Eronda ishlab chiqarilgan armatura mahsulotida standart talablariga nomuvofiqlik aniqlandi. 

​Texnik jihatdan tartibga solish sohasida nazorat inspeksiyasining Xorazm viloyati bo‘limi mutaxassislari tomonidan Urganch shahridagi savdo do‘konlarida nazorat xaridi o‘tkazildi.

​Nazorat jarayonida Eron davlatidagi Khorasan Steel Company (KSCCO) tomonidan ishlab chiqarilgan diametri 14 mm bo‘lgan A400 rusumli armatura mahsuloti — (K.S.C. 14 CT) namunalaridan belgilangan tartibda sinovlar olindi.

​O‘tkazilgan laboratoriya sinovlari natijasida mahsulotning standartda belgilangan «kimyoviy tarkibdagi uglerod (C) miqdori» ko‘rsatkichi bo‘yicha talabga javob bermasligi aniqlandi.

​Mazkur holat O‘zbekiston Respublikasining «Standartlashtirish to‘g‘risida»gi Qonuni talablari buzilishiga olib kelishi qayd etildi.

​Aniqlangan qonunbuzilish holatlarini bartaraf etish maqsadida savdo do‘koniga ushbu mahsulotni savdodan chiqarish hamda belgilangan tartibda utilizatsiya qilish bo‘yicha taqdimnoma kiritildi.

Source link

Xitoyga rasmiy tashrif doirasida Toshkent shahar hokimi Shavkat Umurzoqov boshchiligidagi delegatsiya «China Railway Construction Corporation» kompaniyasi rahbariyati bilan muzokara o‘tkazdi.

Uchrashuvda Toshkentni kompleks renovatsiya qilish, shahar infratuzilmasini modernizatsiyalash hamda shaharsozlik va ekologiya sohalariga zamonaviy yechimlarni joriy etish masalalari muhokama qilindi.

Shuningdek, Xitoy kompaniyasiga qurilish va maishiy chiqindilarni qayta ishlashga mo‘ljallangan zamonaviy poligon qurish loyihasida ishtirok etish taklif qilindi.

Muzokaralarda transport infratuzilmasiga ham alohida e’tibor qaratildi. Tomonlar Toshkentda qo‘shimcha pullik avtomobil yo‘llarini qurish, jumladan, taxminan 100 kilometrli halqa pullik yo‘li hamda kelgusida qurilishi rejalashtirilayotgan yangi xalqaro aeroportga olib boruvchi pullik magistral barpo etish istiqbollarini muhokama qildi.

Bundan tashqari, zamonaviy maktablar, bog‘chalar, tibbiyot muassasalari va boshqa ijtimoiy obyektlarni qurish bo‘yicha hamkorlik imkoniyatlari ko‘rib chiqildi.

«China Railway Construction Corporation» vakillari mazkur tashabbuslarni o‘rganishga qiziqish bildirib, Toshkent shahar hokimligi bilan amaliy hamkorlikni kengaytirishga tayyor ekanini ma’lum qildi.

Source link

Onix mashinasini tegishli hujjatlarsiz boshqarib ketayotgan haydovchi to‘xtash ishorasiga bo‘ysunmasdan, YPX xodimi Vahobjon Mo‘minovni katta tezlikda urib ketgan. Og‘ir tan jarohati olgan xodim vafot etgan. Haydovchi Jinoyat kodeksining 3 ta moddasi bo‘yicha aybli deb topildi. Unga 6 yil ozodlikdan mahrum qilish jazosi tayinlandi.

Namanganda YPX xodimini mashinada urib ketib, o‘limiga sabab bo‘lgan 24 yoshli haydovchi jinoiy jazoga tortildi. Bu haqda Hilqat TV telekanali xabar berdi. 

YTH 2025 yil 21 noyabr kuni tungi vaqtda Davlatobod tumanida sodir bo‘lgan. YPX xodimlari tomonidan Onix mashinasiga to‘xtash ishorasi berilgan. Biroq tegishli hujjatga ega bo‘lmagan haydovchi xodimlarga bo‘ysunmasdan qochishga uringan.

Shu vaqtda ratsiya orqali oldinroqda xizmat olib borayotgan katta serjant Vahobjon Mo‘minovga mazkur mashinani to‘xtatish chorasini ko‘rish yuzasidan xabar berilgan. Vahobjon Mo‘minov haydovchiga to‘xtash ishorasini bergan vaqtda haydovchi yuqori tezlik bilan xodimni urib yuborib, unga og‘ir tan jarohati yetkazgan.

Ko‘rilgan tezkor harakatlar natijasida transport vositasining harakati cheklanib, haydovchi qo‘lga olingan. Katta serjant Vahobjon Mo‘minov shifoxonaga olib borilgan vaqtda vafot etgan.

