Futbol – millionlarni birlashtiradigan o‘yin. Ayniqsa, katta turnirlar, jumladan Jahon chempionati yoshu qarini, erkag-u ayolni, har turli soha vakillarini qiziqtiradigan turnirdir. O‘zbekiston milliy jamoasining Mundialda ilk bor ishtirok etishi xalqimiz orasida ushbu turnirga qiziqishni chandon oshirdi. Shu bilan birga, ayrim soha mutaxassislari futbolchilarimizga g‘alaba tilash bilan birga, o‘z sohalari doirasida foydali fikrlar va maslahatlar bilan ham bo‘lishib turishibdi. Ulardan biri, saytimizning doimiy rezidenti, meteorolog, iqlimshunos Erkin Abdulahatov.

O‘zim futbolga qiziqaman. 1998-2000 yillardan boshlab muntazam katta turnirlarni tomosha qilaman. O‘yinlarni kasbim taqozosi bilan tashqi ob-havo muhiti prizmasi orqali ham kuzatib, o‘yinchilarning holatiga tashqi ta’sirni modellashtirib yuraman. Buni butun dunyo tan olgan – tashqi muhit futbolchilar fiziologiyasiga va o‘yiniga 20-30 foiz darajada ta’sir ko‘rsatadi. Sovuq havo, issiqlik stressi – termoregulyatsiya futbolchilarning harakatlariga, jumladan, to‘p uzatish, pressing qilish, sprint kabilarga, shubhasiz, ta’sir qiladi. Bu ilmiy jihatdan isbotlangan va yangilik emas.

Dengiz sathidan olinadigan balandlik ham shular jumlasidan. Ko‘pchilik toqqa chiqqanida kislorod yetishmasligini his qiladi. Deylik, o‘zimizdagi Amirsoy yoki Arashanga chiqqaningizda tekislikdagi harakatlaringiz va yerdagi harakatlarda farq seziladi. Masalan, tekislikda siz 100 metrni bosib o‘tishda 11-12 soniya sarflasangiz, yuqorida bu 15-16 soniyani tashkil qilishi mumkin. Chunki yuqorida havoning bosimi pasayadi, kislorod siyraklashadi. Milliy jamoamiz o‘ynagan Meksikaning Mexiko shahri dengiz sathidan 2240 metr balandlikda joylashgan. Shuningdek, Toluka shahri ham bor va u 2660 metr yuqorida. Bu Jahon chempionatlari tarixidagi eng yuqori nuqtadagi stadionlar. Biz o‘ynagan “Atsteka” stadionida 1970 va 1986 yillardagi Jahon chempionatlari o‘yinlari ham o‘tkazilgan. O‘sha paytlarda ham turli OAVlarda bu stadionlarda o‘ynash qiyinligi haqida o‘sha yerda to‘p tepgan jamoalar vakillarining gap-so‘zlari yoritilgan.

Ta’kidlashim kerak, men bu omillar haqida o‘yindan so‘ng chiqib aytmayapman. Men o‘yindan oldin bu haqda ijtimoiy tarmoqlarda yozdim. Bunday balandlikdagi o‘yinlarga futbolchilarning tayyorlanishi uchun ikki variant bor: birinchisi, o‘yindan 48 soat avval borish kerak. Bunday holatda ob-havo va bosimga organizm moslashadi, xolos. Bunda ular to‘pga fizik ta’sir omillarini o‘rganishga ulgurmaydi. To‘pni tepayotganda oddiy tekislikda qanday zarb berish kerag-u, balandda qanday kuch bilan zarba berish kerakligini ham o‘rganish lozim. Buni atroflicha o‘rganish uchun esa o‘sha muhitga 10-15 kun avval borish kerak. Ko‘rgan bo‘lsangiz, futbolchilarimiz standart vaziyatlarda to‘pni uzatayotganda paslar juda noaniq ketdi. To‘p doim mo‘ljallangan masofadan o‘tib ketaverdi, ya’ni futbolchining jamoadoshiga uzatilgan to‘p aniq bormay, 3-4 metr va undan uzoqroq masofaga uchib ketaverdi.

***

Portugaliyaga qarshi o‘yinimiz qulay ob-havo sharoitida o‘tadi. Hyustonda usti yopiladigan stadion. Unda konditsionerlar ishlaydi va 22-24 darajalai komfort muhit bo‘ladi.

Erkin Abdulahatovning fikrlarini havola orqali o‘tib, to‘liq tomosha qilishingiz mumkin. Biz esa bugungi o‘yinda Vatanimiz jamoasini qo‘llab-quvvatlab, unga omad tilaymiz.

Source link

Jahon chempionatining navbatdagi kuni ham voqealarga boy bo‘ldi: Mbappe va Holand ham Messidan qolishmayapti; arablar derbisida Iordaniya Jazoirga yutqazdi va turnirni muddatidan oldin tark etdi.

