Jamiyat
“Yoshartiruvchi muolaja” – vaqtinchalik taskin: teri salomatligi aslida nimaga bog‘liq?
Porloq, silliq, tiniq teri insonda ichki ishonchni uyg‘otadi. Shu sabab ham so‘nggi paytlarda yosharish, ajin ketkazish, yuzni silliqlashtirish va “g‘adir-budirlarni yo‘qotish”ga qiziqish tobora ortmoqda. Kosmetologik, tashqi muolajalar ma’lum muddatgacha tanamizning ustki qoplamasini yaxshi saqlab turishi mumkin, ammo uning doimiy porloq va tiniq bo‘lishi uchun birinchi navbatda organizm ichki holatidagi balansni ushlash kerak. Ushbu maqolada terini to‘g‘ri parvarishlashda nimalarga e’tibor qaratish lozimligi haqida so‘z boradi.
Teri inson tanasidagi eng yirik a’zo hisoblanadi. U organizmni himoya qiluvchi to‘siq, shu bilan birga, haroratni saqlovchi, sezgi uzatuvchi va metabolizmda ishtirok etuvchi murakkab tuzilmadir.
Mazkur organning ustki qatlami (epidermis) har 27–30 kunda to‘liq yangilanadi. Bu tabiiy jarayon sekinlashib yoki buzilib qolmasligi uchun unga to‘g‘ri parvarish zarur. Agar teri yetarlicha tozalanmasa, o‘lik hujayralar yuzada to‘planib, yangilangan hujayralarning chiqishiga to‘sqinlik qiladi. Natijada teri xira, g‘adir-budir va nosog‘lom tusga kiradi.
Bundan tashqari, epidermis yangilanishi uchun organizm ichki tomondan ham kerakli oziq moddalar bilan ta’minlanishi kerak: A,C, E vitaminlari, omega-3 yog‘ kislotalari va suv miqdori yetarlicha bo‘lishi zarur. Ichki muvozanat normada bo‘lmasa, eng qimmat krem ham terini go‘zallashtirishga yordam bera olmaydi.
Quyida terining sog‘lom, yosh va tiniq bo‘lishi uchun ahamiyat qaratilishi joiz bo‘lgan jihatlarga to‘xtalamiz:
To‘g‘ri ovqatlanish
Ovqatlanish odatlari terining holatiga bevosita ta’sir qiladi. Fast-fud, shakarli mahsulotlar va zararli yog‘lar terida yallig‘lanish jarayonlarini kuchaytiradi, akne, teshiklar kengayishi va sarg‘ayish kabi muammolarga olib keladi.
A,C, E vitaminlariga boy sabzavot va mevalar, omega-3 yog‘ kislotalari hamda sifatli oqsillar teri hujayralarining yangilanish jarayonini tezlashtiradi. Sabzi, ismaloq, apelsin, tuxum, bodom kabi mahsulotlar esa teriga zarur bo‘lgan antioksidantlar, vitaminlar va minerallarni yetkazib beradi. Ayniqsa:
A vitamini (sabzi, tuxum sarig‘i, qovoq) terining yangilanishini faollashtiradi;
C vitamini (apelsin, kivi, bulg‘or qalampiri) kollagen ishlab chiqarilishini rag‘batlantiradi;
E vitamini (bodom, kungaboqar yog‘i) erkin radikallar (tanadagi sog‘lom hujayralarga hujum qiluvchi moddalar)ning zararli ta’siriga qarshi kurashadi;
Omega-3 yog‘ kislotalari (losos, zig‘ir urug‘i, yong‘oq) terining yumshoq, silliq va elastik bo‘lishiga ko‘maklashadi.
Namlik
Teri hamisha namlikka muhtoj. Ko‘pchilik uni namlantirish deganda turli krem va losyonlarni surtishni tushunadi. Aslida terining to‘liq namlanishi tanadagi suv muvozanatiga bog‘liq.
Organizmda suv yetishmovchiligi birinchi navbatda kapillyarlarning faoliyatini susaytiradi. Buning oqibatida teri hujayralari to‘liq oziqlanmaydi. Ushbu holat epidermis qurishi, zaiflashishi va ajinlarning erta paydo bo‘lishiga olib keladi: teri quruqlashadi, qizaradi va elastikligini yo‘qotadi.
