Jamiyat
Qashqadaryodagi dahshatli avtobus halokati, 26 qurbon va 2 ming so‘m “pora” – sudlangan IIB xodimi 16 yildan so‘ng oqlandi
2009 yil 1 maydan 2 mayga o‘tar kechasi “Ko‘kdala-Chimg‘uzor” avtomobil yo‘lida mudhish YTH sodir bo‘lgan: 51 nafar yo‘lovchi olib ketayotgan avtobus yo‘l chetida turgan ekskavatorga katta tezlikda borib uriladi va uning 26 yo‘lovchisi halok bo‘ladi. Mustaqil O‘zbekiston tarixidagi eng yirik avtohalokatlardan biri sifatida eslanadigan ushbu hodisadan keyin o‘sha tunda “Umakay” YPX maskanida xizmat olib borgan kinolog ham javobgarlikka tortiladi.
Dahshatli YTH va 26 qurbon
2009 yil 1 may. Ish va turli tashvishlar bilan poytaxtga kelib, ortga qaytayotgan surxondaryoliklar hamda biror yumush bilan ushbu viloyatga borayotganlar yo‘lovchi sifatida Mersedes-Bens avtobusiga o‘tirishadi. 51 nafar yo‘lovchi mingach, avtobus Toshkent shahridan Qashqadaryo viloyatiga qarab yo‘l oladi. Albatta, yo‘lovchilar oldinda ularni ayanchli avtohalokat kutayotganini bilishmasdi.
Haydovchi avtobusni shamolday yeldirib borar, yo‘lovchilar tun bo‘lgani uchun bamaylixotir uxlab ketishardi. Soat 00:17 da “Umakay” YPX maskaniga yetib boriladi. U davrda har bir viloyat, ayrim hududlarda hatto har bir tuman chegarasida YPX maskanlari bo‘lgan. “Umakay” maskanidan o‘tgan avtobus yo‘lini davom etadi. Bu paytda yomg‘ir ham yog‘ayotgan, yo‘lni ko‘rish masofasi biroz cheklangandi. Qamashi tumanida, “Ko‘kdala-Chimg‘uzor” avtomobil yo‘lining 42-kilometriga yetganda avtobus yo‘l chetida turgan ekskavatorga katta tezlikda borib uriladi. Oqibatda 51 nafar yo‘lovchining 26 nafari halok bo‘ladi. 20 nafardan ortiq yo‘lovchi turli darajada tan jarohati oladi.
Ushbu yirik YTH mahalliy nashrlarda yoritilmagan. Jamoatchilik bu haqda xorij OAV orqali xabar topgan.
“Aybdor” kinolog
Mersedes-Bens avtobusi “Umakay” YPX maskanidan o‘tganida “post”da o‘sha vaqtda Qashqadaryo viloyati IIB YHXB kinologiya guruhida inspektor kinolog vazifasida ishlagan Akrom Turdiyev xizmat vazifasini o‘tayotgandi. Avtobus YTHga uchragach unga nisbatan ham jinoyat ishi qo‘zg‘atiladi va kinolog 2009 yil 14 may kuni qamoqqa olinadi.
Akrom Turdiyev pora olish va mansab soxtakorligi jinoyatlarida ayblanadi. JIB Chiroqchi tuman sudining 2009 yil 13 iyuldagi hukmi bilan unga 1 yil mansabdorlik va moddiy javobgarlik vazifalarida ishlash huquqidan mahrum qilib, ish haqining 30 foizini davlat daromadi hisobiga ushlab qolgan holda 2 yil axloq tuzatish ishlari jazosi tayinlangan.
O‘sha davrda viloyatlar chegarasidagi YPX maskanlarida pasport rejimi amalda bo‘lgan. Ya’ni bir viloyatdan ikkinchi viloyat hududida o‘tayotgan avtobuslar tekshirilib, hatto yo‘lovchilarning fuqarolik pasporti ko‘zdan kechirilgan.
Sudning hukmida Akrom Turdiyev ana shu ishni bajarmaslik uchun YTHga uchragan avtobus haydovchisidan 2 ming so‘m pora olgani keltirilgan. “Akrom Turdiyev masabdor shaxs bo‘lgan holda 2009 yil 1 maydan 2 mayga o‘tar kechasi soat 00:17 da o‘tgan Mersedes-Bens rusumli avtobusni to‘xtatib, o‘z xizmat mavqeidan foydalangan holda avtobus ish boshqaruvchisidan haydovchilarning hujjatlarini, ularning belgilangan tartib qoidalarga rioya qilib, avtobusni boshqarib kelayotganligini hamda avtobus bagaji va yo‘lovchilarning hujjatlarini tekshirib, ularni ovora qilgan holda YPX maskanida ushlab turmaslik evaziga 2000 so‘mni pora tariqasida olgan”, deyiladi sud hujjatida.
