Siyosat
Urbanizatsiya global barqarorlik va xavfsizlikka ta’sir qiluvchi omilga aylanmoqda
O‘zbekiston prezidenti Shavkat Mirziyoyev Butunjahon urbanizatsiya forumi 13-sessiyasining Yetakchilar sammitida ishtirok etib, global urbanizatsiya jarayonlari, aholini uy-joy bilan ta’minlash va barqaror shaharlar barpo etish masalalari bo‘yicha qator tashabbuslarni ilgari surdi.
Davlat rahbari o‘z nutqida forumning Boku shahrida yuqori saviyada tashkil etilganini ta’kidlab, Ozarbayjon prezidenti Ilhom Aliyevga mehmondo‘stlik uchun minnatdorlik bildirdi. Shuningdek, Qorabog‘da amalga oshirilayotgan bunyodkorlik ishlariga yuqori baho berdi.
Prezident urbanizatsiya jarayonlari XXI asrda dunyo oldidagi eng dolzarb masalalardan biriga aylanganini qayd etdi.
«Bugun dunyoda qariyb 3 milliard inson birlamchi yashash sharoitlaridan mahrum. Bir milliarddan ziyodi norasmiy turar joylarda yashamoqda, 300 milliondan ortiq odam esa umuman boshpanasiz», – dedi Mirziyoyev.
Uning ta’kidlashicha, iqlim o‘zgarishi, iqtisodiy inqirozlar va xalqaro mojarolar global migratsiyani kuchaytirib, shaharlar oldiga yangi chaqiriqlarni qo‘ymoqda.
Prezident O‘zbekistonda urbanizatsiya strategik ahamiyatga ega ekanini bildirib, yaqin 15 yilda mamlakat aholisi 50 million nafarga, urbanizatsiya darajasi esa 65 foizga yetishi kutilayotganini aytdi.
Shu munosabat bilan keyingi yillarda mamlakatda uy-joy qurilishi sezilarli darajada oshirilgani ma’lum qilindi.
Xususan:
2025-yilda 238 mingta xonadon qurilgan;arzon uy-joy dasturlariga har yili qariyb 2 milliard dollar ajratilmoqda;
100 mingga yaqin uy-joy rasmiylashtirilgan;
renovatsiya asosida quriladigan uylar ulushini 60 foizga yetkazish rejalashtirilgan.
Nutqda «Yangi Toshkent» megaloyihasiga ham alohida to‘xtalib o‘tildi. Prezidentga ko‘ra, ikki million aholiga mo‘ljallangan mazkur shahar «yashil», «aqlli», «xavfsiz» va «15 daqiqali shahar» tamoyillari asosida barpo etilmoqda.
Mirziyoyev forumda bir qator xalqaro tashabbuslarni ham ilgari surdi. Jumladan, «Aqlli va xavfsiz shaharlar alyansi»ni tuzish, «Yashil shahar» xalqaro mukofotini ta’sis etish hamda 2030 yilda Butunjahon urbanizatsiya forumining 15-sessiyasini Yangi Toshkent shahrida o‘tkazish taklif qilindi.
Prezident forum yakunida mazkur anjuman yangi tashabbuslar va hamkorliklar uchun muhim platforma bo‘lishiga ishonch bildirdi.
Bugun, 25-sentyabr kuni O‘zbekiston Prezidenti Shavkat Mirziyoyev Xitoy Xalqaro madaniy kommunikatsiya markazi raisi Long Yuysyan va Gonkongning «JDB Group» kompaniyasi asoschisi Chan Xuntoni qabul qildi. Bu haqda Prezident matbuot xizmati xabar berdi.
Qayd etilishicha, O‘zbekiston bilan Xitoy o‘rtasidagi barcha sharoitlarda har tomonlama strategik sheriklik munosabatlarini yanada chuqurlashtirish va madaniy-gumanitar aloqalarni mustahkamlash masalalari ko‘rib chiqildi.
Markaz O‘zbekistonning Xitoy bilan ko‘p qirrali hamkorligini mustahkamlashga katta hissa qo‘shib kelayotgani qayd etildi. Birgalikda infratuzilmani rivojlantirish, investitsiyalar va «yashil» sanoat sohalarida qator loyihalar amalga oshirildi.
«JDB Group» kompaniyasining O‘zbekistondagi faoliyatining ustuvor yo‘nalishlari sifatida zamonaviy shahar, transport va sanoat infratuzilmasini rivojlantirish hamda geologiya sohasi belgilandi.
Uchrashuv yakunida mazkur kompaniya ishtirokida amalga oshirilayotgan va yangi loyihalarni jadallashtirish yuzasidan kelishuvga erishildi.
