Sport
«Siti»da g‘alabasiz seriya, «Barsa» javobsiz 5 ta gol urdi. Kun o‘yinlari
Husanov asosiy tarkibga qaytdi, ammo jamoasi yana durang o‘ynadi. «Chelsi» va «MYu» murabbiyni almashtirib ham g‘alaba qozona olmayapti; «Barsa» Ispaniya superkubogi finalida raqibini kutmoqda. Chorshanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.
Angliya: «Arsenal»ning raqobatchilari chekinmoqda
«Manchester Siti» – «Brayton» 1:1
Gollar: Holand, 41 – penalti (1:0). Mitoma, 60 (1:1)
«Manchester Siti»: Donnarumma, Husanov, Alleyn, Ake (O`Rayli, 73), Mateus Nunes (Lyuis, 73), Gonsales (Rodri, 64), Reynders, Foden (Sherki, 73), Doku, Bernardu Silva, Holand
«Brayton»: Verbryuggen, Dank, van Hekke, De Keyper, Hinshelvud, Ayyari (Milner, 83), Gros, Gomes (Gruda, 77), Mitoma (Uotson, 83), Ferdi Kadio‘g‘li, Ryutter (Uelbek, 77)
Ogohlantirishlar: Donnarumma, 60 – Dank, 29. Gros, 41. van Hekke, 53. De Keyper, 60. Mitoma, 69. Uotson, 89
«Manchester Siti» oldingi ikki turda ketma-ket durang qayd etgach («Sanderlend» bilan 0:0, «Chelsi» bilan 1:1), chempionlik poygasidagi pozitsiyasini yomonlashtirdi, bu ham yetmaganiga asosiy himoyachilari Yoshko Gvardiol va Ruben Diashdan ayrildi. Natijada, klub rahbariyati «Uotford»dan yosh himoyachisi Maks Alleynni muddatidan oldin qaytardi va «Brayton»ga qarshi o‘yinning boshlang‘ich tarkibiga kiritdi, shuningdek, Abduqodir Husanov anchadan buyon ilk bor APL o‘yinida startdan joy oldi.
Va «Manchester Siti» ikkinchi davradagi o‘yinda ham «chaykachilar» mudofaasini buzib o‘tishga qiynaldi, Jyeremi Doku, Bernardu Silva va Erling Holand o‘z imkoniyatlaridan foydalana olmadi. Faqat bo‘lim oxirida Gomesning ortiqcha jonbozligi mehmonlarga pand berdi, u himoyachilarga yordam berish uchun jarima maydoniga qaytdi va Dokuga qarshi ehtiyotsiz harakat qildi. VAR aralashuvi bilan belgilangan penaltini Holand aniq ijro etib, «Siti» safidagi 150-golini urdi.
Ikkinchi bo‘limda esa «shaharliklar» vaziyatlarni yo‘qqa chiqarishda davom etdi va hisobdagi ustunlikni mustahkamlay olmadi, bu esa Mitoma hisobni tenglashtirishiga olib keldi. Yaponiyalik vinger ko‘p o‘tmay jamoasini oldinga olib chiqishi ham mumkin edi, ammo bu safar omad mezbonlarga kulib boqdi. Keyin esa Ferdi Kadio‘g‘li darvozaga kirib ketayotgan to‘pni to‘xtatdi.
Mezbonlardagi eng qulay imkoniyat esa raqib jarima maydoni ichida qo‘pol xatoga yo‘l qo‘yib, to‘p yo‘qotganida yuzaga keldi. Sherki Holandni juda qulay pozitsiyaga chiqardi, ammo hujumchi to‘pni darvozabon turgan nuqtaga qarata tepdi. Erlingning keyingi zarbasini esa van Hekke to‘sib qoldi. Pepda qatoasiga uchinchi o‘yinda durang, turnir jadvalidagi vaziyat esa payshanba oqshomida «Arsenal» va «Liverpul» o‘rtasida Londonda kechadigan o‘yindan keyin oydinlashadi. Mezbonlar g‘alaba qozongudek bo‘lsa, eng yaqin ta’qibchilar bilan oradagi farq 8 ochkoga yetadi.
O‘yindan keyin Pep Gvardiola Abduqodir Husanov haqida iliq fikrlar bildirdi: «Maks bilan tandemda ajoyib o‘yin ko‘rsatishdi. Husa juda zo‘r o‘ynadi; orqadan uzun paslar bilan bizga yordam berdi. Husanov butun maydondagi kenglikni nazorat qila oladi, juda tez. U hali ulg‘ayib, yanada jasurlashadi va jarayonga, o‘yinga ko‘proq jalb etiladi. Bu vaqt masalasi. Himoyada u eng yuqori darajada».
«Kristal Pelas» – «Aston Villa» 0:0
«Kristal Pelas»: Henderson, Lakrua, Gehi, Kanvo, Hyuz, Uorton, Mitchell, Devenni (Sosa, 90), Pino, Jonson, Mateta
«Aston Villa»: Martines (Bizot, 46), Lindelyof, Konsa, Din (Matsen, 73), Kesh, Tilemans, Kamara (Bogard, 82), Makginn (Malen, 73), Rodjyers, Sancho (Buendiya, 65), Uotkins
Ogohlantirishlar: Jonson, 67. Mitchell, 83
Chempionlik poygasidagi yana bir jamoa «Aston Villa» ham bu turda ochko yo‘qotdi. Londonda «Kristal Pelas»ga qarshi kechgan o‘yinda hisob ochilmadi – 0:0. Bu Unai Emeri jamoasi uchun so‘nggi 16 o‘yindagi uchinchi g‘alabasiz o‘yin bo‘ldi. Natijada birminghemliklar uchinchi o‘rinda qoldi.
«Fulhem» – «Chelsi» 2:1
Gollar: Himenes, 55 (1:0). Delap, 72 (1:1). Uilson, 81 (2:1)
«Fulhem»: Leno, Andersen, Kuenka (Kevin, 46), Diop, Kerni (Sessenon, 73), Berge, Robinson (Lukich, 73), Kastan, Uilson (Traore, 90+1), Smit-Rou (Rid, 83), Himenes
«Chelsi»: Sanches, Adarabioyo, Chaloba, Kukurelya, Gyusto (Achimpong, 76), Santos (Hato, 28), Kaysedo, Fernandes (Jyeyms, 65), Pedru Netu, Palmer (Joao Pedro, 75), Delap
Ogohlantirishlar: Kuenka, 45. Kastan, 78. Himenes, 90 – Fernandes, 24. Adarabioyo, 25. Palmer, 25
Chetlatish: Kukurelya, 22
Liam Roseniorning «Chelsi» bosh murabbiyi lavozimidagi debyuti qizil kartochka tufayli barbod bo‘ldi.
Mehmonlar 22-daqiqadayoq ozchilik bo‘lib qolishdi, «Fulhem» darvozaboni Leno uzun uzatma bilan jamoadoshlarini oldinga boshlaganida Kukurelya darvozabon bilan yakkama-yakka vaziyatga chiqib ketishi mumkin bo‘lgan Uilsonni jarima maydoni chizig‘i ustida ushlab qoldi.
