Sport
«Siti» keyingi bosqichga o‘tdi, Yamalda rekord. Hafta o‘yinlari
Husanov «Nyukasl»ga qarshi o‘yinda to‘liq harakat qildi, «Chelsi» Hollivud yulduzlari jamoasini qo‘shimcha bo‘limlarda mag‘lub etdi; Ispaniyada «Real» va «Barsa» poygasi davom etmoqda. Dam olish kunlarida Yevropa chempionatlarida o‘tkazilgan asosiy o‘yinlar, gollar va turnir jadvallaridagi vaziyat.
Angliya: «Mansfild» va «Reksem» grandlarni qiynab qo‘ydi
«Mansfild» – «Arsenal» 1:2
Gollar: Madueke, 41 (0:1). Evans, 50 (1:1). Eze, 66 (1:2)
«Arsenal»: Arrisabalaga, Moskera, Kalafiori (Dikson, 76), Selmon (Timber, 62), Norgar, Trossar (Inkapiye, 38), Douman (Saka, 77), Martinelli, Madueke, Gabriel Jyezus, Havers (Eze, 62)
Ogohlantirishlar: Kalafiori, 70. Eze, 74
Uchinchi divizionda ishtirok etayotgan «Mansfild» «Arsenal»ga qarshi 1929 yildan buyon ilk o‘yinini shudgorzorni eslatuvchi maydonda o‘tkazdi. Bunday gazonda kombinatsiyalar uyushtirish muammo bo‘lishi yetmaganiday, jarohat olish xavfi ham yuqori edi. Amalda ham Mikel Arteta Trossar va Kalafiorini jarohat tufayli almashtirishga majbur bo‘ldi.
«Arsenal» futbolchisi Leandro Trossarga tibbiy yordam ko‘rsatilmoqda
Foto: Cody Froggatt/Getty Images
16 yoshli Salmon esa ortga uzatma berishda xatoga yo‘l qo‘ydi, Moskera esa Evansga qarshi passiv harakat qildi, Kepa ham o‘ziga kelgan zarbani to‘sa olmadi.
Bu orqali «Mansfild» muvozanatni tikladi. Birinchi bo‘lim oxirida Noni Madueke bir hujumning o‘zida ikki bor zarba berish orqali darajadagi farqni namoyish etgandi. Uning birinchi zarbasidan keyin darvozabon to‘pni qaytardi, Martinelli to‘pga ega chiqdi va Maduekeni yanada qulay vaziyatga chiqardi. Shundan keyin «kanonirlar» ketma-ket vaziyatlarni yo‘qqa chiqarishdi. Douman reyd uyushtirib, yaqin masofadan zarba berganida esa darvozabon qahramonlik ko‘rsatdi. Yana bir vaziyatda «5 ga 2» ko‘rinishidagi qarshi hujumda Gabriel Jyezusning zarbasidan keyin himoyachi to‘pni darvoza chizig‘i ustida to‘xtatib qoldi. Faqat ikkinchi bo‘limda zaxiradan tushgan Eze Norgarning uzatmasidan keyin olis masofadan benuqson zarba yo‘lladi va bu gol o‘yin taqdirini hal qildi.
«Arsenal» Mikel Arteta boshqaruvi davrida bir mavsumdagi g‘alabalar soni bo‘yicha (35) rekord o‘rnatdi, shuningdek, joriy mavsumda gollari sonini 100 tadan oshirgan uchinchi jamoaga aylandi («Bavariya» va «Barselona»dan keyin). Bu g‘alaba jamoani Angliya kubogi chorakfinaliga olib chiqdi, ammo mavsumning muhim pallasida ikki futbolchi jarohat olishi – «kanonirlar» uchun og‘riqli zarba bo‘ldi.
«Reksem» – «Chelsi» 2:4
Gollar: Smit, 18 (1:0). Okonkvo, 40 – avtogol (1:1). Doyl, 78 (2:1). Achimpong, 82 (2:2). Garnacho, 96 (2:3). Joao Pedro, 120+5 (2:4)
«Chelsi»: Sanches, Adarabioyo, Badiashile, Sarr (Giu, 58), Santos, Lavia (Kukurelya, 65), Hato (Essugu, 65), Achimpong (Gyusto, 85), Pedru Netu (Derri, 100), Garnacho, Delap (Joao Pedro, 85)
Ogohlantirishlar: Lavia, 23. Santos, 110. Garnacho, 120
Chetlatish: Robson
Uelsdagi o‘yin shanba oqshomida ko‘pchilikning diqqat markazida turgandi. Hollivud yulduzlari Rayan Reynolds va Rob Makelhenni egalik qilayotgan chempionship jamoasi nomdor «Chelsi»ni qabul qildi. O‘yin oldidan favorit kimligi ma’lum edi, ammo o‘yinning birinchi qismida londonliklar katta ustunlik bilan to‘pga egalik qilishdi, ammo «qizil ajdarlar» bu raqamlar amalda hech narsani anglatmasligini ko‘rsatishdi. Muhimi – samaradorlik edi. Doyl o‘z jamoasi jarima maydonidan uzun uzatma berdi, maydon markazida raqibning ikki himoyachisidan qochib ketgan Smit hisobni ochdi.
