Jamiyat
Zavol topgan muhabbat
Romina Al Bano Karriziga turmushga chiqishini aytganida, onasi qattiq g‘azablanib, xitob qilgan edi: «Dehqonning o‘g‘li, past bo‘yli, ko‘zoynak taqqan, ko‘zga yaqin ham tushmaydigan yigit! Sen unda nimani ko‘rding?» Bu ayolga Al Bano allaqachon mashhur qo‘shiqchi ekanligi muhim emasdi. Hatto, aytishlaricha, u to‘yga ruxsat olish uchun qaynonasiga katta miqdorda pul to‘lashga majbur bo‘lgan. Ammo Al Banoning ota-onasi ham o‘g‘li tanlagan qizni xushlamadilar: «tantiq qiz qanday qilib yaxshi xotin va ona bo‘la oladi?» – deyishdi ular.
Shunga qaramasdan, Karrizi va Pauer nikohdan o‘tishdi. Besh yildan so‘ng, ikki farzandli bo‘lishgach, birgalikda musiqiy duet yaratishdi. Va qisqa fursatda dunyo miqyosida shon-shuhrat qozondilar. San-Remodagi Italiya qo‘shiqlar tanlovida bir necha bor sovrinli o‘rinlarni egallashdi. «Ci Sarà» xonishi bilan birinchi o‘rinni olishdi. «Libertà» qo‘shig‘i esa Italiyada norasmiy milliy gimn sifatida tan olindi.
Ularning mashhurligi cho‘qqiga chiqdi – hatto sobiq ittifoqda ham ularni yaxshi ko‘rishardi. Sahnada ko‘rsatayotgan muhabbatlari soxta emasdi: Al Bano va Romina haqiqatan bir-birini sevardi. Ular bir-biri uchun yaratilgandek edi. Bu juftlik juda uyg‘un bo‘lib, alohida tarzda tasavvur qilish deyarli mumkin emasdi.
Al Bano va Rominada barcha narsa bor edi: shon-shuhrat, boylik, jurnal muqovalaridagi fotosuratlar, suhbatlar, Apuliya viloyatidagi katta hovli va xizmatkorlar.
1980-yillarning oxirida ular yana ikki farzand ko‘rishga qaror qilishdi. Romina uchun jismonan og‘ir bo‘lsa-da, u qo‘shiq kuylash va gastrollardan to‘xtamadi. Shu bilan birga, mehribon ona va sog‘lom oila qurgan ayol bo‘lib qoldi. Romina erini har jihatdan qo‘llab-quvvatlardi. Faqat bir narsa uni bezovta qilardi: doimiy safarlar tufayli farzandlariga yetarli vaqt ajrata olmayotgandi. Keyin esa…
Hammasi bir lahzada vayron bo‘ldi. 1994-yil yanvar oyida ularning hayoti «oldin» va «keyin» sifatida qoq ikkiga bo‘lindi. Mashhur er-xotinning felichitasi – baxti, shodligi bir zumda yo‘q bo‘ldi: chunki xabar kelgan – ularning to‘ng‘ich qizi Ileniya Nyu-Orleandagi mehmonxonadan chiqib ketgan va qaytmagan edi. Turli manbalarga ko‘ra, u Amerikaga yoshlar festivaliga borgan yoki kitob yozish uchun material yiqqan.
Ota-ona barcha imkoniyatlarni ishga soldi: politsiya, ekstrasenslar, hatto Sitsiliya mafiyasi va «Interpol» ham qidiruvga jalb etildi. Lekin oylar, yillar o‘tdi – faqat mish-mishlar va taxminlar paydo bo‘ldi, xolos. Kimdir aytdi: u guru bilan aloqada bo‘lgan, boshqalar – giyohvandlikka berilib ketgan, yana o‘zgalar – Missisipi daryosiga sakragan, deyishdi. Ammo hatto qizning jasadini ham topishning iloji bo‘lmadi.
Oradan bir necha yil o‘tgach, Al Bano jurnalistlarga qizining tirik ekaniga ishonmasligini aytib, uning o‘limiga ko‘nikishga majbur bo‘lganini tan oldi. Bu esa Rominani darg‘azab qildi:
– Sen qizimizni unutding! – deb hayqirdi u. Va eri bilan ajrashishga qaror qildi. Ularning mashhur dueti ham o‘z-o‘zidan parchalanib ketdi.