Shuningdek, hukmda Akrom Turdiyev 2000 so‘m pora evaziga avtobusni “Umakay” YPX maskanidan maxsus daftarga qayd qilmasdan o‘tkazib yuborgani, so‘ngra transport vositasi YTHga uchraganini eshitib, daftarga haydovchilar nomidan soxtalashtirgan holda o‘zi imzo qo‘ygani aytiladi.
“Mening vakolatim bo‘lmagan”
Oradan 16 yil o‘tib, kinolog mazkur jinoyat ishi bo‘yicha kassatsiya tartibida shikoyat kiritdi. U o‘z shikoyatida o‘sha holatda aybi bo‘lmaganini aytib, suddan oqlov hukmi chiqarishni so‘ragan.
“Menga portlovchi moddalar va giyohvandlik vositalarini topuvchi ikkita it xizmat yuzasidan biriktirilgandi. “Umakay” YPX maskanida xizmat olib borgan vaqtimda menda haydovchilarni to‘xtatib, ularga ma’muriy bayonnoma rasmiylashtirish va jarima qo‘llash vakolati bo‘lmagan. Haqiqatan 2009 yil 1 maydan 2 mayga o‘tar kechasi “Umakay” YPX maskanidan Mersedes-Bens rusumli avtobus o‘tdi. Vakolatimga kirmasa-da, avtobus haydovchisiga yo‘lda ogoh bo‘lishi uchun viloyat IIB tomonidan ishlab chiqilgan, haydovchilarni yo‘lda sergaklikka undovchi broshyurani berganman. Tergov organi tomonidan menga noto‘g‘ri ayb e’lon qilingan: hech kimdan pora olmaganman va biror rasmiy hujjatni soxtalashtirmaganman. Ushbu avtobus yo‘l-transport hodisasiga uchraganidan so‘ng meni ishdan bo‘shatishdi”, degan Akrom Turdiyev suddagi ko‘rsatmasida.
“Pora bermaganman”
Jinoyat ishidagi jabrlanuvchi ham kinologga pora bermaganini, shifoxonada yotgan vaqtida huquqni muhofaza qiluvchi organ xodimlari kelib, 2000 ming so‘m bergani haqida yozdirib olishganini ma’lum qilgan.
“Mersedes-Bens avtobusi otamga tegishli bo‘lgan. Shu sababli haydovchilar bilan birgalikda “Surxondaryo-Toshkent” yo‘nalishida odam tashish faoliyati bilan shug‘ullanib kelganman. 2009 yil 1 maydan 2 mayga o‘tar kechasi Toshkent shahridan Surxondaryo viloyatiga qaytishda Qamashi tumani hududida avtobus yo‘l chetida turgan ekskavator bilan to‘qnashdi. O‘sha kuni “Umakay” YPX maskanidan o‘tgan vaqtimizda inspektorga 2000 so‘m pul bermaganman. Yo‘l-transport hodisasi oqibatida jarohat olib, shifoxonada yotgan vaqtim huquqni muhofaza qiluvchi organ xodimlari kelishdi va mendan 2000 so‘m pulni inspektorga berganim haqida ariza yozdirib ketishdi. O‘zim biror idoraga ariza bilan murojaat qilmaganman”, degan u ko‘rsatmasida.
Shuningdek, jabrlanuvchi avtobusning barcha hujjatlari joyida bo‘lganini, inspektorga pul berishiga biror sabab bo‘lmaganini bildirgan.
16 yildan so‘ng oqlov
Jinoyat ishi yaqinda kassatsiya tartibida ko‘rib chiqildi.
Kassatsiya instansiyasi hukmida keltirilishicha, pora olish mansabdor shaxsning o‘z xizmat mavqeidan foydalangan holda sodir etishi lozim yoki mumkin bo‘lgan muayyan harakatni pora berayotgan shaxsning manfaatlarini ko‘zlab bajarishi yoki bajarmasligi evaziga shaxsan o‘zi yoki vositachi orqali qonunga xilof ekanligini bila turib, moddiy qimmatliklar olishi yoxud mulkiy naf ko‘rishida ifodalanadi. Arizachining ko‘rsatmasi, shaxsning aybiga iqrorlik ko‘rsatmalari bilan tasdiqlangan holatlar ham boshqa obektiv dalillar aniqlanmagan taqdirda ayblash uchun yetarli asos bo‘la olmaydi.
