Sport
«Siti» va «Barsa» yirik g‘alabalar bilan boshlashdi. Kun o‘yinlari
Abduqodir Husanov zaxiradan maydonga tushdi, «Tottenhem» hujumchisi shedevr gol urdi. Shanba oqshomida Yevropa chempionatlaridagi asosiy voqealar va o‘yinlardagi gollar.
Angliya: Risharlisonning shedevri va Holandning barqarorligi
APL. 1-tur. 16 avgust
«Aston Villa» — Nyukasl 0:0
«Aston Villa»: Bizot, Kesh, Konsa, Mings, Din, Kamara, Onana, Makginn (Malen, 84), Tilemans, Rodjyers, Uotkins.
«Nyukasl»: Poup, Trippiyer, Sher, Byorn, Livramento, Bruno, Tonali, Joelinton, Elanga (Myorfi, 78), Gordon, Barns (Osula 90).
Ogohlantirishlar: Joelinton (45) – Kamara (58).
Chetlatish: Konsa 66.
«Nyukasl» mavsumni isyon ko‘targan va o‘zini «Liverpul»ga qo‘yib yuborishni talab qilayotgan Isaksiz boshladi. Shvetsiyalik hujumchiga muqobil yo‘qligi tufayli Eddi Hau Gordon, Elanga va Barnsdan iborat bir-birining o‘rnini almashtirib o‘ynovchi hujum uchligini tuzdi. «Aston Villa» esa o‘yinni Emiliano Martinessiz boshladi. Argentinalik posbon Birminghemda qolgan, ammo diskvalifikatsiya tufayli birinchi turni o‘tkazib yuborishga majbur edi. Uning o‘rnini egallagan Bizot esa bir qancha vaziyatlarda mezbonlarni qutqarib qoldi, hujum vakillari esa juda sust harakat qilishdi. Unai Emeri shogirdlari dastlabki 45 daqiqalikda raqib darvozasi tomon birorta ham zarba berolmadi.
Ikkinchi bo‘limda esa 66-daqiqda Konsaning maydondan chetlatilishi «Villa»ning ahvolini yanada og‘irlashtirdi. Shunday ekan, golsiz durangni mezbonlar foydasiga yozish mumkin, ushbu jamoa moliyaviy muammolar tufayli yozgi transferlarda faollik qila olmadi. O‘tgan mavsumda klub faqat Duglas Luizni sotish evaziga APLdagi xarajatlar limitida balansga erisha olgandi. Ammo jamoa baribir moliyaviy feyr-pley qoidalarini buzgan, shuning uchun yozda UYeFA 9,5 million funt miqdorida jarima qo‘llagan. Emeri qoidalar eskirgani va ko‘plab klublarni cheklab, o‘z oldiga katta maqsadlar qo‘yishga xalal berayotgani haqida gapirdi. Ammo qonunlarga rioya qilish kerak, shu tufayli «Villa» yangi xaridlar uchun xarajat qila olmaydi, muvozanatni esa daromadlarni keskin ko‘tarish yoki maoshlarni qisqartirish orqali muvozanatlashtirish mumkin.
«Tottenhem» — «Byornli» 3:0
Gollar: Risharlison 10, 60 (dubl), Jonson 66.
«Tottenhem»: Vikario, Porro, Romero, van de Ven, Spens, Grey (Bentankur, 72), Bergvall (Palinya, 80), Quddus (Tel, 85), Sarr, Jonson (Odober, 80), Risharlison (Solanke, 72).
«Byornli»: Dubravka, Zonne (Chauna, 74), Uoker, Ekdal, Estev, Gartman, Mejbri (Larsen, 63), Kallen, Loran (Ugochukvu, 63), Entoni (Edvards, 85), Foster (Fleming, 74).
«Shporlar» birinchi turni shu qadar ko‘tarinki boshlashdiki, endi ko‘pchilik Quddus va Risharlison juftligini klub afsonalari Keyn hamda Son Hyong Min bilan solishtirmoqda. Bu juftlik Yevropa Superkubogida ham yaxshi o‘ynagan, shanba oqshomida esa o‘yinni hal qilishdi. Ganalik yarimhimoyachi ikki bor assistentlik qildi, braziliyalik hujumchi uning uzatmalarini golga aylantirdi. Mavsum endigina boshlanganiga qaramay, hozirdan aytish mumkinki, Risharlisonning «qaychi uslubi»dagi zarbasi chempionatning yakuniy hit-paradidan o‘rin oladi.
Dubl muallifi bu oqshomda asosiy tarkibdagi o‘rnini Solankedan olib qo‘ydi deyish mumkin. Risharlison uchinchi golli hujumda ham ishtirok etdi, Brennan Jonson ikkinchi bo‘lim o‘rtalarida hisobni yiriklashtirdi – o‘tgan mavsumni 16-o‘rinda yakunlagan jamoa yangi bosh murabbiy Tomas Frank bilan yangi mavsumni kuchli boshlamoqda. Chempionshipdan qaytgan «Byornli»da esa vaziyatni o‘zgartirish uchun hech qanday imkoniyat bo‘lmadi.