Romina tanib bo‘lmas darajada o‘zgardi. Uning yuzida nur qolmadi, chuqur depressiyaga tushdi. Keyin yoga bilan shug‘ullana boshladi, Hindistonga safar qildi.
2013-yilda Ileniyani qidirish rasman to‘xtatilgani haqida e’lon qilindi, ammo Romina baribir tinchlanmadi. Axir ona uchun bolasini yo‘qotishdan og‘irroq azob yo‘q!
Al Bano yakka ijod yo‘lini tanladi. Shuningdek, uzumzorlar barpo etdi, vino va zaytun moyi ishlab chiqara boshladi. Romina ssenariylar yozdi, hujjatli filmlar suratga oldi, rasm chizish bilan shug‘ullandi. Keyin esa vatani – Amerikaga qaytdi. Hech kim «Al Banoning xotini» deb qaramaydigan mamlakatga. Jurnalistlar ham undan qizining yo‘qolgani haqida og‘riqli savollar bermasdi.
2013-yilda Romina Al Banoning 70 yillik yubileyi munosabati bilan Rossiyadagi konsertga chiqish taklifini qabul qildi. Sahnada sobiq er-xotin yana bir-biriga muhabbat bilan tikilib qarashdi. Ammo bu endilikda boshqacha tuyg‘u edi – muhabbat emas. Ularning sevgisi zavol topib bo‘lgan edi.
Shundan so‘ng Al Bano va Romina Pauer goh-goh birgalikda qo‘shiq aytishda davom etdilar. 2015-yilda, hatto yana bir bor San-Remo sahnasiga chiqishdi. Va o‘shanda ham, ilgari bo‘lganidek, ularning ovozi qalblarni titratadigan darajada jozibali va ta’sirli edi…
Akbar Fathullayev
Raqobat qo‘mitasi tomonidan 2026 yilning dastlabki sakkiz oyida o‘tkazilgan tekshiruvlar davomida 73 nomdagi mahsulot sifat va xavfsizlik talablariga javob bermasligi aniqlandi. Bu haqda qo‘mita matbuot xizmati xabar berdi.
Ma’lum qilinishicha, qo‘mita hamkor tashkilotlar bilan birgalikda chakana savdo nuqtalarida sotilayotgan xalq iste’moli tovarlarining sifat va xavfsizlik talablariga muvofiqligini tekshirish uchun muntazam ravishda nazorat xaridlarini o‘tkazib kelmoqda. Xarid qilingan mahsulotlar akkreditatsiyadan o‘tgan laboratoriyalarda tekshirilib, ularning davlat standartlari hamda normativ-texnik hujjatlar talablariga mosligi baholanadi.
Xususan, 2026 yilning sakkiz oyida 60 turdagi jami 558 nomdagi mahsulot laboratoriya ekspertizasidan o‘tkazilgan. Natijada ulardan 73 nomdagisi belgilangan normativ-texnik talablarga javob bermasligi ma’lum bo‘lgan.
Ushbu mahsulotlarni savdo rastalaridan qaytarib olish va qonunchilikka muvofiq choralar ko‘rish uchun tegishli materiallar O‘zbekiston texnik jihatdan tartibga solish agentligi hamda Sanitariya-epidemiologik osoyishtalik va jamoat salomatligi qo‘mitasiga yuborilgan.
Qonunchilik palatasi deputatlari bugungi majlisida moliyaviy jarimalarni qo‘llash tartibini yengillashtirishga qaratilgan qonun loyihasini uchinchi o‘qishda qabul qilib, Senatga yubordi.
Hujjatga ko‘ra, tadbirkorlar jarima solish to‘g‘risidagi qaror topshirilgan kundan boshlab bir oy ichida jarimaning 50 foizini ixtiyoriy to‘lasa, qolgan qismini to‘lashdan ozod etilishi mumkin.
Shuningdek, jarimani 6 oy davomida bo‘lib-bo‘lib to‘lash imkoniyati nazarda tutilmoqda.
