Sport
Shomurodovda yana gol, London derbisida mojaro, Salohda rekord. Kun o‘yinlari
«Arsenal» va «Barsa»da yorqin g‘alabalar, «Bavariya» yana ochko yo‘qotdi. Shanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.
Angliya: YeChL poygasida kambeklar kuni
«Lids» – «Arsenal» 0:4
Gollar: Subimendi, 27 (0:1). Darlou, 38 – avtogol (0:2). Yokeresh, 69 (0:3). Gabriel Jyezus, 86 (0:4)
«Lids»: Darlou, Rodon, Streyk, Jastin (Longstaff, 46), Ampadu, Gruyev (Okafor, 46), Gudmundsson, Bogl, Aaronson (Buonanotte, 71), Shtah (Nionto, 81), Kalvert-Lyuin (Piru, 85)
«Arsenal»: Rayya, Saliba, Gabriel Magalyayns, Inkapiye (Kalafiori, 75), Timber, Subimendi, Rays, Havers (Edegor, 61), Trossar (Eze, 81), Madueke (Martinelli, 61), Yokeresh (Gabriel Jyezus, 76)
Ogohlantirishlar: Gudmundsson, 37 – Timber, 59
Qatorasiga uch turda g‘alaba qozona olmagan «Arsenal»da inqiroz yuzaga kelgani haqida taxminlar bildirilgandi va bunga jamoa faqat ishonchli g‘alaba bilan javob qaytarishi mumkin edi. Amalda ham xuddi shunday bo‘lib chiqdi, «Lids» esa APLdagi barcha jamoalar kabi «kanonirlar»ning burchak zarbalariga chora topolmayapti. Birinchi gol urilgan holatda mezbonlar hujumni qaytargandek edi, ammo to‘pni qayta egallab olgan mehmonlar hujumni ikkinchi tempda davom ettirishdi va himoyachilarni finti bilan dog‘da qoldirgan Noni Madueke to‘pni Subimendining boshiga yetkazib berdi. Keyin esa xuddi shu vinger burchak zarbasini shunday ijro etdiki, darvozabon Darlou to‘pni o‘z darvozasiga kiritib yubordi.
Shu tariqa, avvaliga boshlang‘ich tarkibda bo‘lmagan va Saka chigalyozdi mashg‘ulotlari vaqtida o‘zini noqulay his qilishi ortidan startdan o‘rin olgan futbolchi bir bo‘limning o‘zida ikki golli harakat amalga oshirdi, holbuki Nonida 412 kundan buyon APLda golli uzatma bo‘lmagandi.
Mikel Arteta shogirdlari o‘yindan ham gol urishdi: ikkinchi bo‘limda maydonga tushgan Edegor boshlab bergan hujumni darvozabon hududida ochilgan Yokeresh yakunladi, unga ikkinchi bo‘limda zaxiradan tushgan boshqa bir futbolchi Gabriel Martinelli assistentlik qildi. Zaxiradan o‘yinga qo‘shilgan yana bir hujumchi Gabriel Jyezus esa o‘yindagi eng chiroyli gol muallifiga aylandi. U jarima maydoniga kirishda Edegordan pas qabul qilib oldi va fint ishlatib, himoyachilar ta’qibidan qutulgan holda to‘pni burchakka joyladi. «Arsenal» tanqidlarga munosib javob qaytardi va turnir jadvalidagi o‘rnini mustahkamladi – kamida «Siti» va «Aston Villa»ning yakshanba kungi o‘yinlari yakuniga qadar oradagi farq 7 ochkoga yetdi.
«Chelsi» – «Vest Hem» 3:2
Gollar: Bouen, 7 (0:1). Sammervill, 36 (0:2). Joao Pedro, 57 (1:2). Kukurelya, 70 (2:2). Fernandes, 90+2 (3:2)
«Chelsi»: Sanches, Badiashile (Kukurelya, 46), Chaloba, Hato (Fofana, 46), Gyusto (Jyeyms, 81), Fernandes, Kaysedo, Palmer, Garnacho (Joao Pedro, 46), Gittens (Pedru Netu, 26), Delap
«Vest Hem»: Areola, Mavropanos, Todibo, Diuf (Skarlz, 81), Van-Bissaka, Fernandesh, Souchek, Pablo (Kilman, 67), Sammervill, Bouen (Traore, 81), Kastelyanos (Uilson, 76)
Ogohlantirishlar: Kaysedo, 85. Fernandes, 90. Joao Pedro, 90 – Skarlz, 90. Traore, 90
Chetlatish: Todibo, 90
Turnir jadvalining quyi qismidan chiqib ketishga harakat qilayotgan va so‘nggi ikki o‘yinida g‘alaba qozongan «Vest Hem» «Stemford Brij»da ham g‘alaba uchun kelganini namoyish etdi. O‘yin startidayoq Bouenning uzatmasi to‘g‘ridan to‘g‘ri zarbaga aylandi – bu holatda Pablo to‘pga sakrashi Sanchesni chalg‘itib qo‘ydi. «Bolg‘achilar»ning ikkinchi goli ham o‘ng qanotdan urildi, uzun pasdan keyin to‘pga yetib borgan Bouen jarima maydoni ichiga kirib borgan sherigi Van-Bissakani pas bilan ta’minladi. U jarima maydoni markaziga tashlab bergan to‘pga yetib kelgan Sammervil qatorasiga to‘rtinchi o‘yinda o‘z nomini tabloga yozdirib qo‘ydi.
Mezbonlar ustozi Liam Rosenior YeChLda «Napoli»ga qarshi kechgan qiyin o‘yindan (jamoa kambek amalga oshirib, kuchli sakkizlikka kirgandi – 3:2) keyin va keyingi hafta o‘rtasida Liga kubogi yarimfinalida «Arsenal»ga qarshi kechadigan javob uchrashuvi oldidan (ko‘klar o‘z maydonidagi birinchi o‘yinda 2:3 hisobida yutqazgan) tarkibda katta rotatsiyaga qo‘l urgandi – Pedru Netu (u birinchi bo‘limda jarohat olgan Gittensni almashtirdi), Joao Pedro, Kukurelya, Fofana, Jyeyms kabi asosiy tarkib futbolchilari zaxirada qoldirilgandi.
Murabbiy ikkinchi bo‘limni birdaniga uch futbolchini almashtirish bilan boshladi – o‘tkazilgan gollarda xatoga yo‘l qo‘ygan himoyachilar Badiashile va Hato, shuningdek, birinchi bo‘limda 10 martadan ortiq to‘p yo‘qotgan chap qanot vingeri Garnacho o‘rniga mos ravishda Kukurelya, Fofana va Pedro tushirildi. Mehmonlar esa ikkinchi bo‘limda ham hujumkor o‘yin ko‘rsatishda davom etdi va Sanchesni bir necha bor qahramonlik ko‘rsatishga majbur etishdi.
Futbolchilar tanaffusga chiqib ketishayotganida Sanches «Stemford Brij»ni to‘ldirib o‘tirgan fanatlarni tinchlantirishiga to‘g‘ri kelgandi. Ushbu ispaniyalik darvozabon norozilik bildirayotgan muxlislarga qarata jamoada hali barchasini o‘nglash uchun 45 daqiqa borligini aytgandi.
