Namangan viloyati To‘raqo‘rg‘on tumanida yashovchi 75 yoshli Zohida Karimova nazariy va amaliy imtihonlarni birinchi urinishda muvaffaqiyatli topshirdi va shu yoshida haydovchilik guvohnomasiga ega bo‘ldi.

“Endi menda ham “prava” bor. Yaqinda yangi mashina sotib olmoqchiman”, – deydi onaxon xursandchiligini yashira olmay.

Zohida Karimova haydovchilik guvohnomasini olishga qachon qaror qilgani haqida aytib berdi:

“O‘tgan yili ish bilan Toshkentga bordim. Taksiga chiqay deb qo‘limni ko‘tarsam menga o‘xshagan yoshi ulug‘ ayol kelib to‘xtadi. Haydovchi ayol 86 yoshda ekan. Uning shu yoshda ham hech bir qiyinchiliklarsiz mashina boshqarganini ko‘rib havasim keldi. Men ham “prava” olaman deb niyat qildim o‘zimcha. Mana, niyatimga yetib turibman. To‘raqo‘rg‘on tumani Vatanparvar tashkilotida o‘qib bir urinishda “prava”li ham bo‘ldim.

Mana “prava”ni oldik. Reja “minimum” bajarildi, endi orzuning “maksimum”ini bajaramiz. Bu nima degani? Xudo xohlasa, yangi mashina olishni niyat qilib qo‘ydim, umid qilyapman. Har doim Allohim niyatlarimga yetkazgan, albatta bunga ham yetaman deb niyat qilaman, Allohdan so‘rayman.

Harakat qilsangiz, astoydil intilsangiz odam qilgan ish ekan, bo‘laverar ekan. Mana bir martada ham amaliy, ham nazariy imtihondan muvaffaqiyatli o‘tdim. Hamma hayron qolib, qoyil onaxon deyishyapti. Inson tirik ekan yashash kerak, bor imkoniyatlardan foydalanish kerak.

Bir urinishdayoq imtihondan o‘tganimni ko‘rgan “prava” ololmay yurgan bolalar hayron bo‘lishyapti. “Endi biz ham astoydil harakat qilamiz, siz olganda, biz ham “prava”olamiz” deb harakatga tushib qolishdi.

1969 yilda maktabni bitirib Namangan Davlat Universitetining Matematika fakultetiga o‘qishga kirganman. 38 yil maorif sohasida ishladim. Turmush o‘rtog‘im vafot etib ketganlar, ikki nafar farzandim bor. Agar turmush o‘rtog‘im bo‘lganlarida edi yonimdagi o‘rindiqqa o‘tqazib olib shahar aylantirib yurgan bo‘lar edim”, – deydi 75 yoshida haydovchilik guvohnomasi olgan Zohida Karimova.

Source link

Yangiqo‘rg‘on va To‘raqo‘rg‘on tumanlarida yashovchi shaxslar qalbaki 100 ming dollarni sotishga urinishgan. Tergovga qadar tekshiruv davomida qalbaki valutalar xorijda tayyorlanib, aylanma yo‘llar orqali O‘zbekistonga olib kelingani aniqlangan.

Namanganda qalbaki valuta savdogarlari qo‘lga olindi. Bu haqda Davlat xavfsizlik xizmati xabar berdi.

Ma’lum qilinishicha, Yangiqo‘rg‘on tumanida yashovchi 34 va 31 yoshli hamda To‘raqo‘rg‘onda istiqomat qiluvchi 46 yoshli fuqarolar qalbaki 100 ming dollarni haqiqiy 40 ming dollarga sotishni rejalashtirgan.

Ular qalbaki 80 ming dollarni 40 ming dollarga sotgan vaqtlarida DXX Toshkent va Namangan viloyatlari bo‘yicha boshqarmalari hamda departament xodimlari hamkorligida o‘tkazilgan tezkor tadbirda ushlangan. 

