Siyosat
Turkiya va O‘zbekiston o‘rtasida turizm sohasida hamkorlik memorandumi imzolandi
Turkiya Madaniyat va turizm vazirligi Opera binosida Madaniyat va turizm vaziri Mehmet Nuri Ersoy hamda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimovning uchrashuvi bo‘lib o‘tdi. Uchrashuv yakunida «Turkiya Respublikasi Madaniyat va turizm vazirligi bilan O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi o‘rtasida turizm sohasidagi Kelishuv bayonnonmasi va Harakatlar rejasi»ni imzolash marosimi bo‘lib o‘tdi va unga ko‘ra ikki davlat o‘rtasidagi avia reyslar sonini oshirish va sayyohlar sonini 1 million kishiga yetkazish ko‘zda tutilgan.
«O‘zbekiston tarixiy va madaniy boyliklari bilan dunyoning eng muhim turizm yo‘nalishlaridan biridir. Samarqand, Buxoro va Xiva kabi betakror shaharlar nafaqat Markaziy Osiyo, balki butun dunyo madaniy merosida muhim o‘rin tutadi. Bundan tashqari, o‘zbek taomlari, an’anaviy hunarmandchilik va sayyohlik sohasidagi noyob tajribalari O‘zbekistonning turizm sohasidagi o‘rnini yanada mustahkamlamoqda», – dedi Mehmet Nuri Ersoy.
Mehmet Nuri Ersoy o‘tgan yilning iyun oyida bo‘lib o‘tgan Oliy darajadagi strategik hamkorlik kengashi munosabati bilan turizm sohasidagi mushtarak maqsadlarni ilgari surgan «Kelishuv bayonnomasi»ni imzolaganliklarini ta’kidlab, ikki davlat o‘rtasida turizm sohasida hamkorlikni oshirish va qo‘shma loyihalar ishlab chiqishga ustuvor ahamiyat berganliklarini qayd etdi.
«Ikki davlat o‘rtasidagi aviaqatnovlar sezilarli darajada oshib bormoqda»
Mehmet Nuri Ersoyga ko‘ra, ikki davlatda ham turizm sohasida hamkorlikni kengaytirish uchun ko‘plab imkoniyatlar mavjud va ikki davlat o‘rtasida turizm hamda madaniyat sohalaridagi hamkorlik hozirda eng yuqori darajada davom etmoqda.
«Turkiyaning turizm sohasidagi rivojini diqqat bilan kuzatib boramiz»
O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov Turkiya va O‘zbekiston o‘rtasidagi qardoshlik aloqalari azaldan bo‘lganini, turizm ikki davlatning mushtarak jihatlaridan biri ekanini ta’kidladi.
Aziz Abduhakimov o‘z nutqida Turkiyaning turizm nuqtai nazaridan nodir va go‘zal o‘lka ekanligini, uning turizm sohasidagi rivojini yaqindan kuzatib borayotganliklarini tilga oldi va bu holatning O‘zbekiston turizmiga ham hissa qo‘shishiga umid bildirdi.
Kelishuv bayonnomasi va Harakat rejasiga ko‘ra quyidagi takliflar ilgari surildi:
— Turizm maskanlarini bog‘laydigan aviaqatnovlarni ko‘paytirish;
— O‘zbekistonda Turkiyaning va Turkiyada O‘zbekistonning turizm salohiyatini yanada kengroq targ‘ib qilish;
— Moturidiy, Naqshbandiy va Buxoriy tariqatlari izdoshlarining Turkiya markaziy va sharqiy provinsiyalarida istiqomat qiladigan yirik jamoalarini (umumiy 3 mln atrofida) O‘zbekistonga kengroq jalb etish, muzeylar o‘rtasida hamkorlikni kengaytirish, madaniy tadbirlarni ko‘paytirish;
— «Turk qardoshlar» dasturini amalga oshirish, davlatlarimiz tarixini o‘zaro chuqurroq o‘rganish, hamkorlikda kino asarlari yaratish;
— O‘zbekistonda jadal rivojlanib borayotgan turizm yo‘nalishlari – ekoturizm, ekstremal turizm, ziyorat turizmiga bag‘ishlangan tematik ko‘rgazmalar, foto-ko‘rgazmalar tashkil qilish;
— Turkiyalik sayyohlarning Buxorodagi 7 ta Pir ziyoratgohlariga sayohatlarini yo‘lga qo‘yish;
— Turkiya muzeylarida O‘zbekiston muzey eksponatlari burchaklarini yaratish;
— Turkiyaning yirik san’at dargohlari, park va bog‘larida O‘zbekiston tomonidan YuNESKO nomoddiy madaniy meros ro‘yxatiga kiritilgan baxshichilik, maqom san’ati va lazgi raqsi namoyishlari, madaniy festivallar va «open-air» tadbirlarini o‘tkazish;
— turkiyaliklar uchun, ularning talab va istaklariga mos turistik mahsulotlar yaratish maqsadida turoperatorlar, restoratorlar, turizm infrastrukturasiga sarmoya kiritadigan kompaniyalarni O‘zbekistonga jalb qilish;
— aeroportlarda, mehmonxona, kafe va restoranlarda turk tilida ko‘rsatkich belgilarini o‘rnatish, menyular yaratish, turk turistlariga moslashtirilgan (tailor-made) marshrut, ekskursiya va turlar hamda davlatlar kulinariyasini birlashtirgan restoranlar tashkil qilish;
— Turizmning turli sohalari bo‘yicha o‘zaro tajriba almashish.