Uning gaplari to‘g‘ri edi – ikkinchi bo‘limda mezbonlar barchasini o‘z qo‘liga olishdi. Zaxiradan tushirilgan futbolchilarning sa’y-harakatlari bilan kambek amalga oshirildi: 56-daqiqada Joao Pedro Uesli Fofananing ideal krossiga yetib borib, hisobni qisqartirdi. Keyin esa Mark Kukurelya ham boshda darvozani ishg‘ol etib, muvozanatni tikladi.
O‘yinga qo‘shib berilgan daqiqalarda esa Joao Pedroning uzatmasidan keyin Enso Fernandes g‘alaba golini urishga erishdi. Amalda barchasi boshqacha kechishi mumkin edi, chunki hisob 2:2 ekanida mehmonlar himoyachisi Todibo darvozabon hududida turib to‘pni darvozaga to‘g‘ri tepa olmagandi.
Yakunda ushbu fransiyalik himoyachi – oqshomning eng omadsiz kishisiga aylandi. Hakam hushtagi chalinishi arafasida maydonda ikki jamoa futbolchilari o‘rtasida janjal boshlanib ketdi. 90+6-daqiqada Adama Traore burchakda Kukurelyani kuch bilan turtib, maydon tashqarisiga chiqarib yubordi, Joao Pedro esa sherigini himoya qilib, uning o‘ziga tashlandi. Voqea joyiga yetib kelgan Todibo esa braziliyalik hujumchining bo‘ynidan bo‘g‘ib oldi.
Yakunda Todiboga qizil, janjalda ishtirok etgan yana to‘rt futbolchiga sariq kartochkalar ko‘rsatildi. Mezbonlar yakunda tarixiy g‘alabani nishonlashdi. Bungacha «Chelsi» APL o‘yinlarida 57 marta birinchi bo‘limdan keyin ikki to‘p farqi bilan ortda borgan va ilk marta bunday o‘yinni g‘alabaga aylantira oldi.
«Liverpul» – «Nyukasl» 4:1
Gollar: Gordon, 36 (0:1). Ekitike, 41 (1:1). Ekitike, 43 (2:1). Virs, 67 (3:1). Konate, 90+3 (4:1)
«Liverpul»: Alisson, van Deyk, Konate, Kerkez, Soboslai, Makallister, Gravenberh, Virs (Endo, 87), Gakpo, Saloh (Jons, 84), Ekitike (Kiyeza, 84)
«Nyukasl Yunayted»: Poup, Tshau, Byorn, Holl (A. Myorfi, 89), Trippiyer (Osula, 84), Tonali, Remsi, Uillok (Vissa, 73), Barns (J. Myorfi, 73), Elanga (Voltemade, 73), Gordon
Ogohlantirishlar: Makallister, 59 – Gordon, 11. Remsi, 45. Byorn, 86
«Liverpul» hafta o‘rtasida YeChL guruh bosqichi so‘nggi turida «Qorabog‘»ga qarshi o‘yinda xumordan chiqquncha gol urgandi (6:0). «Nyukasl» esa butunlay boshqa darajadagi raqib edi va «Enfild»dagi uchrashuvning birinchi bo‘limida mehmonlar faolroq o‘ynab, xavfliroq vaziyatlar yaratishdi. Eddi Hau shogirdlari qarshi hujumlarga tayandi va shunday hujumlardan biri Gordon hisobni ochishi bilan yakunlandi. Ammo qizillar tezda o‘ziga kelishdi, ajoyib formaga kirib olgan Virs to‘pni qulay pozitsiyada turgan Ekitikening oyoqlari oldiga olib kelib berdi.
Jamoaning moslashish davri qiyin kechgani uchun tanqidga uchragan yozgi xaridlari nihoyat o‘z so‘zini aytmoqda. Shunday futbolchilardan biri bo‘lgan Kerkez bir necha daqiqa o‘tib o‘z jarima maydoni yaqinida turgan holda Ekitikening ikkinchi golini tashkillashtirib berdi. Shu bilan birga, bu hujumda fransuz hujumchisining mahoratini ham e’tirof etish kerak, u tezlik olib, himoyachidan qochib ketdi va shvedka uslubidagi zarbasi bilan to‘pni Poupning yonidan o‘tkazgancha darvozani ishg‘ol etdi.
Shu tariqa, barchasi bir necha daqiqa ichida o‘zgarib ketdi, ikkinchi bo‘limda esa Saloh Virsga golli uzatma berib, APLda yana bir rekord o‘rnatdi. Endi misrlik hujumchi bitta stadiondagi golli harakatlar soni bo‘yicha (jami 152 ta gol va pas) Tiyerri Anri va Ueyn Runini ortda qoldirib, mutlaq rekordchiga aylandi. Qolaversa, u bitta raqibga qarshi o‘yinlardagi gol va uzatmalar soni kamida o‘ntani tashkil etayotgan yagona futbolchidir (10+10).
O‘yin oxirida yana bir e’tiborli voqea sodir bo‘ldi. 90+3-daqiqada Konate gol urib, o‘yindagi yakuniy natijani o‘rnatdi. Bu o‘yin natijasiga ta’sir ko‘rsatmagan bo‘lsa-da, futbolchining o‘zi uchun bu gol muhim edi. Yanvar boshida uning otasi vafot etgan va uch o‘yinni o‘tkazib yuborgandi, futbolchi golni nishonlash chog‘ida yig‘lab yubordi, uni esa avvalroq otasidan ayrilgan Alisson yupatdi.
«Liverpul» uchun bu APLda 2026 yildagi ilk g‘alaba bo‘ldi. Bu g‘alaba orqali beshinchi o‘ringa chiqib olgan mersisaydliklar pastdan ta’qib qilib kelayotgan «Nyukasl» bilan oradagi farq olti ochkoga yetkazildi, to‘rtinchi o‘rindagi «Chelsi» bilan oradagi bir ochkolik farq saqlanib qoldi.
Ispaniya: Ferrandan darvincha ijro
«Elche» – «Barselona» 1:3
Gollar: Yamal, 6 (0:1). Rodriges, 29 (1:1). Torres, 40 (1:2). Reshford, 72 (1:3)
«Elche»: Penya, Chust, Donald, Affengryuber (Petro, 74), Aguado (Redondo, 56), Mendosa, Valera, Pedrosa, Diangana (Neto, 60), Andre Silva (Boyar, 60), Rodriges (Sepeda, 75)
«Barselona»: X. Garsiya, Kubarsi, E. Garsiya, Balde, Kunde (Arauxo, 84), de Yong, Fermin Lopes (Kasado, 85), Olmo (Bernal, 62), Rafinya (Reshford, 46), Yamal, Torres (Levandovski, 62)
Ogohlantirishlar: Donald, 38. Mendosa, 76 – de Yong, 90
«Barselona» yana darvozasi daxlsizligini saqlay olmadi, ammo hujumdagi kuchli o‘yin himoyadagi xatolarni yopib ketmoqda. O‘yin startidayoq Dani Olmoning uzatmasidan keyin yakkama-yakka vaziyatga chiqib borgan Yamal la liganing bir mavsumida urilgan gollar soni bo‘yicha (9) o‘z rekordini yangiladi. Bo‘lim oxirida esa Ferran Torres 20 o‘yinda 12-golini urib, ko‘k-anorranglilar safida so‘nggi 12 yil ichidagi eng sermahsul ispan futbolchisiga aylandi – Pedro 2013/14 yillar mavsumida 37 o‘yinda 15 urgan, Torresda uning natijasini yaxshilash uchun hali imkoniyat yetarli.
