan Simons bir necha daqiqa o‘tib baribir o‘z maqsadiga erishdi va jamoasini yana oldinga olib chiqdi. Bir necha daqiqa o‘tib Musso yana madridliklarni qutqarib qoldi – u Porroning shvedka uslubida olis burchakka yo‘llagan zarbasiga qo‘llarining uchi bilan yetib bordi. «Matraschilar» muxlislari Alvaresning burchakdan oshirgan to‘pi Hansko tomonidan darvozaga kiritilganidan keyingina yengil tin olishdi. O‘yin oxirida Simons o‘zi ishlagan penaltini aniq ijro etishi esa umumiy natijani o‘zgartirmadi.
Madriddagi birinchi o‘yinda londonliklar bosh murabbiyi Igor Tyudor darvozabon bo‘yicha muvaffaqiyatsiz tajriba o‘tkazmaganida «Tottenhem» «Atletiko» bilan tengma-teng kurashishi mumkin edi, ammo murabbiyning o‘sha qarori birinchi o‘yinda «shporlar»ning imkoniyatlarini keskin pasaytirib yuborgandi. Natijada ikki o‘yinda xuddi «Chelsi» kabi sakkiz gol o‘tkazib yuborgan «Tottenhem» turnirni tark etdi, «Atletiko» esa «Barselona» bilan o‘yinlarga tayyorgarlikni boshlaydi.
«Atalanta» tarixga kirdi
«Bavariya» – «Atalanta» 4:1
Gollar: Keyn, 25 – penalti (1:0). Keyn, 54 (2:0). Karl, 56 (3:0). Dias, 70 (4:0). Samarjich, 85 (4:1)
«Bavariya»: Urbig, Kim Min Je, Ta, Bishof (Pavich, 72), Stanishich (Gnabri, 72), Goretska, Pavlovich (Ofli, 55), Rafael Gerreyru (Ito, 83), Dias, Karl, Keyn (Jyekson, 72)
«Atalanta»: Sportello, Hin, Skalvini (Axanor, 83), Kossunu, Pashalich, Ederson (Samarjich, 57), Bernaskoni, Bellanova, Sulemana (Raspadori, 71), De Ketelare (de Ron, 57), Skamakka (Krstovich, 71)
Birinchi o‘yin: 6:1
Bergamodagi tennischa hisobdan (6:1) keyin ham «Bavariya» muxlislarida darvozabon pozitsiyasi tufayli xavotir saqlanib qolgandi. Zayavkadagi to‘rt darvozabon – Noyyer, Ulrayh, Klanats va Urbig – barchasi jarohat tufayli safdan chiqqandi. Faqat ularning to‘rtinchisi so‘nggi kunlarda safga qaytdi va Vensan Kompani darvozaga o‘smirlardan birini qo‘yishiga to‘g‘ri kelmadi.
Umuman olganda, xavotirlar o‘rinsiz edi. Baribir darvozabonga amalda ish topilmadi. Bergamoliklar ham bu o‘yinda darvozabonni almashtirgandi va bu mavsumda deyarli o‘ynamagan 33 yoshli Sportello Keyn ijrosidagi penaltini qaytardi. Ammo u darvoza chizig‘idan ertaroq oldinga chiqib ketgani ma’lum bo‘ldi, Harri esa takroriy zarbada adashmadi.
Ikkinchi bo‘limda esa myunxenliklarni to‘xtatib bo‘lmadi. Avvaliga Keyn o‘yindan ham gol urdi, keyin esa Dias va Karl tandemi bittadan gol urdi (ular bir-biriga golli uzatma berishdi). Bergamoliklar esa bu o‘yinda ham bitta javob goli urishga erishdi, ammo Italiyaning yevrokuboklar pley-off bosqichida ikki o‘yinda 10 gol o‘tkazgan ilk jamoasi sifatida tarixga kirdi. «Bavariya»ni esa navbatdagi bosqichda «Real»ga qarshi janglar kutmoqda.
