Sport
290 mln dollarlik loyiha qanday inshootlarni o‘z ichiga oladi? (fotoreportaj)
Majmua 100 gektar hududni egallaydi. Shaharcha markazidagi stadionda yengil atletikaning 48 yo‘nalishi bo‘yicha musobaqalar o‘tkazish mumkin. Kompleksda ilk xalqaro standartdagi velodrom mavjud bo‘lib, u Xalqaro Olimpiya qo‘mitasi talablari darajasida qurilgan. Kun.uz muxbiri mamlakatimiz sport hayotida yangi sahifa ochishga xizmat qilishi kutilayotgan mazkur majmua va u yerda sportchilar, tomoshabinlarga mo‘ljallangan sharoitlar bilan tanishdi.
Poytaxtning sharqiy qismida, Yangi O‘zbekiston ko‘chasi bo‘yida joylashgan Olimpiya shaharchasi 18 avgust kuni foydalanishga topshirildi. Shaharchaning qurilishi 2022 yil 9 noyabrda boshlangan bo‘lib, uch yil davomida Xitoyning CAMC Engineering kompaniyasi tomonidan amalga oshirildi. Loyiha umumiy qiymati qariyb 290 mln dollarga baholangan.
Majmua 100 gektardan ortiq hududni egallaydi. Unda stadion, suv sporti saroyi, velodrom, yakkakurash hamda jamoaviy sport turlari uchun majmualar, futbol, voleybol, tennis, chim ustida xokkey va yengil atletika uchun 15 ta ochiq maydon, paralimpiya yotoqxonasi va sport tibbiyoti ilmiy-amaliy markazi mavjud.
12 ming kishilik stadion
Olimpiya shaharchasining markazida stadion joylashgan. Ushbu majmua xalqaro turnirlar o‘tkazish bilan bir qatorda mahalliy sportchilarni tayyorlash, dual ta’lim tizimini rivojlantirishga ham xizmat qilishi kutilmoqda. Stadionning eng katta ustunligi shundaki, uning universal maydonida yengil atletikaning 48 yo‘nalishi bo‘yicha musobaqalar o‘tkazish mumkin. 9 qatorli yugurish yo‘laklari, xalqaro standartlarga mos yashil maydon hamda texnik jihozlar jahon chempionati darajasidagi turnirlarni qabul qilish imkonini beradi.
Mutaxassislarning ma’lum qilishicha, bu yerda Brilliant ligasi kabi xalqaro yirik musobaqalar, Paraatletika bahslari, ko‘zi ojizlar o‘rtasidagi IBSA o‘yinlarini o‘tkazish rejalashtirilmoqda. Ya’ni stadion imkoniyatlari faqat professional sport bilan cheklanmay, inklyuziv sport yo‘nalishlariga ham yo‘l ochadi.
Shuningdek, ushbu sport arenasida yirik tantanali tadbirlar tashkil etilishi uchun sharoitlar mavjud. Olimpiya yoki Osiyo miqyosidagi turnirlarda ochilish va yopilish marosimlari, madaniy dasturlar aynan shu stadionda o‘tkazilishi mumkin.
Majmuaning yana bir muhim vazifasi dual ta’lim tizimiga xizmat qilishidir. Musobaqalardan tashqari, bu yerda mahalliy o‘quv-yig‘inlar, sport maktablari amaliy mashg‘ulotlari, universitet talabalari uchun darslar o‘tkaziladi.
Olimpia standartlariga javob beruvchi velodrom
Velodromning o‘ziga xosligi — uning yog‘och qoplamasida. Yo‘lak qimmatbaho yog‘ochlardan yasalib, qavatma-qavat yotqizilgan. Trayektoriya va burilish burchaklari professional velosport talablariga mos ravishda loyihalashtirilgan. Bu nafaqat mustahkamlikni, balki sportchilar uchun zarur sanalgan xavfsizlikni ham ta’minlaydi.
Majmuada harorat doimiy barqaror bo‘ladi. Velodrom ichida yil davomida bir xil iqlim saqlanadi, bu esa yog‘och qoplamaning uzoq muddat davomida xizmat qilishini kafolatlaydi. Inshootda sportchilar uchun havo qarshiligi darajasi ham hisobga olingan.
Velodromdagi trekka yorug‘lik bir xil va teng darajada tushadi. Bu bir tomondan, sportchilar uchun qulay muhit yaratadi, ikkinchi tomondan musobaqalarni tomosha qilayotgan muxlislar hamda televizion translatsiyaga katta afzallik beradi.
Tomosha o‘rinlari 2 ming 200 kishiga mo‘ljallangan bo‘lib, ular maxsus himoya to‘sig‘i bilan jihozlangan. Mazkur sharoit tomoshabinlarning xavfsizligini ta’minlaydi va xalqaro musobaqalar mezonlariga mos keladi.