Ushbu hujumchi o‘z natijasini shu o‘yinning o‘zidayoq yaxshilab olishi mumkin edi, ammo buning o‘rniga chempionatning «Dahshatli xatolar» nominatsiyasi bo‘yicha haylayti qahramoniga aylanadigan bo‘ldi. U darvozabon hududida turib shunday zarba berdiki, to‘p avvaliga to‘singa, keyin ustunga tegdi, ammo darvoza to‘riga kirmadi.
Lekin kataloniyalik muxlislarni uning xatosi emas, birinchi bo‘lim oxirida Rafinya jarohat olib, maydonni tark etishi ranjitdi. Shu bilan birga, uning o‘rnini egallagan Reshford ikkinchi bo‘limda yakuniy hisobni o‘rnatdi. Ijara asosida o‘ynayotgan hujumchi jamoaning Yamal va Fermin Lopesdan keyingi eng sermahsul uchinchi futbolchisi bo‘lib turibdi (barcha turnirlar doirasida 10+10). «Barsa» muxlislari allaqachon Angliyadan kelayotgan xabarlardan xavotirga tusha boshlagan, unga ko‘ra, agar Maykl Kerrik «MYu» bosh murabbiyi sifatida qoladigan bo‘lsa, Markusni qadrdon klubiga qaytarmoqchi.
«Osasuna» – «Vilyarreal» 2:2
Gollar: Moreno, 17 – penalti (0:1). Munos, 20 (1:1). Budimir, 45+2 (2:1). Moreno, 70 (2:2)
«Osasuna»: Garsiya (Bretones, 76), Galan, Katena (Errando, 46), Errera, Boyomo, Torro, Roze, Moro (Oros, 62), Monkayola, Munyos, Budimir (Raul Garsiya, 76)
«Vilyarreal»: Luis Junior, Marin, Veyga, Pedrasa (Kardona, 46), Mourino, Parexo (Komesanya, 75), Guyye, Moleyro, Pepe, Moreno (Oluvaseyi, 83), Mikautadze (Byukenen, 75)
Ogohlantirishlar: Katena, 38. Torro, 72 – Pedrasa, 19. Veyga, 90
«Levante» – «Atletiko» 0:0
«Levante»: Rayan, Moreno (Sanches, 29), de la Fuente, Matturro, Tolyan, Pablo Martines, Ragube, K. Alvares (Olasagasti, 75), Losada (Etta Eyong, 59), Tunde (Kortes, 75), Romero (Abed, 89)
«Atletiko»: Oblak, Langle (Gansko, 46), Le Norman, Rudjyeri, Molina, Kardozo, Barrios (Koke, 49), Gonsales (Monserrate, 73), Liorente (Baena, 59), Syorlot (X. Alvares, 27), Almada (Pubil, 58)
Ogohlantirishlar: de la Fuente, 84. Olasagasti, 90 – Langle, 21
YeChL yo‘llanmasi uchun kurashayotgan «Vilyarreal» «Osasuna» maydonidagi o‘yinda hisobda ortda quvishiga to‘g‘ri keldi va Jyerar Moreno dubli bilan ushbu vazifani uddalashga yordam berdi. Shu bilan birga, «sariq submarinalar» bu turda ochko yo‘qotgan «Atletiko»ga yaqinlasha olmadi, madridliklar safida Xulian Alvares 11 o‘yindan buyon gol urolmayapti va bu argentinalik futbolchi uchun rekord darajadagi noxush seriya. Boshqa tomondan, Marselino Toral jamoasi beshinchi o‘rin bilan oradagi farqni oshirib oldi – mavsum startida shov-shuv ko‘targan «Espanyol» qatorasiga beshinchi turda yuta olmayapti. «To‘tiqushlar»ning shanba kuni «Alaves»dan uchralgan mag‘lubiyati – bu oraliqdagi to‘rtinchisi bo‘ldi.
Germaniya: «Bavariya»da yana qoqilish
«Hamburg» – «Bavariya» 2:2
Gollar: Viyeyra, 34 – penalti (1:0). Keyn, 42 (1:1). Dias, 46 (1:2). Vushkovich, 53 (2:2)
«Hamburg»: Oyyer Fernandesh, Vushkovich, Elfadli, Kapaldo, Lokonga (Feray, 85), Remberg, Muhaym, Mikelbrensis (Omari, 73), Jatta (Gocholeishvili, 59), Viyeyra (Glatsel, 85), Kenigsderffer (Filipp, 73)
«Bavariya»: Noyyer, Upamekano, Kim Min Je (Ta, 65), Deyvis, Stanishich, Kimmih, Pavlovich, Karl (Dias, 46), Gnabri (Musiala, 65), Olise, Keyn
Ogohlantirishlar: Remberg, 23. Muhaym, 55. Lokonga, 75. Gocholeishvili, 85. Oyyer Fernandesh, 90. Kapaldo, 90 – Kim Min Je, 57. Keyn, 87. Olise, 90. Kimmih, 90
Futbolda barchasi bir necha daqiqa ichida o‘zgarib ketishi mumkin. Bu o‘yinda ham «Bavariya» hisobni ochishi muqarrardek ko‘ringandi, ammo mezbonlarni darvoza to‘sini qutqardi va amalda keyingi vaziyatda Kimmih o‘z jamoasi jarima maydonida fol ishlatdi. «Hamburg» penalti tepish huquqini qo‘lga kiritdi va Viyeyraning aniq zarbasi evaziga hisobni ochdi. Tanaffus arafasida Kimmih aybini qisman yuvib, Keynni golli uzatma bilan ta’minladi. Ammo shu bilan mehmonlar tashabbusni o‘z tomoniga og‘dira olmadi va Noyyer muntazam ravishda o‘z mahoratini ishga solishi talab etildi.
Ikkinchi bo‘limda Karl o‘rnini egallagan Dias myunxenliklarni hisobda oldinga olib chiqishi ham mezbonlarni taslim qila olmadi. «Bavariya» mudofaasi shu kuni ishonchli harakat qilmadi va burchak zarbasi amalga oshirilganida 19 yoshli Vushkovich raqib futbolchilarining barchasidan baland sakrab, hisobni tenglashtirdi. Yana bir vaziyatda mezbonlar futbolchisi qarshi hujumda to‘pni Noyyer ustidan oshirib tashlaganida, Deyvis so‘nggi lahzada to‘pni chiziq ustidan qaytarib yubordi.
Yakunda Vensan Kompani shogirdlari qatorasiga ikkinchi o‘yinda ochko yo‘qotdi va Dortmundning «Borussiya» klubiga yaqinlashib olish imkonini berdi.
Turkiya: Shomurodov – to‘purar
«Boshoqshehir» – «Rizespor» 2:2
Gollar: Eldor Shomurodov (19), Bergut Yildirim (74) – M. Shahin (45+1), Valentin Mixayla (68).
To‘rt o‘yindan iborat g‘alabali seriya qayd etgan «Boshokshehir» navbatdagi o‘yinda ham birinchi bo‘lib hisobni ochdi. 19-daqiqada chap qanotdan uzatilgan to‘pni Eldor Shomurodov osonlik bilan darvoza to‘riga yo‘lladi. O‘zbekistonlik hujumchi uchun bu Turkiya superligasidagi 14-goli bo‘ldi va u chempionat to‘purarlari poygasida yetakchilikni davom ettirmoqda – uni «Trabzonspor» hujumchisi Pol Onuachu 13 gol bilan ta’qib etmoqda.