Tergovga qadar tekshiruv davomida ushbu soxta valutalar xorijda tayyorlanib, aylanma yo‘llar orqali O‘zbekistonga olib kelingani aniqlangan.  

Hozirda holat yuzasidan jinoyat ishi qo‘zg‘atilib, tergov harakatlari olib borilmoqda.

Avvalroq 120 ming dollarlik qalbaki pulni sotishga uringanlar qo‘lga olingandi.

Source link

Toshkent shahrining Chilonzor tumani hududidan o‘tuvchi Kichik halqa avtomobil yo‘lining bir qismida qurilish-montaj ishlari sababli transport vositalari harakati vaqtincha cheklanadi. Haydovchilarga harakat yo‘nalishlarini oldindan rejalashtirish tavsiya etildi.

Foto: Toshkent shahar YHTEM

Ma’lum qilinishicha, cheklovlar 2026 yil 19 iyun kuni soat 23:00 dan 22 iyun kuni soat 06:00 gacha amal qiladi.

Bu davrda Kichik halqa avtomobil yo‘lining Toshkent davlat pedagogika universiteti oldidan Dilxush 2-tor ko‘chasi kesishmasigacha bo‘lgan qismida transport harakati cheklanadi.

Mutasaddilarning bildirishicha, qurilish-montaj ishlari davomida mazkur yo‘nalish bo‘ylab harakatlanuvchi avtobuslar hamda boshqa transport vositalari uchun aylanma harakat sxemalari joriy etiladi. Qatnov maxsus belgilangan muqobil yo‘nalishlar orqali tashkil qilinadi.

Shu munosabat bilan haydovchilardan yo‘lda yuzaga kelishi mumkin bo‘lgan tirbandliklar va noqulayliklarni hisobga olgan holda safarlarini oldindan rejalashtirish so‘ralmoqda.

Mas’ul idoralar vaqtinchalik noqulayliklar uchun uzr so‘rab, barcha harakat ishtirokchilarini yo‘l belgilari va vaqtincha harakat sxemalariga qat’iy amal qilishga chaqirdi.

Source link

“Xavotir olmang, biz qonuniy va rasmiy kompaniyamiz” – O‘zbekistonda Seven jade nomi ostida yangi moliyaviy piramida paydo bo‘ldi. Seven jade xodimlari shu nomdagi MChJ va unga soliq qo‘mitasi tomonidan berilgan guvohnomani ko‘rsatgan holda odamlarni barchasi qonuniy ekaniga ishontirishmoqda. Uning tashkilotchisi Xitoy fuqarosi bo‘lishi mumkin.

“Bosh qarorgohimiz Gonkongda”

2026 yil 20 yanvar kuni “Seven jade manufacturing” MChJ davlat ro‘yxatidan o‘tkazilgan. Faoliyat turi ixtisoslashgan ulgurji savdo bo‘lgan MChJning yagona ta’sischisi Lin Nanzhou hisoblanadi.

MChJga soliq qo‘mitasi tomonidan QQS to‘lovchisi sifatida ro‘yxatdan o‘tganligi to‘g‘risida guvohnoma ham berilgan.

Ayni mana shu ikki hujjat Seven jade nomi ostidagi moliyaviy piramida tashkilotchilariga odamlarni go‘yoki faoliyatlari qonuniy ekaniga ishontirishda yetarli bo‘lmoqda.

O‘zbekiston uchun ishlab chiqilgan “biznes reja”da “Seven jade manufacturing” bosh qarorgohi Gonkongda joylashgan qayta ishlash korxonasi ekani aytiladi. Bu “biznes reja”ni sun’iy intellekt tayyorlaganini anglash qiyin emas.

Qolaversa, internetda Gonkongdagi ushbu kompaniya va Lin Nanzhou shaxsiga hech qanday ma’lumot yo‘q.