Arbitr mehmon jamoa futbolchilarining e’tirozlariga qaramay, qarorini o‘zgartirmadi va bahslashgani uchun uch futbolchiga sariq kartochka ko‘rsatdi. Bo‘lim oxirida mezbonlar darvozani ishg‘ol etishdi, ammo hujum boshlanishida Himenesdagi kichik ofsayd holati tufayli Uilsonning goli bekor qilindi.
Ikkinchi bo‘limda esa ushbu meksikalik hujumchi Bergening uzatmasiga ideal tarzda ochilib, Chalobadan ildamroq harakat qildi va boshi bilan to‘pni darvozaning pastki burchagi tomon yo‘naltirdi. Delap esa yakkama-yakka vaziyatda to‘pni Lenoning ustidan oshirib tashlay olmadi. Ko‘p o‘tmay ushbu hujumchi ko‘p o‘tmay chempionatdagi ilk golini urib, muvozanatni tikladi. Ammo bu gol bilan o‘yinda burilish yasalmadi. Aksincha, mezbonlar Uilson shu oqshom haqli bo‘lgan gol evaziga g‘alabani ilib ketishdi. Hozircha Enso Mareskaning iste’fosi darhol effekt bermayapti.
«Byornli» – «Manchester Yunayted» 2:2
Gollar: Heven, 13 – avtogol (1:0). Sheshko, 50 (1:1). Sheshko, 60 (1:2). Entoni, 66 (2:2)
«Byornli»: Dubravka, Estev, Hamfris, Loran, Ugochukvu, Florentinu, Lukas Pires, Uoker, Edvards (Sonne, 90+2), Mejbri (Entoni, 58), Broyya (Foster, 76)
«Manchester Yunayted»: Lammens, Martines, Heven (Yoro, 61), Shou, Dalot, Kazemiro (Maynu, 74), Ugarte (Leysi, 84), Brunu Fernandesh (Maunt, 61), Kunya (Zirkze, 74), Dorgu, Sheshko
Ogohlantirishlar: Mejbri, 41. Foster, 90
Ruben Amorim iste’foga chiqarilishi va o‘rniga Darren Fletcher tayinlanishi ham hozircha «MYu»ga natija keltirmayapti. Ammo o‘yindagi o‘zgarishlar ko‘zga tashlana boshladi. Birinchidan, «qizil iblislar» portugaliyalik mutaxassis o‘jarlik bilan qo‘llashda davom etgan 3-4-3 sxemasidan voz kechildi. Ikkinchidan, nihoyat Sheshko transferini oqlay boshladi. Sloveniyalik hujumchi dublni rasmiylashtirdi va uning birinchi goliga jarohat tufayli 21 dekabrdan buyon ilk bor maydonga qaytgan Brunu Fernandesh assistentlik qildi. Keyin esa Sheshko Dorguning uzatmasidan keyin to‘pni to‘xtatmasdan darvoza to‘riga yo‘lladi. Ammo mankunianliklarga baribir nimadir yetishmayapti. Goh mudofaadagi ishonchli o‘yin, goh hujumlarni yakunlashdagi aniqlik. Masalan, Brunu avvaliga qulay imkoniyatdan foydalana olmadi, keyin esa uning burchakdan uzatmasini Heven darvoza ustuni oldida turgan holda xato zarba berdi va avtogol uchun aybini yuva olmadi. O‘yin oxirida maydonga tushirilgan 18 yoshli Leysi «MYu»ga g‘alaba olib kelishi mumkin edi – ammo debyutantning zarbasidan keyin to‘p to‘singa tegdi.
«Brentford» – «Sanderlend» 3:0
Gollar: Tiago, 30 (1:0). Tiago, 65 (2:0). Yarmolyuk, 73 (3:0)
Aniq ijro etilmagan penalti: Le Fe, 60’
«Brentford»: Kelleher, Ayyer, Kollinz, Henri, Kayode (Hiki, 82), Yarmolyuk, Yanelt, Lyuis-Potter (Damsgor, 61), Shade, Yyensen (Henderson, 76), Tiago (Nelson, 82)
«Sanderlend»: Rufs, Ballard (Kirkin, 79), Mukiyele, Alderete (O`Nayyen, 83), Hyum, Gertreyda (Nil, 79), Jaka, Le Fe, Adingra (Mayyenda, 52), Rigg (Mandl, 52), Brobbi
Ogohlantirishlar: Tiago, 43. Yanelt, 63 – Hyum, 45
Favoritlar ochko yo‘qotishidan foydalangan «Brentford» beshinchi o‘ringa ko‘tarilib oldi. «Asalarilar» tarkibdagi muammolar tufayli pastlashda davom etayotgan «Sanderlend» mudofaasini yakson etishdi. Bu jarayonning eng faol ishtirokchisi esa o‘tgan turdagi het-trik ortidan bu o‘yinda dubl qayd etgan Igor Tiago bo‘ldi, ushbu hujumchi endi joriy mavsumdagi gollari sonini 16 taga yetkazib oldi va braziliyalik futbolchilarning APLdagi rekordini yangiladi (bungacha Roberto Firmino, Gabriel Martinelli va Mateus Kunya bir mavsumda ko‘pi bilan 15 tagacha gol urishgan).
Ushbu to‘purar forvard o‘tgan yozda Touni o‘rniga «Bryugge»dan sotib olingan, ammo birinchi mavsumida jarohat tufayli ko‘p o‘yinlarni o‘tkazib yuborgandi. Murabbiylar shtabi esa uni yangi mavsum uchun optimal holatga keltirishdi va u bildirilgan ishonchni oqlamoqda. Keyt Endryus esa «Tottenhem»ga ketgan Tomas Frankka munosib o‘rinbosar bo‘lib chiqdi. Irlandiyalik mutaxassis rahbarligida «asalarilar» YeChL o‘rinlari uchun kurashga qo‘shildi – kuchli to‘rtlikni yopib turgan «Liverpul» bilan oradagi farq atigi bir ochko.