«Reksem» klubi egalari Rayan Reynolds va Rob Makelhenni golni nishonlamoqda
Foto: James Gill — Danehouse/Getty Images
XIX asrda qurilgan «Reyskors Graund» stadionida yig‘ilgan muxlislar golni aqldan ozgudek bo‘lib nishonlashdi, ammo tanaffus arafasida stadion suv quygandek jimjit bo‘lib qoldi. Garnachoning o‘tkir burchakdan yo‘llagan zarbasidan keyin to‘p himoyachi Tomason orqali darvozabonga bordi va uni avtogol urishga majbur qildi. Ammo umuman olganda muxlislar «Reksem» namoyish etgan o‘yin bilan faxrlanishi mumkin. Mezbonlar munosib o‘ynashdi va jiddiy qarshilik ko‘rsatishdi. Doyl ikkinchi bo‘limda yana jamoani hisobda oldinga olib chiqdi, muxlislar yana katta bayram boshlashdi, ammo yana bo‘lim oxirida mehmonlar hisobni tenglashtirishdi. Qo‘shimcha daqiqalarda esa Dobson Garnachoga qo‘pollik uchun maydondan chetlatildi.
Qo‘shimcha bo‘limlarda londonliklar son jihatdan ustunlikdan foydalanishdi va Garnacho jamoasini hisobda oldinga olib chiqdi. Keyin esa o‘yin yakuniga bir necha daqiqa qolganida uelsliklar uchinchi golini urishdi, ammo bu gol ofsayd tufayli bekor qilindi. Qo‘shimcha bo‘limlarning qo‘shimcha daqiqalarida Joao Pedro yakuniy hisobni o‘rnatdi. «Chelsi» yurishini davom ettiradi, «Reksem» esa o‘z reytingini ko‘tarib oldi. Endi bu jamoani APLda kutishmoqda.
«Nyukasl Yunayted» – «Manchester Siti» 1:3
Gollar: Barns, 18 (1:0). Savio, 39 (1:1). Marmush, 47 (1:2). Marmush, 65 (1:3)
«Nyukasl Yunayted»: Ramsdeyl, Botman, Tiau, Holl (Livramento, 80), Trippiyer (Byorn, 63), Tonali, Uillok, Voltemade (Gordon, 72), Barns, Elanga (Joelinton, 62), Osula (Vissa, 63)
«Manchester Siti»: Trafford, Stouns, Husanov, Ake, Mateus Nunes, Gonsales, O`Rayli, Reynders, Doku (Sherki, 79), Savio (Foden, 79), Marmush (Semenyo, 73)
Ogohlantirishlar: Joelinton, 78. Vissa, 90
«Nyukasl» va «Manchester Siti» bu mavsumning o‘zida beshinchi bor o‘zaro raqib bo‘lishdi. «Qarg‘alar» APLning birinchi davrasida o‘z maydonida kechgan o‘yinda g‘alaba qozongandi (2:1), keyingi uch o‘yinda esa «shaharliklar»ning qo‘li ustun kelgandi – Liga kubogi yarimfinalida (2:0, 3:1) va chempionatning ikkinchi davrasida (2:1). Tabiiyki, Eddi Hau shogirdlari «Sent-Jyeyms Park»dagi o‘yinda oxirgi mag‘lubiyatlar uchun qasos olish maqsadida maydonga tushishdi. Abduqodir Husanov boshlang‘ich tarkibga qaytgan o‘yinda jamoasi tezkor gol o‘tkazib yuborishi mumkin edi, ammo Gonsales bo‘sh darvozaga kirib ketayotgan to‘pni to‘xtatdi.
Mezbonlar baribir ikkinchi urinishda maqsadga erishishdi. Tonali mehmonlar himoyachisini bitta pas bilan dog‘da qoldirdi, himoyachilar ortiga ochilgan Barns esa olis burchakni aniq nishonga oldi.
Bo‘limning qolgan qismi Xosep Gvardiola jamoasi ustunligida o‘tdi. Mehmonlar bir necha yaxshi vaziyatlarga ega bo‘lishdi, ammo bir gol bilan cheklanishdi. Doku chap qanotda fintlari bilan himoyachilarning boshini aylantirib tashladi, uning darvozabon hududiga bergan uzatmasi kerakli vaqtda kerakli joyda turgan Savinioga tegib, darvoza to‘riga borib tushdi. Ikkinchi bo‘lim boshida esa mezbonlar mudofaasi o‘ng qanotdan ham yorib o‘tildi. Mateus Nunesning hujumga qo‘shilishi Marmush jamoasini hisobda oldinga olib chiqishi bilan yakunlandi. Keyinroq misrlik hujumchi olis masofadan yo‘llagan zarbasi bilan «Nyukasl»ni uzil-kesil taslim etdi va jamoasini Angliya kubogi chorakfinaliga olib chiqdi.
Ispaniya: Peshqadamlarda qiyin g‘alabalar
«Real» futbolchilari so‘nggi daqiqada urilgan golni nishonlamoqda
Foto: Jose Manuel Alvarez Rey/Getty Images
«Selta» – «Real» 1:2
Gollar: Tshuameni, 11 (0:1). Iglesias, 25 (1:1). Valverde, 90+4 (1:2)
«Selta»: Radu, Starfelt, Alonso, Rodriges, Moriba (Vesino, 90+1), Roman, Mingesa (Aspas, 83), Karreyra, Svedberg (Lopes, 69), Xutgla (Alvares, 70), Iglesias (Al-Abdullaiy, 70)
«Real»: Kurtua, Raul Asensio, Ryudiger, Mendi, Aleksandr-Arnold, Tshuameni, Arda Guler (Palasios, 65), Pitarch (Manuel Anxel, 90), Valverde, Vinisius Junior, Dias (Garsiya, 77)
Ogohlantirishlar: Iglesias, 31 – Tshuameni, 86. Raul Asensio, 90
«Real» oxirgi haftalarda inqiroz ko‘chasiga kirib qolgan. Yaqinda ham madridliklar La ligada peshqadamlikni o‘z qo‘liga ogandi, ammo «Osasuna» va «Xetafe»dan uchralgan mag‘lubiyatlar «Barselona» uchun sovg‘a bo‘ldi. Keyin esa Rodrigo ham og‘ir jarohat olib, klub lazaretidagi futbolchilar sonini yana bittaga oshirdi. Vigoda esa diskvalifikatsiya tufayli Karreras, Hausen va Mastantuono maydonga tusha olmasdi. Shu tufayli juma oqshomidagi o‘yinda Alvaro Arbeloa ixtiyoridagi bor futbolchilar bilan amallashiga to‘g‘ri kelardi.
