Urush tugaganiga deyarli 80 yil bo‘ldi. Ammo o‘sha qonli yillarni o‘z ko‘zi bilan ko‘rgan insonlar hamon oramizda.

2026-yil 6-may holatiga ko‘ra, O‘zbekistonda jami 60 nafar Ikkinchi jahon urushi faxriylar istiqomat qilishmoqda.

Ulardan 28 nafari poytaxtimizda, 5 nafari Samarqandda, 11 nafarga yaqini esa boshqa viloyatlarda istiqomat qilishmoqda.

Mamlakatimiz Prezidentining farmoniga binoan, 2026-yilda urush qatnashchilari va nogironlariga 30 million so‘m miqdorida bir martalik pul mukofoti beriladi.

Urush faxriylariga tenglashtirilgan boshqa shaxslarga esa 25 million so‘mdan mablag‘ ajratilgan. Bu hali hammasi emac, O‘zbekistonda doimiy ravishda Ikkinchi jahon urushi qatnashchilari va nogironlari uchun keng ko‘lamli moddiy va ijtimoiy imtiyozlar tizimi joriy etilgan.

Jumladan, ular olayotgan nafaqaga asosiy miqdorning 150 foizi miqdorida oylik qo‘shimcha to‘lovlar qo‘shiladi.
Har oyda oziq-ovqat va gigiyena vositalari uchun qo‘shimcha mablag‘, yiliga bir marta esa kiyim-kechak va poyabzal uchun kompensatsiya to‘lanadi
Shuningdek, faxriylarimiz respublika ixtisoslashtirilgan tibbiyot markazlarida va viloyat ko‘p tarmoqli shifoxonalarida bepul tibbiy yordam olish huquqiga egalar.
Bundan tashqari, yiliga bir marta o‘zlari xohlagan vaqtda sanatoriylarda bepul sog‘lomlashtirish kursida davolanishlari mumkin. 1-guruh nogironi bo‘lgan faxriylarni parvarishlovchi farzandi yoki nabirasi uchun ham bepul yo‘llanma ajratiladi.
Yolg‘iz yashayotgan va uy-joyga muhtoj faxriylarning xonadonlari davlat hisobidan ta’mirlab beriladi.
Temir yo‘l transportida bepul yurish va havo transportida imtiyozli uchish huquqi ham mavjud.
Muzey, teatrlar va boshqa madaniy tadbirlarga kirish ham ular uchun mutlaqo bepul.
Qolaversa, kommunal xizmatlar to‘lovi uchun har oylik kompensatsiya pullari to‘lab beriladi.
Urush faxriylari jismoniy shaxslardan olinadigan mol-mulk va yer solig‘idan ham to‘liq ozod qilingan.
Yolg‘iz yashayotgan va uy-joy sharoitini yaxshilashga muhtoj bo‘lgan faxriylarning xonadonlari davlat budjeti mablag‘lari hisobidan to‘liq ta’mirlab berilmoqda.
Shuningdek, yurtimizda urush faxriylarining kundalik turmushi va salomatligini nazorat qilish uchun maxsus patronaj tizimi va hududiy qo‘llab-quvvatlash mexanizmlari yo‘lga qo‘yilgan.
Ular har kuni faxriylarning xonadoniga borib, uning salomatligini (qon bosimi, qand miqdori va umumiy holati) tekshirib turishadi va zaruriy dori-darmonlarni bepul yetkazib berishadi.

Quvonarlisi, bunday imkoniyatdan aksariyati Ikkinchi jahon urushi qatnashchilarining oila a’zolari, ayniqsa, ular bilan birga yashayotgan yoki ularga g‘amxo‘rlik qilayotgan farzandlari va nabiralariga ham taqdim etiladi. Faxriyga biriktirilgan patronaj xizmati hamshiralari uning oila a’zolarining sog‘lig‘idan ham muntazam xabardor bo‘lib turishadi.

Bundan tashqari, yurtimizda urush faxriyalarining farzandlari hamda nevaralari uchun oliy ta’lim muassasalariga (OTM) kirishda davlat granti asosida qo‘shimcha kvotalar va imtiyozli ballar berish amaliyoti yo‘lga qo‘yilgan. Shuningdek, bunday oila farzandlari harbiy yo‘nalishdagi o‘quv yurtlariga kirishda ham imtiyozlarga ega bo‘lishadi.

