Jamiyat
6000 funt oylik, qalbaki taklifnoma va g‘oyib bo‘lgan «menejer». Soxta ish e’lonlari ortidagi firibgarlik sxemasi
Nisbatan erkin ish jadvali, baland maosh, qat’iy talablarning yo‘qligi va kamiga Angliya, AQSh yoki Germaniyadagi nufuzli kompaniyada ishlash. Bu kabi ish e’lonlari aksariyat o‘zbekistonliklarning e’tiborini tortishi tabiiy. Ammo, hammasi ko‘ringanidek bo‘lmasligi, hushyor bo‘lmasangiz, yaxshigina mablag‘ yo‘qotilishi ham mumkin.
{Yii::t(}
O’tkazib yuborish 6s
O’tkazib yuborish
Yillar davomida o‘zbek migrantlari eng ko‘p yo‘l oluvchi davlatlar to‘rtligi quyidagicha shakllanib kelgan: Rossiya, Qozog‘iston, Turkiya va Janubiy Koreya. Ammo oxirgi yillarda vaziyat birmuncha o‘zgardi. O‘zbekistonliklar uchun Buyuk Britaniya, Germaniya, Polsha, Vengriya, Latviya, Litva, Birlashgan Arab Amirliklari, Qatar, Saudiya Arabistoni va Yaponiya kabi yangi yo‘nalishlar paydo bo‘ldi. O‘z navbatida, ushbu mamlakatlarda ishlash istagida bo‘lganlar soni ham oshib boryapti. Bundan esa qo‘shtirnoq ichidagi «uddaburonlar» foydalanib qolishga urinyapti.
Kun.uz soxta ish e’lonlariga aldanib qolgan vatandoshlar bilan bog‘liq holatlarni o‘rgandi.
«Samarqand viloyatidagi maktablardan birida o‘qituvchilik qilardim. Bir hamkasbim bilan Yevropaga ishga ketishga qaror qildik. Darsdan chiqib monomarkazda payvandchilikni o‘rgandim, bu orada katta yuk furalarini boshqarish imkonini beradigan haydovchilik guvohnomasini ham oldim. Dastlab xususiy bandlik tashkilotlari va konsalting firmalarga borib ko‘rdim. To‘lovni juda qimmat aytishgani sababli ularning xizmatidan foydalanmaslikka qaror qildim va rus tilini yaxshi bilganim uchun o‘zim chetdan ish qidira boshladim. Har kuni Layboard.com saytiga kirib, ish e’lonlarini ko‘rib chiqardim. Shunday kunlarning birida o‘zini Maksim Artyomov deb tanishtirgan odam men bilan bog‘landi. U Buyuk Britaniya fuqarosi ekanligini ta’kidlab, ishga joylashtirish va hujjatlarni qayta ishlash bo‘yicha 5 yillik tajribaga ega menejer ekanligini aytdi va menga ish taklif qildi. Pasport ma’lumotlarini ham yubordi. Tavakkal qilib, unga ishondim. Menga taklif qilingan ish Sanderland shahridagi Nissan zavodida edi. Oylik maosh 6 ming funtni tashkil etishi, vazifam sontroller ya’ni nazoratchilik ekani aytildi», deydi murojaatchi.
Birinchi bosqichda firibgar hamma ishlar yaxshi ketayotgani, barcha xarajatlar ish beruvchi tomonidan to‘liq qoplanishini aytadi. Hattoki aviachiptalar ham Nissan kompaniyasi tomonidan olib berilishiga va’da beradi. Keyin birdan ish taklifnomasi uchun pul kerak bo‘lishini, shoshilinch to‘lov qilinmasa bo‘sh vakansiya o‘rni boshqaga berilishi ma’lum qilinadi.
«Shundan so‘ng Maksimdan to‘lov qanday shaklda amalga oshirilishini so‘radik. U bank orqali deb aytdi. Birozdan so‘ng, sizlar ovora bo‘lib o‘tirmanglar, so‘m ko‘rinishda 2,5 mln so‘mdan plastik kartaga ham o‘tkazib bersalaring bo‘ladi, dedi. Menga Adelina M nomidagi O‘zbekistonda ochilgan Humo karta tashladi. Pulni o‘tkazdim-u, shubhalana boshladim. Ertasi kuni Maksim ish taklifnomasini yubordi», deydi murojaatchi.
