Sport
«Siti» va «Real»da qayta qurish boshlandi. Yozning ilk haftalaridagi transferlar
«Manchester Siti» bir kunda uch nafar yangi futbolchi transferini e’lon qildi, «Real» Trentni tanishtirdi, «Liverpul» Trentga o‘rinbosar topdi.
Klublar o‘rtasidagi jahon chempionati tufayli FIFA 1-10 iyun kunlari maxsus transfer darchasi ochib berdi. Shu tufayli Yevropaning ushbu turnirda ishtirok etuvchi qator klublari o‘z tarkiblarini yozning boshidayoq to‘ldirib olishdi, muxlislar ushbu jamoalar safidagi yangi futbolchilarni turnirda ko‘rishi mumkin. Turnirda ishtirok etmaydigan klublar ham faollik bilan kelishuvlar tuzmoqda (bu futbolchilarda mavsumlar oralig‘idagi o‘rtoqlik o‘yinlarida ishtirok etib, yangi jamoaga moslashish imkoni bo‘ladi). Quyida yozning qizg‘in kechgan ilk haftalarida amalga oshirilgan transferlar haqida.
Trent Aleksander-Arnold: «Liverpul» → «Real» Madrid (10 mln yevro)
Angliyalik himoyachi bolaligidan o‘ynagan «Liverpul»dan «Real»ga erkin agent maqomida o‘tdi. Bu o‘tish kutilgan transfer edi, futbolchi Ispaniya klubiga kelib qo‘shilishi mart oyidayoq ma’lum bo‘lib ulgurgandi. Ammo madridliklar Trentning mersisaydliklar klubi bilan shartnoma muddati tugaydigan 1 iyul sanasini kutib o‘tirmadi. «Real» futbolchini klublar o‘rtasidagi jahon chempionatida o‘ynatish uchun «Liverpul» hisobiga 10 mln yevro o‘tkazib berdi va himoyachi bilan olti yillik shartnoma tuzildi. 12 iyun kuni 26 yoshli futbolchi rasman «Real» futbolchisi sifatida tanishtirildi, u taqdimot marosimida ispan tilini allaqachon to‘liq o‘rganib bo‘lganini namoyish etib, ko‘pchilikni hayron qoldirdi.
Din Hausen: «Bornmut» → «Real» (59,5 mln yevro)
20 yoshli markaziy himoyachining o‘tgan mavsumdagi o‘yinlaridan keyin top-klublar uning uchun navbatga turdi. Ammo, kutilganidek bu poygada Madridning «Real» klubi g‘olib chiqdi. Niderlandiyalik futbolchi Donni Hasuyenning o‘g‘li bo‘lgan Din bolaligidan Ispaniyaning ushbu grandi safida o‘ynashni orzu qilgandi. Shu tufayli tomonlar kelishuvga erishishi oson kechdi. Ispaniya milliy jamoasiga nomzod Hausen «Real» bilan besh yillik shartnoma tuzdi. «Bornmut» esa futbolchi transferi uchun qariyb 60 mln yevro ishlab oldi. Endi Hausendan «Real» uchun yangi Serxio Ramos bo‘lishini kutishadi. Futbolchi aynan uni o‘zining bolalikdagi kumiri deb atagan.
Rayan Sherki: «Lion» → «Manchester Siti» (36,5 mln yevro)
«Manchester Siti» Yevropaning eng iste’dodli hujumkor yarimhimoyachilaridan birini o‘ziniki qildi. Rayan Sherki uchun klub 36,5 mln yevro to‘ladi. Bu yaqin kelajakda superyulduzga aylanish salohiyati bor bo‘lgan futbolchi uchun katta mablag‘ emas. 21 yoshli fransuz yakunlangan mavsumda «Lion» uchun barcha turnirlar doirasida 44 o‘yin o‘tkazib, 12 gol urgan va 20 golga uzatma bergan. Sherki fransuzlar klubi asosiy tarkibida 16 yoshda debyut qilgan, endi u o‘zini APL maydonlarida sinab ko‘radi.
Rayan Ait-Nuri: «Vulverhempton» → «Manchester Siti» (36,8 mln yevro)
«Vulverhempton»ni 2025 yil yozida jiddiy qayta qurish kutmoqda. Klub nafaqat asosiy to‘purari Kunyadan, balki hujumlarga faol qo‘shiladigan himoyachisi Rayan Ait-Nuridan ham ayrildi. Shu bilan birga, «bo‘rilar» ikki futbolchi uchun jami 100 mln yevrodan ko‘proq mablag‘ga ega bo‘ldi. Shundan 36,8 mln yevroni «Manchester Siti» to‘ladi. Ait-Nuri Pep Gvardiola jamoasi bilan besh yillik shartnoma imzolagan. 24 yoshli jazoirlikning asosiy pozitsiyasi – chap qanot himoyasi. Ammo Gvardiola keyingi mavsumda undan butunlay boshqa rollarda foydalanishi ham mumkin.
