Loyihaga ko‘ra, O‘zbekistonda tungi vaqtda faoliyat yuritadigan ko‘chalar aholi soni 50 mingdan oshgan shaharlarda tashkil etiladi. Ushbu ko‘chalarda filialini ochgan tadbirkorlik sub’yektlari moliyaviy qo‘llab-quvvatlanadi va ayrim xarajatlari qoplab beriladi. “Tungi iqtisodiyot menejeri” lavozimi joriy etiladi. Toshkent Farmatsevtika universiteti Toshkent viloyatiga ko‘chirilib, uning o‘rnida ming o‘rinli avtoturargoh va besh yulduzli mehmonxona quriladi.

Strategik islohotlar agentligi prezidentning tungi iqtisodiyotni rivojlantirish chora-tadbirlari bo‘yicha qarori loyihasini tayyorladi.

Loyihaga ko‘ra, 2025-2030 yillarda:

tun-u kun faoliyat ko‘rsatuvchi ko‘chalar (hududlar) soni 320 taga;
tun-u kun faoliyat ko‘rsatuvchi kafe va restoranlar soni 8 mingtaga;
tun-u kun faoliyat ko‘rsatuvchi savdo va xizmat ko‘rsatish nuqtalari soni 14,2 mingtaga yetkaziladi.

Bundan tashqari, loyihadan tun-u kun faoliyat ko‘rsatuvchi ko‘chalar (hududlar)da 755 ta avtoturargohlar tashkil etish, tun-u kun faoliyat ko‘rsatuvchi ko‘cha (hudud)larda tashkil etiladigan savdo va xizmat ko‘rsatish nuqtalarida 11,3 mingta yangi ish o‘rinlari yaratish, tunda faoliyat yuritadigan turistik obektlar va madaniy tadbirlarni rivojlantirish orqali 190 ming mahalliy va xorijiy sayyohlarni jalb qilish rejalari o‘rin oldi.

Hujjatga ko‘ra, savdo, xizmat ko‘rsatish va ko‘ngilochar sohalarning tungi vaqtda ham to‘siqsiz faoliyat ko‘rsatishi kafolatlanishi belgilanadi.

Tungi vaqtda faoliyat yurituvchi tadbirkorlar qo‘llab-quvvatlanadi

Qaror loyihasida gastronomik, ko‘ngilochar va turizm sohalarida ishlaydigan tadbirkorlik sub’yektlari uchun to‘langan soliqning bir qismini qaytarib berish (keshbek) tizimi kengaytirilishi nazarda tutilgan.

Mahalliy brendga ega tadbirkorlik sub’yektlari tomonidan tun-u kun faoliyat ko‘rsatuvchi ko‘cha va hududlarda o‘z filialini ochish uchun bitta filial kamida:

5 ta yangi ish o‘rni yaratgan taqdirda 1 milliard so‘mgacha;
10 ta yangi ish o‘rni yaratgan taqdirda 5 milliard so‘mgacha;
15 ta yangi ish o‘rni yaratgan taqdirda 10 milliard so‘mgacha moliyaviy qo‘llab-quvvatlanadi.

Bundan tashqari, hududlarda filial ochish istagini bildirgan mahalliy brend egalariga yangi xodimlarni o‘qitish va qayta tayyorlash bilan bog‘liq xarajatlarning yarmi bir nafar xodim uchun bazaviy hisoblash miqdorining 5 barobaridan oshmagan miqdorda qoplab beriladi. Shuningdek, mahalliy brend egalari tomonidan ishlab chiqarilgan mahsulotlarga sifat darajasini anglatuvchi milliy sertifikatlarni olish bilan bog‘liq xarajatlar to‘liq, xalqaro tan olingan sertifikatlarning 3 ming AQSh dollaridan oshmagan qismi qoplab beriladi.

Tun-u kun faoliyat yurituvchi ko‘chalar qanday bo‘ladi?