“Boy kelajakni birga quramiz”

Ko‘plab moliyaviy piramidalar kabi Seven jade ham odamlar qulog‘iga yoqadigan balandparvoz gaplar orqali maqsadni ulkan olmoqda.

Telegram’dagi rasmiy kanalida Seven jade xalqaro darajada zargarlik buyumlarini ishlab chiqarish va qayta ishlash bilan shug‘ullanuvchi kompaniya sifatida tanishtirilgan. Kompaniyaning savdo tarmog‘i butun dunyoga yoyilgani, O‘zbekistonda ham yangi zavodlar qurib, buyurtmalarni tez va sifatli yetkazib berishni ta’minlayotgani aytiladi.

Qayd etilishicha, kompaniya “uch tomon uchun foyda” modeli asosida ishlaydi: kompaniya ishlab chiqarishni kengaytiradi, chet el buyurtmalarini bajaradi va foydani oshiradi, xodimlar barqaror ish o‘rni hamda yaxshi daromadga ega bo‘lib, hayot sifatini yaxshilaydi, hamkorlar investitsiya va yordam orqali kompaniya o‘sishidan ulush oladi.

Hamkor bo‘lish uchun investitsiya kiritish zarurligi Seven jade aslida moliyaviy piramida ekanini anglatadi. Qolaversa, Seven jade’da boshqalarni taklif qilish orqali daromad olish va’dasi ham bor. Bu moliyaviy piramidalarning asosiy to‘rt ustunidan biri hisoblanadi.

Bundan tashqari, taklif qilingan odam sotib oladigan paketdan ham bonus va’da qilingan. Bu moliyaviy piramidaning navbatdagi ustuni.

Kunlik daromad va’dasi

Seven jade nomi bilan maxsus platforma tashkil qilingan. Unda ushbu moliyaviy piramidaning pul tikish paketlari, hisobni to‘ldirish va kunlik daromadni yechib olish usullari haqida ma’lumotlar bor. Paketlar munchoqdan yasalgan taqinchoq mahsulotlari bilan niqoblangan.

Masalan, Azure glow bracelet mahsuloti narxi 200 ming so‘m qilib belgilangan. Ushbu paket 30 kun davomida faol bo‘ladi. Uni sotib olish orqali kuniga 10 ming so‘mdan bir oyda 300 ming so‘m daromad olish va’da qilingan.

Yoki 600 ming so‘mga Vintage amethyst bracelet mahsulotini sotib olib, 30 kunda 900 ming so‘m daromad olish mumkinligi keltirilgan.

Shu tariqa narxlar va undan keladigan daromad miqdori oshirib borilgan.

Pul kimga ketmoqda?    

Paket sotib olish uchun platformada ro‘yxatdan o‘tib, shaxsiy kabinet ochish kerak bo‘ladi. So‘ngra balans to‘ldiriladi. Bu jarayonda pul o‘tkazish P2P shaklida amalga oshiriladi. Platformada buning uchun Lazokat Nasriddinova nomiga ochilgan bank kartasi raqami kiritib qo‘yilgan.

Savdo tarmog‘i butun dunyoga yoyilgani, O‘zbekistonda ham yangi zavodlar qurgani aytilayotgan kompaniya odamlardan P2P orqali pul yig‘ishiga qanday qarash mumkin?

Bir manzil, bir nom

Seven jade moliyaviy piramidasi “Seven jade manufacturing” MChJga tegishlimi? Bunga amin bo‘lish uchun Seven jade’ning O‘zbekistondagi rasmiy ofisi sifatida ko‘rsatilgan manzil – Shota Rustavelli ko‘chasi 104-uyga bordik.

Davlat reyestrida “Seven jade manufacturing” MChJ manzili sifatida ham ayni shu joy ko‘rsatilgan. Qolaversa, moliyaviy piramida platformasining “mijozlarga xizmat ko‘rsatish xodimi” lokatsiya orqali shu manzilni qoldirdi. Shuningdek, u “xotirjam bo‘lishimizni, hammasi qonuniy ekanini” eslatib o‘tdi.

