Jamiyat
Qoraqalpog‘istonda «Media haftalik»ning ilk bosqichi yakunlandi (foto)
So‘nggi besh kun mobaynida Qoraqalpog‘iston Respublikasi mamlakatimiz axborot makonining tom ma’nodagi qaynoq markaziga — o‘ziga xos innovatsion «media-xab»ga aylandi. O‘zbekiston bo‘ylab start olgan keng miqyosli «Media haftalik»ning dastlabki bosqichi Orolbo‘yi hududida muvaffaqiyatli nihoyalanmoqda.
Quruq akademik ma’ruzalar formatidan voz kechilib, jonli amaliyot ustiga qurilgan ushbu loyiha boshida kutilganidan ko‘ra ancha keng qamrov oldi. Ishtirokchilar tarkibi turli yo‘nalishlarni o‘zida birlashtirdi: mashg‘ulotlarga 60 dan ortiq axborot xizmati rahbarlari va xodimlari, hududiy va mahalliy telekanallarning 80 dan ziyod vakillari (muxbir, tasvirchi, montajchi, rejissyor, muharrir), bosma va elektron OAVning 50 dan ziyod xodimlari hamda yana shuncha mustaqil blogerlar jalb etildi. Eng katta qismni esa zamonaviy trendlarga intiluvchi 500 nafardan ko‘p mobilograf, SMM mutaxassisi, vayner va kontent yaratishga qiziquvchi yoshlar tashkil etdi. Media haftalik haqida ilk anonslar e’lon qilingach, unda ishtirok etish istagini bildirganlar va jamoaga kelib qo‘shilganlar soni yanada oshdi.
Natijada hududdagi 700 dan ortiq media vakillari bir maqsad yo‘lida, bitta ochiq muloqot maydonida jam bo‘ldi. Bu shunchaki navbatdagi o‘quv kursi emas, balki axborot uzatishning eskicha qoliplaridan voz kechib, voqelikka mutlaqo yangicha nigoh bilan qarashga undovchi haqiqiy tajriba maktabi bo‘ldi.
Mazkur haftalik — milliy mediamiz uchun yangi qon, yangi ovoz, ijodiy turg‘unlikdan uyg‘onish uchun kuchli impuls vazifasini o‘tab berdi. Eng quvonarlisi, mashg‘ulotlarga turli xil qarashlar va bilim darajasi bilan kirib kelgan ishtirokchilar haftalik yakuniga kelib, global tarmoqdagi axborot xurujlariga qarshi tura oladigan, sun’iy intellektdan mohirona foydalanadigan va kreativ kontent yaratishning zamonaviy qurollarini to‘liq o‘zlashtirgan yangi formatdagi professionallarga aylandi.
Endilikda ular axborot oqimini shunchaki passiv kuzatuvchi emas, balki inqirozli vaziyatlarni boshqarish kabi murakkab mexanizmlarni amaliyotda qo‘llay oladigan faol, salohiyatli kadrlar sifatida namoyon bo‘lishadi. Qolaversa, besh kunlik fikr almashuvlar davlat idoralari hamda jurnalistlar, blogerlar o‘rtasidagi ko‘rinmas devorlarni buzib, o‘zaro ishonch va konstruktiv hamkorlikka asoslangan yangi media madaniyatiga mustahkam poydevor yaratdi.
Ishtirokchilar beshta asosiy yo‘nalishga bo‘lingan holda o‘qitildi. Haftalikning intensiv dasturidan media sohasining eng dolzarb masalalari o‘rin oldi.
Xususan:
Bosma va internet nashrlari vakillari uchun tashkil etilgan maxsus sessiyalarda sun’iy intellekt davrida axborot generatsiyasi, raqamli etika qoidalari, feyk xabarlarni aniqlovchi faktcheking vositalari bo‘yicha ko‘nikmalar chuqur o‘rgatildi. Shuningdek, korrupsiyaga qarshi kurash mavzularini yoritish amaliyoti tahlil qilinib, bunda xolislikni saqlagan holda ishonchli manbalar bilan ishlashning yangicha usullariga alohida urg‘u berildi. Bundan tashqari, katta hajmdagi murakkab statistika va raqamlarni o‘quvchiga tushunarli, jozibador shaklda yetkazish, ma’lumotlarni vizuallashtirish bo‘yicha mashg‘ulotlar o‘tkazildi.