«Vulverhempton» — «Manchester Siti» 4:0
Gollar: Holand 34, 61 (dubl), Reynders 37, Sherki 81.
«Vulverhempton»: Joze Sa, Agbadu, T. Gomesh, Doerti, Andre (Bueno 72), Gomes, Volfe (Lopes 72), Huver (R. Gomesh 73), Munetsi, Bellegard (Arias 73), Larsen (Hvang Hi Chhang 82)
«Manchester Siti»: Trafford, Ruben Diash, Stouns (Husanov 82), Ayt-Nuri, Lyuis (Mateus Nunes 66), Reynders, Gonsales, Bernardu Silva (O’Rayli 66), Doku (Marmush 66), Bobb, Holand (Sherki 73)
Ogohlantirishlar: Doerti, 67 – Reynders, 54. O’Rayli, 81
«Manchester Siti» mavsumni «Vulverhempton»ni yirik hisobda mag‘lub etish bilan boshladi, Holand esa barqarorlik namunasini ko‘rsatdi. Avvaliga Lyuisning qanotdan uzatmasidan keyin to‘pni bo‘sh darvozaga kiritib yuborgan norvegiyalik qatorasiga to‘rtinchi mavsum ilk turda gol urmoqda. Lekin bu APL rekordi emas: Erlingdan Salohning rekordini takrorlash uchun yana ikkita shunday start talab etiladi.
Bu oqshomning asosiy qahramoni esa yozda «Milan»dan xarid qilingan Teyani Reynders bo‘ldi, u o‘yindagi uchta golda ishtirok etdi. Niderlandiyalik futbolchi avvaliga to‘pni parashyut uslubida oldingi chiziqqa tashlab berish orqali raqib himoyasini buzib o‘tgach, Lyuis Holandni bo‘sh darvoza qarshisiga chiqardi, keyin esa uning o‘zi Bobbning uzatmasini golga aylantirdi, ikkinchi bo‘limda Holandning ikkinchi goliga hammualliflik qildi. Bungacha «shaharliklar» safida APLdagi debyutida faqat Serxio Aguero gol va golli pas bilan boshlagandi.
Yana bir yangi futbolchi, «Lion»dan kelgan Rayan Sherki ham zaxiradan maydonga tushib, yakuniy natijani o‘rnatdi — 4:0.
Shu kuni Gvardiola o‘zbekistonlik himoyachi Abduqodir Husanovni ham zaxiradan tushirdi, u oxirgi o‘n daqiqalikda Jon Stounz o‘rnida harakat qildi.
«Sanderlend» — «Vest Hem» 3:0
Gollar: Mayyenda 61, Ballard 73, Isidor 90+2.
«Sanderlend» sakkiz yil ichida ilk bor APLga qaytdi va darhol «Vest Hem»ni ojiz qoldirdi (3:0). Barchasi ikkinchi bo‘limda hal qilindi: 20 yoshli hujumchi Elieser Mayyenda va himoyachi Deniel Bellard gol urishdi.
Vilzon Izidor esa 90+2-daqiqada qarshi hujumdan hisobni yiriklashtirdi. Fransuz hujumchisi zaxiradan maydonga tushdi va murabbiy ishonchini oqladi. Chempionshipning o‘tgan mavsumida u 43 o‘yinda 12 kiritgandi, endi esa APLda ham jamoasiga yordam bermoqda.
«Sanderlend» fanatlari jamoaning APLga qaytishi munosabati bilan ulkan banner tayyorlashgandi va futbolchilar ham ularni xursand qilishdi.
«Brayton» — «Fulhem» 1:1
Gollar: O’Rayli 55 (pen) — Muniz 90+6.
«Brayton» «Fulhem» bilan o‘yinning so‘nggi daqiqasida g‘alabani qo‘ldan chiqardi – 90+6 (1:1). 55-daqiqada Mettyu O’Rayli penaltini aniq ijro etgandi, ikkinchi bo‘lim davomida mezbonlar zaxira o‘rindig‘idan o‘yinga qo‘shilgan Rodrigo Muniz esa jamoasini mag‘lubiyatdan qutqardi. Ushbu hujumchiga «Atalanta» qiziqayotgandi, ammo «Fulhem» uni sotmayapti – gol buni izohladi.
Yakshanba kuni muxlislarni yangilangan «MYu» va yozgi transferlarda eng faol klublardan biri bo‘lgan «Arsenal»ni qabul qiladi. Shuningdek, «Chelsi» «Kristal Pelas»ga, «Nottinghem Forest» bosh murabbiysiz qolgan «Brentford»ga qarshi o‘ynaydi, chempionshipdan chiqqan uchinchi jamoa bo‘lmish «Lids» «Everton» sinovidan o‘tadi.