Teyani Reynders: «Milan» → «Manchester Siti» (55 mln yevro)
«Manchester Siti» sovrinsiz o‘tgan mavsumdan keyin klublar o‘rtasidagi jahon chempionatida sovrin yutishga qaror qildi va yana katta pul bilan bozorga kirdi. Klub bir kun ichida uch transferini e’lon qildi. Gvardiola ixtiyoriga Italiya chempionatining eng yaxshi yarimhimoyachilaridan biri Teyani Reynders ham kelib qo‘shildi. 26 yoshli niderlandiyalik maydondagi vazifalariga ko‘ra Ilkay Gundo‘g‘anni yodga solib yuboradi va maydon markazida istalgan rolni bajarishi mumkin. «Manchester Siti» «Milan»ga ushbu futbolchi uchun 55 mln yevro to‘ladi, Reynders klub bilan besh yillik shartnomaga ega bo‘ldi. «Men «Manchester Siti»ga o‘tganimdan hayratdaman. Bu jahonning eng yaxshi murabbiy, jahon darajasidagi yulduzlar va ajoyib infratuzilmaga ega eng katta klublaridan biridir. Premer-ligada ishtirok etish — orzu edi va bu ro‘yobga chiqdi», — dedi Teyani taqdimot marosimida.
Jyeremi Frimpong: «Bayyer» → «Liverpul» (40 mln yevro)
Bu «Liverpul»ning yozgi transferlar oynasidagi ilk futbolchisi. Klub Jyeremi Frimpongni «Real»ga ketgan Trent Aleksander-Arnoldga voris sifatida ko‘rmoqda. U «Liverpul» safida Virjiyl van Deyk, Kodi Gakpo, Rayan Gravenberh va bosh murabbiy Arne Slotdan keyingi beshinchi niderland bo‘ladi. Frimpong – uslub jihatdan Trentga butunlay teskari. Aleksandr-Arnold markazga ko‘chishni va uzun uzatmalar berishni xush ko‘rgan bo‘lsa, Jyeremi o‘zi qanot bo‘ylab oldinga borishni ma’qul ko‘radi. Slot Frimpongni «Liverpul» tizimiga qanday qo‘shishini kuzatish qiziq bo‘lishi tayin.
Jonatan Ta: «Bayyer» → «Bavariya» (800 ming yevro)
Jonatan Ta shartnomasi muddati tugagani munosabati bilan «Bayyer»ni tark etdi. Germaniyalik futbolchida faoliyatini davom ettirish uchun bir necha variant bor edi («Real», «Barselona», «Bavariya») va yakunda futbolchi Germaniyada qolishga qaror qildi. «Bavariya» ham ushbu himoyachini klublar o‘rtasidagi jahon chempionatiga olib borish uchun «Bayyer»ga 800 ming yevro to‘ladi. Myunxenliklarning turnirdagi natijasiga qarab bu summa miqdori 1 mln yevrogacha chiqishi mumkin. 29 yoshli futbolchi «Bavariya» bilan 2029 yil iyuniga qadar amal qiluvchi shartnoma imzolagan.
Mateus Kunya: «Vulverhempton» → «Manchester Yunayted» (74,2 mln yevro)
«Manchester Yunayted» yevrokuboklarga yo‘llanma ololmagan, klublar o‘rtasidagi JChda ham qatnashmaydi, ammo yozning top-transferlaridan birini amalga oshirdi. Brend kuchi hamon ish bermoqda. «MYu» braziliyalik forvard Mateus Kunyani «Vulverhempton»dan 74,2 mln yevro evaziga xarid qildi. Mankunianliklar transfer summasini bir necha yil mobaynida bo‘lib-bo‘lib to‘laydi. 26 yoshli futbolchining o‘zi yangi klubi bilan besh yillik shartnoma tuzdi. Endi Kunyadan «MYu»ni yevrokuboklarga qaytarishda yordam berish talab etiladi.
Liam Delap: «Ipsvich» → «Chelsi» (35,5 mln yevro)
«Ipsvich» APLni tark etdi. Ammo forvard Liam Delap elita divizionda qoldi. 22 yoshli forvard «Chelsi» bilan olti yillik shartnoma tuzdi. Londonliklar «Manchester Siti» tarbiyalanuvchisi bo‘lgan ushbu futbolchi uchun 35,5 mln yevro to‘lab berishdi. 2023 yilda «Chelsi» manchesterliklar tizimidan chiqqan boshqa bir futbolchi – Koul Palmerni transfer qilishi muvaffaqiyatli bo‘lgandi. Endi Londondagilar Delap klub uchun zarur bo‘lgan sermahsul hujumchi bo‘lishidan umid qilmoqda. U «Siti»ning boshqa tarbiyalanuvchisi bilan endi «Chelsi»da yorqin duet hosil qilishi kutilmoqda.