Oradan 2 kun o‘tar-o‘tmas firibgar yana aloqaga chiqadi va sug‘urta uchun shoshilinch 200 dollardan pul kerakligini, shundan so‘ng vizani rasmiylashtirish boshlanishini aytadi.
«Pul o‘tkazmadik. Shundan keyin, Maksim Artemov ham g‘oyib bo‘ldi. Keyin yaxshilab o‘rganib ko‘rdim, Angliya bilan bog‘liq e’lonlarning o‘ntadan to‘qqiztasi firibgarlar tomonidan joylashtirilar ekan. Boshqalarga ham e’tiborli bo‘lishni, bunaqa soxta vakansiyalarga ishonmaslikni aytgan bo‘lardim», deya xulosa qiladi murojaatchi.
Kun.uz bilan bog‘langan tarjimon yigit shu kabi soxta e’lon orqali 500 dollar, yana bir holatda esa talaba yigit 450 dollardan ayrilganini aytadi.
Alohida ta’kidlab o‘tish lozimki, O‘zbekistonda ish o‘rni yetishmovchiligi bilan bog‘liq muammolar bor, mehnat muhojirlari uchun asosiy yo‘nalish bo‘lgan Rossiyada esa vaziyat kundan kunga yomonlashib boryapti. Shunday sharoitda Yevropa mamlakatlaridan ish topish moliyaviy holatni yaxshilash uchun katta imkoniyat, ammo bu yo‘lda ham ehtiyot bo‘lish lozim bo‘lgan ko‘plab jihatlar bor. Firibgarlar ham kundan kunga o‘z strategiyalarini takomillashtirib boryapti. Hozirda ular juda ishonarli saytlar yaratyapti, sun’iy intellekt yordamida soxta video suhbatlar tayyorlayapti va hujjatlarni professional darajada soxtalashtiryapti. Keling, qalloblar eng ko‘p ishlatadigan 5 ta jihatga to‘xtalib o‘tamiz:
Oldindan pul so‘rash. Qonuniy ish beruvchilar yoki agentliklar ishga joylashtirish, viza yoki hujjatlar uchun oldindan pul so‘ramaydi.
Haddan tashqari yuqori maosh va’dasi. Endi ishga boruvchi xodim uchun hech kim mamlakatdagi o‘rtacha maoshdan yuqori oylik taklif qilmaydi. Agar shunday taklif bo‘lsa, bu eng kamida shubhali va firibgarning tuzog‘i bo‘lishi mumkin.
Suhbatsiz yoki yuzaki tanlov. Yevropa kompaniyalari nomzodlarni jiddiy tekshiradi. Suhbatlarsiz tezda ish taklif qilinsa, ehtiyot bo‘lish lozim.
Birdaniga shaxsiy ma’lumotlarni so‘rash. Nomzoddan kompaniya xodimlari darhol pasport nusxasi, bank ma’lumotlari yoki boshqa maxfiy axborotlarni talab qilmaydi.
Bosim va shoshiltirish. «Tezroq qaror qiling», «faqat 2 ta joy qoldi», «boshqa nomzodlar ham ko‘p» kabi gaplar ham pul o‘marish uchun firibgarlar tomonidan juda ham ko‘p ishlatiladi.
Bundan tashqari, soxta vakansiyalardagi matnda xatolar va g‘alati jumlalar uchraydi, talab qilinadigan vazifalar noaniq tarzda, umumiy yoziladi, «hamma uchun mos» degan talablar bo‘ladi va yosh chegarasi ham ko‘rsatilmaydi, korporativ email o‘rniga messenjerlardan foydalaniladi. Yoki firibgarlar haqiqiy email’ga juda o‘xshash manzillardan foydalanadi:
@siemens.com o‘rniga @siemens-europe.com yoki @seimens.com.
«1500-2000 ming funt sterlingacha o‘tkazib berganlar bor»
Migratsiya agentligi boshqarma boshlig‘i Bobur Valiyev ham soxta ish e’lonlariga aldanib qolgan o‘zbekistonliklar ko‘p ekanligini tasdiqlagan holda, ish qidirayotganda e’tibor berish lozim bo‘lgan qator jihatlarga to‘xtalib o‘tdi.