Shomurodov shu tempda davom etadigan bo‘lsa, nafaqat chempionatning bu mavsumida, balki Istanbul klubi tarixidagi eng yaxshi to‘purarga aylanib olishi mumkin – hozircha bu boradagi rekord o‘tgan mavsumda 21 gol urgan va yozda Qatar chempionatiga yo‘l olgan Kshishtof Pyontekka tegishli.
Istanbulliklar o‘yin davomida tashabbusni raqibga berib qo‘yishdi va faqat Yildirimning goli evaziga mag‘lubiyatdan qutulib qolishdi. Endilikda jamoa 20 turdan keyin 30 ochko to‘plagan holda oltinchi o‘rinda bormoqda va peshqadam «Galatasaroy» bilan oradagi farq 16 ochkoga teng.
Sport
«Real» «Bavariya»ga qarshi, «Barsa» yana «Atletiko» bilan o‘ynaydi. YeChLda chorakfinal juftliklari
Turnirda 8 jamoa qoldi.
Chorshanba oqshomida Chempionlar ligasi 2025/26 yillar mavsumi 1/8 finali doirasida yana to‘rt uchrashuv o‘tkazildi: «Arsenal», «Real», «PSJ» va «Sporting» ortidan «Barselona», «Atletiko», «Bavariya» va «Liverpul» jamoalari ham keyingi bosqichga yo‘llanma olishdi.
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
«Arsenal» va «Bavariya» – asosiy favoritlar
Har bir bosqichdan keyin Opta superkompyuteri Chempionlar ligasida kim g‘olib bo‘lishi bo‘yicha prognozlarini yangilab bormoqda. Turnir startidan oldin «Liverpul»ning imkoniyatlari eng yuqori baholangandi, o‘tgan mavsum Angliya chempioni bo‘lgan va yozgi transferlarda eng faol bo‘lgan jamoaga 20,6 foiz berilgandi, ammo vaqt o‘tib bu jamoaning imkoniyatlari uch baravar pasaytirildi – 7 foizgacha.
Turnir avvalida ikkinchi asosiy da’vogar «Arsenal» bo‘lib turgandi (15,3 foiz), ammo londonliklarning imkoniyatlari vaqt sayin o‘sib bordi va endi ikki baravar yuqori baholanmoqda.
Setkaning ikkinchi tomonidagi asosiy favorit – «Bavariya». Opta Angliya va Germaniya grandlari Budapeshtdagi finalga yetib kelishini bashorat qilmoqda. «Barselona» va «PSJ»da ham yarimfinalga chiqish imkoniyati yuqori baholangan.
Opta versiyasiga ko‘ra, jamoalarning Chempionlar ligasi g‘olibligi uchun imkoniyatlari:
«Arsenal»da startdan oldin 15,3 foiz, chorakfinal arafasida 30 foiz;
«Bavariya»da startdan oldin 4,5 foiz, chorakfinal arafasida 18 foiz;
«Barselona»da startdan oldin 8,8 foiz, chorakfinal arafasida 14,7 foiz;
«PSJ»da startdan oldin 12 foiz, chorakfinal arafasida 12,1 foiz;
«Real»da startdan oldin 5,8 foiz, chorakfinal arafasida 7 foiz;
«Liverpul»da startdan oldin 20,6 foiz, chorakfinal arafasida 30 foiz;
«Atletiko»da startdan oldin 0,8 foiz, chorakfinal arafasida 4,7 foiz;
«Sporting»da startdan oldin 0,8 foiz, chorakfinal arafasida 3,3 foiz.
1993 yil, aprel. Milliy basketbol assotsiatsiyasi muntazam ligasidagi navbatdagi o‘yini bo‘lib o‘tmoqda. Tanaffus paytida qiziqarli tanlov o‘tkazadi. Unga ko‘ra, xohlovchilar maydon chetidan to‘p irg‘itib, narigi tomondagi savatchaga tushirishi kerak edi. Bir yigit shu ishni uddalaydi. Biroq yutuqni to‘lashi lozim bo‘lgan sug‘urta kompaniyasi g‘irromlik qiladi va pullarini berishdan bosh tortadi. Oxir oqibat yigitga yutuqni “Chicago bulls” jamoasi to‘lab beradi.
Bugun AQSh sportini basketbol o‘yinisiz tasavvur qilib bo‘lmaydi. Bu sport turi muxlislar tashrifi bo‘yicha Amerika futboli va beysboldan so‘ng uchinchi o‘rinda turadi.
Basketbol AQShda eng ko‘p o‘ynaladigan o‘yin hisoblanadi va bilan mamlakatda 26 milliondan ortiq odam shug‘ullanadi.
Shuningdek, AQSh va Kanada jamoalari ishtirok etadian Milliy basketbol assotsiatsiyasi ligasi dunyo miqyosida eng ko‘p tomosha qilinadigan turnir hisoblanadi.
Jamoaviy o‘ynaladigan boshqa sport turlarida bo‘lgani kabi AQShda bo‘lib o‘tadigan basketbol o‘yinlari juda qiziqarli va keskin kurashlar ostida kechadi.
Shu bilan birga tanaffus paytlarida zaldagi muxlislar uchun turli tanlovlar o‘tkaziladi va o‘yinlar qiziqarli shouga aylanadi.
1993 yilda ana shunday tanlovlarning biri mojaro bilan yakun topadi. “Chicago bulls” jamoasiga homiylik qiluvchi kompaniya mukofot uchun va’da qilingan 1 mln dollarni g‘olib yigit Don Kelhunga to‘lab berishdan bosh tortadi.
Foto: spors.qq.com
Million dollarlik aniq zarba
1993 yil 14 aprel. Chikago shahridagi arenada MBA muntazam ligasida ishtirok etuvchi “Chicago bulls” va “Miami Heat” jamoalari bellashmoqda.
O‘sha paytda AQShlik jahonga mashhur basketbolchi Maykl Jordan “Chicago bulls” jamoasi sharafini himoya qilar va u ham maydonda edi.
O‘yinga tanaffus berilgan paytda “Chicago bulls” jamoasi, “Koka-kola” kompaniyasi Lettuce Entertain You restoranlar tarmog‘idan iborat tashkilotchilar yutuqli tanlov o‘tkazadi.
Tanlovga ko‘ra, avval muxlislar orasidan tasodifiy yo‘l bilan bir necha kishi tanlab olinadi. So‘ng ular navbati bilan basketbol maydonining bir chetidan, ikkinchi chetidagi savatchaga to‘pni uloqtirishi kerak edi.
Qoida aniq: 23 metr uzoqlikdan savatchaga to‘pni aniq tushirgan qatnashchi g‘olib bo‘ladi va u 1 mln dollarga ega chiqadi. Agar bu ishni bir necha kishi bajarsa mukofot puli ular orasida teng taqsimlanadi.
Yutuqni “Chicago bulls” jamoasiga homiylik qilayotgan “American Hole ‘N One” sug‘urta kompanisi to‘lab berishi lozim edi.
Tanlov boshlangach bir necha kishi to‘pni uloqtiradi, biroq savatchaga tushira olmaydi. Aslida bu ish juda qiyin bo‘lib, shu sababli ham tashkilotchilar tanlovga yutuq sifatida katta mablag‘ qo‘ygandi.
Navbat kanselariya do‘koni sotuvchisi bo‘lib ishlovchi Don Kelhunga keladi. Yigit uloqtirgan to‘p to‘g‘ri borib savatchaga tushadi. Shunda arenada o‘tirgan muxlislar yigitni olqishlay boshlaydi.
