G, H va I guruhlarida so‘nggi tur shiddatli uchrashuvlarga boy bo‘ldi.

Jahon chempionatida guruh bosqichi yakuniga yetib bormoqda. 26 iyun kuni kechqurun va 27 iyun kuni tongda G, H va I guruhlarida uchinchi tur o‘yinlari bo‘lib o‘tdi. Ispaniya Urugvay ustidan g‘alaba qozondi (1:0), Kabo-Verde Saudiya Arabistoni bilan durang o‘ynab (0:0), pley-offga chiqdi, Belgiya Yangi Zelandiyaga rahm qilmadi (5:1), Eron Misr bilan o‘yinda ochkolarni teng bo‘lib oldi (1:1) va boshqa o‘yinlarning natijalarini kutadigan bo‘ldi.

Maydon tashqarisida ham qiziqarli voqealar bo‘lib o‘tmoqda: Urugvay futbolchilari va bosh murabbiy Marselo Biyelsa o‘rtasida mojaro chiqqan, Shvetsiya vingeri Elanga esa turnir qoidalarini tushunmay, yaponlar bilan o‘yindan keyin yig‘lagan.

Urugvay mojaro bilan turnirni tark etdi

Urugvay – Ispaniya 0:1

Gol: Baena, 42 (0:1)

Urugvay: Muslera (Rochet, 46), Kaseres, Olivera, Sanabriya (Rodriges, 70), Varela, Ugarte (De la Krus, 45), Bentankur, Valverde (Vinyas, 57), Arauxo, Kanobbio, Nunes

Ispaniya: Simon, Lyaport, Kubarsi, Kukurelya, Liorente, Rodri, Pedri (Ruis, 60), Merino (Olmo, 60), Baena (Pino, 66), Yamal (Torres, 76), Oyyarsabal (Uilyams, 76)

Ogohlantirishlar: Sanabriya, 54. Varela, 58. De la Krus, 90– Baena, 46

Chetlatish: Kanobbio, 90

N guruhida so‘nggi tur oldidan barcha a’zolarda pley-offga chiqish imkoni saqlanib turgandi. Shu jumladan, Urugvayda ham – Biyelsa shogirdlari ikki turda 2 ochko jamg‘argan va turnirdagi ishtirokini davom ettirish uchun Ispaniyani yengish talab etilardi.

Bu oson vazifa emasdi, ammo birinchi bo‘limning katta qismida janubiy amerikaliklar kuchli raqibga munosib qarshilik ko‘rsatishdi va hisobni ochish uchun bir necha imkoniyatlarga ega bo‘lishdi. Ammo bo‘lim oxirlarida gol o‘tkazib yuborildi. Bu gol uchun aybni to‘liq Fernando Muslera o‘z zimmasiga olishi mumkin – 40 yoshli darvozabon u qadar kuchli bo‘lmagan va o‘ziga kelgan to‘pni o‘tkazib yubordi. Bu uning uchun chempionatda uchinchi marta qovun tushirishi bo‘ldi – Saudiya va Kabo-Verde bilan o‘yinlarda ham uning xatolari ikki golga sababchi bo‘lgandi.

Tanaffusda Biyelsa darvozabonni ham almashtirdi va uning o‘rniga Serxio Rochetni tushirdi – murabbiyning so‘zlariga ko‘ra, Musleraning o‘zi shuni so‘ragan.

Darvozadagi o‘zgarish urugvayliklarga yordam bermadi – jamoa harakat qildi, ammo hisobni tenglashtira olmadi. Ikkinchi bo‘lim boshlarida mojaroli holat yuzaga keldi, Biyelsa jamoa yetakchisi Federiko Valverdeni 57-daqiqadayoq almashtirib tashladi, u esa maydondan chiqayotganida futbolkasi bilan og‘zini yopgan holda murabbiyga qarata nimadir dedi – tabiiyki, bu minnatdorchilik so‘zlari emasdi.

O‘yindan keyin urugvayliklar ustozi siniqqan holatda edi: «Men iste’dodli futbolchilar guruhi bilan ishladim. Ammo ularning mashaqqatli mehnati, sa’y-harakatlari va sadoqatiga qaramay, men ularni nima uchun aynan shunday bo‘lganini tushuntirish zaruratidan xalos qila oladigan kuchga aylantira olmadim. Urugvay futbolida hech narsa qoldirmayapman, chunki murabbiy uch yil ishlagan mamlakatga qo‘shishi mumkin bo‘lgan har qanday hissa – agar muvaffaqiyatlar bo‘lmasa – dividend keltirmaydi», – dedi Biyelsa.

So‘nggi tur oldidan murabbiy va futbolchilar orasida kelishmovchilik yuzaga kelgani haqida xabar tarqalgandi. El Espectador Deportes ma’lumotiga ko‘ra, Valverde boshchiligidagi futbolchilarning bir guruhi murabbiy bilan o‘zaro uchrashuv o‘tkazishgan. Futbolchilar mashg‘ulotlar haddan tashqari og‘irligidan shikoyat qilishgan va bu jarohatlarga sabab bo‘lishi mumkinligini aytishgan, shuningdek, Ispaniya bilan o‘yin uchun taktik rejani tanqid qilishgan – futbolchilar ilk daqiqalardan kuchli pressing uyushtirish o‘rniga, chuqur himoyalanish va qarshi hujumlarga tayanishni ma’qul ko‘rishgan.

Shundan keyin Biyelsa butun jamoani yig‘gan va 50 daqiqalik nutq so‘zlab, futbolchilarning bunday e’tirozlari oldin ham murabbiyning ishiga zarar yetakazganini ta’kidlagan. Muloqot vaqtida jamoaning ayrim a’zolari namoyishkorona tarzda yig‘ilishni tark etishgan. Yakunda butun jamoa turnirni tark etdi.

Guruh bosqichini birorta gol o‘tkazmay yakunlagan Ispaniya esa keyingi bosqichda J guruhidan ikkinchi o‘rin bilan chiqadigan jamoaga (Avstriya yoki Jazoir) qarshi o‘ynaydi.