Mamadu Sarr: «Strasburg» → «Chelsi» (14 mln yevro)
Yana bir yosh iste’dod «Chelsi»da. Londonliklar 19 yoshli himoyachi Mamadu Sarr jamoa mudofaasini kuchaytirishiga umid bog‘lagan. Futbolchi bungacha Fransiyaning «Strasburg» klubi sharafini himoya qilgan (bu klub va «Chelsi» xo‘jayini bir odam). Sarr endi yangi darajada o‘zini sinab ko‘radi va keyingi mavsum Chempionlar ligasida maydonga tushadi. Fransuz futbolchisi London klubi bilan sakkiz yillik shartnomaga imzo chekkan.
Job Bellinghem: «Sanderlend» → «Borussiya» Dortmund (30,5 mln yevro)
Bellinghem, Angliyadan «Borussiya»ga transfer… Tanish holat. Dortmunddagilar mazkur tryukni ikkinchi bor bajarishga qaror qilishdi. Bu safar nemislar jamoasi Judning ukasi Jobni safga qo‘shib oldi. 19 yoshli yarimhimoyachi «Sanderlend»ga APLga qaytishda yordam berdi. Endi esa 30,5 mln yevro evaziga «Borussiya» Dortmundga yo‘l oldi. Bir necha yildan keyin u Job «Real»da paydo bo‘lishini kutish ham mumkin.
Luis Enrike: «Marsel» → «Inter» (23 mln yevro)
Luis Enrike – «Inter»da. Yo‘q, bu «PSJ» bosh murabbiyi emas. Milan jamoasi «Marsel» yetakchilaridan birini o‘z safiga qo‘shib oldi. 23 yoshli vinger o‘tgan mavsumda Fransiya chempionatidagi 35 o‘yinda to‘qqiz gol urdi va 10 assist rasmiylashtirdi. Odatda Enrike hujum qanotida o‘ynaydi: bu «Inter»ning sobiq ustozi Simone Indzagining sxemasida bo‘lmagan pozitsiya. Ammo, katta ehtimol bilan, milanliklar boshqaruviga kelgan Kristian Kivuning jamoa uchun boshqa rejalari va taktikalari mavjud. Klublar o‘rtasidagi jahon chempionatidagi o‘yinlarda 23 yoshli braziliyalik «Inter»ning yetakchilaridan biriga aylanadi, yo‘qmi, shu savolga javob topiladi.
Kivin Kelleher: «Liverpul» → «Brentford» (14,8 mln yevro)
Kivin Kelleher – ajoyib kiper. Ammo Alison salomatligida u «Liverpul»ning asosiy posboni bo‘lishi noreal holat. Shu tufayli 26 yoshli irlandiyalik o‘zi uchun kelgan taklifni qabul qildi. Kelleher endi APLning o‘rtamiyona jamoasi – «Brentford» darvozasini qo‘riqlaydi. «Liverpul» futbolchi uchun 14,8 mln yevro oldi, Kivin – ajoyib jamoaning asosiy posboni bo‘lish imkoniyatga ega bo‘ldi.
Petar Suchich: «Dinamo» Zagreb → «Inter» (14 mln yevro)
«Inter» klublar o‘rtasidagi jahon chempionatida natijaga erishishga bel bog‘lagan. Shu tufayli Zagrebning «Dinamo» klubidan ham yarimhimoyachi Petar Suchich safga qo‘shib olindi. Milanliklar 21 yoshli futbolchi uchun 14 mln yevro to‘lashga rozi bo‘ldi. Xorvatlar klubi Suchichning qayta sotuvidan ham ulushga ega bo‘ladi. Petar «Inter» bilan besh yil muddat amal qiladigan shartnoma imzoladi. Endi u asosiy tarkib uchun Hoqon Chalxono‘g‘li, Genrix Mxitaryan, Nikolo Barella va Davide Frattezi bilan raqobatlashadi.
De Bryuyne: «Manchester Siti» → «Napoli» (erkin agent)
Kevin de Bryuynening «Manchester Siti»da o‘tgan 10 mavsumlik sayohati yakunlandi. So‘nggi yillarda jarohatlardan aziyat chekkan futbolchi jamoaning asosiy tarkibidan tushib qoldi va shartnoma muddati yakunlangach, klub uni qo‘yib yubordi. Endi belgiyalik yarimhimoyachi intensivlik biroz pastroq bo‘lgan Italiya chempionatida ko‘proq o‘yin amaliyotiga ega bo‘lishi tayin. O‘tgan yozda Manchesterning boshqa bir jamoasidan kelgan Skott Maktominay «Napoli»ning navbatdagi chempionligiga katta hissa qo‘shgan va o‘tgan mavsumning eng yaxshi futbolchilaridan biri bo‘lgandi. KDB uning muvaffaqiyatini takrorlashga harakat qiladi.