«Nyukasl Yunayted» – «Lids» 4:3
Gollar: Aaronson, 32 (0:1). Barns, 36 (1:1). Kalvert-Lyuin, 45+5 – penalti (1:2). Joelinton, 54 (2:2). Aaronson, 79 (2:3). Gimarayns, 90+1 – penalti (3:3). Barns, 90+12 (4:3)
«Nyukasl Yunayted»: Poup, Sher (Remsi, 76), Tshau (Botman, 46), Holl, Mayli, Tonali (Livramento, 46), Joelinton, Gimarayns, Gordon (Myorfi, 81), Barns, Voltemade (Vissa, 75)
«Lids»: Perri, Biyol, Streyk, Rodon (Bornau, 90+7), Ampadu, Shtah (Okafor, 80), Gruyev (Tanaka, 90+7), Gudmundsson, Jastin, Aaronson (Nionto, 90+7), Kalvert-Lyuin (Nmecha, 87)
Ogohlantirishlar: Tshau, 7. Gordon, 45. Joelinton, 45 – Kalvert-Lyuin, 22. Ampadu, 90
Chorshanba oqshomidagi eng shiddatli to‘qnashuv – «Sent-Jyeyms Park»da kechdi, «Nyukasl» va «Lids» o‘yin davomida quvlashmachoq o‘ynadi, ammo yakunda mezbonlar dramatik g‘alabaga erishishdi. «Qarg‘alar» uch bor hisobda ortda quvishdi, ammo uchtadan ko‘proq gol urish imkoniyatiga ega bo‘lgan va bu imkoniyatdan foydalana olmagan «Lids» yakunda mag‘lubiyatga uchradi (Poup to‘pga chiqishda xatoga yo‘l qo‘yganida, Jastinning zarbasidan keyin to‘p to‘singa tegdi, hozirda gol mashinasini eslatayotgan Kalvert-Lyuin esa qaytgan to‘pni darvozaga kiritib yubora olmadi).
Mezbonlar oxirigacha kurashishdi va o‘yinga qo‘shib berilgan daqiqalarda Brunu Gimaraes penaltidan hisobni tenglashtirdi. Bu vaziyatda shu kuni ikki gol urgan Aronson o‘z jamoasi jarima maydoni ichida to‘pni qo‘li bilan o‘ynagandi. Qo‘shib berilgan daqiqalar oxirida esa (90+12) Barns g‘alaba golini urdi. Bu APL tarixida eng kech urilgan g‘alaba goliga aylandi, natijada Eddi Hau jamoasi «MYu» va «Chelsi»ni quvib o‘tib, oltinchi o‘ringa ko‘tarildi.
«Bornmut» – «Tottenhem» 3:2
Gollar: Tel, 5 (0:1). Evanilson, 22 (1:1). Krupi, 36 (2:1). Palinya, 78 (2:2). Semenio, 90+5 (3:2)
«Bornmut»: Petrovich, Krupi (Bruks, 64), Kuk, Semenio, Senesi, Skott, Taverniye (Diakite, 87), Tryuffer, Hill, Ximenes (Adli, 87), Evanilson (Unal, 64).
«Tottenhem»: Vikario, Bergvall (Odober, 57), Bentankur (Grey, 86), van de Ven, Kolo-Muani (Risharlison, 67), Palinya, Porro, Romero, Simons, Spens, Tel.
«Bornmut» o‘z uyida «Tottenhem»ni mag‘lub etdi – 3:2, g‘alaba golini Antuan Semenio 90+5-daqiqada urdi. O‘yin Matis Telning beshinchi daqiqadagi goli bilan boshlangandi, ammo mezbonlar birinchi bo‘limning o‘zida vaziyatni o‘z tomoniga og‘dira olishdi: avvaliga Evanilson Tavernening uzatmasidan keyin bosh bilan aniq zarba berdi, keyin esa Eli Krupi Markos Senesining qanotdan uzatmasini golga aylantirdi.
Ikkinchi bo‘limda Palinya qaychi uslubidagi zarbasi bilan muvozanatni tikladi.
O‘yin durangga qarab ketayotgandi, ammo shu kuni jamoa safidagi so‘nggi o‘yinida maydonga tushgan Semenio jarima maydoni tashqarisidan chiroyli gol urib, «Manchester Siti»ga ketishidan oldin muxlislar bilan chiroyli xayrlashdi: qo‘shimcha daqiqada, o‘z tug‘ilgan kunida va g‘alaba keltirgan gol.
Bu orqali «Bornmut» 11 o‘yin davom etgan g‘alabasiz seriyasiga yakun yasab, APLning eng tomoshabop jamoasi maqomini (ushbu jamoa ishtirokidagi o‘yinlarda o‘rtacha 3,52 gol urilmoqda) mustahkamladi. So‘nggi 12 o‘yinda atigi ikki g‘alabaga erishgan «Tottenhem» turnir jadvalining 14-pog‘onasida qolmoqda.
Ushbu jamoa bosh murabbiyi Tomas Frank esa o‘yindan oldin «Arsenal» logotipi aks etgan stakanda qahva ichayotgani aks etgan fotosi muhokamalar markaziga chiqdi. Ijtimoiy tarmoqdagilar, bu surat uning iste’fosiga qo‘shimcha turtki bo‘lishini aytib, hazil qilishmoqda.
«Barsa» finalga chiqdi
«Barselona» – «Atletik» 5:0
Gollar: Torres, 22 (1:0). Fermin Lopes, 30 (2:0). Barji, 34 (3:0). Rafinya, 38 (4:0). Rafinya, 52 (5:0)
«Barselona»: X. Garsiya, Kubarsi, E. Garsiya, Balde (Martin, 64), Kunde, Pedri (Yamal, 72), de Yong (Bernal, 64), Rafinya (Reshford, 65), Fermin Lopes, Barji (Olmo, 72), Torres
«Atletik»: Simon, Vivian, Paredes, Boyro (Lekue, 57), Areso, Hauregisar, Rego (Sanches, 61), Sanset (Ruis de Galarreta, 54), Navarro (Gomes, 54), Berenger, Inyaki Uilyams (Guruseta, 54)
Ispaniyada yangi an’ana paydo bo‘ldi – Ispaniya Superkubogi o‘yinlari qishda, Saudiya Arabistonida o‘tkazilmoqda. Mini-turnirda to‘rt jamoa o‘ynaydi, turnir bitta o‘yindan iborat yarimfinal bosqichidan boshlanadi.
Aytish mumkinki, qur’ada «Barselona»ning omadi kelgandi: inqiroz davridagi «Atletik» «Real» yoki «Atletiko»dan ancha osonroq raqib.
Xansi Flik Yamalni zaxirada qoldirdi. Diario Sport ma’lumotiga ko‘ra, Lamin kichik shikastlanish tufayli oxirgi mashg‘ulotlarni o‘tkazib yuborgan va Flik uni final uchun asragan. Yamal o‘rniga hujumning o‘ng qanotida boshqa bir iste’dodli futbolchi – 20 yoshli Runi Barji tushirildi.
«Atletik» ilk daqiqalardanoq «Barsa»ga jiddiy jang taklif qilmoqchi ekanini ko‘rsatib, bir necha qiziqarli hujumlar uyushtirdi. Ammo keyin to‘p kataloniyaliklarga o‘tdi va 16 daqiqa ichida o‘yin taqdiri hal bo‘ldi: 22-daqiqadan 38-daqiqagacha bo‘lgan oraliqda to‘rtta gol urildi. Fermin Lopes o‘zi bitta gol urib, ikki golga uzatma berdi, Rafinyada 1+1, Runi va Torres ham bittadan gol urishdi. Fermin Torres o‘tgan turda «Espanyol»ga qarshi o‘yinda (2:0) zaxiradan tushib, ikki golli uzatmaga mualliflik qilgandi. U barcha turnirlar doirasidagi jami 14 gol bilan «Barselona»ning eng yaxshi to‘purari bo‘lib turibdi. Undan keyin Rafinya (10), Yamal (9) va asosiy tarkibni uzil-kesil unga boy bergan Levandovski (9) joylashgan.
