Ikkita Call-markaz’da chet tillarini yaxshi biladigan 140 nafarga yaqin yigit-qizlar faoliyat yuritgan. Ular orasida talabalar ham bor. Call-markaz xodimlari chet davlatlar fuqarolariga soxta raqamlar orqali qo‘ng‘iroq qilib, treyderlik niqobida investitsiya tariqasida kriptoaktivlarni o‘tkazma qilishga erishgan. Ularning har biri kuniga yuzlab qo‘ng‘iroqni amalga oshirgan.

IIV Kiberjinoyatlarga qarshi kurashish departamenti hamda Davlat xavfsizlik xizmati tomonidan yirik jinoiy tarmoq faoliyatiga chek qo‘yildi. Bu haqda IIV matbuot xizmati xabar berdi.

Ma’lum qilinishicha, tezkor tadbirlar davomida Toshkent shahrida ikkita yirik Call-markaz fosh etilgan.

Jumladan, Yashnobod tumanida joylashgan biznes markazlardan birining 6-qavatida o‘tkazilgan tintuv-tergov tadbirlari davomida binoga joylashib olgan Call-markaz’da jami 97 nafar shaxs aniqlangan. Ularning 5 nafari chet el fuqarolari.

Tezkor tadbirlar Yakkasaroy tumanida ham davom ettirilgan. Biznes markaz binosining 11-qavatidagi Call-markaz’da 34 nafar shaxs faoliyat olib borayotgani, ularning 3 nafari esa chet el fuqarolari ekani aniqlandi.

Call-markaz’larda boshqaruvchi, tashkilotchi, yordamchi, jamoa sardorlari va operatorlar bo‘lgan. Ular oyiga 70 foizgacha daromad orttirishga qiziqtiruvchi kontentlar aks etgan fishing havolalar tayyorlab, Kanada, Buyuk Britaniya, Germaniya, Norvegiya, Gollandiya, Daniya va boshqa xorijiy davlatlar fuqarolariga soxta raqamlar orqali qo‘ng‘iroq qilishgan hamda treyderlik niqobi ostida investitsiya tariqasida kriptoaktivlarni o‘tkazma qilishga erishgan.

Markazlardagi xodimlar orasida chet tillarni mukammal biladigan yoshlar, nufuzli universitet talabalari ham bo‘lgan. Ularning har biri kuniga yuzlab qo‘ng‘iroqlarni amalga oshirgan. Xodimlar chet el fuqarolari bilan taxalluslar orqali suhbatlashgan. Binoga kirish qat’iy nazorat ostida amalga oshirilib, maxsus qo‘riqchilar eshik oldida doimiy faoliyat olib borgan.

O‘tkazilgan tezkor tadbir davomida ikki manzildan uyushgan guruh jinoiy harakatlarni amalga oshirishda foydalangan 136 ta kompyuter, 90 ta monitor, 73 ta protsessor, 53 ta monoblok, 320 ta telefon, 128 ta qattiq disk, 175 ta xotira qurilmasi, ikkita seyf va boshqa turdagi vositalar hujjatlashtirib olingan.

Ushbu sxemani chet el fuqarosi tashkil etgan. U mamlakatdagi noqonuniy faoliyatini 48 yoshli O‘zbekiston fuqarosi bilan hamkorlikda amalga oshirgan.

Hozirda holat yuzasidan jinoyat ishi qo‘zg‘atilgan. Jinoiy uyushmaning ikki rahbari va yana 18 kishi qamoqqa olingan. Qolgan 111 nafar shaxs bilan tezkor surishtiruv va tergov ishlari olib borilmoqda.

Qayd etilishicha, tezkor surishtiruv jarayonida ushbu jinoiy guruhning Rossiya, Gruziya, Ukraina va Ozarbayjonda ham Call-markaz’lari faoliyat olib borayotgani aniqlangan. Kelgusida mazkur davlatlar bilan hamkorlikda global miqyosdagi jinoyat zanjiriga barham berish rejalashtirilgan.

Source link

Hukumat qarori bilan “Ro‘yxatga olinmagan qurolni va uning o‘q-dorilarini, o‘qotar qurolning asosiy qismlarini, portlovchi materiallarni va portlatish qurilmalarini ichki ishlar organlariga o‘z ixtiyori bilan topshirish hamda qurolni va uning o‘q-dorilarini topshirganlik uchun taqdirlash tartibi to‘g‘risida”gi nizom tasdiqlandi.

Foto: Davlat bojxona qo‘mitasi

Nizomga ko‘ra, jismoniy shaxs yoki yuridik shaxsning rahbari:

ro‘yxatga olinmagan qurol va uning o‘q-dorilarini, o‘qotar qurolning asosiy qismlarini, portlovchi materiallarni va portlatish qurilmalarini o‘z ixtiyori bilan topshirish to‘g‘risida qarorga kelsa;

uning o‘zi ushbu ashyolarni topshirish haqida ichki ishlar organlariga yozma yoki og‘zaki ravishda murojaat qilsa, mazkur shaxs ashyolarni o‘z ixtiyori bilan topshirgan hisoblanadi.

Ariza beruvchi o‘zining yashash (turar) joyi bo‘yicha ichki ishlar organiga murojaat qiladi.

Ariza beruvchi tomonidan topshirilayotgan qurol qismlarga bo‘laklangan, patronlari olingan, shuningdek, qurol va uning o‘q-dorilari, o‘qotar qurolning asosiy qismlari begona shaxslarning ko‘rish imkoniyatini istisno etadigan o‘ramga joylashtirilgan bo‘lishi lozim.