Ispaniya: Yamal hal qildi
La Liga. 1-tur
«Malyorka» – «Barselona» 0:3
Gollar: Rafinya (7), Torres (23), Yamal (90+4).
«Malyorka» – Roman, Morey (Maskarell, 46), Valent, Raylo, Moyika (Lato, 90+1), Morlanes, Sanches, Asano (Jozef, 46), Torre (Rodriges, 46), Darder, Muriki.
«Barselona» – Garsiya, Balde (Torrens, 68), Kubarsi (Gavi, 69), Arauxo, Garsiya, De Yong, Pedri, Yamal, Fermin (Olmo, 46), Rafinya (Kunde, 77), Torres (Reshford, 69).
Ogohlantirishlar: Morey (9), Morlanes (24, 33), Torre (42) – Rafinya (45+7).
Chetlatishlar: Morlanes (33), Muriki (39).
«Barselona» hali ham o‘tgan mavsumni davom ettirayotgandek. Yettinchi daqiqa, Yamalning o‘z uslubida olis ustun tomon uzatgan pasi va Rafinya gazonga sapchigan to‘pni bosh bilan darvoza to‘riga kiritib yuborishi. Shu daqiqadayoq «Malyorka»ni bu oqshom hech qanday yaxshilik kutmayotgani ayon bo‘lgandi, ammo ko‘k-anorranglilarning ikkinchi goli bahslarni keltirib chiqardi. Ijtimoiy tarmoqlarda feyr-pley prinsiplari haqida muhokamalar boshlanib ketdi, ammo tan olish kerakki, amalda kataloniyaliklar o‘yin qoidalarini buzishmadi. Shunchaki Yamalning zarbasidan keyin yuzi bilan to‘p yo‘lidan chiqqan Railo gazonda yotganganiga qaramay, hujumni davom ettirishdi.
Hakam o‘yinni to‘xtatishga asos ko‘rmadi, Ferran Torres esa hisobdagi farqni oshirdi. Shu bilan birga, «Barsa» futbolchilari vaziyatdan kelib chiqib, golni nishonlashmadi.
Mezbonlarning muammolari esa qor uyumidek o‘sib bordi. 33-daqiqada Yamalga ishlatilgan foldan keyin Morlanes maydonni barvaqt tark etdi.
Bundan oldinroq arbitr bilan bahslashgani uchun ogohlantirilgandi va qo‘polligi uchun unga ikkinchi sariq kartochka ham ko‘rsatildi. Bo‘lim oxirida esa Murichi to‘pni egallashga harakat qilib, oyog‘ini shu qadar baland ko‘tardiki, «Barsa»ning yangi darvozaboni Joan Garsiyaning boshiga butsasining ostki qismi bilan zarba berib yubordi. VAR bilan maslahatlashuvdan keyn albaniyalik hujumchi to‘g‘ridan to‘g‘ri qizil kartochka olib, jamoadoshlarini juda qiyin ahvolga tushirib qo‘ydi, shu bilan amalda o‘yin taqdiri hal bo‘ldi.
Lekin Hansi Flik jamoasi odatdagi kabi golga tashnalikni namoyish etmadi va mezbonlar darvozasini tinimsiz o‘qqa tutmadi. Ammo o‘yin oxiridagi bahs vaqtida raqibning turtishidan jahli chiqqan Yamal biroz o‘tib hisobni yirik ko‘rinishga keltirdi – u Gavidan to‘pni qabul qilib oldi, bir necha himoyachi orasidan o‘tdi va yuqori burchakni aniq nishonga oldi.
Germaniya: Dias sovrin olishni boshladi
Germaniya cuperkubogi
«Shtutgart» – «Bavariya» 1:2
Gollar: Leveling (90+3) – Keyn (18), Dias (77).
«Shtutgart»: Bredlov. Xakes. Shabo (Xendriks, 71). Mittelshtedt. Vagnoman (Assinon, 81). Shtiller (Andres, 87). Karazor (Narti, 81). Deniz Undav. Fyurix (Demirovich, 71). Leveling. Voltemade
«Bavariya»: Noyyer. Upamekano (Kim Min Dje, 80). Ta. Stanishich. Laymer (Boe, 72). Kimmix. Goretska (Bishof, 90+3). Olise (Karl, 90+3). Dias. Gnabri (Rafael Gerreyru, 80). Keyn
Ogohlantirishlar: Mittelshtedt (44) – (Upamekano (35), Olise (45).