Shu sabab har kuni kamida 6–8 stakan, ya’ni 1,5–2 litr suv ichish terining sog‘lom bo‘lishi uchun muhim sanaladi. Biroq mazkur miqdorga choy, qahva yoki gazli ichimliklar iste’moli kirmaydi. Bunday ichimliklar tanadagi suyuqlikni kamaytirishi ham mumkin. Havo harorati yuqori bo‘lgan kunlar yoki sport bilan shug‘ullanganda kunlik suv iste’moli miqdorini oshirish tavsiya etiladi.
Quyosh nuridan himoya
Quyosh nuri D vitamini manbai bo‘lsa-da, uning ultrabinafsha nurlari teri qarish jarayonini 80 foizga tezlashtiradi. Kuchli quyosh nurlari “fotosariqlik”, pigment dog‘lari, ajinlar va hatto teri saratonini ham yuzaga keltirishi mumkin. Shu bois,
Har kuni (hatto bulutli havoda ham) SPF 30+ dan foydalanish;
Quyosh nurlari kuchli bo‘ladigan vaqt – 11:00–16:00 oralig‘ida soyada yurish;
Qalin ko‘zoynak, shlyapa yoki soyabon kabi teri himoyachilaridan foydalanish tavsiya etiladi.
Uyqu
Tibbiy tadqiqotlarga ko‘ra, inson tanasining eng faol tiklanish jarayoni soat 23:00 dan 03:00 gacha sodir bo‘ladi. Bu vaqt “regeneratsiya oynasi” deb nomlanadi. Aynan shu oraliqda melatonin gormoni ko‘p ajraladi: u teri hujayralarining yangilanishiga yordam beradi, erkin radikallar ta’sirini kamaytiradi va qarish jarayonini sekinlashtiradi. Agar siz bu oraliqda uxlamasangiz yoki uyqu sifati yomon bo‘lsa, terining tabiiy yangilanish mexanizmi izdan chiqadi.
Tungi uyquning yetishmasligi birinchi navbatda yuzda namoyon bo‘ladi: ko‘z ostida qora halqalar, xira rangdagi teri, sarg‘ayish va erta ajinlar paydo bo‘la boshlaydi. Organizm to‘liq tiklanishga ulgurmagani sababli qon aylanishi sekinlashadi, natijada teri hujayralari yetarli kislorod va oziqa moddalarini ololmaydi. Bu esa terining jonsiz, rangsiz ko‘rinishiga sabab bo‘ladi.
Kundalik hayotimizda shunchaki 20–30 daqiqa toza havoda sayr qilish ham salomatlik va go‘zallik uchun katta foyda beradi. Qonning yaxshi aylanishi teri hujayralarini kislorod bilan ta’minlaydi, bu esa ularning sog‘lom va yorqin bo‘lishiga xizmat qiladi. Agar mazkur oddiy odatni sifatli uyqu bilan birlashtirsangiz, kosmetik vositalarga bo‘lgan ehtiyoj sezilarli darajada kamayadi.
Stressni boshqarish
Stressli holatlarda organizm kortizol deb nomlanuvchi gormonni haddan tashqari ko‘p ishlab chiqaradi. Bu gormon aslida xavfga javoban tana resurslarini safarbar etish uchun kerak. Uning miqdori doimiy ravishda yuqori bo‘lsa, teri muammolarini keltirib chiqaradi.
Kortizol yog‘ bezlarini faollashtiradi, ushbu jarayon terining haddan ziyod ko‘p yog‘lanishi va akne (yuzdagi toshmalar) ko‘payishiga sabab bo‘ladi. Shuningdek, mazkur modda terining elastikligi uchun zarur bo‘lgan kollagen ishlab chiqarilishini ham sekinlashtiradi. Natijada, teriga erta ajin tushadi, rang xiralashadi, yallig‘lanishlar kuchayadi.
Ruhiy bosim ham ko‘pincha yuzda aks etadi. Doimiy siqilish, xavotir va ruhiy charchoq mimik mushaklarning taranglashuviga olib keladi. Mazkur holat peshona, qosh oralig‘i, og‘iz atrofida erta ajinlarni paydo qiladi.