Shuni ta’kidlash lozimki, bu imtiyozlarning aksariyati faxriyning ijtimoiy himoyasini ta’minlash va unga qarashayotgan yaqinlarini qo‘llab-quvvatlash maqsadida joriy etilgan.

Yolg‘iz yashaydigan faxriylarga esa kundalik yumushlarida (ovqat pishirish, tozalik) yordam berish uchun maxsus ijtimoiy xodimlar ajratilgan.

Ushbu imtiyozlarning aksariyati nafaqat bevosita urush qatnashchilariga, balki ularga tenglashtirilgan shaxslarga ham tegishli tartibda qo‘llanilib kelinmoqda.

Har yili mamlakatimizda 9-may arafasida hokimliklar tomonidan faxriylarga qimmatbaho maishiy texnikalar (muzlatgich, televizor va h.k.) yoki avtomobillar sovg‘a qilinishi an’anaga aylangan.

9-may — bu shunchaki sana emas. Bu — hurmat, xotira va qarzdorlik kuni. Biz urushni faqat kitoblarda o‘qiganmiz. Ular esa uni yuragi bilan his qilib, hayoti bilan yozgan.

Source link

Joriy o‘quv yilida Rossiya oliy ta’lim muassasalarida tahsil olayotgan xorijlik talabalar soni 2024-yilga nisbatan 7 ming nafarga ko‘payib, jami 402 ming nafarni tashkil etdi. Bu haqda RF Fan va oliy ta’lim vaziri o‘rinbosari Konstantin Mogilevskiy ma’lum qildi.

Bugungi kunda Rossiyada dunyoning 179 mamlakatidan kelgan yoshlar o‘qimoqda. Eng katta ko‘rsatkichlar Qozog‘iston (60 818), Turkmaniston (57 060) va Xitoy (56 766) hissasiga to‘g‘ri keladi.

Ma’lumotlarga ko‘ra, Rossiya OTMlarida 46 598 nafar o‘zbekistonlik talaba tahsil olmoqda. Bu ko‘rsatkich jami chet ellik talabalarning 11,5 foizi demakdir.

Rossiyada tahsil olayotgan xorijlik talabalar soni (top-10):
(Jami xorijlik talabalarning qariyb 82 foizi 10 mamlakatga to‘g‘ri keladi)

Qozog‘iston — 60 818;
Turkmaniston — 57 060;
Xitoy — 56 766;
O‘zbekiston — 46 598;
Hindiston — 38 831;
Tojikiston — 24 640;
Belorussiya — 16 048;
Qirg‘iziston — 9 643;
Ozarbayjon — 9 633;
Eron — 9 495 kishi.

Source link

Qorako‘l tumanidagi 8-sonli umumiy o‘rta ta’lim maktabi sobiq direktori T.E. budjet mablag‘larini asossiz sarflagani uchun jinoiy javobgarlikka tortildi. Bu haqda «Xabar.uz»ga Jinoyat ishlari bo‘yicha Qorako‘l tumani sudi raisi Boborahim Ochilov ma’lum qildi.

Sud materiallariga ko‘ra, u bir necha yil davomida ustama va moddiy yordam pullarini tayinlashda amaldagi tartib-qoidalarni qo‘pol ravishda buzib kelgan.

Direktor pedagog xodimlarga ustama va moddiy yordam ajratish jarayonida belgilangan nizom talablariga amal qilmagan. Jumladan, maxsus komissiya yig‘ilishlari to‘liq o‘tkazilmagan, ota-onalar va kuzatuv kengashi vakillari jalb etilmagan. Ayrim hollarda esa hujjatlar to‘liq o‘rganilmasdan, baholash mezonlariga asossiz ballar qo‘shib kelingan.

Aniqlanishicha, 2023–2024-o‘quv yilida 24 nafar o‘qituvchiga qariyb 84,3 million so‘m, 2024–2025-o‘quv yilida esa 40 nafar pedagogga 83,7 million so‘m miqdorida ustama mablag‘lari asossiz to‘langan. Shuningdek, 2024-yilda yana 5 nafar xodimga 32,9 million so‘mlik moddiy yordam noqonuniy ajratilgan.