Siyosat
Saida Mirziyoyeva Diyene Keyta bilan demografik barqarorlik va inson kapitali bo‘yicha hamkorlikni muhokama qildi
O‘zbekiston Respublikasi Prezidenti Administratsiyasi rahbari Saida Mirziyoyeva BMT Bosh kotibi o‘rinbosari, BMT Aholishunoslik jamg‘armasi (UNFPA) ijrochi direktori Diyene Keyta bilan uchrashdi.
Muloqotda demografik barqarorlik, inson kapitali va aholi farovonligini ta’minlash bo‘yicha hamkorlikni yanada rivojlantirish masalalari muhokama qilindi.
Saida Mirziyoyeva O‘zbekistonning asosiy kapitali yosh avlod ekanini ta’kidladi. U demografik salohiyatni kelgusida dividend manbaiga aylantirish uchun inson, ayniqsa, ayollar va bolalarning salomatligi, ta’limi hamda xavfsizligiga investitsiya kiritish zarurligini bildirdi.
Saida Mirziyoyeva o‘zining Telegram kanalida demografik prognozlash tizimini yo‘lga qo‘yilayotganini ma’lum qildi. Shuningdek, «Demografik dividend — 2050» strategiyasini ishlab chiqish rejalashtirilayotganini aytdi.
Tomonlar demografik barqarorlikni faqat aholi soni bilan bog‘liq masala sifatida emas, balki ta’lim, sog‘liqni saqlash, bandlik, ijtimoiy himoya va oilalarni qo‘llab-quvvatlashni qamrab oladigan uzoq muddatli taraqqiyot masalasi sifatida ko‘rish zarurligini ta’kidladi.
Shuningdek, demografik ma’lumotlar va tahliliy prognozlar asosida qarorlar qabul qilish hamda inson kapitali va ijtimoiy xizmatlarga investitsiyalarni kuchaytirish bo‘yicha xalqaro hamkorlikni rivojlantirish masalalari muhokama qilindi.
Muloqotda aholining farovonligini oshirish va demografik jarayonlarni samarali boshqarishda ma’lumotlar hamda prognozlarning ahamiyatiga e’tibor qaratildi.
Prezident administratsiyasi rahbari Saida Mirziyoyeva Nyu-Yorkda «BlackRock» rahbariyati bilan uchrashdi.
Unda kompaniya prezidenti Robert Kapito, vitse-rais Tomas Donilon, «Global Infrastructure Partners» raisi va bosh ijrochi direktori Adebayo Ogunlesi, Moliyaviy va strategik investorlar guruhi global rahbari hamda kompaniyaning Yaqin Sharq mintaqasi bo‘yicha rahbari Charlz Hatami qatnashdi.
Muloqot davomida 2027-yilda Toshkent xalqaro moliya markazi faoliyatini yo‘lga qo‘yish masalasini muhokama qilindi. «BlackRock» ushbu Markaz konsepsiyasi va tuzilmasini ishlab chiqishda ko‘maklashmoqda.
AQSh ishbilarmon doiralari vakillari ishtirokidagi qo‘shma davra suhbatida O‘zbekiston hamda mintaqamizning yaqin o‘n yilliklarga mo‘ljallangan rivojlanish istiqbollari yuzasidan fikr almashildi.
O‘zbekiston yirik, samarali, sifatli sarmoyalar uchun yangi imkoniyatlar maydoniga aylanmoqda, dedi Saida Mirziyoyeva.
Mudofaa vaziriga ikki o‘rinbosar tayinlandi. Bu haqda vazirlik matbuot xizmati xabar berdi.
Jumladan, Prezidentning tegishli qaroriga muvofiq, polkovnik Zoidov Qahramonjon Obidjonovich O‘zbekiston mudofaa vazirining qurollanish va qurollantirish bo‘yicha o‘rinbosari lavozimiga tayinlandi.
Adliya polkovnigi Muratov Jahongir Dilshatovich vazirning komplayens va korrupsiyaga qarshi ichki nazorat bo‘yicha o‘rinbosari lavozimiga tayinlandi.
Prezident Shavkat Mirziyoyev Andijon viloyatiga tashrif buyuradi.
Ikki kunlik safar dasturidan hududning sanoat va investitsiya salohiyati, energetika, qishloq xo‘jaligi, transport, turizm va boshqa sohalardagi loyihalar bilan tanishish o‘rin olgan. Davlatimiz rahbari mahallalardagi bunyodkorlik ishlarini ham ko‘zdan kechiradi. Qator yangi quvvatlarni ishga tushirish va istiqbolli loyihalar qurilishini boshlash ko‘zda tutilgan.
Shuningdek, Andijon viloyatini yanada rivojlantirishning ustuvor yo‘nalishlari muhokamasiga bag‘ishlangan yig‘ilish bo‘lib o‘tadi.