Jahon chempionatining ikkinchi turi poyoniga yetib bormoqda – 22 iyun kuni kechqurun va 23 iyunga o‘tar kechasi esa ushbu bosqichda navbatdagi uchrashuvlar bo‘lib o‘tdi. Kun voqealarga boy bo‘ldi: Argentina Avstriyani mag‘lub etgan o‘yinda (2:0) Lionel Messi rekord o‘rnatdi, Fransiya haddan tashqari uzoq davom etgan o‘yinda Iroqqa hech qanday imkoniyat qoldirmadi (3:0), Norvegiya Senegalni taslim etdi (3:2), Iordaniya esa Jazoirga birinchi bo‘lib gol urganiga qaramay, yakunda yutqazib qo‘ydi (1:2).

Futbol atrofida ham voqealar davom etmoqda: ganalik shaman Harri Keynga tahdid qildi, Jyeremi Doku ota bo‘ldi, D guruhida esa kelishilgan o‘yin o‘tkazilishi mumkin.

Messi tarixga kirdi

Argentina – Avstriya 2:0

Gollar: Messi, 38 (1:0). Messi, 90+5 (2:0)

Aniq ijro etilmagan penalti: Messi, 9’

Argentina: E. Martines, L. Martines, Romero (Otamendi, 57), Medina (Talyafiko, 82), Molina, de Paul (Paredes, 82), Makallister, Fernandes, Messi, Almada (Alvares, 64), L. Martines (Gonsales, 64)

Avstriya: A. Shlager, Danso, Posh (Fridl, 67), Alaba (Prass, 67), Vanner (Arnautovich, 67), K. Shlager, Zayvald, Zabitser, Shmid (Vimmer, 78), Laymer, Gregorich (Chukvuemeka, 85)

Ogohlantirishlar: Medina, 76. Paredes, 90 – Posh, 40. Laymer, 76

22 iyun kuni kechqurun butun dunyo nigohi Argentinaning Avstriya bilan o‘yiniga qaratildi. Muxlislarni o‘yin natijasidan ko‘ra Messining natijasi ko‘proq qiziqtirardi. 38 yoshli hujumchi jahon chempionatlarida urilgan gollar soni bo‘yicha yangi rekord o‘rnatish arafasida turgandi. O‘yindan oldin uning hisobidagi bunday gollar soni 16 ta bo‘lib turgandi – u germaniyalik Miroslav Klozedan o‘zib ketishi va sof birinchi o‘ringa chiqishi uchun yana bitta gol kerak edi.

Leoda buning uchun dastlabki imkoniyat o‘yin startidayoq yuzaga keldi – 9-daqiqada o‘yin bosh hakami VAR aralashuvidan keyin yevropaliklar darvozasiga penalti belgiladi. Ammo tajribali forvard 11 metrdan aniq zarba bera olmadi. Bu joriy turnirda ilk bor penalti xato ijro etilishi bo‘ldi – bungacha olti nafar futbolchi o‘z imkoniyatlaridan unumli foydalangandi.

Lekin «Oltin to‘p»ning sakkiz karra sohibi tarixiy lahzalarni uzoq kuttirmadi. U birinchi bo‘lim oxirlarida o‘z maqsadiga erishdi va mutlaq rekord o‘rnatdi. Ikkinchi bo‘limga qo‘shib berilgan daqiqalarda esa dublni rasmiylashtirdi va joriy turnir to‘purarlari poygasida ham oldinga o‘zib ketdi. Argentina ikki o‘yinda besh gol urdi va bu gollarning barchasi Leo hisobiga yozilgan.

Bo‘ron va Mbappedan yorqin o‘yin

Fransiya – Iroq 3:0

Gollar: Mbappe, 14 (1:0). Mbappe, 54 (2:0). Dembele, 66 (3:0)

Fransiya: Menyan, Upamekano, Saliba, Din, Kunde (Gyusto, 83), Kone, Rabio, Olise (Sherki, 68), Barkolya (Akliush, 83), Dembele (Due, 68), Mbappe (Tyuram, 90+1)

Iroq: Bazil, Tahsin (Sulaka, 60), Hoshim, Doski, Ali, Al-Ammariy (Farji, 68), Iqbol, Ismoil (Amin, 60), Bayyesh (Sher, 68), Qosim, Husayn (Al-Hamadiy, 26)

Ogohlantirishlar: Al-Ammariy, 6

Ushbu o‘yin boshlanishidan ancha oldinroq sinoptiklar Fransiya va Iroq o‘rtasidagi uchrashuvga Filadelfiyadagi ob-havo noqulayligi xalal berishi mumkinligi haqida ogohlantirgandi. Amalda ham o‘yin yomg‘ir ostida boshlandi, ammo futbolchilar o‘ynashga qaror qilishdi.

Fransiya 14-daqiqadayoq hisobda oldinga chiqib oldi. Birinchi turda bo‘lgani kabi Maykl Olise va Kilian Mbappe chiroyli gol yuzaga keltirishdi: «Bavariya» yarimhimoyachisi to‘pni jarima maydoniga kirib borgan «Real» forvardiga yetkazdi, u esa bor kuch bilan zarba berib, olis burchakni aniq nishonga oldi. Tanaffusga yaqin yomg‘ir ikki karra kuchaydi va chaqmoqlar boshlandi. Hakam hushtagi chalinganidan keyin futbolchilar tom ma’noda maydondan qochib chiqishdi.