“Golden cash” ishi takrorlanmasin

O‘zbekistonda MChJ ochib, odamlarni chuv tushirish holati yangilik emas. Masalan, 10 oyda 2 ming nafardan ortiq o‘zbekistonlikning qariyb 6 mln dollarini qo‘lga kiritgan “Golden cash” ishi.

O‘shanda Ukraina fuqarosi bo‘lgan Maksim Muntyan nomiga  “Golden cash store” MChJ davlat ro‘yxatidan o‘tkazilgan, so‘ngra odamlar ixtisoslashgan do‘konlarda soatlar va zargarlik buyumlari chakana savdosi niqobi ostida chuv tushirilgandi.  

Seven jade ham ayni shu holatga o‘xshash: odamlar pulini ochiqchasiga moliyaviy piramida ko‘rinishida jalb qilmoqda.

“Golden cash” ishi qayta takrorlanmasligi uchun tegishli organlar, jumladan, kiberxavfsizlik tezkor ravishda Seven jade faoliyatini o‘rganib, bu sxema ortida turganlarni aniqlashi zarur. Ularning “mushugiga hech kim pisht demasligi” ko‘plab odamlarning aldanishiga olib kelishi mumkin.

Eslatib o‘tamiz, Jinoyat kodeksining 188-1-moddasiga ko‘ra, pul mablag‘larini va (yoki) boshqa mol-mulkni jalb etishga doir noqonuniy faoliyat bilan shug‘ullanish jinoiy javobgarlikka sabab bo‘ladi. Bunday qilmish uchun 10 yilgacha ozodlikdan mahrum qilish jazosi nazarda tutilgan.

Jinoyat protsessual kodeksi talabiga ko‘ra, Jinoyat kodeksining 188-1-moddasi bilan jinoyat ishi qo‘zg‘atish uchun jabrlanuvchining arizasi talab qilinmaydi.

Source link

Andijon viloyatida o‘tkazilgan tezkor tadbirlar davomida qariyb 2,5 kilogramm gashish moddasi musodara qilinib, giyohvandlik vositalari savdosi bilan shug‘ullanganlikda gumonlanayotgan bir necha shaxslar qo‘lga olindi.

Davlat xavfsizlik xizmati Andijon viloyati bo‘yicha boshqarmasi, ichki ishlar hamda bojxona organlari xodimlari hamkorligida Asaka tumanida o‘tkazilgan tezkor tadbirda Lacetti rusumli avtomashina to‘xtatilib, tekshirildi.

Ko‘zdan kechirish jarayonida transport vositasida bo‘lgan Namangan va Marg‘ilon shaharlarida yashovchi 1970, 1981 va 1984 yillarda tug‘ilgan uch nafar fuqaroga tegishli 2 kilogramm gashish moddasi aniqlanib, protsessual tartibda rasmiylashtirildi.

Shuningdek, Marhamat tumanida o‘tkazilgan yana bir tezkor tadbirda Quva shahrida yashovchi, 1985 yilda tug‘ilgan fuqaro boshqaruvidagi Cobalt avtomashinasi tekshirilganda, undan 497 gramm gashish moddasi ashyoviy dalil sifatida olindi.

Ma’lum qilinishicha, mazkur turdagi giyohvandlik vositalari mamlakat hududiga xorijdan kontrabanda yo‘li bilan olib kirilgan bo‘lishi mumkin.

Hozirda har ikki holat yuzasidan jinoyat ishlari qo‘zg‘atilgan bo‘lib, gumonlanuvchilarga nisbatan «qamoq» ehtiyot chorasi qo‘llandi. Tergov harakatlari davom etmoqda.

Mutasaddilar fuqarolarni giyohvandlik vositalari bilan bog‘liq qonunbuzilish holatlari haqida DXXning 1520 qisqa raqami orqali xabar berishga chaqirmoqda.

Source link