Jamiyat
Urush qatnashchilariga 30 mln so‘mdan mukofot puli beriladi
II jahon urushi qatnashchilari 30 mln so‘m miqdorida mukofotlanadi.
O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyevga harbiy xizmatchilarni ijtimoiy qo‘llab-quvvatlash, rezerv va zaxiradagi ofitserlar tayyorlash tizimini takomillashtirish, shuningdek, 9 may – Xotira va qadrlash kuniga tayyorgarlik ko‘rish yuzasidan axborot berildi.
Avvalo, armiyaning jangovar shayligi va tayyorgarligini rivojlantirish, shaxsiy tarkibga yangi tizim asosida ta’lim berish va kasbga tayyorlash bo‘yicha amalga oshirilayotgan ishlar yuzasidan hisobot berildi.
Xususan, jangovar shaylik yo‘nalishida qo‘shinlarda majmuaviy strategik va qo‘mondonlik shtab o‘quvlari, yig‘in, dala chiqishlari va o‘quv kurslari tizimli ravishda o‘tkazib kelinayotgani, bunda shaxsiy tarkibda axloqiy-ruhiy, real jangovar vaziyatlarda qo‘rquv va emotsiyalarni boshqarish hamda dadil harakatlana olish kabi muhim jangovar sifatlarni shakllantirishga alohida e’tibor qaratilayotgani qayd etildi.
Zamonaviy jangovar harakatlar tahlilidan kelib chiqib, barcha o‘quv, trening va mashg‘ulotlarda jang olib borishning yangi usul va shakllari o‘zlashtirilayotgani, bo‘linmalarning mobilligini, jangovar imkoniyatlarini va qo‘yilgan vazifalarni mustaqil bajarish qobiliyatini oshirishga qaratilgan tegishli chora-tadbirlar ko‘rilayotgani yuzasidan axborot berildi.
Har yili mamlakatimizda 9 may – Xotira va qadrlash kuni umumxalq bayrami sifatida nishonlanishi yurtimizda tinchlikni asrash, mustaqillikni mustahkamlash, Vatan ozodligi yo‘lida qurbon bo‘lganlar xotirasini yod etish, bugun oramizda sog‘-omon yashayotgan urush va mehnat faxriylariga g‘amxo‘rlik ko‘rsatishning yorqin amaliy ifodasidir.
Joriy yilda bayram munosabati bilan Ikkinchi jahon urushi qatnashchilari va nogironlarining har biriga 30 million so‘m miqdorida bir martalik pul mukofotini to‘lash taklif qilindi.
Shuningdek, bu kunda urush qatnashchilari, front orti mehnat faxriylari, keksalar va ustozlarga hurmat-ehtirom ko‘rsatish, yolg‘iz va kam ta’minlangan faxriylarning turar joylarini obodonlashtirish, turli xotira va qadrlash tadbirlarini tashkil etish rejalashtirilgan. Mustaqillik yillarida xizmat burchini bajarish chog‘ida halok bo‘lgan Vatan fidoyilarining xotirasi ham ulug‘lanadi. Ularning oila a’zolariga moddiy va ma’naviy yordam ko‘rsatiladi.
Ona Vatanimiz tinchligi, xalqimiz osoyishtaligi yo‘lida jon fido qilgan harbiy xizmatchilarning mardligi va jasoratini targ‘ib qilishga qaratilgan ma’naviy-vatanparvarlik tadbirlari o‘tkaziladi. Mamlakatimiz bo‘ylab “Burch, jasorat, matonat!” shiori ostida madaniy-ma’rifiy tadbirlar, uch avlod uchrashuvlari, ijodiy kechalar, tanlovlar va ommaviy sport musobaqalari tashkil etiladi.
Taqdimotda rezervdagi va zaxiradagi ofitserlarni tayyorlash tizimini yangi bosqichga olib chiqishga qaratilgan qo‘shimcha chora-tadbirlar ham ko‘rib chiqildi. Qayd etilganidek, dunyoda yuz berayotgan harbiy mojarolar tahlili urush davridagi safarbarlik ehtiyojlaridan kelib chiqib, tinchlik davrida harbiy tayyorgarlikka ega bo‘lgan ofitserlar zaxirasini shakllantirish va ularni mutaxassisliklar bo‘yicha to‘g‘ri taqsimlash dolzarb vazifa ekanini ko‘rsatmoqda.