Stressni kamaytirish orqali teriga ham, ichki holatga ham sog‘lom muvozanatni qaytarish mumkin. Nafas olish mashqlari, yoga, meditatsiya, yurish, musiqa tinglash yoki kuniga bir necha daqiqa o‘zingiz bilan yolg‘iz qolish kortizol darajasini tushiradi. Shuningdek, psixogigiyena qoidalariga amal qilish, ya’ni ekran oldidagi vaqtni cheklash, ijtimoiy tarmoqlardan tanaffus olish va sifatli uyqu ham ruh, ham teri uchun kuchli davodir.
To‘g‘ri parvarish
Terining o‘z tabiati, ehtiyoji va muvozanati bor. Parvarishning birinchi va eng asosiy bosqichi — teri turini aniqlash: u quruqmi, yog‘limi yoki aralashmi? Shu savolga javob topmasdan turib, yuzingizga har xil mahsulotlarni surtish salbiy ta’sirlarni kuchaytirishi mumkin.
Aniqroq aytadigan bo‘lsak, teriga mos bo‘lmagan vositalarni doimiy ishlatish uning tabiiy muvozanatini buzadi: peshona yog‘li, yonoqlar quruq, burun esa toshmalar toshgan holatga tushib qolishi mumkin, Shuning uchun yuzlab vosita ishlatish emas, terining ehtiyojlariga mos protseduralarni tanlab, muntazam parvarishlash kerak. Universal mahsulotlar hamisha ham foyda keltirmaydi – har bir vosita teri turiga mos bo‘lishi shart.
Sog‘lom va chiroyli teri faqat krem, niqob yoki kosmetologik muolajalarga bog‘liq emas, u sizning har kungi odatlaringiz: yeyayotgan ovqatingiz, uxlayotgan vaqtingiz, ichayotgan suvingiz, yengayotgan stressingiz va o‘zingizga bo‘lgan mehringiz aksi hisoblanadi. Shunday ekan, go‘zallik yo‘lida ko‘p emas – mos, qimmat emas – kerakli vositalarni tanlang. Zero, teri parvarishida minimalizmdan foydalanish mustahkam natijaga eltuvchi, eng boy strategiyadir.
Diyoraxon Nabijonova tayyorladi
Bu yil yozda dunyoning aksariyat mintaqalarida g‘ayrioddiy jazirama hukm surmoqda. Biroq, konditsionerdan foydalanish imkoniyati hammada ham mavjud emas.
Jaziramadan saqlanish bo‘yicha Hindistonning NPR nashri jamlagan maslahatlarning har biri alohida olinganda arzimasdek tuyulishi mumkin, ammo ular birgalikda tananing sovishiga haqiqatan ham yordam beradi.
Alohida ta’kidlanishicha, issiq urish belgilariga quyidagilar kiradi: tana haroratining ko‘tarilishi, bosh og‘rig‘i, ko‘ngil aynishi, ongning chalkashishi yoki holsizlik. Ushbu alomatlar paydo bo‘lganda, darhol tez yordam chaqirish va tibbiy yordamga murojaat qilish kerak.
Jazirama bilan kurashishga yordam beradigan maslahatlar:
1. Ko‘p suyuqlik iching
Tana gidratatsiyasi darajasini doimo kuzatib borish kerak. Har qanday jismoniy faoliyatni boshlash bilan suvni kichik qultumlarda ichish lozim. Ko‘chaga chiqqanda suv olib yurish – jaziramada hayot-mamot masalasidir.
2. Albatta, biror narsa yeb oling
Hech qachon uydan och qoringa chiqmaslik kerak, doim nimadir yeb olish lozim. Masalan, tarkibida erigan elektrolitlar bo‘lgan bodring yoki bir bo‘lak ananas buning uchun ayni muddao.
3. Ruh tetikligi
Agar isib ketayotgan bo‘lsangiz, sovuq dush qabul qiling yoki hech bo‘lmaganda yuzingiz va qo‘llaringizni, shuningdek, boshingizni vaqti-vaqti bilan suv bilan ho‘llab turing – bu tana haroratini pasaytirishga yordam beradi.
4. Dam olish uchun salqin joy toping
Shuni bilish kerakki, issiq havo yuqoriga ko‘tarilgani uchun ko‘p qavatli uylarning pastki qavatlari salqinroq bo‘ladi. Kunduzi quyosh nurini qalin pardalar bilan to‘sing. Qo‘lingiz ostidagi barcha ventilyatorlarni ishga tushiring.