Loyihada belgilanishicha, tun-u kun faoliyat ko‘rsatuvchi ko‘cha yoki hududlar viloyat va tuman markazlarida, aholi soni 50 mingdan oshgan shaharlarda, aholi va turistlar tashrifi kuzatiladigan gavjum va tadbirkorlik sub’yektlari tomonidan tungi vaqtda faoliyat ko‘rsatish istagi bildirilgan ko‘cha yoki hududlarda tashkil etiladi.

Bundan tashqari, tun-u kun ishlaydigan ko‘chalarga quyidagi talablar qo‘yiladi:

Tun-u kun faoliyat ko‘rsatadigan ko‘chaning uzunligi o‘rtacha 800 metrdan 2000 metrgacha oraliqda bo‘lishi;
tadbirkorlik sub’yektlari uchun noodatiy (juma, shanba va yakshanba kunlari soat 06:00 dan 06:00 gacha) va kengaytirilgan (har kuni soat 09:00 dan 03:00 gacha) vaqt rejimida faoliyat ko‘rsatishi uchun yetarli infratuzilma shakllantirilishi;

• tun-u kun faoliyat ko‘rsatadigan ko‘chalar va hududlarda joylashgan tadbirkorlik sub’yektlariga yengil konstruksiyali qurilmalar (soyabonlar, o‘tirish joylari) o‘rnatish uchun o‘zlariga tutash hududlardagi yer maydonlari elektron onlayn-autsion savdolari orqali ijaraga berilishi;

avtomobil harakatlanadigan ko‘chalarda transport vositalarining tezligi 20 km/soatgacha cheklanishi;
tun-u kun faoliyat ko‘rsatadigan ko‘chalarda favqulodda holat, tez tibbiy yordam xizmatlari, xavfsizlik choralarini ta’minlash uchun maxsus joylar ajratilishi hamda «xavfsizlik chaqiruv tugmalari» o‘rnatilishi:
telekommunikatsiya (jumladan, Wi-Fi), bank-moliya xizmatlari yo‘lga qo‘yilishi;
tashrif buyuruvchilarning avtotransport vositalarini saqlash uchun aniq belgilangan avtoturargoh (parkovka, jumladan, ko‘p qavatli) bo‘lishi;
galereyalar, muzeylar va kinoteatrlar, hamda sport maydonchalari, sog‘lomlashtirish markazlari, kibersport va fitnes klublar ish vaqti uzaytirilishi;
obodonlashtirish, tozalik va jamoat xizmatlari yo‘lga qo‘yilishi.

Toshkent shahri tumanlari, Nukus shahri va viloyat markazlari hokimliklari tuzilmasida “tungi iqtisodiyot menejeri” lavozimi joriy etiladi.

Shuningdek, 2025 yil 31 dekabrga qadar: karshering milliy platformasi pilot shaklida Toshkent shahrining turistlar oqimi ko‘p bo‘lgan 3 ta tumanida (Mirobod, Yunusobod, Yakkasaroy) ishga tushiriladi. Toshkent shahar hokimligi davlat-xususiy sheriklik shartlarida Toshkent shahrida pilot shaklida avtomat veloshering loyihasini ishlab chiqadi va ishga tushiradi. Sog‘liqni saqlash vazirligi ko‘chma mobil klinikalar faoliyatini yo‘lga qo‘yadi.

Loyihada Toshkent Farmatsevtika institutini Toshkent viloyatida joylashgan “Tashkent 10 Pharma Park” hududiga ko‘chirgan holda, bo‘shagan yer maydonida 1 000 o‘rinli avtoturargoh qurib, davlat tasarrufiga o‘tkazish majburiyati bilan zamonaviy 5 yulduzli mehmonxona barpo etish taklifi ham ilgari surilmoqda.

Eslatib o‘tamiz, Strategik islohotlar agentligi O‘zbekistonda tungi iqtisodiyotni rivojlantirish maqsadida 2024 yilda maxsus hudud ajratilishiga oid rejalar haqida ma’lum qilgandi.

Agentlik joriy yil boshida Tungi iqtisodiyot konsepsiyasini ishlab chiqdi.

Source link