Kiran Tirni: «Arsenal» → «Seltik» (erkin agent)
Foto: celticfc.com
Tirnining karerasiga jarohatlar xalaqit berdi. «Arsenal» Tirnini 2019 yilda katta umidlar bilan sotib olgandi, ammo shotlandiyalik chap qanot mudofaasidagi muammoni hal qila olmadi. Salomatligidagi muammolar uning asosiy tarkibda o‘rnashib olishiga imkon bermadi. «Real Sosedad»ga bir mavsum ijaraga berilgani ham, Mikel Arteta 2024/2025 yillar mavsumida bergan navbatdagi imkon ham naf bermadi. «Arsenal» Kiran bilan shartnomani uzaytirmadi va 28 yoshli futbolchi «Seltik»ka qaytdi.
Jorjinio: «Arsenal» → «Flamengo» (erkin agent)
Jorjinio ham Mikel Artetaga kerak bo‘lmay qoldi va vataniga yo‘l oldi. 33 yoshli yarimhimoyachi «Flamengo» futbolchisiga aylandi — bu klub Janubiy Amerikaning eng katta klublaridan biri hisoblanadi. Jorjinio yangi jamoasi bilan 2028 yil yoziga qadar amal qiladigan shartnoma imzoladi va 21-raqamni tanladi. Endi u klublar o‘rtasidagi jahon chempionatida ishtirok etadi.
Erik Dayyer: «Bavariya» → «Monako» (erkin agent)
Foto: asmonaco.com
Angliyalik himoyachi kerakli vaqtda «Bavariya»ga yordam berdi va o‘z faoliyatida ilk bor sovrin yutdi. Ammo klub Dayyerga yangi shartnoma taklif qilmadi. Lekin 31 yoshli futbolchiga «Monako»da joy topildi. Dayyer bungacha Portugaliya, Angliya va Germaniya chempionatlarida o‘ynagan. Endi uning faoliyatida yangi sahifa ochiladi.
Anxel Di Mariya: «Benfika» → «Rosario Sentral» (erkin agent)
Foto: rosariocentral.com
Di Mariya ham jonajon klubiga qaytdi. Anxel «Benfika»ni tark etib, «Rosario Sentral» futbolchisiga aylandi. «Bizning umumiy tariximiz uchun hali ko‘p sahifalar yozish kerak», — deyiladi klubning transfer haqidagi anonsida. Di Mariya 2006-2007 yillarda ham «Rosario Sentral» safida o‘ynagan. E’tiborli tomoni, 37 yoshli argentinalik vatanga qaytish haqida o‘tgan mavsum oldidan ham o‘ylagandi. Ammo o‘shanda xavfsizlik nuqtayi nazardan bu rejadan voz kechilgandi (futbolchi va uning oilasiga turli tahdidlar kelgandi).
«Arsenal» so‘nggi daqiqalarda muhim g‘alabaga erishdi, qatorasiga ikkinchi o‘yinda durang o‘ynagan «Siti» endi 9 ochkoga ortda qolmoqda. «Chelsi» yana yutqazdi, «Real»da yirik g‘alaba.
«Arsenal» – «Everton» 2:0
Gollar: Yokeresh, 89 (1:0). Douman, 90+7 (2:0)
«Arsenal»: Rayya, Saliba, Gabriel Magalyayns, Kalafiori (Inkapiye, 74), Timber (Moskera, 38), Subimendi (Douman, 74), Rays, Eze, Madueke (Martinelli, 61), Saka, Havers (Yokeresh, 61)
«Everton»: Pikford, Kin, O`Brayyen, Mikolenko, Garner, Gana Guyye (Jorj, 90+5), Iroegbunam (Rel, 86), Dyusberi-Holl, Ndiay, Makneyl (Armstrong, 86), Betu (Barri, 69)
«Arsenal» o‘z maydonida kechgan o‘yinda to‘pga egalik qildi, ammo dastlabki 20 daqiqa ichida qarshi hujumlardan ikki bor gol o‘tkazib yuborishi mumkin edi. Birinchi holatda Rayyaning xatosidan keyin Maknilning zarbasidan keyin darvozaga kirib ketayotgan to‘pni yotgan holatda oyog‘ini ko‘tarib qolish orqali to‘xtatib qoldi.
Maknilning uzoq masofadan yo‘llagan zarbasi ustundan qaytdi, qaytgan to‘pga birinchi bo‘lib yetib kelgan Ndiay esa vaziyatdan foydalana olmadi. Keyinroq Maknilning bir necha metr masofadan yo‘llagan zarbasini darvozabon qaytardi.