Kabo-Verde pley-offda

Kabo-Verde – Saudiya Arabistoni 0:0

Kabo-Verde: Vozinya, Diney Borjyes, Lopesh, Juan Paulu, Pina (Moreyra, 90+4), Lenini, Monteyru (L. Duarte, 71), D. Duarte, Semedu (Varela, 61), Mendesh da Grasa (Rodrigesh, 71), Livramento (Da Koshta, 61)

Saudiya Arabistoni: Al-Uvays, Al-Amriy, Al-Tumbukti (Lajamiy, 33), Al-Bushal (Al-Arbi, 82), Abdulhamid, N. Ad-Dovsariy, Al-Haybariy (Al-Juvayr, 46), S. Ad-Dovsariy (Abulshamat, 66), Mandash (Al-Hamdon, 66), Al-Buraykan, Kanno

Ogohlantirishlar: Pina, 9 – Abdulhamid, 4. N. Ad-Dovsariy, 67. Al-Buraykan, 90

Urugvayliklar ispanlar bilan o‘yinda javob golini urish uchun mashaqqat chekayotganida, parallel uchrashuvda turnirning asosiy sensatsiyasi ro‘y berdi. Jahon chempionatidagi debyutini o‘tkazayotgan Kabo-Verdedan so‘nggi turda Saudiya Arabistonidan hech bo‘lmaganda bir ochko olish talab etilardi – bunday holda jamoada pley-offga kamida uchinchi o‘rin egalari orasida sakkizlikka kirish orqali imkoniyat saqlanib qolgan bo‘lardi.

Yakunda jamoa g‘alabaga ham yaqin keldi – afrikaliklar ko‘proq hujum qilishdi, saudiyaliklar darvozasi tomon 15 bor zarba berishdi va mudofaada ham ishonchli harakat qilishdi. Kaboverdiliklar yetakchisi, darvozabon Vozinya bir necha bor goldan qutqardi va kerakli hisobga erishishga (0:0) katta hissa qo‘shdi.

Bu uchrashuv oldinroq yakunlandi va afrikaliklar maydonda turib Urugvayning turnirni tark etishiga guvoh bo‘lishdi va o‘z yo‘llanmasini katta xursandchilik bilan nishonlashdi. Kabo-Verde – pley-offning eng kichik (aholisi soni 500 ming kishi atrofida) ishtirokchisi va 1998 yildan buyon uch ochko bilan guruhdan chiqqan ilk jamoaga aylandi.

1/16 finalda ushbu sensatsiya jamoani Argentinaga qarshi o‘yin kutmoqda.

Belgiyaning jahli chiqdi

Yangi Zelandiya – Belgiya 1:5

Gollar: Trossar, 28 (0:1). Trossar, 50 (0:2). De Bryuyne, 66 (0:3). Jast, 84 (1:3). Lukaku, 86 (1:4). Salemakers, 90+4 (1:5)

Yangi Zelandiya: Krokomb, Bindon, Sarmen, Kakache (de Vris, 79), Peyn (Boksall, 64), Bell (Makkovatt, 64), Stamenich, Tomas (Old, 46), Jast, Singh (Rendell, 46), Vud

Belgiya: Kurtua, Teat, Mehele, De Kyuyper, Kastan, Tilemans (Raskin, 85), Vanaken, De Bryuyne (Salemakers, 72), Trossar (Onana, 72), Doku (Fernandes-Pardo, 56), De Ketelare (Lukaku, 85)

Ogohlantirishlar: Stamenich, 46. Jast, 56

Rudi Garsiya shogirdlari turnir startida ko‘pchilikning hafsalasini pir qilib, ikki o‘yinda ham g‘alaba qozona olmagandi – Misr (1:1) va Eron bilan o‘yinlarda (0:0) Yevropa vakillari ochko yo‘qotgandi. Shu bilan birga, jamoa bu o‘yinlarda o‘zi birorta gol ura olmagan – misrliklar bilan o‘yinda Muhammad Xanining avtogoli yordam bergandi.

Yangi Zelandiyaga qrashi uchinchi tur o‘yini futbolchilar uchun o‘z aybini yuvish va g‘alaba qozonib, pley-off masalasini hal qilish uchun imkon edi. Va belgiyaliklar bu vazifani sharaf bilan uddalashdi: raqib 5:1 hisobida tor-mor etildi va guruhda birinchi o‘rin egallandi.

O‘yin taqdirini amalda «Arsenal» vingeri Leandro Trossar hal qildi, u birinchi bo‘limda dubl rasmiylashtirdi. Ikkinchi bo‘limda esa Kevin de Bryuyne ham o‘z nomini tabloga yozdirib qo‘ydi va Belgiyaning qatorasiga uchta jahon chempionatida gol urgan ilk futbolchisiga aylandi. O‘yin oxirlarida esa Romelu Lukaku asosiy qahramonga aylandi – 33 yoshli hujumchi 85-daqiqada maydonga tushib, to‘pga ikkinchi teginishidayoq gol urdi. Ushbu forvard Misr bilan o‘yinda maydonga tushganidan 23 soniya o‘tib Xanini o‘z jamoasi darvozasini ishg‘ol etib qo‘yishga majbur qilgandi.

Bundan tashqari, yangi zelandiyaliklarga qarshi o‘yinning qo‘shimcha daqiqalarida Lukaku Salemakersning goliga assistentlik ham qildi. Romelu shu kuni Mark Vilmotsni ortda qoldirib, Belgiyaning jahon chempionatlaridagi eng yaxshi to‘purariga aylandi.

Belgiyaning 1/16 finaldagi raqibi uchinchi o‘rin egalari orasidagi kuchli sakkizlik aniqlanganidan keyin ma’lum bo‘ladi.

