2025-2026 o‘quv yili boshida O‘zbekistondagi oliy ta’lim tashkilotlarida 1 million 535 ming nafar talaba tahsil olmoqda. Hududlar kesimida eng ko‘p talabalar Toshkent shahri hissasiga to‘g‘ri keladi.

Milliy statistika qo‘mitasi ma’lumotlariga ko‘ra, 2025-2026 o‘quv yili boshida respublikadagi oliy ta’lim tashkilotlarida tahsil olayotgan talabalar soni 1 million 535 ming nafarni tashkil etgan.

Shundan 1 million 478,7 ming nafari bakalavriat, 56,3 ming nafari esa magistratura bosqichida tahsil olmoqda.

Hududlar kesimida eng ko‘p talabalar Toshkent shahrida qayd etilgan bo‘lib, ularning soni 579,3 ming nafarni tashkil etadi.

Undan keyingi o‘rinlarda Buxoro viloyati (117,7 ming nafar), Qashqadaryo viloyati (111,6 ming nafar), Toshkent viloyati (101,5 ming nafar), Farg‘ona viloyati (98,9 ming nafar) va Samarqand viloyati (93,9 ming nafar) joylashgan.

Shuningdek, Surxondaryo viloyatida 76,2 ming, Qoraqalpog‘iston Respublikasida 73,7 ming, Xorazm viloyatida 65,9 ming, Andijon viloyatida 65,7 ming, Namangan viloyatida 52,5 ming, Navoiy viloyatida 42,5 ming, Jizzax viloyatida 32,4 ming va Sirdaryo viloyatida 23,2 ming talaba tahsil olmoqda.

Source link

Serbiyada og‘ir moddiy ahvolga tushib qolgan O‘zbekiston fuqarosiga yurtga qaytishi uchun bepul aviachipta olib berildi. Amaliy yordam O‘zbekistonning Budapeshtdagi elchixonasi ko‘magida tashkil etildi.

«Dunyo» axborot agentligi ma’lum qilishicha, O‘zbekistonning Budapeshtdagi elchixonasi Konsullik bo‘limiga Serbiyada bo‘lib turgan fuqaro M.B. vatanga qaytishda yordam so‘rab murojaat qilgan.

Aniqlanishicha, fuqaroning og‘ir ahvolga tushib qolishiga Serbiyadagi ish beruvchi tomonidan mehnat shartlari va erishilgan kelishuvlarga amal qilinmagani sabab bo‘lgan. Buning oqibatida u moddiy qiyinchilikka duch kelib, O‘zbekistonga mustaqil ravishda qaytish imkoniyatini yo‘qotgan.

Elchixona tomonidan ko‘rilgan choralar va o‘zaro kelishuvlar natijasida O‘zbekiston fuqarolarini qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan vatandoshga bepul aviachipta rasmiylashtirib berilgan.

Qayd etilishicha, O‘zbekistonning xorijdagi diplomatik vakolatxonalari va konsullik muassasalari chet elda bo‘lib turgan fuqarolarning huquq va qonuniy manfaatlarini himoya qilish, shuningdek, zarur huquqiy va amaliy yordam ko‘rsatish ishlarini izchil davom ettirmoqda.

Source link

Farzandini davlat maktabgacha ta’lim tashkilotiga imtiyozli navbat asosida joylashtirish huquqiga ega oilalar endi barcha jarayonni my.gov.uz portali orqali onlayn amalga oshirishi mumkin. Tizim imtiyoz huquqini davlat idoralari axborot bazalari orqali avtomatik tekshiradi.

Yangi tartibga ko‘ra, davlat bog‘chasiga imtiyozli navbatga qo‘yish uchun endi turli idoralarga borish yoki hujjatlar to‘plash talab etilmaydi.

Ariza beruvchi my.gov.uz portali yoki uning mobil ilovasi orqali ro‘yxatdan o‘tib, «Bolani davlat maktabgacha ta’lim tashkilotlariga qabul qilish» xizmatini tanlashi hamda o‘ziga tegishli imtiyoz toifasini ko‘rsatishi kifoya.

Shundan so‘ng tizim ma’lumotlarni tegishli vazirlik va idoralarning axborot bazalari orqali avtomatik ravishda tekshirib, imtiyoz huquqini tasdiqlaydi.