Televideniye ijodkorlari — muxbir, tasvirchi va montaj ustalarini qamrab olgan darslarda siyosiy va iqtisodiy islohotlarni inson taqdiri va kreativ rakurslar orqali tomoshabinni jalb qiluvchi qiziqarli reportajlar formatida yoritish masalalariga e’tibor qaratildi. Ta’sirchan hujjatli filmlar yaratish konsepsiyasi, bu jarayonda ishonchli manbalar bilan ishlash va mualliflik mas’uliyati tahlil qilindi. Texnik mutaxassislar esa amaliy mashqlar davomida «Ronin» uskunasi yordamida kadr balansini saqlash va mikro-silkinishlarni yo‘qotish usullarini, shuningdek, zamonaviy ko‘rsatuv ritmini shakllantiruvchi ilg‘or montaj sirlarini o‘zlashtirdi.
Davlat organlari va tashkilotlarning axborot xizmati rahbarlari esa strategik kommunikatsiya, antikrizis vaziyatlarda reputatsiyani tiklash, bayonot va raddiya berish qoidalari, ochiqlik indeksi va KPI bo‘yicha bilimlarini mustahkamladi. Matbuot kotiblari uchun o‘tkazilgan maxsus master-klasslarda neyrotarmoqlar yordamida sifatli matnlar yozish, kreativ g‘oyalarni shakllantirish, qisqa fursatda video va media-dizayn mahsulotlarini yaratish amaliyotda ko‘rsatib berildi.
SMM mutaxassislari va blogerlar mashg‘ulotlarda auditoriya e’tiborini soniyalar ichida jalb qiladigan kreativ mobil reportajlar tayyorlash va vizual storitelling (voqeani tasvirlar orqali ta’sirchan hikoya qilish) san’atining eng so‘nggi trendlari bo‘yicha o‘z bilimlarini oshirdi. Ishtirokchilar ijtimoiy tarmoqlarning murakkab algoritmlari bilan ishlash, kontent qamrovini organik tarzda oshirib, uni «tavsiyalar» bo‘limiga olib chiqishning sinalgan usullari bilan yaqindan tanishdi. Shuningdek, sahifalarni yuritishda brend imijini to‘g‘ri shakllantirish, maqsadli SMM-strategiya ishlab chiqish hamda foydalanuvchilar bilan interaktiv muloqot o‘rnatish orqali jamoatchilik ishonchini qozonish ko‘nikmalariga ega bo‘lishdi.
Ushbu saboqlarning eng muhim ahamiyati, avvalo, loyihaga jalb etilgan spikerlarning o‘ta kuchli, salkam «yulduzli» tarkibi bilan izohlanadi. Mashg‘ulotlar faqat nazariyotchilar emas, balki bugungi kunda respublika media maydonining ob-havosini belgilab berayotgan amaliyotchi ekspertlar tomonidan olib borildi. Xususan, Beruniy Alimov va Nozima Toshpo‘latova kabi yetuk media-ekspertlar, Prezident faoliyatini yorituvchi tajribali jurnalist Jahongir Olimov, O‘zbekiston Milliy axborot agentligi vakili Ikrom Avvalboyev, O‘zbekiston milliy teleradiokompaniyasidan Ulug‘bek Rahmonqulov, mashhur teleprodyusser Baxtiyor To‘raxonov, mualliflik bloglarini yurituvchi tarmoq faoli Muhrim A’zamxo‘jayev kabi taniqli nomlar darslarning salmog‘ini oshirdi.
Shuningdek, raqamli kontent ustalari — millionlab kuzatuvchilarga ega bloger va vaynerlar Bobur Mansurov, Mavluda Hikmatova, Gulruh Pirnazarova hamda media sohasining boshqa ko‘plab professional namoyandalari auditoriya bilan o‘zlarining eng sara bilimlarini bo‘lishishdi. Jonli va interfaol tarzda, SWOT-tahlillar hamda pre-test/post-testlar orqali o‘tkazilgan ushbu darslarda ishtirokchilar o‘z xatolarini bevosita mana shu mutaxassislar bilan birgalikda tahlil qilib, to‘g‘ri, ta’sirchan va zamonaviy kontent yaratishning real formulalarini o‘zlashtirdilar.