Biroq Akrom Turdiyevni pora olish jinoyati sodir etganlikda ayblash uchun faqatgina jabrlanuvchining ko‘rsatuvi asos qilib olingan. Bu boshqa obektiv dalillar bilan asoslantirilmagan, tezkor tadbir o‘tkazish choralari ko‘rilmagan, pul pora predmeti sifatida ashyoviy dalil tariqasida olinmagan, ish bo‘yicha maqbul dalil to‘planmagan. Jabrlanuvchi YPX maskanidan o‘tish davomida inspektorga 2000 so‘m berib ketgani uni pora olganlikda ayblash uchun yetarli dalil emas, chunki inspektor pora olishi jarayonida ushlanmagan, aynan pora olish fakti bilan bog‘liq telefon so‘zlashuvlarini amalga oshirmagan. Shu asoslar bilan sud Akrom Turdiyevning pora olishda ifodalangan aybini tasdiqlovchi ishonchli dalillar mavjud emas hamda ayni vaqtda bunday dalillarni to‘plash imkoniyati ham yo‘qolgan degan xulosaga kelgan.
Mansab soxtakorligi aybi bo‘yicha esa sud YPX maskanidan o‘tadigan avtobus va mikroavtobuslarni tekshirib, ogohlantirilganini qayd qilish daftari rasmiy hujjat hisoblanmaydi va biron bir huquqiy ahamiyat kasb etmaydi, degan to‘xtamga kelgan. Qolaversa, ushbu daftarda haydovchilarning imzolari Akrom Turdiyev yoki boshqa shaxs tomonidan qo‘yilgani haqida sud-xatshunoslik ekspertizasi o‘tkazilmagan. Shu sababli kassatsiya sudi tergov organi va birinchi instansiya sudi tomonidan Akrom Turdiyevga nisbatan bu borada ham gumon va taxminlarga asoslangan holda ayb e’lon qilingan, degan xulosaga kelgan.
Qashqadaryo viloyati sudi jinoyat ishlari bo‘yicha sudlov hay’ati kassatsiya instansiyasining 2025 yil 18 dekabrdagi hukmi bilan dastlabki sud hukmi bekor qilindi. Akrom Turdiyevning qilmishida jinoyat tarkibi bo‘lmagani sababli u aybsiz deb topildi va oqlandi. Jinoyat ishi harakatdan tugatildi.
Shu tariqa, sudlangan paytida 34 yoshda bo‘lgan kinolog oradan 16 yil o‘tib, 50 yoshida oqlandi.
Ruslan Saburov,
Kun.uz
Energiya resurslaridan noqonuniy foydalanish holatlari fosh etildi.
Bosh prokuratura huzuridagi Departamentning Quvasoy shahri bo‘limi va boshqa huquqni muhofaza qiluvchi organ xodimlari hamkorligida nazorat tadbiri o‘tkazildi.
Unda «P.F.» MChJ mas’ul shaxslari MChJga qarashli umumiy ovqatlanish shoxobchasida umumiy foydalanishdagi tabiiy gaz tarmog‘iga tijorat maqsadida o‘zboshimchalik bilan ulanib, 903,6 mln so‘mlik tabiiy gazdan noqonuniy foydalanganliklari aniqlangan.
Shuningdek, Departamentning Farg‘ona viloyati boshqarmasi tomonidan o‘tkazilgan tergovga qadar tekshiruvda «A.Y.» MChJ rahbari M.J. Qo‘shtepa tumani,«Qumtepa» MFY hududidagi umumiy ovqatlanish shoxobchasida umumiy foydalanishdagi elektr tarmog‘iga tijorat maqsadida to‘g‘ridan-to‘g‘ri ulanib, 264,5 mln so‘mlik elektr energiyasidan noqonuniy foydalanganligi aniqlangan.
Shu kabi, Departamentning Sergeli tuman bo‘limi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda fuqaro D.R.«Ziyolilar» MFY hududidagi xonadonda ishlab chiqarish sexida umumiy foydalanishdagi elektr tarmog‘iga tijorat maqsadida to‘g‘ridan-to‘g‘ri ulanib, 248,6 mln so‘mlik elektr energiyasidan noqonuniy foydalanganligi aniqlangan.