Mutaxassislar tomonidan o‘tkazilgan o‘rganishlarda ko‘plab hujjatlarda kamchiliklar aniqlangan. Ayrim hollarda komissiya a’zolari imzolari soxtalashtirilgani, ba’zi o‘qituvchilarning hujjatlari, umuman, mavjud bo‘lmagani yoki belgilangan talablarga javob bermagani ma’lum bo‘lgan. Shuningdek, tibbiy xulosalar to‘liq bo‘lmagan holda ham moddiy yordam ajratilgan holatlar qayd etilgan.

Sud majlisida T. E. aybini to‘liq tan olgan. U o‘z ko‘rsatmasida hujjatlarni chuqur o‘rganmaganini, asosan, komissiya a’zolarining xulosalariga tayanganini bildirgan. Shu bilan birga, u qilgan ishlaridan pushaymon ekanini va yetkazilgan zararni ixtiyoriy ravishda qoplaganini ma’lum qilgan.

Jabrlanuvchi tomon ham yetkazilgan moddiy zarar to‘liq qoplanganini bildirib, sudlanuvchiga nisbatan da’vosi yo‘qligini bildirgan.

Sud dastlabki tergov organi tomonidan sudlanuvchi T.E. O‘zbekiston Respublikasi Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish), 2-qismi «b,g» bandlari bilan aybdor, deb topilgan. Sud xulosasiga ko‘ra, ayblanuvchining harakatlari budjet mablag‘larini rastrata qilish hamda mansab soxtakorligi sifatida to‘g‘ri malakalangan.

Hozirda T. E. maktab direktori lavozimidan ozod etilgan bo‘lib, o‘qituvchilik faoliyati bilan shug‘ullanmoqda.

Source link

Qatiq — oddiy ichimlik emas, balki zamonaviy nutritsiologiyada “funksional ozuqa” sifatida e’tirof etilgan mahsulotdir. Uning tarkibidagi tirik bakteriyalar, oqsillar va minerallar inson organizmiga kompleks ta’sir ko‘rsatadi. Xalqaro ilmiy tadqiqotlarda ham qatiqning bir qator sog‘lomlashtiruvchi xususiyatlarini tasdiqlangan.

Keling yaxshisi, qatiqning 10 ta ilmiy asoslangan foydali xususiyatlari haqida gaplashamiz:

1. Ichak mikroflorasini muvozanatga keltiradi

Qatiqdagi probiotiklar (Lactobacillus va Bifidobacterium) ichakdagi foydali bakteriyalarni ko‘paytirib, patogen mikroorganizmlarning o‘sishini cheklaydi. Bu hazm tizimining barqaror ishlashini ta’minlaydi.

2. Immun tizimini kuchaytiradi

Probiotiklar orqali qatiq organizmning infeksiyalarga qarshi kurashish qobiliyatini oshiradi.

3. Oqsil va aminokislotalar manbai

Qatiq yuqori biologik qiymatga ega oqsillarni o‘z ichiga oladi. U inson organizmi uchun zarur bo‘lgan almashtirib bo‘lmaydigan aminokislotalarni ta’minlaydi.

4. Organizmingizni foydali vitaminlar bilan boyitadi

Unda V guruhi vitaminlari (V2, V5, V12), A vitamini va biotin mavjud bo‘lib, ular asab tizimi, teri salomatligi va energiya almashinuvi uchun juda muhim.

5. Minerallar balansiga yordam beradi

Qatiq kalsiy, fosfor, magniy, kaliy va rux kabi minerallarga boy. Bu suyak va tishlarni mustahkamlashda muhim rol o‘ynaydi.

6. Suyak to‘qimasini mustahkamlaydi

Kalsiy va fosforning yaxshi o‘zlashtirilishi osteoporozning oldini olishga yordam beradi, ayniqsa katta yoshdagilar uchun bu juda muhim.

7. Yurak-qon tomir tizimini qo‘llab-quvvatlaydi

Ayrim klinik tadqiqotlar qatiqni muntazam iste’mol qilish qondagi LDL (“yomon xolesterin”) miqdorini pasaytirishga yordam berishini ko‘rsatgan.