Ikkinchi bo‘lim esa o‘z vaqtida boshlanmadi. Avvaliga standart 15 daqiqalik tanaffus vaqti yarim soatga oshirildi, keyin yana 40 daqiqa, undan keyin yana bir yarim soat qo‘shib berildi. Yakunda futbolchilar faqat 2 soat-u 10 daqiqa o‘tib gazonga qaytishdi.

Pauza fransuzlarga ta’sir ko‘rsatmagandi. Aksincha, hordiq chiqarib olgan futbolchilar katta kuch bilan oldinga tashlanishdi va Mbappe raqiblar xatosidan foydalanib, jahon chempionatlaridagi 16-golini nishonladi va bu borada Miroslav Klozening ko‘rsatkichiga yetib olib, Lionel Messini ta’qib qilishda davom etdi. O‘yindagi yakuniy hisob esa Usmon Dembele tomonidan o‘rnatildi – 3:0.

Holand Norvegiyani pley-offga olib chiqdi

Norvegiya – Senegal 3:2

Gollar: Pedersen, 43 (1:0). Holand, 48 (2:0). I. Sarr, 53 (2:1). Holand, 58 (3:1). I. Sarr, 90+3 (3:2)

Norvegiya: Nyulann, Ayyer, Heggem (Estigor, 84), Volfe, Ryuerson (Pedersen, 13), Berge, Eursnes (Berg, 46), Edegor, Nusa (Shelderup, 71), Serlot (Bobb, 84), Holand

Senegal: Mendi (Diav, 63), Kulibali (P. Sarr, 72), Niakate, Diuf (Yakobs, 54), Diatta, Gana Guyye, Guyye (Mbay, 54), Kamara (Siss, 63), Mane, I. Sarr, Jyekson

Skandinavlar Senegal bilan o‘yinning birinchi bo‘limini qulay imkoniyatlarni yo‘qqa chiqarish bilan o‘tkazishdi. Shunday vaziyatlardan birida Erling Holand darvozabon Eduard Mendini ham aldab o‘tdi, ammo bo‘sh qolgan darvozani ishg‘ol etolmadi. Shunga qaramay, bo‘lim oxirida Markus Holmgren Pederson hisobni ochdi.

Ikkinchi 45 daqiqalikda esa Holand uyg‘ondi: «Manchester Siti»ning yulduzli forvardi dublni rasmiylashtirdi va Norvegiyaning jahon chempionatlaridagi eng yaxshi to‘purariga aylanib oldi (4 gol). Senegalliklar ham o‘yinga qaytishdi. Afrika jamoasi safida Ismoil Sarr yorqin o‘yin ko‘rsatib, ikki bor darvozani ishg‘ol etdi. Faqat bu uning jamoasiga yordam bera olmadi – 2:3.

Ikki tur natijalariga ko‘ra Norvegiya fransuzlar bilan bir xilda 6 tadan ochko jamg‘arib, pley-offga chiqish masalasini hal qildi. So‘nggi turda ushbu jamoalar guruh peshqadamligi uchun o‘zaro kurash olib borishadi. Senegal va Iroqda esa hozircha birorta ochko yo‘q.

Iordaniya turnirni tark etdi

Gollar: Al-Rashdon, 36 (1:0). Benbuali, 69 (1:1). Guiri, 82 (1:2)

Iordaniya: Abulayla, Al-Arab, Abu Dahab (Ubayd, 90+1), Nasib, Al-Ravabdeh, Al-Rashdon, Abu Taha (Abu Hashish, 84), Haddod, Olvan (Abu Zrayk, 90+1), Al-Mardiy (Al-Faxuriy, 76), At-Tamariy (Azayzeh, 84)

Jazoir: Zidan, Mandi, Bensebayni, Ayt Nuri (Hajam, 85), Belgali, Zerrukiy (Bintolib, 46), Badaviy (Benbualiy, 46), Maza, Shaybiy, Mahrez (Hoji-Musa, 76), Guiri (Belaid, 86)

Ogohlantirishlar: Abu Dahab, 64 – Zerrukiy, 44

Ikki jamoa ham turnirni mag‘lubiyat bilan boshlagandi: Jazoir Argentina qarshisida butkul ojiz qolgan (0:3), Iordaniya esa Avstriya bilan o‘yinda tengma-teng kurashib, o‘yin oxirida gollar o‘tkazib yuborgandi (1:3). Ikkinchi turda yutqazadigan jamoa uchun pley-offga chiqish imkoniyati qolmasdi.

O‘yinning birinchi bo‘limida jazoirliklar to‘pga egalik qilish bo‘yicha katta ustunlikka erishishdi (74 ga 26 foiz), vaziyatlar bo‘yicha tenglik kuzatildi. Ulardan foydalanish bo‘yicha esa Iordaniya yaxshiroq harakat qildi: Nizan Al-Rashdon Muso At-Tamarining uzatmasidan keyin darvozabonning o‘ng pastki burchagini aniq nishonga oldi. Ammo bu gol natija keltirmadi.

