Tezkor tadbirlar davomida ikki nafar fuqaroda giyohvand modda qadoqlangan 43 dona, yana bir fuqaroda 15 dona paketcha borligi aniqlandi.

Toshkent shahrida o‘tkazilgan tezkor-profilaktik tadbirlar doirasida giyohvand moddalarni yashirin joylarga qoldirib ketuvchi («zakladchik») shaxslar faoliyatiga chek qo‘yildi.

Poytaxt IIBB xabariga ko‘ra, Bektemir tumanining Iyk-ota mahallasi hududida xizmat olib borayotgan patrul-post xizmati xodimlari ikki nafar fuqaroning xatti-harakatlaridan shubhalanib, ularni tekshirishgan.

Xolislar ishtirokida o‘tkazilgan shaxsiy ko‘rik davomida ularning yonidan giyohvand modda qadoqlangan sotuvga tayyor 43 dona paketcha chiqdi.

Maxsus tadbirlar davomida tuman IIB tezkor xodimlari yana bir shaxsni qo‘lga oldi. Uning yonida giyohvand modda qadoqlangan 15 dona paketcha borligi aniqlanib, ashyoviy dalil sifatida musodara qilindi.

Mazkur holatlar yuzasidan jinoyat ishi qo‘zg‘atildi. Gumonlanuvchilarga nisbatan qamoqqa olish ehtiyot chorasi qo‘llanildi.

Source link

Fotima Nazarova, Shahzoda Albayeva va Komila Murodovani nafaqat vaynlar, balki og‘ir hayot sinovlari ham birlashtirgan. Biri sahnada tan olinmagan, biri to‘rt nafar farzandini katta qilish uchun kurashgan, yana biri bolalikdagi bullinglar sabab aktrisalik orzusiga yetishishni maqsad qilgan. Ular qiyinchiliklarni yumorga aylantirib, ijtimoiy tarmoqlarda o‘z auditoriyasini topdi. Ammo daromadga muhtoj bo‘lsa ham, dori, klinika va ishonchsiz qurilishlar reklamasidan voz kechishini aytmoqda.

Kun.uz xalq orasida o‘z auditoriyasiga ega bo‘layotgan uchlik Sohiba qalpoq, Komilalolo va Shahzoda Zarifjonovna taxallusi bilan faoliyat yuritayotgan vaynerlar bilan suhbatlashdi.

“Uch qismat – bir dard!”

Dard! Ko‘zyoshlar va yashab qolish uchun kurash! Ba’zan hayot sinovlari kimningdir qaddini egib qo‘ysa, ba’zilar esa qayta oyoqqa turish uchun tinimsiz mehnat qiladi. Bizning oramizda shunday insonlar borki, ularning yo‘llarini dard birlashtirgan. Har qanday qayg‘uni kulgi bilan yenga olgan. Tanlagan kasbida ishlash uchun judayam ko‘p eshiklar oldida sarg‘aygan bo‘lsa-da, ammo sahna ularni tanlamadi. Ijtimoiy tarmoqlarning rivojlanishi ularning iste’dodlarini yuzaga chiqarish uchun maydon bo‘la oldi. Hatto ular bilan gaplashishni istamagan, qadrini yerga urganlar bugun ich-ichidan ularning qayta oyoqqa turganiga jimgina tan berishgani haqiqat!

Bugungi suhbatdoshlarimiz shak-shubhasiz yuqoridagi e’tiroflarga loyiqdir. Vaynerlar Fotima Nazarova, Shahzoda Albayeva, Komila Murodova. Bu uchlik birlashishdagi oliy maqsadlari yashab qolish uchun kurash ekanligini berkitishmadi. Oddiy sodda o‘zbegim ayollari. Gardanidagi mas’uliyat o‘laroq dardni yumorga almashtira olgan bu opa-singillarimiz, pulsiz qolsak-da “biz 3 turdagi reklamalarni ommaga olib chiqmaymiz” – deyishmoqda. Prinsipli ular.