«Biz bu masalalarda hamkorlik qilishga kelishib oldik. Ayni paytda O‘zbekistondan Turkiyaga 250 mingdan ortiq, Turkiyadan O‘zbekistonga 150 mingdan ortiq sayyoh kelmoqda. Bu bizning imkoniyatimiz qanchalik yuqori ekanligini va uni qanday oshirish mumkinligini ko‘rsatadi. Bundan kelib chiqib, Turkiyadan O‘zbekistonga 1 million kishi, O‘zbekistondan esa 1 million kishi Turkiyaga tashrif buyurishini maqsad qilgan holda ish olib borishga ham kelishib oldik. Bu raqamlarga erishsak, madaniy birligimizni ham mustahkamlagan bo‘lamiz», deya o‘z nutqini yakunladi A.Abduhakimov.
O‘z navbatida Mehmet Nuri Ersoy O‘zbekiston tomonidan bildirilgan barcha tashabbuslarni qo‘llab-quvvatlanishini bildirdi. Ma’ruzalardan so‘ng ikki vazir Kelishuv bayonnomasi va Harakat rejasini imzoladi.
O‘zbekiston Respublikasi Prezidenti Shavkat Mirziyoyev poytaxtimizda to‘xtab o‘tgan Malayziya Bosh vaziri Anvar Ibrohim bilan uchrashuv o‘tkazdi.
Samimiy muloqotda ikki tomonlama munosabatlarni rivojlantirish, ularni amaliy mazmun bilan boyitish masalalari atroflicha muhokama qilindi.
Oliy darajadagi o‘zaro tashriflar natijasida mamlakatlarimiz hamkorligi mutlaqo yangi bosqichga ko‘tarildi. Xususan, yil boshidan buyon tovar ayirboshlash hajmi 15 foizga o‘sdi, qo‘shma korxonalar soni esa 50 taga yetdi. Turli darajalarda faol muloqotlar davom etmoqda.
Davlatimiz rahbari ayni kunlarda O‘zbekistonda bo‘lib turgan Malayziyaning “Petronas” korporatsiyasi delegatsiyasi bilan muzokaralarning ahamiyatiga to‘xtalib, iqtisodiyotning turli tarmoqlarida strategik loyihalarni amalga oshirishni jadallashtirish zarurligini qayd etdi.
Jumladan, neft-kimyo, yuqori texnologiyalar, qishloq xo‘jaligi, mashinasozlik, farmatsevtika va boshqa ustuvor sohalardagi loyihalarni ilgari surishga e’tibor qaratildi.
Muloqot davomida islom moliyasi, hududlararo aloqalar, ziyorat turizmi, to‘g‘ridan-to‘g‘ri aviaqatnovlar sonini oshirish hamda madaniyat almashinuvlari yo‘nalishlaridagi hamkorlik istiqbollariga ham to‘xtalib o‘tildi.
Xalqaro va mintaqaviy kun tartibi yuzasidan ham fikr almashildi.
