Yevropadan JCh yo‘llanmasini naqd qilgan ilk jamoa nomi ma’lum.

14 oktyabr kuni Yevropada JCh-2026 saralashida navbatdagi bahslar o‘tkazildi. Quyida dushanba oqshomida o‘tkazilgan o‘yinlar va guruhlardagi vaziyat haqida.

E guruhi

To‘purar Merino

Ispaniya – Bolgariya 4:0

Gollar: Merino, 35 (1:0). Merino, 57 (2:0). Chernev, 79 – avtogol (3:0). Oyyarsabal, 90+2 – penalti (4:0)

Ispaniya: Simon, Le Norman (Vivian, 72), Lyaport, Grimaldo, Porro, Subimendi (Garsiya, 63), Pedri (Barrios, 67), Merino, Baena (Pino, 63), Oyyarsabal, Agexova (Iglesias, 46)

Bolgariya: Vutsov, Chernev, Xristov, Georgiyev, Velkovski, Krastev, Gruyev (Krayev, 89), Shopov (Stoyanov, 84), Minchev (Dimitrov, 67), Kirilov (Nikolov, 67), Despodov (Petkov, 67)

Ispaniya va Bolgariya o‘yini kunning natijasini oldindan taxmin qilish oson bo‘lgan o‘yini edi. Ispanlar shu vaqtgacha gol o‘tkazmay kelmoqda, bolgarlar esa faqat bir gol urgan va birorta ochko to‘plamagandi. Mehmonlar darvozaboni Vutsov imkon qadar harakat qildi, agar uning seyvlari bo‘lmaganida hisob birinchi bo‘limning o‘zida yirik ko‘rinish olgan bo‘lardi. Faqat yarimhimoyachi Mikel Merino yana bir bor o‘zining hujumchilik xislatlarini yodga oldi va bo‘lim oxirlarida hisobni ochdi. Ikkinchi bo‘lim boshida esa dublni rasmiylashtirdi. «Arsenal» futbolchisi saralash bosqichidagi to‘rt o‘yinda 6 gol urishga ulgurdi. O‘yin davomida Atanas Chernev avtogol muallifi bo‘lib, hisobni tenglashtirdi. 90+2-daqiqada Mikel Oyarsabal penaltini aniq ijro etdi – 4:0. Jami to‘plar nisbati esa ideal ko‘rinishda 15:0! Lekin navbatdagi yirik g‘alabadan keyin ham ispanlar hali mundial yo‘llanmasini hal qilmadi.

Turkiya – Gurjiston 4:1

Gollar: Kenan Yildiz, 14 (1:0). Merih Demiral, 22 (2:0). Yunus Oqgun, 35 (3:0). Merih Demiral, 52 (4:0). Kochorashvili, 64 (4:1)

Turkiya: Ugurjan Chaqir, Merih Demiral, Abdulkarim Bardakchi, Eren Elmali, Mert Mo‘ldur, Hoqon Chalxono‘g‘li (O‘zjan, 78), Ismoil Yuksek, Arda Guler (Orkun Ko‘kchi, 68), Kenan Yildiz (Ferdi Kadio‘g‘li, 83), Yunus Oqgun (Barish Yilmaz, 68), Karim Oqturko‘g‘li (O‘g‘uz Oydin, 78)

Gurjiston: Mamardashvili, Goglichidze, Lochoshvili, Gocholeishvili, Kakabadze, Mekvabishvili, Kochorashvili, Kiteishvili (Gagnidze, 65), Kvaratsxeliya, Davitashvili (Lobjanidze, 72), Mikautadze (Zivzivadze, 46)

Ogohlantirishlar: Karim Oqturko‘g‘li, 74 – Kochorashvili, 84

Ispanlar hali ham yo‘llanmani kafolatlamaganiga esa turklar aybdor. Turkiya Gurjistonni yana bir bor mag‘lub etdi va ispanlar bilan oradagi uch ochkolik farqni saqlab qoldi. Turklar o‘zaro o‘yingacha ikkinchi o‘rin uchun raqobatchisi bo‘lmish gurjistonliklardan faqat uch ochko oldinda edi. Shu tufayli bu o‘yin natijasiga qarab ko‘p narsa o‘zgarib ketishi mumkin edi. Ammo mehmonlar kutilganidek kurash taklif eta olishmadi va mezbonlar birinchi bo‘limning o‘zida uchta gol farqi bilan oldinga chiqib olishdi.

Tanaffusdan keyin esa Vinchenso Montella shogirdlari raqibga deyarli imkon bermadi. Endi Villi Sanyol shogirdlari ikkinchi o‘ringa chiqishi uchun faqat mo‘jiza kerak bo‘ladi. Buning uchun ular Ispaniya va Bolgariyaga qarshi o‘yinlarda g‘alaba qozonishi, shuningdek, turklar qolgan ikki o‘yinda ham yirik hisobda mag‘lub etishidan umid qilishi kerak bo‘ladi. Ochkolar teng kelgan taqdirda barchasini to‘plar nisbati hal qiladi: hozircha bu borada turklarning vaziyati ancha yaxshiroq («-3»ga qarshi «+3»).

