O‘zbekistonlik grossmeyster Javohir Sindorov Polsha poytaxti Varshavada o‘tayotgan turnirda rapid shaxmatda hindistonlik Gukesh Dommarajuga yutqazdi.

Foto: Instagram / grandchesstourofficial / Lennart Ootes

O‘zbekistonlik grossmeyster Javohir Sindorov Polsha poytaxti Varshavada o‘tayotgan Grand Chess Tour: Super Rapid & Blitz turnirida rapid shaxmatda hindistonlik Gukesh Dommarajuga yutqazdi.

Shaxmatning rapid turida har bir ishtirokchiga 25 daqiqa vaqt va har bir yurishdan so‘ng 10 soniya qo‘shib beriladi. Bunday vaqt cheklovi jiddiy o‘ylash uchun kam vaqt qoldiradi va aksariyat qarorlar reflekslar asosida qabul qilinadi, variantlarni hisoblash tezligi va sezgi birinchi o‘ringa chiqadi.

Sindorov va Gukesh bahsi shaxmat ishqibozlarining e’tibori markazida bo‘ldi. Chunki 20 yoshli grossmeysterlar shu yil oxirida klassik shaxmatda jahon toji uchun kurash olib boradi. Bu o‘zbekistonlik shaxmatchining Nomzodlar turniridagi g‘alabasidan keyin Gukesh bilan ilk yuzma-yuz o‘yini edi. Ularning shaxmat toji uchun o‘tkazadigan matchiga taxminan yarim yil vaqt qolgani sababli bu partiya ruhiy ustunlik uchun erta boshlangan kurash sifatida ham ko‘rildi.

Javohir musobaqani yaxshi boshlab, peshqadamlar safidan joy olganidan so‘ng, 6 may kuni o‘tkazilgan partiyalarning barchasini yutqazdi — Uesli So (AQSh), jahon chempioni Dommaraju Gukesh (Hindiston) va Maksim Vashe-Lagravga (Fransiya).

Ayni paytda u 4 ochko jamg‘arib, Alirizo Firuzja bilan 8-o‘rinni bo‘lishib turibdi. Turnirda 9 ochkodan jamg‘argan amerikaliklar – Hans Nimann va Uesli So peshqadamlik qilmoqda.

Super Rapid & Blitz Poland 2026 musobaqasi 5−10 may kunlari bo‘lib o‘tadi va Grand Chess Tour yangi mavsumini ochib berdi. Varshavadan keyin musobaqa Buxarestdagi (Ruminiya) klassik turnir, Zagrebdagi (Xorvatiya) tezkor shaxmat bosqichi, Sent-Luisdagi ikkita turnir va AQShda o‘tadigan final bilan davom etadi.

Turnirning mukofot jamg‘armasi 200 ming dollarni tashkil etadi. G‘olib 50 ming dollar oladi, ikkinchi va uchinchi o‘rinlar uchun esa mos ravishda 40 va 30 ming dollar mukofot belgilangan.

Source link

O‘yin 8 iyun kuni Nyu-Yorkdagi «Icahn Stadium»da bo‘lib o‘tadi.

O‘zbekiston milliy jamoasi Jahon chempionati o‘yinlariga tayyorgarlik doirasida Niderlandiya bilan o‘rtoqlik o‘yini o‘tkazadi.

O‘yin 8 iyun kuni Nyu-Yorkdagi «Icahn Stadium»da bo‘lib o‘tadi va Toshkent vaqti bilan soat 23:45 da boshlanadi.

Avvalroq, milliy jamoa jahon chempionati mezbonlaridan biri Kanada bilan o‘rtoqlik o‘yini o‘tkazish haqida kelishuvga erishgan edi. Ushbu o‘yin 1 iyun kuni Kanadaning Edmonton shahrida bo‘lib o‘tadi.

