Samarqand shahrining Shohrux ko‘chasida 2018 yilda boshlangan ko‘p qavatli uy qurilishi orqali ko‘plab insonlarga boshpana va’da qilingandi. Hududdagi xonadon egalari esa issiq joyidan ko‘chirilgandi. Oradan sakkiz yil o‘tib ham uylar bitmadi, quruvchi qamaldi. Mijozlar ham, ular to‘lagan pullar ham qadrsizlanishda davom etmoqda.

Kun.uz surishtiruvi shuni ko‘rsatdiki, ushbu chala qolgan loyiha “muammoli uy” deb malakalangan. Hozircha bu muammoning yechimi yoki aniq reja bo‘yicha ma’lumot bera oladigan mas’ulning o‘zi yo‘q.

Qurilish boshlangan paytda hududdagi 20 ga yaqin xonadon egalari turli shartlar asosida quruvchi – “JAHON KAFOLAT STIL” xususiy korxonasi bilan kelishuvga erishgan. Kimdir uyini sotgan, boshqalar yangi uy olish sharti bilan ijaraga chiqqan, yana bir qismi esa yillar davomida jamg‘argan mablag‘ini yangi kvartira uchun to‘lagan. Bugun esa ularning aksariyati og‘ir ijtimoiy va moliyaviy ahvolga tushib qolgan.

Mijozlardan biri Asror Turdiyevning aytishicha, 2018 yilda quruvchi korxona rahbari hokimlik qarori bilan kelib, ikki yil ichida uylarni bitkazib berishni va’da qilgan. Ammo bu muddat avval cho‘zilgan, keyin esa qurilish butunlay to‘xtab qolgan. Hozirgacha u oilasi, nabiralari bilan ijarada yashashga majbur bo‘lmoqda.

Hovlisini quruvchiga berib, o‘rniga yangi uy olish bo‘yicha kelishganlar ko‘pchilik. Mavjuda Ro‘ziqulovaning to‘rtta kadastrli xonadoni bo‘lgan. U uchtasini yangi uyga almashtirishga, bittasini esa kompensatsiyasini olishga kelishgan. O‘zi esa o‘sha vaqtda ijaraga chiqib ketgan.

“Bu vaqt ichida o‘zim kasallik orttirib oldim, 2023 yilda o‘g‘lim nobud bo‘ldi. U juda orzu qilardi yangi uyimizga ko‘chib kirishni. Hozir ahvolim ancha og‘ir, shu sababli ijaradan chiqishga majbur bo‘ldim. Shu yerdagi eski, buzilishdan qolgan garajimizni ta’mirlab kirib oldik. Farzandlarim, nabiralarim bilan shu sharoitda yashashga majbur bo‘lyapmiz”, dedi Mavjuda Ro‘ziqulova.

Umuman, bu yerdan uy olish istagida bo‘lganlarning barchasining o‘z hikoyasi bor. Kimdir xorijda ishlab topgan pulini “JAHON KAFOLAT STIL” xususiy korxonasi rahbariga naqd shaklda to‘lagan. Yana kimdir shahar chekkasidagi uyini sotgan, kimdir mashinalarini sotgan va yangi uy uchun to‘lov qilgan. Deyarli barcha mijozlar bugun moddiy-ijtimoiy tomondan jiddiy muammo bilan to‘qnash kelgan.

Shu hududda 35 yildan buyon yashab kelgan Radik Mo‘minovning qarori esa butunlay noodatiy. Otaxon ijarada yashashga sharoiti bo‘lmagani uchun chala qolgan ko‘p qavatli uyga ko‘chib kira qolgan. Faqat eshik-derazasi bor ushbu xonadonda yashayotgan oqsoqolning ahvoliga havas qilib bo‘lmaydi, albatta.

Samarqand viloyati hududiy qurilish va uy-joy kommunal xo‘jaligi vakili Bekzod Xo‘jayorovning aytishicha, ushbu uylarning qurilishi 2018 yilda boshlangan. Qurilish me’yorlariga amal qilinmagani sababli qurilish to‘xtatib qo‘yilgan. Quruvchining o‘zi esa ayni paytda qamoqqa olingan.

Xo‘jayorovga ko‘ra, bu hududdagi uylar qurilishi 11 metrdan oshmasligi qayd etilgan. 11 metrli ko‘p qavatli uylar odatda uch qavatdan oshmaydi. Quruvchi esa loyihadan tashqariga chiqqan, uyni to‘rt qavat qilib qurgan. Qolaversa, mijozlardan ham ko‘plab e’tirozlar, murojaatlar tushgan. Natijada Samarqand shahar hokimligi tomonidan sudga da’vo arizasi kiritilgan va quruvchining o‘zi hisobidan ortiqcha qavatni buzish bo‘yicha sud qarori qabul qilingan.