15 noyabr. Gurjiston – Ispaniya, Turkiya – Bolgariya.

18 noyabr. Bolgariya – Gurjiston, Ispaniya – Turkiya.

I guruhi

3:0 ham kam

Italiya – Isroil 3:0

Gollar: Retegi, 45+2 – penalti (1:0). Retegi, 74 (2:0). Manchini, 90+3 (3:0)Italiya: Donnarumma, Kalafiori, Manchini,

Dimarko, Di Lorenso, Lokatelli (Spinatssola, 85), Tonali (Pikkoli, 90+2), Barella, Raspadori (Espozito, 46), Kambiyaso (Kristante, 85), Retegi (Kambiyagi, 90+2)

Isroil: Glazer, Baltaksa, Blorian, Revivo, Dasa (Mizraxi, 89), Glux, Xalaili (Turgeman, 72), Perets (Abu Fani, 75), Solomon (Shua, 89), Biton, Baribo (Turiel, 72)

Ogohlantirishlar: Tonali, 88. Barella, 90 – Biton, 42

Italiya bu o‘yinga, shubhasiz, yaqqol favorit sifatida yetib keldi, ammo sentabragi Isroil bilan o‘yindagi trillerdan (5:4) keyin har narsani kutish mumkin edi. Lekin «Skuadra adzurra» xatolardan saboq chiqargani va Jyennaro Gattuzo himoyada tartib o‘rnatgani oydinlashdi. Oldingi chiziqda esa odatdegidek Mateo Retegi o‘zini ko‘rsatdi, uning dubli va qo‘shimcha daqiqalarda Manchini urgan gol yirik hisobdagi g‘alabani ta’minladi.

Italiya hozircha ikkinchi o‘rinni mustahkamladi. Isroil ustidan g‘alaba jamoani guruh peshqadami Norvegiyaga uch ochkolik masofada yaqinlashtirdi. Ammo italyanlar o‘zaro o‘yinda norveglarni yenggan taqdirda ham ushbu raqibdan to‘plar nisbati bo‘yicha ancha ortda qoladi. Birinchi o‘ringa chiqib olish esa faqat aql bovar qilmas voqealar bo‘lib o‘tishini talab qiladi. Hozirda Italiyada to‘plar nisbati «+10», Norvegiyada – «+26». Shuning uchun norveglar keyingi turda o‘z uyida Estoniyani mag‘lub etadigan bo‘lsa, amalda JCh-2026 ga to‘g‘ridan to‘g‘ri yo‘llanmani o‘ziniki qiladi. Italiya esa o‘tish o‘yinlari orqali o‘z imkoniyatini sinab ko‘rishiga to‘g‘ri keladi.

Estoniya – Moldova 1:1

Gollar: Kyayt, 12 (1:0). Bodishtyanu, 64 (1:1)

Estoniya: Xeyn, Paskochi, Mets, Sinyavskiy, Shenning-Larsen, Kyayt (Paalberg, 85), Soomets, Kristal (Sheyn, 59), Saarma (Mustmaa, 59), Yakovlev, Sappinen (Tamm, 82)

Moldova: Kojuxar, Baboglo, Gerasimenkov, Krechun (Shtefan, 62), Ryabchuk, Forov (Pletike, 81), Ratse (Bors, 62), Bogachuk (Bodishtyanu, 46), Kaymakov (Lupan, 46), Postolaki, Persiun

Ogohlantirishlar: Mets, 45. Tamm, 88 – Ryabchuk, 29. Bogachuk, 34. Baboglo, 88

Estoniya va Moldova jamoalari uchun saralash turniri amalda yakunlangan. Ushbu jamoalar JCh-2026 yo‘llanmasi uchun nazariy imkoniyatni ham yo‘qotgan. Shu tufayli o‘zaro uchrashuvda ular faqat muxlislariga taskin beruvchi g‘alaba uchun o‘ynashdi. Ammo yakunda durang qayd etildi. Moldova olti tur ichidagi ilk ochkosini qo‘lga kiritdi, Estoniya ushbu raqib ustidan ikkinchi g‘alabasiga erishish imkonini qo‘ldan boy berdi.

13 noyabr. Norvegiya – Estoniya, Moldova – Italiya.

16 noyabr. Isroil — Moldova, Italiya – Norvegiya.