AQSh, Kanada va Meksika mezbonligida o‘tadigan jahon chempionati 11 iyun kuni boshlanib, 19 iyulda yakunlanadi. Turnirda ilk bor 48 jamoa ishtirok etadi. O‘zbekiston milliy jamoasi guruh bosqichida Portugaliya, Kolumbiya va Kongo DR bilan o‘ynaydi.

Source link

«Bavariya» o‘z uyida kechgan javob o‘yinida g‘alaba qozona olmadi va bunda hakamlarni ayblamoqda. Endi 30 may kuni Budapeshtda «PSJ» «Arsenal»ga qarshi final bahsida maydonga tushadi.

Enrike avtobus qo‘yishdan tortinmadi

«Bavariya» – «PSJ» 1:1

Gol: Dembele, 3 (0:1). Keyn, 90+4 (1:1)

«Bavariya»: Noyyer, Upamekano (Karl, 85), Ta (Kim Min Je, 68), Stanishich (Deyvis, 68), Laymer, Kimmih, Pavlovich, Musiala (Jyekson, 79), Dias, Olise, Keyn

«PSJ»: Safonov, Markinios, Pacho, Nunu Mendesh (Mayulu, 85), Zair-Emeri, Vitinya, Joau Nevesh, Ruis (Beraldo, 76), Kvaratsxeliya, Due (Ernandez, 76), Dembele (Barkolya, 65)

Ogohlantirishlar: Ta, 33. Dias, 78. Kimmih, 90 – Nunu Mendesh, 8. Kvaratsxeliya, 45. Markinios, 86

Birinchi o‘yin: 4:5

«Bavariya» va «PSJ» Parijda kechgan birinchi bahsda mavsumning eng yaxshi o‘yinini o‘tkazib berishgandi, muxlislar esa ikki hafta o‘tib o‘sha o‘yinning takrorini kutishdi. O‘yindan oldin parijliklar ustozi Luis Enrike jamoasi hisobdagi ustunlikka qaramay, g‘alaba uchun o‘ynashini aytdi, ammo u amalda shu kuni himoyaviy o‘yin tanladi.

Uchinchi daqiqadayoq mehmonlar hisobni ochgani bunda yanada qo‘l keldi. «PSJ» tezkor qarshi hujum uyushtirdi, bu vaqtda «Bavariya» himoyasi shu qadar yuqorida joylashgandiki, maydon markazida Ruis bilan devor uslubida o‘ynab, oldinga tashlangan Xvichani hech kim qarshi olmadi. Keyin esa gurjistonlik vinger jarima maydonida to‘p uzatish uchun uchta bo‘sh sherigidan birini tanlashi kifoya qildi.

Kvaratsxeliya olis ustun yaqiniga yetib kelgan Dembelega pas berishga qaror qildi. Fransuz hujumchisi esa hech qanday qarshilikka uchramasdan to‘pni bir teginishda darvoza to‘riga joylashtirdi. O‘tkazib yuborilgan tezkor goldan keyin «Bavariya» ikki to‘p farqni yo‘qqa chiqarishi kerak bo‘lgan vaziyatda qoldi.

Va «Bavariya»da buning uchun birinchi bo‘limning o‘zidayoq yetarlicha vaziyatlar yuzaga keldi. Olise chap qanotdan jarima maydoniga yaqinlashib olis burchak tomon yo‘llagan zarbaga biroz aniqlik yetishmadi, biroz o‘tib Musiala yerlatib tepgan to‘pni Safonov to‘sib qoldi.

Lekin birinchi bo‘limda eng ko‘p muhokama qilingan vaziyatlar bular emasdi. O‘yin bosh hakami Joau Pedru Pineyra ikki vatandoshiga qizil kartochka va mehmonlar darvozasiga penalti qo‘yishni xohlamadi.

Avvaliga o‘z jamoasi jarima maydoni ichida Vitinya to‘pni qo‘li bilan o‘ynadi, bu vaziyatda uning qo‘li tabiiy holatda emasdi. «Bavariya» futbolchilari penalti so‘rab hakamga tashlanishdi, ammo u qarorini o‘zgartirmadi. Katta ehtimol bilan, u bu qarorini to‘p darvoza sohasi tomon bormayotgani bilan izohlagan, lekin futbolchi bu vaziyatda ehtiyotsizlik bilan qo‘lini yuqoriga ko‘targani fakt edi.