YeChLda 8 jamoa qoldi
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
Stadion suriluvchi tom va maydonga ega bo‘ladi. Uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. 45000 tomoshabinga mo‘ljallangan arena “Al Hilol” va “Al Nassr” klublari uchun uy maydoni bo‘lishi kutilmoqda.
Saudiya Arabistonida qurilayotgan shahzoda Muhammad bin Salmon nomidagi ko‘p funksiyali stadionning yangi suratlari e’lon qilindi. U 2034 yilgi futbol bo‘yicha jahon chempionatini o‘tkazish uchun ehtimoliy arenalardan biri sifatida ko‘rilmoqda.
Qurilish ishlari Ar-Riyod shahri g‘arbidagi Qiddiya ko‘ngilochar hududida olib borilmoqda.
Foto: SaudiProject
Stadion suriluvchi tom va maydonga ega bo‘ladi, uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. Devor ochilganida, maydon atrofidagi tribunalar va Tuvayk qoyasi manzarasi namoyon bo‘ladi. Bu dunyodagi birinchi to‘liq integratsiyalashgan majmua bo‘lib, stadionni bir necha soat ichida turli tadbirlar uchun moslashtirish imkonini beradi.
Geometrik shakldagi binolarning tashqi qismi raqamli ekranlar bilan qoplanadi va ular qoyadan o‘sib chiqqandek ko‘rinadi.
Foto: SaudiProject
Stadion atrofida sport va ko‘ngilochar hududlarga ega bo‘lgan baland binolar quriladi. Ular ichki ko‘chalar orqali bog‘lanadi va bu ko‘chalar ham LED ekranlar bilan qoplanadi. Ushbu yo‘laklar tashrif buyuruvchilarni qoya chetidagi kuzatuv maydonchalariga olib boradi.
Loyihasi Populous arxitektura byurosi tomonidan ishlab chiqilgan ushbu arena 45000 tomoshabinga mo‘ljallangan.
Foto: SaudiProject
Stadion Saudiya Arabistoni professional ligasining “Al Hilol” va “Al Nassr” klublari uchun uy maydoni bo‘ladi. Shu bilan birga, bu yerda boks, kibersport, konsertlar va teatr tomoshalari kabi turli sport va madaniy tadbirlar ham o‘tkaziladi.
NBU auksion ob’yektlar bo‘yicha Telegram-guruhni ishga tushirdi
Eron islomiy mamlakatlarga chaqirmoqda
O‘zbekiston ayollar milliy jamoasi JCh yo‘llanmasini qo‘lga kiritolmadi
-
Turk dunyosi4 days agoTurkiyaning Baykal K2 bir tomonlama hujumga uchragan uchuvchisiz samolyotining toʻda harakatini sinovdan oʻtkazdi
-
Jamiyat23 hours ago
Tadbirkor boshpanasiz bo‘lgan 5 ta oilani uy-joy bilan ta’minladi
-
Dunyodan5 days ago
Iroq g‘arbida AQShning yonilg‘i quyuvchi samolyoti urib tushirildi
-
Iqtisodiyot1 day agopayme Tez QR orqali to‘lovni 3% keshbek bilan ishga tushirmoqda
-
Iqtisodiyot2 days agoMetandan go‘shtgacha. Narxi keskin oshgan mahsulot va xizmatlar
-
Iqtisodiyot3 days ago«Yomg‘ir va qorda ham foydalanishga tayyor bo‘ladi» – Toshkent-Andijon pulli yo‘li haqida nimalar ma’lum?
-
Dunyodan1 day ago
Eron Hormuz boʻgʻozi orqali cheklangan oʻtishga ruxsat beradi
-
Iqtisodiyot2 days ago“Markaziy Osiyo umumiy investitsiya makonini yaratishi zarur” – Alisher Umirdinov