Tanaffusdan keyin «Barsa» birgina gol bilan cheklandi. Rafinya Barjining sa’y-harakatlari bilan dublni rasmiylashtirdi. O‘yinning so‘nggi yigirma daqiqasida Yamal ham maydonda ko‘rinish berdi: u bir necha bor o‘z uslubida (butsasining tashqi qismi bilan) uzatmalar berdi, ammo gol urmadi. Jamoa usiz ham barchasini hal qilib bo‘lgandi – 5:0.
«Barselona» osonlik bilan finalga chiqdi va raqibini kutmoqda. Raqib 8 yanvar kungi «Real» va «Atletiko» bahsida ma’lum bo‘ladi. Final 11 yanvarga belgilangan.
Litvalik murabbiy Kotrina Kulbite qo‘l ostidagi jamoa hal qiuvchi bahsda Filippinga yutqazdi.
Futbol bo‘yicha O‘zbekiston ayollar milliy jamoasi Avstraliyada bo‘lib o‘tayotgan Osiyo kubogidagi ishtirokini yakunladi.
Litvalik murabbiy Kotrina Kulbite qo‘l ostidagi jamoa kuchli sakkiztalikka kirdi.
Futbolchilar Bangladeshni 4:0 hisobida mag‘lub etdi. Ammo KXDR (0:3), Xitoy (0:3) va Janubiy Koreyaga (0:6) yutqazdi.
Jahon chempionati yo‘llanmasi uchun hal qiluvchi kurashda Filippin milliy jamoasiga 0:2 hisobida yutqazdi.
Endi O‘zbekiston ayollar milliy jamoasi qit’alararo saralash musobaqasida ishtirok etadi. Birinchi bosqich noyabr-dekabr oylarida markazlashgan formatda bo‘lib o‘tadi. Ikkinchi bosqich 2027 yil fevral oyiga belgilangan.
O‘zbekiston ayollar milliy jamoasi tarixda biror marta jahon chempionatida ishtirok etmagan.
Sport
«Real» «Bavariya»ga qarshi, «Barsa» yana «Atletiko» bilan o‘ynaydi. YeChLda chorakfinal juftliklari
Turnirda 8 jamoa qoldi.
Chorshanba oqshomida Chempionlar ligasi 2025/26 yillar mavsumi 1/8 finali doirasida yana to‘rt uchrashuv o‘tkazildi: «Arsenal», «Real», «PSJ» va «Sporting» ortidan «Barselona», «Atletiko», «Bavariya» va «Liverpul» jamoalari ham keyingi bosqichga yo‘llanma olishdi.
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
«Arsenal» va «Bavariya» – asosiy favoritlar
Har bir bosqichdan keyin Opta superkompyuteri Chempionlar ligasida kim g‘olib bo‘lishi bo‘yicha prognozlarini yangilab bormoqda. Turnir startidan oldin «Liverpul»ning imkoniyatlari eng yuqori baholangandi, o‘tgan mavsum Angliya chempioni bo‘lgan va yozgi transferlarda eng faol bo‘lgan jamoaga 20,6 foiz berilgandi, ammo vaqt o‘tib bu jamoaning imkoniyatlari uch baravar pasaytirildi – 7 foizgacha.
Turnir avvalida ikkinchi asosiy da’vogar «Arsenal» bo‘lib turgandi (15,3 foiz), ammo londonliklarning imkoniyatlari vaqt sayin o‘sib bordi va endi ikki baravar yuqori baholanmoqda.
Setkaning ikkinchi tomonidagi asosiy favorit – «Bavariya». Opta Angliya va Germaniya grandlari Budapeshtdagi finalga yetib kelishini bashorat qilmoqda. «Barselona» va «PSJ»da ham yarimfinalga chiqish imkoniyati yuqori baholangan.
Opta versiyasiga ko‘ra, jamoalarning Chempionlar ligasi g‘olibligi uchun imkoniyatlari:
«Arsenal»da startdan oldin 15,3 foiz, chorakfinal arafasida 30 foiz;
«Bavariya»da startdan oldin 4,5 foiz, chorakfinal arafasida 18 foiz;
«Barselona»da startdan oldin 8,8 foiz, chorakfinal arafasida 14,7 foiz;
«PSJ»da startdan oldin 12 foiz, chorakfinal arafasida 12,1 foiz;
«Real»da startdan oldin 5,8 foiz, chorakfinal arafasida 7 foiz;
«Liverpul»da startdan oldin 20,6 foiz, chorakfinal arafasida 30 foiz;
«Atletiko»da startdan oldin 0,8 foiz, chorakfinal arafasida 4,7 foiz;
«Sporting»da startdan oldin 0,8 foiz, chorakfinal arafasida 3,3 foiz.
1993 yil, aprel. Milliy basketbol assotsiatsiyasi muntazam ligasidagi navbatdagi o‘yini bo‘lib o‘tmoqda. Tanaffus paytida qiziqarli tanlov o‘tkazadi. Unga ko‘ra, xohlovchilar maydon chetidan to‘p irg‘itib, narigi tomondagi savatchaga tushirishi kerak edi. Bir yigit shu ishni uddalaydi. Biroq yutuqni to‘lashi lozim bo‘lgan sug‘urta kompaniyasi g‘irromlik qiladi va pullarini berishdan bosh tortadi. Oxir oqibat yigitga yutuqni “Chicago bulls” jamoasi to‘lab beradi.
Bugun AQSh sportini basketbol o‘yinisiz tasavvur qilib bo‘lmaydi. Bu sport turi muxlislar tashrifi bo‘yicha Amerika futboli va beysboldan so‘ng uchinchi o‘rinda turadi.
Basketbol AQShda eng ko‘p o‘ynaladigan o‘yin hisoblanadi va bilan mamlakatda 26 milliondan ortiq odam shug‘ullanadi.
Shuningdek, AQSh va Kanada jamoalari ishtirok etadian Milliy basketbol assotsiatsiyasi ligasi dunyo miqyosida eng ko‘p tomosha qilinadigan turnir hisoblanadi.
Jamoaviy o‘ynaladigan boshqa sport turlarida bo‘lgani kabi AQShda bo‘lib o‘tadigan basketbol o‘yinlari juda qiziqarli va keskin kurashlar ostida kechadi.
Shu bilan birga tanaffus paytlarida zaldagi muxlislar uchun turli tanlovlar o‘tkaziladi va o‘yinlar qiziqarli shouga aylanadi.
1993 yilda ana shunday tanlovlarning biri mojaro bilan yakun topadi. “Chicago bulls” jamoasiga homiylik qiluvchi kompaniya mukofot uchun va’da qilingan 1 mln dollarni g‘olib yigit Don Kelhunga to‘lab berishdan bosh tortadi.