Bundesliga klublarining aksariyati mavsumni Germaniya kubogining 1/32 final o‘yinlarida quyi divizion vakillarini yakson qilish bilan boshlayotgan paytda (kun rekordchisi «Volfsburg» 9:0 hisobida g‘alaba qozondi), «Bavariya» va «Shtutgart» Superkubok uchun maydonga tushdi. O‘tgan mavsumda Germaniya kubogini qo‘lga kiritgan «Shtutgart» o‘z stadionida yana bir sovringa ega chiqish uchun hamma ishni qilishdi, ammo o‘yin taqdirini jamoalar safidagi futbolchilarning individual mahorati darajasi hal qildi.
Xususan, o‘tgan mavsum kashfiyoti bo‘lgan va «Bavariya» nishoniga aylangan Voltamade ajoyib pozitsiyadan turib to‘pni Noyyerga qarata tepgan bo‘lsa, Keyn esa optimal qaror qabul qilishi uchun bir necha soniya yetarli bo‘ldi. Himoyachining xatosini poylab turgan Harri ildamlik qildi va yiqilayotib, to‘pni darvozaga yo‘lladi. Ssenariy bo‘yicha o‘yinning asosiy qismi ham shunga o‘xshash bo‘ldi. «Shtutgart»ning bosimi eng yuqori cho‘qqisiga chiqqanida Noyyer rikoshet bo‘lib kelgan to‘pni ham qaytardi, bunga javoban uyushtirilgan hujumda esa Dias Gnabrining uzatmasidan keyin Germaniyadagi debyut o‘yinida g‘alaba golini nishonladi. «Liverpul»ning sobiq forvardi kabi futbolchilar saviyadagi farqni ko‘rsatmoqda, Levelingning qo‘shimcha daqiqalardagi goli esa hech narsani o‘zgartira olmadi.
«Inter» ikki mavsumdan so‘ng, yangi bosh murabbiy Kristian Kivu qo‘l ostida chempionlik unvonini qaytarib oldi.
«Inter» A Seriyaning 35-turida «Parma»ni 2:0 hisobida mag‘lub etib, muddatidan oldin Italiya chempioni bo‘ldi.
Bu g‘alabadan so‘ng, bosh murabbiy Kristian Kivu shogirdlari musobaqa yakuniga 3 tur qolganida 82 ochko to‘pladi, eng yaqin ta’qibchi «Napoli» hisobida 70 ochko bor.
Shu tariqa, «Inter» ikki mavsumdan so‘ng chempionlik unvonini qaytarib oldi. Milanliklar oxirgi marta 2023/24-yilgi mavsumda g‘olib bo‘lgan edi.
2025 yil iyun oyida «Inter» bosh murabbiyi bo‘lgan ruminiyalik mutaxassis Kristian Kivu murabbiylik faoliyatidagi ilk sovrinini qo‘lga kiritdi. U Joze Mourinodan keyin (2008/09 va 2009/10-yilgi mavsumlar) A Seriyada g‘alaba qozongan birinchi xorijlik murabbiy bo‘ldi. O‘sha yillarda Kivuning o‘zi portugaliyalik murabbiy qo‘l ostida «Inter» himoyasida o‘ynagan. Shundan beri Italiya chempionatida faqat italiyalik murabbiylar g‘alaba qozongan edi: Massimiliano Allegri, Antonio Konte, Mauritsio Sarri, Stefano Pioli, Luchano Spalletti va Simone Inzagi.
Italiyada skudettolar soni bo‘yicha «Inter» ikkinchi o‘rinda turadi: 21 ta unvon. Rekordchi — «Yuventus» (36 ta sovrin). «Milan»da — 19 ta unvon.
Kivu jamoasida mavsumni oltin dubl bilan yakunlash uchun ajoyib imkoniyat bor. 13 may kuni «neradzurri» Italiya kubogi finalida «Latsio» bilan o‘ynaydi.
Angliya chempionatining 35-turi uchrashuvi oldidan stadionda bo‘lgan Fergyuson o‘zini yomon his qilganidan so‘ng shifoxonaga olib ketilgan. Xabar qilinishicha, gap ehtiyot chorasi haqida bormoqda.
«Manchester Yunayted»ning sobiq murabbiyi ser Aleks Fergyuson jamoaning «Liverpul»ga qarshi bahsi oldidan o‘zini yomon his qildi va shifoxonaga olib ketildi, deb xabar berdi Daily Mail.
Nashr xabariga ko‘ra, 84 yoshli Fergyuson o‘yin boshlanishidan bir soat oldin shifoxonaga yotqizilgan. Unga ehtiyot chorasi sifatida tibbiy kuzatuv tayinlangan. Fergyusonga tez vaqt ichida uyiga javob berilishi kutilmoqda.