Uchrashuv yakunida O‘zbekiston Prezidenti Shavkat Mirziyoyev Malayziya Bosh vaziri Anvar Ibrohimni O‘zbekistonga alohida tashrif bilan kelishga taklif qildi
Toshkent xalqaro investitsiya forumi nafaqat global iqtisodiy muloqotlar maydoni, balki istiqbolli shartnomalar pishib yetiladigan yirik amaliy platformaga aylandi. Anjumanning markaziy va eng kutiladigan voqealaridan biri sifatida, «CAEx» ko‘rgazma majmuasida O‘zbekiston Respublikasining investitsiyaviy, sanoat va eksport salohiyatini namoyish etishga qaratilgan keng ko‘lamli xalqaro ko‘rgazma o‘z ish faoliyatini boshladi.
Qarib 6 ming kvadrat metrlik ulkan maydonni qamrab olgan ko‘rgazmada mamlakatimiz iqtisodiyotining yetakchi tarmoqlari, davlat idoralari va yirik ishlab chiqarish birlashmalari o‘zlarining eng zamonaviy texnologiyalari va tayyor loyiha paketlari bilan ishtirok etmoqda.
Ko‘rgazma pavilonlaridan joy olgan neft-gaz-kimyo, mashinasozlik, metallurgiya, elektrotexnika, qurilish materiallari, farmatsevtika hamda oziq-ovqat sanoati korxonalari O‘zbekistonda ishlab chiqarish modellari to‘liq transformatsiya bo‘lganini namoyish etmoqda.
Bugungi kunda asosiy urg‘u xomashyo eksportiga emas, balki yuqori qo‘shilgan qiymatga ega mahsulotlarni mahalliylashtirish, yangi texnik ish o‘rinlarini yaratish va global bozorlarga raqobatbardosh tovarlar bilan chiqishga qaratilgani xalqaro ekspertlar tomonidan alohida e’tirof etilmoqda.
Bu yilgi ko‘rgazma shunchaki mahsulotlar namoyishidan iborat bo‘lmay, balki biznes vakillari, xalqaro moliyaviy institutlar hamda davlat organlari o‘rtasida to‘g‘ridan-to‘g‘ri aloqalarni o‘rnatuvchi jonli «B2B» va «G2B» muloqot maydoniga aylandi.
Forum doirasida rejalashtirilgan panel muhokamalari, tarmoq va hududiy taqdimotlar hamda pitch-sessiyalar xorijlik hamkorlarga O‘zbekistonning investitsiya muhitini ichkaridan turib, aniq raqamlar va amaliy natijalar misolida baholash imkonini bermoqda.
Dunyoning 100 dan ortiq mamlakatidan 9 mingdan ziyod yuqori martabali delegat, xalqaro tashkilotlar rahbarlari va global investorlar jam bo‘lgan TXIF-2026 doirasidagi ushbu ko‘rgazma, shubhasiz, O‘zbekistonning Markaziy Osiyodagi bosh iqtisodiy va texnologik xab maqomini uzil-kesil mustahkamlaydi.
Ko‘rgazma davomida bo‘lib o‘tadigan qizg‘in muzokaralar yakunida mamlakatimiz sanoatini yangi bosqichga olib chiquvchi ko‘p milliardlik yirik qo‘shma loyihalar va strategik shartnomalar imzolanishi kutilmoqda.
O‘zbekiston Prezidenti Shavkat Mirziyoyev Xitoy Xalq Respublikasi Raisi Si Szinpinga tavallud kuni munosabati bilan tabrik maktubi yo‘lladi.
Davlat rahbari o‘z maktubida Si Szinpinni Xitoy va Xitoy Kommunistik partiyasining yirik siyosiy arbobi sifatida e’tirof etib, uning rahbarligi ostida mamlakat modernizatsiyasi izchil davom etayotganini ta’kidladi.
«Sizning oqilona rahbarligingiz ostida Xitoy modernizatsiyasi izchil davom etmoqda, millatning buyuk tiklanishi va yuksalishiga qaratilgan siyosatingiz mamlakatingiz tarixiga yorqin sahifa sifatida yozilmoqda», – deyiladi tabrikda.
Maktubda O‘zbekiston va Xitoy o‘rtasidagi munosabatlar so‘nggi yillarda yangi bosqichga ko‘tarilgani, do‘stlik, o‘zaro ishonch va har tomonlama strategik sheriklik izchil mustahkamlanayotgani qayd etilgan.
Prezident Mirziyoyev, shuningdek, Yangi O‘zbekistonda amalga oshirilayotgan islohotlarda Xitoyning doimiy qo‘llab-quvvatlovi muhim ahamiyat kasb etayotganini ta’kidladi.