Tan olish kerak bugungi kunda vaynlarga ko‘pchilikning munosabati yaxshi emas. Qabul qilisholmaydi. Bir zamonlar odamlar mahallada, choyxonada, to‘y-tomoshalarda yig‘ilib qolganda aytiladigan maishiy muammolar, bugun zamon zayli bilan internetga ko‘chdi. Kimdir bachkanalik qilsa, yana kimdir ba’zi muammolarni kulgiga aylantirib tarmoqqa joylamoqda. Aslida internet janrlaridan biriga aylangan vaynlar dastlab Fransiyada 1895 yildan, bundan 131 yil oldin ilk marta bor-yo‘g‘i 45 soniyalik “L’Arroseur arrosé” (“Suv sepuvchi”) nomli komedik film ko‘rinishida tasvirga olingan. Voqeasi quyidagicha. Bog‘bon suv sepmoqda bir bola kelib, bog‘bonning shlangini bosib turib, suv kelishini to‘xtatmoqda. Bir qarashda u qadar kulgili emasdek. Ammo o‘sha davr uchun bu ham yangilik o‘laroq, san’atda yangi janr paydo qilgan. Tomoshabinlar esa buni kulgili deb hisoblagan va zavqlanishgan. Davomiyligi nuqtai nazaridan hozirgi vaynlarga o‘xshashroq, sezgandirsi?.. Ya’ni kino tarixidagi ilk komediyalardan biri hozirgi vayn bilan deyarli teng bo‘lgan.

Biz vaynlar yaxshi yoki yomon degan fikrni muhokama qilishdan yiroqmiz. Tomoshabinning o‘z munosabati bor va vayn tomosha qilib katta bo‘layotgan avlod shakllandi. Nima bo‘lsa-da hayotimizning bir bo‘lagidir vaynlar. E’tiboringizni tan olinmagan iqtidorlilar vaynlar orqali iste’dodini namoyon etib, oiladagi mas’uliyatini ado etayotgan uchlik Fotima Nazarova, Shahzoda Albayeva, Komila Murodovaga qaratmoqchimiz.

Fotima Nazarova asli hozirgi O‘zbekiston davlat san’at va madaniyat instituti, Musiqali drama yo‘nalishida tahsil olgan. Shahzoda Albayevaning asl kasbi iqtisodchi. Komila Murodova esa hamshira bo‘lib ishlagan. Jamoa tasvirchisi va montaj ustasi Fotima opaning 17 yoshli o‘g‘li Mahmud. Ssenariy muallifi va ma’mur Shahzoda. U “Fotima opaning tajribasiga suyanaman” – demoqda. San’at sohasida ta’lim olmagan Shahzoda va Komilada aktrisa bo‘lib mashhurlikka erishish istagi bolaligidanoq paydo bo‘lgan ekan. Jamoani jam qilgan sardor bu Fotima opa Nazarova.

“Bobur Mansurovga borib yurganimda, birinchi Shahzodani ko‘rganman. Mana shu qiz zo‘r dedim ularga aytdim-da. “Yomon” tipaj dedim. Shunaqa qilib, keyin Komila biz bilan ishlaysanmi desam, Rahmiddin bilan ishlardi. Ha, dedi. Shu bilan Boburlar, mayli, sizga bo‘lsa mayli opa dedi. Keyin Shahzodani ham Bobur Mansurovda ko‘rdim. Voy, opa, sizning muxlisingizman dedi keyin. Voy, aylanay dedim-da, keyin, Shahzoda, ssenariy yozasan-ku, bizga o‘t deb, shunaqa qilib birlashib ketdik.” – deb xotiralarni esladi Fotima Nazarova.

“Biz dori reklama qilmaymiz”

Jamoadan reklamalarni saralash masalasida o‘z munosabatlarini so‘radik. Shu narsa ma’lum bo‘ldiki, ular 3 turdagi reklamalarni ommaga e’lon qilishmas ekan.

“Biz dorini hech qachon reklama qilmaymiz. Umuman olmaymiz dori reklamasini. Keyin klinikalarni reklama qilmaymiz. Sababchi bo‘lib qolishdan qo‘rqamiz. Chunki hammani organizmi har xil. Eng oxirgisi qurilishlarni o‘ylab qilamiz, qilsak agar. Qarg‘ishga qolmaylik deb qurilishni ham o‘ylab ko‘ramiz.”