Foto: Videodan kadr
O‘sha paytda tanaffus olgan basketbolchilar tanlovni kuzatishayotgandi. Ular ham navbati bilan yigitni quchoqlab, tabriklashadi. Jumladan, maydonda bo‘lgan Maykl Jordan ham.
Don Kelhunning qo‘liga 1 dollarlik yutuqqa ega chiqqani haqidagi banner-sertifikat topshiriladi. Yigit o‘sha kuni xursand holda sevimli jamoasining arenasidan chiqib ketadi. Ertasi kuni esa muammo boshlanadi…
G‘irromlik
Don Kelhun ancha-muncha basketbolchilar ham amalga oshirolmaydigan ishni uddalab, mukofot puliga ega chiqqandi. Biroq 23 metrdan to‘pni savatchaga hech kim tushira olmasligiga ishonib pul tikkan sug‘urta kompaniyasi yutuqni to‘lashga kelganda g‘irromlik qilardi.
Kompaniya Don Kelhunga mukofot puli berilmasligini e’lon qilib, buning ikkita sababini keltiradi. Birinchi sababga ko‘ra Don Kelhun to‘pni uloqtirayotganda chiziqni bosgan.
Ikkinchisi, u avvalroq bir muddat kollejdagi jamoa safida basketbol o‘ynagan. Kompaniya tanlov oddiy muxlislar o‘rtasida o‘tkazilganini va unda Donning ishtiroki xato bo‘lganini aytadi.
Ya’ni, sug‘urta kopaniyasi tanlov ishtirokchilari so‘ngi 5 yilda basketbol bilan muntazam shug‘ullanmagan bo‘lishi kerak edi, deb turib oladi.
Foto: Videodan kadr
Shundan so‘ng sug‘urta kopaniyasining vajlari bo‘yicha tekshiruv o‘tkaziladi. Eng avval Don Kelhun to‘pni uloqtirayotgan paytda chiziqni bosganmi yoki yo‘q, shu tekshiriladi.
Jarayon tasvirga tushirilgandi. Video sinchiklab ko‘rilganda Donning chiziqni bosmagani ma’lum bo‘ladi. Ikkinchi sabab bo‘yicha ham komissiya yigitni haq deb topadi.
Chunki shartga ko‘ra, tanlovda professional sportchi, hatto faoliyatini tugatgan bo‘lsa ham qatnashishi mumkin emasdi. Don Kelhun esa hech qachon basketbol bilan professional tarzda shug‘ullanmagan, shunchaki kollejdagi havaskor jamoada o‘ynagandi.
Sug‘urta kopaniyasining ikkita vaji ham o‘rinli emas, deb topiladi. Biroq ular baribir 1 mln dollarni to‘lashni xohlamaydi.
O‘sha paytda Don Kelhun bilan sodir bo‘lgan hodisa va sug‘urta kompaniyasining g‘irromliq qilayotgani AQSh OAV lari e’tiboriga tushadi va ular birin ketin hodisa haqida yoza boshlaydi. Ammo bu ham sug‘urta kopaniyasining fikrini o‘zgartira olmaydi.
Hodisaga “Chicago bulls” jamoasining aralashuvi
Don Kelhunga qilingan g‘irromlik ommaga oshkor bo‘lgach muxlislar “Chicago bulls” jamoasini ham ayblay boshlaydi. Chunki tanlov jamoaning uy arenasida, uning o‘yini paytida tashkillashtirilgandi.
Qolaversa gazetalar va turli telekanallar har kuni Don Kelhunga qilingan g‘irromlik haqida maqola hamda ko‘rsatuvlar berib, muxlislarni yanada junbushga keltiradi.
Foto: alamy.com
Bu orada bir yilcha vaqt o‘tib ketadi va Don Kelhun sug‘urta kompaniyasidan o‘z yutug‘ini ololmaydi. Kunlarning birida “Chicago bulls” jamoasi rahbariyati 1 mln dollarlik yutuq bo‘yicha matbuot anjuani o‘tkazishi haqida e’lon beradi.
Matbuot anjumanida jamoa rahbariyati sug‘urta kompaniyasidan farqli ravishda Don Kelhun 1 mln dollarni haqqoniy yutganini tan oladi. So‘ng sug‘urta kompaniyasi to‘lashdan bosh tortgan pullarni jamoa to‘lab berishini ma’lum qiladi.
Faqat jamoa rahbariyati Donga pullarni birdaniga emas, har yili 50 ming dollardan 20 yil davomida to‘lab borilishini aytadi. Yigitning bunga ko‘nishdan o‘zga chorasi qolmaydi.
O‘shandan keyin Don Kelhun 2013 yilgacha 20 yil davomida har yili “Chicago bulls” jamoasidan 38 ming dollardan olib turadi. Qolgan 12 ming dollar daromad solig‘i uchun ushlab qolinadi. Shu tariqa yigit o‘zi yutgan mukofot pullarini to‘liq oladi.
Garchi bir urinishda million dollarni yutgan bo‘lsa-da Don Kelhun millionerga aylana olmaydi – u kanselariya mahsulotlari sotiladigan magazindagi ishini davom ettiradi.
Mashmashaga Maykl Jordanning aralashuvi
Don Kelhun to‘pni savatchaga tushirgan kuni afsonaviy basketbolchi Maykl Jordan ham maydonda edi. Boshqalar kabi u ham g‘olibni tabriklaydi.
Foto: Videodan kadr
O‘yin so‘ngida “Chicago bulls” jamoasining barcha o‘yinchilari Don Kelhun savatchaga tushirgan to‘pga dastxat qo‘yib berishlari lozim edi. O‘shanda faqat bir kishi – Maykl Jordan bu ishni qilmaydi. Jamoadoshlari dastxat qo‘yayotganda u indamay kiyinish xonasiga kirib ketadi.
Mayklning dastxat qo‘ymagani sababi bor edi. 1992 yilda u Upper Deck kompaniyasi bilan shartnoma imzolagandi.
Ushbu kelishuvga ko‘ra, Upper Deck Jordanning dastxati tushirilgan turli mahsulotlarni ishlab chiqaruvchi yagona kompaniya hisoblanardi.
Sportchi va kompaniya o‘rtasida tuzilgan shartnomada Jordanning futbolka, to‘plar va boshqa narsalarga dastxat qo‘yishi cheklangandi. Jordan faqat xayriya tadbirida yoki kasal bolalar uchun dastxat qo‘yishi mumkin edi.
Don Kelhun nima qilib bo‘lsa ham Jordanning dastxatini olishni maqsad qiladi va “Chicago bulls” jamoasining o‘yinlariga muntazam tusha boshlaydi. Biroq mashhur o‘yinchining dastxatini ololmaydi.
Oradan bir yilcha vaqt o‘tadi. Sug‘urta kompaniyasi hamon mukofot pulini to‘lab berishni kechiktirib kelar, Don esa da’vogar sifatida yurgandi. Bir kuni yigit Maykl Jordan o‘g‘lining o‘yinlarini ko‘rish uchun u o‘qiydigan maktabga borib turishini eshitadi va o‘sha yoqqa otlanadi.
Foto: memedeportes.com
Biroq tan soqchilar uni Mayklning oldiga qo‘ymaydi. Ular sportchi baribir dastxat bermasligini ta’kidlaydi. Don u yerdan chiqib ketayotganida tan soqchilardan biri uni quvib yetadi va Maykl chaqirayotganini aytadi.
