Yig‘ilishda Olmazor tumanining ta’lim va ilmiy salohiyatidan samarali foydalanish, talabalar uchun xavfsiz va zamonaviy muhit yaratish masalalariga alohida to‘xtalib o‘tildi.

Bu yerda bir vaqtning o‘zida 75 ming nafar talaba tahsil oladi. Shu bois, ularning o‘qishi va yashash sharoiti, bandligi, tadbirkorligi, madaniy hayoti va xavfsizligini qamrab oladigan yaxlit boshqaruv tizimini yo‘lga qo‘yish zarurligi ta’kidlandi.

“Yoshlik” shaharchasi hokimligi tizimida talabalarning ta’lim-tarbiyasi, bandligi, ijtimoiy ta’minoti va xotin-qizlar masalalari bilan ishlaydigan alohida mas’ullar faoliyati tashkil etiladi.

Tumanda 7 ta oliygohga qarashli 41 ta talabalar yotoqxonasida qariyb 18 ming nafar yosh istiqomat qiladi. Ularning yashash sharoitini yaxshilash, yotoqxonalar atrofini obod saqlash, yashil hududlar va “buk-kafe”larni ko‘paytirish, madaniy tadbirlarni muntazam tashkil etish uchun alohida Direksiya tuziladi.

Talabalar shaharchasida tashkil etilgan Vaziyatlar markazi orqali oliygoh va yotoqxonalarga kirib-chiqish hamda davomatni onlayn nazorat qilish amaliyoti yaxshi natija berayotgani qayd etildi.

Mazkur tizimni yil yakunigacha Toshkent shahrining boshqa tumanlariga, kelgusi yili esa mamlakatdagi barcha oliy ta’lim muassasalariga joriy etish vazifasi qo‘yildi.

Yig‘ilishda maktabgacha ta’lim qamrovini oshirish masalasi ham ko‘rib chiqildi.

Hozir Olmazor tumanida bolalarni maktabgacha ta’lim bilan qamrab olish darajasi 67 foizni tashkil etmoqda. Aholisi zich hududlarda mavjud bog‘chalar quvvatini kengaytirish orqali bu ko‘rsatkichni sezilarli oshirish mumkinligi ta’kidlandi.

441-sonli bog‘cha hududida mavjud 385 o‘ringa qo‘shimcha 450 o‘rinli yangi bino qurilishi natijasida mahallaning ehtiyoji to‘liq qoplangan. Ushbu tajriba asosida yil yakuniga qadar Olmazorda kamida yana 5 ta shunday loyihani boshlash belgilandi.

Poytaxtning boshqa tumanlarida ham aholisi zich mahallalar aniqlanib, bog‘cha infratuzilmasini kengaytirish bo‘yicha loyihalar tayyorlanadi.

Shu bilan birga, Toshkentda transport tirbandligi tobora dolzarb bo‘lib borayotgani qayd etildi. Bugun poytaxt ko‘chalarida kuniga 1,5 millionta transport vositasi harakatlanmoqda.

Tirbandlikni faqat yo‘llarni kengaytirish, ko‘prik va tunnellar qurish bilan hal etib bo‘lmasligi ta’kidlanib, piyodalar va avtomobillar harakatini xavfsiz va samarali boshqarish uchun intellektual transport tizimlarini joriy etish bo‘yicha ishlarni yil yakuniga qadar boshlash vazifasi qo‘yildi.

Source link

Chiqindilarni boshqarish agentligi Chiqindi poligonlarini boshqarish direksiyasi tomonidan chiqindilarni saralash xizmatini tashkil etish uchun 77 ta qattiq maishiy chiqindi poligoni davlat xaridlarining elektron platformasiga tanlov joylashtirilganini ma’lum qiladi.