Hozirgi kunda 4 ta oliy ta’lim va 2 ta oliy harbiy ta’lim muassasasining harbiy tayyorgarlik o‘quv markazlari va fakultetlarida 42 ta mutaxassislik bo‘yicha rezerv va zaxiradagi ofitserlar tayyorlanmoqda. Bunga qo‘shimcha ravishda Urganch, Termiz, Andijon davlat universitetlari, Samarqand iqtisodiyot va servis instituti hamda Andijon davlat tibbiyot institutida yana 5 ta harbiy tayyorgarlik o‘quv markazini tashkil etish taklif qilindi.
Shuningdek, davlat oliy ta’lim muassasalarida qo‘shimcha ravishda “Chaqiriqqacha harbiy ta’lim” yo‘nalishi bo‘yicha 3 yillik bakalavriat ta’limi asosida rezerv va zaxiradagi ofitserlarni tayyorlash tizimi yo‘lga qo‘yiladi. Harbiy tibbiyot institutida esa ilk bor klinik ordinatura va magistraturaga qabul qilingan hamda harbiy tayyorgarlikdan o‘tish istagini bildirgan talabalar to‘lov-kontrakt asosida o‘qitiladi. Bunday imkoniyat nodavlat oliy ta’lim muassasalari talabalari uchun ham yaratiladi.
Bugungi kunda dolzarb bo‘lgan sun’iy intellekt, dron, robototexnika kabi zamonaviy va tor mutaxassisliklar bo‘yicha ham zaxira ofitserlari tayyorlash yo‘lga qo‘yiladi. Harbiy tayyorgarlik o‘quv bo‘linmalari uchun ilg‘or xorijiy armiyalar tajribasi asosida yangi o‘quv reja va dasturlar ishlab chiqiladi.
Harbiy xizmatchilarni ijtimoiy himoya qilish masalalariga ham alohida e’tibor qaratildi. Joriy yil 13-yanvar kuni Prezidentimiz, Qurolli Kuchlarimiz Oliy Bosh Qo‘mondoni raisligida o‘tkazilgan Xavfsizlik kengashi yig‘ilishida mazkur masala ustuvor vazifalardan biri sifatida belgilangan edi.
Jumladan, Mudofaa vazirligi ofitserlariga xizmat yillari uchun to‘lanadigan har oylik ustama miqdori ikki baravarga oshirish, kontrakt bo‘yicha xizmat qilayotgan oddiy askar va serjantlarning oylik pul ta’minotini 10 foizga ko‘paytirish taklif qilindi.
Prezidentimiz takliflarni qo‘llab-quvvatlab, ularning ijrosi harbiy xizmatchilar va ularning oila a’zolari ijtimoiy himoyasini yanada kuchaytirish, harbiy xizmat nufuzi va jozibadorligini oshirishga xizmat qilishini ta’kidladi hamda tegishli hujjatlarni imzoladi.
Samarqand viloyatida noqonuniy ravishda ma’danli toshlardan oltin ajratib olish bilan shug‘ullanib kelgan shaxslar ushlandi.
Bosh prokuratura huzuridagi Departamentning Narpay tumani bo‘limi tomonidan tergovga qadar tekshiruv o‘tkazilgan. Unda fuqarolar D.A., M.A. va boshqalar o‘zaro til biriktirib, Paxtachi tumani hududida tarkibida oltin bo‘lishi mumkin bo‘lgan 5 tonna ma’danli toshlarni tegishli ruxsatnomasiz noqonuniy ravishda qazib olib, qo‘lbola usulda yasalgan uskunalar yordamida oltin ajratib olish faoliyati bilan shug‘ullanib kelganliklari aniqlangan.