Eronni pley-offdan santimetr ajratib qoldi

Misr – Eron 1:1

Gollar: Saber, 5 (1:0). Rizoyan, 14 (1:1)

Aniq ijro etilmagan penalti: Torimiy, 11’

Misr: Shubayr, Robia, Abdul Munim (Yosir Ibrohim, 14), Ahmad Fotih, Xani, Lashin, Saber (Ateya, 46), Saloh (Sayid, 57), Trezege, Ashur (Marmush, 46), Ziko (Abdulkarim, 76)

Eron: Beyranvand, Xalilzoda, Kanaanizodagon, Ne’matiy (Hardoniy, 46), Muhammadiy, Rizoyan, Izzatullohiy, Qurboniy, Muhibiy (Jahonbaxsh, 90+1), Quddus (Mug‘anli, 67), Torimiy

Ogohlantirishlar: Saber, 20. Yosir Ibrohim, 42. Lashin, 90 –Kanaanizodagon, 19. Ne’matiy, 43. Izzatullohiy, 79. Xalilzoda, 90

Bugungi dasturdagi yana bir drama Misr va Eron o‘rtasidagi bahsda kuzatildi. Jamoalar birinchi bo‘lim boshida bittadan gol urishdi – bunday natija ko‘proq Muhammad Saloh va uning jamoadoshlarini qoniqtirardi – afrikaliklar tabiiyki hisobdan kelib chiqib o‘ynashda davom etishdi.

Eronliklar ikkinchi bo‘lim davomida toliqib qolishdi, lekin yakuniy shturmni uyushtirish uchun o‘zlarida kuch topa olishdi va 90+6-daqiqada gol ham urishdi. Osiyoliklar bazasidagi xursandchilikni so‘z bilan ta’riflab bo‘lmasdi – gol muallifi Shoja Xalilzoda qora ko‘zoynak taqib, oldindan tayyorlab qo‘yilgan gol nishonlash uslubini namoyish etishga ham ulgurdi, ammo biroz o‘tib barchasi sarobga aylandi: VAR aralashuvidan keyin bu hujumda mikroskopik ofsayd aniqlandi.

Qolgan daqiqalarni ham eronliklar hujumda o‘tkazishdi va yana bir golga yaqin kelishdi, ammo misrliklar darvozaboni yaqin masofadan yo‘llangan zarbani qaytarib qoldi. O‘yin 1:1 hisobida yakunlandi, ammo Eron uchun barchasi tugamagan – uchta o‘yinda ham durang o‘ynagan jamoada to‘plar nisbati yaxshi va eng yaxshi uchinchi o‘rin egalari orasida hozircha oltinchi o‘rinni egallab turibdi. Jamoa pley-offga yo‘l olishi uchun J, K va L guruhlaridan kamida ikkitasida kerakli hisoblar qayd etilishi kerak bo‘ladi.

Dembele nomidagi bo‘lim

Norvegiya – Fransiya 1:4

Gollar: Dembele, 7 (0:1). Dembele, 20 (0:2). Osgor, 21 (1:2). Dembele, 32 (1:3). Due, 90+4 (1:4)

Aniq ijro etilmagan penalti: Strann Larsen, 50’

Norvegiya: Selvik, Estigor, Falhener (Langos, 66), Berkan (Pedersen, 46), Eursnes, Berg, Osgor, Torstvedt (Torsbi, 46), Shelderup (Nusa, 83), Bobb (Hauge, 83), Strann Larsen

Fransiya: Menyan, Upamekano (Konate, 76), Lakrua, Ernandez, Kunde (Gyusto, 87), Kone, Tchuameni, Olise (Sherki, 65), Due, Dembele (Barkolya, 65), Mbappe (Mateta, 87)

Ogohlantirishlar: Berg, 10 – Tchuameni, 74

Dastlabki ikki turda Fransiya va Norvegiya oltitadan ochko to‘plagan va muddatidan oldin pley-off masalasini hal qilishgandi. Yevropa vakillari o‘zaro o‘yinda 1/16 finalga qaysi jamoa birinchi o‘rin bilan chiqishin hal qilishi kerak edi.

O‘yindan oldin norvegiyaliklar forvardi Erling Holand shunday degandi: «Agar fransuzlar bu o‘yinda g‘olib bo‘lishsa, jahon chempioni ham ular bo‘ladi». Skandinavlar jamoasi ustozi esa kutilmagan yurish qildi: u keng ko‘lamli rotatsiyaga qo‘l urdi va asosiy tarkibga to‘liq dam berdi, Holand, Edegor, Syorlot kabi yetakchilar shu kuni zaxiradan ham tushirilmadi.

«Uchranglilar» esa to‘liq asosiy tarkibda o‘ynashdi va ilk daqiqalardan ketma-ket hujumlar uyushtirishdi. Usmon Dembele esa het-trik qayd etishi uchun 32 daqiqa yetarli bo‘ldi. U jahon chempionatlarida so‘nggi 72 yillikdagi eng tezkor het-trik muallifiga aylandi. Raqib esa Telo Osgorning goli bilan javob qaytardi.

Ikkinchi bo‘lim boshida norveglarda hisobdagi farqni qisqartirish uchun juda qulay imkoniyat yuzaga kelgandi, ammo forvard Yorgen Larsen penaltini aniq ijro etolmadi – Mayk Menyan zarba yo‘nalishini topdi va seyv ijro etdi. O‘yin oxirida esa Dezire Due yakuniy hisobni o‘rnatdi – 4:1. Kilian Mbappe shu kuni ikki golli uzatma bilan cheklandi.

Fransiya 1998 yildan buyon ilk bor guruh bosqichidagi barcha o‘yinlarda g‘alaba qozondi.

Endi 1/16 finalda Norvegiya Kot-d’Ivuar bilan o‘ynaydi. Fransiyani esa F guruhida uchinchi o‘rinni egallagan Shvetsiya bilan bahs kutmoqda.