Aleks Fergyuson — «Manchester Yunayted» tarixidagi eng sovrindor murabbiy hisoblanadi. U klubni 1986 yildan 2013 yilgacha boshqargan. «Manchester Yunayted» Fergyuson boshqaruvida 13 marta Angliya chempioni bo‘lgan. Shotlandiyalik murabbiy klubdagi 26 yillik faoliyati davomida jami 38ta sovrinni qo‘lga kiritgan.
Murabbiylikdan ketganidan so‘ng Fergyuson «Manchester Yunayted» elchisi va klub direktorlar kengashi a’zosi sifatida faoliyat yuritdi. 2024 yil oktyabrda klubning yangi egasi Jim Retkliff va INEOS kompaniyasi unga elchilik faoliyati uchun yiliga 2,16 mln funt sterlingga teng maosh to‘lashni to‘xtatdi.
«Arsenal» turnir jadvalida «Siti» bilan oradagi farqni 6 ochkoga yetkazdi, Ispaniyada esa bugun «Real» Kataloniyaning «Espanyol» jamoasiga qarshi o‘yinda ochko yo‘qotadigan bo‘lsa, bu turda navbatdagi g‘alabaga erishgan «Barselona» muddatidan oldin chempionlikni nishonlashi mumkin.
Angliya: Tiago Holand bilan poygalashmoqda
«Brentford» – «Vest Hem» 3:0
Gollar: Mavropanos, 15 – avtogol (1:0). Tiago, 54 – penalti (2:0). Damsgor, 82 (3:0)
«Brentford»: Kelleher, van der Berg, Kollinz, Lyuis-Potter (Hiki, 90+1), Kayode, Yyensen, Yarmolyuk, Damsgor (Dasilva, 90+1), Shade (Ayyer, 80), Uattara (Furo, 90), Tiago
«Vest Hem»: Hermansen, Disasi, Mavropanos, Diuf (Traore, 74), Uoker-Piters (Van-Bissaka, 65), Fernandesh, Souchek, Sammervill (Skarlz, 88), Bouen (Magassa, 88), Pablo, Kastelyanos (Uilson, 65)
Ogohlantirishlar: Kayode, 73 – Kastelyanos, 59. Sammervill, 62. Skarlz, 90
Bu mavsumda APLda qolish uchun kurash chempionlik tituli uchun kurashdagi kabi qizg‘in kechmayapti. «Vulverhempton» va «Byornli» chempionshipga tushib ketishi allaqachon aniq bo‘lgan, mavsumning uchinchi omadsiz jamoasi esa katta ehtimol bilan «Vest Hem» klubi bo‘ladi. Shanba kuni ushbu jamoa «Brentford» maydonida ilojsiz ahvolda qoldi va hozirda 18-o‘rinda turgan «Tottenhem»da turnir jadvalining quyi qismini tark etish uchun yaxshi imkoniyat hosil bo‘ldi. «Bolg‘achilar» darvozasiga uchta javobsiz gol urgan «asalarilar» yevrokuboklar yo‘llanmasi uchun kurash olib bormoqda, jamoa to‘purari Igor Tiago mavsumdagi sakkizinchi penaltini aniq ijro etib, to‘purarlar poygasida Holandni quyishda ta’qib etmoqda. Hozircha bu poygada norvegiyalik hujumchi ikkita gol oldinda (24:22), ammo braziliyalik hujumchi hozir pik formasida – u gollarining yarmini 2026 yilda urgan va bu borada hech bir hujumchi unga teng kelolmaydi.
«Arsenal» – «Fulhem» 3:0
Gollar: Yokeresh, 9 (1:0). Saka, 40 (2:0). Yokeresh, 45+4 (3:0)
«Arsenal»: Rayya, Saliba, Gabriel Magalyayns, Kalafiori, Uayt (Moskera, 83), Rays (Subimendi, 64), Lyuis-Skelli, Eze (Douman, 78), Trossar, Saka (Madueke, 46), Yokeresh (Gabriel Jyezus, 64)
«Fulhem»: Leno, Bassi, Andersen, Robinson, Kastan, Rid (Kerni, 63), Lukich, Smit-Rou (Kusi-Asare, 78), Chukvueze (King, 64), Uilson (Bobb, 64), Ximenes (Rodrigu Munis, 73)
Ogohlantirish: Lukich, 23
Chempionlik poygasida qatnashayotgan «Arsenal» esa bu oqshom raqibni yirik hisobda mag‘lub etish uchun maydonga tushgandi va buni birinchi bo‘limdayoq uddaladi. Arteta shu kuni boshlang‘ich tarkibdagi tanlovlari bilan ko‘pchilikni ajablantirdi. Birinchidan, so‘nggi vaqtlarda muntazam ravishda ilk daqiqalardan o‘ynab kelgan Inkapiye zaxirada qoldirildi va uning o‘rnini hujumkorligi bilan farq qiladigan Kalafiori egalladi. Ikkinchidan, bu mavsumda top-5 ligalarda eng ko‘p o‘ynagan yarimhimoyachi bo‘lib turgan Martin Subimendiga dam berildi. Uchinchidan, uning o‘rniga tayanch yarimhimoyasiga Rays o‘tkazildi, Deklanning o‘rniga esa chap qanot himoyachisi Lyuis-Skelli tushirildi. Shu bilan birga, hujumning o‘ng qanotida ancha vaqtdan buyon jarohatini davolagan Saka paydo bo‘ldi. Aynan Saka va Skellining harakatlari o‘yin taqdirini hal qildi. Bukayo o‘z qanotida istagan ishini qildi va uning uzatmasidan keyin Yokeresh tezkor gol bilan hisobni ochdi.