F guruhi

Vaziyat chigal

Portugaliya – Vengriya 2:2

Gollar: Salai, 8 (0:1). Krishtianu Ronaldu, 22 (1:1). Krishtianu Ronaldu, 45+3 (2:1). Soboslai, 90+1 (2:2)

Portugaliya: Koshta, Ruben Diash, Veyga, Nunu Mendesh (Nunu Tavaresh, 78), Semedu, Ruben Nevesh (Palinya, 62), Vitinya, Brunu Fernandesh (Joau Feliks, 62), Pedru Netu (Konseysau, 62), Bernardu Silva, Krishtianu Ronaldu (Ramush, 78)

Vengriya: B. Tot, Salai, Orban, Kerkez (Dardai, 79), Nego, Stayls (Vitalish, 79), Soboslai, Shefer (A. Tot, 38), Sholloi, Bolla (Lukach, 58), Varga

Ogohlantirishlar: Brunu Fernandesh, 34. Joau Feliks, 90 – Stayls, 50. Lukach, 90

Portugaliya milliy jamoasi Budapeshtda bo‘lib o‘tgan birinchi o‘yinda Vengriyani qiyinchilik bilan mag‘lub etgandi (3:2). Va vengrlar «Joze Alvalade»da ham raqibga jiddiy muammolar tug‘dira oldi. Bu safar ular sakkizinchi daqiqadayoq hisobni ochishdi: Attila Salai Soboslai burchakdan uzatgan to‘pni darvoza to‘riga joylab qo‘ydi. Ammo keyin Krishtianu Ronaldu katta sahnaga chiqdi. Ushbu 40 yoshli futbolchi 22-daqiqada Nelson Semeduning o‘ng qanotdan uzatmasini golga aylantirdi va jahon chempionatlari saralash bosqichlari doirasida eng ko‘p gol urgan (41) futbolchiga aylanib, navbatdagi rekordni o‘rnatdi. Birinchi bo‘limga qshib berilgan daqiqalarda esa Nunu Mendeshning chap qanotdan kross uzatmasiga yetib borib, jamoasini hisobda oldinga olib chiqdi. Endi Ronaldu karerasidagi gollar sonini 948 taga yetkazib oldi.

Portugaliya 90+1-daqiqagacha JCh-2026 yo‘llanmasiga ega bo‘lib turgandi. Ammo mezbonlar so‘nggi daqiqalarda Dominik Soboslaini jarima maydoni ichida yolg‘iz qoldirishdi, u esa portugallarning bayramini keyinga qoldirdi. Endi Vengriya ikkinchi o‘ringa chiqib oldi, Portugaliya esa endi safarda Irlandiyani yengishi talab etiladi. Bu guruhda hali hech narsa aniq emas.

Irlandiya – Armaniston 1:0

Gol: Fergyuson, 70 (1:0)

Irlandiya: Kellexer, Kollinz, O`Shi, O`Brayyen, Molumbi, Smollboun (Teylor, 81), Menning, Koulman (Ogbene, 64), Eyzas, Ebosele (Perrott, 65), Fergyuson (Ida, 81)

Armaniston: Avagyan, Muradyan, Piloyan (Bichaxchyan, 81), Mkrtchan, Oganesyan, Ivu, Tiknizyan (Grigoryan, 72), Spersyan, Shagoyan (Selarrayyan, 46), Barsegyan, Ranos (Miranyan, 71)

Ogohlantirishlar: Koulman, 48. Molumbi, 70. Menning, 78. O`Brayyen, 84

Chetlatish: Barsegyan, 52

Irlandiya terma jamoasi 4-tur oldidan atigi bir ochkoga ega edi. Shu tufayli Armanistonga qarshi o‘yin ular uchun hayot-mamot masalasiga aylandi. Bu o‘yin natijasiga ko‘ra irlandlar yoki JCh-2026 yo‘llanmasi uchun poygada qolar, yoki 99 foizga imkoniyatni yo‘qotardi. O‘yin kutilganidek ancha asabiy kechdi: armanlar sabr bilan va sifatli himoyalandi. Ammo 52-daqiqada mehmonlar sardori Tigran Barsegyan jamoadoshlarini qiyin ahvolga solib qo‘ydi. U Finn Azazga qo‘pollik ishlatib, qizil kartochka oldi va maydonni erta tark etdi. 70-daqiqada esa Evan Fergyuson irlandlarning g‘alaba golini urdi.

Endi Armaniston uchun keyingi turda o‘z uyida Vengriyaga qarshi o‘yin hal qiluvchi ahamiyat kasb etadi. Oxirgi turda esa Portugaliyaga safar kutmoqda.

13 noyabr. Armaniston – Vengriya, Irlandiya – Portugaliya.

16 noyabr. Vengriya – Irlandiya, Portugaliya – Armaniston.