Mazkur holat yuzasidan Jinoyat kodeksining 196-2-moddasi (foydali qazilmalarni oltin izlovchilar usulida ruxsatnomasiz qazib olish) bilan jinoyat ishi qo‘zg‘atilib, tergov harakatlari o‘tkazilmoqda.
Eslatib o‘tamiz, avvalroq DXX hududiy boshqarmalari hamda IIV o‘tkazgan tezkor tadbirlar davomida katta miqdordagi narkotik moddalarning noqonuniy aylanmasiga chek qo‘yilgandi.
Ravshanjon Isomiddinov hozir 44 yoshda. U 24 yildan beri ichimlik suvi yetib bormagan hududlarda quduq qazib, odamlarning og‘irini yengil qilib keladi. Ravshanjon quduqchi nomi bilan tanilgan qag‘ramonimiz hatto 120 metr chuqurlikkacha bo‘lgan quduqlarni qazigan.
“Yer qa’arida tuprog‘-u toshlar oralab ancha ichkariga kirib ketib qolganimni o‘zim ham sezmay qolaman. Yuqorida turgan yordamchilarim ovozimni eshitmay qolishi mumkin, o‘sha uchun mikrofonda gapiraman. Havo yetishmay qolganida “pilesos” tushirishadi”, – deydi u.
Kun.uz tasvirga olgan manzilda quduqchi 40 metr chuqurga tushishga ulgurib, shag‘alni tashqariga olayotgan ekan.
“Quduq qazib suv chiqarish mashaqqatli ish. Ichkarida doim duoda bo‘laman. Har bir daqiqada xavf bilan yuzlashasiz-da. Quduq ichida sizga hech kim yordam bera olmaydi.
Taqir yerlarda ko‘pchilikka suv chiqarib berib duosini oldim. O‘sha quduqdan chorvasini, bog‘ini sug‘orishyapti, bola-chaqasiga suv berishyapti. Yaratganga shukur aytaman, hayotimdan nolimayman. Kasbimning ortidan ro‘zg‘or tebratyapman, ustim but.
Faoliyatim davomida chuqurligi 100 metrdan ortiq quduqlardan ko‘plab qaziganman. O‘sha quduqlarni tushlarimda ham ko‘raman…
Chuqurlikka qarab tushib ketganimda havo yetishmay qolishi mumkin. O‘sha paytda sheriklarim ichkariga “pilesosda” havo berib turishadi.
Bir qishloqda quduq qaziyotganimda quvur yorilib ketib ichkarida suv ostida qolib ketganman. O‘shanda yuqorida turgan do‘stlarim meni o‘ldi, deb xavotir olishgan. Allohga shukur, amallab chiqib olganman.
Ravshanjon Isomiddinov
Mikrofonsiz ish bo‘lmaydi. Ichkaridan gapirganimni tepadagilar eshitmay qolishi mumkin. Quduq ichiga mikrofon bilan tushib ketib, yordamchilarimga ish buyurib turaman.
Mashaqqat bilan qazilgan joyda suv chiqishini ko‘rishning zavqi boshqacha. Suv chiqishini oldinroq sezaman va o‘sha paytda atay shogirdlarimni tushiraman. Xursand bo‘lsin deyman-da”, – deydi quduqchi.
Qahramonimiz quduqning har bir metri uchun 300 ming so‘mdan 1 mln 200 ming so‘mgacha xizmat haqi olar ekan.
Jamiyat
Soliq deklaratsiyasi taqdim etgan 728 nafar xonanda jami 4,7 mlrd so‘m daromad topgani ma’lum bo‘ldi
Ularga 437,1 mln. so‘m daromad solig‘i hisoblangan.
Soliq qo‘mitasi xonandalar tomonidan “Konsert-tomosha faoliyati” xizmati bo‘yicha soliq deklaratsiyalari taqdim etilishi bo‘yicha ma’lumot berdi.
Unga ko‘ra, 17 aprel holatiga konsert-tomosha faoliyati litsenziyasiga ega bo‘lgan va 2025 yilda ushbu faoliyatdan olgan daromadlari bo‘yicha 728 nafar xonanda soliq deklaratsiyasini taqdim etgan.