Senegal Iroqqa 5 ta gol urdi va pley-offga chiqdi

Senegal – Iroq 5:0

Gollar: Diarra, 4 (1:0). Sarr, 56 (2:0). Guyye, 59 (3:0). Guyye, 71 (4:0). Ndiay, 82 (5:0)

Senegal: Diav, Sek (Siss, 58), Niakate, Yakobs, Diatta, Gana Guyye, Kamara (Guyye, 57), Diarra (Jyekson, 57), Mane, Mbay (Ndiay, 57), Sarr (Diao, 81)

Iroq: Bazil (Jalol, 46), Sulaka, Hoshim, Doski, Frans Dia, Iqbol (Yakob, 67), Al-Ammariy, Yasim (Maknzi, 58), Bayyesh, Qosim (Yunus, 16), Al-Hamadiy (Yusuf, 58)

Ogohlantirishlar: Sek, 18. Guyye, 81 – Al-Ammariy, 75. Doski, 90

Chetlatish: Sulaka, 13

I guruhidagi ikkinchi o‘yinda intriga ko‘proq edi. Ikki jamoa ham yakuniy tur arafasida birorta ochkoga ega emasdi. Bu o‘yindagi g‘alaba jamoalardan birini uchinchi o‘rin orqali pley-offga olib chiqishi mumkin edi. Ammo boshqa da’vogarlar (12 guruhdan faqat 8 tasida uchinchi o‘rin egalari ham pley-offga chiqishi mumkin) bilan raqobatda yutib chiqish uchun imkon qadar yirik hisobda g‘alaba qozonish talab etilardi.

Bu vazifani Senegal uddaladi. Afrikaliklar dastlabki o‘n daqiqa ichida hisobni ochishdi va raqib son jihatdan ozchilik bo‘lib qolishiga erishishdi. Ikkinchi bo‘limda muvaffaqiyat rivojlantirildi va yirik hisob qayd etildi. Pap Guyye dubl muallifi bo‘ldi, Habib Diarra, Ismaila Sarr va Iliman Ndiay bittadan gol urishdi — 5:0.

Shu tariqa, «Teranga sherlari» Afrikaning jahon chempionatlarida bir o‘yinda besh gol urgan ilk jamoasiga aylandi va Misr hamda Eron o‘rtasidagi uchrashuvda durang qayd etilgani evaziga 1/16 final yo‘llanmasini kafolatladi. Raqobatchilar ochko yo‘qotgani tufayli endi senegalliklar uchinchi o‘rin vakillari reytingida sakkizinchi o‘rindan tushib ketmasligi aniq.

Navbatdagi o‘yinlar

27 iyundan 28 iyunga o‘tar kechasi va tongda guruh bosqichining so‘nggi uchrashuvlari bo‘lib o‘tadi.

02.00. L guruhi. Panama – Angliya

02.00. L guruhi. Xorvatiya – Gana

04.30. K guruhi. Kolumbiya – Portugaliya

04.30. K guruhi. Kongo DR – O‘zbekiston

07.00. J guruhi. Jazoir – Avstriya

07.00. J guruhi. Iordaniya – Argentina

Source link

Toshkentda jamoat transporti infratuzilmasini tubdan isloh qilish va uni zamonaviy urbanistika tamoyillariga moslashtirish yo‘lida mutlaqo kutilmagan, ammo ilg‘or qadam tashlandi. Sergeli tumanida poytaxt tarixidagi ilk sport-bekat rasman ishga tushirildi.

Odatda jamoat transportini kutish qimmatli vaqtimizni havoga sovurishdek tuyuladi. Biroq, Toshkent shahar Yo‘l harakatini tashkil etish markazi bu tushunchani butkul o‘zgartirishga qaror qildi. Sergeli tumanidagi eng gavjum nuqtalardan biri — mashina bozori yaqin atrofida joylashgan avtobus bekati negizida poytaxtning ilk sport-bekati barpo etildi.

Uushbu hudud nafaqat mashina bozori sababli yuqori transport oqimiga ega, balki bu yerdan jami 12 ta yo‘nalishdagi avtobuslar o‘tadi. Bu esa har kuni minglab yo‘lovchilar ushbu nuqtada to‘xtashini anglatadi. Endilikda poytaxtliklar va shahar mehmonlari avtobus kelguncha bo‘lgan 10-15 daqiqalik vaqtni shunchaki telefonga tikilib emas, balki turniklarda tortilish va yengil jismoniy mashqlar bajarish orqali o‘tkazishlari mumkin.

Infratuzilmani sog‘lom turmush tarzi bilan integratsiya qilish bugungi kunda dunyoning eng rivojlangan megapolislari qo‘llayotgan zamonaviy usuldir. Toshkent shahri ushbu loyihani joriy etishda xalqaro tajribaga tayandi. Masalan, Janubiy Koreya va Singapur aholi salomatligini kundalik qatnov yo‘nalishlariga singdirish bo‘yicha yetakchilar hisoblanadi. U yerda bekatlar nafaqat sport elementlari, balki salomatlikni monitoring qiluvchi raqamli datchiklar bilan ham jihozlangan. Fransiya va Kolumbiyada esa vorkaut-bekatlar orqali kamharakatlilik muammosiga qarshi kurashishni shahar dizaynining bir qismiga aylantirishgan.

Mutaxassislarning ta’kidlashicha, bunday yondashuv shahar infratuzilmasi faqatgina bir nuqtadan ikkinchi nuqtaga harakatlanish vositasi emas, balki aholining qulayligi, salomatligi va kundalik farovonligiga xizmat qiladigan jonli ekotizim bo‘lishi kerakligini isbotlaydi.

Har qanday bekatni ham shunchaki sport maydonchasiga aylantirib bo‘lmaydi. Mutasaddilar vorkaut-bekatlarni joylashtirishda bir nechta qat’iy mezonlarga tayanmoqda.

Birinchidan, bu xavfsizlikdir, ya’ni sport elementlari qatnov qismidan xavfsiz masofada va piyodalar harakatiga xalaqit bermaydigan qilib o‘rnatilishi shart. Ikkinchidan, konstruksiya mustahkamligiga e’tibor beriladi: tashqi muhit noqulayliklariga, ya’ni yomg‘ir va issiqqa chidamli, buzib yuborishga qarshi materiallardan foydalaniladi. Uchinchidan, qurilmalarning xavfsizligi doimiy nazoratda va texnik xizmatda bo‘ladi.

