Jamiyat
“Yemagan somsamga pul to‘layapman” – surxondaryolik ayol tergov va suddan norozi
Surxondaryoda tergov va sud organlarining kuchi ikki bolani voyaga yetkazayotgan yolg‘iz ayolga yetgan ko‘rinadi – oilaning yagona boquvchisiga qo‘llangan adolatsiz hukm sabab uch jon nochor ahvolga tushib qolgan. Gap shundaki, Uzun tuman obodonlashtirish bo‘limi qabriston nazoratchisining aybi uchun kadrlar bo‘yicha mutaxassis jazolandi. Huquq himoyachisi bu borada shunday deydi: «asl o‘g‘ri-korrupsionerlarni kechirib, jamiyatdagi zaif qatlam bo‘lgan ayollarga nisbatan bu munosabatni davlat siyosatiga sabotaj deyish mumkin».
{Yii::t(}
O’tkazib yuborish 6s
O’tkazib yuborish
Uzun tumanida oddiy bir tekshiruv ortidan boshlangan jarayon boquvchisiz bir oilaning xonavayron bo‘lishi bilan davom etyapti. Eng ajablanarlisi: bir xodim ish davrida Termizdagi diniy maktabda o‘qigan va buni tashkilotdan bekitgan. Javobgarlik va jazo esa kadrlar bo‘limi mutaxassisi — Iroda Sharipova zimmasiga yuklangan. Biz bilan bog‘langan ayol o‘ziga nisbatan chiqarilgan sud qarori oilaning shundoq ham yengil bo‘lmagan hayotini battar boshi berk ko‘chaga tiqqanini, buning jabrini ikki bolasi ham tortayotganini aytdi.
“2025 yil 25 oktyabr kuni Qiziriq tuman sudi tomonidan menga nisbatan JKning 167-moddasi 1-qismi, 228-moddaning 1-qismi bilan aybli deb topilib, 45-moddani qo‘llab 1 yil muddatga mansabdorlik va moddiy javobgarlik lavozimlarida ishlashdan mahrum qilinib, ish haqimning 20 foizini davlat daromadi hisobiga ushlab qolgan holda 9 oy axloq tuzatish ishlari jazosi tayinlangan.
Buning sababi esa Uzun tumani qabriston nazoratchisi vazifasida ishlab kelgan Abubakr Hotamov ismli xodim 2022 yil sentabrdan 2025 yil apreligacha o‘z xizmat faoliyatida ishlab turgan holda qo‘shimcha ravishda Termiz shahridagi Imom Termiziy nomli o‘rta maxsus kasb-hunar diniy maktabida ta’lim olib kelgan, bundan rahbariyatni xabardor qilmagan”, – deydi Iroda Sharipova.
Tumandagi obodonlashtirish bo‘limida 200 ga yaqin xodim ishlaydi. Aynan Hotamov ishlagan hudud Irodadan 35-40 km uzoqda, uni har kuni nazorat qilishga imkon yo‘q va u bo‘lim boshliqlari bergan hisobotga ko‘ra ish haqi yozgan. Ishga guvoh sifatida jalb etilgan Abubakr Hotamov ham Sharipovaning aybi yo‘qligini aytgan.
Yomonning kuchi yapaloqqami?
Abubakr Hotamov jinoyat ishiga guvoh sifatida jalb qilingan va Sharipovaning bu ishlardan mutlaqo bexabar ekanligini aytgan:
“Uzun tumani Obodonlashtirish boshqarmasida qabriston nazoratchisi lavozimida ishlab, o‘zimga biriktirilgan 11 ta qabristonlar tozaligini, o‘lim daftarlarini, qabriston ishchilarining ishga kelib-ketishlarini nazorat qilganman.
Termiz shahridagi “Imom Termiziy” o‘rta maxsus islom ta’limiy muassasasining talabasi bo‘la turib, 2022 yil sentabr oyidan 2025 yil aprel oyiga qadar o‘qishda bo‘lgan davr uchun jami majburiy ushlanmalardan tashqari 51 326 966 so‘m ish haqi olganman. Uzun tuman prokuraturasi tomonidan Obodonlashtirish boshqarmasida o‘tkazilgan tekshirishda bu holat yuzaga chiqdi. Haftada 6 kun dushanbadan shanbaga qadar o‘qishda bo‘lganman. Ish vaqti soat ertalab 8 dan soat 16 gacha edi, har kuni soat 8 dan 14 gacha darsda bo‘lar edim. Darsdan chiqib soat 14:30 dan keyin ishga kelib berilgan topshiriqlarni bajarganman. Biror marta boshqarma rahbariyati yoki kadrlar bo‘limi boshlig‘i I. Sharipovaga o‘qishda ekanligimni aytmaganman. Menga biriktirilgan qabristonlarda jami 13ta qorovul bor edi va ularga tabel to‘ldirib, o‘zim imzo chekib kadrlar bo‘limi boshlig‘i I. Sharipovaga topshirganman. Mening ishga kelgan-kelmaganimni Sharipova nazorat qilmagan. Men ishlaydigan qabriston undan 40 kilometr uzoqda, bizning ishlarimizni obektlarni saqlash bo‘limi boshlig‘i Bo‘ronov tekshirardi, u asosan tushdan keyin kelardi bizning ishimizni tekshirishga”, – degan u o‘z ko‘rsatmasida.