«Kanonirlar» esa tinimsiz hujum uyushtirganiga qaramay (birinchi bo‘limning o‘zida 13 zarba berildi), hisobni ocha olmadi. Birinchi bo‘limdagi eng yodda qolgan vaziyat Havers jarima maydoni ichida yiqilishi bo‘ldi. Bu epizodda Kin avvaliga raqib hujumchisining oyog‘ini bosib oldi, keyin esa qo‘llari bilan turtib yiqitdi, ammo bosh hakam va VAR xonasidagilar kontakt penalti uchun yetarli emas deb topdi.
Ikkinchi bo‘limda esa mezbonlar uzoq masofadan zarba berishga e’tibor qarata boshladi, xususan, Ezening aylantirib yo‘llagan zarbasiga Pikford yetib bora olmadi, ammo to‘p darvoza ustuni yonidan o‘tib ketdi. Keyin esa Arteta katta tavakkalchilikka qo‘l urdi va tayanch yarimhimoyachisi Martin Subimendi o‘rniga o‘ng qanot vingeri Doumanni maydonga tashladi. Aynan shu o‘zgarish o‘yinni hal qildi. Avvaliga ushbu yosh yarimhimoyachining o‘ng qanotdan uzatmasidan keyin Pikford to‘pga chiqishda xatoga yo‘l qo‘ydi, Inkapiye esa to‘pni bo‘sh darvoza qarshisiga yetib kelgan Yokereshning oyoqlari ostiga tashlab berdi.
So‘nggi daqiqalarda mehmonlar hisobni tenglashtirish umidida to‘liq tarkib bilan oldinga tashlandi, Douman esa burchak zarbasidan keyin uyushtirilgan qarshi hujumda bo‘sh darvozani ishg‘ol etib, APL tarixiga kirdi. Maks 16 yosh-u 73 kunligida liga tarixida gol urgan eng yosh futbolchiga aylandi. Bu orqali u Jyeyms Von tomonidan 2005 yilda o‘rnatilgan rekordni (16 yosh-u 270 kun) yangiladi.
Shu tariqada, bu mavsumda zaxiradan tushgan futbolchilari 11 bor gol urgan Mikel Arteta jamoasi qiyinchilik bilan bo‘lsa-da muhim g‘alabaga erishdi.
«Chelsi» – «Nyukasl Yunayted» 0:1
Gol: Gordon, 18 (0:1)
«Chelsi»: Sanches, Chaloba, Fofana (Xato, 82), Kukurelya, Gyusto (Delap, 46), Jyeyms, Kaysedo (Lavia, 61), Fernandes, Garnacho, Palmer, Joao Pedro
«Nyukasl Yunayted»: Ramsdeyl, Botman, Tiau, Holl, Livramento, Uillok (Byorn, 77), Remsi, Voltemade (Joelinton, 67), Barns, Myorfi (Elanga, 78), Gordon
Ogohlantirishlar: Fofana, 23. Kaysedo, 25 – Ramsdeyl, 84. Holl, 89
«Chelsi» «qarg‘alar»ga qarshi Londonda o‘tgan oldingi 12 o‘yindan 11 tasida g‘alaba qozongandi va shanba oqshomidagi o‘yinni ushbu seriyani davom ettirish maqsadida hujumkorlik bilan boshladi. Ammo mezbonlar o‘z imkoniyatlaridan foydalana olishmadi. 18-daqiqada Palmer qulay vaziyatni yo‘qqa chiqarganidan keyin «Nyukasl» muvaffaqiyatli qarshi hujum uyushtirdi va Uillok Gordonni bo‘sh darvoza qarshisiga chiqarib yubordi.
Tanaffusdan keyin Entoni dublga erishishi mumkin edi, ammo darvozaga qaytgan Sanches jamoasini qutqardi. U Liam Rosenior jamoasini o‘yinda qoldirdi, ammo jamoa mag‘lubiyatdan qutulib qolishni uddalay olmadi. «Chelsi» yana ochko yo‘qotib, raqobatchilarga imkon berdi: bugun «MYu» va «Aston Villa» o‘yinida g‘olib bo‘lgan jamoa ilgarilab ketadi, «Liverpul» esa «Chelsi»ni quvib o‘tib, beshinchi o‘ringa ko‘tarilishi mumkin.