Foto: spors.qq.com
Million dollarlik aniq zarba
1993 yil 14 aprel. Chikago shahridagi arenada MBA muntazam ligasida ishtirok etuvchi “Chicago bulls” va “Miami Heat” jamoalari bellashmoqda.
O‘sha paytda AQShlik jahonga mashhur basketbolchi Maykl Jordan “Chicago bulls” jamoasi sharafini himoya qilar va u ham maydonda edi.
O‘yinga tanaffus berilgan paytda “Chicago bulls” jamoasi, “Koka-kola” kompaniyasi Lettuce Entertain You restoranlar tarmog‘idan iborat tashkilotchilar yutuqli tanlov o‘tkazadi.
Tanlovga ko‘ra, avval muxlislar orasidan tasodifiy yo‘l bilan bir necha kishi tanlab olinadi. So‘ng ular navbati bilan basketbol maydonining bir chetidan, ikkinchi chetidagi savatchaga to‘pni uloqtirishi kerak edi.
Qoida aniq: 23 metr uzoqlikdan savatchaga to‘pni aniq tushirgan qatnashchi g‘olib bo‘ladi va u 1 mln dollarga ega chiqadi. Agar bu ishni bir necha kishi bajarsa mukofot puli ular orasida teng taqsimlanadi.
Yutuqni “Chicago bulls” jamoasiga homiylik qilayotgan “American Hole ‘N One” sug‘urta kompanisi to‘lab berishi lozim edi.
Tanlov boshlangach bir necha kishi to‘pni uloqtiradi, biroq savatchaga tushira olmaydi. Aslida bu ish juda qiyin bo‘lib, shu sababli ham tashkilotchilar tanlovga yutuq sifatida katta mablag‘ qo‘ygandi.
Navbat kanselariya do‘koni sotuvchisi bo‘lib ishlovchi Don Kelhunga keladi. Yigit uloqtirgan to‘p to‘g‘ri borib savatchaga tushadi. Shunda arenada o‘tirgan muxlislar yigitni olqishlay boshlaydi.
Foto: Videodan kadr
O‘sha paytda tanaffus olgan basketbolchilar tanlovni kuzatishayotgandi. Ular ham navbati bilan yigitni quchoqlab, tabriklashadi. Jumladan, maydonda bo‘lgan Maykl Jordan ham.
Don Kelhunning qo‘liga 1 dollarlik yutuqqa ega chiqqani haqidagi banner-sertifikat topshiriladi. Yigit o‘sha kuni xursand holda sevimli jamoasining arenasidan chiqib ketadi. Ertasi kuni esa muammo boshlanadi…
G‘irromlik
Don Kelhun ancha-muncha basketbolchilar ham amalga oshirolmaydigan ishni uddalab, mukofot puliga ega chiqqandi. Biroq 23 metrdan to‘pni savatchaga hech kim tushira olmasligiga ishonib pul tikkan sug‘urta kompaniyasi yutuqni to‘lashga kelganda g‘irromlik qilardi.
Kompaniya Don Kelhunga mukofot puli berilmasligini e’lon qilib, buning ikkita sababini keltiradi. Birinchi sababga ko‘ra Don Kelhun to‘pni uloqtirayotganda chiziqni bosgan.
Ikkinchisi, u avvalroq bir muddat kollejdagi jamoa safida basketbol o‘ynagan. Kompaniya tanlov oddiy muxlislar o‘rtasida o‘tkazilganini va unda Donning ishtiroki xato bo‘lganini aytadi.
Ya’ni, sug‘urta kopaniyasi tanlov ishtirokchilari so‘ngi 5 yilda basketbol bilan muntazam shug‘ullanmagan bo‘lishi kerak edi, deb turib oladi.
Foto: Videodan kadr
Shundan so‘ng sug‘urta kopaniyasining vajlari bo‘yicha tekshiruv o‘tkaziladi. Eng avval Don Kelhun to‘pni uloqtirayotgan paytda chiziqni bosganmi yoki yo‘q, shu tekshiriladi.
Jarayon tasvirga tushirilgandi. Video sinchiklab ko‘rilganda Donning chiziqni bosmagani ma’lum bo‘ladi. Ikkinchi sabab bo‘yicha ham komissiya yigitni haq deb topadi.
Chunki shartga ko‘ra, tanlovda professional sportchi, hatto faoliyatini tugatgan bo‘lsa ham qatnashishi mumkin emasdi. Don Kelhun esa hech qachon basketbol bilan professional tarzda shug‘ullanmagan, shunchaki kollejdagi havaskor jamoada o‘ynagandi.
Sug‘urta kopaniyasining ikkita vaji ham o‘rinli emas, deb topiladi. Biroq ular baribir 1 mln dollarni to‘lashni xohlamaydi.
O‘sha paytda Don Kelhun bilan sodir bo‘lgan hodisa va sug‘urta kompaniyasining g‘irromliq qilayotgani AQSh OAV lari e’tiboriga tushadi va ular birin ketin hodisa haqida yoza boshlaydi. Ammo bu ham sug‘urta kopaniyasining fikrini o‘zgartira olmaydi.
Hodisaga “Chicago bulls” jamoasining aralashuvi
Don Kelhunga qilingan g‘irromlik ommaga oshkor bo‘lgach muxlislar “Chicago bulls” jamoasini ham ayblay boshlaydi. Chunki tanlov jamoaning uy arenasida, uning o‘yini paytida tashkillashtirilgandi.
Qolaversa gazetalar va turli telekanallar har kuni Don Kelhunga qilingan g‘irromlik haqida maqola hamda ko‘rsatuvlar berib, muxlislarni yanada junbushga keltiradi.
Foto: alamy.com
Bu orada bir yilcha vaqt o‘tib ketadi va Don Kelhun sug‘urta kompaniyasidan o‘z yutug‘ini ololmaydi. Kunlarning birida “Chicago bulls” jamoasi rahbariyati 1 mln dollarlik yutuq bo‘yicha matbuot anjuani o‘tkazishi haqida e’lon beradi.
Matbuot anjumanida jamoa rahbariyati sug‘urta kompaniyasidan farqli ravishda Don Kelhun 1 mln dollarni haqqoniy yutganini tan oladi. So‘ng sug‘urta kompaniyasi to‘lashdan bosh tortgan pullarni jamoa to‘lab berishini ma’lum qiladi.
Faqat jamoa rahbariyati Donga pullarni birdaniga emas, har yili 50 ming dollardan 20 yil davomida to‘lab borilishini aytadi. Yigitning bunga ko‘nishdan o‘zga chorasi qolmaydi.
O‘shandan keyin Don Kelhun 2013 yilgacha 20 yil davomida har yili “Chicago bulls” jamoasidan 38 ming dollardan olib turadi. Qolgan 12 ming dollar daromad solig‘i uchun ushlab qolinadi. Shu tariqa yigit o‘zi yutgan mukofot pullarini to‘liq oladi.
Garchi bir urinishda million dollarni yutgan bo‘lsa-da Don Kelhun millionerga aylana olmaydi – u kanselariya mahsulotlari sotiladigan magazindagi ishini davom ettiradi.