Yuqorida tilga olingan Hotamovning faoliyatini nazorat qilish Irodaning vakolatiga kirmasa-da, rahbariyat ham bu yerda bee’tiborlik qilganini tan olsa-da, kamomad qoplansa-da Iroda aybdor deb topilgan. Qisqagina voqeaning uzun tarixi Irodaning kichkina oilasiga katta kulfat bo‘lib kelgan. Chunki u yolg‘iz boquvchi, ikki farzandining ta’minotchisi. U sud hukmidan norozi, ammo apellyatsiyaga ariza berish uchun advokat yollashga imkoni yo‘q. Turmushidan ajrashgan va voyaga yetmagan 2 farzandini o‘zi ta’minlaydi, sobiq turmush o‘rtog‘i Tojikiston fuqarosi bo‘lgani sabab aliment ham ololmaydi.
Hozir u kam ish haqi oladigan joyda ishlaydi va uning ham 20 foizi davlat hisobiga o‘tadi. Qish kelgan bo‘lsa-da 12 va 14 yoshli bolalari haligacha yupun kiyimlarda maktabga qatnashadi. Nafaqadagi ota-onasidan boshqa hech kimi yo‘q.
Huquq himoyachilari bu vaziyat ayolga nisbatan adolatsizlik ekanligini aytishdi.
“Sud hukmiga qarasak, u haqiqatan shunday jazo oladigan darajadagi mansabdor shaxsmi yoki bu jinoyatning motivlari nimadan kelib chiqdi degan savollar yuzaga keladi. Shu nuqtayi nazardan Sharipovaga nisbatan chiqarilgan sud qarorini birmuncha adolatsiz deyish mumkin. Chunki tergov organi uni o‘ta jiddiy ayblovlarda ayblagan. Ya’ni u bor-yo‘g‘i kadrlar boshqarmasida oddiy nozir. Uni mansab soxtakorligi, sovuqqonligi, korrupsiyaga oid ayblovlar bilan ayblashgan. O‘g‘rilar, korrupsionerlarni kechirib, jamiyatdagi zaif qatlam bo‘lgan ayollarga nisbatan bu munosabatni davlat siyosatiga sabotaj deyish mumkin.
Prezident administratsiyasi rahbari Saida Mirziyoyevaning ayollar huquqlari himoyasiga qaratilgan qadamlari doim meni ilhomlantirib kelgan. Chunki jamiyatning katta qismi ayollardan iborat ekan, ularning faolligini inobatga olish kerak. Bunga sud, prokuratura organlariyam moslashishi kerak. Davlat siyosati ayollarning ijtimoiy himoyasiga qaratilgan bir paytda bu ish siyosatga qarshi qaratilgan adolatsizlik deyish mumkin”, – deydi Inson huquqlari bo‘yicha “Ezgulik” jamiyati rahbari Abdurahmon Tashanov.
Bir ayol va ikki bolaning taqdiri ustidan chiqarilgan hukm yana bir bor xulosa talab qiladi. Surxondaryo viloyati, Qiziriq tumani mutasaddilaridan bu masala yuzasidan o‘rganish kutib qolamiz.
Gulmira Toshniyozova. Kun.uz
Buxoro viloyati hokimiga birinchi o‘rinbosar tayinlandi.
Jamshid Sharopov Buxoro viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari – viloyat iqtisodiyot va moliya boshqarmasi boshlig‘i lavozimiga tayinlandi.
Jamshid Sharopov 1984-yil 27-yanvarda G‘ijduvon tumanida tug‘ilgan. 2005-yilda Buxoro davlat universiteti, 2009 yilda Toshkent davlat iqtisodiyot universitetini tamomlagan. Ma’lumoti bo‘yicha mutaxassisligi-iqtisodchi.