«Vest Hem» – «Manchester Siti» 1:1
Gollar: Bernardu Silva, 31 (0:1). Mavropanos, 35 (1:1)
«Vest Hem»: Hermansen, Mavropanos, Disasi, Todibo, Fernandesh, Souchek, Diuf, Van-Bissaka, Pablo (Magassa, 64), Bouen (Kante, 90+6), Kastelyanos (Traore, 75)
«Manchester Siti»: Donnarumma, Geyi, Husanov, Ayt Nuri (Sherki, 60), Mateus Nunes, Rodri, Bernardu Silva (Reynders, 75), O`Rayli, Semenyo (Foden, 75), Marmush (Doku, 60), Holand
Ogohlantirishlar: Magassa, 76. Fernandesh, 89 – Marmush, 11. Bernardu Silva, 37
Birinchi bo‘lim o‘rtalaridan o‘tganida Bernardu Silvaning Holandga uzatmasi to‘g‘ridan to‘g‘ri zarbaga aylanib, hisob ochilganida ko‘pchilik bu o‘yin taqdiri hal bo‘lgani haqida o‘ylay boshlagandi. Ammo «Siti» bu mavsumda ishonchli o‘ynay olmayapti. Biroz o‘tib «Vest Hem» muvozanatni tikladi. Burchak zarbasidan keyin Donnarumma to‘pga chiqishda xatoga yo‘l qo‘ydi va «Arsenal»ning sobiq futbolchisi Mavropanos muvozanatni tikladi.
Bu mezbonlar uchun o‘yindagi ilk zarba edi va bu zarba chempionlik poygasida ishtirok etayotgan jamoaning oyog‘idan chalib qolish uchun yetarli bo‘ldi. Qolgan vaqt davomida «shaharliklar»ning hech qaysisi mezbonlar himoya devorida o‘tmadi, to‘p darvoza sohasiga yetib borganida esa darvozabon Hermansen ishonchli harakat qildi. Endilikda shu kuni o‘yinni diskvalifikatsiya tufayli tribunada o‘tirib kuzatishga majbur bo‘lgan Gvardiola jamoasi «Arsenal»dan 9 ochkoga ortda qolmoqda. «Siti»da bitta zaxira o‘yini borligiga qaramay, deyarli hech kim endi jamoa bu farqni yo‘qqa chiqara olishiga ishonmayapti.
Ispaniya: Molinaning zambarak zarbasi va tinim bilmas Valverde
«Atletiko» – «Xetafe» 1:0
Gol: Molina, 8 (1:0)
«Atletiko»: Musso, Ximenes, Langle, Pubil (Alvares, 66), Koke, Almada (Simeone, 66), Vargas (Liorente, 73), Gonsales, Molina, Baena (Grizmann, 73), Syorlot (Lukman, 66)
«Xetafe»: Soriya, Abkar, Duarte (Riko, 83), Romero, Iglesias, Kiko Femeniya (Birmanchevich, 46), Dakonam, Arambarri (Martin, 74), Milya (Munos, 90+2), Satriano, Vaskes (Liso, 74)
Ogohlantirishlar: Syorlot, 55. Vargas, 68. Molina, 90 –Romero, 60. Liso, 77. Satriano, 90
Chetlatish: Abkar, 55
Yaqinda «Real»ni mag‘lub eta olgan «Xetafe» «Atletiko»ga ham jiddiy muammolar tug‘dirdi. Shu kuni Oblak o‘rniga darvozaga turgan Musso olti seyv ijro etishiga to‘g‘ri keldi. Ammo mezbonlarning qariyb ikki yildan buyon gol urmayotgan himoyachisi Molina o‘yin startidayoq o‘yin taqdirini hal qildi. Argentinalik futbolchining jarima maydoni tashqarisidan yo‘llagan kuchli zarbasidan keyin to‘p olis «to‘qqizlik»ka borib tushdi.
Mehmonlar esa ancha osonroq vaziyatlardan gol ura olmadi. «Matraschilar»ni goh Musso qutqardi, goh «Xetafe» futbolchilari to‘g‘ri zarba bera olmadi. Ikkinchi bo‘lim boshlarida Abkar qizil kartochka olib maydonni tark etganidan keyin esa amalda o‘yin taqdiri hal bo‘ldi. Diyego Simeone jamoasi uchinchi o‘rinni yanada mustahkamladi.