«Bugungi kunda 1,8 mln O‘zbekiston fuqarosi xorijda mehnat faoliyatini olib boryapti. Bu ko‘rsatkich oldin 3,8 mlnni tashkil etgan. Oxirgi yillarda chetda ishlayotgan fuqarolarimizning soni qisqardi, shu bilan birga pul o‘tkazmalari oshyapti. Bu fuqarolarimiz dunyoning rivojlangan davlatlaridagi yuqori maosh beruvchi kompaniyalarda ishlayotganini anglatadi. Shunga qaramasdan, firibgarlar tomonidan ijtimoiy tarmoqlar orqali yuqori maoshlarni taklif qilgan holda yurtdoshlarimizni aldash holatlari uchrab turibdi. Bunaqa holatlardan qanday o‘zingizni himoya qilishingiz mumkin? Haqiqiy ish beruvchilar yozishmalarda kompaniyaning rasmiy elektron pochtasidan foydalanadi. Shuningdek, Buyuk Britaniyada ish beruvchi hamma xarajatlarni ishchi uchun qoplab beradi. Ular oldindan qanchadir pul so‘ramaydi, keyin ularning HR departamenti Whatsapp yoki Telegram orqali aloqaga chiqmaydi, balki rasmiy ravishda pochta orqali murojaat qilishadi. Shuningdek, hamyurtlarimizdan qanaqadir xizmat uchun oldindan pul bermasliklarini so‘rab qolardim. 1500-2000 ming funt sterlingacha «ish beruvchi»ga pul o‘tkazib berilyapti va keyin ular yo‘qolib qolyapti.
Xorijiy firibgarlar tomonidan soxta mehnat shartnomasini yuborish holatlari ham uchrab turibdi. Bunga ishonmaslikni so‘rab qolardik. Xorijga qonuniy ravishda chiqib ketmoqchi bo‘lganlarga Migratsiya agentligiga murojaat qilishni yoki tegishli litsenziyaga ega xususiy bandlik agentliklari xizmatidan foydalanishni tavsiya qilgan bo‘lardim. Yana bitta qiziq jihati shundaki, Germaniya yoki Britaniya kabi mamlakatlar hech qachon o‘zining tilini bilmaydigan mutaxassisni ishga jalb qilmaydi. Masalan, Germaniya tomonining eng katta talabi nemis tilini A2 yoki B1 darajasida bilish kerak. Britaniya tomoni ham qishloq xo‘jaligi mavsumiy ishlarini hisobga olmaganda, mutaxassisdan ingliz tilini kamida 5,5-6 IELTS darajasida bilishni so‘raydi. Yana bir narsaga e’tibor berish kerak, e’lonlardagi 3000 yoki 4000 funt sterling kabi maoshlarning hammasi yolg‘on. Yangi kelayotgan mutaxassis uchun bu darajada ko‘p oylik to‘lanmaydi. Bu firibgarlarning hiylasi», deydi Bobur Valiyev.
Yana bir bor alohida ta’kidlab o‘tamiz, Yevropa kompaniyalaridan ish topish 1-2 soatda hal bo‘ladigan jarayon emas. Bu vaqt talab qiladi. Hech qachon ish beruvchi viza uchun pul talab qilmaydi. «100 foiz viza kafolati», pulga «tezlashtirilgan yo‘l»larni taklif qilish firibgarlarning tuzog‘idan boshqa narsa emas. Har bir detalni sinchkovlik bilan tekshirish, berilayotgan va’dalarni tanqidiy jihatdan ko‘rib chiqish va tahlil qilish juda ham muhim. Bu sizning katta pulga aldanib qolmasligingizni kafolatlaydi. Ehtiyot bo‘ling!
Doston Ahrorov tayyorladi
Jamiyat
Profilaktika inspektori, yo‘l-patrul, patrul-post va qo‘riqlash xizmati yagona tizimga birlashtiriladi
Prezident Shavkat Mirziyoyev 29 iyun kuni profilaktika inspektorlari va jamoat xavfsizligini ta’minlash faoliyatini takomillashtirish, sohada kadrlar tayyorlash tizimini rivojlantirish yuzasidan takliflar taqdimoti bilan tanishdi.