Inspeksiya vakili ayni paytda “JAHON KAFOLAT STIL” xususiy korxonasi rahbari qamalib qolgani sababli uning yaqinlari, jumladan, otasi bilan bog‘langanini aytmoqda. Biroq hujjatlarni rasmiylashtirish, masalani joyiga chiqib o‘rganish bo‘yicha qilingan takliflarni qabul qilmagan.

Samarqand shahar hokimligi bergan ma’lumotga ko‘ra, “JAHON KAFOLAT STIL” xususiy korxonasi tomonidan amalga oshirilgan ko‘p qavatli uylar qurilishi jarayonida bir qator jiddiy qonunbuzilishlar aniqlangan. Jumladan, qurilish ishlari tasdiqlangan loyiha hujjatlari va shaharsozlik normalariga zid ravishda olib borilgani, belgilanganidan ortiqcha qavatlar qurilgani, tegishli ruxsatnomalar va xulosalarsiz ishlar davom ettirilgani qayd etilgan. Shu sababli vakolatli idoralar tomonidan qurilish ishlari to‘xtatilgan. Hozirda mazkur obekt muammoli uylar ro‘yxatiga kiritilgan bo‘lib, holatni huquqiy jihatdan tartibga solish, kamchiliklarni bartaraf etish va loyihaning keyingi taqdirini hal qilish yuzasidan o‘rganish va yechim topish ishlari amalga oshirilmoqda.

Bu o‘rinda “masalaning yechimi bo‘yicha ishlar olib borilmoqda”, degan javobning o‘zi yetarli emas. Yechim aniq bo‘lishi kerak: hokimlik yoki viloyat darajasidagi biror mas’ul organ belgilanib, shu kabi obektlar bo‘yicha to‘liq reyestr e’lon qilinishi shart – kim qancha pul to‘lagan, qaysi kvartiraga da’vo qilyapti, barchasi ro‘yxatga olinishi lozim. Keyin esa ikki yo‘ldan biri tanlanadi: yo yangi investor kiritilib, qurilish aniq muddat bilan tugatiladi, yoki fuqarolarga keltirilgan zarar to‘liq hisoblanib, kompensatsiya to‘lab beriladi.

Kun.uz voqealar rivojini kuzatishda davom etadi.

Source link

Chirchiq shahrida o‘tkazilgan tezkor tadbirda yashirin iqtisodiyotga oid yirik jinoiy sxemaga chek qo‘yildi.

Ma’lum bo‘lishicha, jinoiy guruh 2025–2026-yillarda qalbaki hujjatlar rasmiylashtirib, go‘yoki 20 mlrd so‘mlik tovar aylanmasi mavjuddek ko‘rsatgan. Shu orqali budjetdan 2 mlrd so‘m QQSni noqonuniy qaytarib olish rejalashtirilgan.

Sxemaga ko‘ra:
— 18,6 mlrd so‘mlik soxta xizmat va tovarlar bo‘yicha 10 ta elektron hisob-faktura tuzilgan;
— soliq idoralaridagi tanishlar orqali QQS qaytarishga urinilgan;
— “xizmat” uchun 340 mln so‘m talab qilingan.

Tezkor tadbir davomida pul mablag‘lari olinayotgan vaqtda 4 nafar shaxs ushlandi. Ular pulni o‘zaro taqsimlab olishni rejalashtirgan.

Holat yuzasidan Jinoyat kodeksining tegishli moddalari bilan jinoyat ishi qo‘zg‘atildi. Tergov ishlari davom etmoqda.

Source link

Raqobat qo‘mitasiga ko‘ra, 2025-yil va 2026-yil yanvar-fevral oylarida ko‘p kvartirali uy-joy qurilishi bilan bog‘liq jami 2 057 ta murojaat kelib tushgan. Ularning asosiy qismi qurilish sifati, muddatlar va moliyaviy hisob-kitoblarga oid bo‘lgan.

2025-yil davomida 1 700 dan ortiq murojaatlar o‘rganilib, 708 holatda qurilish ishlari sifatsiz bajarilgani aniqlangan. Yana 693 holatda uylar shartnomada belgilangan muddatda topshirilmagan, 278 holatda esa ko‘rsatilmagan xizmat uchun haq olingan.