Haftalik doirasida Davlat rahbari tashabbusi bilan ilgari surilgan 10 000 nafar SMM mutaxassisini tayyorlash loyihasining borishiga ham alohida e’tibor qaratildi. Aloqabank, Kontent markazi va Yoshlar ishlari agentligi hamkorligidagi mazkur bepul kurslarga bugungi kunga kelib 7 mingdan ortiq, jumladan, Qoraqalpog‘iston Respublikasida 500 dan ziyod yoshlar qamrab olindi. Hozirda kurslarni muvaffaqiyatli tamomlaganlar soni 2000 nafardan oshdi. Ahamiyatlisi, bitiruvchilarga o‘z kasblari ortidan barqaror daromad topishlari uchun bank tomonidan maxsus imtiyozli kreditlar taqdim etilmoqda va ko‘plab yoshlar allaqachon yuqori daromad chegarasiga chiqishga ulgurdi. Haftalik mobaynida Aloqabank va Kontent markazi vakillari tomonidan kurs bitiruvchilariga sertifikat hamda plastik kartalar topshirildi.
Shuningdek, Yoshlar ishlari agentligi va Kontent markazi tashabbusi bilan mamlakat bo‘ylab 1000 nafar, xususan, Qoraqalpog‘iston Respublikasida 175 nafar yigit-qiz mobilografiya yo‘nalishida bepul o‘qitilgan bo‘lib, hududdagi ushbu yosh ijodkorlar ham media haftalikka jalb etildi. Hozirga kelib, mazkur bitiruvchilarning 68 nafari o‘z mutaxassisligi ortidan mustaqil daromad manbaiga ega bo‘ldi, yana 23 nafari sinov muddati bilan turli tashkilotlarga ishga qabul qilindi.
Haftalik doirasida axborot sohasi vakillari kundalik faoliyatida asqotadigan ikkita yangi risolaning taqdimoti ham bo‘lib o‘tdi. «Davlat organlari va OAV hamda bloger o‘rtasidagi munosabatlarni tartibga solishning huquqiy asoslari» qo‘llanmasi davlat idoralari va media vakillari o‘rtasidagi axborot almashinuvini qonuniy, shaffof va etik normalar asosida tashkil etishga xizmat qiluvchi muhim metodik manba sifatida taqdim etildi. Unda axborot olish kafolatlaridan tortib, jurnalist faoliyatiga to‘sqinlik qilganlik uchun javobgarlik masalalarigacha tizimli yoritilgan.
«Davlat idoralarining ijtimoiy tarmoqlardagi rasmiy sahifalarini verifikatsiya qilish bo‘yicha yo‘riqnoma» deb nomlangan kitobchada esa Facebook, Instagram, Telegram, YouTube va X kabi tarmoqlarda rasmiy (verifikatsiya) belgisini olishning texnik va huquqiy algoritmlari qadam-baqadam tushuntirilgan. Yo‘riqnoma dezinformatsiya va feyk xabarlarga qarshi kurashish hamda raqamli makonda davlat organlari resurslarining ishonchliligini ta’minlashda muhim vosita vazifasini o‘taydi.
Qoraqalpog‘istondagi haftalik hududdagi media vakillarini jamlagan yirik Media forum va sertifikatlar topshirish marosimi bilan yakunlanmoqda.
Navbatdagi bosqich joriy yilning 6–10-aprel kunlari Xorazm viloyatida o‘tkazilishi rejalashtirilgan. Loyihada ishtirok etish istagida bo‘lgan nomzodlar Yoshlar ishlari agentligining hududiy boshqarmalariga murojaat qilishlari mumkin.
O‘zbekistonda tuman va shahar hokimlarini saylash tizimini joriy etish masalasi kun tartibiga chiqdi.
Bu haqda Prezident farmoni loyihasi bilan tasdiqlanishi rejalashtirilayotgan «Davlat boshqaruvini 2030 yilgacha nomarkazlashtirish strategiyasi»da so‘z boradi.