So‘nggi vaqtlarda Toshkentda eski, noqonuniy do‘konli bekatlar buzilib, o‘rniga kutish maydoni keng, perronlari qulay va zamonaviy servislar bilan jihozlangan yangi namunaviy bekatlar qurilayotgani jamoatchilik diqqat markazida turibdi. Sergelidagi sport-bekat ham ushbu keng ko‘lamli modernizatsiyaning o‘ziga xos mantiqiy davomidir.hokimligi va soha mutasaddilari ushbu loyihani muvaffaqiyatli deb topsa, poytaxt bo‘ylab sport-bekatlar sonini keskin ko‘paytirishni rejalashtirmoqda. Eng muhimi keyingi manzil qayerda bo‘lishini aynan shahar aholisining o‘zi belgilaydi.

Agar siz ham uyingiz, o‘qish joyingiz yoki ishxonangiz yaqindagi serqatnov bekatda shunday vorkaut maydonchasi bo‘lishini istasangiz, o‘z takliflaringizni Yo‘l harakatini tashkil etish markazining rasmiy telegram-boti orqali yuborishingiz mumkin. Shahar rivoji uning aholisi faolligidan boshlanadi.

Source link

27 iyun kuni O‘zbekiston milliy jamoasi jahon chempionatida Kongo DR qarshi maydonga tushadi. Bu uchrashuv oldidan Atlanta shahridagi Mercedes-Benz stadionida jamoa bosh murabbiyi Fabio Kannavaro ishtirokida matbuot anjumani o‘tkazildi. Bu o‘yin osonroq kechadi, faqat g‘alabani o‘ylayapmiz, degan u Anjuman chog‘ida.

O‘zbekiston milliy jamoasining jahon chempionati doirasidagi navbatdagi o‘yini Kongo jamoasiga qarshi 27 iyun kuni Atlanta shahrida, Mercedes-Benz stadionida bo‘lib o‘tadi. Ushbu uchrashuv avvalida jamoa bosh murabbiyi 26 iyun kuni matbuot anjumani o‘tkazdi. Fabio Kannavaroga ko‘ra, jamoa ikki kuchli raqib bilan o‘ynab bo‘ldi, endi Kongoga qarshi o‘yin nisbatan oson kechishi kerak.

“Ertangi raqibimiz Kolumbiya, Portugaliya bilan solishtirganda ancha osonroq. Bizga teoritik jihatdan biroz yengilroq bo‘ladi, chunki tarkib bo‘yicha eng kuchli jamoadan o‘tib oldik. Ijobiy natija qayd etish haqida o‘ylayapmiz”, dedi jamoa bosh murabbiyi.

Uning qo‘shimcha qilishicha, jahon chempionati avvalidan o‘tkazilgan o‘rtoqlik o‘yinlarida o‘zini yaxshi namoyon etgani sabab Abduvohid Ne’matovni asosiy darvozabon etib tanlangan.

“Abduvohid Ne’matov men bu yerga kelganimdan beri terma jamoa safida hamda o‘rtoqlik o‘yinlarida o‘zini yaxshi namoyon etgan. Shu sababli men unga imkoniyat berishga harakat qildim. Sababi jahon chempionati shunday musobaqaki, barchaga tajriba ulashishi kerak. Agar Abduvohiddek yaxshi darvozabonim bo‘lsa, nega bunday foydalanmasligim kerak”, deydi Kannavaro.

Kolumbiya va Portugaliyaga qarshi uchrashuvda 22 ta o‘yinchi ishtirok etgan. Faqatgina 4 nafar futbolchi ushbu jahon chempionatida hali ishtirok etmadi, ya’ni debyut qilmadi. Bular uchinchi darvozabon Botirali Ergashev, Avazbek O‘lmasaliyev, Umar Eshmurodov hamda Jamshid Iskanderov.

22 ta o‘yinchini maydonga tushirish haqidagi savolgan Kannavaro javob berarkan, bu yaxshi va barcha futbolchilar terma jamoada o‘ynab ko‘rdi, Kolumbiya va Portugaliyaga qarshi, deya ta’kidlagan.

Matbuot anjumanidan so‘ng jamoa o‘yin oldidan mashg‘ulotlarga yo‘l olgan. Bosh murabbiy Kannavaro shuningdek, Osiyo deganda Iordaniya, Iroq, Yaponiya, Avstraliya kabi davlatlar jamoalari kabi o‘ynash darajasiga chiqish lozimligini eslatdi.

Source link

Ukrainalik bokschi kamarlarni bo‘shatayotganini, biroq sportdan ketmasligini ta’kidladi.

Foto: Francois Nel/Getty Images

Ukrainalik Oleksandr Usik superog‘ir vazn toifasida Xalqaro boks federatsiyasi (IBF), Butunjahon boks assotsiatsiyasi (WBA) va Butunjahon boks kengashi (WBC) versiyalari bo‘yicha chempionlik kamarlaridan voz kechdi. Bu haqda 39 yoshli bokschi ijtimoiy tarmoqda ma’lum qildi.

«Men hozir o‘zimga tegishli bo‘lgan barcha kamarlarni bo‘shatib bermoqchiman, toki navbatdagi nomzodlar ular uchun jang qilsin. Men kamarlarni bo‘shatyapman, lekin sportdan ketmayapman. Menda hali «so‘nggi raqs» bor», dedi Usik.

So‘nggi jangida Usik 23 may kuni Giza ehromlari majmuasi hududida niderlandiyalik kikbokschi Rik Verxuvenni 11-raundda texnik nokautga uchratib, WBC chempionlik unvonini himoya qilgan edi.

Usik professional ringdagi barcha 25 ta jangida g‘alaba qozongan. U ikki marta superog‘ir vaznda, yana bir marta birinchi og‘ir vaznda mutlaq jahon chempioni bo‘lgan.

Chempionlik kamarlaridan voz kechish professional sportda kundalik holat bo‘lmasa-da, normal hodisa sanaladi. Bu odatda sportchining faoliyatini yakunlaganini anglatmaydi. Ba’zida bokschilar boshqa vazn toifasiga o‘tish, serdaromadroq janglar o‘tkazish yoki yirik to‘qnashuvlarni tashkil etishga to‘sqinlik qiladigan majburiy himoya janglaridan qochish uchun o‘z ixtiyori bilan unvonlarini bo‘shatib beradi.