Ikkinchi bo‘limda Nadir Benbuali Riyoz Mahrezning uzatmasidan keyin bosh bilan gol urib, muvozanatni tikladi. Ko‘p o‘tmay Jazoir hisobda oldinga ham chiqib oldi: burchak zarbasi ijro etilganida Amin Guiri barchadan ildamroq harakat qildi – 2:1. Endi Iordaniya uchun uchinchi tur natijasi hech qanday ahamiyat kasb etmaydi.

Mashhur shaman qaytdi

23 iyun kuni Angliya Gana bilan o‘ynaydi. Tomas Tuxel jamoasining Xorvatiyaga qarshi o‘yinini (4:2) ko‘rgan afrikaliklar esa oldindagi o‘yinga tayyorgarlik jarayonida barcha vositalarni, jumladan, noodatiy usullarni ishga solmoqda.

Xususan, ganalik mashhur shaman Nana Kvaku Bonsam ingliz nashrlariga bergan intervyusida «Uch sherlar» forvardi Harri Keynni la’natlashini aytdi. O‘zining aytishicha, u hech qanday xavfli ish qilishni rejalashtirmayapti, lekin baribir raqib hujumchisini to‘xtatmoqchi.

«Unga jiddiy jarohat yetkazishni istamayman. Uni to‘xtatishning o‘zi kifoya. Ganaga yordam berish uchun o‘z ishimni qilaman», – degan Bonsam.

Ushbu shaman avval ham OAV orqali shov-shuvli chiqishlar qilgan. 2014 yilgi jahon chempionatida Gana Portugaliya bilan raqib bo‘lgandi – turnir arafasida Krishtianu Ronaldu jarohat olgan, Nana Kvaku esa buning uchun javobgarlikni o‘z zimmasiga olib, bu hodisani o‘z mamlakati uchun deb izohlagandi. Lekin portugaliyalik hujumchi o‘yingacha tiklanishga ulgurib, Gana darvozasini ishg‘ol ham qilgandi (2:1), shunday ekan, Keyn hech narsadan xavotir olmasa ham bo‘ladi.

Kelishilgan o‘yin bo‘ladimi?

Hozirgi reglament milliy jamoalar o‘rtasida kelishilgan o‘yinlar bo‘lishi ehtimolini minimallashtirishga qaratilgan. Ammo bu muammoni uzil-kesil bartaraf etishning imkoni yo‘qqa o‘xshaydi – 2026 yilgi turnirda ham kelishilgan o‘yin uchun asos yuzaga kelgan.

Muxlislar Paragvay va Avstraliya o‘rtasidagi o‘yinni shubha ostiga olishmoqda – D guruhi vakillari 25 iyun kuni 3-tur doirasida o‘zaro o‘ynaydi. Kvartetdagi vaziyat shundayki, ikki jamoani ham so‘nggi turda durang natija qoniqtiradi – bu holda ikki jamoa ham to‘rttadan ochkoga ega bo‘ladi va birgalikda pley-offga chiqishi mumkin.

Albatta, jamoalarni oldindan ayblab bo‘lmaydi. Ammo o‘sha kuni butun dunyoning nigohi ushbu jamoa futbolchilarining harakatlariga qaratilgan bo‘ladi.

Doku ota bo‘ldi

Belgiyalik hujumchi Jyeremi Doku birinchi bor ota bo‘ldi. Jamoa matbuot xizmati bu haqda rasman ma’lum qildi. 24 yoshli vinger bir necha kun oldin jamoa bazasini tark etgan va Eronga qarshi uchrashuvni o‘tkazib yuborgandi, buning uchun L`Equipe nashri jurnalisti Frans Perron futbolchini tanqid qilib chiqqandi.

«Jahon chempionatiga chiqish uchun o‘zini qurbon qilishga tayyor bo‘lgan yuzlab futbolchilar bor. Bolalik orzusi, eng muhim lahza. Va sen farzand ko‘rish uchun buni tashlab ketasanmi? Bu jirkanch. Bunday paytda onaga ota yonida bo‘lishi muhim emas, u statist rolini bajaradi», – degandi Perron.

Jurnalist darhol tanqidlar ostida qoldi – uning o‘zi ham, u ishlaydigan nashr ham uzr so‘rab chiqishiga to‘g‘ri keldi. Dokuning o‘zi esa bunga e’tibor qaratgani yo‘q, turmush o‘rtog‘ining yoniga yo‘l oldi va baxtli otalardan biriga aylandi.

Navbatdagi o‘yinlar

23 iyun kuni kechqurun va 24 iyunga o‘tar kechasi ikkinchi tur doirasidagi so‘nggi o‘yinlar o‘tkaziladi.

22.00. K guruhi. Portugaliya — O‘zbekiston
01.00. L guruhi. Angliya — Gana
04.00. L guruhi. Panama — Xorvatiya
07.00. K guruhi. Kolumbiya — Kongo DR

Source link

Murabbiy o‘z futbolchilari o‘yin oxirigacha kurashishiga ishonch bildirdi va futbolchilar jamoa bo‘lib harakat qilsa, ijobiy natijaga erishish mumkinligini ta’kidladi. Jamoa sardori Eldor Shomurodov esa JChda debyutni o‘tkazib olgan futbolchilarda bosim yo‘qligini aytdi.