Hujjat loyihasiga ko‘ra, kelgusi yillarda davlat boshqaruvidagi vakolatlarni markazdan hududlarga o‘tkazish, mahalliy rahbarlarning mas’uliyati va mustaqilligini oshirishga qaratilgan keng qamrovli islohotlar amalga oshiriladi. Shu doirada tuman va shahar hokimlarini saylash mexanizmini to‘liq ishlab chiqish vazifasi ham belgilangan.
Hozirda O‘zbekistonda tuman va shahar hokimlari yuqori turuvchi hokimlar tavsiyasi asosida Prezident tomonidan tayinlanadi. Yangi strategiya esa mahalliy boshqaruv tizimida aholi ishtirokini kuchaytirish va hudud rahbarlarining xalq oldidagi hisobdorligini oshirishga qaratilgan navbatdagi qadam sifatida baholanmoqda.
Loyihada, shuningdek, respublika darajasidagi 250 ta funksiya va vakolatni hududlarga o‘tkazish, mahalliy budjetlar mustaqilligini kengaytirish hamda davlat boshqaruvida jamoatchilik ishtirokini oshirish vazifalari ham nazarda tutilgan.
Hujjat hozircha jamoatchilik muhokamasi uchun e’lon qilingan bo‘lib, taklif va mulohazalar asosida takomillashtirilishi mumkin.
Prezident investorlar uchun yangi huquqiy kafolatlarni e’lon qildi. Toshkent dunyoning eng tez o‘zgarayotgan shaharlari qatoriga kirdi. 10 yoshdan katta aholining qariyb barchasi mobil telefon ishlatishi ma’lum bo‘ldi. Andijonda 160 ming dollarlik yer savdosi bilan bog‘liq firibgarlik fosh etildi. Muddati o‘tgan mahsulotlarni sotganlik uchun jarimalar oshirilishi mumkin. Kunning muhim yangiliklari bilan tanishtiramiz.
Prezident investorlar uchun yangi huquqiy kafolatlarni e’lon qildi
O‘zbekistonda investorlar huquqlarini himoya qilish va xalqaro moliyaviy xizmatlar bozorini rivojlantirish maqsadida Toshkent xalqaro moliya markazi tashkil etiladi. Uning ishtirokchilari uchun maxsus huquqiy rejim hamda 50 yillik soliq imtiyozlari joriy qilinishi rejalashtirilmoqda. Bu haqda prezident Shavkat Mirziyoyev beshinchi Toshkent xalqaro investitsiya forumining yalpi majlisida ma’lum qildi.
Ta’kidlanishicha, markaz ishtirokchilari uchun jozibador soliq tizimi yaratiladi. Xususan, foyda solig‘i, qo‘shilgan qiymat solig‘i, mol-mulk solig‘i hamda bojxona bojlari nol foiz etib belgilanadi. Shuningdek, kapitalning erkin harakati va istalgan valutada hisob-kitob qilish imkoniyati kafolatlanadi.
Markaz hududida moliyaviy texnologiyalar, raqamli aktivlar va «yashil» moliyani rivojlantirish uchun zamonaviy infratuzilma shakllantiriladi. Bundan tashqari, normativ hujjatlar qabul qilish vakolatiga ega mustaqil moliyaviy regulyator tashkil etiladi.
Toshkent dunyoning eng tez o‘zgarayotgan shaharlari qatoriga kirdi
Xalqaro konsalting kompaniyasi Boston Consulting Group (BCG) tomonidan o‘tkazilgan tadqiqotda Toshkent dunyoning eng tez o‘zgarayotgan shaharlari qatorida qayd etildi. Poytaxt “o‘zgarish sur’ati” ko‘rsatkichi bo‘yicha jahonning bir qator yirik shaharlarini ortda qoldirib, yuqori o‘rinlardan birini egallagan.
BCG tomonidan tayyorlangan tadqiqotda dunyoning turli shaharlari iqtisodiy imkoniyatlar, yashash sifati, ijtimoiy kapital, davlat boshqaruvi bilan o‘zaro munosabatlar hamda o‘zgarishlarga moslashish sur’ati kabi mezonlar asosida baholangan.
