“Insonda muammo bor, uni yechib beradigan chala mutaxassislar paydo bo‘ldi. Ular juda jadallik bilan ko‘payib ketib, mediada bemalol chiqishlar qilishni boshlashdi, sababi bugun mediada kim ilg‘or bo‘lsa unga murojaatlar soni ko‘p bo‘ladi. Xalqning og‘rib turgan yarasi bor, ular go‘yoki shartta shunga yechim ko‘rsatganday bo‘lishdi”, – deydi tibbiyot fanlari doktori, psixoterapevt Gavhar Darvish.

Bugun butun dunyoda ruhiy muammolar bilan kurashayotgan odamlar psixolog xizmatiga ehtiyoj sezmoqda. Ammo instagramni tutib ketgan “psixologlar” armiyasi millionlab auditoriyani boshqaryapti, ular istagancha narxlarda va ko‘rinishlarda o‘z xizmatlarini sotishyapti. Mutaxassislar buni marketing nayrangi deb hisoblashmoqda.

Gavhar Darvish (Teshaboyeva) psixoterapevt:

“Bozor qonuni shunday: talab bo‘lsa taklif ham bo‘ladi. Insonda muammo bor, uni yechib beradigan chala mutaxassislar paydo bo‘ldi. Ular juda jadallik bilan ko‘payib ketib, mediada bemalol chiqishlar qilishni boshlashdi, sababi bugun mediada kim ilg‘or bo‘lsa unga murojaatlar soni ko‘p bo‘ladi. Xalqning og‘rib turgan yarasi bor, ular go‘yoki shartta shunga yechim ko‘rsatganday bo‘lishdi. Ammo bu yechim har doim ham to‘g‘ri bo‘lmadi. Ular orasida o‘z sohasining haqiqiy professional mutaxassislari ham bor, lekin asosan mediani egallagan mutaxassislarni chala mutaxassis yoki psevdomutaxassislar desak to‘g‘ri bo‘ladi. Ularni qanday aniqlasa bo‘ladi? Ular birdaniga bitta sessiyada muammoni hal qilib berishni va’da qilishadi. Og‘rig‘i bo‘lgan odam, misol uchun farzandini yo‘qotgan odam shu qayg‘udan qutulishni istaydi va yechim topishni qidiradi. Psevdomutaxassislar bir konsultatsiyada muammoni hal qilib berish usulini taklif qilishadi. Bu marketing nayrangi hisoblanadi.

Farzandini yo‘qotgan bir ayol keldi, tushlariga kirgan o‘g‘li, yurgan yo‘lida ko‘ziga ko‘rinavergan, hayotni usiz tasavvur qila olmaydigan darajaga kelib qolgan. Chuqur depressiyaga tushgan va shunaqa chalamutaxassisning qo‘liga tushib qolgan. U bu muammoga yechim va’da qilgan, ayol unga ishongan. Bu yerda juda katta summa haqida gap ketyapti. Ba’zi holatlarda uyini sotib shunaqa mutaxassislarga borganlarniyam eshitganmiz. Bu bemorlar ulardan davo topa olmagandan keyin bizga kelishadi – endi uning uyi yo‘q, bo‘ynida qarzi bor va hokazo. Muammosi esa hal bo‘lmagan.

Mutaxassisning bir martada natija va’da qilishi uning psevdo ekanligidan darak beradi. Uning qayerni bitirgani, necha yillik tajribaga ega ekanligi, mutaxassisligi bo‘yicha diplomini so‘rash kerak. Ular xonasiga ilib tashlagan sertifikatlari muhim emas. Borishdan oldin bularni so‘rash kerak. Hali o‘qishni bitirmagan talaba bo‘lishi yoki falonchi mutaxassisning qo‘lida o‘qigan bo‘lishi, qo‘lida diplomi bo‘lmasligi uning chala yoki soxtaligidan dalolat beradi.

Siz borayotgan mutaxassis aynan qanaqa metodika bilan ishlashini bilishingiz shart. U sizga qo‘llamoqchi bo‘lgan usulining nomini bilishingiz kerak. Chunki ruhiyatingizni chala va soxtaning qo‘liga topshirib bo‘lmaydi. Ruhiyat – bu ma’naviyat, bu mentalitet, insonning butun borlig‘i, ichki dunyosi degani. Buni hammagayam ochib bermaslikni maslahat bergan bo‘lardim. Ya’ni haqiqiy mutaxassisga ruhiy muammo bilan boradigan bo‘lsangiz, ular sizga yechim taklif qiladi va bu bitta seansda bo‘lmaydi. Buning uchun siz ishlaysiz. Mutaxassis bilan birgalikda ter to‘kasiz. Unga vaqt, kuch va bilim ajratasiz. Ma’lum bir muddatdan keyin, deylik 3 oy yoki 1 oy, balki 1 yil (o‘rtacha 6 oy) muddatdan keyingina muammolarga haqiqiy yechim topsa bo‘ladi”.