Jami yillik deklaratsiya asosida 4 mlrd 694,9 mln. so‘m daromad ko‘rsatilib, shundan soliqqa tortiladigan daromad 3 mlrd 728,7 mln. so‘mdan 437,1 mln. so‘m daromad solig‘i hisoblangan.
Shundan:
1-reyting guruhida 28 nafari 1 mlrd 091,7 mln. so‘m daromad ko‘rsatib, shundan soliqqa tortiladigan 869,8 mln. so‘mdan 104,4 mln. so‘m daromad solig‘i;
2-reyting guruhida 57 nafari 585,4 mln. so‘m daromad ko‘rsatib, shundan soliqqa tortiladigan 464,3 mln. so‘mdan 55,7 mln. so‘m daromad solig‘i;
3-reyting guruhida 643 nafari 3 017,8 mln. so‘m daromad ko‘rsatib, shundan soliqqa tortiladigan 2 394,6 mln. so‘mdan 277,0 mln. so‘m daromad solig‘i hisoblangan.
Taqdim etilgan 728 ta jami yillik deklaratsiyaning:
228 tasida daromad 1 mln. so‘mgacha 117,9 mln. so‘m (o‘rtacha yillik soliq summasi 48,5 ming so‘m);
396 tasida 10 mln. so‘mgacha 1 783,3 mln. so‘m (o‘rtacha yillik soliq summasi 429,5 ming so‘m);
71 tasida 20 mln. so‘mgacha 972,1 mln. so‘m (o‘rtacha yillik soliq summasi 1,2 mln. so‘m);
16 tasida 40 mln. so‘mgacha 514,6 mln. so‘m (o‘rtacha yillik soliq summasi 2,8 mln. so‘m);
11 tasida 60 mln. so‘mgacha 605 mln. so‘m (o‘rtacha yillik soliq summasi 5,1 mln. so‘m);
6 tasida 152 mln. so‘mgacha 702 mln. so‘m (o‘rtacha yillik soliq 11,4 mln. so‘m) ko‘rsatilgan.
Avvalroq xonandalar to‘lagan soliqlar keskin kamaygani ma’lum bo‘lgandi.
Obidjon Mo‘minov Toshkent shahri hokimining o‘rinbosari — Uy-joy kommunal xo‘jaligi bosh boshqarmasi boshlig‘i etib tayinlandi.
Obidjon Odilovich Mo‘minov 1987-yilda Navoiy viloyatida tug‘ilgan. 2013-yilda Navoiy davlat pedagogika institutini, 2024-yilda RF prezidenti huzuridagi Rossiya xalq xo‘jaligi va davlat xizmati akademiyasi Davlat boshqaruvi oliy maktabini (magistratura) tamomlagan.
Tayinlovga qadar O‘zbekiston Qurilish va uy-joy kommunal xo‘jaligi vazirligida Ko‘p xonadonli uy-joy fondini boshqarish va ekspluatatsiya qilish tizimini muvofiqlashtirish hamda renovatsiya loyihalarini umumlashtirish departamenti boshlig‘i lavozimida faoliyat yuritib kelgan.
2025 yil 2 iyul. Qarshi shahridagi choyxonada oshpaz bo‘lib ishlovchi Quvonch Sunnatovning telefoniga SMS keldi. U xabarni o‘qidi va o‘zi ishlatadigan pichoqni ryukzagiga solib, yo‘lga chiqdi. Oradan 3 soat o‘tib, Koson tumani Mustaqillik mahallasida dahshatli oshkora qotillik sodir bo‘ldi: Quvonch Sunnatov 5 aka-ukani yaqinlari ko‘z oldida pichoqladi. Oqibatda ikki aka-uka halok bo‘ldi, uchtasi jarohatlandi. Hodisadan xabar topganlarni bir savol o‘ylantirardi: oshpaz nega qotillikka qo‘l urdi, uning telefoniga kimdan qanday SMS kelgandi?