Tahlil natijalariga ko‘ra, Toshkent “o‘zgarish sur’ati” yo‘nalishida Xitoyning Shenchjyen shahri va Saudiya Arabistoni poytaxti Ar-Riyoddan keyingi pog‘onani egallagan. Tadqiqot mualliflari Toshkentning yuqori natijalarini avvalo iqtisodiy faollikning o‘sishi, yangi imkoniyatlarning paydo bo‘lishi hamda davlat xizmatlarining raqamlashtirilishi bilan izohlagan. Shuningdek, aholi va davlat idoralari o‘rtasidagi muloqot mexanizmlarining takomillashib borayotgani ham muhim omil sifatida qayd etilgan.
10 yoshdan katta aholining qariyb barchasi mobil telefon ishlatishi ma’lum bo‘ldi
O‘zbekistonda mobil aloqa vositalaridan foydalanish darajasi rekord ko‘rsatkichga yetdi. Milliy statistika qo‘mitasi ma’lumotlariga ko‘ra, 2025 yilda 10 yosh va undan katta aholining 99,3 foizi mobil telefondan foydalangan.
Qayd etilishicha, mamlakatda raqamli texnologiyalardan foydalanish imkoniyatlarining kengayishi, mobil aloqa xizmatlari qamrovining ortishi hamda internet infratuzilmasining rivojlanishi aholi orasida mobil telefonlar ommalashuviga xizmat qilgan.
Mutaxassislar fikricha, mobil telefonlar nafaqat aloqa vositasi, balki davlat xizmatlari, elektron to‘lovlar, onlayn ta’lim, elektron tijorat va turli raqamli platformalardan foydalanishning asosiy vositasiga aylanib bormoqda.
Andijonda 160 ming dollarlik yer savdosi bilan bog‘liq firibgarlik fosh etildi
Andijon viloyatida davlat zaxirasidagi yer maydonini rasmiylashtirib berishni va’da qilib, katta miqdorda pul talab qilgan shaxs huquqni muhofaza qiluvchi organlar tomonidan qo‘lga olindi.
Tergovga qadar tekshiruv materiallariga ko‘ra, fuqaro Z.Yu. boshqa bir fuqaroning ishonchiga kirib, o‘zini go‘yoki Andijon viloyati Statistika boshqarmasi xodimi sifatida tanishtirgan. U Andijon tumanidagi Yo‘ldosh Oxunboboyev massivida joylashgan davlat zaxirasi yer maydoni auksion orqali uning farzandi nomiga rasmiylashtirilgani haqida yolg‘on ma’lumot bergan. Shundan so‘ng mazkur 40 sotix yer maydonining hujjatlarini kelgusida xaridor nomiga rasmiylashtirib berishni va’da qilib, bu xizmat uchun 160 ming AQSh dollari talab qilgan.
Tezkor tadbir davomida u 80 ming AQSh dollarini olayotgan vaqtda ashyoviy dalillar bilan ushlangan. Holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan.
Muddati o‘tgan mahsulotlarni sotganlik uchun jarimalar oshirilishi mumkin
Yaroqlilik muddati o‘tgan yoki belgilangan tartibda ishlab chiqarilgan sanasi va yaroqlilik muddati ko‘rsatilmagan oziq-ovqat mahsulotlarini sotganlik uchun javobgarlikni kuchaytirish rejalashtirilmoqda. Bu bo‘yicha qonun loyihasi Qonunchilik palatasida birinchi o‘qishda qabul qilindi.
Hujjat bilan «Ma’muriy javobgarlik to‘g‘risida»gi kodeksning 178-moddasiga tegishli o‘zgartirishlar kiritish taklif etilmoqda. Loyihaga ko‘ra, yaroqlilik muddati o‘tgan mahsulotlarni, shuningdek, ishlab chiqarilgan sanasi va yaroqlilik muddati ko‘rsatilishi majburiy bo‘lgan oziq-ovqat mahsulotlarini ushbu ma’lumotlarsiz realizatsiya qilish yoki sotish maqsadida qabul qilganlik uchun belgilangan jarimalar miqdori oshiriladi.
Ta’kidlanishicha, mazkur tashabbus iste’molchilar huquqlarini himoya qilish, bozorlarda mahsulotlar sifati ustidan nazoratni kuchaytirish hamda aholi salomatligiga xavf tug‘dirishi mumkin bo‘lgan holatlarning oldini olishga xizmat qiladi.