Va salqinlik izlab mebellarni qayta joylashtirishdan qo‘rqmang. Masalan, karavotni deraza yoniga qo‘ysangiz, uxlayotganda yengil shabadani his qilishingiz mumkin.
Agar xona ichida nafas olish qiyinlashib, dim bo‘lib ketsa, tashqariga chiqing va gamakda yoting. Tebranish paytida hosil bo‘ladigan havo oqimi tanani sovutishga yordam beradi.
5. Me’morchilikdan ilhomlaning
Ko‘plab me’moriy yangiliklar orasida «jaali» deb nomlangan me’moriy uslub bor, u hind va urdu tillaridan tarjima qilinganda shunchaki «to‘r» degan ma’noni anglatadi. Aslini olganda, bu tosh devorni yaxlit qoldirish o‘rniga, bir qator kichik teshiklari bor geometrik naqshlarni o‘yib, uni naqshinkor panjaraga aylantirish usulidir.
6. Bug‘lantiruvchi sovutgich
Ushbu elektr qurilma, shuningdek, bug‘lantiruvchi sovutgich sifatida ham tanilgan bo‘lib, xonadagi havoni suvga botirilgan filtrlar orqali o‘tkazadi, bu filtrlar havoni sovutadi va keyin uni xonaga qaytaradi. Bu qurilmalar konditsionerlardan arzonroq va kamroq energiya sarflaydi. Bunday qurilmani hatto o‘zingiz ham yasashingiz mumkin.
7. Oq rangli kiyimlar kiying
Paxta va zig‘ir matolaridan tikilgan kiyimdan foydalaning, oq rang issiqlikni samarali qaytaruvchi hisoblanadi.
8. Bosh va bo‘yningizni yopib yuring
Yozda boshni yopib yurish qadimiy va samarali an’anadir.
9. Tushki quyoshdan saqlaning
Kunning eng issiq vaqtida ko‘chaga chiqish, sport bilan shug‘ullanish yoki ochiq havoda bo‘lish orqali o‘zingizni charchatmaslikka va quvvatingizni behuda sarflamaslikka harakat qiling, chunki jazirama quyosh nuri va issiq havo tana haroratini yanada oshirib yuboradi.
10. Soyadan foydalaning
Ochiq havoda ishlayapsizmi yoki ko‘chada ketyapsizmi, daraxtlar soyasida yurishga harakat qiling. U yerdagi havo harorati aslida quyosh ostidagidek bo‘lsa-da, teringiz quyosh nurlarini yutmaydi va bu tanangizning qizib ketishiga yo‘l qo‘ymaydi.
Jazirama issiq sabab ayrim yo‘nalishlarda poyezdlar harakat tezligiga vaqtinchalik cheklov joriy etiladi.
Foto: Temiryo‘lekspress
“Temiryo‘lekspress” AJ xabariga ko‘ra, mazkur choralar yo‘lovchilar va poyezdlar harakati xavfsizligini ta’minlash, shuningdek, temir yo‘l infratuzilmasining barqaror va ishonchli ishlashini saqlash maqsadida ko‘rilmoqda. Shu sababli ayrim poyezdlar harakat jadvalida belgilangan vaqtdan kechroq manzilga yetib borishi mumkin.
Xabarda qaysi yo‘nalishlarda cheklov joriy qilinishiga aniqlik kiritilmagan.
Eslatib o‘tamiz, 13 iyuldan boshlab O‘zbekiston hududida g‘ayritabiiy o‘ta issiq ob-havo sharoiti kuzatilmoqda, u 20 iyulgacha davom etishi mumkin. Havo harorati 43-45 darajagacha, janubda va cho‘l hududlarda 46-48 darajagacha ko‘tarilishi kutilmoqda.
D002 avtomobil yo‘lining 4-9 kilometri oralig‘i 21 iyulga qadar yopildi. Haydovchilarga aylanma yo‘llardan foydalanish bo‘yicha tavsiyalar berildi.
Toshkent va Nurafshon shaharlarini bog‘lovchi avtomobil yo‘lida joriy yilning 21 iyul kuniga qadar transport vositalarning harakati to‘liq cheklandi.