Mashmashaga Maykl Jordanning aralashuvi
Don Kelhun to‘pni savatchaga tushirgan kuni afsonaviy basketbolchi Maykl Jordan ham maydonda edi. Boshqalar kabi u ham g‘olibni tabriklaydi.
Foto: Videodan kadr
O‘yin so‘ngida “Chicago bulls” jamoasining barcha o‘yinchilari Don Kelhun savatchaga tushirgan to‘pga dastxat qo‘yib berishlari lozim edi. O‘shanda faqat bir kishi – Maykl Jordan bu ishni qilmaydi. Jamoadoshlari dastxat qo‘yayotganda u indamay kiyinish xonasiga kirib ketadi.
Mayklning dastxat qo‘ymagani sababi bor edi. 1992 yilda u Upper Deck kompaniyasi bilan shartnoma imzolagandi.
Ushbu kelishuvga ko‘ra, Upper Deck Jordanning dastxati tushirilgan turli mahsulotlarni ishlab chiqaruvchi yagona kompaniya hisoblanardi.
Sportchi va kompaniya o‘rtasida tuzilgan shartnomada Jordanning futbolka, to‘plar va boshqa narsalarga dastxat qo‘yishi cheklangandi. Jordan faqat xayriya tadbirida yoki kasal bolalar uchun dastxat qo‘yishi mumkin edi.
Don Kelhun nima qilib bo‘lsa ham Jordanning dastxatini olishni maqsad qiladi va “Chicago bulls” jamoasining o‘yinlariga muntazam tusha boshlaydi. Biroq mashhur o‘yinchining dastxatini ololmaydi.
Oradan bir yilcha vaqt o‘tadi. Sug‘urta kompaniyasi hamon mukofot pulini to‘lab berishni kechiktirib kelar, Don esa da’vogar sifatida yurgandi. Bir kuni yigit Maykl Jordan o‘g‘lining o‘yinlarini ko‘rish uchun u o‘qiydigan maktabga borib turishini eshitadi va o‘sha yoqqa otlanadi.
Foto: memedeportes.com
Biroq tan soqchilar uni Mayklning oldiga qo‘ymaydi. Ular sportchi baribir dastxat bermasligini ta’kidlaydi. Don u yerdan chiqib ketayotganida tan soqchilardan biri uni quvib yetadi va Maykl chaqirayotganini aytadi.
Yigit Jordan bilan uchrashganda sportchi Donni taniydi va “Pulingizni oldingizmi?” deb so‘raydi. Yigit olmaganini bildiradi.
Shundan so‘ng Jordan “Chicago bulls” rahbariyatiga bosim o‘tkazadi va yigitga yutuqni to‘lab berishni talab qiladi. Avvaliga jamoa rahbariyati ko‘nmaydi.
Biroq bir muddat o‘tgach klub rahbariyati o‘zining eng yaxshi o‘yinchisi qo‘ygan talabga ko‘nishga majbur bo‘ladi.
Angliyaning olti jamoasidan to‘rttasi turnirni tark etdi. Chorakfinalning barcha juftliklari aniq bo‘ldi.
«Kamp Nou»da rekordlar va antirekord
«Barselona» – «Nyukasl» 7:2
Gollar: Rafinya, 6 (1:0). Elanga, 15 (1:1). Bernal, 18 (2:1). Elanga, 28 (2:2). Yamal, 45+7 – penalti (3:2). Fermin Lopes, 51 (4:2). Levandovski, 56 (5:2). Levandovski, 61 (6:2). Rafinya, 72 (7:2)
«Barselona»: X. Garsiya (Shchensni, 82), Kubarsi, Martin, Joau Kanselu (Espart, 66), E. Garsiya (Arauxo, 21), Pedri, Bernal, Fermin Lopes (Olmo, 66), Rafinya, Yamal, Levandovski (Torres, 66)
«Nyukasl Yunayted»: Ramsdeyl, Tiau, Byorn, Holl, Trippiyer (Livramento, 46), Joelinton (Botman, 64), Tonali (Uillok, 55), Remsi, Barns, Elanga (Myorfi, 64), Gordon (Osula, 81)
Ogohlantirishlar: Kubarsi, 44 – Joelinton, 17. Trippiyer, 45. Uillok, 60
Birinchi o‘yin: 1:1
«Kamp Nou»dagi o‘yin turli-tuman rekordlar jamlanmasiga aylandi. Birinchidan, Angliyaning hech bir klubi bungacha Chempionlar ligasi pley-offidagi bir o‘yinda 7 gol o‘tkazib yubormagandi. «Nyukasl» esa shunday imkonsiz ko‘ringan ishni uddaladi. O‘z maydonida to‘liq ustunlik qilgan va so‘nggi daqiqalarda penalti tufayli g‘alabani qo‘ldan chiqargan APL vakili javob o‘yinining birinchi bo‘limida ham munosib qarshilik ko‘rsatdi. Mehmonlar uchta gol o‘tkazib yuborgan bo‘lsa-da, o‘zi ham raqib mudofaasidagi qo‘pol xatolardan foydalanib, ikkita gol urdi.
Ammo Kiran Trippiyer birinchi bo‘limga qo‘shib berilgan daqiqalarda penaltiga sababchi bo‘ldi va Lamin Yamal uchinchi bor jamoasini hisobda oldinga olib chiqdi. Tanaffusdan keyin esa «Nyukasl»ni tanib bo‘lmay qoldi. Eddi Hau jamoasi shunchaki sochilib ketdi va 10 daqiqa ichida uchta gol qo‘yib yubordi. Bunday himoya chizig‘i bilan ko‘p narsadan umid qilib bo‘lmasdi. Ayniqsa Jyeykob Remsining xatosi yilning eng kulgili holatlari kolleksiyasidan o‘rin olishi tayin. Uning qo‘pol xatosi yettinchi gol o‘tkazilishiga olib keldi.
Rafinya bu o‘yinda «gol+pas» tizimida 4 (2+2) ochko ishladi, Robert Levandovski dublni rasmiylashtirdi. Polyak hujumchisi birdaniga bir necha rekordni urdi. U Chempionlar ligasida urgan gollari sonini 41 taga yetkazib, bu borada Lionel Messining rekordini yangiladi. Bundan tashqari, Robert endi Chempionlar ligasida dubl qayd etgan eng katta yoshli futbolchi hisoblanadi – u hozir 37 yoshda. «Barsa» uchun yagona minus – darvozabon Joan Garsiya jarohat olishi bo‘ldi. Chorakfinalda jamoa usiz qiynalishi mumkin.