Mintaqaviy texnik komissiya tomonidan quyidagi qarorlardan biri qabul qilinadi:

pul mukofoti bilan taqdirlash yoki taqdirlashni rad etish;

o‘qotar qurolni va uning o‘q-dorilarini imtiyozli olish huquqini berish yoki berishni rad etish.

O‘z ixtiyori bilan topshirilgan qurol va uning o‘q-dorilari uchun pul mukofoti Qoraqalpog‘iston Respublikasi Ichki ishlar vazirining, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari boshlig‘ining buyrug‘i asosida beriladi.

Eslatib o‘tamiz, qonunchilikka ko‘ra, o‘qotar qurollar, o‘q-dorilar va portlovchi moddalarni ixtiyoriy ravishda huquqni muhofaza qiluvchi organlarga topshirgan shaxslar javobgarlikdan ozod etiladi.

Source link

2025-2026 o‘quv yili boshida O‘zbekistondagi oliy ta’lim tashkilotlarida 1 million 535 ming nafar talaba tahsil olmoqda. Hududlar kesimida eng ko‘p talabalar Toshkent shahri hissasiga to‘g‘ri keladi.

Milliy statistika qo‘mitasi ma’lumotlariga ko‘ra, 2025-2026 o‘quv yili boshida respublikadagi oliy ta’lim tashkilotlarida tahsil olayotgan talabalar soni 1 million 535 ming nafarni tashkil etgan.

Shundan 1 million 478,7 ming nafari bakalavriat, 56,3 ming nafari esa magistratura bosqichida tahsil olmoqda.

Hududlar kesimida eng ko‘p talabalar Toshkent shahrida qayd etilgan bo‘lib, ularning soni 579,3 ming nafarni tashkil etadi.

Undan keyingi o‘rinlarda Buxoro viloyati (117,7 ming nafar), Qashqadaryo viloyati (111,6 ming nafar), Toshkent viloyati (101,5 ming nafar), Farg‘ona viloyati (98,9 ming nafar) va Samarqand viloyati (93,9 ming nafar) joylashgan.

Shuningdek, Surxondaryo viloyatida 76,2 ming, Qoraqalpog‘iston Respublikasida 73,7 ming, Xorazm viloyatida 65,9 ming, Andijon viloyatida 65,7 ming, Namangan viloyatida 52,5 ming, Navoiy viloyatida 42,5 ming, Jizzax viloyatida 32,4 ming va Sirdaryo viloyatida 23,2 ming talaba tahsil olmoqda.

Source link

Serbiyada og‘ir moddiy ahvolga tushib qolgan O‘zbekiston fuqarosiga yurtga qaytishi uchun bepul aviachipta olib berildi. Amaliy yordam O‘zbekistonning Budapeshtdagi elchixonasi ko‘magida tashkil etildi.

«Dunyo» axborot agentligi ma’lum qilishicha, O‘zbekistonning Budapeshtdagi elchixonasi Konsullik bo‘limiga Serbiyada bo‘lib turgan fuqaro M.B. vatanga qaytishda yordam so‘rab murojaat qilgan.

Aniqlanishicha, fuqaroning og‘ir ahvolga tushib qolishiga Serbiyadagi ish beruvchi tomonidan mehnat shartlari va erishilgan kelishuvlarga amal qilinmagani sabab bo‘lgan. Buning oqibatida u moddiy qiyinchilikka duch kelib, O‘zbekistonga mustaqil ravishda qaytish imkoniyatini yo‘qotgan.

Elchixona tomonidan ko‘rilgan choralar va o‘zaro kelishuvlar natijasida O‘zbekiston fuqarolarini qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan vatandoshga bepul aviachipta rasmiylashtirib berilgan.

Qayd etilishicha, O‘zbekistonning xorijdagi diplomatik vakolatxonalari va konsullik muassasalari chet elda bo‘lib turgan fuqarolarning huquq va qonuniy manfaatlarini himoya qilish, shuningdek, zarur huquqiy va amaliy yordam ko‘rsatish ishlarini izchil davom ettirmoqda.

Source link

Toshkent shahrining Chilonzor tumanida Lacetti rusumli avtomashina ishtirokida yo‘l-transport hodisasi sodir bo‘ldi. Dastlabki ma’lumotlarga ko‘ra, haydovchi quvib o‘tish qoidasini qo‘pol ravishda buzishi oqibatida transport vositasi boshqaruvdan chiqib ketgan.

Toshkent shahar IIBB YHXB axborot xizmati ma’lum qilishicha, hodisa joriy yilning 18 iyun kuni soat 18:30 atrofida Chilonzor tumanidagi Bunyodkor shohko‘chasida sodir bo‘lgan.

Qayd etilishicha, Lacetti rusumli avtomashina haydovchisi quvib o‘tish qoidalarini qo‘pol ravishda buzib, rul boshqaruvini yo‘qotgan. Natijada avtomobil yo‘lni ikkiga ajratib turuvchi beton to‘siqqa chiqib ketib, yo‘lni yoritish chiroq ustuniga urilgan.

Hozirda mazkur yo‘l-transport hodisasi yuzasidan Toshkent shahar IIBB YHXB mas’ul xodimlari tomonidan surishtiruv harakatlari olib borilmoqda.

YHXB haydovchilarni yo‘l harakati qoidalariga qat’iy rioya qilishga chaqirib, bu kabi qoidabuzarliklar og‘ir oqibatlarga olib kelishi mumkinligini eslatdi.

Source link