Taqdimotda jinoyatchilikni baholashda raqamlar va ko‘rsatkichlarni taqqoslash amaliyotidan to‘liq voz kechilmagani ko‘rsatib o‘tildi. Jamoat xavfsizligi bo‘linmalari faoliyati samaradorligini baholash mezonlari “aholiga xizmat ko‘rsatuvchi tizim” tamoyili asosida belgilanishi taklif qilindi.
Buning uchun profilaktika inspektorlari, yo‘l-patrul, patrul-post va qo‘riqlash xizmatlari faoliyatini o‘zaro uyg‘unlashtirish, ularning aholi murojaatlariga tezkor munosabat bildirish, fuqarolar bilan ochiq muloqot qilish, xavf guruhiga kiruvchi shaxslar bilan manzilli ishlash borasidagi vazifalarini yagona tizimga birlashtirish nazarda tutilmoqda. Jumladan, yo‘l harakati xavfsizligini ta’minlashda ayrim funksiya va vakolatlarni patrul-post hamda qo‘riqlash xizmatlariga, jamoat tartibini saqlashdagi ba’zi vakolatlarni esa yo‘l-patrul xizmatiga berish ko‘zda tutilmoqda.
Mamlakatdagi 9 mingga yaqin mahallada 10 mingdan ortiq profilaktika inspektori xizmat qilmoqda. Davlat rahbari bu katta kuch ekanini ta’kidlab, jinoyatchilikni jilovlashda, avvalo, profilaktika inspektori ishini to‘g‘ri tashkil qilish zarurligini ko‘rsatib o‘tdi.
Amalda profilaktika inspektoriga xos bo‘lmagan 50 ga yaqin qo‘shimcha vazifa yuklatilgani, ayrim hollarda ularning mahallama-mahalla yurib, jinoyatchilikni jilovlash va aholi muammolarini hal etish o‘rniga boshqa ishlar bilan band bo‘lib qolayotgani qayd etildi.
Shu munosabat bilan ishlab chiqilgan “Ichki ishlar organlari profilaktika inspektorining maqomi to‘g‘risida”gi qonun loyihasi to‘g‘risida axborot berildi. Unda profilaktika inspektorining huquqiy maqomi, vazifalari, huquqlari, majburiyatlari, kasbiy faoliyat kafolatlari, ijtimoiy-huquqiy himoyasi, rag‘batlantirish va javobgarlik choralari aniq belgilanishi nazarda tutilgan.
Qonun loyihasiga ko‘ra, profilaktika inspektorining ustuvor maqsadi aholi ishonchining yuqori darajasiga erishish va xizmat hududida jinoyatchilikni jilovlashdan iborat bo‘ladi. U xizmat hududida tergovga qadar tekshiruv va profilaktikani amalga oshiruvchi mansabdor shaxs hisoblanadi.
Profilaktika inspektoriga faqat qonun bilan belgilangan vazifalar yuklanadi. Uning huquqlari, sha’ni, qadr-qimmati va ishchanlik obro‘si davlat himoyasi ostida bo‘ladi.
Loyihaga ko‘ra, profilaktika inspektorining kasbiy faoliyatiga aralashish, unga taalluqli bo‘lmagan topshiriqlar va asossiz yuklamalar berish taqiqlanadi.
Profilaktika inspektori huquqbuzarliklar profilaktikasi turini mustaqil ravishda tanlaydi, majburiy profilaktik ko‘rsatmalar beradi, taqdimnoma kiritadi va ijrosini talab qiladi, o‘zining profilaktik tadbirlar uslubini ishlab chiqadi hamda vakolati doirasida tegishli hujjatlarni rasmiylashtiradi.
Shu bilan birga, profilaktika inspektori zimmasiga ichki ishlar organlari xodimlarining kasbiy madaniyat va xizmat intizomi kodeksiga qat’iy rioya qilish, huquqbuzarliklar to‘g‘risida fuqarolarning har qanday shakldagi murojaatlarini qabul qilish va tezkorlik bilan munosabat bildirish, huquqbuzarlik sodir etilgan joyga darhol yetib kelish va tekshirish, jabrlangan fuqarolarga birinchi tibbiy yoki boshqa turdagi yordam ko‘rsatish kabi majburiyatlar yuklatiladi.