«Real» – «Elche» 4:1
Gollar: Ryudiger, 39 (1:0). Valverde, 44 (2:0). Hausen, 66 (3:0). Manuel Anxel, 85 – avtogol (3:1). Arda Guler, 89 (4:1)
«Real»: Kurtua, Ryudiger (D. Aguado, 61), Hausen, F. Garsiya, Karvahal, Tshuameni (Arda Guler, 58), Pitarch (Palasios, 64), Kamavinga, Valverde (G. Garsiya, 58), Vinisius Junior (Yanez, 58), Dias (Manuel Anxel, 63)
«Elche»: Dituro, Petro (M. Aguado, 64), Affengryuber (Bigas, 74), Chust, Valera, Sangare (Pedrosa, 23), Redondo (Mir, 64), Febas, Sepeda (Xosan, 64), Andre Silva, Neto (Diangana, 74)
Ogohlantirishlar: Kamavinga, 55 – Valera, 62. Affengryuber, 66. Mir, 88
Hafta o‘rtasida YeChL o‘yinida katta kuch sarflagan «Real» futbolchilari ancha vaqtgacha autsayder darvozasi tomon yo‘l topa olmadi. Ammo yarimhimoyaga qaytganidan keyin yayrab o‘ynayotgan Valverdeda bu o‘yinga ham yetarli kuch qolgandi. «Selta» darvozasiga g‘alaba goli, «Siti»ga qarshi o‘yinda het-trik, shanba kuni esa uning seriyasi darvom etdi. Avvaliga Fedening zarbasidan keyin darvozabon to‘pni amallab qaytardi, qaytgan to‘pga esa Ryudiger birinchi bo‘lib yetib keldi va hisob ochildi. Bir necha daqiqa o‘tib esa barchasini Valverdening o‘zi bajardi. U jarima maydoniga yaqinlashib kelib, bir harakat bilan himoyachini yo‘lidan oldi va to‘pni to‘sin ortidan darvoza to‘riga kiritdi.
Alvaro Arbeloa 58-daqiqadayoq Vinisius Junior, Valverde va Tshuameni kabi yetakchi futolchilarini, biroz o‘tib Ryudigerni ham zaxiraga oldi, ular keyingi hafta o‘rtasida «Siti»ga qarshi javob o‘yinida kerak bo‘ladi. Ularning o‘rniga o‘yinni davom ettirgan futbolchilar ham ikkita gol urishdi. Avvaliga 18 yoshli Yanesning uzatmasidan keyin Hausen hisobdagi farqni oshirdi. O‘yin oxirlarida esa Guler maydonning ikkinchi qismidan turib fantastik gol muallifiga aylandi. U zarba bergan nuqtadan darvoza chizig‘igacha bo‘lgan masofa 68 metr chiqadi.
Yirik g‘alabadan keyin madridliklar turnir jadvalida yana «Barselona»ga bir ochkolik masofada yaqinlashib oldi, lekin kataloniyaliklar yakshanba kuni «Sevilya»ga qarshi o‘yin natijasiga ko‘ra yana to‘rt ochkolik farqni tiklashi mumkin.
Bugun, Turkiya Superligasining 26-turi doirasida peshqadam «Galatasaroy» o‘z maydonida «Bashakshehir»ni qabul qiladi.
Uchrashuv Toshkent vaqti bilan soat 22:00 da Istanbuldagi «RAMS Park» stadionida boshlanadi.
«Galatasaroy» 25 o‘yindan so‘ng 61 ochko bilan jadvalda 1-o‘rinda bormoqda. «Bashakshehir» esa 42 ochko bilan 5-pog‘onani egallab turibdi va yevrokuboklar uchun kurashmoqda.
«Istanbul Bashakshehir» bugungi o‘yin uchun asosiy tarkibni e’lon qildi. Eldor Shomurodov — asosiyda, Abbosbek Fayzullayev qaydnomaga ham kiritilmagan.
2026-yilgi Osiyo Kubogi chorak finalida O‘zbekiston ayollar terma jamoasi Janubiy Koreya ayollar terma jamoasidan mag‘lubiyatga uchradi. 6:0 hisobida g‘alaba qozongan koreyslar yarim final yo‘llanmasini qo‘lga kiritdi.
Shunga qaramasdan, milliy jamoamiz Jahon chempionati yo‘llanmasi uchun kurashni davom ettiradi. Bo‘lg‘usi raqib Yaponiya – Filippin uchrashuvida aniqlanadi — ushbu uchrashuvda yengilgan jamoa ustidan g‘alaba qozonsa, O‘zbekiston terma jamoasi 2027-yilda Braziliyada o‘tkaziladigan ayollar o‘rtasidagi JChga yo‘llanma oladi.
Agar jamoa ushbu o‘tish bahsida ham yengilsa, KXDR/Xitoy Taypeyi o‘rtasidagi o‘yinda mag‘lub bo‘lgan jamoa bilan to‘qnash keladi. Bu uchrashuv g‘olibi xalqaro pley-off o‘yinlari orqali mundial yo‘llanmasi uchun kurashni davom ettiradi, mag‘lub musobaqani tark etadi.
2026-yilgi ayollar o‘rtasidagi Osiyo Kubogida 12 ta terma jamoa ishtirok etmoqda. Ular uchta guruhga bo‘lingan holda bahs olib bordi. Guruhlarda dastlabki ikki o‘rinni egallagan jamoalar hamda eng yaxshi ko‘rsatkich qayd etgan ikki nafar uchinchi o‘rin sohibi chorak final bosqichiga yo‘l oldi.