Source link

Oliy sud Sho‘rchi dehqon bozorida sodir etilgan jinoyat ishini taftish tartibida ko‘rishni Surxondaryodan Qashqadaryo viloyati sudiga o‘tkazdi.

Jinoyat ishlari bo‘yicha Sho‘rchi tuman sudida o‘ta shafqatsizlik bilan sodir etilgan qotillik, deb topgan ishni Surxonddaryo viloyat sudi apellyatsiya instansiyasida bezorilik va qasddan badanga og‘ir shikast yetkazishga o‘zgartirib, mahkumlarga tayinlangan jazoni yengillashtirgandi.

Sho‘rchi dehqon bozorida sodir etilgan jinoyat ishi taftish tartibida Qashqadaryo viloyati sudida ko‘riladigan bo‘ldi. Bu haqda marhum (jabrlanuvchi)ning turmush o‘rtog‘iga Oliy suddan yuborilgan javob xatida ma’lum qilingan.

Unda yozilishicha, Jinoyat kodeksining 97-moddasi (qasddan odam o‘ldirish) 2-qismi “l, p” bandlari bilan sudlangan Ulug‘bek Bo‘riyev va boshqalarga oid jinoyat ishi qonuniy hal etish uchun Qashqadaryo viloyati sudiga yuborilgan. Unga qadar mazkur ish Surxondaryo viloyati sudi jinoyat ishlari bo‘yicha sudlov hay’ati taftish instansiyasining ish yurituvida edi. Marhumning yaqinlari taftish Surxondaryo sudida ko‘rilishi xolislikka putur yetkazishidan xavotir bildirishgandi.

Sho‘rchi voqeasi

Jinoyat 2025 yil 16 iyul kuni Surxondaryo viloyati Sho‘rchi tumanidagi dehqon bozorida sodir etilgan. 1990 yilda tug‘ilgan Ulug‘bek Bo‘riyev o‘ziga qo‘shni oshxona egasi – 1987 yilda tug‘ilgan Elbek Eshmatov bilan janjallashgan. Oshxona egalari bir-biri bilan mushtlashib, yoqalashayotganda har ikki tomonning yaqinlari, o‘tib-qaytuvchilar ularni ajratib qo‘yishga urinishgan. Shunda Ulug‘bek Bo‘riyevning oshxonasida ishlovchi 16 yoshli jiyani Ozodbek Boltayev 30 sm.dan uzunroq kabob sixini olib chiqib, tog‘asi bilan urishayotgan Elbek Eshmatovning orqasidan ko‘krak qafasiga sanchgan.

Sud-tibbiy ekspertizasi xulosasiga ko‘ra, kabob sixi Elbek Eshmatovning qovurg‘alari orasidan kirib, chap o‘pkasini to‘liq teshib o‘tgan. U buning oqibatida vafot etgan.

Dastlabki sud hukmi bilan tog‘a va jiyan Jinoyat kodeksining 97-moddasi 2-qismi “l, p” bandlari, ya’ni bezorilik oqibatida bir guruh shaxslar tomonidan qasddan odam o‘ldirish jinoyatini sodir etishda aybli deb topilgan. Ulug‘bek Bo‘riyevga 15 yil 6 oy, Ozodbek Boltayevga 9 yil 6 oy ozodlikdan mahrum qilish jazosi tayinlangan.

Surxondaryo viloyati sudi jinoyat ishlari bo‘yicha sudlov hay’ati apellyatsiya instansiyasining 2026 yil 27 yanvardagi ajrim bilan dastlabki sud hukmi o‘zgartirilgan. Unga ko‘ra, Ozodbek Boltayevning harakatlari Jinoyat kodeksining 104-moddasi 3-qismi “d” bandi, ya’ni qasddan badanga og‘ir shikast yetkazish jabrlanuvchining o‘limiga sabab bo‘lishi, Ulug‘bek Bo‘riyevniki esa Jinoyat kodeksining 277-moddasi 3-qismi “g” bandi – jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib bezorilik sodir etish bilan qayta malakalangan. Jiyanning ozodlikdan mahrum qilish bilan bog‘liq jazo muddati 9,5 yildan 7 yilga, tog‘aniki esa 15,5 yildan 5 yilga tushirilgan.

Marhumning yaqinlari buni adolatsiz deb hisoblamoqda. Holatga munosabat bildirgan Surxondaryo viloyati sudi sud qarorlarining adolatliligiga taftish instansiya sudi huquqiy baho berilishini ma’lum qilgandi.

Source link

O‘zbekistonda 2025-yil davomida temir yo‘l transportida 10,5 mln yo‘lovchi tashilgan.

Milliy statistika qo‘mitasining ma’lumotlariga ko‘ra, bu ko‘rsatkich 2000 yilga nisbatan qariyb 4,1 mln yo‘lovchiga kamaygan.