“Rizqimiz albatta keladi”…

Hech o‘ylab ko‘rganmisizlar, YouTube, Instagram platformasi bor hozir. Agar shu platformalarga cheklovlar bo‘lib qolsa yoki to‘xtatilsa yoki yo‘qolib qolsa-da. Nima bo‘ladi keyin? Shu haqida o‘ylaganmisizlar deb so‘radik ulardan.

“O‘ylaganman”, – deydi Shahzoda. “Aytaman-ku, birxillikdan zerikaman deb. Bu yo‘nalishdan ham zerikib qolmayman deb javob bera olmayman o‘zimga. Izlaganga yo‘l ko‘p. Xavotir olmaymiz. Rizq berguvchi Alloh. Bizning shiorimiz shu. Rizq Allohdan. Biz bu yo‘nalishda bo‘lamizmi, boshqa yo‘nalishda bo‘lamizmi, mana shu nonimiz keladi baribir. Qo‘rquv yo‘q. Yo‘q, yo‘q, umuman qo‘rqmaslik kerak”.

“Vaynlar vaqtinchalik!”

Fotima opa Siz nima deb o‘ylaysiz, vaynlarning umri qancha, qancha vaqtdan keyin vaynlarni xalq qabul qilmay qo‘yadi, sizningcha?

“Menimcha, tegirmon navbati bilan deydi-ku. Bir mahallar kino zo‘r edi. Undan keyin seriallar zo‘r bo‘ldi. Serialdan keyin sekin-sekin komediya rivojlandi. Mana eng qisqasi vaynlar, endi odamlarning boshqasiga sabri qolmadi. Hozircha o‘sha Instagram. Bu ham bir kun yo‘q bo‘ladi. Hamma narsa aylanib kelaveradi. Endi qachon yo‘q bo‘ladi, uni Alloh biladi. O‘sha qo‘rqmaslik kerak. Allohning aytganini qilish kerak. Rizqni beraveradi. Vayndan keyin. O‘zi shunaqa chevar, shunaqa yo‘lini qilib qo‘yadi. Men oldin qo‘rqardim. Rostdan ham Allohni tanimasdan oldin men qo‘rqardim. Ertaga nima bo‘ladi, nima qilaman, och qolsak-chi, unaqa qilsak-chi, qayg‘uga botar edim. Hozir bitta ham qayg‘urmayman. Chunki Allohim bor. Mehribon.”

“To‘rtta chaqaloq. To‘rt quti bo‘tqa”

Fotima Nazarovaning fikrlariga Shahzoda Albayeva qo‘shimcha qildi.

“Bizni hayot shunaqa tarbiyalab qo‘ydi-da. Biz och qolishdan yoki rizqimiz kelmay qolishidan qo‘rqmaydigan bo‘lib qoldik. Qo‘rqmayman. Qiyinchiliklar shunaqa qilib qo‘ydi desak ham bo‘ladi. Vaqtida, aytaman, to‘rtta chaqaloq. To‘rt o‘ram taglik, to‘rt quti bo‘tqa deganida bu arzon narsa emas. Buni boshga tushganlar biladi. Bitta bo‘tqa va taglik olsak, ikki kunga yetadi. Mana bugun olsam, bugun xursand bo‘laman, ertaga yediraman, indiniga yana o‘ylanishim kerak. U bo‘tqa qurg‘ur ham arzon narsa emas. O‘sha paytlar Fotima opa aytmoqchi, ertaga nima qilaman degan qo‘rquv bor edi. Keyin o‘zimni o‘zim kasal qilaman qarasam. O‘sha qo‘rquvni qo‘yib yuborganimdan keyin hayotim shunaqa yaxshilanib ketdi, ishoning. Insonlar o‘sha qo‘rquvni qo‘yib yuborish kerak o‘zidan.”

“5000 dollar yig‘ildi”

Fotima Nazarova uzoq yillar davomida o‘z uyi bo‘lishini orzu qilib yashagan. Xalqning yordami bilan bugun vatanli bo‘ldim demoqda suhbatdoshimiz.