2026 yilning dastlabki to‘rt oyida o‘qish maqsadida xorijga chiqqan O‘zbekiston fuqarolari soni o‘tgan yilning mos davriga nisbatan sezilarli darajada qisqardi. Shu bilan birga, Qirg‘iziston, Rossiya va Janubiy Koreya o‘zbekistonliklar uchun eng ommabop ta’lim yo‘nalishlari bo‘lib qolmoqda.
Foto: Fotolia / WavebreakmediaMicro
Milliy statistika qo‘mitasi ma’lumotlariga ko‘ra, joriy yilning yanvar–aprel oylarida 7 355 nafar O‘zbekiston fuqarosi ta’lim olish maqsadida chet elga safar qilgan. Bu ko‘rsatkich 2025 yilning shu davriga nisbatan 2,6 ming nafarga yoki 26,2 foizga kamaygan.
Tahlillarga ko‘ra, mazkur davrda o‘zbekistonliklar o‘qish uchun eng ko‘p tanlagan davlat Qirg‘iz Respublikasi bo‘lgan. U yerga ta’lim maqsadida 1 519 nafar fuqaro yo‘l olgan. Rossiya ikkinchi o‘rinni egallab, ushbu mamlakatga 1 515 nafar o‘zbekistonlik o‘qish uchun borgan.
Reytingning keyingi pog‘onalaridan Janubiy Koreya, Turkiya va Tojikiston joy olgan. Xususan, Koreya Respublikasiga 1 184 nafar, Turkiyaga 554 nafar, Tojikistonga esa 514 nafar fuqaro ta’lim maqsadida safar qilgan.
Shuningdek, Xitoyga 472 nafar, Buyuk Britaniyaga 413 nafar o‘zbekistonlik o‘qish uchun chiqqan. Boshqa davlatlarga ta’lim maqsadida safar qilganlar soni esa 1 184 nafarni tashkil etgan.
Mutaxassislar fikricha, ta’lim migratsiyasidagi o‘zgarishlarga xorijiy universitetlar qabul siyosati, ta’lim xarajatlari, stipendiya dasturlari hamda mehnat bozoridagi tendensiyalar ta’sir ko‘rsatishi mumkin.
Statistik ma’lumotlardan ko‘rinishicha, xorijda ta’lim olishga qiziqish saqlanib qolayotgan bo‘lsa-da, joriy yilning dastlabki oylarida chet elda o‘qish uchun safar qiluvchilar soni o‘tgan yilga nisbatan kamaygan.
O‘zbekistonda o‘zboshimchalik bilan egallangan yer uchastkalari hamda ularda barpo etilgan uy-joy va boshqa obektlarga bo‘lgan huquqlarni e’tirof etish tartibini takomillashtirishga qaratilgan qonun qabul qilindi. Hujjat mazkur sohadagi huquqiy mexanizmlarni soddalashtirish va fuqarolarning mulkiy huquqlarini himoya qilishni kuchaytirishni nazarda tutadi.
Qonun bilan bir qator me’yoriy-huquqiy hujjatlarga o‘zgartish va qo‘shimchalar kiritildi. Unda o‘zboshimchalik bilan egallangan yer uchastkalari hamda ularda qurilgan binolar va inshootlarga bo‘lgan huquqlarni e’tirof etish bilan bog‘liq amaldagi tartib-taomillarni yanada takomillashtirish maqsad qilingan.
Xususan, huquqlarni e’tirof etish jarayonlaridagi ayrim byurokratik talablar qisqartirilib, vakolatli tashkilotlarning mas’uliyati aniqlashtirildi. Shuningdek, fuqarolar tomonidan taqdim etiladigan hujjatlarni ko‘rib chiqish va qaror qabul qilish jarayonlarini soddalashtirishga qaratilgan normalar ham kiritilgan.
Qonunga muvofiq, ayrim holatlarda yer uchastkalari va uy-joylarga bo‘lgan huquqlarni rasmiylashtirishda avtomatlashtirilgan axborot tizimlaridan kengroq foydalanish, davlat organlari o‘rtasidagi ma’lumot almashinuvini kuchaytirish hamda arizachilar uchun ortiqcha ovoragarchiliklarni bartaraf etish choralari belgilanmoqda.