Yevrokuboklarga yo‘llanma beruvchi oltinchi o‘rinda kelayotgan «Selta» bu holatdagi «Real»ga qarshi dalil o‘yin ko‘rsatdi. Borxa Iglesias o‘z vaziyatlaridan foydalana olganida 25-daqiqagacha het-trik amalga oshirishi mumkin edi. Ammo Kurtua avvaliga uning jarima maydoni tashqarisidan yo‘llagan kuchli zarbasini qaytardi, keyin esa yakkama-yakka vaziyatda ustun keldi. Faqat Aleksander-Arnoldning himoyachilar ortiga oshirilgan uzatmani o‘tkazib yuborishidan keyin belgiyalik posbon baribir o‘z darvozasidan to‘p olib chiqishga majbur bo‘ldi – Svedberg uni aldab o‘tdi va to‘pni bo‘sh darvoza qarshisidagi Iglesiasga uzatdi.
Galisiyaliklar bu gol bilan faqat hisobni tenglashtirishdi, 11-daqiqada «Real» uzoq cho‘zilgan hujum yakunida hisobni ochgandi: bu hujum davomida Vinisiusning zarbasidan keyin to‘p ustundan qaytdi, Tshuamenining xavfli zarbasidan keyin burchak to‘pi ishlandi. Aynan shu burchak to‘pi ijro etilgnaida fransuz futbolchisi ikkinchi imkoniyatdan foydalandi.
Ikkinchi bo‘lim madridliklarning to‘liq ustunligida o‘tdi. Akademiya tarbiyalanuvchilari Pitarch va Palasiosda ham yaxshi vaziyatlar yuzaga keldi. Ammo hadeganda to‘p darvoza to‘riga kirishni istamadi, mehmonlarning penalti so‘rab bildirgan e’tirozlari bu safar inobatga olinmadi: to‘p Jutglening qo‘liga tegishidan oldin «Selta» futbolchisiga nisbatan fol ishlatilgani ma’lum bo‘ldi. «Real» uchun bu o‘yin ham achinarli yakunlanishi mumkin edi, ammo o‘yin oxirida omad «Qirollik klubi»ga ikki bor kulib boqdi. Avvaliga galisiyalikar afsonasi Aspasning zarbasidan keyin to‘p ustunga tegdi, o‘yinga qo‘shib berilgan daqiqalarda esa Valverde g‘alaba golini urdi. Oldinda jamoani YeChLda «Manchester Siti»ga qarshi qiyin o‘yinlar kutmoqda.
«Atletiko» – «Real Sosiyedad» 3:2
Gollar: Syorlot, 5 (1:0). Soler, 9 (1:1). Gonsales, 67 (2:1). Oyyarsabal, 68 (2:2). Gonsales, 81 (3:2)
«Atletiko»: Oblak, Ximenes, Gansko, Rudjyeri, Molina, Mendosa (Liorente, 46), Koke (Kardozo, 61), Almada (Gonsales, 54), Simeone (Grizmann, 53), Serlot, Lukman (Alvares, 53)
«Real Sosiyedad»: Remiro, Chaleta-Tsar, Xon Martin, Gomes, Aramburu, Errera, Soler (Turrentes, 74), Barrenechea (Zaxaryan, 65), Marin (Gonsalu Gedesh, 55), Oskarsson (Oyyarsabal, 56), Suchich (Mendes, 74)
Ogohlantirishlar: Gansko, 20 – Oskarsson, 49
Keyingi oyda Ispaniya kubogi finalida o‘zaro to‘qnash keladigan ushbu jamoalar o‘yinning 9-daqiqasigacha bittadan gol urishga ulgurishdi. Autdan to‘p tashlash orqali boshlangan hujum Ximenesning Syorlotga golli uzatmasi va hisob ochilishi bilan yakunlandi. Ammo bir necha daqiqa o‘tib Soler yaqin burchakni aniq nishonga olib, muvozanatni tikladi. Shundan keyin o‘yin tempi pasaydi va birinchi bo‘limda hisob boshqa o‘zgarmadi.
Ikkinchi bo‘lim boshida Syorlot qulay vaziyatni yo‘qqa chiqardi, ammo ko‘p o‘tmasdan Niko Gonsales baribir «matraschilar»ning ikkinchi golini urdi. Bir daqiqa o‘tib esa Oyyarsabal bu golga javob qaytardi. Gonsalesning ikkinchi goliga esa mehmonlarda javob topilmadi. Diyego Simeone shogirdlari navbatdagi uch ochkodan keyin uchinchi o‘rinni mustahkamladi – to‘rtinchi o‘rindagi «Vilyarreal» bilan oradagi farq yana uch ochkoni tashkil etmoqda.