“Allohga shukur, 30 yil deganda mana shu uyni qurib oldim. Hali kamchiliklari rosa ko‘p. Men bo‘lmasa, karta qo‘yinglar, menga yordam beringlar deganim yo‘q xalqqa. Shunchaki hayotimni gapirib berdim, xolos. Rahmi kelib, shunaqa yaxshi insonlar bor ekan. Keyin 5000 dollar yig‘ildi. Shu sabab bo‘ldi. 5000 dollarga betonini quydim. Keyin bu yog‘i yana xayr-ehson, reklamalar, barterlar, xullas uy bitdi. Men haqimda, mening oilam, bolalarim haqida yaxshi duoda bo‘lganlardan ilohim, Alloh rozi bo‘lsin, ikki dunyo saodatini bersin.”

“Bir tiyinga olishmagan”

“Xalqqa tanilmasimdan oldin, lekin rosa yerga urishgan, uni bilaman. Endi uni aytib o‘tirishim shart emas. Muqimiy teatrida ishlaganman. Ko‘p joylarda bo‘lganman. Bir tiyinga olishmagan. Ana endi hozir yuzaga chiqqandan keyin olishyapti, mayli. Shunaqa. Lekin o‘sha hech kim bo‘lmagan paytimda ham Foti-Foti, Fotima deb qo‘llaganlar bor, san’atkorlar ichida.” – deya qadrsizlantirganlardan ranjiganini berkitmadi qahramonimiz.

“Kontent fikrlarni o‘zgartirishi mumkin”

Oila va turmushdagi ba’zi muammolar sabab, 4 nafar egizak farzandlarni katta qilish uchun yanada kurashishga bel bog‘lagan Shahzoda Albayevaning Instagram sahifasidagi kontentlar asosan xotin-qizlarga motivatsiya berishga qaratilgan. Shahzodaning kuzatuvchilari asosan 20-35 yosh oralig‘idagi ekan. Va biz suhbatdoshimizga sahifangizga joylayotgan kontentlarni saralaysizmi, hech o‘ylaganmisiz, kimgadir ta’sir qilib qo‘ymadimmi, misol uchun kimningdir hayotini o‘zgartirib yubormayapmanmi deb xavotir bo‘ladimi deb savol berdik.

“O‘ylaganman, chunki juda ko‘p odamni boshqa taraflama, yomon tarafga ham burib yuborishi mumkin kontentimiz. Fikrini o‘zgartirishi mumkin-da. O‘shanda kommentariyaga yozadi, shaxsiy direktimga yozishadi, ayol-qizlar juda ko‘p muammolari bilan. Aytaman, har kimning hayotidagi vaziyat har xil. Holatlar o‘xshash bo‘lishi mumkin, lekin vaziyat boshqacha. Agar oilani ushlab qoladigan vaziyat bo‘lsa, u vaziyatda imkon boricha ushlab qolish kerak deyman.”

To‘liq intervyuni quyidagi havola orqali tomosha qiling.

Source link

2025 yilda bunday imkoniyatdan 678 nafar abituriyent foydalangan.

2026/2027-o‘quv yili uchun jami 677 907 nafar abituriyent onlayn ro‘yxatdan o‘tdi, deb xabar berdi Bilim va malakalarni baholash agentligi. Shundan 451 744 nafarini (66,6 %) joriy yil bitiruvchilari, 226 163 nafari (33,4 foiz)ni ta’lim muassasalarini avvalgi yillarda tamomlagan fuqarolar tashkil etgan.

Abituriyentlarning 365 196 nafari (53,9 foiz)ni ayollar, 312 711 nafari (46,1 foiz)ni esa erkaklar tashkil etadi. Qayd etilishicha, test sinovlarida 664 609 nafar abituriyent ishtirok etadi.

Ro‘yxatdan o‘tishda abituriyentlar tomonidan yuklangan xalqaro sertifikatlar tekshirilib, ularning 24 526 tasi tasdiqlangan. Umumta’lim fanlari bo‘yicha 193 186 nafar, chet tillari bo‘yicha esa 125 354 nafar milliy yoki xalqaro sertifikatga ega abituriyent ro‘yxatdan o‘tgan.

Joriy yilda barcha fanlardan milliy yoki xalqaro sertifikatga ega bo‘lgan 12 997 nafar abituriyent test sinovlaridan ozod qilinib, bevosita tanlov bosqichiga o‘tkazilgan. 2025 yilda bunday imkoniyatdan 678 nafar abituriyent foydalangan edi.