O‘zbekiston milliy jamoasi bosh murabbiyi Fabio Kannavaro Portugaliyaga qarshi o‘yindan oldingi matbuot anjumanida jurnalistlarning savollariga javob qaytardi. U ijobiy natija uchun barcha futbolchilar birgalikda ter to‘kishi lozimligini ta’kidlagan.

«Raqibimiz jahon chempionatidagi eng kuchli jamoalardan biri hisoblanadi. Agar Portugaliya jamoasini tahlil qilib ko‘rsangiz, ularning qanotlarda juda kuchli futbolchilari bor, dunyoning eng yaxshi yarimhimoya chiziqlaridan biriga ega, shuningdek futbol tarixidagi eng yaxshi futbolchilaridan biri ham shu jamoada o‘ynaydi.

Shunday ekan, bu oson o‘yin bo‘lmaydi. Lekin biz jahon chempionatidamiz, jamoa sifatida harakat va mehnat qilishimiz zarur. Chunki ijobiy natija bilan maydonni tark etishning yagona yo‘li shu», – deya Kannavaroning so‘zlarini keltirmoqda O‘FA matbuot xizmati.

Murabbiy futbolchilar nomdor raqibdan qo‘rqmasligini ta’kidlagan.

«Biz Portugaliyaning futbol falsafasini o‘rganishga harakat qildik. Ular doimo to‘p nazorati orqali o‘yinni boshqarishni yoqtiradi. Shuningdek, uchrashuvni juda faol boshlashga intilishlarini ham bilamiz. Chunki imkon qadar tezroq o‘yinni o‘z foydasiga burishni, himoyani yorib o‘tishni istashadi.

Shundan kelib chiqib biz ham bunga tayyorgarlik ko‘rdik, deb o‘ylayman. O‘z rejamiz va strategiyamiz bor va maydonda aynan o‘z o‘yinimizni namoyish etishga harakat qilamiz. Futbol shunday o‘yin. Biz juda kuchli jamoaga qarshi maydonga tushayotganimizni bilamiz, ammo avval ham aytganimdek, biz bundan qo‘rqmaymiz.

Qo‘limizdan kelgan eng yaxshi o‘yinni ko‘rsatishga va uchrashuv oxirigacha kurashishga harakat qilamiz», – deydi italiyalik mutaxassis.

U raqib jamoa sardori Krishtianu Ronalduga to‘xtalib, uni jarima maydonida e’tiborsiz qoldirib bo‘lmasligini ta’kidlagan.

«Yuqorida ham aytganimdek, biz faqat Krishtianuga qarshi o‘ynamaymiz. U futbol tarixidagi eng buyuk futbolchilardan biri, biroq Portugaliya faqat Ronaldudan iborat emas. Ularning asosiy tarkibida ham, zaxirasida ham juda ko‘p yuqori saviyali futbolchilar bor.

Shunga qaramay, jarima maydonida Ronalduni bir lahzaga ham e’tiborsiz qoldirib bo‘lmaydi. U standart vaziyatlarda ham, o‘yin davomida ham istalgan payt gol urishga qodir. Shu bois, butun o‘yin davomida maksimal darajada diqqatli bo‘lishimiz kerak», – deydi jamoa bosh murabbiyi.

U Kolumbiyaga qarshi o‘yin futbolchilarning jismoniy holati yaxshiligini ko‘rsatganini qayd etgan: «Jamoaga kelganimizdan buyon asosiy e’tibor futbolchilarning jismoniy holatini yaxshilashga qaratildi. Ayrim futbolchilar turli chempionatlarda o‘ynagan, ba’zilarida esa ma’lum muammolar mavjud edi. Shunga qaramay, so‘nggi o‘yin davomida futbolchilarning holati yaxshi ekanini ko‘rdim. Jamoa uchrashuvni yuqori tempda yakunladi va barcha o‘zini yaxshi his qildi».

Shuningdek, murabbiy futbolchilar ko‘p yugurishi emas, aql bilan yugurishi lozimligini ta’kidladi.

«Albatta, statistikalarni tahlil qilish oson emas. Masalan, to‘pning harakat tezligiga qarasangiz, futbolchilarning texnik mahorati qanchalik yuqori ekanini tushunishingiz mumkin. Men faqat jismoniy ko‘rsatkichlarga qarashni yoqtirmayman. Chunki yakunda eng muhimi — to‘pni qanday nazorat qilishingiz, qanday uzatishingiz va uni qanchalik kam yo‘qotishingizdir.

Menimcha, agar siz o‘yin davomida to‘pni 20 marta yo‘qotsangiz, uni qaytarib olish uchun 20 marta yugurishingizga to‘g‘ri keladi. Bu esa juda muhim omil. Portugaliyaning statistikasi esa, albatta, ko‘p jihatlar bo‘yicha yuqori darajada. Biz buni bilamiz va tahlil qilib chiqdik.