Qonun loyihasida profilaktika inspektorlarining ijtimoiy-huquqiy himoyasi ham kuchaytirilmoqda. Hokimliklarga ularni xizmat xonasi va uy-joy bilan ta’minlash majburiyati yuklatilishi, faoliyatiga to‘sqinlik qilganlik uchun ma’muriy javobgarlik belgilanishi, uzoq yil xizmat qilgan xodimlar uchun pensiya ta’minoti bo‘yicha qo‘shimcha kafolatlar nazarda tutilmoqda.
Profilaktika inspektoriga qo‘shimcha vakolatlar ham berilishi rejalashtirilgan. Jumladan, ayrim ma’muriy huquqbuzarliklar bo‘yicha ma’muriy jazo qo‘llash vakolati kengaytiriladi, ayrim moddalar bo‘yicha ma’muriy ogohlantirish jazosini qo‘llash imkoniyati yaratiladi.
Taqdimotda Jamoat xavfsizligi universitetini transformatsiya qilish, kunduzgi ta’lim kvotasini 600 ga, masofaviy ta’lim kvotasini 300 gacha oshirish taklif qilindi.
Universitetda huquqbuzarliklar profilaktikasi, yo‘l harakati xavfsizligi, jamoat tartibini saqlash va qo‘riqlash faoliyati yo‘nalishlarida kadrlar tayyorlanadi. “Huquqbuzarliklar profilaktikasi faoliyati” yo‘nalishi va kafedrasi tashkil qilinib, xotin-qizlar, yoshlar va voyaga yetmaganlar, bozor va savdo majmualari bo‘yicha profilaktika inspektorlari tayyorlanadi.
Ta’lim jarayoniga xavf-xatar tahlili, geoaxborot tizimlari, dron va robototexnika, profayling, konfliktologiya, muammoli sotsiologiya, ochiq manbalardan foydalangan holda raqamli tahlil, oilaviy mediatsiya kabi yangi innovatsion fanlarni kiritish rejalashtirilmoqda.
Ichki ishlar organlarida kadrlar tayyorlashning ta’lim klasteri ham shakllantiriladi. Bu jarayonda umumiy o‘rta ta’limdan boshlab idoraviy ixtisoslashtirilgan maktab-internat, akademik litseylar, ichki ishlar texnikumlari, Ichki ishlar vazirligi akademiyasi va malaka oshirish institutlarigacha bo‘lgan uzluksiz tizim yo‘lga qo‘yiladi.
Kasbiy ta’lim tizimini joriy etish doirasida Namangan va Samarqand texnikumlarida o‘rta-maxsus ma’lumotga ega ofitser va safdorlar tayyorlanadi. O‘quv jarayonida yuridik-texnik ta’lim, jismoniy bardoshlik, jangovar shaylik, raqamli texnologiyalar, kasbiy ta’lim, birinchi tibbiy yordam, dron va AT platformalar bilan ishlash kabi yo‘nalishlarga alohida e’tibor qaratiladi. Dual ta’lim asosida nazariya va amaliyot uyg‘unlashtiriladi.
Ichki ishlar vazirligi akademiyasini ham transformatsiya qilish taklif etildi. Akademiya faoliyati “ta’lim – tadqiqot – amaliyot” zanjiri asosida qayta tashkil etilib, jamoat xavfsizligini ta’minlash, tezkor-qidiruv faoliyati, kiberjinoyatlarga qarshi kurashish, ekspert-kriminalistika va ijtimoiy reabilitatsiya yo‘nalishlarida ixtisoslashgan maktablar shakllantiriladi.
Yangi dual ta’lim matritsasi asosida kursantlar “o‘qish – amaliyot – faoliyat” tamoyili bo‘yicha tayyorlanadi. Rahbar kadrlar malakasini oshirish tizimi tubdan takomillashtiriladi.
Prezident takliflarni ma’qullab, profilaktika inspektorlarini ortiqcha vazifalardan xalos etish, ularning huquqiy maqomi va ijtimoiy himoyasini mustahkamlash, jamoat xavfsizligi tizimini raqamlashtirish hamda kadrlar tayyorlashni zamonaviy talablar asosida tashkil etish yuzasidan mutasaddilarga topshiriqlar berdi.