Yigit Jordan bilan uchrashganda sportchi Donni taniydi va “Pulingizni oldingizmi?” deb so‘raydi. Yigit olmaganini bildiradi.
Shundan so‘ng Jordan “Chicago bulls” rahbariyatiga bosim o‘tkazadi va yigitga yutuqni to‘lab berishni talab qiladi. Avvaliga jamoa rahbariyati ko‘nmaydi.
Biroq bir muddat o‘tgach klub rahbariyati o‘zining eng yaxshi o‘yinchisi qo‘ygan talabga ko‘nishga majbur bo‘ladi.
Angliyaning olti jamoasidan to‘rttasi turnirni tark etdi. Chorakfinalning barcha juftliklari aniq bo‘ldi.
«Kamp Nou»da rekordlar va antirekord
«Barselona» – «Nyukasl» 7:2
Gollar: Rafinya, 6 (1:0). Elanga, 15 (1:1). Bernal, 18 (2:1). Elanga, 28 (2:2). Yamal, 45+7 – penalti (3:2). Fermin Lopes, 51 (4:2). Levandovski, 56 (5:2). Levandovski, 61 (6:2). Rafinya, 72 (7:2)
«Barselona»: X. Garsiya (Shchensni, 82), Kubarsi, Martin, Joau Kanselu (Espart, 66), E. Garsiya (Arauxo, 21), Pedri, Bernal, Fermin Lopes (Olmo, 66), Rafinya, Yamal, Levandovski (Torres, 66)
«Nyukasl Yunayted»: Ramsdeyl, Tiau, Byorn, Holl, Trippiyer (Livramento, 46), Joelinton (Botman, 64), Tonali (Uillok, 55), Remsi, Barns, Elanga (Myorfi, 64), Gordon (Osula, 81)
Ogohlantirishlar: Kubarsi, 44 – Joelinton, 17. Trippiyer, 45. Uillok, 60
Birinchi o‘yin: 1:1
«Kamp Nou»dagi o‘yin turli-tuman rekordlar jamlanmasiga aylandi. Birinchidan, Angliyaning hech bir klubi bungacha Chempionlar ligasi pley-offidagi bir o‘yinda 7 gol o‘tkazib yubormagandi. «Nyukasl» esa shunday imkonsiz ko‘ringan ishni uddaladi. O‘z maydonida to‘liq ustunlik qilgan va so‘nggi daqiqalarda penalti tufayli g‘alabani qo‘ldan chiqargan APL vakili javob o‘yinining birinchi bo‘limida ham munosib qarshilik ko‘rsatdi. Mehmonlar uchta gol o‘tkazib yuborgan bo‘lsa-da, o‘zi ham raqib mudofaasidagi qo‘pol xatolardan foydalanib, ikkita gol urdi.
Ammo Kiran Trippiyer birinchi bo‘limga qo‘shib berilgan daqiqalarda penaltiga sababchi bo‘ldi va Lamin Yamal uchinchi bor jamoasini hisobda oldinga olib chiqdi. Tanaffusdan keyin esa «Nyukasl»ni tanib bo‘lmay qoldi. Eddi Hau jamoasi shunchaki sochilib ketdi va 10 daqiqa ichida uchta gol qo‘yib yubordi. Bunday himoya chizig‘i bilan ko‘p narsadan umid qilib bo‘lmasdi. Ayniqsa Jyeykob Remsining xatosi yilning eng kulgili holatlari kolleksiyasidan o‘rin olishi tayin. Uning qo‘pol xatosi yettinchi gol o‘tkazilishiga olib keldi.
Rafinya bu o‘yinda «gol+pas» tizimida 4 (2+2) ochko ishladi, Robert Levandovski dublni rasmiylashtirdi. Polyak hujumchisi birdaniga bir necha rekordni urdi. U Chempionlar ligasida urgan gollari sonini 41 taga yetkazib, bu borada Lionel Messining rekordini yangiladi. Bundan tashqari, Robert endi Chempionlar ligasida dubl qayd etgan eng katta yoshli futbolchi hisoblanadi – u hozir 37 yoshda. «Barsa» uchun yagona minus – darvozabon Joan Garsiya jarohat olishi bo‘ldi. Chorakfinalda jamoa usiz qiynalishi mumkin.
Salohning benefisi
«Liverpul» – «Galatasaroy»
Gollar: Soboslai, 25 (1:0). Ekitike, 51 (2:0). Gravenberh, 53 (3:0). Saloh, 62 (4:0)
Aniq ijro etilmagan penalti: Saloh, 45+4’
«Liverpul»: Alisson, van Deyk, Konate, Kerkez, Frimpong (Jons, 67), Gravenberh (Nioni, 89), Virs (Kiyeza, 89), Soboslai, Makallister, Saloh (Gakpo, 74), Ekitike (Ngumoha, 89)
«Galatasaroy»: Ugurjan Chaqir, Abdulkarim Bardakchi (Eren Elmali, 73), Singo, Yakobs, Boe (Sane, 46), Torreyra (Yunus Oqgun, 60), Lemina, Sara, Barish Yilmaz, Sholloi, Osimhen (Lang, 46, Ikardi, 80)
Birinchi o‘yin: 0:1
Chorshanba kungi o‘yinlarda chinakamiga intriga saqlanib qolgan yagona o‘yin «Enfild»da edi, bu yerda mezbonlar minimal farqni yo‘qqa chiqarishi talab etilardi. Mezbonlar birinchi bo‘lim o‘rtalaridayoq bu vazifani uddalashdi. Mak Allister burchak zarbasini ijro etishda raqiblarni dog‘da qoldirib, to‘pni yerlatib jarima maydoni chizig‘i hududiga yetkazib berdi, u yerda ortdan kelgan Soboslaini esa hech kim kutib olmadi.
«Liverpul»ning bu mavsumdagi eng yaxshi futbolchisi bo‘lib turgan vengriyalik yarimhimoyachi jamoasi tanaffusga ikki gol farqi bilan chiqib ketishi uchun barcha ishni qildi. Ammo u ishlagan penaltini Saloh aniq ijro eta olmadi.
Misrlik hujumchi o‘z vaziyatlaridan foydalana olmagan bo‘lsa-da, ikkinchi bo‘lim boshida ikki daqiqa ichida urilgan ikki golda ham ishtirok etdi. Avvaliga tezkor qarshi hujumda u Ekitikega ideal uzatma berdi, biroz o‘tib uning zarbasidan keyin darvozabondan qaytgan to‘pni Gravenberh darvozaga kiritib yubordi va «Galatasaroy» amalda chorakfinalga chiqishdan umid uzdi. Salohning o‘zi ham yakunda o‘z nomini tabloga yozdirib qo‘ydi – Virs tovonida uzatgan pasdan keyin o‘zining eng yaxshi yillarida bo‘lgani kabi aylanma zarba yo‘lladi.
Biroz o‘tib «Enfild»da yig‘ilganlar zaxiraga olinayotgan o‘z kumirini olqishlar ostida kuzatib qo‘ydi. Bu oqshomdagi gol uning uchun YeChLdagi 50-goli edi. U shundan 47 tasini «Liverpul» safida urgan («Bazel»da 2 va «Chelsi»da 1). Saloh – bunday ko‘rsatkichga erishgan ilk afrikalik futbolchi bo‘ldi. Oldinda esa Arne Slot jamoasini chorakfinalda «PSJ»ga qarshi o‘yinlar kutmoqda. Mersisaydliklar uchun bu o‘tgan mavsumdagi mag‘lubiyat uchun revansh olish imkoniyatidir.