Departamentning Yangibozor tuman bo‘limi tomonidan o‘tkazilgan tergovga qadar tekshiruvda fuqaro G‘.A.«Obod» MFY hududidagi xonadonda umumiy foydalanishdagi tabiiy gaz tarmog‘iga o‘zboshimchalik bilan ulanib, 147,3 mln so‘mlik tabiiy gazdan noqonuniy foydalanganligi aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) va 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda
Amerikalik kardiolog Brett A. Silavening so‘zlariga ko‘ra, zaytun yurak salomatligini yaxshilashi mumkin.
U tadbirkor va teleboshlovchi Marta Styuartning veb-saytida mahsulotning nozik foydalari haqida suhbatlashdi.
Shifokor zaytunni ratsionga qo‘shishni tavsiya qildi, chunki uning tarkibidagi yog‘lar, ayniqsa olein kislotasi xolesterin miqdorini tartibga solishi mumkin: ular past zichlikdagi lipoprotein darajasini pasaytiradi va yuqori zichlikdagi lipoprotein darajasini oshiradi.
Olein kislotasi shuningdek, organizmda xavfli tizimli yallig‘lanish xavfini kamaytiradi, bu esa xolesterin plakalarining paydo bo‘lishiga va qon tomirlarining elastikligini pasayishi, qon bosimining oshishi va yurak muammolari kuchayishining oldini oladi.
Kardiolog zaytun tarkibida tola va antioksidantlar kabi yurak uchun foydali boshqa ozuqaviy moddalar ham borligini ta’kidladi.
«Va nihoyat, zaytun tarkibida qizil qon tanachalarining barqaror ishlashini ta’minlaydigan temir va yurak salomatligi va immunitetni qo‘llab-quvvatlaydigan mis mavjud», deb xulosa qildi Silave.
Urgut tumanining «Bahrin» mahallasida joylashgan 21-sonli «Navoiy» oilaviy poliklinikasi kapital rekonstruksiyadan so‘ng mutlaqo yangi qiyofa kasb etdi.
O‘zbekiston Prezident Administratsiyasi rahbari Saida Mirziyoyeva Samarqand viloyatiga tashrifi doirasida mazkur tibbiyot maskanida amalga oshirilgan keng ko‘lamli qurilish va ta’mirlash ishlari, aholiga sifatli xizmat ko‘rsatish uchun yaratilgan sharoitlar bilan tanishdi.
Loyiha doirasida poliklinikaning mavjud binosi to‘liq yangilanib, unga qo‘shimcha bino hamda zamonaviy talablarga javob beradigan 20 o‘rinli yangi tug‘ruq bo‘limi qad rostladi.
Mazkur yangilanishlar hududdagi 13 mingdan ziyod aholining tibbiy ehtiyojlarini to‘laqonli qondirishga qaratilgan. Hozirda yangi binolarni zamonaviy tibbiy jihozlar va qo‘shimcha zarur anjomlar bilan to‘liq ta’minlash ishlari jadal olib borilmoqda.
Ushbu maskanning foydalanishga topshirilishi nafaqat «Bahrin», balki unga tutash mahallalar aholisi uchun ham sifatli tibbiy xizmatdan bahramand bo‘lish imkoniyatini kengaytirdi.
«Bahrin»da istiqomat qiluvchi Javlon Xaydarovning xonadoni tomorqadan unumli foydalanish va oilaviy tadbirkorlikni yo‘lga qo‘yishda namuna bo‘lib kelmoqda.
Prezident Administratsiyasi rahbari Saida Mirziyoyeva Samarqand viloyatiga tashrifi davomida ushbu xonadon faoliyati bilan yaqindan tanishib, yerdan oqilona foydalanish borasidagi namunali tajribani ko‘zdan kechirdi.
0,38 gektar maydonga ega bo‘lgan ushbu tomorqada chorvachilik va parrandachilik tarmoqlari tizimli tashkil etilib, bugungi kunda 15 ta qoramol, 21 ta qo‘y va 2 500 ta tovuq parvarishlanmoqda. Shuningdek, bir yilda 2-3 marotaba hosil olish yo‘lga qo‘yilgan bo‘lib, tomorqada 7 turdagi poliz mahsulotlari yetishtirilmoqda.