Keyingi vaziyat yanada bahsli. Nunu Mendesh ham qanotda to‘pni qo‘l bilan o‘ynab, to‘xtatib qoldi. Bungacha u Olisening oyog‘iga bir vaziyatning o‘zida ikki bor butsasining ostki qismi bilan zarba bergani uchun sariq kartochka olgandi va mezbonlar unga ikkinchi sariq kartochka ko‘rsatishni talab qilishdi. Ammo hakam bu vaziyatda Laymer tomonidan fol ishlatilgan deb topdi va parijliklar himoyachisini maydondan chetlatmadi. Lekin Laymer qanday fol ishlatgani mavhum bo‘lib qoldi.

Umuman olganda, «Bavariya» kuchli bosim uyushtirdi, ammo bu golga olib kelmadi. Ikkinchi bo‘limda ham mezbonlar to‘pga egalik qilishda davom etdi, ammo «Bavariya»ning bo‘limdagi dastlabki xavfli vaziyati faqat 69-daqiqaga kelib ro‘y berdi. Luis Dias taxminan 11 metr masofadan turib to‘pni to‘xtatmay zarba yo‘lladi, ammo Safonov ishonchli harakat qildi.

Parijliklar ikkinchi bo‘limda hisobdan kelib chiqib, chuqur himoyaga yotdi va qarshi hujumlarga tayanishdi. «Bavariya» esa hududiy ustunlikka ega bo‘lib, to‘liq hujumda o‘ynagan bo‘lsa-da, oldinda tig‘iz joylashgan himoya chizig‘idan o‘ta olmadi.

Mezbonlar futbolchilari vaqt o‘tgan sayin shoshilishdi va bu jamoa zarariga ishladi. Vaziyatlarning birida Keyn vaqt yo‘qotmaslik uchun autni o‘zi otdi, ammo to‘pni yo‘qotdi. Shu bilan birga, Duening o‘zida uchta vaziyat yuzaga keldi, ammo Noyyer har safar ishonchli harakat qilib, o‘yinda intrigani saqlab qoldi. 79-daqiqada Xvicha ikkinchi golni urib, o‘yin taqdirini hal qilishi mumkin edi, ammo yaqin masofadan turib to‘pga to‘g‘ri zarba berolmadi. 

«Bavariya» baribir o‘z golini urdi. Keyn jarima maydonida to‘pni o‘ziga bo‘ysundirib, to‘qqizlikni aniq nishonga oldi. Ammo juda kech bo‘lgandi, bu vaqtda o‘yinning 90+4-daqiqasi o‘tib borayotgandi. Myunxenliklarda ikkinchi gol uchun vaqt qolmagandi.

O‘yin yakunlanganidan keyin «PSJ» futbolchilari final yo‘llanmasini nishonlashga kirishdi. «Bavariya» futbolchilari esa o‘z e’tirozlarini bildirish uchun hakamni o‘rab olishdi – Kimmih buning uchun sariq kartochka ham oldi. Ikkinchi bo‘lim davomida Nevesh ham jarima maydonida qo‘li bilan o‘ynagan va jazosiz qolgandi. Lekin futbolchilarning e’tirozlari endi hech narsani o‘zgartirmaydi. «PSJ» qatorasiga ikkinchi bor YeChL finaliga chiqdi va 30 may kuni Budapeshtda «Arsenal»ga qarshi o‘ynaydi.

Source link

Uni muxlislar ham tanqid qilishmoqda. «Real» rahbariyatidan Mbappeni ketkazish talab qilingan petitsiyani 14 milliondan ortiq kishi imzolagan.