Ushbu ko‘rsatkich yillar kesimida quyidagicha:

2000-yil — 14,6 mln nafar;
2005-yil — 15,1 mln nafar;
2010-yil — 14,5 mln nafar;
2015-yil — 20,1 mln nafar;
2020-yil — 6,2 mln nafar;
2021-yil — 7,9 mln nafar;
2022-yil — 9 mln nafar;
2023-yil — 9,6 mln nafar;
2024-yil — 9,8 mln nafar;
2025-yil — 10,5 mln nafar.

Source link

Yaqin Sharqdagi keskinlik ortib borayotgan bir paytda Eron raketalari imkoniyatlari yana bir bor xalqaro muhokama markaziga aylandi. Hind okeanidagi Diyego-Garsiya harbiy bazasiga ehtimoliy zarba haqidagi xabarlar bu bahslarni yanada kuchaytirdi.

Mazkur baza Eron hududidan taxminan 4000 kilometr uzoqlikda joylashgan. Bu esa avvalgacha Eron raketalari uchun aytib kelingan 2000–2500 kilometrlik diapazondan ancha yuqori ko‘rsatkichdir. Agar bu ma’lumotlar tasdiqlansa, bu Eron raketalari salohiyati haqidagi tasavvurlarni tubdan o‘zgartirishi mumkin.

Biroq hozircha bu zarba va qo‘llangan qurol turi rasman tasdiqlanmagan. Shu sababli ekspertlar ehtiyotkorlik bilan baho bermoqda. Ayrim tahlilchilar fikricha, gap Khorramshahr turidagi modernizatsiya qilingan raketa yoki kosmik raketa texnologiyalari asosida yaratilgan tashuvchi haqida ketishi mumkin. Bunday tizimlar uzoq masofaga yetishi mumkin, ammo ularning aniqligi odatda pastroq bo‘ladi.

Shu bilan birga, asosiy savol shundaki — agar Eron haqiqatan ham 4000 kilometrlik masofaga ega raketalarga ega bo‘lsa, bu Yevropaga qanday ta’sir qiladi?

Harbiy ekspertlar ta’kidlashicha, bunday diapazon nazariy jihatdan Yevropaning ayrim hududlarini ham qamrab olishi mumkin. Bu esa NATO davlatlari uchun xavfsizlik masalasini yanada dolzarb qiladi. Biroq bu holatni mutlaq tahdid sifatida baholash hozircha erta. Chunki Yevropa mamlakatlari zamonaviy raketaga qarshi mudofaa tizimlariga ega bo‘lib, bunday tahdidlarni qaytarish imkoniyatiga ega.

Shu o‘rinda yana bir muhim jihat bor: uzoq masofali raketaga ega bo‘lish — bu uni samarali va aniq qo‘llay olish degani emas. Masofa oshgan sari nishonga tegish aniqligi pasayishi mumkin. Shu bois, bugungi bahslar faqat texnik imkoniyatlar emas, balki ularning amaldagi samaradorligi haqida ham bormoqda.

Xulosa qilib aytganda, Eron raketalari Yevropaga yetishi mumkinligi haqidagi gaplar hozircha tasdiqlanmagan ssenariylarga asoslanmoqda. Biroq bu muhokamalarning o‘ziyoq Yaqin Sharqdagi mojaro doirasi kengayib borayotganini va uning oqibatlari global xavfsizlikka ta’sir qilishi mumkinligini ko‘rsatmoqda.

Source link

O‘zbekistonning Shvetsiyadagi elchixonasi vakillari Norvegiyaning «TOMRA Systems ASA» kompaniyasi vitse-prezidenti Tomas Morgenshtern bilan onlayn muloqot qildi.

«Dunyo» AA bergan ma’lumotga ko‘ra, muzokaralar chog‘ida «O‘zbekiston – 2030» strategiyasi doirasida aylanma iqtisodiyotni rivojlantirish bo‘yicha hamkorlik istiqbollari muhokama qilindi. Kompaniya O‘zbekiston Chiqindilarni boshqarish va aylanma iqtisodiyotni rivojlantirish agentligi bilan birgalikda chiqindilarni yig‘ish va qayta ishlash bo‘yicha loyihalarga qiziqish bildirdi.

Muloqot davomida ekologik tashabbuslarni amalga oshirish uchun Norvegiya grantlarini jalb qilish imkoniyatlariga alohida e’tibor qaratildi. Shuningdek, tomonlar «TOMRA» rahbariyatining 2026 yil iyun oyida poytaxtimizda bo‘lib o‘tadigan Toshkent xalqaro investitsiya forumida ishtirok etishi va O‘zbekiston vakillarining Norvegiyaga tashrifi bo‘yicha kelishib oldi.

«TOMRA Systems ASA» kompaniyasi 1972-yilda tashkil etilgan bo‘lib, chiqindilarni saralash va qayta ishlash, aylanma iqtisodiyotni rivojlantirish va tabiiy resurslardan barqaror foydalanish bo‘yicha jahon bozorida yetakchi o‘rinni egallaydi.

Source link