Chorak final g‘oliblari to‘g‘ridan-to‘g‘ri Jahon chempionati yo‘llanmasiga ega bo‘ladi. Mag‘lub jamoalar esa oldindan aniqlangan setka asosida pley-off bosqichida ishtirok etadi. Pley-offda g‘alaba qozongan jamoalar Osiyoning 5 va 6-vakili sifatida mundial yo‘llanmasini qo‘lga kiritadi.
JCh-2027 yo‘llanmasi uchun pley-off o‘yinlari:
O‘zbekiston — Yaponiya/Filippin
KXDR — Xitoy Taypeyi
Yarim finalga yo‘l olgan Avstraliya, Xitoy va Janubiy Koreya terma jamoalari allaqachon Jahon chempionati ishtirokchisiga aylanishga ulgurdi. So‘nggi yarim finalchi nomi Yaponiya – Filippin uchrashuvidan keyin ma’lum bo‘ladi.
Ma’lumot uchun: 2029-yilgi ayollar o‘rtasidagi Osiyo Kubogi O‘zbekistonda o‘tkaziladi.
Sport
Futbol bo‘yicha O‘zbekiston ayollar terma jamoasi Osiyo kubogi chorak finalida yirik hisobda mag‘lub bo‘ldi
Endi ular jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Avstraliyada bo‘lib o‘tayotgan ayollar o‘rtasida Osiyo kubogi chorak finalida O‘zbekiston terma jamoasi futbolchilari Janubiy koreyalik raqibalariga qarshi maydonga tushdi.
Bahs 6:0 hisobida Janubiy Koreya ayollar terma jamoasi g‘alabasi bilan yakunlandi.
O‘zbekistonlik ayol futbolchilar bangladeshlik raqibalarini 4:0 hisobida yengib chorak finalga chiqishgandi.
Endi ular 19 mart kuni jahon chempionati yo‘llanmasi uchun Yaponiya – Filippin bahsida imkoniyatni boy bergan jamoa bilan kuch sinashishadi.
Osiyo kubogida eng yaxshi natijaga erishgan olti jamoa 2027 yilgi ayollar o‘rtasidagi Jahon chempionatiga to‘g‘ridan-to‘g‘ri yo‘llanmani qo‘lga kiritadi.
U 50 kg vazn toifasida vaqtinchalik chempionlik kamari uchun puerto-rikolik Jonatan Gonsalesga qarshi jang qiladi.
17–19 aprel kunlari Qirg‘iziston poytaxti Bishkek shahrida professional boks oqshomi bo‘lib o‘tadi. Unda ikki karra Olimpiya chempioni Hasanboy Do‘smatov ham ringga ko‘tarilishi kutilmoqda.
WBA reytingida oltinchi o‘rinni egallab turgan charm qo‘lqop ustasi 50 kg vazn toifasida vaqtinchalik chempionlik kamari uchun puerto-rikolik Jonatan Gonsalesga qarshi jang qiladi.
Hasanboy Do‘smatov professional ringdagi so‘nggi jangini 2025 yil 20 iyul kuni filippinlik Mark Antonioga qarshi o‘tkazib, g‘alaba qozongan edi. Shu tariqa, uning professional boksdagi janglari soni 7 taga yetdi, ularning barchasi Do‘smatov foydasiga hal bo‘lgan.
Jonatan Gonsales hisobida 29 g‘alaba, 4 durang va 1 mag‘lubiyat mavjud.
Prezidentning yangi qarori e’lon qilindi
«Siti» deyarli kurashdan chiqdi, Gulerdan shedevr gol. Kun o‘yinlari
Uch yil avval pora olgan sobiq arxiv xodimasi sudga tortildi
-
Jamiyat4 days agoNogironlar uchun onlayn platforma tenderida shubhali holatlar aniqlandi
-
Jamiyat4 days agoRulda kamar taqmagan Sardor Mamadaliyev jarimaga tortildi
-
Dunyodan4 days ago
Ali Xomanaiyning o‘g‘li Eronning yangi oliy rahbari etib saylandi
-
Siyosat2 days agoPrezident Mirziyoyev fuqarolardan murojaatlar ko‘payib borayotgan bir paytda militsiya xodimlarining qo‘pol xatti-harakatlarini tanqid qildi
-
Siyosat3 days agoIkki nafar O‘zbekiston fuqarosi firibgarlik va o‘g‘irlik hodisasidan so‘ng Bahrayn va AQShdan qaytib keldi
-
Turk dunyosi4 days agoEron urushi kuchayib borayotgan bir paytda Turkiya o’rtada qoldi
-
Sport4 days agoAvstraliyadan boshpana so‘ragan eronlik futbolchilardan biri fikrini o‘zgartirdi
-
Iqtisodiyot3 days ago
13-mart kuni ham dollar kursi pastlaydi