​Hududlar kesimida lotlar quyidagicha taqsimlangan:

Buxoro viloyati – 8 ta;

Jizzax viloyati – 11 ta;

Qashqadaryo viloyati – 4 ta;

Qoraqalpog‘iston Respublikasi – 2 ta;

Navoiy viloyati – 7 ta;

Namangan viloyati – 6 ta;

Samarqand viloyati – 2 ta;

Surxondaryo viloyati – 6 ta;

Sirdaryo viloyati – 2 ta;

Farg‘ona viloyati – 6 ta;

Xorazm viloyati – 9 ta;

Andijon viloyati – 8 ta;

Toshkent viloyati – 6 ta.

​Mazkur tanlovlar orqali chiqindilarni saralash xizmatini yo‘lga qo‘yish, ikkilamchi xomashyodan samarali foydalanish va qayta ishlashga yo‘naltiriladigan chiqindilar hajmini oshirish ko‘zda tutilgan.

​Ma’lumot uchun: Davlatimiz rahbarining 2024-yil 4-yanvardagi 5-son hamda 2025-yil 24-martdagi 56-son farmonlarida chiqindilarni saralash va qayta ishlash jarayonlariga xorijiy hamda mahalliy investorlarni jalb etish, shuningdek, chiqindilarni saralash faoliyatini amalga oshiruvchi investorlarni belgilangan tartibda tanlab olish vazifalari belgilangan.

​Unga muvofiq agentlik huzuridagi Chiqindi poligonlarini boshqarish direksiyasi davlat muassasasining tegishli buyrug‘i bilan hududiy boshqarmalarga chiqindi poligonlarida chiqindilarni saralash ishlarini tashkil etish bo‘yicha chora-tadbirlar tasdiqlangan bo‘lib, jadal amalga oshirilmoqda.

​Ta’kidlash joizki, ayni chora-tadbirlar mamlakatimizda poligonlarda saralash tizimining joriy etilishi chiqindilarni boshqarish samaradorligini oshirish, tabiiy resurslardan oqilona foydalanish hamda atrof-muhitga salbiy ta’sirni kamaytirishga xizmat qiladi.

Source link

Majburiy ijro byurosining Buxoro viloyati boshqarmasi axborot xizmatining «Xabar.uz»ga ma’lum qilishicha, Buxoro shahrida oilaviy kelishmovchiliklar sababli turmush o‘rtog‘i R.Y.ning qarshiligiga uchragan J.X. ikki yashar qizchasini o‘zi bilan olib keta olmagan. So‘ngra u da’vo arizasi bilan murojaat qilgan.

Boshqarma axborot xizmati rahbari Ixtiyor Olimovga ko‘ra, joriy yilning o‘tgan davri mobaynida Byuro ish yurituvida bo‘lgan bolani olib berish yoki bola bilan uchrashtirishga oid 666 ta ijro hujjati bo‘yicha ijro harakatlari amalga oshirilgan. Ularning 250 tasi tamomlangan, 189 tasi amalda ijro etilgan.

Ma’lum bo‘lishicha, Buxoro shahrida yashovchi fuqaro J.X. oilaviy kelishmovchilik sababli turmush o‘rtog‘i R.Y.ning xonadonini tark etgan. Biroq, ayol har qancha urinishlariga qaramay, erining qattiq qarshiligiga uchrab, 2 yashar qiz farzandini o‘zi bilan birga olib keta olmagan. Shundan so‘ng ayol farzandini o‘z tarbiyasiga olish maqsadida fuqarolik ishlari bo‘yicha Buxoro tumanlararo sudiga murojaat qilgan. 

Sud ish holatlarini o‘rganib, da’voni qanoatlantirgan va 2 yashar qizaloqni onasi J.X. tarbiyaisga olib berish bo‘yicha ijroni ta’minlash choralarini ko‘rish haqida ajrim chiqargan. Mazkur ijro hujjati Byuroning Buxoro shahar bo‘limi ish yurituviga kelib tushgach, zudlik bilan ijro harakatlari boshlangan.

Qarzdor ota sud hujjatlari bilan tanishtirilib, uni ixtiyoriy ravishda bajarishi zarurligi haqida ogohlantirilgan. Biroq, u sud hujjati talabini bajarishdan bosh tortib, farzandini bermasligini ma’lum qilgan.