8. Hazm tizimini yaxshilaydi

Qatiq fermentlari ovqatning parchalanishini yengillashtiradi, qorin dam bo‘lishi va gaz yig‘ilishini kamaytiradi.

9. Tabiiy tinchlantiruvchi ta’sirga ega

Qatiq tarkibidagi ba’zi biofaol moddalar asab tizimiga yengil tinchlantiruvchi ta’sir ko‘rsatishi haqida hali ko‘pchilik bilmaydi. U uyqu sifatiga ham ijobiy ta’sir qiladi.

10. Ayrim onkologik kasalliklar xavfini kamaytirishga yordam beradi

Ichak mikroflorasining barqarorligi va antioksidant ta’siri orqali qatiq ichakdagi yallig‘lanish jarayonlarini kamaytirishga yordam berishi mumkin. Bu esa uzoq muddatli profilaktik ta’sir sifatida qaraladi.

Katta yoshli kishilar kuniga  200–400 ml (1 stakandan 2 stakangacha) qatiq iste’mol qilib yurishsa hamisha yosh va navqiron ko‘rinadilar.

Ammo yodingizda tuting, asalning ham ozi shirin, qatiq foydali mahsulot bo‘lsada, laktozaga sezgirlik, oshqozon kasalliklari yoki maxsus parhezlarda uni iste’mol qilishdan oldin shifokor bilan maslahatlashish tavsiya etiladi.

Source link

Media haftalik Navoiyda davom etmoqda. Bu loyiha oddiy o‘quv yoki seminar emas, balki zamonaviy axborot muhitida faoliyat yurituvchi mutaxassislar uchun amaliy tajriba, fikr almashinuv va kasbiy o‘sish platformasi sifatida shakllanmoqda.

Bugungi kunda axborot tezligi, ishonchlilik va kontent sifati eng muhim omillarga aylangan bir davrda, Media haftalik aynan shu talablarni qamrab olgan holda tashkil etilmoqda. Unda ommaviy axborot vositalari vakillari, axborot xizmatlari xodimlari, blogerlar hamda SMM mutaxassislari bir maydonga jam bo‘lib, zamonaviy media standartlarni birgalikda muhokama qilmoqda.

Ushbu tashabbusning markazida bitta g‘oya turadi: “Axborot bilan ishlashni yangi bosqichga olib chiqish.”

Ishtirokchilar quyidagi yo‘nalishlarda bilim va ko‘nikmalarini rivojlantirmoqda:

Faktcheking va axborot ishonchliligini tekshirish;
Tezkor yangilik tayyorlash va tarqatish mexanizmlari;
Auditoriya psixologiyasi va kontent strategiyasi;
Raqamli platformalarda samarali ishlash usullari;
Viral kontent yaratish va uning algoritmlari.

Media haftalikning eng muhim jihatlaridan biri — bu faqat nazariy bilim bilan cheklanmaslikdir. Har bir ishtirokchi, real keyslar ustida ishlamoqda, amaliy mashg‘ulotlarda ishtirok etmoqda, tajribali ustozlar bilan bevosita muloqot qilmoqda va o‘z kontentini tahlil qilib, xatolarini real vaqt rejimida tuzatmoqda Bu esa an’anaviy treninglardan farqli ravishda tezkor natija beruvchi o‘quv muhitini yaratadi.

Umuman olganda, media haftalik ishtirokchilarga kontentning qanday qilib e’tibor qozonishi, qanday qilib keng auditoriyaga yetib borishi va eng muhimi — qanday qilib ishonchli manbaga aylanishi bo‘yicha aniq yo‘l xaritasini taqdim etmoqda.

Bu tashabbusning eng katta natijasi — yangi fikrlaydigan, tezkor, raqamli muhitni chuqur tushunadigan media mutaxassislar avlodining shakllanishidir. Ular nafaqat axborot yetkazadi, balki uni tahlil qiladi, tekshiradi va auditoriyaga mos shaklda yetkazishni o‘rganadi.

Media haftalik — bu faqat tadbir emas. Bu yangi media tafakkuri, yangi yondashuv va yangi kasbiy standartlar maktabidir. Unutmang, bugun olingan bilim ertangi natijani belgilaydi. Shuning uchun bu jarayonning bir qismi bo‘lish — faqat imkoniyat emas, balki zamon talabi hamdir.

Source link