Shu bilan birga, biz maydonda tartibsiz ravishda har tomonga yugurib yurishimiz kerak emas. Masala ko‘p yugurishda emas, to‘g‘ri yugurishda. To‘pni yo‘qotmaslik va uni qayerda qaytarib olishni bilish muhim», – degan Kannavaro.

Kannavaro jahon chempionati oson turnir emasligini eslatib, O‘zbekiston jamoasi g‘alaba uchun maydonga tushishini ma’lum qildi. «Biz ushbu o‘yinda g‘alaba qozonishimiz kerak. Agar yakka tartibda emas, balki jamoa bo‘lib harakat qilsak, natijaga erisha olamiz», – deydi u.

Murabbiy Kolumbiyaga qarshi kechgan birinchi uchrashuvda futbolchilar diqqatni yaxshi jamlashgani va yagona jamoa sifatida harakat qilishganini qayd etgan.

«Ular istalgan jamoaga qarshi o‘ynay olishlarini ko‘rsatishdi. To‘g‘ri, xatolarga yo‘l qo‘yilganda, ular uchun qimmat to‘lashga to‘g‘ri keladi. Biz buni tushunamiz. Yo‘qotadigan hech narsamiz yo‘q, jahon chempionatida ilk bor ishtirok etyapmiz. Albatta, hech kim yutqazishni xohlamaydi va bu birinchi navbatda futbolchilarning o‘zlari uchun og‘ir. Lekin ertangi o‘yinni xuddi Kolumbiyaga qarshi bahsdagidek kuch va shijoat bilan boshlashimiz kerak. Qo‘rqib o‘tirmaymiz va dastlabki daqiqalardanyoq tayyor bo‘lamiz. Himoyaga yotib olmasdan, gol urishga va imkoniyatlarimizdan foydalanishga harakat qilamiz», – deya uning so‘zlarini keltiradi Gazeta muxbiri.

Milliy jamoa sardori Eldor Shomurodov ham matbuot anjumanida jurnalistlardan bo‘lgan savollarga javob qaytardi. U Kolumbiya bilan o‘yin haqida gapirarkan, jamoa yo‘l qo‘yilgan xatolarni allaqachon muhokama qilib olganini aytdi.

«Birinchi bo‘limda o‘yinimiz qovushmadi, ikkinchi bo‘limda esa to‘pni ko‘proq nazorat qila oldik. Ko‘proq mana shunday o‘ynash kerakligini muhokama qildik. Bunday xatolarni takrorlamasdan, o‘z o‘yinimizni ko‘rsatishga, to‘pni ko‘proq nazorat qilib, vaziyatlar yaratishga harakat qilamiz», – deydi u.

Eldor Shomurodov futbolchilar uchrashuvga xotirjam tayyorgarlik ko‘rishayotganini va bosim sezishmayotganini ta’kidladi.

«Albatta, bizda bosim yo‘q. Shu sababli, ertaga bizga Portugaliyaga qaraganda osonroq bo‘ladi deb o‘ylayman. Ular g‘alaba qozonish uchun ko‘proq harakat qilishadi.

Bizda ajoyib jamoa shakllangan, birinchi o‘yindan keyin o‘zimizga bo‘lgan ishonch paydo bo‘ldi. Debyutni o‘tkazib bo‘ldik, shuning uchun endi bosim yo‘q. Ertaga maydonga faqat yaxshi natija uchun chiqamiz», – deydi jamoa sardori.

Portugaliyaning Kongo DR bilan durang o‘ynagani raqibga bo‘lgan munosabatga ta’sir qiladimi-yo‘qmi degan savolga javob berarkan, Shomurodov O‘zbekiston bor e’tiborini o‘z o‘yiniga qaratishini ta’kidladi.

«Kelganimizdan beri murabbiy bosim yo‘qligini ko‘p marta aytdi. Biz boshqa jamoalarga qaramasligimiz, balki o‘zimiz ochko to‘plashga va guruhdan chiqishga harakat qilishimiz kerak. Bu borada birinchi tur u qadar muhim emas edi. Boshqalarga e’tibor qaratmasdan, o‘z natijalarimizga diqqat qaratishimiz lozim», – deb ta’kidladi u.

O‘zbekiston milliy jamoasi Kolumbiyaga qarshi birinchi o‘yinda so‘nggi daqiqalargacha kurashda qolgan, ammo yakunda alamli gol o‘tkazib, 1:3 hisobida mag‘lub bo‘lgandi. Jamoaning Portugaliyaga qarshi ikkinchi tur uchrashuvi Toshkent vaqti bilan 23 iyun kuni soat 22:00 da (mahalliy vaqt bilan soat 12:00) boshlanadi.

Source link

Muhim o‘yin oldidan afrikaliklar jamoasi ichidan yoqimsiz insaydlar tarqalmoqda.