Ijro harakatlari davomida qizaloq Buxoro shahridagi xususiy maktabgacha ta’lim muassasalaridan birida tarbiyalanayotgani aniqlangan. Muassasa mas’ullari va taraflar ishtirokida belgilangan tartibda ijro harakatlari amalga oshirilib, 2 yashar qizaloq sog‘-salomat holda onasi tarbiyasiga olib berilgan.

Mazkur holat yuzasidan ijro hujjatlarini bajarishda, avvalo, bolaning huquq va qonuniy manfaatlarini ta’minlashga alohida e’tibor qaratilmoqda.

Source link

Xusiylar harakati vakili Yahyo Sariyaning so‘zlariga ko‘ra, «Ansar Alloh» jangarilari Yamanning Taiz va Al-Hodayda viloyatlaridagi umumiy maydoni 5 400 kvadrat kilometr bo‘lgan oltita tumanni nazoratga oldi.

​«Ko‘p tomonlama harbiy operatsiya Saudiya Arabistoni qo‘shinlarini g‘anbiy qirg‘oqbo‘yi mintaqalaridan quvib chiqarish maqsadida olib borilmoqda», — dedi Yahyo Sariya Al-Marisax telekanalida.

​Yamanning g‘arbiy qirg‘og‘i Bab al-Mandab bo‘g‘oziga chiqish imkoniyati tufayli strategik ahamiyatga ega.

U Qizil dengizni Adan ko‘rfazi bilan bog‘laydi va Suvaysh kanalining janubiy darvozasi bo‘lib xizmat qiladi. Bu Osiyodan Yevropaga tovarlarni tashish uchun eng qisqa dengiz yo‘li.

Source link

«Lotin yozuviga asoslangan o‘zbek alifbosini joriy etish to‘g‘risida»gi qonunga o‘zgartirish kiritish haqidagi qonun kuchga kirgach, ommaviy axborot vositalari yangilangan alifboda ish yuritishi majburiy qilinadi. Bu haqda Senatning 19-yalpi majlisida Vazirlar Mahkamasi Davlat tilini rivojlantirish departamenti rahbari Nodirjon Xolbo‘tayev ma’lum qildi.

Uning aytishicha, yangilangan alifbo rasmiy ish yuritish va davlat idoralarida ham yagona standart sifatida qo‘llanadi.

«Qonun kuchga kirgandan keyin barcha ommaviy axborot vositalari tasdiqlangan, takomillashtirilgan alifboda ish yuritishini qat’iy qilib qo‘yishni rejalashtiryapmiz», – dedi Xolbo‘tayev.

Shu bilan birga, fuqarolar shaxsiy yozishmalarda o‘zlari o‘rgangan alifbodan foydalanishda davom etishi mumkin. Majburiy talab asosan rasmiy ish yuritish va rasmiy OAVga taalluqli bo‘ladi.

Xolbo‘tayevning ta’kidlashicha, yangi alifboga o‘tish uchun texnologik sharoitlar ham yaratiladi. Jumladan, klaviaturalarga yangi harflarni joylashtirish, matnlarni amaldagi kirill va lotin yozuvidan yangilangan alifboga avtomatik o‘giruvchi dasturlarni keng joriy etish rejalashtirilgan.

Uning ma’lum qilishicha, alifboni takomillashtirish bo‘yicha so‘nggi 10 yilda 10 dan ortiq konferensiya va muhokamalar o‘tkazilgan, hozir qabul qilinayotgan variant esa beshinchi loyiha hisoblanadi.

Yangi variantni tayyorlashda raqamli texnologiyalarga moslik, qardosh xalqlar va Yevropa davlatlari alifbolari tajribasi inobatga olingan. Xolbo‘tayevga ko‘ra, yangilangan harflar jadidlar 100 yil avval qo‘llagan alifbo va 1993-yilda qabul qilingan lotin alifbosidagi shakllarga yaqin. 

Source link