Agar jarima to‘g‘risidagi qaror bekor qilinsa yoki haqiqiy emas deb topilsa, noqonuniy undirilgan mablag‘ qaytariladi. Qaytarish kechiktirilgan taqdirda, Markaziy bank asosiy stavkasining uch yuzdan biri miqdorida foiz to‘lash tartibi joriy etiladi.
Hozircha bu qoidalar qonun loyihasida nazarda tutilgan, kuchga kirmagan.
O‘zbekistonda moda va dizayn sohasi uchun malakali mutaxassislar tayyorlashga ixtisoslashgan yangi davlat oliy ta’lim muassasasi tashkil etiladi.
Prezidentning 2026-yil 16-oktyabrdagi PQ–378-son qaroriga muvofiq, Toshkent xalqaro moda akademiyasi tashkil etiladi. Akademiya Yengil sanoatni rivojlantirish agentligi tizimida faoliyat yuritadi.
Yangi oliygoh Toshkent to‘qimachilik va yengil sanoat instituti hamda Parij xalqaro moda akademiyasining qo‘shma ta’lim dasturi negizida tashkil etiladi.
Mazkur dasturda tahsil olayotgan barcha talabalar o‘qishini yangi akademiyada davom ettiradi. Bitiruvchilarga Toshkent xalqaro moda akademiyasining diplomi beriladi.
O‘quv jarayoni 2026/2027 o‘quv yilidan boshlanadi. Akademiyada xalqaro qo‘shma dasturlar bilan bir qatorda, mustaqil ta’lim dasturlari asosida bakalavr va magistrlar tayyorlashga ham ruxsat etiladi.
2027/2028 o‘quv yilidan boshlab to‘qimachilik, tikuvchilik, trikotaj va charm-poyabzal sohalarida korxonalar buyurtmasi asosida dual ta’lim joriy qilinadi. Bunda talabalar nazariy bilim olish bilan birga ishlab chiqarish jarayonlarida ham ishtirok etadi.
Shuningdek, yengil sanoat yo‘nalishidagi texnikumlarni muvaffaqiyatli tamomlagan, o‘rtacha bahosi akademiya belgilagan talabga javob beradigan bitiruvchilarga bakalavriatning uchinchi bosqichidan to‘lov-kontrakt asosida o‘qishni davom ettirish imkoniyati yaratiladi.
Akademiya bazasida davlat buyurtmasi asosida turli tashkilotlar uchun kiyim-bosh dizaynini ishlab chiqish va milliy brendlarni shakllantirish ham yo‘lga qo‘yiladi.
Qarorda xorijiy mutaxassislar va talabalarni jalb qilish uchun ko‘p martalik vizalar rasmiylashtirish tartibi ham nazarda tutilgan.
Bundan tashqari, 2028-yil yakuniga qadar davlat-xususiy sheriklik asosida 400 o‘rinli talabalar turar joyi quriladi. Ungacha akademiyaga o‘tkazilgan talabalar Toshkent to‘qimachilik va yengil sanoat instituti yotoqxonasidan belgilangan tartibda foydalanishi mumkin.
Xorijda o‘zbek milliy taomlariga ixtisoslashgan restoran yoki oshxona tashkil etgan mahalliy tadbirkorlar ayrim xarajatlarining 50 foizigacha bo‘lgan qismini subsidiya sifatida qaytarib olishi mumkin.
Ushbu xizmat Turizm qo‘mitasi tomonidan my.gov.uz Yagona interaktiv davlat xizmatlari portali orqali bepul ko‘rsatiladi.
Subsidiya O‘zbekistonda davlat ro‘yxatidan o‘tgan va xorijda milliy restoran tashkil etgan tadbirkorlik subyektlariga ajratiladi.
Ariza topshirishda restoranning xorijiy davlatda ro‘yxatdan o‘tganini va binodan foydalanish huquqini tasdiqlovchi hujjatlar, sanitariya va yong‘in xavfsizligi talablariga muvofiqlik bo‘yicha ma’lumotlar taqdim etilishi kerak.