Mehnat faoliyatini 2002-yilda AT “Paxta Bank”ning Buxoro viloyati boshqarmasi bank jarayonlari bo‘limi iqtisodiy bo‘linmasi mutaxassisi sifatida boshlab, ATB “Agrobank” Buxoro viloyati boshqarmasi boshlig‘i (2014-2020), O‘zbekiston Respublikasi Markaziy banki Buxoro viloyati bosh boshqarmasi boshlig‘i (2020-2021), Shofirkon tumani hokimi (2021-2023), ATB “Agrobank” agrosanoat majmuasi korxonalarini moliyalashtirish departamenti direktori o‘rinbosari (2023-2026) lavozimlarida faoliyat yuritgan.
Ayni paytga qadar u ATB “Agrobank” muammoli kreditlar bilan ishlash departamenti direktori vazifasida ishlab kelayotgan edi.
«O‘zbekiston Respublikasi mustaqilligining o‘ttiz besh yilligi munosabati bilan chet el fuqarolari va xorijda istiqomat qilayotgan vatandoshlarimizni mukofotlash to‘g‘risida»gi Prezident farmoni e’lon qilindi.
Mukofotlanganlar ro‘yxati:
“Do‘stlik” ordeni bilan
Ivan Sao – “BYD Auto” kompaniyasining Yevropa sotuv bo‘limi bosh direktori o‘rinbosari
Klod Imoven – Fransiyaning “MEDEF International” harakatining O‘zbekiston-Fransiya ishbilarmonlar kengashi raisi
Masayoshi Fujimoto – “Sojitz” kompaniyasi direktori
Sabine Maxl – BMTning O‘zbekistondagi doimiy koordinatori
Turaman Sinan – Shayxontohur tumanidagi “Outdoor Factory Toshkent” mas’uliyati cheklangan jamiyati kuzatuv kengashi raisi, Toshkent shahri
II darajali “Salomatlik” ordeni bilan
Qahorova Nilufar Hamroyevna – AQShning Garvard universiteti huzuridagi Boston bolalar shifoxonasi loyiha menejeri
Yuldasheva Nodira Muxamedovna – Kanadaning Toronto shahridagi Kanadadagi o‘zbekistonliklar uyushmasi asoschisi, “Sog‘lom yo‘l” tibbiy va diagnostik markazi rahbari
“Shuhrat” medali bilan
Abdullayeva Shahlo Abdirashidovna – Koreya Respublikasining Kvangju shahridagi Migrant ayollar huquqlarini himoya qilish va ta’lim berish markazi rahbari.
Podpolkovnik Baxtiyor Inoqov Surxondaryo viloyati ichki ishlar boshqarmasi boshlig‘i etib tayinlandi. U bunga qadar Ichki ishlar vazirligi Akademiyasi magistratura bosqichida tahsil olgan.
Tayinlov Xalq deputatlari Surxondaryo viloyati Kengashining jamoat xavfsizligi va kriminogen vaziyatga bag‘ishlangan navbatdan tashqari sessiyasida ma’lum qilindi.
Sessiyada viloyatdagi jinoyatchilik holati ham tahlil qilindi. Joriy yilning hisobot davrida hududdagi 723 ta mahallaning 528 tasida (73 foiz) bironta ham jinoyat sodir etilmagan. Ichki ishlar xodimlarining tashabbusi bilan aniqlanadigan jinoyatlar soni 40 foizga yaxshilangan.
Shu bilan birga, 28 ta mahalla «qizil» toifada qolayotgani qayd etildi.
Yangi IIB boshlig‘iga jinoyatchilikka qarshi kurashish samaradorligini oshirish, har bir mahallada xavfsizlikni ta’minlash, aholi bilan yaqin muloqotni yo‘lga qo‘yish va fuqarolarning ichki ishlar organlariga ishonchini mustahkamlash vazifalari yuklatildi.
Yangi o‘quv yili arafasida O‘zbekiston hududidagi umumta’lim maktablari, dehqon bozorlari va savdo majmualarida mavsumiy «Maktab bozorlari» tashkil etilmoqda.
Raqobat qo‘mitasi mavsumiy savdo jarayonlarida iste’molchilarning huquq va manfaatlarini himoya qilish, raqobat muhitini ta’minlash hamda aholini sifatli va hamyonbop mahsulotlar bilan ta’minlash muhimligini ta’kidladi.
Qo‘mita ota-onalar va o‘quvchilarga xarid vaqtida mahsulotning sifati, ishlab chiqaruvchisi, narxi va boshqa muhim ma’lumotlarga e’tibor qaratishni tavsiya qildi.
Tadbirkorlarga esa «Maktab bozorlari»da sotilayotgan mahsulotlar sifati va narxlarining asosliligini ta’minlash, iste’molchilarga zarur axborotlarni taqdim etish hamda ularning huquqlariga rioya qilish majburiyati eslatildi.