Senegal milliy jamoasi jahon chempionati startida Fransiya bilan o‘yinda ko‘pchilikda yaxshi taassurot qoldirgandi. Afrikaliklar jamoasi o‘sha o‘yinning birinchi bo‘limida 2026 yilgi mundial favoritlarini barcha jabhalarda ortda qoldirishgandi. Endi bu jamoani Norvegiyaga qarshi muhim o‘yin kutmoqda. Katta ehtimol bilan, bu o‘yin guruhda ikkinchi o‘rinni kim olishini hal qiladi. Senegalliklar o‘yin bobida Erling Holand va uning jamosidan ustun kelishga qodir, agar ular ichki mojarolar sharoitida buni uddalay olishsa, ikki karra qoyil qolish kerak. Lekin jamoa ichkarisida muhit yaxshi emas – federatsiya futbolchilardan qarzini to‘lamagan va pul tejash uchun mundialga oshpazini olib kelmagan, bosh murabbiy esa besh oydan buyon maoshsiz ishlamoqda.

Senegal milliy jamoasida ishlar joyida emasligi haqida gaplar jahon chempionati boshlanishidan oldinroq paydo bo‘lgandi. May oyi oxirida Senegaldagi nashrlar milliy jamoa bosh murabbiyi Pap Tiav jahon chempionatiga borishdan bosh tortish bilan tahdid qilgani haqida xabar tarqatgandi – ushbu mutaxassis boshchiligida jamoa yanvar oyida Afrika kubogini qo‘lga kiritgandi (va bu kubokka finaldagi voqealar uchun texnik mag‘lubiyat yozilmagunicha egalik qildi). Manbalar Senegal futbol federatsiyasining Tiav bilan shartnomasi muddati fevral oyidayoq yakunlangani va uch oy o‘tsa ham shartnoma yangilanmagani haqida aytishgandi. Tiav esa rasmiy kelishuv va maosh yo‘qligiga qaramay, ishlashda davom etgan – futbolchilarni yig‘gan, o‘rtoqlik uchrashuvlari va mashg‘ulot yig‘inlari tashkillashtirishda qatnashgan. Papning kelajagi mavhumligi sharoitida Senegalning AQShga safari kechikkan. U masalani chempionat boshlanguniga qadar hal etishni talab qilgandi.

Shu bilan birga, Senegal futbol federatsiyasidagilar murabbiy bilan munosabatlarda qandaydir muammolar borligini qat’iyan rad etgan. Tashkilot AQShga safar kechikkanini quyidagicha bayonot orqali izohlagan:

«Senegal delegatsiyasi parvozi kechiktirilishi faqat ma’muriy va logistik murakkabliklar, xususan, AQSh hududiga maxsus reysni amalga oshirishga ruxsat berilishi kechikishi, shuningdek, shtabning ba’zi a’zolari uchun vizalar rasmiylashtirilishini kutish bilan bog‘liq. Federatsiya milliy jamoa murabbiyi shartnoma sababli safardan bosh tortgani haqidagi asossiz mish-mishlarni qat’iyan rad etadi. Shartnoma bo‘yicha muzokaralar olib borilmoqda, ammo ular jamoaga hech qanday ta’sir ko‘rsatmadi.

Moddiy-texnik ta’minotdagi kichik muammolar futbolchilar, murabbiylar shtabi va federatsiyaning hamjihatligi va qat’iyatini susaytirmaydi. Jamoa AQShdagi muhim o‘yinlar oldidan birdamligini saqlab qolmoqda. Federatsiya tayyorgarlik uchun zarur bo‘lgan tinch muhitni ta’minlaydi. Har qanday dezinformatsiyadan saqlanish uchun jamoatchilikka muntazam ravishda, shaffof va ishonchli axborot berib turamiz».

Shu bilan mavzu yopilgandi. Senegal milliy jamoasi AQShga uchib kelgan va Tiav rahbarligida jahon chempionatiga tayyorgarlik ko‘rishda davom etgandi. Jamoa Nyu Jyersida, Ratgerskiy universiteti bazasiga joylashgan. Turnirning ilk kunlarida jamoa atrofidagi yagona yoqimsiz xabar – futbolchilar va delegatsiyaning qolgan a’zolari AQShdagi aeroportda qat’iy tekshiruvdan o‘tkazilgani haqida bo‘lgandi.

Ammo jahon chempionatining 2-turida Norvegiyaga qarshi kechadigan o‘yin arafasida Senegal lageridagi olov yangidan alanga oldi. Sport News Africa sayti xabariga ko‘ra, muhim uchrashuv oldidan jamoa ruhiyati keskin tushib ketgan. Buning sababi – moliyalashtirish va tashkilotchilik bilan bog‘liq muammolar saqlanib qolayotganidir. Futbolchilar Afrika kubogidagi ishtiroki va jahon chempionatiga yo‘llanma olgani uchun mukofot pullari hali ham to‘lab berilmaganidan norozi, holbuki FIFA va Afrika futbol konfederatsiyasi mablag‘larni allaqachon federatsiya hisobiga o‘tkazib beran, lekin mablag‘lar qayerga g‘oyib bo‘lgani noma’lum.

Bundan tashqari, Senegal milliy jamoasi a’zolari AQShdagi yashash sharoitlari qoniqarli emasligidan shikoyat qilishmoqda. Federatsiya eng arzon mehmonxonalardan birini tanlagan, bu yerda tayyorlanadigan taomlar sifati o‘rtacha va professional sportchilar uchun mos emas deb topilgan.