«Real» hujumchisi Kilian Mbappe klasiko arafasida Italiyaga ketib qolgani uchun keskin tanqidga uchradi, deb yozmoqda Ispaniya va Fransiyadagi nashrlar. Ushbu forvard jarohatlangan va bo‘sh vaqtida ta’tilga yo‘l olgandi, ammo bu uni ta’na-dashnomlardan qutqara olmadi – jamoa bosh murabbiyi Alvaro Arbeloa uni himoya qilib chiqishiga to‘g‘ri keldi.

Bahslarga sabab bo‘lgan safar

Mbappe 24 aprel kuni «Betis»ga qarshi kechgan o‘yinda (1:1) tizza osti payini shikastlab olgandi. Klubdagilar 27 yoshli forvard qachon safga qaytishini ma’lum qilmagan. Ayrim ma’lumotlarga ko‘ra, u mavsum oxirigacha maydonga tusha olmasligi mumkin, boshqa manbalar esa unda «Barselona»ga qarshi 10 may kuni o‘tkaziladigan klasikoda o‘ynash imkoniyati borligini aytishgan.

Ammo fransuz futbolchisi, aftidan, jarohati haqida unchalik jiddiy qayg‘urmayapti – u ko‘nglini yozishga qaror qildi va sevgilisi, aktrisa Ester Ekspozito bilan Kalyariga yo‘l oldi.

Marca va L’Equipe nashrlari ma’lumotiga ko‘ra, so‘nggi vaqtlarda fransiyalik yulduzning ayrim jamoadoshlari, jumladan, Vinisius Junior bilan munosabatlari yomonlashgan. Va klub uchun qiyin pallada Italiyaga ketib qolishi uning kiyim almashtirish xonasidagi holatini yanada yomonlashtirgan. «Real»dagilar uning klasikogacha jarohatidan tuzalish imkoniyati bo‘lganidan kelib chiqib, tiklanish vaqtida bunday yo‘l tutishni yaxshi g‘oya deb hisoblashmayapti.

Forvardni fanatlar ham tanqid qilishmoqda. Italiyaga sayohat haqidagi yangiliklar fonida madridliklar klubi himoyachisi Fran Garsiyaning fransuz jamoadoshi haqida aytgan so‘zlari yana keng aylanmoqda.

«Bilasizki, bugun bitta futbolchi mashq qilmasligi, to‘p ortidan yugurmasligi mumkin. Ammo bir vaqtning o‘zida bir necha o‘yinchi bu bilan shug‘ullanmasa, bu chempionatda, Chempionlar ligasida g‘alaba qozonish imkoniyatiga jiddiy ta’sir ko‘rsatadi. O‘ylaymanki, agar Kilian ter to‘kib ishlasa, u jamoaning qolgan a’zolariga katta yordam bergan bo‘ladi», – degandi Garsiya yanvar oyidayoq El Camino de Mario kanaliga.

Himoyachi intervyusida Mbappe haqida boshqa ko‘p iliq so‘zlar aytgan bo‘lsa-da, muxlislar tushunarli sababga ko‘ra aynan shu iqtibosni eslab qolgandi. Hozir esa bu gaplar yana dolzarblashdi va ijtimoiy tarmoqlarda faol tarqalmoqda.

Fanatlar «Real» rahbariyatidan Mbappedan qutulish talab qilingna petitsiya ochishgan. Ikki kun ichida uni allaqachon 14 milliondan ortiq kishi imzolagan.

Shu bilan birga, jamoa ixtiyoriga qaytganidan keyin forvard o‘ziga dam olish kunlari olmagan. AS xabariga ko‘ra, u boshqa futbolchilarga dam berilgan vaqtda fizioterapevt va tiklanish bo‘yicha mutaxassislar bilan ishlash uchun «Real» bazasiga kelgan.

Yaqin vaqtlar ichida Kilian MRT tekshiruvidan o‘tadi va shundan keyin uning «Barselona»ga qarshi o‘yindagi ishtirokiga oydinlik kiritiladi.