Shuningdek, restoranni tashkil etish bilan bog‘liq amalga oshirilgan xarajatlarni tasdiqlovchi hujjatlar, zaruratga qarab O‘zbekistondan mahsulot yetkazib berilganini tasdiqlovchi ma’lumotlar va ularning rasmiy tarjimasi so‘ralishi mumkin.
Restoranning ichki va tashqi ko‘rinishini aks ettiruvchi fotosuratlar ham arizaga ilova qilinadi.
Ariza my.gov.uz portali orqali elektron shaklda yuboriladi va 18 ish kuni ichida ko‘rib chiqiladi. Ijobiy qaror qabul qilinsa, subsidiya mablag‘lari 7 ish kuni ichida tadbirkorning bank hisobvarag‘iga o‘tkaziladi.
Arizada kamchiliklar aniqlangan taqdirda, tadbirkorga ularni bartaraf etib, hujjatlarni qayta taqdim qilish imkoniyati beriladi.
Qoraqalpog‘iston Respublikasidagi Ekologiya va iqlim o‘zgarishi milliy qo‘mitasi huzuridagi «Sayg‘ochiy» kompleks landshaft buyurtma qo‘riqxonasida yovvoyi hayvonlarni suv bilan ta’minlash maqsadida beshta avtonom suv ichish tizimi o‘rnatildi.
Tashabbus Ekologiya qo‘mitasi tomonidan BMT Taraqqiyot dasturi (BMTTD) va Global ekologik jamg‘arma (GEF) bilan hamkorlikda «Aral Sea Wetlands» loyihasi doirasida amalga oshirildi.
Suv resurslari cheklangan Ustyurt cho‘li sharoitida qo‘shimcha suv manbalarining mavjudligi sayg‘oqlar va mahalliy faunaning boshqa vakillarini saqlab qolishda muhim ahamiyatga ega.
Avtonom tizimlar quyosh energiyasida ishlaydi va to‘liq avtomatlashtirilgan. Ularning har biri 3 kub metr sig‘imga ega suv havzalari, nasoslar, datchiklar va hisoblagichlar bilan jihozlangan. Bu markazlashgan elektr energiyasi va suv ta’minoti manbalariga doimiy ulanish zaruratisiz suvni barqaror yetkazib berish imkonini beradi.
Suv ichish tizimlari bilan bir qatorda hududga 10 ta kamera va 10 ta fototuzoq ham o‘rnatildi. Ular hayvonlarni sutka davomida kuzatish, harakatlanishi va suv ichish joylaridan foydalanishini qayd etish, shuningdek, populyasiyalar holatini keyingi monitoring qilish uchun ma’lumot to‘plash imkonini beradi.
Ustyurtning og‘ir tabiiy sharoitida yashaydigan sayg‘oqlar uchun qo‘shimcha suv manbalarining yaratilishi yovvoyi hayvonlar populyasiyalarini saqlash va tiklashda muhim ahamiyat kasb etadi.
Avtonom suv ichish tizimlarining o‘rnatilishi Ustyurtda bioxilma-xillikni asrash bo‘yicha amalga oshirilayotgan chora-tadbirlardan biri bo‘lib, zamonaviy kuzatuv vositalari orqali hayvonlar holatini monitoring qilish va zarur ma’lumotlarni to‘plash imkonini ham beradi.
Shavkat Mirziyoyev Shinjon usulida yetishtirilgan paxta dalasini ko‘zdan kechirdi
O‘zbekiston do‘konlarida 73 turdagi mahsulot sifatsiz deb topildi
Tadbirkorlar jarimaning 50 foizini to‘lab, qolgan qismidan ozod etilishi mumkin
-
Iqtisodiyot4 days ago
O‘zbekiston «Wabtec» kompaniyasi bilan lokomotivlar parkini yangilashni muhokama qildi
-
Jamiyat4 days ago
Tadbirkorlar jarimaning 50 foizini to‘lab, qolgan qismidan ozod etilishi mumkin
-
Jamiyat4 days ago
O‘zbekiston do‘konlarida 73 turdagi mahsulot sifatsiz deb topildi
-
Iqtisodiyot3 days ago
Shavkat Mirziyoyev Shinjon usulida yetishtirilgan paxta dalasini ko‘zdan kechirdi