Sport
Portugaliyadan Vladivostokkacha velosipedda kelgan fransuzni Rossiya hibsga oldi
Yevroosiyoni velosipedda eng tez kesib o‘tish bo‘yicha jahon rekordini yangilashga uringan fransiyalik Sofian Sehili Vladivostokda hibsga olindi. Bu haqda o‘z manbalariga asoslanib Le Monde xabar berdi.
Sehili chegarani noqonuniy kesib o‘tishda ayblanmoqda, deb yozdi nashr.
Sehili 44 yoshda. U hujjatli filmlar ijodkori bo‘lgan, 2012-yilda kasbini velosportga o‘zgartirgan. O‘shandan buyon u 20 ga yaqin ko‘p kilometrlik poygalarda qatnashib, ularning 11 tasida g‘alaba qozondi. Ular orasida Kanada va Meksikadan 4 500 kilometrga cho‘zilgan Tour Divide poygasi ham bor.
Iyun oyi o‘rtalarida Sehili o‘zining instagram-sahifasida 2017-yilda Yevroosiyoni velosipedda eng tez bosib o‘tib rekord o‘rnatgan germaniyalik Yonas Deyxmanning rekordini yangilashni orzu qilayotganini yozgan edi. Va u olis hamda mashaqqatli safarga otlanib, Portugaliyaning Roka burnidan Vladivostokkacha 64 kun, ikki soat va 26 daqiqada yetib bordi.
Sehili velosayohatga 2025-yil 1-iyulda Portugaliyadan jo‘nab ketdi. U Instagramdagi postlaridan ma’lum bo‘lishicha, u birinchi marta iyul oyi oxirida Chechenistonga Gruziya orqali kirib, Rossiya chegarasini kesib o‘tgan. U Rossiyani Astraxan viloyati orqali tark etib, Qozog‘iston, Tojikiston va Mo‘g‘uliston hududlari bo‘ylab sayohatni davom ettirgan.
Xitoyda Sehili o‘z sayohatini to‘xtatdi, deb yozdi Le Monde.
Sofian Sehili
«Marra juda yaqin qolganida muvaffaqiyatsizlikka uchrash yurakni ezadi. Endi menda yana rekordni yangilash uchun urinib ko‘rishni xohlash-xohlamasligimni hal qilish uchun o‘n oy vaqt bor… yoki bu abadiy muvaffaqiyatsizlik bo‘lib qoladi», — deb yozdi Sehili.
U 2-sentyabr kuni Instagramdagi storisida Xitoy-Rossiya chegarasida Rossiya bojxonachilari tomonidan to‘xtatilganini ma’lum qilgan.
Sehili bilan keyin nimalar bo‘lganini uning yozganidan bilish qiyin.
Le Monde xabariga ko‘ra, Fransiya konsulligi velosayohatchiga yordam berishga harakat qilmoqda. Rossiya hukumati esa Sehilining hibsga olingani haqidagi xabarlarga hozircha izoh bermadi.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