Bu vaqtda esa futbolchining tarafdorlar uning «Real»da qolishi haqida petitsiya boshlagan va uni ham 10 milliondan ortiq kishi imzolagan.

«Sadoqatiga shubha qilmayman»

«Real» bosh murabbiyi Alvaro Arbeloa yulduzli futbolchisiga qaratilgan tanqidlarga munosabat bildirdi.

«Mbappe boshqa har qanday futbolchi kabi bo‘sh vaqtida xohlagan ishini qilishi mumkin. Men bunga aralasholmayman. Vinisiusning sadoqati unikidan kuchliroqmi? Taqqoslab o‘tirmayman. Menimcha, bizga hamma kerak. Men murabbiylik kursisini egallaganimdan beri doim shuni aytaman: har qanday o‘yinda g‘alaba qozonish uchun har bir futbolchining fidoyiligi kerak.

«Real» smokingda maydonga tushadigan o‘yinchilar bilan emas, balki ter va loyga botgan futbolkalarda o‘yinni yakunlaydigan o‘yinchilar bilan yaratilgan. Bu ajoyib klubda ekanimiz hammamizning omadimiz kelgani. «Real»dan muhimroq futbolchi yo‘q. Lekin men o‘z shogirdlarimning sadoqatiga shubha qilmayman», – deya Arbeloaning so‘zlarini keltirgan Diario AS.

Ispaniyalik mutaxassis Mbappening «Barselona» bilan o‘yindagi ishtiroki hozircha so‘roq ostida ekanini qo‘shimcha qilgan.

«Kilian o‘ynaydimi? Ko‘ramiz, u o‘zini qanday his qilarkan. O‘tgan haftadagi testlar tiklanish jarayoni ko‘proq vaqtni olishini ko‘rsatgandi», – degan mutaxassis.

Mbappe jarohatini davolayotgan mahalda «Real» natijalari uchun butun mas’uliyat yuki Vinisiusning zimmasiga tushmoqda. Va braziliyalik vinger ham uyaltirmayapti – u o‘tgan turda «Espanyol» bilan o‘yinda dubl muallifi bo‘ldi (2:0) va murabbiydan katta maqtov eshitdi. Arbeloa o‘yindan keyin uning jamoaga ta’siri ortib borayotganini e’tirof etdi.

Shunday pallada yana bir qiziqarli yangilik paydo bo‘ldi: jurnalist Fransua Gallardoning ma’lumotiga ko‘ra, Kilianning onasi va agenti hisoblangan Fayza Lamari go‘yoki Madrid klubi prezidenti Florentino Peresga ultimatum qo‘ygan va yozda Vinisiusni sotib yuborishni talab qilgan.

Chempionat yakuniga to‘rt tur qolganida «Real» turnir jadvalida 77 ochko bilan ikkinchi o‘rinda joylashgan va «Barselona»dan 11 ochkoga ortda qolmoqda. Chempionlik masalasi klasikoda uzil-kesil hal bo‘lishi mumkin.

Source link

Bosh murabbiy Fabio Kannavaro Toshkent yig‘ini uchun kengaytirilgan tarkibni e’lon qildi.

O‘zbekiston milliy jamoasi 6−26-may kunlari Toshkentda o‘quv-mashg‘ulot yig‘inini o‘tkazadi. Bu JCh-2026 uchun tayyorgarlik bosqichi hisoblanadi.

Bosh murabbiy Fabio Kannavaro Toshkent yig‘ini uchun kengaytirilgan tarkibni e’lon qildi.

Yig‘in Milliy futbol markazida bo‘lib o‘tadi va uning doirasida jamoa Superliga klublariga qarshi yopiq nazorat o‘yinlarini o‘tkazishi rejalashtirilgan.

JCh-2026 11 iyundan 19 iyulgacha AQSh, Kanada va Meksikada bo‘lib o‘tadi. O‘zbekiston milliy jamoasi tarixda birinchi marta unda ishtirok etadi.

Source link