Raqobat qo‘mitasi maktab bozorlarida faoliyat yuritayotgan tadbirkorlarni darsliklar, maktab formalari, o‘quv-yozuv qurollari va boshqa anjomlar narxlarini asossiz oshirmaslikka hamda qonunchilik talablariga qat’iy amal qilishga chaqirdi.
Fuqarolar «Maktab bozorlari»da narxlarni asossiz oshirish holatlariga duch kelsa, Raqobat qo‘mitasining 1159 ishonch telefoni orqali murojaat qilishi mumkin.
Qo‘mita tomonidan maktab bozorlarida narxlar barqarorligini ta’minlash maqsadida monitoring ishlari olib borilishi ma’lum qilindi.
Prezidentning 2026-yil 14-avgustdagi PQ–294-son qarori bilan 2027-yil 1-yanvardan muddatli to‘lov xizmati operatorlari faoliyati tartibga solinadi.
Ma’lum qilinishicha, muddatli to‘lov xizmatini ko‘rsatuvchi yuridik shaxslar operator hisoblanadi. Ular iste’molchiga tovar yoki xizmatni muddatli to‘lov asosida olish imkoniyatini vositachi sifatida taqdim etadi.
Qarorning 3-bandi «d» kichik bandiga ko‘ra, ko‘chmas mulk operator ko‘rsatadigan muddatli to‘lov xizmatining obyekti bo‘la olmaydi. Shu sababli vositachi operator orqali uy-joyni «rassrochka»ga olish imkoniyati nazarda tutilmagan.
Biroq bu qoida uy-joyni bo‘lib-bo‘lib to‘lash asosida sotishni umumiy tarzda taqiqlamaydi.
Qarorning 3-bandi «a» kichik bandida sotuvchi tomonidan iste’molchiga tovarni to‘g‘ridan-to‘g‘ri sotish holatlari muddatli to‘lov xizmati tushunchasidan mustasno qilingan.
Shunga ko‘ra, quruvchi o‘zining qurgan uy-joyini xaridorga bevosita bo‘lib-bo‘lib to‘lash sharti bilan sotishi mumkin. Ya’ni yangi tartib quruvchi va xaridor o‘rtasidagi to‘g‘ridan-to‘g‘ri savdoni taqiqlamayapti.
Demak, ijtimoiy tarmoqlarda tarqalayotgan «endi uyni rassrochkaga olib bo‘lmaydi» degan talqin to‘liq to‘g‘ri emas. Cheklov aynan muddatli to‘lov operatorlari orqali ko‘chmas mulkni moliyalashtirishga taalluqli.
Yangi tartibga ko‘ra, muddatli to‘lov operatorlari maxsus reyestrga kiritiladi va ularning faoliyati Markaziy bank nazorati ostida bo‘ladi. Shuningdek, operatorlar bilan tuziladigan shartnomalar, ustama va komissiyalarga nisbatan aniq talablar belgilanadi.
Shunday qilib, 2027-yildan operator orqali uy-joyni «rassrochka»ga olish cheklanadi, ammo quruvchining xaridorga uyni bevosita bo‘lib-bo‘lib to‘lash sharti bilan sotishi saqlanib qoladi.
Prezident ishtirokida umumiy qiymati 50 trln so‘mlik loyihalar ishga tushirildi
«Milliy manfaatlarni himoya qilish dunyodan yopilish degani emas» — Sherzod Asadov
O‘zbekiston kartoshkani asosan qaysi davlatlardan sotib oldi?
-
Siyosat2 days ago
Илҳом Алиев Тошкентда тантанали кутиб олинди
-
Iqtisodiyot3 days ago
O‘zbekistonda kiyim ishlab chiqarish bo‘yicha qaysi hududlar yetakchi?
-
Siyosat3 days ago
To‘qayev prezidentlikka qayta nomzod qo‘yishi haqidagi savolga javob berdi
-
Mahalliy4 days ago
O‘zbekistonda 10-sinf o‘quvchilari o‘qishini texnikumga ko‘chirishi mumkin bo‘ladi
-
Jamiyat4 days ago
O‘zbekistonda endi uylarni «rassrochka»ga olib bo‘lmaydimi?
-
Siyosat3 days ago
Shavkat Mirziyoyev «Haydar Aliyev» ordeni bilan taqdirlandi
-
Siyosat2 days ago
Ўзбекистон ва Озарбайжон раҳбарлари Бухоронинг машҳур обидаларини зиёрат қилдилар (фото)
-
Iqtisodiyot5 days agoO‘zbekistonda xorijiy investitsiyali korxonalar soni 21 mingga yaqinlashdi