«Atletik» – «Barselona» 0:1
Gol: Yamal, 68 (0:1)
«Atletik»: Simon, Vivian, Lyaport, Boyro, Gorosabel, Hauregisar (E. Garsiya, 74), Rego (Vesga, 69), Sanches (Sanset, 46), Gomes (Navarro, 10), Berenger, Inyaki Uilyams (Guruseta, 69)
«Barselona»: E. Garsiya, Joau Kanselu, Martin, X. Garsiya, Kubarsi, Bernal (Pedri, 46), Kasado (Arauxo, 78), Olmo (Fermin Lopes, 62), Reshford (Levandovski, 62), Yamal, Torres (Rafinya, 62)
Ogohlantirishlar: Rego, 50. Vivian, 90 – Kubarsi, 57
«San-Mames»da ikki jamoaning yorqin hujumlari bilan boshlangan o‘yinda muxlislar ancha vaqtgacha gol ko‘rishmadi. Katta ehtimol bilan, Unai Gomesning jarohati o‘yin ritmini buzib qo‘ydi. Basklar jamoasining eng iste’dodli futbolchilaridan biri havodagi yakkakurashdan keyin noqulay yiqildi va tizzasini jarohatlab oldi, u maydonni fizioterapevtlar yordamida tark etdi. «Barselona» bo‘lim davomida to‘pga egalik qilish bo‘yicha katta ustunlikka erishdi, ammo golli vaziyatlar yarata olishmadi.
«Barselona» dastlabki 45 daqiqalikda zarbalar berish bo‘yicha bu mavsumdagi eng yomon ko‘rsatkichini (2) qayd etdi va bu mavsumda ilk bor birinchi bo‘limda raqib darvozasi tomon to‘g‘ri borgan birorta ham zarba bera olmadi. Gol urishga mezbonlar yaqinroq kelishdi. Avvaliga Navarro qulay vaziyatda turib, zarba berish o‘rniga pas berishga qaror qildi va to‘pni yo‘qotdi. Keyin esa Iniyaki Uilyams darvozani ishg‘ol etdi, ammo kichik ofsayd holati tufayli bu gol bekor qilindi.
Ikkinchi bo‘limda esa basklarga goh aniqlik yetishmadi, goh Joan Garsiya «Barselona»ni qutqarib qoldi. Hansi Flik uchtalik almashtirish orqali o‘yinda burilish yasashga muvaffaq bo‘ldi. Pedri, Rafinya va Levandovski maydonga tushdi va o‘yin taqdiri hal qilindi. Pedrining uzatmasidan keyin Yamal olis «to‘qqizlik»ka qaytarib bo‘lmas zarba yo‘lladi. Bu nafaqat g‘alaba goli, balki Laminning faoliyatidagi yubiley 50-gol ham bo‘ldi – (44 tasi klub safida, 6 tasi terma jamoada).
Tabiiyki, kataloniyaliklarning «o‘nlik» futbolchisi bu orqali navbatdagi rekordni o‘rnatdi. U 18 yosh-u 237 kunligida XXI asrda top-5 ligalarda bu natijaga erishgan ilk futbolchiga aylandi. Taqqoslash uchun: Messi buncha golni urganida 20 yosh-u 315 kunlik, Krishtianu Ronaldu — 21 yosh-u 297 kunlik edi.
Turnir jadvalida esa kataloniyaliklar «Real» bilan oradagi farqni yana to‘rt ochkoga yetkazib qo‘ydi.
O‘zbekiston Superligasida 2-tur o‘yinlari o‘tkazildi. Amaldagi chempion «Neftchi» bosh murabbiy Islombek Ismoilov qo‘l ostida yana yirik hisobda g‘alaba qozondi. Pro-Ligadan qaytgan «Lokomotiv» 40 yoshli Anzur Ismoilov bilan ikkinchi g‘alabasini nishonladi. OKMK va «So‘g‘diyona» yana mag‘lub bo‘ldi, ikkala jamoa birorta gol urmagan holda jadval tubiga tushdi.
4-6 mart kunlari futbol bo‘yicha O‘zbekiston Superligasida 2-tur o‘yinlari o‘tkazildi.
SURXON 0:3 NeFTChI
Gollar: Stipe Peritsa, 40 (0:1), Stipe Peritsa, 48 (0:2), Yovan Jokich, 73 (0:3)
Amaldagi chempion «Neftchi» bu safar ham ishonchli o‘yin namoyish etib, safarda «Surxon»ni 3:0 hisobida yengdi. Islombek Ismoilov shogirdlari 1-turda ham yirik hisobda g‘alaba qozongan edi. «Neftchi» musobaqa jadvalida to‘plar nisbatiga ko‘ra peshqadamlik qilmoqda. Farg‘onaliklarning xorvatiyalik hujumchisi Stipe Peritsa 3 ta gol bilan chempionat to‘purarlari ro‘yxatini boshqarib turibdi.
MASh’AL 0:2 LOKOMOTIV
Gollar: Anzur Ismoilov, 44 (0:1), Quvonchbek Abrayev 45+1 (0:2)
Chetlatish: Roman Xadjiyev, 90+4 (Mash’al)
Ikkinchi o‘ringa kutilmaganda «Lokomotiv» ko‘tarilib oldi. «Temiryo‘lchilar» o‘tgan mavsumda Pro-Ligada qiyinchilik bilan g‘alaba qozonib, Superligaga qaytgan edi. Bosh murabbiy Mirko Yyelichich mavsumlar oralig‘ida yaxshi tarkib to‘plagan ko‘rinadi – dastlabki 2 turda g‘alabaga erishdi. Bu gal safarda «Mash’al» mag‘lub etildi. Gollardan biriga 40 yoshida ham navqiron Anzur Ismoilov mualliflik qildi.
QO‘QON-1912 1:2 PAXTAKOR
Gollar: Doston Hamdamov, 49 (0:1), Pyotr Parjishek, 56 (0:2), Toma Tabatadze, 90+5 pen (1:2)
«Paxtakor» ham mavsumni ishonchli tarzda 2 ta g‘alaba bilan boshladi. Toshkentliklar Qo‘qonda qiyin o‘yin o‘tkazdi, biroq 3 ochko bilan qaytadigan bo‘ldi. Mezbonlar uchun vaziyat yaxshi emas – ular dastlabki 2 ta o‘yinda ham mag‘lubiyatga uchradi.