Ta’kidlanishicha, yangi o‘zgartishlar fuqarolarning ko‘chmas mulkka bo‘lgan huquqlarini qonuniy jihatdan mustahkamlash, bahsli holatlarni kamaytirish va mulkni davlat ro‘yxatidan o‘tkazish jarayonlarining ochiqligi hamda samaradorligini oshirishga xizmat qiladi.
Mutasaddilar fikricha, qabul qilingan qonun aholining uy-joy va yer munosabatlari sohasidagi huquqiy kafolatlarini yanada kuchaytirish bilan birga, ko‘chmas mulk sohasidagi huquqiy munosabatlarni tartibga solishning zamonaviy mexanizmlarini joriy etishga zamin yaratadi.
O‘zbekistonda yaroqlilik muddati o‘tgan yoki belgilangan tartibda ishlab chiqarilgan sanasi va yaroqlilik muddati ko‘rsatilmagan oziq-ovqat mahsulotlarini sotganlik uchun javobgarlikni kuchaytirish rejalashtirilmoqda. Bu bo‘yicha qonun loyihasi Qonunchilik palatasida birinchi o‘qishda qabul qilindi.
Qonunchilik palatasining navbatdagi majlisida aholi salomatligi va hayotini muhofaza qilishga qaratilgan qonun loyihasi muhokama qilindi. Hujjat bilan «Ma’muriy javobgarlik to‘g‘risida»gi kodeksning 178-moddasiga tegishli o‘zgartirishlar kiritish taklif etilmoqda.
Loyihaga ko‘ra, yaroqlilik muddati o‘tgan mahsulotlarni, shuningdek, ishlab chiqarilgan sanasi va yaroqlilik muddati ko‘rsatilishi majburiy bo‘lgan oziq-ovqat mahsulotlarini ushbu ma’lumotlarsiz realizatsiya qilish yoki sotish maqsadida qabul qilganlik uchun belgilangan jarimalar miqdori oshiriladi.
Ta’kidlanishicha, mazkur tashabbus iste’molchilar huquqlarini himoya qilish, bozorlarda mahsulotlar sifati ustidan nazoratni kuchaytirish hamda aholi salomatligiga xavf tug‘dirishi mumkin bo‘lgan holatlarning oldini olishga xizmat qiladi.
Muhokamalar davomida deputatlar qonun loyihasining dolzarbligi va amaliy ahamiyatiga alohida to‘xtalib, ayrim normalar yuzasidan qonun tashabbuskorlariga savollar berdi. Shuningdek, hujjatni yanada takomillashtirish bo‘yicha taklif va tavsiyalar ham bildirildi.
Bahs-munozaralardan so‘ng qonun loyihasi Qonunchilik palatasi deputatlari tomonidan birinchi o‘qishda qabul qilindi.
O‘zbekistonda ham hokimlar xalq tomonidan saylanishi mumkin
Investorlar uchun yangi kafolatlar va aholidagi mobil telefonlar miqdori
O‘zbekiston va Ronaldu boshlamoqda – JCh kundaligi
-
Siyosat2 days ago
«Ushbu masalani shaxsan nazoratimga oldim» — Saida Mirziyoyeva giyohvandlikka qarshi kurash haqida
-
Jamiyat3 days agoFarg‘onada “Lasetti” qarama-qarshi yo‘nalishga chiqib ketishi oqibatida ikki kishi halok bo‘ldi
-
Mahalliy3 days ago
my.gov.uz — 35 yilda odamlarning vaqtini qaytarib berdi!
-
Iqtisodiyot3 days ago
O‘zbekiston qaysi davlatlarga gilam eksport qilmoqda?
-
Jamiyat4 days ago16−18 iyun kunlari Toshkent shahriga yuk mashinalari kiritilmaydi
-
Sport2 days agoEron Amerikaga bordi, Osiyo Yevropaning ta’zirini berayotir – JCh kundaligi
-
Sport4 days agoJCh-2026. Osiyoning ikki jamoasi Yevropa vakillariga qarshi maydonga tushadi
-
Mahalliy3 days ago
Quyoshda turgan suvning ta’mi emas, tarkibi o‘zgaradi… bu esa juda xavfli