Andijon shahrida Malibu 2 haydovchisi tartibga solinmagan piyodalar o‘tish joyidan o‘tayotgan uch nafar piyodani urib yubordi. Jabrlanuvchilardan ikki nafari shifoxonada vafot etgan. Haydovchi qamoqqa olingan.
Andijon viloyati Andijon shahrida piyodalar o‘tish joyida sodir bo‘lgan yo‘l-transport hodisasi oqibatida ikki kishi halok bo‘ldi. Bu haqda viloyat YHXB axborot xizmati xabar qildi.
Hodisa 25 iyun kuni soat 17:55 larda shaharning «Yangi Bo‘ston» MFY, Amir Temur shohko‘chasida yuz bergan.
1997 yilda tug‘ilgan R.Z. o‘ziga tegishli Malibu 2 rusumli avtomobilda tartibga solinmagan piyodalar o‘tish joyidan yo‘lni kesib o‘tayotgan uch nafar piyodaga yo‘l bermagan va ularni urib yuborgan.
Voqea aks etgan videoda ularning kamida bir nafari bola ekanini ko‘rish mumkin.
YTH oqibatida jabrlanganlar shifoxonaga olib borilgan. Shifokorlar ko‘rsatgan tibbiy muolajalarga qaramay, ulardan ikki nafari vafot etgan.
Hozirda haydovchi protsessual tartibda qamoqqa olinib, holat yuzasidan Andijon shahar IIO FMB tergov bo‘limi tomonidan Jinoyat Kodeksining 266-moddasi 2-qismi bilan jinoyat ishi qo‘zg‘atilib, tergov harakatlari olib borilmoqda.
O‘zbekiston bolalar huquqlarini ta’minlash darajasini baholovchi xalqaro KidsRights Index 2026 reytingida 194 ta davlat orasida 96-o‘rinni egalladi. Bu o‘tgan yilgi natijaga nisbatan bir pog‘ona past ko‘rsatkichdir. 2025 yilda mamlakat 95-o‘rindan joy olgan edi.
Reyting BMTning Bola huquqlari to‘g‘risidagi konvensiyasini ratifikatsiya qilgan davlatlar o‘rtasida tuziladi. Davlatlar bolaning yashash huquqi, sog‘liqni saqlash, ta’lim, himoya hamda bolalar uchun qulay muhit yaratish kabi beshta asosiy yo‘nalish bo‘yicha baholanadi.
Markaziy Osiyo davlatlari ichida eng yaxshi natijani Qozog‘iston qayd etib, 24-o‘rinni egalladi. Keyingi o‘rinlarda Turkmaniston (75-o‘rin), Qirg‘iziston (82-o‘rin), Tojikiston (92-o‘rin) va O‘zbekiston (97-o‘rin) joylashgan.
Jahon reytingida Lyuksemburg birinchi o‘rinni egalladi. Shuningdek, yetakchilar qatoridan Islandiya, Monako, Germaniya, Niderlandiya, Norvegiya, Gretsiya, Belgiya, Sloveniya, Avstriya va Tailand o‘rin olgan.
Rossiya reytingda 151-o‘rinni egallagan. AQSh esa BMTning Bola huquqlari to‘g‘risidagi konvensiyasini haligacha ratifikatsiya qilmagani uchun indeksga kiritilmagan.
Reytingning eng so‘nggi — 194-o‘rnini esa uchinchi yil ketma-ket Afg‘oniston egalladi.
Surxondaryo va Andijon viloyatlarida elektr ta’minoti tizimida faoliyat yurituvchi ikki mansabdor shaxs pora olish bilan bog‘liq holatlarda qo‘lga olindi. Ularga nisbatan jinoyat ishlari qo‘zg‘atilib, tergov harakatlari olib borilmoqda.
Foto: Davlat xavfsizlik xizmati
Davlat xavfsizlik xizmati ma’lum qilishicha, Surxondaryo viloyatining Sho‘rchi tumanida «Hududiy elektr tarmoqlari» AJ «Energosavdo» filiali tuman bo‘limi muhandisi xizmat mavqeini suiiste’mol qilgan.
U fuqaroga tegishli savdo do‘konida elektr energiyasidan foydalanish qoidalari buzilgani yuzasidan tuzilgan dalolatnomani qonuniy tartibda ko‘rib chiqmaslik, ishni sudga yubormaslik hamda yangi elektr hisoblagichini o‘rnatib, ro‘yxatdan o‘tkazib berish evaziga 1000 AQSh dollari talab qilgan.