JIB Namangan shahar sudi hukmi bilan sudlanuvchi I.B. Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi, 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘lishiga sabab bo‘lishi) va 117-moddasi 2-qismida (xavf ostida qoldirish odam o‘lishiga sabab bo‘lishi) nazarda tutilgan jinoyatlarni sodir etganlikda aybdor deb topilgan. Unga 3 yil muddatga mashina boshqarish huquqidan mahrum qilgan holda 6 yil ozodlikdan mahrum etish jazosi tayinlangan.

Ikki qiz va bir o‘g‘ilning otasi bo‘lgan 42 yoshli Vahobjon Mo‘minov 2007 yildan ichki ishlar organlarida xizmat qilib kelgan.

Source link

9, 10 va 12 yoshli bolalar O‘zbekistondagi majburiy ta’lim jarayonidan ajratilib, Turkiyaga olib borilgan. Biroq u yerda biror ta’lim muassasasiga joylashtirilmagan. Bolalarning ota-onasi rasman ajrashgani, onasi Rossiyada yashashi aniqlandi.

3 nafar voyaga yetmagan bola Turkiyadan O‘zbekistonga qaytarildi. Bu haqda O‘zbekistonning Istanbuldagi bosh konsulxonasi xabar berdi.

Ma’lum qilinishicha, 9, 10 va 12 yoshli bolalarga ularning buvisi tomonidan muntazam ravishda jismoniy, ruhiy hamda ma’naviy tazyiq o‘tkazib kelingan. Shuningdek, ular O‘zbekistondagi majburiy ta’lim jarayonidan ajratilib, Turkiyaga olib borilgan. Biroq u yerda biror ta’lim muassasasiga joylashtirilmagan.

O‘rganishlar davomida bolalarning ota-onasi rasman ajrashgani, onasi Rossiyada yashashi aniqlangan. 

Holat yuzasidan bolalar Bosh konsulxonaga olib kelinib, ular bilan psixolog ishtirokida suhbat o‘tkazilgan. Shuningdek, O‘zbekistonning tegishli mutasaddi idoralari o‘rtasida ishchi guruh tashkil etilib, voyaga yetmaganlarga vaqtincha vasiy tayinlash, ularni vatanga qaytarish hamda ta’lim jarayoniga qayta jalb etish bo‘yicha zarur choralar ko‘rilgan.

25 may kuni bolalar mas’ul xodim kuzatuvi ostida O‘zbekistonga qaytarilgan. 

Qayd etilishicha, hozirda bolalarni tegishli mutasaddi tashkilotlar tomonidan kutib olish hamda ularning ijtimoiy himoyasi, ta’lim olishi va qonuniy manfaatlarini ta’minlash bo‘yicha zarur ishlar olib borilmoqda.

Avvalroq murakkab vaziyatga tushib qolgan o‘zbekistonlik ayol va uning uch farzandi Rossiyadan olib kelingandi.

Source link

Toshkent shahrida uy-joy oldi-sotdisi bilan bog‘liq firibgarlik holati yuzasidan jinoyat ishi qo‘zg‘atildi. Uy sotib olishni rejalashtirgan fuqaro 20 ming AQSh dollarini oldindan berganidan so‘ng sotuvchi bilan qayta aloqa o‘rnata olmagan.

Ma’lum qilinishicha, 1988 yilda tug‘ilgan fuqaro uzoq vaqtdan buyon uy-joy sotib olish niyatida bo‘lgan. E’lon orqali topilgan xonadonni ko‘zdan kechirib, uy egasi — 1959 yilda tug‘ilgan erkak bilan 55 ming AQSh dollariga kelishgan.

Sotuvchi xaridorni pulning yarmini oldindan berishga ko‘ndirgan. Shu tariqa fuqaro 20 ming AQSh dollarini topshirgan va ikki kundan so‘ng notarius idorasida uchrashishga kelishilgan.

Biroq belgilangan kuni uy egasi uchrashuvga kelmagan. Keyinchalik u turli bahonalar bilan xaridorni bir yildan ortiq vaqt davomida chalg‘itib kelgan.

Mazkur holat yuzasidan Yakkasaroy tumani IIO FMB Tergov bo‘limi tomonidan O‘zbekiston Respublikasi Jinoyat kodeksining 168-moddasi 3-qismi “a” bandi — “Firibgarlik” alomatlari bilan jinoyat ishi qo‘zg‘atilgan. Hozirda tergov harakatlari olib borilmoqda.

Huquqni muhofaza qiluvchi organlar fuqarolarni mol-mulk oldi-sotdisida barcha moliyaviy hisob-kitoblarni notarial rasmiylashtirish orqali amalga oshirishga chaqirmoqda.

Source link