Keyin esa Sakaning o‘zi shvetsiyalik hujumchining uzatmasini golga aylantirdi. Arteta uni seshanba oqshomida YeChL yarimfinalida «Atletiko»ga qarshi kechadigan javob o‘yini uchun asrashga qaror qilib, tanaffusda zaxiraga oldi. Ammo u unga 45 daqiqa ham uchta yubiley natijaga erishish uchun yetarli bo‘ldi – 80 gol, 70 assist va 150 ball. Uning maydonga tushishi Yokereshning ham o‘yinini ochib yubordi, u bo‘lim oxirlarida Trossarning uzatmasi orqali dubl qayd etdi. Bu uning uchun «Arsenal» safida ilk bor bir o‘yinda 2+1 ko‘rsatkich qayd etishi bo‘ldi. Shuningdek, Viktor Aleksis Sanches davridan buyon «Arsenal»dagi ilk mavsumida yigirmadan ortiq gol urgan (21) ilk futbolchiga aylandi.
Bu o‘yin mezbonlarning to‘liq ustunligida o‘tgani quyidagi suratda yaqqol aks etgan: «Arsenal» himoya chizig‘i shu qadar yuqori joylashganki, darvozabon David Rayya maydonning ikkinchi qismiga kelib podkat amalga oshirmoqda.
Bu o‘yindagi yirik hisobdagi g‘alaba chempionlik poygasida qo‘l kelishi mumkin, agar mavsum yakunida «Arsenal» va «Manchester Siti»ning ochkolari teng kelib qolsa, birinchi navbatda to‘plar nisbatiga qaraladi. Hozirda «kanonirlar» +4 ko‘rsatkichiga ega va keyingi raqiblar ham nisbatan osonroq: «Vest Hem» (18-o‘rin), «Byornli» (19-o‘rin) va «Kristal Pelas» (14-o‘rin). «Siti»ning qolgan 5 raqibidan 3 tasi yevrokuboklar uchun kurashmoqda: «Everton» (11-o‘rin), «Brentford» (6-o‘rin), «Bornmut» (8-o‘rin), «Kristal Pelas» (14-o‘rin) va «Aston Villa» (5-o‘rin).
Ispaniya: Simeonening 1000-o‘yini va YeChLga chiqqan «Vilyarreal»
«Vilyarreal» – «Levante» 2:1
Gol: Mikautadze, 38 (1:0). Espi, 51 (1:1). Moleyro, 62 (2:1). Mikautadze, 68 (3:1). Byukenen, 87 (4:1). Pepe, 90 (5:1)
«Vilyarreal»: Tenas, Veyga, Navarro (Kambvala, 81), Pedrasa (Kardona, 74), Frimen, Parexo (Parti, 74), Komesanya, Moleyro, Pepe, J. Moreno (Byukenen, 84), Mikautadze, Peres
«Levante»: Rayan, M. Moreno, Matturro, Pampin, Tolyan, Arriaga (Ragube, 68), Olasagasti, Pablo Martines (Bruge, 77), Romero (Tunde, 46, Etta Eyong, 68), Alvares (Losada, 30), Espi
Ogohlantirishlar: Parexo, 45. Veyga, 55 – Arriaga, 45
Mavsumning katta qismida uchinchi o‘rinni o‘zida saqlab turgan «Vilyarreal» bu turda «Levante»ni yirik hisobda tor-mor etib, valensiyaliklarning ligada qolish imkoniyatlarini amalda nolga tenglashtirdi. O‘z navbatida, «submarinalar» bu g‘alaba orqali qatorasiga ikkinchi mavsumda Chempionlar ligasi umumiy guruh bosqichida ishtirok etishini kafolatladi. Marselino shogirdlarida yevrokubokning bu mavsumidagi muvaffaqiyatsizlikni to‘g‘rilash imkoni bo‘ladi. Shanba oqshomidagi o‘yinni Mikautadzening dubli hal qildi, u avvaliga raqib himoyasidagi qo‘pol xatodan foydalandi, keyin esa Pepening qanotdan uzatmasini darvoza to‘riga to‘g‘rilab yubordi. O‘tgan yozda «Lion»dan Ispaniyaga ko‘chib o‘tgan ushbu gurjistonlik hujumchi ilk mavsumida barcha turnirlar doirasida 13 gol urishga erishdi.