Tezkor tadbir davomida muhandis avval olgan 200 AQSh dollari va 1 mln 50 ming so‘mdan tashqari, qolgan 500 AQSh dollari hamda 2,4 mln so‘mni olayotgan vaqtida ashyoviy dalillar bilan ushlandi.
Shuningdek, Andijon viloyatining Baliqchi tumanida elektr ta’minoti korxonasi boshlig‘i o‘rinbosari ham korrupsiya bilan bog‘liq holatda qo‘lga olindi.
U tuman elektr tarmoqlari korxonasi xodimlarining oylik faoliyat ko‘rsatkichlari bo‘yicha hisobotlarini viloyat filialidagi tanishlari orqali ijobiy hal qilib berishni va’da qilib, ulardan pul talab qilgan. Tezkor tadbirda mansabdor shaxs xodimlar tomonidan yig‘ib berilgan 300 AQSh dollarini olayotgan vaqtida ushlandi.
Har ikki holat yuzasidan mansabdorlarga nisbatan jinoyat ishlari qo‘zg‘atilgan. Hozirda tergov harakatlari davom etmoqda.
2026-yilning yanvar–aprel oylarida O‘zbekistonning import hajmi 16,4 mlrd AQSh dollarini tashkil qildi. Bu haqda Milliy statistika qo‘mitasi ma’lum qildi.
Hisobotga ko‘ra, import tarkibida eng katta ulushni mashina va transport asbob-uskunalari egallagan. Mazkur toifadagi mahsulotlar importi 5,5 mlrd AQSh dollariga yetgan bo‘lib, o‘tgan yilning mos davriga nisbatan 29,1 foizga oshgan.
Shuningdek, sanoat tovarlari importi 2,5 mlrd dollar (+17,1 foiz), kimyoviy vositalar va shunga o‘xshash mahsulotlar 2 mlrd dollar (+22,6 foiz), oziq-ovqat mahsulotlari hamda tirik hayvonlar 1,9 mlrd dollar (+47,2 foiz), xizmatlar esa 1,6 mlrd dollar (+15,5 foiz)ni tashkil etgan.
Mineral yoqilg‘i, moylash materiallari va shunga o‘xshash mahsulotlar importi 1,4 mlrd dollarga (+25,8 foiz) yetgan.
Bundan tashqari, turli xil tayyor buyumlar importi 585,7 mln dollar (+34,6 foiz), nooziq-ovqat xomashyosi (yoqilg‘idan tashqari) 464,8 mln dollar (+34,5 foiz), hayvon va o‘simlik moylari, yog‘lar hamda mumlar 217,7 mln dollar (+37,3 foiz), ichimliklar va tamaki mahsulotlari esa 100,5 mln dollar (+24,3 foiz)ni tashkil qildi.
Enso Mareska “Manchester Siti”ga bosh murabbiy etib tayinlandi
Profilaktika inspektori, yo‘l-patrul, patrul-post va qo‘riqlash xizmati yagona tizimga birlashtiriladi
Shomurodov JCh guruh bosqichidagi eng chiroyli gol muallifi bo‘lishga da’vogar
-
Jamiyat4 days ago«Andijon polkasi» tadbiriga ketayotgan o‘quvchilar YTHga uchradi
-
Sport3 days agoYaponiya futbolining buyuk sabog‘i: mag‘lubiyatdan to‘g‘ri xulosa chiqarish
-
Dunyodan2 days agoQirgʻiziston va Oʻzbekiston chegarani delimitatsiya qilish doirasida hudud almashadilar
-
Dunyodan4 days agoQirg‘izistonda navbatdagi prezidentlik saylovlari qachon o‘tkazilishi ma’lum qilindi.
-
Iqtisodiyot4 days ago
Dollar bir necha kunlik ko‘tarilishdan so‘ng pastladi
-
Jamiyat3 days agoVatanparvar jurnalistlarni o‘zimga do‘st va maslakdosh deb bilaman
-
Iqtisodiyot5 days ago
O‘zbekiston banklari aktivlari 962,8 trln so‘mga yetdi
-
Sport5 days ago0:5. Bu nima edi? | JCh kundaligi