Inglizlarning yana bir jamoasini ispanlar chiqarib yubordi
«Tottenhem» – «Atletiko» 3:2
Gollar: Kolo Muani, 30 (1:0). Alvares, 47 (1:1). Simons, 52 (2:1). Gansko, 75 (2:2). Simons, 90+1 – penalti (3:2)
«Tottenhem Hotspur»: Vikario, Romero (Danso, 81), van de Ven, Spens, Dregushin (Udoji, 66), Grey (Gallaher, 81), Sarr, Simons, Tel (Olusesi, 81), Porro (Bergvall, 74), Kolo Muani
«Atletiko»: Musso, Gansko, Le Norman, Rudjyeri, Molina (Koke, 64), Kardozo, Liorente, Lukman (Syorlot, 64), Simeone (Ximenes, 87), Grizmann (Baena, 84), Alvares (Gonsales, 84)
Ogohlantirishlar: Porro, 57. Vikario, 58. Romero, 70. Udoji, 72 – Rudjyeri, 28. Lukman, 56. Syorlot, 90
Birinchi o‘yin: 2:5
Yaqinda «Atletiko» Ispaniya kubogi yarimfinalida «Barselona»ga qarshi birinchi uchrashuvda yirik g‘alabaga (4:0) erishgach, «Kamp Nou»dagi javob o‘yinida bu ustunlikni saqlab qolish uchun to‘liq himoyaviy o‘yin uslubini tanlagandi. Londonda esa barchasi butunlay boshqacha kechdi va dastlabki 45 daqiqalikda mehmonlar sakkizta zarba berishdi, Lukman esa darvozani ishg‘ol etishga ham muvaffaq bo‘ldi. Ammo – ofsayddan. Yana bir necha xavfli hujumlar uyushtirildi, ammo yakunda Diyego Simeone jamoasi yo‘q joydan «Tottenhem»ga o‘yinga qaytish imkonini berdi. Autdan to‘p tashlanishi, Telning jarima maydoni markaziga uzatmasi, u yerda esa yolg‘iz qoldirilgan Kolo Muani.
Mezbonlar ikkinchi golni ham urishganida ispanlar og‘ir vaziyatga tushib qolgan bo‘lardi, faqat darvozabon Musso jamoa joniga ora kirdi. Argentinalik posbon Telning burchakka yo‘naltirilgan zarbasini oyoqlari bilan to‘sib qoldi. Birinchi bo‘limdan keyin baribir intriga saqlanib qoldi va buning uchun mezbonlar Vikarioga minnatdorchilik bildirishi kerak bo‘ladi. Juliano Simeone uzoq masofadan zarba yo‘llaganida to‘p Romeroga tekkan holda o‘z trayektoriyasini o‘zgartirdi, ammo allaqachon to‘p yo‘liga yotgan italiyalik darvozabon o‘rnidan turib, xavfni bartaraf etishga ulgurdi.
Ammo ikkinchi bo‘lim boshida «Atletiko» baribir intrigani o‘ldirdi. Avvaliga Xulian Alvares Simons gol urishiga to‘sqinlik qildi (mezbonlar uning harakatini fol deb e’tiroz bildirishdi) va qarshi hujumni o‘zi gol bilan yakunlandi. U jarima maydonida Lukmandan pas qabul qilib oldi va to‘pni yuqori burchakka aniq yo‘lladi.
Hakamdan va raqiblardan ranjigan Simons bir necha daqiqa o‘tib baribir o‘z maqsadiga erishdi va jamoasini yana oldinga olib chiqdi. Bir necha daqiqa o‘tib Musso yana madridliklarni qutqarib qoldi – u Porroning shvedka uslubida olis burchakka yo‘llagan zarbasiga qo‘llarining uchi bilan yetib bordi. «Matraschilar» muxlislari Alvaresning burchakdan oshirgan to‘pi Hansko tomonidan darvozaga kiritilganidan keyingina yengil tin olishdi. O‘yin oxirida Simons o‘zi ishlagan penaltini aniq ijro etishi esa umumiy natijani o‘zgartirmadi.
Madriddagi birinchi o‘yinda londonliklar bosh murabbiyi Igor Tyudor darvozabon bo‘yicha muvaffaqiyatsiz tajriba o‘tkazmaganida «Tottenhem» «Atletiko» bilan tengma-teng kurashishi mumkin edi, ammo murabbiyning o‘sha qarori birinchi o‘yinda «shporlar»ning imkoniyatlarini keskin pasaytirib yuborgandi. Natijada ikki o‘yinda xuddi «Chelsi» kabi sakkiz gol o‘tkazib yuborgan «Tottenhem» turnirni tark etdi, «Atletiko» esa «Barselona» bilan o‘yinlarga tayyorgarlikni boshlaydi.
«Atalanta» tarixga kirdi
«Bavariya» – «Atalanta» 4:1
Gollar: Keyn, 25 – penalti (1:0). Keyn, 54 (2:0). Karl, 56 (3:0). Dias, 70 (4:0). Samarjich, 85 (4:1)
«Bavariya»: Urbig, Kim Min Je, Ta, Bishof (Pavich, 72), Stanishich (Gnabri, 72), Goretska, Pavlovich (Ofli, 55), Rafael Gerreyru (Ito, 83), Dias, Karl, Keyn (Jyekson, 72)
«Atalanta»: Sportello, Hin, Skalvini (Axanor, 83), Kossunu, Pashalich, Ederson (Samarjich, 57), Bernaskoni, Bellanova, Sulemana (Raspadori, 71), De Ketelare (de Ron, 57), Skamakka (Krstovich, 71)
Birinchi o‘yin: 6:1
Bergamodagi tennischa hisobdan (6:1) keyin ham «Bavariya» muxlislarida darvozabon pozitsiyasi tufayli xavotir saqlanib qolgandi. Zayavkadagi to‘rt darvozabon – Noyyer, Ulrayh, Klanats va Urbig – barchasi jarohat tufayli safdan chiqqandi. Faqat ularning to‘rtinchisi so‘nggi kunlarda safga qaytdi va Vensan Kompani darvozaga o‘smirlardan birini qo‘yishiga to‘g‘ri kelmadi.
Umuman olganda, xavotirlar o‘rinsiz edi. Baribir darvozabonga amalda ish topilmadi. Bergamoliklar ham bu o‘yinda darvozabonni almashtirgandi va bu mavsumda deyarli o‘ynamagan 33 yoshli Sportello Keyn ijrosidagi penaltini qaytardi. Ammo u darvoza chizig‘idan ertaroq oldinga chiqib ketgani ma’lum bo‘ldi, Harri esa takroriy zarbada adashmadi.
Ikkinchi bo‘limda esa myunxenliklarni to‘xtatib bo‘lmadi. Avvaliga Keyn o‘yindan ham gol urdi, keyin esa Dias va Karl tandemi bittadan gol urdi (ular bir-biriga golli uzatma berishdi). Bergamoliklar esa bu o‘yinda ham bitta javob goli urishga erishdi, ammo Italiyaning yevrokuboklar pley-off bosqichida ikki o‘yinda 10 gol o‘tkazgan ilk jamoasi sifatida tarixga kirdi. «Bavariya»ni esa navbatdagi bosqichda «Real»ga qarshi janglar kutmoqda.
YeChLda 8 jamoa qoldi
Chempionlar ligasi 1/8 final natijalari
«Real» – «Manchester Siti» – 5:1 (birinchi o‘yin – 3:0, javob o‘yini – 2:1).