Ba’zida kichik oilaviy janjallar katta jinoyatlarga sabab bo‘ladi. Qashqadaryo viloyatining Koson tumanida sodir etilgan dahshatli qotillik ham oilaviy janjalga borib taqaladi. Afsuski, oradan 8 oy o‘tganiga qaramay bu voqea hamon kosonliklarni hayratga, marhumlarning yaqinlarini esa iztirobga solib kelmoqda.
Sangamdan kelgan SMS
2023 yilning dekabri. Koson tumanida yashovchi Sangam Musayev Sevinch Sunnatova bilan turmush quradi. Biroq ularning birgalikdagi turmushi tinch kechmaydi, er-xotin o‘rtasida turli oilaviy janjallar bo‘lib turadi. Shunday janjallarning birida, 2025 yilning 11 iyun kuni Sangam Musayevning akasi G‘olib Musayev Sevinchni ota-onasining uyiga tashlab ketadi.
30 yoshli Quvonch Sunnatov Sevinchning akasi edi. U Qarshi shahridagi choyxonalardan birida oshpaz bo‘lib ishlardi. Kuyovi singlisini jo‘natib yuborgani uni g‘azablantirmasdan qolmagandi.
2025 yil 2 iyul. Odatdagiday kunlarning biri. Quvonch choyxonada o‘z ishlari bilan band edi. Soat 14:00 larda uning telefoniga kuyovi Sangam Musayevdan “Singlingning narsalarini chiqarib qo‘yibman, kelib olib ketinglar”, degan xabar keladi. Oshpaz unga javoban xo‘p degan mazmunda xabar jo‘natadi. O‘sha kungi voqealarning bari ana shu xabardan boshlangandi.
Xavfli ryukzak
Quvonch Sunnatov kuyovidan SMS olgach, onasiga qo‘ng‘iroq qiladi. “Kuyovingiz narsalarni olib ketinglar, deb yozib yubordi”, deydi u. Shunda onasi “Ajrashib ketadimi, yashaydimi?” deb so‘raydi. Onasining hadik aralash bergan savoliga Quvonch “Qachondir vaqti kelib yashab ketar, borib narsalarini olib kelamiz, olib ket deganidan keyin yalinib yashatib bo‘lmaydi, taksi gaplashib kelinglar, men ham boraman”, deya javob qaytaradi.
Shundan so‘ng Quvonch singlisiga tegishli buyumlarni olib kelish uchun 400 ming so‘mga yuk mashinasi gaplashadi ham uning haydovchisiga manzilni tushuntiradi.
Singlisi bir nafar voyaga yetmagan farzandi hamda 7 oylik homilasi bilan ajrashib ketayotgani akani tinch qo‘ymasdi. U bunga kuyovi va uning oila a’zolari sababchi ekani haqida o‘ylab, g‘azab otiga mingandi. Shu sababli singlisining or-nomusi uchun qasd olish maqsadida choyxonadan o‘zi ishlatib kelgan pichoqni ryukzagiga solib, yo‘lovchi mashinada Koson tumaniga yo‘l oladi.
Oshkora qotillik
Quvonch Sunnatov Koson tumani Beshqo‘ton mahallasida yashovchi tog‘asining yashash uyiga kelib, buvisi bilan suhbatlashadi. Shu payt pochchasi boshqaruvidagi mashinada onasi, singlisi hamda ukasi ham yetib keladi.
Quvonch Sunnatov singlisiga qarata “Boradigan bo‘lsang baqir-chaqir qilmasdan narsalaringni yig‘ishtirib qaytasan”, deydi. So‘ngra yuklarni ortishda yordamlashishini aytib, jiyanini ham o‘zlari bilan olgan holda Sangam Musayevning uyiga borishadi.
Sevinchning buyumlari hovliga kirgan joyda yig‘ib qo‘yilgandi. Bu yerda quda tomonni Sangam, uning akalari G‘olib, Kamol, Lochinbek va Farhod Musayevlar kutib turgandi. Aslida qudalar bir-birlari bilan qarindosh bo‘lgan.