Toshkent viloyati YHXB xabariga ko‘ra, bunga yo‘ldagi inshootlarning qurilishi sabab bo‘lgan.
«Toshkent – Nurafshon (D002) avtomobil yo‘lining 4 kilometridan 9-kilometriga qadar transport vositalarining harakati to‘liq cheklanadi», deyiladi xabarda.
Shu sababli YHXB ushbu yo‘ldan harakatlanuvchi haydovchilarga aylanma yo‘llardan foydalanish bo‘yicha tavsiyalar berdi.
Prezident Shavkat Mirziyoyev mahalla bankirlari ish tizimi tubdan o‘zgarishini ma’lum qildi. Endi bir bankirga ko‘pi bilan uchta mahalla biriktirilib, biznes faolligi, yangi ish o‘rinlari va aholi daromadini oshirish bo‘yicha KPI belgilanadi. Shuningdek, banklarga har bir mahallaning “o‘sish nuqtasi”ni aniqlash va daromadli loyihalarni ko‘paytirishni buyurdi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Yig‘ilishda mahalla bankirlarining ish uslubi ham tubdan o‘zgarishi belgilandi. Ta’kidlanishicha, joylarda yaxshi tajribalar bor. Masalan, Angor tumani Yangiobod mahallasidagi 2 kilometr zovur usti yopilib, 110 ta servis obekti ishga tushirildi. Natijada mahalla atrofida yashaydigan 1 ming 225 nafar odam ishli va daromadli bo‘ldi.
Arnasoy tumanidagi Baxtli mahallasining bankiri 20 ta xonadonga 50 million so‘mdan kredit ajratib, mehmon uylarini ishga tushirdi. Har bir xonadon bir mavsumda 100 million so‘mgacha daromad olmoqda. Ish yurishib ketgani uchun yana 80 ta oila shunday mehmon uylari tashkil qilishga kirishdi.
Endi banklar har bir mahallaning “o‘sish nuqtasi”ni aniqlab, tashabbuskorlarni topishi va daromadli loyihalarni ko‘paytirishi zarur. Bundan buyon bitta mahalla bankiriga ko‘pi bilan uchta mahalla biriktiriladi.
Ikki haftada tashabbuskor, zamonaviy fikrlaydigan oliygoh bitiruvchilari va yosh mutaxassislar orasidan 400 nafar yangi mahalla bankiri tanlab olinadi. Ular bir oy davomida namunali mahallalarga olib borilib, tajriba o‘rganadi.
Joriy yil oilaviy tadbirkorlik loyihalari uchun qo‘shimcha 2 trillion so‘m imtiyozli resurs berildi. “Og‘ir” mahallalar uchun kredit stavkasi 17,5 foizdan 12 foizga tushirildi.
Endi mahalla bankirlari o‘zi topgan loyihasi uchun ushbu resursdan foydalanishi mumkin bo‘ladi. Bu tizimni 1 avgustdan amaliyotga joriy etish vazifasi qo‘yildi.
Mahalla bankirlariga biznes faollikni oshirish, tadbirkorlik, ish o‘rni va aholi daromadini ko‘paytirish bo‘yicha KPI belgilanadi. Tuman va shahar hokimlari mahalla raislari bilan birga har bir mahalla bankiriga yil yakunigacha aniq buyurtma shakllantirib beradi.
Davlat banklari bu yil 100 tadan mahallani ixtisoslashtirish tashabbusi bilan chiqqan. O‘tgan yili 9 ta davlat banki ishtirokida mahallalarda agrosanoatni rivojlantirish uchun “Agrostar” kompaniyalari tashkil qilingan edi.
Endi banklar mahallani ixtisoslashtirish bilan cheklanib qolmasdan, “Agrostar”larni jalb qilgan holda “yetishtirish – qayta ishlash – saqlash – qadoqlash – sotish” zanjirini yaratadi. Bir oyda dastur qilib, 1 mingta mahallada ish boshlash topshirildi.