«PSJ» – «Chelsi» – 8:2 (5:2, 3:0).
«Sporting» – «Budyo-Glimt» – 5:3 (0:3, 5:0).
«Arsenal» – «Bayyer» – 3:1 (1:1, 2:0).
«Atletiko» – «Tottenhem» – 7:5 (5:2, 2:3).
«Barselona» – «Nyukasl» – 8:3 (1:1, 7:2).
«Liverpul» – «Galatasaroy» – 4:1 (0:1, 4:0).
«Bavariya» – «Atalanta» – 10:2 (6:1, 4:1).
Pley-offning to‘liq setkasi oldindan ma’lum edi, bundan keyin boshqa qur’a tashlanmaydi. Chorakfinalga chiqqan jamoalar o‘zlarining navbatdagi raqiblarini allaqachon bilishadi.
1/4 final juftliklari
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
Birinchi bo‘lib ko‘rsatilgan jamoalar birinchi o‘yinni o‘z uyida o‘tkazadi.
1/4 final o‘yinlari taqvimi
Keyingi bosqich deyarli uch haftadan keyin, mart oyidagi FIFA kunlari ortidan boshlanadi. Chorakfinaldagi uy va safar uchrashuvlari orasi bir haftani tashkil etadi.
Mart oyi oxirida Yevropa yozgi vaqtga o‘tadi, shuning uchun Chempionlar ligasi yana Toshkent vaqti bilan soat 23:59 dan boshlanadi.
7–8 aprel. Birinchi o‘yinlar
«Real» – «Bavariya»
«PSJ» – «Liverpul»
«Sporting» – «Arsenal»
«Barselona» – «Atletiko»
14–15 aprel. Javob o‘yinlari
«Bavariya» – «Real»
«Liverpul» – «PSJ»
«Arsenal» – «Sporting»
«Atletiko» – «Barselona»
Birinchi va ikkinchi juftliklar g‘oliblari hamda uchinchi va to‘rtinchi juftliklar g‘oliblari yarimfinalda o‘zaro to‘qnashadi.
Yarimfinal bahslari 28-29 aprel va 5-6 may kunlariga belgilangan.
Final 30 may kuni Budapeshtda bo‘lib o‘tadi.
Stadion suriluvchi tom va maydonga ega bo‘ladi. Uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. 45000 tomoshabinga mo‘ljallangan arena “Al Hilol” va “Al Nassr” klublari uchun uy maydoni bo‘lishi kutilmoqda.
Saudiya Arabistonida qurilayotgan shahzoda Muhammad bin Salmon nomidagi ko‘p funksiyali stadionning yangi suratlari e’lon qilindi. U 2034 yilgi futbol bo‘yicha jahon chempionatini o‘tkazish uchun ehtimoliy arenalardan biri sifatida ko‘rilmoqda.
Qurilish ishlari Ar-Riyod shahri g‘arbidagi Qiddiya ko‘ngilochar hududida olib borilmoqda.
Foto: SaudiProject
Stadion suriluvchi tom va maydonga ega bo‘ladi, uning bir tomoni ulkan suriluvchi LED devordan iborat bo‘lib, devorda jonli translatsiyalar, filmlar va lazer shou namoyish etiladi. Devor ochilganida, maydon atrofidagi tribunalar va Tuvayk qoyasi manzarasi namoyon bo‘ladi. Bu dunyodagi birinchi to‘liq integratsiyalashgan majmua bo‘lib, stadionni bir necha soat ichida turli tadbirlar uchun moslashtirish imkonini beradi.
Geometrik shakldagi binolarning tashqi qismi raqamli ekranlar bilan qoplanadi va ular qoyadan o‘sib chiqqandek ko‘rinadi.
Foto: SaudiProject
Stadion atrofida sport va ko‘ngilochar hududlarga ega bo‘lgan baland binolar quriladi. Ular ichki ko‘chalar orqali bog‘lanadi va bu ko‘chalar ham LED ekranlar bilan qoplanadi. Ushbu yo‘laklar tashrif buyuruvchilarni qoya chetidagi kuzatuv maydonchalariga olib boradi.
Loyihasi Populous arxitektura byurosi tomonidan ishlab chiqilgan ushbu arena 45000 tomoshabinga mo‘ljallangan.
Foto: SaudiProject
Stadion Saudiya Arabistoni professional ligasining “Al Hilol” va “Al Nassr” klublari uchun uy maydoni bo‘ladi. Shu bilan birga, bu yerda boks, kibersport, konsertlar va teatr tomoshalari kabi turli sport va madaniy tadbirlar ham o‘tkaziladi.
O‘zbekistonlik futbolchi Abduqodir Husanov The Atlantic nashrining dunyoning eng kam qadrlangan futbolchilari ro‘yxatiga kiritildi.
Mualliflar o‘zbek himoyachisi bu mavsumda yanada yaxshilanganini ta’kidladilar.
Angliyaning «Manchester Siti» klubining o‘zbek himoyachisi Abduqodir Xusanov The Atlantic nashrining dunyoning eng kam baholangan futbolchilari ro‘yxatiga kiritildi. Husanov bu mavsumda yanada yaxshilangani ta’kidlanmoqda.
Uning tezligi, o‘yinni himoyada o‘qish va to‘pni agressiv ravishda ta’qib qilish qobiliyati ham ta’sirchan. U ba’zan biroz haddan tashqari tajovuzkor bo‘lishi mumkin, ammo bular bartaraf etish mumkin bo‘lgan qo‘polliklar sanaladi. U shuningdek, to‘p bilan yaxshi harakat qiladi. Maqolada Xusanov chindan ham juda istiqbolli o‘yinchi ekanligi aytiladi.
Ro‘yxatga shuningdek, Federiko Valverde (Real Madrid), Harri Maguayr (Manchester Yunayted), Bernardo Silva (Manchester Siti) va boshqa o‘yinchilar ham kiritilgan.
Soʻnggi savdo maʼlumotlariga koʻra, Oʻzbekiston temir yoʻllari importi eksportdan 2,5 barobar koʻp
Qozog‘istonda 5 nafar o‘zbekistonlikning ish haqi va pasportlari qaytarildi
Janubiy Koreyada O‘zbekiston fuqarosi vafot etdi
-
Turk dunyosi3 days agoTurkiyaning Baykal K2 bir tomonlama hujumga uchragan uchuvchisiz samolyotining toʻda harakatini sinovdan oʻtkazdi
-
Jamiyat14 hours ago
Tadbirkor boshpanasiz bo‘lgan 5 ta oilani uy-joy bilan ta’minladi
-
Iqtisodiyot3 days ago«Yomg‘ir va qorda ham foydalanishga tayyor bo‘ladi» – Toshkent-Andijon pulli yo‘li haqida nimalar ma’lum?
-
Iqtisodiyot15 hours agopayme Tez QR orqali to‘lovni 3% keshbek bilan ishga tushirmoqda
-
Dunyodan14 hours ago
Eron Hormuz boʻgʻozi orqali cheklangan oʻtishga ruxsat beradi
-
Sport5 days agoFutbol bo‘yicha O‘zbekiston ayollar terma jamoasi Osiyo kubogi chorak finalida yirik hisobda mag‘lub bo‘ldi
-
Dunyodan4 days ago
Iroq g‘arbida AQShning yonilg‘i quyuvchi samolyoti urib tushirildi
-
Jamiyat5 days agoorzularni umringiz evaziga sotib olasiz / 5 daqiqa