Mazkur serqirra faoliyat natijasida xonadon egalari yiliga 300-350 million so‘m miqdorida barqaror daromad olishga muvaffaq bo‘lmoqdalar. Muhimi, ushbu kichik xo‘jalik nafaqat oilaning iqtisodiy farovonligini ta’minlamoqda, balki 4 nafar fuqaroning ish bilan bandligini ham tashkil etgan.
Tashrif davomida Javlon Xaydarovning mehnatsevarligi va yerning har bir qarichidan unumli foydalanish borasidagi yondashuvi aholi farovonligini oshirishda o‘ziga xos tajriba maktabi ekanligi ta’kidlandi.
Toshkent shahridagi tuman elektr tarmoqlari korxonasining ikki nafar muhandisi pora bilan qo‘lga tushdi.
Muhandislar tijorat banklaridan birining binosida elektr hisoblagich noto‘g‘ri ulangani va elektr sarfi xato hisoblanayotgani haqida dalolatnoma rasmiylashtirishgan. Ular ushbu dalolatnoma bo‘yicha 400 mln so‘m jarima hisoblashgan va uni 65 mln so‘mga tushirib berish evaziga MChJ rahbaridan 8 ming dollar talab qilishgan.
DXX Toshkent viloyati bo‘yicha boshqarmasi va Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbirda, muhandislar so‘ralgan pulni uchinchi shaxs orqali olayotgan vaqtida ushlangan.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Toshkent shahrida elektr tarmoqlari korxonasining ikki nafar muhandisi katta miqdordagi jarimani kamaytirib berish evaziga pora talab qilgan vaqtda qo‘lga olindi.
Toshkent shahri tumanlaridan birida faoliyat yurituvchi elektr tarmoqlari korxonasining 2 nafar muhandisi tijorat bank filiali binosida o‘rnatilgan elektr hisoblagichni tekshirish jarayonida qonunbuzilish holatini aniqlagan.
Ma’lum bo‘lishicha, elektr hisoblagich tarmoqqa noto‘g‘ri sxema orqali ulangani sabab elektr energiyasi hisob-kitoblari xato yuritilayotganligi qayd etilgan. Shu asosda ular tomonidan 400 mln so‘m miqdorida jarima hisoblangan.
Biroq muhandislar elektr hisoblagichni tarmoqqa ulagan mas’ul MChJ rahbariga ushbu jarimani 65 mln so‘mga tushirib berishni va’da qilib, evaziga 8 ming AQSh dollari talab qilgan.
Davlat xavfsizlik xizmatining Toshkent viloyati bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbirda muhandislar so‘ralgan pul mablag‘ini uchinchi shaxs orqali olgan vaqtda qo‘lga olindi.
Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.
Fuqarolardan shu kabi qonunbuzilish holatlariga duch kelganda 1520 qisqa raqami orqali xabar berish so‘raldi. Shaxs sir saqlanishi kafolatlanadi.
Farg‘onadagi kafeda salkam 1 mlrd so‘mlik gaz o‘g‘irlangani aniqlandi
Nodirbek Abdusattorov — yarim final ostonasida
Shavkat Mirziyoyev Turkiya bilan mudofaa sohasidagi hamkorlikni kengaytirishni ko‘rib chiqmoqda
-
Siyosat4 days agoSaida Mirziyoyeva xalqaro forumda Prezident murojaatini o‘qib eshittirdi
-
Siyosat5 days agoSamarqandda narkotiklarning transmilliy tahdidlariga qarshi kurash bo‘yicha xalqaro forum bo‘lib o‘tmoqda
-
Siyosat5 days agoGiyohvand moddalar savdosini moliyaviy tomirlarni kesish orqali to’xtatish mumkin.
-
Siyosat4 days agoHukumat mehnat muhojirlariga til oʻrgatish va malaka olish xarajatlari uchun kompensatsiya toʻlashi kerak
-
Siyosat3 days agoPrezident Shavkat Mirziyoyev JSST bosh direktorini qabul qildi
-
Siyosat3 days agoPrezident Mirziyoyev mintaqaviy sammitda yashil savdo yoʻlaklari va yagona iqlim investitsiya strategiyasini taklif qildi
-
Dunyodan4 days ago
Prezident Tramp Eron rahbariyati bilan uchrashishga tayyorligini ma’lum qildi
-
Iqtisodiyot2 days ago
Markaziy bank: 24-aprelda dollar pasayadi