NAVBAHOR 0:1 BUXORO
Gol: Velko Filipovich, 73 (0:1)
«Buxoro» mavsum startining «kashfiyot»laridan biri bo‘ldi. O‘tgan mavsumda Superligada arang «jon saqlab» qolgan jamoa yilni yaxshi boshladi. 2 ta o‘yin – 2 ta g‘alaba. Bu buxoroliklarning so‘nggi 15 yildagi eng yaxshi natijasi. Aleksandr Xomyakov shogirdlari bu safar Timur Kapadze qo‘l ostidagi «Navbahor»ni yengdi va peshqadamlar safida bormoqda.
SO‘G‘DIYoNA 0:2 NASAF
Gol: Oybek Rustamov, 14 (0:1), Sharof Muhiddinov, 22 (0:2)
Noaniq penalti: Lyupcho Doriyev, 73 (So‘g‘diyona)
«Nasaf» Jizzaxda ishonchli g‘alabaga erishdi. O‘yin taqdirini birinchi bo‘limdagi 2 ta gol hal qildi. «So‘g‘diyona» esa mavsumni juda yomon boshladi va Superliga jadvalining so‘nggi pog‘onasini egallab turibdi. Bosh murabbiy Ivan Boshkovich jamoani bunday ruhiy chohdan olib chiqa olarmikan, kuzatamiz.
QIZILQUM 2:1 ANDIJON
Gollar: Jambuli Jigauri, 35 (1:0), Aleksandre Andronikashvili, 76 (1:1), Islom Kenjaboyev, 80 (2:1)
Chempionatni yaxshi boshlagan «Andijon» kutilmaganda «Qizilqum»ga yutqazdi. Bosh murabbiy Samvel Babayan mavsumlar oralig‘ida yaxshi tarkib to‘pladi. Biroq, jamoaviy o‘yinni sozlash uchun unga vaqt kerak shekilli, 2-turdayoq «qoqildi».
BUNYoDKOR 1:2 DINAMO
Gollar: Azizbek Amonov, 8 (0:1), Firdavs Abdurahmonov, 14 (0:2), Samandar Mavlonqulov, 83 (1:2)
«Dinamo» 1-turdagi mag‘lubiyatdan keyin murakkab raqib «Bunyodkor»ni mag‘lub etdi. «Qaldirg‘ochlar» esa aksincha, dastlabki g‘alabani davomiyligiga erisholmadi. O‘yindan keyin «Dinamo» bosh murabbiyi Vadim Abramov jamoa moliyaviy qiyinchiliklar ostida ekanini, 4 oydan beri maosh berilmayotganidan shikoyat qildi.
XORAZM 1:0 OKMK
Gol: Diyorbek Ortiqboyev, 52 (1:0)
Turning yana bir kutilmagan natijasi Urganchda qayd etildi. «Xorazm» Superliga doirasida ilk marotaba OKMK ustidan g‘alaba qozondi. Natijada, Mirjalol Qosimov shogirdlari chempionatni muvaffaqiyatsiz – 2 ta mag‘lubiyat bilan boshladi. «Xorazm» dastlabki turdagi mag‘lubiyatdan so‘ng, jadvaldagi o‘rnini biroz yaxshilab oldi.
SUPeRLIGA JADVALI
SUPeRLIGA TO‘PURARLARI
3-TUR O‘YINLARI
10 mart
NeFTChI – ANDIJON
MASh’AL – QIZILQUM
PAXTAKOR – NAVBAHOR
11 mart
SURXON – BUNYoDKOR
LOKOMOTIV – QO‘QON-1912
BUXORO – XORAZM
12 mart
OKMK – SO‘G‘DIYoNA
DINAMO – NASAF
Rossiya va Belarus sportchilariga qishki Paralimpiadada o‘z milliy bayroqlari ostida qatnashishiga ruxsat berilgani sababli, Ukraina, Chexiya, Estoniya, Finlandiya, Latviya, Litva va Polsha o‘yinlarning ochilish marosimini boykot qildi. Germaniya terma jamoasi esa sportchilar paradida ishtirok etmadi.
Italiyada 6 mart, juma kuni XIV qishki Paralimpiya o‘yinlari rasman boshlandi. Qishki Olimpiada tugaganidan 12 kun o‘tib, Veronaning qadimiy amfiteatrida mamlakat prezidenti Serjo Mattarella mahalliy vaqt bilan soat 21:19 da o‘yinlarni ochiq deb e’lon qildi. Olimpiya mash’alasi yana bir vaqtning o‘zida ikki joyda — Milandagi Tinchlik arkasi yonida va Kortina-d’Ampetssodagi Dibona maydonida yoqildi.
Ukraina, Chexiya, Estoniya, Finlandiya, Latviya, Litva va Polsha qishki Paralimpiadaning ochilish marosimini boykot qildi, chunki Rossiya va Belarus sportchilari musobaqaga neytral maqomda emas, balki o‘z davlatlarining milliy bayroqlari ostida qo‘yildi. 2026 yilgi qishki Olimpiadada esa ular neytral sportchilar maqomida qatnashgan edi. Rossiyalik sportchilar o‘tib ketayotganda tomoshabinlar ularni norozilik bilan qarshi oldi. Marosimda 2014 yildan beri birinchi marta Rossiya bayrog‘i olib chiqildi, uni italiyalik volontyor ko‘tarib bordi.
Bir qator davlatlar, jumladan Germaniya, Fransiya, Buyuk Britaniya va Kanada terma jamoalari sportchilar paradida qatnashmadi, buni sportga oid sabablar bilan izohladi. Masalan, Germaniyaning imkoniyati cheklangan sportchilar uyushmasi (DBS) oldindagi musobaqalarga diqqatni jamlash zarurligini aytdi, shu bilan birga ukrainaliklar bilan hamjihatlik bildirdi. Germaniyadan Paralimpiadaga 40 nafar sportchi va 8 nafar hamroh shaxs keldi — bu qishki Paralimpiya o‘yinlari tarixidagi Germaniyaning soni jihatidan ikkinchi eng katta delegatsiyasidir. Germaniya sportchilari faqat kyorlingda qatnashmaydi.