Salohning benefisi
«Liverpul» – «Galatasaroy»
Gollar: Soboslai, 25 (1:0). Ekitike, 51 (2:0). Gravenberh, 53 (3:0). Saloh, 62 (4:0)
Aniq ijro etilmagan penalti: Saloh, 45+4’
«Liverpul»: Alisson, van Deyk, Konate, Kerkez, Frimpong (Jons, 67), Gravenberh (Nioni, 89), Virs (Kiyeza, 89), Soboslai, Makallister, Saloh (Gakpo, 74), Ekitike (Ngumoha, 89)
«Galatasaroy»: Ugurjan Chaqir, Abdulkarim Bardakchi (Eren Elmali, 73), Singo, Yakobs, Boe (Sane, 46), Torreyra (Yunus Oqgun, 60), Lemina, Sara, Barish Yilmaz, Sholloi, Osimhen (Lang, 46, Ikardi, 80)
Birinchi o‘yin: 0:1
Chorshanba kungi o‘yinlarda chinakamiga intriga saqlanib qolgan yagona o‘yin «Enfild»da edi, bu yerda mezbonlar minimal farqni yo‘qqa chiqarishi talab etilardi. Mezbonlar birinchi bo‘lim o‘rtalaridayoq bu vazifani uddalashdi. Mak Allister burchak zarbasini ijro etishda raqiblarni dog‘da qoldirib, to‘pni yerlatib jarima maydoni chizig‘i hududiga yetkazib berdi, u yerda ortdan kelgan Soboslaini esa hech kim kutib olmadi.
«Liverpul»ning bu mavsumdagi eng yaxshi futbolchisi bo‘lib turgan vengriyalik yarimhimoyachi jamoasi tanaffusga ikki gol farqi bilan chiqib ketishi uchun barcha ishni qildi. Ammo u ishlagan penaltini Saloh aniq ijro eta olmadi.
Misrlik hujumchi o‘z vaziyatlaridan foydalana olmagan bo‘lsa-da, ikkinchi bo‘lim boshida ikki daqiqa ichida urilgan ikki golda ham ishtirok etdi. Avvaliga tezkor qarshi hujumda u Ekitikega ideal uzatma berdi, biroz o‘tib uning zarbasidan keyin darvozabondan qaytgan to‘pni Gravenberh darvozaga kiritib yubordi va «Galatasaroy» amalda chorakfinalga chiqishdan umid uzdi. Salohning o‘zi ham yakunda o‘z nomini tabloga yozdirib qo‘ydi – Virs tovonida uzatgan pasdan keyin o‘zining eng yaxshi yillarida bo‘lgani kabi aylanma zarba yo‘lladi.
Biroz o‘tib «Enfild»da yig‘ilganlar zaxiraga olinayotgan o‘z kumirini olqishlar ostida kuzatib qo‘ydi. Bu oqshomdagi gol uning uchun YeChLdagi 50-goli edi. U shundan 47 tasini «Liverpul» safida urgan («Bazel»da 2 va «Chelsi»da 1). Saloh – bunday ko‘rsatkichga erishgan ilk afrikalik futbolchi bo‘ldi. Oldinda esa Arne Slot jamoasini chorakfinalda «PSJ»ga qarshi o‘yinlar kutmoqda. Mersisaydliklar uchun bu o‘tgan mavsumdagi mag‘lubiyat uchun revansh olish imkoniyatidir.
Inglizlarning yana bir jamoasini ispanlar chiqarib yubordi
«Tottenhem» – «Atletiko» 3:2
Gollar: Kolo Muani, 30 (1:0). Alvares, 47 (1:1). Simons, 52 (2:1). Gansko, 75 (2:2). Simons, 90+1 – penalti (3:2)
«Tottenhem Hotspur»: Vikario, Romero (Danso, 81), van de Ven, Spens, Dregushin (Udoji, 66), Grey (Gallaher, 81), Sarr, Simons, Tel (Olusesi, 81), Porro (Bergvall, 74), Kolo Muani
«Atletiko»: Musso, Gansko, Le Norman, Rudjyeri, Molina (Koke, 64), Kardozo, Liorente, Lukman (Syorlot, 64), Simeone (Ximenes, 87), Grizmann (Baena, 84), Alvares (Gonsales, 84)
Ogohlantirishlar: Porro, 57. Vikario, 58. Romero, 70. Udoji, 72 – Rudjyeri, 28. Lukman, 56. Syorlot, 90
Birinchi o‘yin: 2:5
Yaqinda «Atletiko» Ispaniya kubogi yarimfinalida «Barselona»ga qarshi birinchi uchrashuvda yirik g‘alabaga (4:0) erishgach, «Kamp Nou»dagi javob o‘yinida bu ustunlikni saqlab qolish uchun to‘liq himoyaviy o‘yin uslubini tanlagandi. Londonda esa barchasi butunlay boshqacha kechdi va dastlabki 45 daqiqalikda mehmonlar sakkizta zarba berishdi, Lukman esa darvozani ishg‘ol etishga ham muvaffaq bo‘ldi. Ammo – ofsayddan. Yana bir necha xavfli hujumlar uyushtirildi, ammo yakunda Diyego Simeone jamoasi yo‘q joydan «Tottenhem»ga o‘yinga qaytish imkonini berdi. Autdan to‘p tashlanishi, Telning jarima maydoni markaziga uzatmasi, u yerda esa yolg‘iz qoldirilgan Kolo Muani.
Mezbonlar ikkinchi golni ham urishganida ispanlar og‘ir vaziyatga tushib qolgan bo‘lardi, faqat darvozabon Musso jamoa joniga ora kirdi. Argentinalik posbon Telning burchakka yo‘naltirilgan zarbasini oyoqlari bilan to‘sib qoldi. Birinchi bo‘limdan keyin baribir intriga saqlanib qoldi va buning uchun mezbonlar Vikarioga minnatdorchilik bildirishi kerak bo‘ladi. Juliano Simeone uzoq masofadan zarba yo‘llaganida to‘p Romeroga tekkan holda o‘z trayektoriyasini o‘zgartirdi, ammo allaqachon to‘p yo‘liga yotgan italiyalik darvozabon o‘rnidan turib, xavfni bartaraf etishga ulgurdi.
Ammo ikkinchi bo‘lim boshida «Atletiko» baribir intrigani o‘ldirdi. Avvaliga Xulian Alvares Simons gol urishiga to‘sqinlik qildi (mezbonlar uning harakatini fol deb e’tiroz bildirishdi) va qarshi hujumni o‘zi gol bilan yakunlandi. U jarima maydonida Lukmandan pas qabul qilib oldi va to‘pni yuqori burchakka aniq yo‘lladi.
Hakamdan va raqiblardan ranjigan Simons bir necha daqiqa o‘tib baribir o‘z maqsadiga erishdi va jamoasini yana oldinga olib chiqdi. Bir necha daqiqa o‘tib Musso yana madridliklarni qutqarib qoldi – u Porroning shvedka uslubida olis burchakka yo‘llagan zarbasiga qo‘llarining uchi bilan yetib bordi. «Matraschilar» muxlislari Alvaresning burchakdan oshirgan to‘pi Hansko tomonidan darvozaga kiritilganidan keyingina yengil tin olishdi. O‘yin oxirida Simons o‘zi ishlagan penaltini aniq ijro etishi esa umumiy natijani o‘zgartirmadi.