Source link

Ikki o‘yinda jamoalar durangga «kelishdi».

Jahon chempionatida uchinchi tur avjida – 25 va 26 iyun kunlari E, F va D guruhlarida so‘nggi uchrashuvlar o‘tkazildi. Kyurasao Kot-d’Ivuarga yutqazdi (0:2) va turnirni tark etdi, Germaniya sensatsion ravishda Ekvadorga yutqazib qo‘ydi (1:2), Niderlandiya Tunisni osonlik bilan mag‘lub etdi (3:1), Turkiya esa natijasi ahamiyatsiz o‘yinda mezbon AQShdan ustun keldi (3:2), Yaponiya esa Shvetsiya bilan (1:1), Paragvay Avstraliya bilan o‘yinda (0:0) o‘zlariga kerak bo‘lgan natijalarni qayd etishdi.

Dik Advokat JCh bilan xayrlashdi

Kyurasao – Kot-d`Ivuar 0:2

Gollar: Pepe, 7 (0:1). Pepe, 64 (0:2)

Kyurasao: Rom, Gari (Noslin, 77), Obispo, Fonvill (Kastaner, 77), Floranus, Brenet (Sambo, 90), Komenensiya (Antonisse, 61), L. Bakuna, J. Bakuna, Chong, Lokadia (Kuvas, 90)

Kot-d`Ivuar: Fofana, U. Diomande, Kossunu, Operi, Due, Kesse (Seri, 77), Sangare, Pepe (Vai, 67), Ya. Diomande (Diakite, 67), Diallo (Oulai, 46), Bonni (Ture, 67)

Ogohlantirishlar: J. Bakuna, 75. Kastaner, 83 – Pepe, 34

Oqshom yorqin syujyet bilan boshlandi – Kyurasao tarix yaratish uchun maydonga tushdi. Ikkinchi turdan keyin Dik Advokat jamoasi shunday holatda ediki, Kot-d’Ivuar bilan o‘yindagi g‘alaba orolliklar ikkinchi o‘rin bilan to‘g‘ridan to‘g‘ri pley-offga chiqishini ta’minlardi. Ikki hafta oldin ko‘pchilik nomini ham eshitmagan debyutant va JCh tarixidagi eng kichik jamoa uchun bu aql bovar qilmas ssenariy bo‘lgan bo‘lardi.

78 yoshli niderlandiyalik mutaxassis o‘yindan oldin yaxshi natijadan umid qilayotganini yashirmadi.

«O‘yin qiyin bo‘ladi. Bizda uchinchi o‘yin ham o‘zimizdan kuchli jamoaga qarshi bo‘ladi, ammo Kyurasao uchun ham bunday raqiblarga qarshi o‘yinlar kerak. Ekvador bilan o‘yinda nimaga qodirligimizni ko‘rsatdik. Nafaqat himoyalanamiz, balki hujum uchun to‘g‘ri paytlarni ham topa olamiz», – dedi Advokat.

Lekin mo‘jiza ro‘y bermadi. Ivuarliklar 7-daqiqadayoq orolliklar jamoasi himoyasidagi qo‘pol xatodan foydalanib, hisobni ochishdi, ikkinchi bo‘lim o‘rtalarida esa «Vilyarreal» hujumchisi Nikolya Pepe dublni rasmiylashtirdi.

KONKAKAF vakillari o‘yin oxirini to‘liq hujumda o‘tkazdi. Ammo bitta ham javob qaytara olishmadi va Ye guruhida so‘nggi o‘rinni egallagan holda turnirni tark etishdi.

Ekvadordan superkambek

Ekvador – Germaniya 2:1

Gollar: Sane, 2 (0:1). Angulo, 9 (1:1). Plata, 77 (2:1)

Ekvador: Galindes, Ordones, Pacho, Inkapiye (Estupinyan, 71), Franko (Presiado, 64), Vite, Moy. Kaysedo, Angulo (Torres, 85), Yyeboa (X. Kaysedo, 85), Valensiya (Rodriges, 64), Plata

Germaniya: Noyyer, Ryudiger, Ta, Raum, Kimmih (Tiau, 60), Pavlovich (Shtiller, 46), Nmecha (Bayyer, 64), Musiala, Virs (Gros, 73), Sane, Havers (Undav, 60)

Ogohlantirishlar: Inkapiye, 43. Franko, 50. Plata, 89 – Pavlovich, 44

Bir tomondan, bu o‘yinda sensatsiya ro‘y berishini taxmin qilish mumkin edi. O‘tgan turda Kyurasao bilan o‘yinda ochko yo‘qotgan (0:0) ekvadorliklardan so‘nggi turda raqib kim bo‘lishidan qat’i nazar uch ochko uchun o‘ynash talab etilardi, raqib esa allaqachon guruh g‘olibligi masalasini hal qilib, pley-offga tayyorgarlik ko‘rayotgan jamoa edi. Boshqa tomondan, o‘yinning ikkinchi daqiqasidayoq Leroy Sane hisobni ochdi va Janubiy Amerika vakillariga qattiq zarba berdi.

Ammo ekvadorliklar taslim bo‘lishmadi va tezda hisobni tezlashtirishdi. Ikkinchi bo‘limda esa o‘yin bosh hakami Tori Penso videoassistentlar yordamida janubiy amerikaliklar darvozasiga qo‘yilgan penaltini bekor qildi.

O‘yin oxirlarida esa fantastika ro‘y berdi: Ekvador hujumchisi Gonsalo Plata burchak zarbasi ijro etilishi vaqtida nemislar jarima maydonida yuzaga kelgan talato‘pdan foydalanib, g‘alaba golini urdi (2:1). Bu epizodda o‘zining so‘nggi xalqaro turnirini o‘tkazayotgan Maneul Noyyer to‘pga chiqishda xatoga yo‘l qo‘ydi, Sebastyan Bekkasese shogirdlari esa iroda ko‘rsatib, uchinchi o‘rin bilan pley-offga yo‘l oldi.