Qo‘mita tomonidan ko‘rilgan choralar natijasida 2025-yil va 2026-yil boshida jami murojaatlarning 1 529 tasi ijobiy hal etildi. Natijada qariyb 24,4 mlrd so‘m mablag‘ iste’molchilar foydasiga qayta hisob-kitob qilindi.

2026-yilning yanvar-fevral oylarida ham 350 dan ortiq murojaat kelib tushgan bo‘lib, fuqarolar asosan uylarning kechiktirilishi va sifat masalalaridan shikoyat qilgan.

Xususan, Surxondaryo viloyatida yashovchi fuqaro Toshkent shahrida qurilayotgan uydan xonadon xarid qilish uchun qariyb 1,4 mlrd so‘m to‘lagan. Biroq quruvchi tomonidan uy o‘z vaqtida topshirilmagan va qurilish sifatsiz amalga oshirilgan.

Mazkur holat Qo‘mita tomonidan o‘rganilib, fuqaroga to‘langan mablag‘ to‘liq qaytarilishi ta’minlangan.

Source link

7-aprel kuni Senat yalpi majlisida «Qo‘riqlash faoliyati takomillashtirilishi munosabati bilan ayrim qonun hujjatlariga o‘zgartish va qo‘shimchalar kiritish to‘g‘risida»gi Qonun ko‘rib chiqilib, senatorlar tomonidan ma’qullandi.

Qonunga ko‘ra, ayrim ma’muriy huquqbuzarliklarni ko‘rib chiqish vakolati Ichki ishlar vazirligi huzuridagi Qo‘riqlash departamenti xodimlariga beriladi. Jamoat joylarida tamaki mahsulotlarini iste’mol qilish, noqonuniy ov qilish va daraxt kesish kabi qoidabuzarliklar shular jumlasidandir.

Qonun doirasida Ma’muriy javobgarlik to‘g‘risidagi kodeks hamda bir qator sohaviy qonunlarga tegishli o‘zgartishlar kiritilmoqda.

Shuningdek, qo‘riqlashning texnik vositalarini loyihalash va ularga xizmat ko‘rsatish uchun ruxsatnoma berish vakolati Ichki ishlar vazirligiga o‘tkaziladi.

Source link

Unda maktabning yuzga yaqin birinchi sinf o‘quvchilari ishtirok etdi. Mazkur tadbir an’anaviy “Alifbe bayrami”dan farqli ravishda “Savodxonlik bayrami” shaklida tashkil etildi. Bu yondashuv o‘quvchilarning bir vaqtning o‘zida bir necha tilda savod chiqarish jarayonini ifodalaydi.

Maktabda o‘quvchilar boshlang‘ich sinfdanoq uch til: o‘zbek, rus va ingliz tillarida ta’lim oladi. Ular o‘qish va yozish bilan bir qatorda, ravon nutq, fikrni erkin ifodalash va muloqot qilish ko‘nikmalarini ham erta bosqichdan shakllantirib boradi.

Shu bilan birga, ta’lim jarayonida aniq fanlarga alohida e’tibor qaratilib, o‘quvchilarning matematika yo‘nalishidagi bilimlari tizimli ravishda rivojlantiriladi. Bu esa mantiqiy fikrlash va tahlil qilish ko‘nikmalarini mustahkamlashga xizmat qiladi.

Tadbir davomida o‘quvchilar uch tilda she’rlar o‘qib, qo‘shiqlar ijro etdi hamda sahna ko‘rinishlarida qatnashdi. Ota-onalar farzandlarining qisqa vaqt ichida erishgan natijalariga bevosita guvoh bo‘ldi.

Al-jabr xususiy maktabi rahbari Matluba Karaxodjayeva ta’kidlashicha, mazkur bayram maktabda uch tilli ta’lim tizimining amaliy natijasini namoyon etadi:

“Maktabimizda o‘quvchilar o‘zbek, rus va ingliz tillarida o‘qish, yozish va ravon muloqot qilish ko‘nikmalarini egallaydi. Shu bois an’anaviy alifbe bayrami o‘rniga savodxonlik bayrami o‘tkaziladi. Bugungi kunda birinchi sinf o‘quvchilari uch tilda bemalol o‘qib, fikrini ifoda eta oladi.”

Tadbir o‘quvchilarning sahnadagi erkinligi, o‘ziga bo‘lgan ishonchi va ta’lim jarayoniga muvaffaqiyatli moslashganini yaqqol namoyon etdi.

Telefon: +99855 500 8485

Ro‘yxatdan o‘tish uchun: forms.amocrm.ru/rwrcmtd

Instagram: instagram.com/al_jabruz/

Telegram: t.me/aljabrmaktabi

Reklama huquqi asosida

Source link