Quvonch kuyovi yashagan hovliga kirib borarkan, aka-ukalar bilan ko‘rishmaydi. Faqat ammasi bilan og‘zaki so‘rashib qo‘yadi. So‘ngra darvozani ochib, yuk mashinasiga singlisining buyumlarini yuklay boshlaydi. Bu paytda o‘zi bilan birga kelgan onasi quda tomon bilan tortishib turgandi. Quvonch onasiga qarata jim bo‘lishni, ular bilan o‘zi gaplashishini aytadi.
Yuklar mashinaga ortib bo‘linganda Sevinch turmush o‘rtog‘i Sangamga “Ikki yosh bolaning uvoli uradi seni”, deydi. Sangam esa Sevinchni urmoqchi bo‘ladi va quda tomonni onasidan kelib haqoratlaydi. Bu holat Quvonchning jahlini battar chiqaradi. U pochchasining mashinasiga qo‘ygan ryukzagini oladi. Bir ko‘ngilsizlikni sezgan onasi, singlisi va jiyani uni to‘xtatib, mashinaga o‘tirg‘izadi.
Ammo Quvonch Sunnatov sekin harakatlanayotgan mashinadan tushib, qo‘lida taxta bo‘lagini ko‘tarib kelayotgan G‘olib Musayevning qorin va ko‘krak sohasiga ikki marta pichoq uradi. So‘ngra ularni ajratish uchun kelgan Farhod Musayevga ham ikki marta pichoq uradi. Shundan so‘ng ko‘zi qonga to‘lgan oshpaz Komil Musayevni quvlashga tushadi. Uni kartoshka ekilgan yer maydonida ushlab olib, ungayam pichoq bilan ikki marta zarba beradi.
Shuningdek, Quvonch Sunnatov Lochinbek Musayev hamda kuyovi Sangam Musayevga ham pichoq sanchib, ularni o‘ldirishga suiqasd qilgan.
Shu tariqa, yaqin qarindoshlari ko‘z o‘ngida pichoqlangan Kamol Musayev voqea joyida, G‘olib Musayev esa shifoxonada vafot etgan. Qolgan uch aka-uka esa tan jarohati olgan.
Bo‘layotgan janjalni ko‘rib, homilador Sevinchning mazasi bo‘lmay qolgan. Quvonch singlisini onasi va ukasi bilan birgalikda pochchasining mashinasida Qarshi shahar tez tibbiy yordam bo‘limiga olib ketgan. Shifokorlar uning kiyimlariga sachragan qon dog‘larini ko‘rgan. Shu sababli Quvonch Sattorov pochchasi bilan o‘zi ishlaydigan choyxonaga borib, kiyimlarini almashtirgan. So‘ngra shifoxonaga borib, onasi va singlisini shifoxonadan olib chiqib ketayotganda tezkor xodimlar tomonidan qo‘lga olingan.
“Hammasini o‘ldir, dedi”
Barcha jinoyat ishlarida qarama-qarshi ko‘rsatmalar bo‘lgani kabi, bu qotillik sudida ham tomonlar janjalning kelib chiqish sabablari, kim avval nima degani-yu, kim qanday harakat qilgani borasida turlicha ko‘rsatmalar bergan. Albatta, ularning barini sanab o‘tirish fikridan yiroqmiz. Ammo sudda jabrlanuvchi tomon ko‘rsatmasida Quvonch Sunnatovning onasi bilan bog‘liq bir gap yangragan.
Jumladan, jabrlanuvchi Farhod Musayev o‘z ko‘rsatmasida sekin yurib ketayotgan mashinadan Quvonch va uning onasi tushganini, onasi o‘g‘liga qarab “hammasini o‘ldir”, deya qo‘li bilan ular tomonga ishora qilganini aytgan. Shuningdek, u o‘ziga pichoqni Quvonch emas, ukasi Qodir sanchganini bildirgan.