17 fevral kuni Xalqaro paralimpiya qo‘mitasi Rossiya va Belarus sportchilari 2026 yil Milan va Kortina-d’Ampetssoda bo‘lib o‘tadigan Qishki paralimpiya o‘yinlarida o‘z mamlakatlari bayroqlari ostida qatnashishi mumkinligini ma’lum qildi. Paralimpiadaga ikki tomonlama taklifnomalar olti nafar rossiyalik va to‘rt nafar belaruslik sportchiga berildi.
2025 yil sentabrida Xalqaro paralimpiya qo‘mitasi Rossiya va Belarus milliy qo‘mitalari a’zoligini tikladi. Bu a’zolik Ukrainadagi keng ko‘lamli urush boshlanganidan so‘ng to‘xtatib qo‘yilgan edi. Rasman olganda, bu qaror ushbu mamlakatlar sportchilariga Italiyadagi o‘yinlarda o‘z milliy bayroqlari ostida ishtirok etish imkonini berar edi. Ammo yakuniy ruxsat tegishli sport turlari bo‘yicha xalqaro federatsiyalarga bog‘liq bo‘lib qolgan.
Dekabr oyida Sport arbitraj sudi (CAS) Rossiya va Belarus sportchilarining Xalqaro chang‘i sporti va snoubord federatsiyasi (FIS) ularni xalqaro musobaqalarga qo‘ymaslik haqidagi qaroriga qarshi bergan apellyatsiyalarini qisman qanoatlantirdi. Natijada, paralimpiyachi sportchilar FIS musobaqalarida neytral maqomsiz va milliy ramzlar bilan ishtirok etish huquqini qo‘lga kiritdi. Shundan so‘ng Rossiya va Belarus paralimpiyachilari tanaffusdan keyin birinchi marta xalqaro musobaqalarda o‘z mamlakatlari bayroqlari ostida qatnashish imkoniga ega bo‘ldi. Bu imkoniyati cheklangan sportchilar o‘rtasidagi chang‘i poygalari bo‘yicha Jahon kubogining bosqichi bo‘lib, u yanvar oyida Germaniyaning Finsterau shahrida o‘tkazilgan edi.
50 yoshli afsonaviy sportchi o‘tgan yili Ozarbayjonda o‘tgan sport gimnastikasi bo‘yicha Jahon kubogida oltin medalga sazovor bo‘lgandi.
Foto: MOQ matbuot xizmati
Boku shahrida o‘tayotgan sport gimnastikasi bo‘yicha Jahon kubogining dastlabki saralash bahslarida O‘zbekiston terma jamoasi a’zosi Oksana Chusovitina tayanib sakrash dasturida final yo‘llanmasini qo‘lga kiritdi.
Chusovitina kvalifikatsiyada 13.049 ball bilan uchinchi pog‘onani egalladi.
Mazkur yo‘nalishdagi final 7 mart sanasiga belgilangan.
Ma’lumot uchun, Oksana Chusovitina sakkiz karra Olimpiada ishtirokchisi sanaladi. U 1992 yilda Barselonada Birlashgan jamoa tarkibida jamoaviy musobaqada oltin medalni qo‘lga kiritgan, 2008 yilgi Pekin Olimpiadasida Germaniya terma jamoasi tarkibida kumush medalga ega chiqqan.
50 yoshli afsonaviy sportchi o‘tgan yili Ozarbayjonda o‘tgan sport gimnastikasi bo‘yicha Jahon kubogida oltin medalga sazovor bo‘lgandi.
Transfermarkt portali Turkiya Superligasida to‘p surayotgan futbolchilarning transfer narxlarini yangiladi. Unga ko‘ra, Eldor Shomurodovning bahosi sezilarli darajada oshdi.
Eldor Shomurodovning transfer qiymatiga 2 million yevro qo‘shilib, 7 million yevroni tashkil etmoqda.
Bunga uning «Istanbul Bashakshehir» safidagi muvaffaqiyatli o‘yinlari sabab bo‘ldi. U joriy mavsumda Superliganing 24 ta o‘yinida 16 ta gol urib, 4 ta golli uzatmani amalga oshirdi.
Eldorning jamoadoshi — yana bir yurtdoshimiz Abbosbek Fayzullayevning transfer qiymati o‘zgarmadi, uning ham narxi — 7 mln yevro.
Jiddiy jarohat olib safdan chiqqan Husniddin Aliqulovning qiymati ham oldingidek qoldi — 1,5 million yevro.
Turkiya Superligasining eng qimmat futbolchilari uchligi:
Viktor Osimhen — «Galatasaroy», 75 mln yevro)
Matteo Genduzi — «Fenerbahche», 28 mln yevro
Barish Yilmaz — «Galatasaroy», 26 mln yevro
«MYu» bir kishi ko‘p bo‘lib o‘ynab yutqazdi, «Chelsi»da yirik g‘alaba.