Niderlandiyaning ishonchli g‘alabasi

Tunis – Niderlandiya 1:3

Gollar: Shiri, 3 – avtogol (0:1). Brobbi, 7 (0:2). Masturi, 54 (1:2). van Hekke, 62 (1:3)

Tunis: Damen, Talbi, Shiri, Ben Amida (Ashuri, 68), Abdi, Valeri, Garbi (Shauat, 75), Xedira (Mahmud, 67), Mejbri, Slimane (Ben Uanes, 68), Masturi (Tunekti, 90)

Niderlandiya: Verbryuggen, van Deyk, van Hekke, Ake, Dyumfris, de Yong (Kopmeyners, 72), Reynders (Klyuyvert, 72), Gravenberh, Gakpo (Lang, 84), Malen (Sammervill, 72), Brobbi (Depay, 78)

Tunis birinchi turdan keyinoq bosh murabbiyi Sabri Lyamushini iste’foga chiqarib, jahon chempionati tarixiga kirgandi. Afrikaliklar jamoasi o‘tkazilgan gollar soni bo‘yicha yana bir antirekord o‘rnatishga qarab ketayotgandi, chunki jamoa yettinchi daqiqaga kelib ikki gol o‘tkazib yubordi.

Avvaliga Tunis yarimhimoyachisi Ele Shiri Denzel Dumfrisning qanotdan uzatmasidan keyin o‘z jamoasi darvozasini ishg‘ol etib qo‘ydi. Keyin niderlandlar forvardi Brayan Brobbi jarima zarbasini ajoyib ijro etdi va turnirdagi uchinchi golini nishonladi.

Lekin o‘yin gollar shousiga aylanib ketmadi. Ikkinchi bo‘lim boshida jamoalar bittadan gol almashishdi – Hazim Masturi va Yan Pol van Hekke o‘z nomlarini tabloga yozdirib qo‘yishdi.

Ronald Kuman shogirdlari 3:1 hisobidagi g‘alabani saqlab qolishdi va guruhda birinchi o‘rinni egallashdi. Uchta o‘yinda ham yutqazgan Tunis esa uyga qaytadi.

«O‘zaro manfaatli hamkorlik»

Yaponiya – Shvetsiya 1:1

Gollar: Maeda, 56 (1:0). Elanga, 62 (1:1)

Yaponiya: Sudzuki, Itakura (Taniguti, 39), X. Ito, Seko (Nagatomo, 75), Tanaka, Kamada, Nakamura (Vatanabe, 75), Sugavara, Doan (D. Ito, 67), Maeda, Ueda (Ogava, 66)

Shvetsiya: Videll Setterstrem, Hin (Bergvall, 37), Gudmundsson (Nyugren, 88), Lagerbilke, Lindelyof (Starfelt, 87), Ayyari, Stroud (Svensson, 75), Bernhardsson (Sema, 75), Isak, Elanga, Yokeresh

Ogohlantirishlar: Taniguti, 77 – Hin, 32. Yokeresh, 85

Bu uchrashuvda ikki jamoani ham durang qoniqtirardi. Bunday holatda ikki jamoada ham ochkolar soni 4 tadan bo‘lar, yaponlar ikkinchi o‘rinni egallar, shvedlar esa to‘plar nisbatiga ko‘ra uchinchi o‘rinda qolar, ammo uchinchi o‘rin vakillari orasida kuchli sakkizlikka kirardi.

Amalda ham jamoalar hisobga qarab o‘ynashdi va birinchi bo‘limda deyarli golli vaziyatlar yuzaga kelmadi. Ikkinchi bo‘lim esa biroz qiziqarliroq kechdi: avvaliga Ritsu Doan jarima maydoniga yaqinlashib borgan Daydzen Maedani ajoyib pas bilan ta’minladi, u esa o‘z imkoniyatini qo‘ldan boy bermadi. Lekin ko‘p o‘tmay shvetsiyaliklar Entoni Elanganing burchakka yo‘naltirilgan kuchli zarbasi bilan muvozanatni tiklashdi (1:1).

Guruhda yakuniy vaziyat kutilganidek ko‘rinish oldi. Yaponiya ikkinchi, Shvetsiya uchinchi o‘rin bilan pley-offga chiqdi. Buni «o‘zaro manfaatli hamkorlik» desa bo‘ladi.

Ikkinchi qulay durang

Paragvay – Avstraliya 0:0

Paragvay: Hil, Velaskes, Alderete (Kanale, 84), G. Gomes, Maydana (Maurisiu, 46), Kaseres, Kubas, Galarsa (Alonso, 90+2), D. Gomes (Bobadilya, 90+2), Ensiso, Avalos (Arse, 67)

Avstraliya: Bich, Suttar, Herrington, Chirkati, O`Nill, Irvayn (Okon-Engstler, 84), Behich, Bos, Metkalf, Volpato (Xrustich, 58), Irankunda (Yengi, 84)

Ogohlantirishlar: D. Gomes, 77 – Irvayn, 46

Bu ikki jamoani ham durang hisob qoniqtiradigan yana bir o‘yin edi. Bunday hisob nisbatan avstraliyaliklarga yaxshiroq edi, bu holda yashil qit’a vakillari ikkinchi o‘rindan tushib ketmasdi. Paragvayliklarda esa ikki o‘yindan keyin to‘plar nisbati yomonroq edi (-2), ammo to‘rt ochko bilan jamoa uchinchi o‘rin egalari orasida kuchli sakkizlikdan o‘rin olishi tayin edi.

Jamoalar o‘yin davomida uzoq masofalardan ko‘plab zarbalar berishdi (19 urinish), ammo deyarli yaqqol golli vaziyat kuzatilmadi. Yakunda golsiz durang saqlanib qoldi, lekin buning uchun hech kim bu jamoalarni ayblay olmaydi.