“Quvonch sumkasidan oshxona pichog‘ini olib, yugurib kelganicha ukam Komilning qorniga ikki marta urdi. Shunda holatni ko‘rib turgan ukam G‘olib ularni ajratish uchun yugurdi. Quvonch pichoq bilan G‘olibning biqiniga urdi, so‘ngra Lochinbekka tashlandi. Lochinbek chap bergani sababli pichoq uning qo‘ltiq sohasidan o‘tib ketdi. Shunda yugurib borib, Quvonchning ikkala qo‘lini ushladim. U ukasi Qodirga pichoqni ol, deb aytdi. Qodir kelib pichoqni oldi. Quvonch ukasiga qarab “ur”, dedi. Qodir pichoqni qo‘ltiq osti sohamga tiqib, ko‘tarib yubordi. Shunda tanamdan “puff” etgan ovoz chiqib, tirqirab qon oqa boshladi. Ukam G‘olib Qodirni kiyimidan ushlab tortganida u burilib, ukamning ham old ko‘krak sohasiga bir marta pichoq sanchib oldi. Biz Qodirning qo‘lini ushlaganimizda ukam G‘olib pichoqni olib, darvozaxonaga otib yubordi. So‘ngra Quvonch va uning oila a’zolari hodisa joyidan mashinada qochib ketishdi”, degan Farhod Musayev o‘z ko‘rsatmasida.
U Quvonch Sunnatov bilan birga uning voyaga yetmagan ukasi Qodir Sunnatovni ham javobgarlikka tortishni so‘ragan.
Sudlanuvchi Quvonch Sunnatov sudda aybiga to‘liq iqror bo‘lgan va pushaymonlik bildirgan. U o‘z ko‘rsatmasida onasi “hammasini o‘ldir”, deya aytmaganini, aksincha janjalni to‘xtatishga uringanini, ukasi Qodir, pochchasi va jiyani aralashmaganini ma’lum qilgan. Bundan tashqari, sudda guvoh sifatida so‘ralganlar ham Qodirning qo‘lida pichoq ko‘rmaganini bildirishgan.
Jazo
JIB Koson tuman sudining 2025 yil 23 dekabrdagi hukmi bilan 29 yoshli Quvonch Sunnatov Jinoyat kodeksi 97-moddasi (qasddan odam o‘ldirish) 2-qismi “a,g,j” bandlari va 25,97-moddasi 2-qismi “a,g,j” bandlarida nazarda tutilgan jinoyatlarni sodir qilganlikda aybli deb topilgan. Unga umrbod ozodlikdan mahrum qilish jazosi tayinlangan. Jazoni maxsus tartibli koloniyalarda o‘tash belgilangan.
Qashqadaryo viloyati sudi jinoyat ishlari bo‘yicha sudlov hay’ati apellyatsiya instansiyasining 2026 yil 24 fevraldagi ajrimi bilan dastlabki sud hukmi o‘zgarishsiz qoldirilgan.
Oliy sud axborot xizmati bilan hamkorlikda sud hujjatlari asosida tayyorlandi.
Samarqandda ma’danli toshlardan oltin ajratib olayotganlar ushlandi
Urush qatnashchilariga 30 mln so‘mdan mukofot puli beriladi
«Bavariya» muddatidan oldin Germaniya chempionligini qo‘lga kiritdi
-
Iqtisodiyot4 days ago
16-apreldan dollar sezilarli ravishda oshadi
-
Dunyodan5 days agoKreml Vengriya muxolifati yetakchisini tabriklashdan bosh tortmoqda
-
Dunyodan5 days ago
Prezident Tramp Hormuz blokadasi bilan bog‘liq tahdidli so‘zlarni aytdi
-
Iqtisodiyot4 days ago
O‘zbekistonga kofe importi keskin kamaydi
-
Dunyodan5 days ago
Dunyo “dahshatli” ish taqchilligiga duch kelmoqda
-
Siyosat5 days ago
Shahboz Saidxanov Turizm qo‘mitasi raisining axborot siyosati bo‘yicha maslahatchisi lavozimiga tayinlandi
-
Jamiyat3 days ago
Reklama qonunchiligini buzgan qurilish kompaniyalari jarimaga tortildi
-
Sport4 days ago
Shavkat Mirziyoyev Sindorovni telefon orqali tabrikladi