Tabrik yakunida davlat rahbari Si Szinpinga mustahkam sog‘liq, baxt-saodat va davlatchilik faoliyatida yangi muvaffaqiyatlar, Xitoy xalqiga esa tinchlik va farovonlik tiladi.
«Uzbekistan Airways» aksiyadorlik jamiyatini transformatsiya qilish va xalqaro IPO‘ga tayyorlash ishlarini jadallashtirish masalasi Prezident Shavkat Mirziyoyevga taqdim etildi. Bu haqda Prezident matbuot xizmati xabar berdi.
Qayd etilishicha, bu jarayonda Milliy investitsiya jamg‘armasi tashkil etilgani va uning boshqaruviga «Franklin Templeton» kompaniyasi jalb qilingani muhim qadam sifatida qayd etildi. O‘tgan oyda jamg‘arma ilk bor xalqaro bozorda 690 million dollarlik aktivlarni joylashtirdi. Bu jarayonda investorlardan qariyb 3 milliard dollarlik buyurtmalar kelib tushgani O‘zbekiston aktivlariga qiziqish yuqori ekanini ko‘rsatdi.
Endi jamg‘arma portfelidagi 13 ta yirik korxonani IPO‘ga tayyorlash vazifasi turibdi. Ular qatorida «Uzbekistan Airways», «O‘zsanoatqurilishbank», «O‘zbekgidroenergo», «O‘zbekiston milliy elektr tarmoqlari» va «O‘zbektelekom» ham bor.
«Franklin Templeton» mutaxassislari milliy aviakompaniya faoliyatini tahlil qilib, 115 ta chora-tadbirdan iborat transformatsiya dasturini ishlab chiqqan. Hisob-kitoblarga ko‘ra, mazkur dastur to‘liq amalga oshirilsa, kompaniyaning operatsion daromadlari bir yilda 120 million dollarga oshishi mumkin.
Dasturda marshrutlarni optimallashtirish, to‘g‘ridan to‘g‘ri sotuvlarni kengaytirish, mijozlar bilan ishlash tizimini yaxshilash, parvozlar samaradorligini oshirish va xizmat ko‘rsatuvchi tarmoq korxonalar faoliyatini rivojlantirish kabi yo‘nalishlar nazarda tutilgan.
Shuningdek, aviakompaniyaning bozor qiymatini hozirgi 1,6 milliard dollardan 2,3 milliard dollargacha oshirish imkoniyati mavjudligi qayd etildi. Biroq taqdimotda dastur ijrosi hozircha kutilgan sur’atda kechmayotgani ham tanqid qilindi.
Prezident kompaniyani xalqaro kapital bozoriga olib chiqish uchun boshqaruv sifatini oshirish, moliyaviy intizomni kuchaytirish, xalqaro standartlar asosida hisobot yuritish va kredit reytingini yaxshilash zarurligini ta’kidladi.
Yil yakuniga qadar «Uzbekistan Airways» aksiyalarining 15–20 foizini xalqaro IPO orqali sotish rejalashtirilgan. Buning uchun kompaniyaning investitsion jozibadorligini oshirish, aktivlarni qayta ko‘rib chiqish va davlat buyurtmalari bo‘yicha xarajatlarni qoplash mexanizmlarini joriy etish belgilandi.
Shu bilan birga, mamlakatga kelayotgan turistlar soni tez sur’atlarda ortib borayotgani qayd etildi. Yil boshidan buyon O‘zbekistonga tashrif buyurgan sayyohlar soni 27,5 foizga o‘sib, qariyb 5,5 million nafarga yetgan. Shu munosabat bilan samolyotlar parkini kengaytirish va Toshkentni Markaziy Osiyoning yirik aviahabiga aylantirish bo‘yicha qo‘shimcha vazifalar belgilandi.
Siyosat
O‘zbekiston va Albaniya yashil energiya, savdo va turizm bo‘yicha qo‘shma dasturlarni belgilab beradi
Poytaxtimizdagi Ko‘ksaroy saroyida Prezident Shavkat Mirziyoyev va Prezident Bayram Begay boshchiligidagi rasmiy delegatsiyaning keng ko‘lamli muzokaralari bo‘lib o‘tdi. Oliy darajadagi uchrashuvda iqtisodiy, savdo va logistika sohasidagi hamkorlikni kengaytirishning amaliy asoslarini yaratish masalalari muhokama qilindi.