«Valensiya» – Atletiko» 0:2
Gollar: Luke, 74 (0:1). Kubo, 82 (0:2)
«Valensiya»: Dimitriyevski, Tarrega, Pepelu, Xose Gayya (Vaskes, 73), Saraviya (Raba, 82), Rodriges, Gerra, Ugrinich (Duro, 59), Rioxa (Diyego Lopes, 59), Sodiq, Ramazani (Gruneveld, 73)
«Atletiko»: Musso, Langle, Le Norman, Dias, Bonyar (Purich, 90+7), Mendosa (Koke, 73), Vargas, Morsilio (Luke, 63), Almada (Grizmann, 73), Molina, Belaid (Kubo, 63)
Ogohlantirishlar: Tarrega, 67 – Almada, 29. Mendosa, 52. Vargas, 61
«Atletiko» «Valensiya» uchun noqulay raqib sifatidagi maqomini mustahkamlab, qatorasiga beshinchi o‘zaro o‘yinda g‘alaba qozondi. Qolaversa, «matraschilar» o‘yinning birinchi bo‘limida mezbonlarga darvoza sohasi tomon birorta zarba berishga imkon qoldirmadi, ikkinchi bo‘lim oxirida esa shu kuni la ligada debyut qilgan ikki yosh futbolchi «ko‘rshapalaklar» jamoasini nokautga uchratdi. Diyego Simeone YeChL yarimfinali doirasida Londonga safar oldidan asosiy tarkib futbolchilariga dam bergandi va yosh futbolchilar taqdim etilgan imkoniyatdan foydalanishdi.
Avvaliga 20 yoshli forvard Luke o‘z debyutini gol bilan nishonladi, keyin esa 18 yoshli Migel Kubo bu darajadagi ilk o‘yinini madridliklar afsonasi Grizmanning uzatmasi orqali urgan goli bilan eslab qoladigan bo‘ldi. Fransuz hujumchi klublar darajasidagi 800-o‘yinida navbatdagi golli harakatini amalga oshirdi. Bu o‘yin Simeone uchun ham yubiley edi, argentinalik mutaxassis shu kuni murabbiylik faoliyatidagi 1000-o‘yinini o‘tkazdi. Shunday o‘yinda jamoa tarixida 1984 yildan buyon kuzatilmagan holat qayd etildi: 42 yildan buyon «Atletiko» ikki debyutantning ikki goli bilan g‘alaba qozonmagandi.
«Osasuna» – «Barselona» 1:2
Gollar: Levandovski, 81 (0:1). Torres, 86 (0:2). Raul Garsiya, 88 (1:2)
«Osasuna»: Errera, Boyomo, Katena, Galan, Roze, Torro (Osambela, 85), Monkayola (Barxa, 85), Moyses Gomes (Oros, 70), Moro, R. Garsiya (Bretones, 86), Budimir (Raul Garsiya, 70)
«Barselona»: X. Garsiya, Kubarsi, Martin, Joau Kanselu, E. Garsiya (Arauxo, 82), Gavi (de Yong, 62), Pedri (Bernal, 88), Olmo (Torres, 62), Fermin Lopes, Barji (Reshford, 62), Levandovski
Ogohlantirishlar: Monkayola, 74. Krus, 90 – Gavi, 24. E. Garsiya, 60
«Barselona»ning vaziyati juda oddiy – kataloniyaliklar shu turdayoq maydondan tashqarida turib chempion bo‘lishi mumkin. Buning uchun «Real» yakshanba kuni «Espanyol»ga qarshi o‘yinda ochko yo‘qotishi talab etiladi.
Ammo jamoa birinchi navbatda shanba kuni Pamplonada kechadigan o‘yinda g‘alaba qozonishi talab etilardi va bu har qanday raqib uchun oson ish emas. O‘yinning birinchi bo‘limi «Osasuna» nafaqat peshqadamning hujumlarini qaytarib turdi, balki o‘zi ham xavfli qarshi hujumlar uyushtirdi.
O‘yin kartinasi ikkinchi bo‘limda o‘zgara boshladi va Rafinya va Yamal kabi yetakchilar yo‘q sharoitda Reshford ko‘p ishni o‘z gardaniga oldi. Zaxiradan o‘yinga qo‘shilgan ingliz hujumchisi avvaliga o‘zi xavfli zarba berdi, keyinroq qanotdan Levandovskining boshiga ajoyib uzatma berdi. O‘tkazib yuborilgan goldan keyin mezbonlar to‘liq kuch bilan oldinga o‘tib ketishdi va ikkinchi golni o‘tkazib yuborishdi – Fermin Lopes chiziqlar orasidan o‘tkazilgan pas bilan Ferran Torresning goliga assistentlik qildi.