Shu bilan birga, senegallik futbol amaldorlari hashamat ichida yashayotgani aytiladi – ular Qo‘shma Shtatlarga o‘z oila a’zolari hamda boshqa yaqin kishilarini ham olib kelishgan.

Qo‘shimchasiga federatsiya Senegal milliy jamoasiga hamrohlik qiluvchi xodimlar uchun budjetni qisqartirgan. Xususan, chempionlik qo‘lga kiritilgan Afrika kubogida jamoa bilan bo‘lgan bosh oshpaz jahon chempionatiga olib ketilmagan. Ish shu darajaga yetganki, mehmonxona ovqatlari yoqmagan futbolchilar o‘zi uchun tashqaridan ovqat buyurtma qilishmoqda. Ichki muhit taranglashgan va istalgan vaqtda portlash ro‘y berib, jamoa bo‘linib ketishi mumkin.

Tiav esa besh oydirki shartnomasiz va amalda tekinga ishlamoqda. Federatsiya u bilan yangi shartnoma imzolashni kechiktirmoqda, buni «jahon chempionatidek mas’uliyatli tadbir boshqa barcha masalalarni keyinga qoldirishga majbur qilishi» bilan izohlanmoqda. Jamoadagilar esa, tabiiyki, bu so‘zlarni bahona sifatida qabul qilishadi. 45 yoshli Tiav 2024 yil dekabridan buyon Senegal milliy jamoasini boshqarib kelmoqda. Uning statistikasi juda salmoqli: 14 ta g‘alaba, to‘rtta durang va atigi ucht mag‘lubiyat – Fransiya, Braziliya, AQShga qarshi o‘yinlarda. Shuningdek, Afrika kubogi finalida Marokash mag‘lub etilgan bo‘lsa-da, bir necha oy o‘tib bu o‘yin uchun texnik mag‘lubiyat yozildi.

Pap Tiav, Senegal milliy jamoasi ustozi

Foto: Franco Arland/Getty Images

Uning o‘zi esa ijobiy kayfiyatni saqlab qolishga urinmoqda:

«Mening shartnomam ahamiyatga ega emas – faqat Senegal muhim. Biz birlashishimiz lozim. Jamoa safarbar qilingan, futbolchilar Senegal xalqini ulug‘lash va Mamlakat bayrog‘i ranglarini himoya qilish uchun bu yerda. Men bor e’tiborimni futbol maydonidagi ishlarga qaratganman. Butun e’tiborim – jahon chempionatiga qaratilgan».

Umuman, bunaqa holat Afrika uchun yangilik emas. Qit’adagi ayrim jamoalar futbolchilari oldin ham jahon chempionatlarida quruq rahmat uchun o‘ynashgan. 2018 yilgi mundialda esa FIFA Afrika jamoalariga 2 mln yevrodan bonus pullari ajratib bergandi, bunga to‘rt yil oldingi mundialdan keyin Afrikaning birato‘la bir necha jamoasida futbolchilarga mukofot pullari to‘lanmagani bilan bog‘liq mojaro ro‘y bergani sabab bo‘lgandi.

Yuzaga kelgan vaziyat yarim yil oldin Afrika kubogida bo‘lgani kabi Amerikadagi mundialda ham uzoqqa borish salohiyatiga ega bo‘lgan Senegal milliy jamoasini parchalab yuborishi mumkin. Tiav bunday bo‘lmasligi uchun qo‘lidan kelganicha harakat qilmoqda. Ammo birgina murabbiyning avtoriteti jamoa ustidan nazoratni saqlab qolish uchun yetarli bo‘lmasligi mumkin. Tarkibdagi yulduzlar, birinchi navbatda, Sadio Mane tashabbusni qo‘lga olishi kerak bo‘ladi.

Source link

Argentina milliy jamoasi hujumchisi JCh-2026 guruh bosqichidan o‘rin olgan Avstriyaga qarshi o‘yinda mundiallardagi 17-golini urdi.

Lionel Messi jahon chempionatlari tarixidagi eng yaxshi to‘purar bo‘lib oldi. Argentina milliy jamoasi hujumchisi JCh-2026 guruh bosqichidan o‘rin olgan Avstriyaga qarshi o‘yinda mundiallardagi 17-golini urdi.

Bungacha u avstriyaliklar darvozasiga penaltini amalga oshira olmay, rekord o‘rnatishni kechiktirgan edi.

Messi Germaniya milliy jamoasi sobiq hujumchisi Miroslav Klozening rekordini yangiladi. Kloze hisobida 16 ta gol bor edi.

Ayni damda faoliyatini davom ettirayotgan futbolchilar orasida Messining eng yaqin ta’qibchisi Kilian Mbappe hisoblanadi. Fransiya milliy jamoasi sardorining mundiallardagi gollari soni 14 tani tashkil qilmoqda.

Jahon chempionatlarida eng ko‘p gol urgan futbolchilar:

17 – Lionel Messi (Argentina)

16 – Miroslav Kloze (Germaniya)

15 – Ronaldo (Braziliya)

14 – Kilian Mbappe (Fransiya)

14 – Gerd Myuller (Germaniya)

13 – Jyust Fonten (Fransiya)

Source link