Turkiya kuchli o‘ynadi, ammo endi kech

Turkiya – AQSh 3:2

Gollar: Trasti, 3 (0:1). Arda Guler, 10 (1:1). Barish Yilmaz, 31 (2:1). Berhalter, 49 (2:2). Xon Oyxon, 90+8 (3:2)

Turkiya: Ugurjan Chaqir, O‘zan Qoboq, Abdulkarim Bardakchi, Zeki Chelik (Chag‘lar Suyunchi, 84), O‘zjan, O‘rxun Ko‘kchi (Xon Oyxon, 88), Eren Elmali, O‘g‘uz Oydin (Mert Muldur, 90+1), Arda Guler, Kenan Yildiz (Uzun, 84), Barish Yilmaz (Irfon Qahvachi, 90+1)

AQSh: Terner, Robinson, Makkenzi, Trasti, Skalli (Frimen, 77), Berhalter, Reyna (Dest, 76), Makkenni (Tillman, 86), Vea (Pulishich, 58), Aaronson (Zendehas, 77), Pepi

Ogohlantirishlar: Berhalter, 19

Turklar 2002 yildan buyon ilk bor jahon chempionatiga tashrif buyurgan va ulardan ko‘pchilik yaxshiroq natija kutayotgandi, ammo Vinchenso Montella shogirdlari ikkinchi turdan keyinoq guruhdan chiqa olmasligi ma’lum bo‘lib ulgurgandi: ushbu jamoa ikki o‘yinda 62 bor zarba yo‘lladi, ammo birorta gol urolmay, ikki o‘yinda ham yutqazdi. Natijada turklar so‘nggi o‘yinda faqat muxlislar uchun o‘ynashi kerak bo‘lib qoldi.

Mezbonlarga qarshi o‘yin ham Turkiya uchun juda yomon boshlandi: amerikaliklar jamoasi himoyachisi Oston Trasti uchinchi daqiqadayoq hisobni ochdi. Lekin ko‘p o‘tmay Arda Guler turklarning turnirdagi ilk golini urdi. Bo‘lim oxirida esa Burak Yilmaz jamoani oldinga olib chiqdi.

Ikkinchi bo‘lim boshida Sebastian Berhalter hisobni tenglashtirdi. Shundan keyin o‘yin durangga qarab keta boshladi, ammo qo‘shimcha daqiqalarda uyushtirilgan so‘nggi hujumni Xon Oyxon gol bilan yakunladi va turklarning turnirdagi ilk va oxirgi g‘alabasini ta’minladi – 3:2.

Mourinio o‘zinikilarga qarshi

«Real» bosh murabbiyi Joze Mourinio jahon chempionatida o‘z futbolchilariga qarshi muxlislik qiladi. 63 yoshli mutaxassisda buning uchun tushunarli sabab bor.

«JChdan men nima kutyapmanmi? To‘g‘risini aytaman: Madrid futbolchilari yutqazsin va ta’tilga chiqishsin. Chunki men yigitlar mavsumoldi yig‘iniga ertaroq kelishini istayman», – dedi u Beast Mode On podkastida.

Joze iyun oyi boshida «Real» bosh murabbiyi etib tayinlandi va hozircha madridliklar klubining mundialga yo‘l olgan futbolchilari bilan hali ko‘rishmadi. Bunday futbolchilar jamoada kam emas: Kilian Mbappe va Orelen Tchuameni (Fransiya), Jud Bellinhem (Angliya), Vinisius Junior (Braziliya), Federiko Valverde (Urugvay), Antonio Ryudiger (Germaniya), Tibo Kurtua (Belgiya), Braim Dias (Marokash), shuningdek, yozgi transferlar doirasida safga qo‘shib olingan Mark Kukurelya (Ispaniya), Bernardu Silva (Portugaliya), Ibraima Konate (Fransiya) va Denzel Dyumfris (Niderlandiya).

Darvoqe, Mourinioning istagi asta-sekinlik bilan ro‘yobga chiqmoqda – Arda Guler Turkiya milliy jamoasi bilan allaqachon turnirni tark etdi.

Turning asosiy o‘yini xavf ostida

Nafaqat ushbu turdagi, balki guruh bosqichidagi eng yorqin afisha –  Norvegiya va Fransiya o‘rtasidagi bahsdir. Erling Holand va Kilian Mbappe boshchiligidagi ushbu jamoalar allaqachon pley-off masalasini hal qilishdi va endi I kvartetida birinchi o‘rin uchun bahslashadi. Ammo bu bellashuv o‘z vaqtida o‘tkazilmasligi mumkin – meteorologlar 26 iyun kuni Foksboroda o‘ta noqulay ob-havo kuzatilishini prognoz qilmoqda. Bunday holatda qat’iy protokol amal qiladi, unga ko‘ra, o‘yin noma’lum vaqtga ko‘chiriladi.

Fransuzlar uchun bu turnirdagi ikkinchi shunday hodisaga aylanishi mumkin – o‘tgan turda Dide Desham shogirdlarining Iroq bilan o‘yinida ikki soatdan ortiq vaqt davomida tanaffus yuzaga kelgandi. Lekin bu «Uchranglilar»ga 3:0 hisobida g‘alaba qozonishga to‘sqinlik qilmagandi.

2026 yilgi jahon chempionatida bir necha bor bu kabi holatlar kuzatildi: turnirning ilk kunlarida Angliya milliy jamoasi bazasi joylashgan hududda kuchli tornado ro‘y bergan, kuchli chaqmoq chaqishi portugallar va ispanlar ochiq havodagi mashg‘ulotlarni bekor qilishiga olib kelgandi. Ammo faqat fransuzlar to‘g‘ridan to‘g‘ri o‘yin vaqtida jabrlanuvchiga aylangan va bu ular bilan ikkinchi bor ro‘y berishi kutilmoqda.

Navbatdagi o‘yinlar

Uchinchi tur davom etmoqda. 26 iyun kuni kechqurun va 27 iyunga o‘tar kechasi quyidagi uchrashuvlar bo‘lib o‘tadi:

00.00. I guruhi. Norvegiya — Fransiya

00.00. I guruhi. Senegal — Iroq

05.00. H guruhi. Urugvay — Ispaniya

05.00. H guruhi. Kabo-Verde — Saudiya Arabistoni

08.00. G guruhi. Yangi Zelandiya — Belgiya

08.00. G guruhi. Misr — Eron

Source link