K guruhi

Keynning rekordi va Andorraning mo‘jizaviy goli

Latviya – Angliya 0:5

Gollar: Gordon, 26 (0:1). Keyn, 44 (0:2). Keyn, 45+4 – penalti (0:3). Tonishev, 58 – avtogol (0:4). Eze, 86 (0:5)

Latviya: Zviyedris, Balodis, Veyps, Chernomordiy, Tsiganik, Yurkovskis (Tonishev, 46), Varslavans (Dashkevich, 66), Vapne (Savelev, 73), Ikauniyeks (Grabovskis, 88), Zelenkov, Gutkovskiy (Regja, 73)

Angliya: Pikford, Konsa, Stouns (Bern, 70), Lyuis-Skelli, Spens, Rays (Henderson, 61), Anderson, Rodjyers (Eze, 61), Gordon (Reshford, 70), Saka (Bouen, 61), Keyn

Ogohlantirishlar: Tsiganik, 31. Balodis, 41. Chernomordiy, 45. Regja, 87 – Konsa, 87

Angliya milliy jamoasi kutilganidek jahon chempionati yo‘llanmasini kafolatladi. Buning uchun Tomas Tuxel shogirdlari finishga ikki tur qolganida Latviyani mag‘lub etish kifoya qilardi. Inglizlar safar o‘yinida jiddiy qarshilikka duch kelmadi. Birinchi bo‘limda Entoni Gordon hisobni ochdi, Harri Keyn esa dublni rasmiylashtirib, hisobni yiriklashtirdi, bu ushbu hujumchi uchun Germaniya chempionatiga ketganidan keyin milliy jamoada urilgan 17- va 18-gollar bo‘ldi. Bu esa o‘ziga xos rekord ko‘rsatkich. U o‘tgan asrning 80-yillarida «Barselona» futbolchisi sifatida «Uch sherlar» uchun 17 gol urgan Gari Linekerning rekordini yangiladi.

Tanaffusdan keyin Maksim Tonishev o‘z darvozasini ishg‘ol etib qo‘ydi, 86-daqiqada esa Eberechi Eze yakuniy natijani o‘rnatdi. 5:0 – inglizlar AQSh, Meksika va Kanada mezbonlik qiladigan mundial uchun safar xaltalarini tayyorlashni boshlashi mumkin.

Andorra – Serbiya 1:3

Gollar: Lopes, 17 (1:0). Garsiya, 19 – avtogol (1:1). Vlahovich, 54 (1:2). A. Mitrovich, 77 – penalti (1:3)

Andorra: Alvares, Llovera, Garsiya, Olivera (Garsia, 78), San Nikolas, Borra (Gomes, 84), E. Vales (M. Vales, 63), Babot, Servos, Rodrigo (Rubio, 84), Lopes (Rosas, 63)

Serbiya: Petrovich, Erakovich, Pavlovich (Simich, 84), Velkovich (Milosavlevich, 45+4), Gudel (Maksimovich, 68), S. Mitrovich, Kostich, Stankovich (Ugreshich, 89), Samarjich (Tsvetkovich, 84), A. Mitrovich, Vlahovich

Ogohlantirishlar: Borra, 15. Servos, 21. E. Vales, 24. Garsiya, 76 – Erakovich, 62

O‘tgan turda o‘z uyida Albaniyadan uchralgan alamli mag‘lubiyatdan (0:1) keyin Serbiyaning taqdiri o‘z qo‘lida emas. Qolaversa, serblar bosh murabbiysiz qolgan: Dragan Stoykovich ashaddiy raqibdan uchralgan mag‘lubiyatdan keyin iste’foga chiqdi. Shu tufayli jamoa Andorraga qarshi o‘yinga vaqtincha murabbiy bilan yo‘l oldi. Uchrashuv esa kutilmagan ssenariyda boshlandi. 17-daqiqada mezbonlar hisobni ochishdi – forvard Giyom Lopes deyarli maydon markazidan chiroyli gol urdi.

Ammo bir necha daqiqa o‘tib Kristian Garsiya o‘z jamoasi darvozasini ishg‘ol etib qo‘ydi. Ikkinchi bo‘limda esa Dushan Vlahovich va Aleksandr Mitrovich bittadan gol urishdi. Serbiya qiyinchilik bilan bo‘lsa-da, g‘alabaga erishdi va Albaniya bilan oradagi farqni bir ochkogacha qisqartirdi.

Noyabrda jamoalar guruhdagi ikkinchi o‘rin uchun sirtdan kurash olib borishadi. Serbiya Albaniyani quvib o‘tib, ikkinchi o‘rinni egallash uchun safarda Angliyani yengishi, shu bilan birga, albanlar Andorrada ochko yo‘qotishidan umid qilishi kerak bo‘ladi.

13 noyabr. Andorra – Albaniya, Angliya – Serbiya.

16 noyabr. Albaniya – Angliya, Serbiya – Latviya.

Source link