Test sinovlari 10 kun davomida o‘tkaziladi.

Source link

Sertifikatdan faqat bir marta foydalaniladi va uning amal qilish muddati bir yilni tashkil qiladi.

Hukumat qarori bilan “Giyohvandlik vositalari va psixotrop moddalarni olib kirish, olib chiqish uchun sertifikat berish tartibi to‘g‘risida”gi nizom tasdiqlandi.

Nizomga ko‘ra, sertifikatdan faqat 1 marta foydalaniladi va uning amal qilish muddati 1 yilni tashkil qiladi.

Giyohvandlik vositalarini olib kirish, olib chiqishga ruxsat berish uchun sertifikat olish talablari va shartlariga quyidagilar kiradi:

ariza beruvchida giyohvandlik vositalari muomalasi bilan bog‘liq faoliyatni amalga oshirish huquqini beruvchi litsenziyaning mavjudligi;

giyohvandlik vositalarini olib kirish va olib chiqishda qonunchilikka majburiy rioya qilinishi;

sertifikatni olish uchun taqdim etiladigan ma’lumotlarning ishonchliligini ta’minlash va boshqalar.

Arizani ko‘rib chiqish va sertifikatni rasmiylashtirish uchun BHMning 8 baravari miqdorida yig‘im undiriladi.

Farmatsevtika mahsulotlari xavfsizligi markazi arizani qabul qilingan kundan boshlab 30 ish kunidan ortiq bo‘lmagan muddatda ko‘rib chiqib, sertifikat beradi yoki sertifikat berishni rad etadi.

Source link

Qayd etilishicha, qurilish bozorida yetarlicha tajribaga ega bo‘lmagan quruvchilar ko‘payib, muammoli qurilish obektlari ortib bormoqda. Shu bilan birga, ulush kiritish asosida ko‘p kvartirali uylarni qurish sohasidagi munosabatlar alohida qonun bilan tartibga solinmagan.

Oliy Majlis Qonunchilik palatasining Tadbirkorlik, raqobatni rivojlantirish va sanoat masalalari qo‘mitasi tomonidan “Ko‘p kvartirali uylar va boshqa ko‘chmas mulk obektlarini ulush kiritish asosida qurish to‘g‘risida”gi qonun loyihasi dastlabki tarzda ko‘rib chiqildi.

Qayd etilishicha, statistik ma’lumotlarga ko‘ra, O‘zbekistonda keyingi yillarda qurilish hajmi 17,5 baravarga ko‘paygan. Biroq ayrim hollarda quruvchi (developerlar) tomonidan qurilish-montaj ishlarini amalga oshirish grafigiga rioya qilinmayapti. Ulushli shartnomalar esa fuqarolarning manfaatlarini yetarlicha inobatga olmasdan tuzilmoqda. Qurilish obektlari, uy-joylar belgilangan muddatlarda foydalanishga topshirilmayapti.

Qurilish bozorida yetarlicha tajribaga ega bo‘lmagan quruvchilar ko‘payib, muammoli qurilish obektlari ortib bormoqda. Shu bilan birga, ulush kiritish asosida ko‘p kvartirali uylarni qurish sohasidagi munosabatlar alohida qonun bilan tartibga solinmagan. Bu kabi holatlar natijasida ko‘plab fuqarolar uy-joy sotib olish jarayonida muammolarga duch kelmoqda.

Qonun loyihasi bilan ko‘p kvartirali uylar va boshqa ko‘chmas mulk obektlarining qurilishiga jismoniy va yuridik shaxslarning pul mablag‘larini jalb qilishga oid munosabatlarni qonun darajasida belgilash nazarda tutilmoqda.

Loyihada belgilangan normalar orqali qurilishga ulush kiritishning amaldagi mexanizmi tubdan takomillashtirilib, ulushdorlarning huquq va qonuniy manfaatlari, ularning mablag‘larini kafolatli himoya qilish nazarda tutilmoqda.

Ayni paytda qonun loyihasi mutaxassislar ishtirokida muhokama qilinib, Qonunchilik palatasi majlisi kun tartibiga kiritish uchun tayyorlanmoqda.

Source link