Foto: Prezident matbuot xizmati
Prezident Mirziyoyev tarixda ilk bor o‘tkazilayotgan mazkur ikki tomonlama sammit O‘zbekiston bilan Albaniya o‘rtasidagi aloqalarni samarali yangi bosqichga ko‘tarishda muhim bosqich ekanini ta’kidladi. Ikki davlat yetakchilari siyosiy muloqot va ko‘p darajali aloqalarning mustahkamlanishini olqishladilar hamda Birlashgan Millatlar Tashkiloti va boshqa yirik xalqaro tashkilotlar doirasidagi o‘zaro yordamni ta’kidladilar.
Tovar ayirboshlash hajmini sezilarli darajada oshirish hamda keng va uzoq muddatli hamkorlik dasturini ishlab chiqish muzokaralarning asosiy mavzulari bo’ldi. Birgalikda rivojlantirish rejalashtirilgan asosiy yo‘nalishlar qatoriga qishloq xo‘jaligi majmualari, yashil energiya, geologiya-qidiruv, axborot texnologiyalari, raqamlashtirish va turizm kiradi.
Logistika va transport yo’nalishlari ham muhim masalalar sifatida maydonga chiqdi. Delegatsiyalar Albaniyaning Durres portidan transport va logistika markazi sifatida foydalanishning strategik maqsadga muvofiqligini tahlil qilishga kelishib oldilar. Bu yoʻnalish Oʻzbekistonning ishlab chiqarish va qishloq xoʻjaligi mahsulotlari eksportini Oʻrtayer dengizi va janubiy Yevropaning keng bozorlariga toʻgʻridan-toʻgʻri chiqish imkonini beradi.
Ikki davlat rahbarlari savdo aloqalarini kengaytirish kuchli institutsional poydevor talab qilishini tan olib, sarmoya va savdo uchun huquqiy asoslarni mustahkamlash muhimligini ta’kidladilar. Ushbu sa’y-harakatlarni ilgari surish uchun har ikki tomon yangi hukumatlararo komissiya tuzishga kelishib oldi. Komissiyaning birinchi yig‘ilishi joriy yil oxirigacha Toshkentda o‘tkazilishi rejalashtirilgan.
Madaniy-gumanitar sohada yetakchilar oʻzaro madaniy almashinuv orqali xalqni kengroq jalb etish tarafdori boʻldi. Taklif etilayotgan tashabbuslar qatoriga muqobil madaniyat kunlari, milliy filmlar namoyishi, badiiy ko‘rgazmalar va teatr gastrollari o‘tkazish kiradi. Ikki davlat prezidentlari bugungi kundagi mintaqaviy va xalqaro siyosiy manzarani shakllantirayotgan dolzarb masalalar yuzasidan fikr almashish orqali sessiyani yakunladilar.
Soliq oliy maktabida bakalavriat va magistratura yo‘nalishlari ochiladi
Kolumbiya va Portugaliyaga qarshi ehtiyotkorlik bilan o‘ynaymiz – Kannavaro
FVB tizimiga ishga kiritishni va’da qilgan shaxs ushlandi
-
Siyosat2 days ago
«Ushbu masalani shaxsan nazoratimga oldim» — Saida Mirziyoyeva giyohvandlikka qarshi kurash haqida
-
Jamiyat3 days agoO‘zbekistonda qaysi fintex ilovalardan ko‘p foydalanilmoqda?
-
Mahalliy3 days ago
my.gov.uz — 35 yilda odamlarning vaqtini qaytarib berdi!
-
Jamiyat3 days agoFarg‘onada “Lasetti” qarama-qarshi yo‘nalishga chiqib ketishi oqibatida ikki kishi halok bo‘ldi
-
Sport4 days agoJCh-2026. Osiyoning ikki jamoasi Yevropa vakillariga qarshi maydonga tushadi
-
Mahalliy3 days ago
Quyoshda turgan suvning ta’mi emas, tarkibi o‘zgaradi… bu esa juda xavfli
-
Jamiyat2 days agoToshkentda renovatsiyaning birinchi bosqichi boshlandi
-
Sport2 days agoDik Advokat jahon chempionatlari tarixidagi eng yoshi ulug‘ murabbiyga aylandi