Onlayn xizmatdan shartnoma bo‘yicha harbiy xizmatchilar, ichki ishlar va bojxona organlari xodimlarining farzandlari, I va II guruh nogironligi bo‘lgan shaxslarning bolalari, yetim va ota-ona qaramog‘idan mahrum bo‘lgan bolalar, «Ayollar daftari»ga kiritilgan yolg‘iz ayollarning farzandlari, kam ta’minlangan va ko‘p bolali oilalarning bolalari, talabalar hamda ta’lim muassasalari pedagoglarining farzandlari va qonunchilikda belgilangan boshqa imtiyozli toifalar foydalanishi mumkin.

Ariza yuborish uchun fuqaro my.gov.uz portali yoki mobil ilovasiga kirib, xizmatni tanlaydi, zarur ma’lumotlarni to‘ldiradi, davlat bog‘chasini hamda mavjud imtiyoz turini ko‘rsatgan holda arizani elektron shaklda yuborishi mumkin.

Source link

Farg‘ona viloyatida huquqni muhofaza qiluvchi organlar tomonidan qariyb 6 kilogramm «gashish» giyohvandlik vositasi musodara qilindi. Tergov doirasida ushbu holatga aloqador boshqa shaxslarni aniqlash choralari ko‘rilmoqda.

Respublika miqyosida o‘tkazilayotgan «Xavfsiz va sog‘lom yurt» tezkor-profilaktik tadbiri doirasida Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan giyohvandlik vositalarining noqonuniy aylanmasiga chek qo‘yildi.

Ma’lum qilinishicha, DXX xodimlari viloyat Ichki ishlar va Bojxona boshqarmalari xodimlari bilan hamkorlikda o‘tkazgan tezkor tadbir davomida Farg‘ona shahri Beshbola mahallasida yashovchi, 1982 yilda tug‘ilgan ayol kelgusida sotish maqsadida 5 kilogramm 936 gramm «gashish» moddasini shag‘al uyumi ichiga yashirib qo‘ygani aniqlangan. Giyohvandlik vositasi ashyoviy dalil sifatida olingan.

Qayd etilishicha, mazkur ayol muqaddam ham giyohvandlik vositalari bilan bog‘liq jinoyat uchun sudlangan bo‘lib, shunga qaramay yana qonunbuzarlikka qo‘l urgan.

Hozirda unga nisbatan Jinoyat kodeksining 25-moddasi va 273-moddasi 5-qismi «a» bandi bilan jinoyat ishi qo‘zg‘atilgan. Tergov harakatlari davom etmoqda hamda ushbu jinoyatga aloqador bo‘lishi mumkin bo‘lgan sheriklarni aniqlash bo‘yicha chora-tadbirlar amalga oshirilmoqda.

Source link

Qashqadaryo viloyatida davlat mehnat huquq inspektori fuqaroni ishga joylashtirishni va’da qilib, 800 AQSh dollarini firibgarlik yo‘li bilan olgani aniqlandi. Unga nisbatan jinoyat ishi qo‘zg‘atilib, tergov harakatlari olib borilmoqda.

Bosh prokuratura huzuridagi departamentning Qarshi tumani bo‘limi tomonidan o‘tkazilgan tergovga qadar tekshiruvda Qashqadaryo viloyati Kambag‘allikni qisqartirish va bandlik boshqarmasining davlat mehnat huquq inspektori A.H. muqaddam sudlangani holda firibgarlik sodir etgani ma’lum bo‘ldi.

Tekshiruv davomida aniqlanishicha, u o‘zining yuqori lavozimlarda ishlovchi tanishlari orqali fuqaro N.H.ni Qarshi shahridagi Respublika ixtisoslashtirilgan Ona va bola salomatligi ilmiy-amaliy tibbiyot markazi hududiy filialiga orastabon lavozimiga ishga kiritib qo‘yishni va’da qilgan.

Buning evaziga inspektor fuqarodan 800 AQSh dollarini olgan. Tergov jarayonida ushbu mablag‘ning 200 AQSh dollari hamda 3,3 million so‘mi qaytarilib, bu holat protsessual tartibda rasmiylashtirilgan.

Mazkur holat yuzasidan Jinoyat kodeksining 168-moddasi (firibgarlik) hamda 28, 211-moddalari (pora berish jinoyatiga ishtirokchilik) bilan jinoyat ishi qo‘zg‘atilgan. Ayni paytda ish bo‘yicha tergov harakatlari davom etmoqda.

Source link