Xalqaro talablar darajasidagi suv sport saroyi
Majmua tarkibida 25×50 metrli suzish va 25×21 metrli suvga sakrash havzasi mavjud. Bundan tashqari, sportchilarning tayyorgarligi uchun mashg‘ulot basseyni va trenajyor zallari ham barpo etilgan. Butunjahon suv sporti federatsiyasi (World Aquatics) delegatsiyasi saroyni ko‘zdan kechirib, uning to‘liq xalqaro talablar darajasida ekanini tasdiqlagan. Bu esa O‘zbekistonga ilk bor qit’a va jahon chempionatlarini o‘tkazish imkonini beradi.
Saroyning universal dizayni bir nechta sport yo‘nalishlarini qamrab oladi. Bu yerda:
suzish,
suvga sakrash,
sinxron suzish,
suv polosi musobaqalari o‘tkazilishi mumkin.
Tomoshabinlar uchun mo‘ljallangan joy 2 mingdan ortiq muxlisni sig‘dira oladi. Arenaning yoritish, havoni shamollatish va xavfsizlik tizimlari ham xalqaro translatsiya va tomosha talablari asosida loyihalashtirilgan.
Jamoaviy va yakkakurash sport turlari majmualari
Har ikkala majmua ham uch qavatli qilib qurilgan bo‘lib, 2 ming nafardan ortiq tomoshabinni sig‘dira oladi. Binolarda sportchilar uchun mashg‘ulot zallari, hakamlar xonalari, tibbiy punktlar, kiyinish va dam olish joylari zamonaviy standartlarga mos ravishda jihozlangan. Muhandislik yechimlari tomosha jarayonining sifatini, sportchilarning xavfsizligi va qulayligini ta’minlaydi.
Jamoaviy o‘yinlar majmuasi voleybol, basketbol va gandbol musobaqalarini o‘tkazish uchun mo‘ljallangan. Tomoshabinlar uchun panoramali o‘rindiqlar va xalqaro talabdagi yoritish tizimi o‘rnatilgan. Yakkakurash sport turlariga iqtisoslashgan majmuada dzyudo, boks, taekvondo kabi yo‘nalishlar uchun maxsus ring va tatamilar, xavfsizlik talablariga mos qoplamalar o‘rnatilgan.
15 ta ochiq maydon
Olimpiya shaharchasida futbol, voleybol, tennis, chim ustida xokkey, yengil atletika kabilar bo‘yicha 15 ta ochiq maydon ham qurilgan. Ular orasida chim ustida xokkey maydonining barpo etilishi O‘zbekiston sport tizimi uchun yangiliklardan biri bo‘ldi. Bu sport turi mamlakatimizda keng rivojlanmagan bo‘lsa-da, yangi baza uning ommalashuviga zamin yaratishi, shu orqali O‘zbekiston qit’a va xalqaro musobaqalarda qatnashish imkoniyatlarini kengaytirishi mumkinligi ta’kidlangan.
Iklyuziv sport muhiti
Shaharcha infratuzilmasi loyihalanayotganda Paralimpiada o‘yinlari talablari ham inobatga olingan. Shaharchada nogironligi bo‘lgan sportchilar erkin harakatlanishi uchun keng va qulay yo‘laklar, panduslar, maxsus liftlar barpo etilgan. Stadion va sport majmualarida esa jismoniy imkoniyati cheklangan muxlislar uchun alohida sektorlar tashkil qilingan. Bu sektorlar tomosha jarayonidan chetda qolmaslik, barcha voqealarni qulay sharoitda kuzatib borish imkonini beradi.
Paralimpiya sportchilari uchun mashg‘ulot zallari ham individual moslashtirilgan bo‘lib, bu ularga yuqori darajada tayyorgarlik o‘tash imkonini beradi.
Mutaxassislarning aytishicha, inshootlar energiya jihatidan tejamkor texnologiyalar asosida qurilgan. Avtoturargohlar ustiga quyosh panellari o‘rnatilgan.
Ma’lumot uchun, 2025 yilda yoshlar o‘rtasidagi tashkil etiladigan, qit’amizning 45 davlatidan 3000 dan ortiq sportchini qamrab oladigan Osiyo va Paraosiyo o‘yinlari aynan shu yerda o‘tkaziladi. Musobaqalar tugaganidan keyin majmualar sport vakillari uchun mashg‘ulot maydoni sifatida xizmat qiladi. Shuningdek, shaharchada Sport vazirligi, Antidoping agentligi, Davlat sport akademiyasi, Jismoniy tarbiya ilmiy-tadqiqot instituti va Sport turlarini rivojlantirish markazi faoliyat yuritadi.
Diyoraxon Nabijonova,
Boymirza Xalilov
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