«Brayton» – «Arsenal» 0:1
Gol: Saka, 9 (0:1)
«Brayton»: Verbryuggen, van Hekke, Boskali, Ferdi Kadio‘g‘li, Viffer (Veltman, 77), Baleba (Ayyari, 78), Gross, Hinshelvud (Uelbek, 69), Mitoma (Minte, 46), Gomes (Hauell, 77), Ryutter
«Arsenal»: Rayya, Moskera (Kalafiori, 64), Gabriel Magalyayns, Inkapiye, Timber, Subimendi (Norgar, 80), Rays, Eze, Martinelli (Trossar, 60), Saka, Yokeresh (Havers, 59)
Ogohlantirishlar: Gomes, 52. Boskali, 80. Ferdi Kadio‘g‘li, 82. Ayyari, 90 – Moskera, 11
Turnir jadvali peshqadamlari o‘yin startida gol o‘tkazib yuborishiga bir baxya qoldi – Baleba jarima maydoni yaqinida to‘pni egallab oldi va uni darvozabon ustidan oshirib tashladi, ammo Gabriel bo‘sh darvozaga ketayotgan to‘pni to‘sib qoldi. Bir necha daqiqa o‘tib «Arsenal»ning o‘zi tezkor gol bilan hisobni ochdi. Sakaning zarbasidan keyin rikoshet Ferbryuggenni ilojsiz ahvolda qoldirdi. Bu gol g‘alaba uchun yetarli bo‘ldi. O‘yinning qolgan qismida londonliklar hisobga qarab o‘ynadi va yakunda ikkinchi o‘rin bilan oradagi farqni yetti ochkoga yetkazishdi.
«Manchester Siti» zaxiradagi bir o‘yinida uch ochko olgan taqdirda ham Mikel Arteta jamoasi turnir jadvalida o‘zini ancha qulay his qilishi mumkin.
«Manchester Siti» – «Nottinghem Forest» 2:2
Gollar: Semenyo, 31 (1:0). Gibbs-Uayt, 56 (1:1). Rodri, 62 (2:1). Anderson, 76 (2:2)
«Manchester Siti»: Donnarumma, Ruben Diash, Geyi, Ayt Nuri (Husanov, 77), Mateus Nunes, Rodri, Bernardu Silva, Foden (Doku, 77), Sherki (Savio, 82), Holand, Semenyo
«Nottinghem Forest»: Sels, Milenkovich, Murilo, Kunya, Sangare, Anderson, Uilyams (Moratu, 90), Ayna, Gibbs-Uayt (Yyeyts, 90), Dominges (Hadson-Odoi, 63), Igor Jyezus (Avoniyi, 79)
Ogohlantirishlar: Sangare, 45. Murilo, 60. Milenkovich, 63. Sels, 90
Parallel o‘yinda «kanonirlar»ning titul uchun kurashdagi asosiy raqibi yarim soat davomida «Nottinghem» mudofaasini yorib o‘tishga urindi va nihoyat buni uddaladi: 31-daqiqada Geyi ham hujumga qo‘shildi, Sherki esa davomli fintlardan keyin to‘pni jarima maydoniga uzatdi, u yerda turgan Semenyo to‘pni to‘xtatmasdan darvoza to‘riga yo‘lladi. Faqat mezbonlar keyingi imkoniyatlaridan foydalana olishmadi.
Ikkinchi bo‘lim boshida avvaliga Igor Jyezus xavfli zarbasi bilan ogohlik qo‘ng‘irog‘ini chalgandi. Biroz o‘tib uning uzatmasidan keyin Gibbs-Uayt tomonida yo‘llagan zarbasi bilan Donnarummani dog‘da qoldirdi.
«O‘rmonchilar» Rodrining goliga ham javob qaytarishdi. Odatda himoyaviy ishlar bilan mashg‘ul bo‘ladigan Anderson olis masofadan yo‘llagan kuchli zarba qarshisida «shaharliklar» posboni ojiz qoldi.
O‘yindagi asosiy drama final hushtagi chalinishi arafasida ro‘y berdi. Mezbonlar bir hujumning o‘zida bir necha bor zarba berishdi, dastlabki zarbalar himoyachilar to‘sig‘idan o‘tmadi, so‘nggisini esa Murilo deyarli darvoza chizig‘i ustida qaytarib yubordi.
Bu epizod yakunda chempionlik taqdirini o‘zgartirgan epizodga aylanishi mumkin.
«Aston Villa» – «Chelsi» 1:4
Gollar: Duglas Luis, 2 (1:0). Joao Pedro, 35 (1:1). Joao Pedro, 45+6 (1:2). Palmer, 55 (1:3). Joao Pedro, 64 (1:4)
«Aston Villa»: Martines, Konsa, Mings, Matsen, Kesh (Bogard, 46), Duglas Luis (Barkli, 63), Onana, Rodjyers, Buendiya (Sancho, 63), Beyli (Alisson, 63), Uotkins (Abraham, 72)
«Chelsi»: Yyergensen, Chaloba, Fofana (Kukurelya, 79), Hato, Gyusto (Lavia, 75), Jyeyms, Kaysedo, Fernandes (Adarabioyo, 79), Garnacho, Palmer (Santos, 85), Joao Pedro (Delap, 85)
Ogohlantirishlar: Kesh, 32. Rodjyers, 58. Uotkins, 68 – Joao Pedro, 54. Fernandes, 58
Chorshanba oqshomidagi markaziy uchrashuvda «Chelsi» tezkor gol o‘tkazib yubordi: Beylining darvozabon maydonchasiga oshirgan uzatmasini Duglas Luiz golga aylantirdi. Ammo birminghemliklarning braziliyalik futbolchisining bu goliga birinchi bo‘limning o‘zida londonliklar safidagi boshqa bir braziliyalik ikki bor javob qaytardi. Birinchi holatda Joao Pedro Gyustoning qanotdan uzatmasidan foydalanib, amalda bo‘sh qolgan darvozani ishg‘ol etdi.
Bo‘limga qo‘shib berilgan oltinchi daqiqada esa u Ensoning uzatmasini golga aylantirdi. Birminghemliklar ikkinchi bo‘limda ikkinchi golni urishgandi, ammo Uotkinsning tezkor qarshi hujumda urgan goli mikroskopik ofsayd holati tufayli bekor qilindi. Shundan keyin Palmer uchinchi golni urib, amalda o‘yin taqdirini hal qildi.