Ikki gol ustunligidan keyin «Barsa» futbolchilari biroz bo‘shashdi va 88-daqiqada jarima maydonida yolg‘iz qoldirilgan Raul Garsiya mezbonlarning hisobni qisqartiruvchi golini urdi.
Shunga qaramay, «Barselona» la ligada qatorasiga 10-g‘alabasini nishonladi va endi bugun «Real» va «Osasuna» o‘yini qanday natijada yakunlanishini kutmoqda. Madridliklar bugun safardan g‘alaba bilan qaytadigan bo‘lsa, «Barselona» keyingi haftada bo‘lib o‘tadigan klasikoda chempionlikni rasmiylashtirishi mumkin.
U ko‘p yillar Farg‘onaning «Neftchi» klubi safida to‘p surgan, O‘zbekiston milliy jamoasi bilan 1994 yilgi Osiyo o‘yinlarida chempion bo‘lgandi.
O‘zbekiston milliy jamoasi sobiq futbolchisi, O‘zbekistonda xizmat ko‘rsatgan sportchi va murabbiy, futbol faxriysi Abdusamad Do‘rmonov 60 yoshda vafot etdi.
Abdusamad Do‘rmonov 1965 yil Termiz shahrida tug‘ilgan. Futbolchilik faoliyati davomida «Paxtakor» (1987-1989), «Surxon» (1990-1991) va «Neftchi» (1992-2002) kabi klublarda to‘p surgan, Farg‘ona klubi jamoasi bilan besh marta O‘zbekiston chempioni bo‘lgan.
Shuningdek, 1992-1994 yillarda O‘zbekiston milliy jamoasiga chaqirilgan, 1994 yil Yaponiyada o‘tkazilgan Osiyo o‘yinlarida g‘olib bo‘lgan.
U futbolchilar oilasi vakili bo‘lib, ukasi Rustam Do‘rmonov ham u bilan birga «Neftchi» klubi sharafini himoya qilgan, yana bir ukasi Ravshan Do‘rmonov esa Termizning «Surxon» klubida o‘ynagan.
Abdusamad Do‘rmonov 2002 yilda futbolchilik faoliyatini yakunlagach, «Neftchi», «Yozyovon lochinlari» va «Istiqlol» kabi klublarda murabbiy sifatida ishlagan, hozirga qadar «Neftchi» klubi murabbiylar shtabida ishlayotgandi.
«Barselona» hujumchisi Robert Levandovski faoliyatini «Yuventus»da davom ettirishi mumkin deb xabar berdi Tuttosport.
Turinliklar va polshalik forvardning agenti muzokara o‘tkazgan.
Xabarga ko‘ra, «Yuventus» kelasi mavsum uchun YChL yo‘llanmasini qo‘lga kiritsa, 37 yoshli futbolchi klubga o‘tish taklifini ko‘rib chiqishga tayyor.
Levandovskining «Barselona» bilan amaldagi shartnomasi 2026-yil yozigacha mo‘ljallangan. Kataloniyaliklar futbolchiga yangi shartnoma taklif qilgan, ammo unda maosh keskin kamaytirilishi ko‘zda tutilgan va bu hujumchiga ma’qul kelmagan.
Endi chet el valyutasida obligatsiyalar chiqarish mumkin bo‘ladi
Global beqarorlik sharoitida ham O‘zbekiston iqtisodiyoti 8,7 foizga o‘sdi
Chustda qalbaki dollar sotuvchilari qo‘lga tushdi
-
Siyosat4 days agoPrezident Mirziyoyev energiya tejash vositasi sifatida kommunal xizmatlarni oʻchirishni taqiqlovchi farmonni imzoladi
-
Siyosat4 days agoOʻzbekistonda yil oxiriga qadar 13 ta GES qurish rejalashtirilmoqda, tarmoqni kengaytirish koʻzda tutilmoqda
-
Turk dunyosi5 days agoKurd jangari rasmiysining aytishicha, Turkiya islohotlarning yoʻqligi tufayli tinchlik muzokaralarini toʻxtatib qoʻymoqda
-
Jamiyat4 days ago
Sud jarayonlarini OAVda yoritishni takomillashtirish bo‘yicha dastur boshlandi
-
Jamiyat5 days ago
May oyida qanday ob-havo kutiladi? «O‘zgidromet» izoh berdi
-
Jamiyat5 days agoBuxoro va Surxondaryoda Afg‘onistondan kontrabanda qilingan opiyning katta partiyasi aniqlandi
-
Iqtisodiyot5 days ago
O‘zbekistonda kafe va restoranlar daromadi keskin oshdi
-
Jamiyat3 days agoJinoiy guruh yetakchisidan 2,7 ming dollar olgan profilaktika inspektori ushlandi