Prezident Shavkat Mirziyoyev mahalla raislariga yangi vakolatlar berilishini ma’lum qildi. Endi ular hududda xususiy bog‘cha, maktab, klinika va sport inshootlari qurish uchun yerlarni auksionga chiqarish, shuningdek, “mahalla yettiligi” ishini muvofiqlashtirish huquqiga ega bo‘ladi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Mahallalarda soliq tushumlari, jinoyatchilikni jilovlash va aholi muammolarini hal etish bo‘yicha mas’ullarga savollar qo‘yildi. Davlat rahbari mahalla odamlar uchun chinakam “ishonch, tayanch va imkoniyatlar markazi” bo‘lishi zarurligini ta’kidladi.
Yangi Quva mahallasi misolida aholini ish bilan ta’minlash va daromadini oshirish bo‘yicha yangi tartib ko‘rsatib o‘tildi. Ushbu mahallada 51 nafar ishsiz fuqaro bor, ularning 4 nafari agrotexnikumni bitirgan va xonadonida 10 sotixdan tomorqasi mavjud.
Mahalla raisi tomorqada gul ko‘chatiga ixtisoslashgan yengil konstruksiyali issiqxona qurish uchun mahalla bankiriga buyurtma beradi. Qolgan ishsiz aholi bo‘yicha ham mahalla raisi kim tadbirkor bo‘lmoqchi, qaysi oila daromadini oshirmoqchi, kimga kredit, uskuna yoki yer kerakligini aniqlab, bankirga aniq vazifa qo‘yadi.
Yangi Quva mahallasida bog‘cha yetishmasligi sabab 50 nafar bola qo‘shni mahallaga qatnayapti, hududda esa 70 sotix bo‘sh yer bor. Shu munosabat mahallalarda xususiy bog‘cha, maktab, klinika va sport inshootlari qurish uchun yerni auksionga chiqarish vakolati ham mahalla raisiga beriladi.
Davlat rahbari mahalla raisi ijtimoiy muammolarni hal qilish, tozalikni ta’minlash va daromadni ko‘paytirishga xizmat qiladigan loyihalarda tashabbuskor bo‘lishi zarurligini ta’kidladi.
Bunday loyihalar uchun “mahalla yettiligi”ga 10 million so‘mdan grant ajratiladi. Agar 8 ming 992 ta mahallaning har birida bittadan shunday loyiha amalga oshirilsa, hududlardagi muhit sezilarli o‘zgaradi. Ushbu maqsadlar uchun jami 240 milliard so‘m resurs shakllantiriladi.
Mahalla raisi o‘z hududining haqiqiy boshqaruvchisi bo‘lishi shart. Buning uchun u hokim yordamchisi, xotin-qizlar faoli, yoshlar yetakchisi, ijtimoiy xodim, profilaktika inspektori, soliqchi va mahalla bankirining haftalik hamda oylik ish rejasini tasdiqlab beradi. Rais “yettilik” a’zolariga aniq vazifa qo‘yib, ulardan so‘rov qilib boradi.
Shuningdek, “yettilik” faoliyatini metodik qo‘llab-quvvatlash va hududdagi muammolarga ilmiy yondashish uchun Mahallani rivojlantirish milliy instituti tashkil etiladi. U “yettilik”ni o‘qitadi, mahallalardagi dolzarb masalalarga ilmiy yechimlar ishlab chiqadi.
Ingliz tili Toshkent xalqaro moliya markazining rasmiy tili bo‘ladi
Ispaniya Fransiyaga qarshi o‘yinda nimani isbotladi?
Jaziramada konditsionersiz qanday yashash haqida 10 ta foydali maslahat
-
Siyosat3 days ago
Prezident Shavkat Mirziyoyev Qatar amiriga ta’ziya bildirdi
-
Sport5 days agoAngliya Norvegiyani turnirdan chiqarib yubordi
-
Jamiyat4 days agoToshkent metrosiga yana 3 ta zamonaviy poyezd qo‘shildi
-
Sport5 days agoInfantino yana JCh ishtirokchilari sonini oshirish g‘oyasi haqida gapirdi
-
Jamiyat5 days agoEnergetika tizimidagi ayrim rahbarlar ishdan olindi
-
Dunyodan5 days ago
NATO 2026-yilda Ukrainaga 70 milliard yevro miqdorida yordam ajratmoqchi
-
Dunyodan4 days ago
Anqarada NATO sammiti boshlandi
-
Jamiyat5 days ago
Bugun ayrim hududlarda chang-to‘zon kuzatiladi, havo 43 darajagacha isiydi