Madriddagi birinchi o‘yinda londonliklar bosh murabbiyi Igor Tyudor darvozabon bo‘yicha muvaffaqiyatsiz tajriba o‘tkazmaganida «Tottenhem» «Atletiko» bilan tengma-teng kurashishi mumkin edi, ammo murabbiyning o‘sha qarori birinchi o‘yinda «shporlar»ning imkoniyatlarini keskin pasaytirib yuborgandi. Natijada ikki o‘yinda xuddi «Chelsi» kabi sakkiz gol o‘tkazib yuborgan «Tottenhem» turnirni tark etdi, «Atletiko» esa «Barselona» bilan o‘yinlarga tayyorgarlikni boshlaydi.
«Atalanta» tarixga kirdi
«Bavariya» – «Atalanta» 4:1
Gollar: Keyn, 25 – penalti (1:0). Keyn, 54 (2:0). Karl, 56 (3:0). Dias, 70 (4:0). Samarjich, 85 (4:1)
«Bavariya»: Urbig, Kim Min Je, Ta, Bishof (Pavich, 72), Stanishich (Gnabri, 72), Goretska, Pavlovich (Ofli, 55), Rafael Gerreyru (Ito, 83), Dias, Karl, Keyn (Jyekson, 72)
«Atalanta»: Sportello, Hin, Skalvini (Axanor, 83), Kossunu, Pashalich, Ederson (Samarjich, 57), Bernaskoni, Bellanova, Sulemana (Raspadori, 71), De Ketelare (de Ron, 57), Skamakka (Krstovich, 71)
Birinchi o‘yin: 6:1
Bergamodagi tennischa hisobdan (6:1) keyin ham «Bavariya» muxlislarida darvozabon pozitsiyasi tufayli xavotir saqlanib qolgandi. Zayavkadagi to‘rt darvozabon – Noyyer, Ulrayh, Klanats va Urbig – barchasi jarohat tufayli safdan chiqqandi. Faqat ularning to‘rtinchisi so‘nggi kunlarda safga qaytdi va Vensan Kompani darvozaga o‘smirlardan birini qo‘yishiga to‘g‘ri kelmadi.
Umuman olganda, xavotirlar o‘rinsiz edi. Baribir darvozabonga amalda ish topilmadi. Bergamoliklar ham bu o‘yinda darvozabonni almashtirgandi va bu mavsumda deyarli o‘ynamagan 33 yoshli Sportello Keyn ijrosidagi penaltini qaytardi. Ammo u darvoza chizig‘idan ertaroq oldinga chiqib ketgani ma’lum bo‘ldi, Harri esa takroriy zarbada adashmadi.
Ikkinchi bo‘limda esa myunxenliklarni to‘xtatib bo‘lmadi. Avvaliga Keyn o‘yindan ham gol urdi, keyin esa Dias va Karl tandemi bittadan gol urdi (ular bir-biriga golli uzatma berishdi). Bergamoliklar esa bu o‘yinda ham bitta javob goli urishga erishdi, ammo Italiyaning yevrokuboklar pley-off bosqichida ikki o‘yinda 10 gol o‘tkazgan ilk jamoasi sifatida tarixga kirdi. «Bavariya»ni esa navbatdagi bosqichda «Real»ga qarshi janglar kutmoqda.
YeChLda 8 jamoa qoldi
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
Stadion suriluvchi tom va maydonga ega bo‘ladi. Uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. 45000 tomoshabinga mo‘ljallangan arena “Al Hilol” va “Al Nassr” klublari uchun uy maydoni bo‘lishi kutilmoqda.
Saudiya Arabistonida qurilayotgan shahzoda Muhammad bin Salmon nomidagi ko‘p funksiyali stadionning yangi suratlari e’lon qilindi. U 2034 yilgi futbol bo‘yicha jahon chempionatini o‘tkazish uchun ehtimoliy arenalardan biri sifatida ko‘rilmoqda.
Qurilish ishlari Ar-Riyod shahri g‘arbidagi Qiddiya ko‘ngilochar hududida olib borilmoqda.
Foto: SaudiProject
Stadion suriluvchi tom va maydonga ega bo‘ladi, uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. Devor ochilganida, maydon atrofidagi tribunalar va Tuvayk qoyasi manzarasi namoyon bo‘ladi. Bu dunyodagi birinchi to‘liq integratsiyalashgan majmua bo‘lib, stadionni bir necha soat ichida turli tadbirlar uchun moslashtirish imkonini beradi.
Geometrik shakldagi binolarning tashqi qismi raqamli ekranlar bilan qoplanadi va ular qoyadan o‘sib chiqqandek ko‘rinadi.
Foto: SaudiProject
Stadion atrofida sport va ko‘ngilochar hududlarga ega bo‘lgan baland binolar quriladi. Ular ichki ko‘chalar orqali bog‘lanadi va bu ko‘chalar ham LED ekranlar bilan qoplanadi. Ushbu yo‘laklar tashrif buyuruvchilarni qoya chetidagi kuzatuv maydonchalariga olib boradi.
Loyihasi Populous arxitektura byurosi tomonidan ishlab chiqilgan ushbu arena 45000 tomoshabinga mo‘ljallangan.
Foto: SaudiProject
Stadion Saudiya Arabistoni professional ligasining “Al Hilol” va “Al Nassr” klublari uchun uy maydoni bo‘ladi. Shu bilan birga, bu yerda boks, kibersport, konsertlar va teatr tomoshalari kabi turli sport va madaniy tadbirlar ham o‘tkaziladi.
Eron islomiy mamlakatlarga chaqirmoqda
O‘zbekiston ayollar milliy jamoasi JCh yo‘llanmasini qo‘lga kiritolmadi
Eron Hindistondan qo’lga olingan tankerni ozod qilishni talab qildi
-
Turk dunyosi3 days agoTurkiyaning Baykal K2 bir tomonlama hujumga uchragan uchuvchisiz samolyotining toʻda harakatini sinovdan oʻtkazdi
-
Jamiyat18 hours ago
Tadbirkor boshpanasiz bo‘lgan 5 ta oilani uy-joy bilan ta’minladi
-
Iqtisodiyot3 days ago«Yomg‘ir va qorda ham foydalanishga tayyor bo‘ladi» – Toshkent-Andijon pulli yo‘li haqida nimalar ma’lum?
-
Iqtisodiyot2 days ago“Markaziy Osiyo umumiy investitsiya makonini yaratishi zarur” – Alisher Umirdinov
-
Dunyodan5 days ago
Iroq g‘arbida AQShning yonilg‘i quyuvchi samolyoti urib tushirildi
-
Iqtisodiyot20 hours agopayme Tez QR orqali to‘lovni 3% keshbek bilan ishga tushirmoqda
-
Dunyodan19 hours ago
Eron Hormuz boʻgʻozi orqali cheklangan oʻtishga ruxsat beradi
-
Iqtisodiyot2 days agoMetandan go‘shtgacha. Narxi keskin oshgan mahsulot va xizmatlar