Qolgan daqiqalarda «Aston Villa» futbolchilari oldinga tashlanishdi, vaziyatlar yaratishdi, ammo yana gol o‘tkazib yuborishdi. Mezbonlar to‘liq kuch bilan oldinga tashlanishi natijasida «Chelsi» hujum chizig‘i vakillari katta bo‘sh hududlarga ega bo‘lishdi va navbatdagi qarshi hujumda Palmer Pedroning uchinchi goliga assistentlik qildi. Bu yirik g‘alabadan keyin Liam Rosenior shogirdlari turnir jadvalidagi vaziyatini yaxshilab oldi. Birinchidan, londonliklar bir kun oldin sensatsion ravishda «Vulverhempton»ga yutqazib qo‘ygan «Liverpul»dan qo‘shimcha ko‘rsatkichlar evaziga o‘zib ketishdi. Ikkinchidan, endi to‘rtinchi o‘rindagi «Villa» bilan oradagi farq atigi uch ochkoni tashkil etmoqda.
«Nyukasl Yunayted» – «Manchester Yunayted» 2:1
Gollar: Gordon, 45+6 – penalti (1:0). Kazemiro, 45+9 (1:1). Osula, 90 (2:1)
«Nyukasl Yunayted»: Ramsdeyl, Tiau, Byorn, Holl, Trippiyer, Tonali (Botman, 90+7), Joelinton, Remsi, Barns (Uillok, 46), Elanga (Myorfi, 84), Gordon (Osula, 85)
«Manchester Yunayted»: Lammens, Maguayr, Yoro, Shou (Dalot, 61), Mazraviy (Malasia, 85), Kazemiro (Ugarte, 61), Maynu (Diallo, 76), Brunu Fernandesh, Kunya, Mbemo (Zirkze, 77), Sheshko
Ogohlantirishlar: Remsi, 26. Joelinton, 38. Trippiyer, 80 – Mbemo, 37. Shou, 39. Mazraviy, 64
Chetlatish: Remsi, 45 (ikkinchi sariq)
«MYu» besh yildan buyon «Sent-Jyeyms Park» o‘yingohida g‘alaba qozona olmayotgandi va bu safar ham jamoa katta qiyinchilikka uchradi. Xususan, mezbonlarning hujumlaridan birida Lammens o‘zini ayamasdan Jyeykob Remsining oyog‘iga tashlanishiga to‘g‘ri keldi. Raqib hujumchisi esa bu vaziyatda aktyorlik mahoratini ishga soldi va unga simulyatsiya uchun ikkinchi sariq kartochka ko‘rsatildi. Lekin bir necha daqiqa o‘tib «Nyukasl» baribir penalti ishladi va Gordon hisobni ochdi.
Lekin son jihatdan ozchilik bir necha daqiqa o‘tib mehmonlar tomonidan ijro etilgan standart vaziyat vaqtida sezilib qoldi. Birinchi bo‘limga qo‘shib berilgan to‘qqizinchi daqiqada Kazemiro Brunu Fernandeshning uzatmasidan hisobni tenglashtirdi. Portugaliyalik bu orqali joriy mavsumdagi 14-assistni o‘z hisobiga yozib qo‘ydi va 26 yil muqaddam Devid Bekhem tomonidan o‘rnatilgan klub rekordini takrorladi. Agar jamoadoshlari aniqroq harakat qilganida, raqib darvozasidagi Ramsdeyl esa bir necha bor qahramonlik ko‘rsatmaganida, Brunu bu rekordni yangilagan ham bo‘lardi. Ammo o‘yin oxirida «qarg‘alar» kiperi Zirkzening zarbasidan keyin «to‘qqizlik»ka ketayotgan to‘pni «olib chiqdi», zaxiradan o‘yinga qo‘shilgan Osula esa so‘nggi daqiqada g‘alaba golini urdi. Yosh forvard qarshi hujumda raqib himoyachilaridan tezkorroq harakat qildi va to‘pni olis burchakka aniq yo‘naltirib, Lammensni tomoshabinga aylantirdi. Bu Maykla Kerrik uchun «MYu» boshqaruvidagi ilk mag‘lubiyatga aylandi.
Jurnalistlar uyushmasi rahbari o‘zgardi
Oliy ta’lim vazirligi xodimi 100 ming dollar bilan ushlandi
“Yuk mashina boshqarishimga ko‘pchilik ishonmaydi” – oltiariqlik gulchi ayol
-
Iqtisodiyot4 days agoAQSh Eronga zarbalarni qo‘llab-quvvatlamagan Ispaniya bilan savdoni to‘xtatadi
-
Iqtisodiyot4 days agoYevropada gaz narxi so‘nggi uch yildagi eng yuqori darajaga yetdi
-
Iqtisodiyot5 days ago
O‘zbekiston–Yaponiya: startaplar yo‘nalishida hamkorlik imkoniyati mavjud
-
Jamiyat1 day ago
Гидрометеорология хизмати қор кўчиш хавфидан огоҳлантирди
-
Dunyodan2 days ago
Sochida bir kunda ikki marta zilzila sodir bo‘ldi
-
Iqtisodiyot2 days agoSodiqlik kartasini skanerlash va xarid uchun to‘lov qilish — endi payme’da barchasi bir urinishda!
-
Siyosat4 days agoO‘zbekiston mudofaa qobiliyatini mustahkamlash masalalari muhokama qilindi
-
Siyosat4 days agoPrezident Mirziyoyev pedofillarga umrbod qamoq jazosini joriy etish to‘g‘risidagi qonunni imzoladi